ZAMBALES-OLONGAPO TUTUTUKAN SA JUETENG 

jueteng 12

(NI JG TUMBADO)

MAS paiigtingin pa ang pagbabantay ng Philippine National Police (PNP) laban sa pamamayagpag ng ilegal na sugal sa bansa, partikular ang jueteng.

Ito’y matapos tanggalin na rin ni Pangulong Rodrigo Duterte ang suspensiyon ng operasyon ng Small Town Lottery (STL) sa bansa.

Ayon kay PNP Spokesperson Police Brigadier General Bernand Banac, batid nilang ginagamit na front ng jueteng ang STL kaya mas matinding monitoring ang kanilang gagawin at huhulihin ang mga masasangkot dito.

Kasabay nito, sinabi ni Banac na mananatili pa rin ang kanilang “one strike policy” sa kampanya kontra illegal na sugal, partikular sa jueteng.

Sa ilalim ng one-strike policy, ang chief of police, precinct commander at station commander ay agad na sisibakin sa puwesto kapag namayagpag ang jueteng sa kanilang lugar.

Sakaling  tatlong chief of police ang nasibak sa isang probinsya dahil sa jueteng operations ay saka naman masisibak ang provincial director.

Kabilang sa ngayon na mahigpit na babantayan ng pambansang pulisya ang lalawigan ng Zambales kung saan sa kabila ng pagpapatigil noon ng Pangulo sa operasyon ng STL ay patuloy na namayagpag sa mala-‘guerrilla’ operations.

Base sa intel report ng pulisya, nasa P1.5 million kada araw ang nakukubra sa nabanggit na jueteng operation sa lugar na pinapatakbo ng isang alyas ‘Arnel’.

Habang ang Olongapo City naman ay pinatatakbo ng isang nagngangalang ‘Etchy’ na umano’y kasalukuyang kapitan ng barangay na tumatabo ng halos P2 milyon kada araw.

Please follow and like us:
Read More

DALANGIN NG BAYAN, IBALIK ANG STL

STL-4

Mahirap walang pagkain sa mesa

(Ni Jun V. Trinidad / Huling labas)

NGUNIT may ilan din namang STL kubradores na pilit lumalaban sa kabila ng desperasyon sa biglang pagkawala ng legal na hanapbuhay.

“Sa hirap ng buhay ngayon, hindi dapat umasa lang sa pangungulekta ng taya para makaraos sa 24 oras. Kailangang humanap din ng ibang pagkakakitaan,” katwiran ni Maria Sheila Sarguilla, 53, isa sa mga dating kubrador ng loterya na nawalan din ng trabaho.

Pinagkakaabalahan ngayon ni Sarguilla ang pagbebenta ng iba’t ibang kakanin sa bangketa – mainit na sopas, pansit, tinapay, puto, suman, macaroni atbp – sa tapat ng kanilang bahay sa isang subdibisyon sa Lucena City.

Malaking dagok din aniya sa kaniya ang pagtigil ng STL.

“Bahagi ng badyet ko ang nasa P5,000 kita ko sa pangungubra sa isang buwan. Bukod pa ang balato kapag may patama,” ang pagtatapat ni Sarguilla, isang single parent na bumubuhay sa tatlo pa niyang anak, ang bunso ay nasa kolehiyo.

Isa pang kubrador ng loterya ang tumatanggap ngayon ng paglalaba at pamamalantsa para may pagkakitaan.

“Mahirap ang walang pagkain sa lamesa. Hindi dapat maging pihikan sa trabaho kahit na gaano man ito kahirap. Mas lalong mahirap ang matulog ng gutom,” ang natatawang paliwanag ni Lolita Marquez, 65,

Ayon sa report ng pulisya sa lalawigan ng Quezon, may ilang mga kubradores ng STL na nawalan ng trabaho ang napapasangkot sa mga gawaing labag sa batas partikular ang pagbebenta ng iligal na droga pagkatapos na tumigil ang bola ng STL.

Sa gitna ng ganitong sitwasyon ay nagpasa ng resolusyon ang Sangguniang Panglalawigan nitong nakaraang linggo na humihiling kay Pangulong Duterte na muling buksan ang operasyon ng STL.

Ayon kay Senior Board Member Isaias Ubana, wala umanong record ang Pirouette Corp., ang operator ng STL sa lalawigan ng Quezon, na nagpapakitang nandadaya ito sa pamahalaan sa loob ng 13 taon nitong pagpapatakbo ng loterya.

“Inasahan ko po na matapos ang isinasagawang imbestigasyon ay malilinis ang pangalan nito (Pirouette) at maibabalik na ang operasyon ng STL upang maiwasan din ang posibilidad na pagbabalik ng operasyon ng jueteng,” ang pahayag ni Ubana sa kanyang privilege speech noong August 5.

Ang kanyang isinulong na resolusyon na nagpapahayag din ng suporta sa kampanya ni Pangulong Duterte laban sa iligal na sugal at korapsyon ay sinuportahan ng buong kasapi ng Sangguniang Panglalawigan.

Please follow and like us:
Read More

PANGUNGUBRA SA STL, MARANGAL NA TRABAHO

STL-3

(Ni Jun V. Trinidad / Ikaapat na bahagi)

BATAY sa impormasyon ng pulisya, kadalasan umano ay may koneksyon sa mga lokal na opisyal ang mga nagpapatakbo ng “bookies” sa kanilang mga lugar o kung hindi man ay ang mismong nanunungkulan sa munisipyo ang operator ng bawal na sugal.

“Sa ganitong sitwasyon, hindi mahirap para sa sinumang gustong bumangka sa jueteng ang muling simulan ang iligal na sugal. Bukod pa rito, may nakahanda na silang batalyon ng mga STL kubradores na nawalan ng trabaho para ­mangulekta ng taya para sa kanila,” ang paliwanag ni Marta.

Ngunit inamin ng dalawang kubrador ng STL na magpapatuloy sila sa kanilang pagdadasal at panawagan kay Pangulong Duterte na muling ibalik ang operasyon STL.

“Kahit na may naghihintay sa aming trabaho sa jueteng ay mas gusto namin ang STL. Kahit papaano, dahil legal ang STL, may respeto sa amin ang lipunan,” ang paliwanag ni ­Aling Teresa.

“Marangal na trabaho”

Kuwento nga niya, noong kubrador pa siya ng jueteng ay halos itinatago ng kanyang anak ang klase ng kanyang hanapbuhay.

“Sa iskul, hindi niya binabanggit na kubrador ako ng jueteng kapag nagtatanong ang kanilang titser kung ano ang trabaho ng magulang nya. Pero ngayon, nakataas pa ang noo nila na sasabihin na empleyado ako ng Pirouette Corp bilang sales collector. Marangal kasing trabaho,” ang paliwanag ng kubrador kasabay ng bunghalit ng malakas na tawa.

Inamin ng dalawa na malaki ang nagawang pagbabago ng STL sa kanilang buhay.

Umaabot umano sa P12,000 hanggang P15,000 ang kanilang regular na buwanang kita sa araw-araw kapag masipag sa pangungulekta ng taya at hindi pa kasama ang balato at komisyon sa patama.

Batay sa kanilang karanasan, kapag kilalang maswerteng magpataya ang isang kubrador dahil madalas na magpatama, mas maraming tumataya.

“Yung TV at ref ko sa bahay ang nabili ko mula sa ­balato ng mga pinatama ko,” ang masayang kuwento ng kubrador.

Pero ngayong nakahinto ang operasyon ng STL, patuloy anila silang magdadasal at aasa sa muling pagbabalik ng legal na sugal.

“Sana ay tapusin na ni Presidente ang imbestigasyon at parusahan ang mga korap sa PCSO. Pati kaming maliliit na kubradores ay nadadamay sa kanilang katakawan sa pera,” ang galit na pitik ni Marta.

Wala pang katiyakan kung kailan muling pahihintulutan ng Malakanyang ang operasyon ng STL.

Patuloy na nagsasagawa nang imbestigasyon ang National Bureau of Investigation (NBI), Presidential Anti-Corruption Commission (PACC) at iba pang ahensya ng gobyerno bilang pagsunod sa direktiba ni Pangulong Duterte na linisin ang PCSO.

Maging ang Kongreso at Senado ay may ikinakasa rin na katulad na imbestigasyon upang alamin ang ugat ng korapsyon sa PCSO, kung gaano ito kalawak at kung sino-sino ang mga kasangkot.

Sa huling ulat ay tinatayang nasa 13 hanggang 20 opisyal ng PCSO ang sumasailalim na sa “lifestyle check” ng PACC.

Please follow and like us:
Read More

PAGLAGANAP MULI NG JUETENG TUTUTUKAN

(NI NIC ECHEVARRIA)

MAHIGPIT na binabantayan ngayon ng  Philippine National Police (PNP) ang paglago ng operasyon ng sugal na jueteng matapos ipasara ng Pangulong Rodrigo Duterte ang lahat ng gaming outlets ng Philippine Charity Sweepstakes Office (PCSO).

Sinabi ni PNP Chief General Oscar Albayalde sa press conference sa Camp Crame nitong Lunes, na hindi nila inaalis ang posibilidad na muling maglabasan ang mga illegal numbers game sa bansa partikular ang jueteng.

Ayon kay Albayalde kasalukuyan na nilang minomonitor ang mga intelligence report na kanilang natatanggap kaugnay  sa muling pagbuhay ng operasyon ng jueteng sa dalawang lalawigan sa Central Luzon, isang araw matapos ang closure order ng pangulo sa mga gaming operations ng PCSO.

Bagamat wala pa namang naaarestong sangkot sa mga illegal numbers game mahigpit ang utos ni Albayalde sa kanyang mga police commanders na ipagpatuloy ang kanilang kampanya laban sa nasabing ilegal na mga sugal.

Pinatitiyak ng PNP Chief sa lahat ng mgal police commanders na hindi dapat lumaganap ang jueteng habang suspendido ang operasyon ng mga laro ng PCSO..

Babala ni Albayalde na aarestuhin nila ang sinumang mahuhuling sangkot sa operasyon ng mga illegal numbers game, lalo na ang jueteng.

Sa kasalukuyan umaabot na sa 30,284 na mga Lotto, Small-Town Lottery (STL), Peryahan Ng Bayan at Keno outlets ang naipasara na ng PNP bilang pagsunod sa kautusan ng presidente.

Wala naman umanong naitalang resistance ang PNP mula sa mga may-ari ng mga outlets na kanilang ipinasara, kung saan ang iba aniya ay boluntaryo ng nagsara.

Please follow and like us:
Read More

8-K TRABAHADOR NG STL SA N. COTABATO, JOBLESS

north cotabato 12

(NI BONG PAULO)

KIDAPAWAN CITY – Nasa 8,000 na trabahador ang nawalan ng trabaho simula Sabado ng umaga matapos ipasara ng Cotabato Police Provincial Office ang Small Town Lottery Outlet sa Quezon Boulevard, Kidapawan City. Mismong si Provincial Director Police Colonel Maximo Layugan ang nanguna sa pagpapasara sa nasabing outlet.

Ang hakbang ay ginawa ng CPPO matapos ipinatigil ni Pangulong Rodrigo Duterte ang operasyon ng Lotto, Small Town Lottery (STL), Keno, Peryahan ng Bayan at lahat ng gaming operation o scheme na may lisensya o prangkisa mula sa Philippine Charity Sweepstakes Office (PCSO).

Sa kanyang mensahe na inilabas ng PCOO Biyernes ng gabi, sinabi ng Pangulo na ang malawakang korapsyon ang dahilan kaya niya ipinahinto ang operasyon ng PCSO games.

Partikular na iniutos ng Pangulo na tigil-operasyon ang lahat ng lotto games, Keno, STL, Peryahan ng Bayan at ibang pang nasa ilalim ng PCSO.

Kasabay nito ay inutusan ng Pangulo ang Philippine National Police (PNP) at Armed Forces of the Philippines (AFP) na ipatupad ang kanyang direktiba at arestuhin ang mga magpapatuloy ng operasyon o lalabag sa kanyang utos.

Samantala,  una na ring inianunsiyo ni dating vice mayor Rodolfo Gantuangco ang operator ng small town lottery sa probinsiya na pinamamahalaan ng miracle pick gaming station na inihinto nila ang operasiyon kasabay ng utos ng Pangulo.

Dahil dito, libong katao na ang nawalan ng trabaho na umaasa lamang sa porsiyento sa pagpapataya ng number games para sa kanilang hanapbuhay araw araw.

Bukod sa main office ng STL sa Kidapawan City ay ipinasara rin ang ilan pang mga yellow booth ng STL sa Makilala, Antipas, President Roxas, Kabacan, Matalam, Mlang, Tulunan, Magpet at Arakan.

 

Please follow and like us:
Read More

LOTTO OUTLETS INIISA-ISA NANG ISINASARA

(NI MAC CABREROS)

BILANG pagtalima sa direktiba ni Pangulong Rodrigo Duterte, sinuyod ng Eastern Police Districtang mga lotto outlets sa Lungsod ng Pasig, Marikina, Mandaluyong City at San Juan  (PaMaMariSan), ngayong Sabado ng umaga.

Pinamunuan mismo ni EPD director, BGen. Nolasco Bathan, kasama si San Juan City  Police chief, Col. Ariel R. Fulo sa pagsasara sa mga lotto outlets sa 79 F. Blumentritt St., 107, N. Domingo St., Brgy. Pedro Cruz; 02 G.B Santos St., Brgy Rivera; 19-A N. Domingo St., Brgy Progreso; 146 Aurora Blvd, Brgy Balong Bato; Aurora Blvd. Brgy
Salapan, nasabing lungsod.

Naging maayos at mapayapa ang pagsasara sa mga lotto outlets, ayon sa tanggapan ni BGen. Bathan.
Naunang ipinatigil ni Pangulong Duterte ang operasyon ng mga Lotto outlets, STL, Keno at Peryahang Bayan dahil ugat o pugad ito ng korupsyon.

Umani ng magkakaibang reaksyon ang nasabing hakbang ng Pangulo kung saan matindi ang pagtutol ng mga may-ari ng lotto outlets dahil sa pagkawala ng kanilang puhunan at kabuhayan kasama ang kanilang empleyado.

“Maganda po ‘yan. Pambili na lamang ng pagkain ang pantaya,”
pagpabor ng isang empleyado ng engineering company sa Pasig City.

“Kung inipon ko lang sana ang itinaya ko simula noong may lotto ay malamang libu-libong piso na ang pera ko o baka milyon pa,” dugtong ng isa pa.

Ang Lotto 6/42 ay sinimulan ng PCSO sa ilalim ni chair Manuel Morato noong Enero 1995 sa halagang P10 kada isang 6-numerong kombinasyon habang ang Small Town Lottery ay nag-umpisa noong Marso
20, 2006 sa administrasyon ni pangulong GloriaMacapagal Arroyo.

Layon ng lotto na makalikom ng pondo para sa charity service ng gobyerno habang target na mapatigil ng STL ang jueteng.

Sa kasaysayan ng Pilipinas, unang binola ang loterya noong 1833 sa pamamagitan ng Empresa de Reales Loterias Españolas de Filipinas sa ilalim ng Spanish government. Maging si  Dr. Jose Rizal ay nanalo ng ₱6,200 noong 1892 habang naka-exile sa Dapitan at nai-donate ang panalo nito sa isang educational project.

Nabatid na isa  kada 5.2 milyon ang tsansang manalo sa 6/42 habang 1 kada 8.124 milyon sa 6/45 ; 1 kada 14 milyon sa 6/49; 1 kada 29 milyon sa 6/55 at 1 kada 40.4 milyon sa lotto 6/58.

 

Please follow and like us:
Read More

LAMAYAN NIRATRAT, 4 PATAY, 2 SUGATAN

lamay

(Ni JUN V. TRINIDAD)

INFANTA, Quezon – APAT na tao ang namatay at dalawa ang sugatan nang ratratin ng hindi pa nakikilalang salarin ang isang lamayan sa bayang ito, Miyerkoles ng gabi.

Sa report ni Colonel Osmundo de Guzman, Quezon police director, biglang pumasok ang salarin na may suot na bonnet sa loob ng bakuran ng isang lamayan sa Purok Irrigation sa Barangay Ilog dakong 8:45 ng gabi.

Gamit ang kalibre .45 na pistola, nagsimula na itong magpaputok ng baril hanggang sa tamaan ang mga nakikipaglamay na sina Herman Cuento, 70; Leon Cuento, 73; Manuel Cuerdo, 41, at Michael Cuento, 50 sa iba’t ibang bahagi ng katawan.

Nahagip din ng bala ang dalawa pang nasa burulan na sina Maximo Cuento, 65, at Napoleon Miras, 68.

Ang salarin ay mabilis na tumakas pagkatapos ng krimen sakay sa isang motorsiklo na minamaneho ng kasamahan na naghihintay sa kanya.

Mabilis na isinugod sa Claro M. Recto Memorial District Hospital ng mga nagrespondeng tauhan ng lokal na pulisya ang mga tinamaan ng bala subalit hindi na umabot ng buhay sa nasabing pagamutan sina Herman, Leon, Manuel at Michael.

“Si Michael ang target”

Ligtas naman at nagtamo lang nang hindi malubhang tama sina Maximo at Napoleon na isang chairman sa isa pang barangay.

Ayon sa pulisya, magkakamag-anak ang mga biktimang Cuento.

Batay sa inisyal na imbestigayon, si Michael ang target ng mamamatay tao dahil siya ang unang binaril.

“Nilapitan pa ang sugatang si Michael at pininis pa ng ilang putok,” ang impormasyon na ibinigay ni De Guzman sa mobile phone interview.

Nadamay na lang ang mga iba pang tinamaan ng bala dahil nagkagulo na sa mga sunod-sunod na putok, dagdag pa ni De Guzman.

Napag-alaman kay De Guzman na si Michael ay isang “ambush survivor” noong 2016. “Nakakulong pa hanggang ngayon ang suspek sa kanyang ambush”.

Inamin naman ni Infanta Mayor Grace America na si Michael ay official driver ng kanyang opisina at isa ring quarry permit holder o may pahintulot ang lokal na pamahalaan na makapag-quarry ng buhangin sa ilog.

Napag-alaman din kay America na muli na namang nangangamba si Michael ngayong panahon ng eleksyon dahil panahon din ng halalan noong 2016 nang pagtangkaan ang kanyang buhay.

“Mag-ingat”

“Bagama’t hindi naman siya nasaktan noong ambusin siya. Pinayuhan ko siyang palaging mag-ingat,” ani America.

Ngunit hindi masabi ng alkalde kung may kinalaman sa pulitika ang motibo sa nabigong ambush sa dating tsuper ng kanyang opisina. “Hindi ko alam,” ang tanging pahayag ni America

Ayon kay Major Hobert Sarmiento, Infanta police officer-in-charge simula pa noong Lunes, binabalikan ng mga imbestigador ang nabigong ambush kay Michael noong 2016 upang humanap ng posibleng motibo sa naganap na pagpatay sa kanya.

“Posibleng may kaugnayan ang nakaraang ambush sa kanya. At ito ang isa sa mga tinututukan ng mga imbestigador,” ang pahayag ni Sarmiento sa bukod na phone interview.

Nakapokus din aniya ang imbestigasyon sa posibleng koneksyon sa pagpatay kay Michael ang linya ng kanyang ibang trabaho bilang quarry operator at manager ng operasyon ng Small Town Lottery (STL) sa Infanta.

 

 

 

Please follow and like us:
Read More