SWINE FLUE DAPAT SUGPUIN – NOGRALES

Rep Juan Fidel Nograles-3

Dapat magkaisa sa pagsugpo ng swine flu ang lahat ng nagmamay-ari ng babuyan at nag-aalaga ng baboy sa Montalban (Rodriguez) upang matiyak na hindi kakalat ang swine disease bagamat kinukumpirma pa lamang ang ulat.

Sinuportahan ni Congressman Juan Fidel Nograles, kinatawan ng Ikalawang Distrito ng Rizal ang pagkilos ng Bureau of Animal Industry (BAI) ng Department of Agriculture (DA), sa pakikipagtulungan ng pamahalaang lokal at iba pang ahensiya na naatasang i-monitor at gumawa ng kaukulang aksiyon upang mabilis na masugpo ang banta ng posibleng sakit sa baboy.

“Habang hindi pa kinukumpirma ng DA ang sanhi ng pagkamatay ng mga baboy, mas mabuting sundin ng hog farmers ang direktiba ng DA-BAI tungkol sa usaping ito,” pahayag ni Nograles.

Kasabay nito, umapela si Nograles sa mga nagmamay-ari ng swine farm sa kanyang distrito na sumunod sa mga patakarang ipinatutupad ng DA, partikular na sa tatlong barangay ng Montalban na kinabibilangan ng Macabud, San Isidro at San Jose na isinailalim na sa quarantine dahil sa napaulat na pagdami ng namamatay na baboy rito.

Inaasahang lalabas ang resulta ng pagsusuring isinagawa ng DA sa loob ng dalawang linggo.

“Prayoridad natin ngayon na maiwasan ang pagkalat ng kung anumang dahilan ng pagkamatay ng mga alagang baboy sa ilang bahagi ng Montalban,” dagdag pa ng mambabatas.

Batay sa obserbasyon ng mga apektadong backyard swine farmers, walang ganang kumain, matamlay, nagsusuka, may pagdurugo ng balat, nangingitim ang kulay ng mga paa, at biglaang namamatay ang kanilang mga alaga.

Nagpatupad ng “one-seven-ten” policy nitong nakalipas na linggo sa mga apektadong lugar kung saan lahat ng baboy sa loob ng 1-kilometer radius ay bawasan o katayin, samantalang yung nasa 7 at 10-kilometer radius ay mahigpit na i-monitor.

“Sa maraming rehiyon ng bansa, ang CALABARZON ang pumapangalawa sa may pinakamataas na produksiyon ng baboy. Kung ang pagdurusang ito ay hahayaan nating kumalat pa sa ibang bayan, maging sa iba pang probinsiya sa rehiyon, ito ay magiging isang malaking dagok sa industriya ng babuyan,” mariing pahayag ng mambabatas.

Dagdag pa ni Nograles, “Ang ating mga karatig bayan at lalawigan ay umaasa sa ating distrito na gagawa ng hakbang upang mapigil o limitahan ang perwisyo na dulot ng nasabing sakit.”

Noong 2018, ang kabuuang laki ng hog production sa bansa ay 2,319,764 metric tons, kung saan ang total volume ng produksiyon ng baboy sa CALABARZON ay umabot ng 381,590 metric tons at ang total volume ng hog production sa lalawigan ng Rizal ay umabot sa 89,576 metric tons.

Ang livestock industry sa kasalukuyan ay nakaranas ng positibong paglaki o pag-unlad. Noong nakaraang taon, ang gross value ng hog production sa katumbas na presyo nito ay P268 billion, 10.8% na mas mataas sa gross value ng hog production na P241.9 noong 2017.

Please follow and like us:
Read More