REP. NOGRALES: SIERRA MADRE PROTEKTAHAN

Rep Fidel Nograles-Sierra Madre-2

NAIS ng isang mambabatas mula sa Rizal na masigurong nabibigyan ng proteksyon ang bulubundukin ng Sierra Madre.

Ito ang layunin ni Rizal 2nd District Rep. Fidel Nograles kaya isinusulong niya sa Kamara ang pagbuo ng Sierra Madre Development Authority.

Magiging pangunahing gawain ng naturang ahensiya ay magsagawa ng komprehensibong survey ng pisikal at mga likas na yaman gayundin sa mga potensyal na makikita sa Sierra Madre region at gumawa ng komprehensibong tala at detalyadong plano batay sa resulta ng survey, at gumawa ng disenyo upang mapangalagaan at gamitin nang mabuti ang likas-yaman na matatagpuan sa rehiyong ito.

Ang SMDA ay maaari ring “gumawa ng rekomendasyon sa tamang mga ahensya para sa pananalapi o paglalaan ng pondo, technical support, pisikal na tulong at ang antas ng prayoridad ay nakatuon sa mga proyekto sa agrikultura, pang-industriya at komersyal, humiling o humingi ng tulong mula sa pamahalaan o alinman sa mga sangay nito.”

Ito rin ay gagawa ng “plano, pinansyal ng programa o magsagawa ng mga proyektong pang-imprastraktura tulad ng river, flood and tidal control projects, waste water and sewerage works, dams and water supply, mga kalsada, irigasyon, pabahay at iba pang kahalintudad na patrabaho, kung kinakailangan na isama ito sa konteksto ng ipatutupad na plano sa pagpapaunlad at mga programa kabilang na ang pagsasaayos, relokasyon o paglilipat sa mga residenteng naninirahan sa lugar na maaaring kailanganin at kapaki-pakinabang sa mga awtoridad.”

“Kailangan natin ng isang government body na may sapat na ngipin para siguruhin na ang pagsasaayos sa Sierra Madre ay kayang gawin na hindi masasalaula at hindi rin mababalewala ang karapatan ng mga katutubo na kung ilang siglo nang naninirahan dito at nagsilbing tagapag-alaga nito,” pahayag ni Nograles, na nagsanay ng abogasya sa Harvard.

Ayon pa sa mambabatas, ang pagnanais na magamit ang likas-yaman ng Sierra Madre ay maaaring makaambag sa pambansang kaunlaran ngunit dapat maging balanse na pangmatagalan at tama ang pag-iingat sa kalikasan.

Please follow and like us:
Read More

BANTAY NG SIERRA MADRE NAIS MAGKAARMAS

illegal loggers-5

(Ni Jun V. Trinidad / Huling labas)

MALAKING panga­nib ang kinakaharap ng forest rangers na nangangalaga ng Sierra Madre na ngayon ay sinasabing pugad na rin ng mga illegal loggers at kanilang mga escort na humihigop ng usok ng shabu bago magtrabaho.

Kadalasan, ang forest rangers ay nagtratrabaho ng isang linggo sa loob ng kagubatan ng kabundukan ng Sierra Madre na ang tanging armas ay camera, global positioning system (GPS) device, teleskopyo at solar-powered lights para sa kanilang dokumentasyon habang ang hinahabol at hinaharap nilang mga illegal loggers ay armado ng matataas na kalibre ng baril.

Ilang beses na ring tinakot at pinaputukan ang mga bantay at nangangalagang ito ng Sierra Madre kaya’t naghahangad din sila na sana ay mabigyan din sila ng armas upang maharap nila ang mga nagsasamantala sa kabundukan.

Bukod pa ito sa katotohanan na bagaman naiulat na nila sa pulisya ang nangyari sa kanila na bahagi ng pananakot ng ilang illegal loggers, wala namang nagiging aksyon ang pamahalaan tungkol sa sinapit nila. Sa madaling salita, bumabagsak sa tengang bingi ang kanilang mga hinaing.

Nagtratrabaho ang fo­rest rangers sa kabundukan na walang kasamang sundalo sapagkat nais din nilang makaiwas na maipit sa engkwentro laban sa mga miyembro ng rebeldeng grupong New People’s Army.

Reklamo laban sa protektor ng illegal logging

Ikinuwento ni Lupo Telan, hepe ng  Community Environment and Natural Resources Office – Real, Quezon, na ilang beses na rin siyang nakakatanggap ng pagbabanta sa kanyang buhay.

Aniya, hindi siya tinatantanan ng mga illegal loggers at kahit pulis ng lalawigan ng Rizal ay nagpapaalam sa kanya upang makapangahoy sa protected areas at sa hindi niya pagpayag ay mas lalong dumami ang nagbabanta sa kanyang buhay.

Bilang pag-iingat, pansamantalang nagpalipat si Telan sa kanilang opisina sa Real, Quezon at hindi na muna sumasama sa pagpapatrulya.

Noong nakaraang buwan, anim na kasamahan ni Telan na pawang forest rangers ang naghain ng reklamong “grave threats” sa Infanta Police laban kina Ruel at Reynaldo Villaflor.

Nabatid na noong Hunyo 19, naharang ng forest ran­gers ang isang van na kargado ng hinihinalang “hot lumbers” sa Barangay Polo kung saan ay nasa loob ng sasakyan ang  dalawang Villaflor.

Nagalit si Ruel sa ginawang pagharang sa kanilang sasakyan bago nagpakilalang sundalo at pinaputukan ng baril ang anim na forest rangers na humarang sa kanilang sasakyan.

Si Reynaldo na driver ng van ay nagbanta rin sa grupo ng mga tagabantay ng Sierra Madre.

“Sige humarang kayo! Sasagasaan ko kayo!, ” ang sigaw ni Reynaldo.

Ayon naman kay P/Maj Hobert Sarmiento, hepe ng Infanta Police, hindi na nag­re-report sa kanyang tanggapan si Ruel na hindi pala kasapo ng Philippine Army subalit miyembro ng Citizens’ Armed Forces Geographical Unit o CAFGU.

Forest rangers nais magkaarmas

Dahil ayaw nilang matulad sa  ibon na binabaril na lang ng illegal loggers, nais ng fo­rest rangers ng Sierra Madre na magkaroon sila ng armas upang magamit bilang proteksyon.

Nabatid sa ilang rangers na makailang beses na rin silang humingi ng permiso sa Department of Environment and Natural Resources na pahin­tulutan silang magkaroon ng baril upang maipagtanggol ang kanilang sarili ngunit hanggang ngayon ay naghihintay pa rin sila sa pahintulot.

Sinabi ng ilang rangers na masyadong mapangahas na ngayon ang illegal loggers dahil karamihan sa mga ito ay batak sa shabu habang nagpuputol ng mga punongkahoy.

Giit pa nila, madalas ay may nakukuha silang plastic sachet ng shabu at paraphernalia na hindi nalalayo sa sumbong sa kanila ng mga katutubo.

Ayon sa mga katutubo, mismong kapitalista ng illegal loggers ang nagbibigay ng supply na shabu, alak at sigarilyo sa mga trabahador nito upang tumagal ang resistensiya sa kanilang ginagawa kahit na malamig ang panahon at umuulan.

Nabatid rin na kahit may total log ban, hindi humihinto ang illegal logging sa Sierra Madre kung saan ibinababa mula sa kabundukan ang mga table at troso sa Agos River hanggang Umiray River sa bayan ng Infanta.

Rangers kay PRRD: Armasan na kami

Malakas ang panawagan ng forest rangers sa Sierra Madre na sakop ng lalawigan ng Quezon kay Pangulong Rodrigo Roa Duterte na bigyan sila ng baril na gagamiting panlaban sa mga armadong illegal loggers na nasa ilalim ng tama ng shabu.

Sinabi ni Rexmel Telan, beteranong forest ranger ng CENRO sa Real, Quezon, sakaling walang badyet ang pamahalaan para ipambili ng baril, nakahanda naman silang dumukot sa sarili nilang bulsa upang makabili at magkaroon ng baril.

Isa pang giling ng grupo ni Telan ay payagan silang makakuha ng permit to carry firearms outside their residence.

“Kailangan namin ang baril para maipagtanggol ang sarili laban sa mga illegal loggers na may mga bantay na armado,” paliwanag ng forest ranger.

Maraming beses na rin aniya na pinapuputukan ng mga armadong illegal loggers ang mga nagpapatrulyang fo­rest rangers para takutin.

Mitsa ng buhay

Subalit para kay Lupo Telan, hepe ng Cenro-Real, nagdadalawang isip ang mga opisyal ng pamahalaan na armasan ang forest rangers dahil sa halip na maging proteksyon nila ay baka maging mitsa pa ng kanilang buhay.

Paliwanag pa ng hepe ng Cenro, taktika ng mga rebeldeng New People’s Army (NPA) ang mang-agaw ng armas upang gamitin ng mga kasamahan nila sa armadong pakikibaka laban sa pamahalaan.

Batay sa record ng Global Witness, sa 200 napapatay na mga “environmental defen­ders” sa 24 na bansa ay 28 ang napapaslang sa Pilipinas.

Please follow and like us:
Read More

SIERRA MADRE PATULOY NA GINAGAHASA

SIERRA MADRE-2

(Ni Jun V. Trinidad / Ikalawang labas)

BATID ng mga forest rangers sa Sierra Madre ang panganib na kanilang kinakaharap sa mga illegal loggers at mga bantay ng mga ito na pawang armado ng matataas na kalibre ng baril kapag nagsasagawa ng operasyon sa kagubatan at kabundukan.

Bukod sa masyadong matatapang ang ilan sa mga magtotroso dahil sa hawak nilang baril at wala na rin sa tamang wisyo dahil sa karamihan ay nasa ilalim ng impluwensiya ng bawal na droga na kanilang sinisinghot bago magtrabaho dahil sa maling akala na matagal silang mapagod at antukin kapag nakabatak ng shabu.

Hindi na iisang beses nangyari na pinaputukan ang forest rangers na nakatokang mangalaga ng mga kagubatan sa hilera ng kabundukan ng Sierra Madre subalit hindi na halos mabilang na bagaman ilang beses na nilang iniulat sa pulisya ay tila bumabagsak sa kawalan ang kanilang rek­lamo.

Ayon kay Rexner Telan, beteranong forest ranger sa Real, Quezon, karamihan sa kanilang mga forest ranger ay nagtratrabo base sa ibinigay na responsibilidad ng gob­yerno. Hindi maitatanggi na sila, kapag nasa trabaho na sa kagubatan na inaabot ng isang linggo, ay armado ng camera, global positioning system (GPS) device, teleskopyo at solar-powered lights para sa kanilang dokumentasyon.

Bukod pa sa katotohanan na kapag nagtrabaho ang fo­rest rangers ay sila-sila lang at walang kasamang sundalo ng pamahalaan upang maiwasan na rin na maipit sila sa eng­kwentro sa laban sa mga mi­yembro ng New People’s Army.

Panggagahasa sa kabundukan tuloy-tuloy

Bagaman may total log ban, hindi humihinto ang illegal logging sa Sierra Madre na sakop ng hilagang bahagi ng lalawigan ng Quezon kaya’t itinuturing itong “hot spot” sa usaping ng illegal logging.

Sinabi ni Fr. Pete Montallana, president ng Save Sierra Madre Network Alliance (SSMNA), walang habas ang panggagasaha ang ginagawa ng illegal loggers sa kabundukan ng Sierra Madre.

Aniya, ang iligal na kahoy mula sa kabundukan ng Sierra Madre ay ibinababa sa pamamagitan ng pagpapaagos ng mga tabla at topso sa Agos River hanggang Umiray River sa bayan ng Infanta.

Ayon pa sa president ng SSMNA, sinasambot ng mga tauhan ng sindikato sa ibabang bahagi ng ilog ang mga tabla at torso na may inukit na palatandaan upang makilala kung sino ang may-ari.

Sinasabing ang mga puslit na troso ay ibinibenta ng sindikato sa halagang P40 hanggang P50 bawat board foot na kapag nilagari at napagpira-piraso ay umaabot ang presyo mula P150 hanggang P200 kada board foot depende sa uri ng kahoy.

Sinabi pa ni Montallana, ang mga iligal na kahoy ay ibi­nibiyahe patungong bayan ng Mauban sakay ng bangkang de motor. Simula Mauban ay dinadala ito sa Metro Manila o saan mang bahagi ng Calabarzon (Cavite, Laguna, Batangas, Rizal, Quezon) region.

Napag-alamang, matagal ng bantog ang Mauban bilang bagsakan ng mga iligal na kahoy mula sa Sierra Madre sa hilagang Quezon pati na rin ang ‘hot logs’ mula sa isla ng Polillo sa lalawigan din ng Quezon.

Ibinabagsak din sa ba­yang ito sa harap ng Pacific Ocean ang mga kahoy na nagmumula at pinutol sa bahagi ng Sierra Madre sa hilagang Luzon.

Ang mga bumibili ng iligal na kahoy ang siyang bumabayad sa “biyahero” ng ipinagbabawal na produkto mula sa Mauban patungo sa kung saang destinasyon

Ang biyahero naman ang aareglo o magbabayad ng suhol sa mga checkpoints na dadaaan ng iligal na kargamento.

Please follow and like us:
Read More

BUNDOK NG SIERRA MADRE BATAKAN NG SHABU

SIERRA MADRE

(Ni Jun V. Trinidad / Unang labas)

ANG Sierra Madre ang pinakamahabang hanay ng kabundukan sa Pilipinas mula sa Hilaga hanggang Timog o mula sa lalawigan ng Cagayan sa Hilaga at lalawigan ng Quezon sa Timog. Ang hanay ng kabundukang ito ang itinutu­ring na pinakamalaking isla sa archipelago. Ang hangganan ng hilera ng kabundukang ito ay ang Karagatang Pacifico patungong silangan. Ang mga lugar na nasa hilerang ito ay pawang mga liblib na lugar na pawang kadalasang nakakarating sa pamamagitan ng sasakyang panghimpapawid at pandagat.

Simpleng kabuhayan ang pinangangalagaan ng mga tao sa Sierra Madre lalo na ang kagubatan. Ang illegal logging ay isa sa mga banda sa biodiversity at rural livelihood sa hilagang bahagi ng Sierra Madre Natural Park, isa sa pinakamalaking lugar na pinangangalagaan sa Pilipinas.

Nabatid na taon-taon, umaabot sa 20,000 hanggang 35,000 cu. m ng kahoy ang kinukuha mula sa parke na sinasabing pawang pagkunsinti ng pamunuan ng kagubatan at lokal na pamahalaan sa mga protektadong lugar.

Sa kaalaman ng lahat, marami sa nangangalaga ng Bundok Sierra Madre ay nag-aalala sa posibleng kahinatnan ng nasabing likas na yaman sapagkat baka dumating ang panahon na tuluyang makalbo ang hilera ng bundok na nagtatangi ng malulusog na kagubatan.

Forest rangers sa Sierra Madre

FOREST RANGERSMabibilang lang sa kamay ang dami ng forest ranger sa Sierra Madre. Sa mangilan-ngilan na bilang ng mga nangangalaga ng kabundukan, pawang wala naman talagang laban ang mga ito sa mga illegal loggers na nagpuputol ng mga kahoy sa lugar dahil ang huli ay pawang mga armado ng matataas na kalibre ng baril.

Ang masaklap pa, ang mga illegal loggers at ilang mga kasama ay pawang gu­magamit ng bawal na droga upang matagalan ang trabaho sa kagubatan na nasa mahabang hanay ng kabundukan.

Bukod sa mga illegal loggers, ang kanilang mga kasama o bantay na pawang armado ng mahahaba at matataas na kalibre ng baril, ay pawang gumagamit ng shabu bilang pantanggal pagod at mas mahabang oras na mulat ang mga mata.

Batid ng forest rangers na kapag ganitong klaseng mga tao ang kanilang kaharap, tiyak na nasa balag ng alanganin ang kanilang kinabukasan o kaya naman ay lubhang nanganganib ang kanilang mga buhay.

Illegal loggers bumabatak ng shabu

ILLEGAL LOGGERS-2Hindi naman maikakaila na napakarami na sa mga nagtratrabaho sa kahit saang panig ng bansa ang lulong sa droga. Marami sa mga nagpuputol ng kahoy sa hilera ng Sierra Madre ang bumabatak ng shabu sa maling akala na lumalakas sila at tumatatag sa puyat at pagod kapag nakatira o singhot sila ng usok ng shabu.

Kadalasan, kapag nakatira na ng bawal na droga, marami ang lumalakas ang loob kaya’t nagagawa ang mga bagay na hindi dapat at sa bandang huli ay kanilang pagsisisihan.

Nabatid na marami sa mga loggers ang nagsa-shabu sa kagubatan base na rin sa mga nakukuhang plastic sachet at paraphernalia ng mga nag-iikot na forest rangers. Hindi magawa ng mga ito na magsuplong dahil ang karamihan sa mga illegal loggers ay may konesyon sa pulis at militar.

Nais magka-armas

Ayaw ng forest rangers na maihalintulad sila sa mga ibon na namamatay kapag binaril ng mga nangangaso sa mga kagubatan at kabundukan.

Batid nila na wala silang kalaban-laban sa mga armadong illegal logger lalo na yung mga nasa ilalim ng espi­ritu ng alak at tama ng shabu.

ARMAS-3Ayon sa ilang forest ran­gers, ilang beses na rin naman nilang naranasan na paputukan ng baril ng mga armadong illegal loggers habang sila ay nagpapatrulya.

Ayon kay Rexmel Telan, beteranong forest ranger na nakatalaga sa Community Environment and Natural Resources (Cenro) sa bayan ng Real, Quezon, kailangan ng mga katulad niyang forest ranger ang armas o baril upang maipagtanggol ang sarili laban sa illegal loggers at sa mga bantay ng mga ito na pawang armado.

“Ilang beses na nangyari na pinagbabaril nila ang mga forest rangers na wala namang ginawang masama subalit ipa­tupad lang ang responsibilidad na iniatang sa kanila ng pamahalaan,” ani Telan.

Ayon pa sa forest ranger ng Quezon, kailangan nilang ipagtanggol ang kanilang sarili at ayaw nilang mangyari na parang ibon lang sila na babagsak sa lupa matapos targetin ng mga armadong illegal loggers.

Please follow and like us:
Read More