STL KUBRADORES SINISISI SI DUTERTE

DUTERTE-49

(Ni Jun V. Trinidad / Ikatlong bahagi)

MARAMI ang gu­ma­galang kay Pangulong Duterte. Sinasabi ng mga ito na karamihan ng hakbangin ng punong ehekutibo ay pawang para sa mahihirap na mamamayan ng bansang Pilipinas.

Ang pagpayag niya sa i­lang mga gawain na pumapabor sa mga mahihirap na bumoto sa kanya sa pag-aakalang siya ang pag-asa ng bansang tinaguriang “Perlas ng Silangan” ay halos sumamba sa kanya noong bago pa lang siya sa puwesto.

Ang mga taong ito ang nagtatanggol sa kanya sa lahat ng batikos na kanyang tinatanggap kabilang ang mga mamamayan ng ibang bansa na nakatuon ang pansin at atensiyon sa nangyayari sa Pilipinas na malakas ang pagkontra sa bawal na droga.

Ngayon, tila iba na ang nangyayari. Matapos ipatigil ang operasyon ng ilang ga­ming schemes sa ilalim ng Philippine Charity Sweepstakes Office (PCSO) halos marami ang naninisi kay Pangulong Duterte.

PNP hahadlang sa Jueteng

Sa unang panayam sa ilan sa mga ito ay sinisisi nila si Pangulong Duterte sa muli nilang gagawing pagbabalik sa iligal na gawain.

“Sinunod namin si Tatay Digong. Nagbabagong buhay na kami. Pero siya rin ang nagtutulak sa amin ngayon na mu­ling bumalik sa dating gawain. Ayaw na namin pero wala ka­ming magagawa,” ang pahayag ng isa sa kanila sa panayam ng Diaryo Bomba.

Sa nauna ring panayam ay mariin naman ang babala ni Colonel Audie Madrideo, Quezon police director, na nakahanda ang puwersa ng kapulisan na hadlangan ang mu­ling pagsigla ng jueteng at iligal na droga pagkatapos na itigil ang legal na sugal.

Inamin ni Madrideo na inaasahan na nila ang muling pagbabalik ng operasyon ng jueteng sa lalawigan. “Pero nakahanda kami sa pagpapatigil sa kanila. Hindi dahilan ang kahirapan para gumawa ng labag sa batas. Huhulihin din namin sila,” ang babala pa ng opisyal ng PNP.

Binalaan din ni Madrideo ang mga hepe ng lokal na pulisya sa 39 na bayan at 2 siyudad sa lalawigan sa pinaiiral ng Philippine National Police na “one strike policy” laban sa mga hepe ng pulis na mapapatunayang may operasyon ng iligal na sugal sa kanilang nasasakupan.

Maraming “bangkero”

Sa ilalim ng nasabing polisiya, agad na sisibakin ang hepe ng pulis kapag nadiskub­reng may ipinagbabawal na sugal sa kanyang bayan dahil tumanggap ng suhol ang opis­yal ng pulis.

Ayon kay Aling Teresa at Marta, nakahanda na ang mu­ling operasyon ng jueteng kung sakaling hindi pahihintulutan ng Malakanyang ang pagbabalik ng STL.

“Marami ang gustong magbangka (kapitalista). Sila yung mga dating maliliit na operators ng bookies. Hindi na naman sila bago sa operasyon dahil ginagawa na nila ito ma­ging noong may STL pa,” ani Marta.

Maski na may STL ay naging laganap din ang operasyon ng “bookies” sa iba’t ibang panig ng Quezon.

Hinihikayat ng mga ope­rators ng “bookies” ang mga lehitimong kubrador ng STL sa ilalim ng Pirouette Corp. – ang may prangkisa sa operasyon ng loterya sa lalawigan – na sa kanila isulit ang bahagi ng kanilang koleksyon sa STL kapalit ng mas mataas na komis­yon.

Hindi na nagsasagawa ng kanilang “draws” o pagbola ang “bookies” at sa halip ay sinusunod na lang nila ang lumabas na kumbinasyong numero sa regular na bola ng Pirouette mula sa kanilang draw center sa Lucena City. (May karugtong)

Please follow and like us:
Read More

STL KUBRADORES MAPIPILITAN SA JUETENG

JUETENG-7

(Ni Jun V. Trinidad / Pangalawang bahagi)

TILA nawawalan na ng pag-asa ang ilang nagpapataya ng STL na muling magbubukas ang la­ngit para sa panawagan nila na ibalik ang pinagmumulan ng kanilang hanap-buhay bagaman tinawag na nila ang mga santo na tulungan sila habang ang ilan ay naglakad pa ng paluhod upang bigyang linaw ang kaisipan ni Pangulong Rodrigo Duterte na ibalik ang STL upang magkaroon sila ng legal na trabaho.

Ito ay dahil ayaw na ng marami sa mga kubradores na bumalik sa dati nilang trabaho na itinuturing na iligal.

“Balik jueteng”

Ang sinasabi nilang iligal na trabaho na muli nilang babalikan ay ang “jueteng”.

Aminado ang dalawa na pareho silang dating kubrador ng jueteng bago magsimula ang STL sa lalawigan ng Quezon noong 2006.

Isa ang Quezon sa mga lugar sa bansa na unang nagkaroon ng operasyon ng STL sa hangarin ng pamahalaan na sugpuin ang malaganap na jueteng at makolekta sa porma ng buwis ang malaking salapi na kinikita sa iligal na sugal na pinagpapartehan lang ng mga korap na opisyales ng Philippine National Police (PNP) at lokal na pamahalaan.

“Pareho din naman ang trabaho. Mas doble ingat lang sa jueteng dahil iligal. Lalo ngayon na mainit ang pulis dahil sa utos ni Tatay Digong,” ani Aling Teresa, na noong 20 anyos pa lang ay kubrador na ng jueteng.

“Namana ko ang pangu­ngubra sa aking nanay na minana rin ang trabaho sa kanyang nanay na aking lolang namatay na,” ang kuwento niya.

Nagtataka nga ang bete­ranang kubrador kung bakit biglang naging mabalasik ang pangulo sa legal na sugal ganoong kamakailan lang ay ipinahayag pa nito na mas papaboran niya ang operasyon ng jueteng kaysa iligal na droga.

“Bakit ganoon? Ang dali niyang makalimot sa kanyang mga sinasabi. Ulyanin na ba siya?” ang natatawa pang pakli ng kubrador.

Noong Hunyo 25, nagpahayag si G. Duterte sa kanyang talumpati sa Malakanyang na mas papayagan niya ang jueteng kaysa iligal na droga.

“Maski sinong Presidente ilagay mo dito, for as long as the economy does not really provide food on the table for so many families, hayaan mo na lang ‘yan. At least ang pera doon. Kasi hindi ko talaga rin kaya. At pagka-sinira ko ‘yan, ang papalit sa apparatus niyan droga. So choose between the lesser evil,” ani Duterte.

Hindi ito ang unang pahayag ng pangulo tungkol sa pagpapahintulot niya sa jueteng.

Noong June 2018, sinabi rin ni Presidente Duterte na kung ihihinto niya ang jueteng ay mas lalong mananalasa ang iligal na droga dahil magbebenta ng mga ipinagbabawal na droga ang mga mawawalan ng trabaho partikular ang mga libo-libong kubrador.

Jueteng o shabu

Katwiran ng dalawang dating kubrador ng STL, mas ligtas sila sa gagawin nilang muling pangungulekta sa jueteng kaysa ibang kasamahan nila na mapipilitang magbenta ng shabu para lang mabuhay ang kanilang pamilya.

“Kung matimbog man kami sa jueteng ay piyansa lang ang kapalit. Hindi katulad sa mga drug pusher na kapag minamalas ay pwedeng basta na lang itumba (patayin) ng pulis,” pahayag ni  Marta.

Pagkatapos na itigil ni Pangulong Duterte ang mga legal na sugal ay nagpahayag ang ilang dating drug pusher na naging kubradores ng STL sa siyudad na ito na mapipilitan silang bumalik sa dating trabaho nilang pagbebenta ng shabu kung tuluyang ihihinto ang legal nilang hanapbuhay ngayon.

Please follow and like us:
Read More