NAPAPANAHON ANG MODERNISASYON

RESPONDE.jpg

ISANG aksidente muli ang kumitil sa buhay ng abot 20 nating mga kababayan nitong Martes. Ang masayang bakasyon ng mga magkapamilya at kapitbahay ay humantong sa trahedya nang mahulog sa bangin ang isang truck sa T’boli, South Cotabato.

Agarang nagpatawag si Pangulong Rodrigo Roa Duterte ng isang pulong kasama si Department of Transportation Secretary Arthur Tugade at iba pang mga opisyales. Ipinahayag ng pangulo ang kanyang mabigat na utos na mas maging mahigpit sa pagpapatupad ng ating mga batas ukol sa kaligtasan at seguridad ng bawat mamamayan sa kalsada.

Ilang taon nang isinusulong ang modernisas­yon sa mga pang-publiko at pribadong transportas­yon. Ngunit parati itong nauudlot dahil sa kaliwa’t kanan na lumalaban dito. Sa dinami na ng buhay na nawala nang dahil sa kapabayaan sa kalsada at sa mga sasakyan eto na nga at nagpahayag na ang Pangulo na “non-negotiable” ang modernisasyon ng public transport.

Ayon sa pag-aaral ng Japan International Coope­ration Agency, umaabot sa P3.5 billion kada araw ang talo ng Pilipinas dahil na rin sa trapiko sa Metro Manila. Sa tala naman ng World Health Organization, umaabot sa P1.35 million ang road traffic deaths taon-taon at ang road crash ay pang-walong sanhi ng pagkakitil ng buhay sa mundo.

Saan nga ba ang problema? O mas mainam na tanong ay sino nga ba ang problema? Sa dami ng batas natin ay tila wala ni isa ang nakalulutas at nakapagbibigay lunas sa ka­lagayan natin ngayon. Ang isang nakapagtataka pag tayo ay nasa ibang bansa ay masunurin tayo sa kanilang mga batas pang-trapiko at pangangalaga ng mga sasakyan. Ngunit pag tayo ay nasa ating sariling bansa tila hari ang lahat, mapa-pribado o publikong tao sa hindi pagsunod ng batas.

Tama nga ang pa­ngulo. Panahon na para pagtibayin ang moder­nisasyon sa transportasyon, pampubliko man o pribadong sektor. Kailangan ang pakikilahok ng bawat isa sa atin. Hindi ito magi­ging madali para sa lahat pagkat kasama rito ang mahigpit na pagpapatupad ng road worthiness ng sasakyan, mas madalas na pagsusuri sa mga ito, ang dagdag bayad sa bayarin ng inspeksyon, ang mas mahirap na kwalipikasyon para sa aplikasyon at pag-renew ng Driver’s License at gayundin ang pagre­histro ng sasakyan kasama ang insurance at ang mas mataas na multa sa paglabag sa batas.

Ilan lamang ito sa mga pagbabago dala ng mo­dernisasyon. Ngunit ang sakripisyo na ating ibibigay ngayon ay siya namang mag-aayos sa ating problema sa mga darating na taon. Tulungan natin ang administrasyon!  (RESPONDE ORA MISMO / Kuya Joe)

Please follow and like us:
Read More

HUWAG NANG IBALIK SA PWESTO

RESPONDE.jpg

BUONG linggong pinagpiyestahan ang balita ukol sa pag-abuso ng mga opis­yales ng Bureau of Corrections (BuCor) sa R.A. No. 10592 o ang Good Conduct Time Allowance (GCTA) na siya rin naging paksa natin kamakailan. Mismong ang Pangulong Rodrigo Duterte na ang nagpahayag na sibak na sa pwesto si BuCor Dir. Nicanor Faeldon sa hindi pagsunod sa kanyang utos ukol sa GCTA.

Pati ang anak ng Pa­ngulo na si Davao City Mayor Sara Duterte-Carpio ay dismayado sa mga pangyayari lalo na sa pagpapalaya nito lamang buwan ng Hunyo sa apat na high-profile convicted Chinese drug lord. Ayon sa alkalde, ito ay taliwas sa laban sa droga ng kanyang ama.

Umabot na rin nga sa Senado na pinakinggan ang panig ng bawat isang sangkot dito.

Ang taumbayan naman ay tutok at sinubaybayan ang mala-teleseryeng kwento sa loob ng BuCor. Ang nakapanlulumo ay ang pag-iwas ni Faeldon sa responsibilidad. Nung una umiwas ito at sinabing pinirmahan lamang niya ang memorandum para umpisahan ang proseso. Hindi naman daw siya ang nag-apruba ng release order. Ngunit inamin na rin nito sa Senado na siya nga ang may otoridad sa pag-apruba. Kung kaya masasabi nating malalim at malala ang kalakaran at tila hindi pa ito ang dulo ng kwentong ito.

Mainam nating pag-usapan na maayos naman ang hangarin ng batas. Binigyan ng pagkakataon makalaya ang mga presong sumunod naman nang husto sa mga panuntunan at dahil dito, maaari silang makapagbagong buhay sa labas ng piitan. Ang naging problema ay nasa pag-implementa ng batas na siya namang pinagkaperahan ng ilang opisyales, ayon na rin sa mga pamilya ng ibang ninais na makalabas sa tulong ng GCTA.

Ngayon ang tanong ay kung maaari ba talaga ipatawag at ibalik sa piitan ang mga nakinabang sa batas na ito? Mukhang mahirap din naman ito pagkat kawawa ang mga kwalipikado sa batas na nakalaya na at kasama ang kanilang mga pamilya. Mas mai­nam siguro na pag-aralan muna ang dokumento ng bawat isa at patawag lamang ‘yung iilan na talagang sa simula’t sapul ay diskwalipikado na.

Kung si Faeldon naman ang ating pag-uusapan, mas mainam na magpahinga na lamang ito at wag nang italaga ng Pangulo sa iba pang ahensya ng gobyerno. Matatandaan na bago pa napunta sa BuCor, naitalaga ito sa Bureau of Customs ngunit nagbitiw nuong

Agosto 2017 dahil sa kontrobersiya ukol sa P6.4 bilyong halaga ng shabu mula sa China na diumano nakalusot sa ating bansa. Marahil, sa pananaw ng nakararami mabuti para sa lahat na ito na ang huling pagtalaga sa kanya. (RESPONDE ORA MISMO / KUYA JOE)

Please follow and like us:
Read More

SUNDIN ANG BATAS

RESPONDE.jpg

NABULABOG ang sambayanan nang mapabalitang maaaring makalaya si dating Calauan, Laguna Mayor Antonio Sanchez na matagal nang nakakulong matapos mahatulang guilty sa kasong pagpatay at paggahasa sa estudyante ng University of the Philippines sa Los Baños nuong 1993.

Sa unang panayam ng media kay Bureau of Corrections Director Nicanor Faeldon, nabanggit nito na kasama si Sanchez sa may sampung libong preso na pinag-aaralang makalaya sa ilalim ng R.A. No. 10592 o ang Good Conduct Time Allowance at sa ruling ng Korte Suprema na “retroactive” ang batas na ito. Ibinahagi naman ni Department of Justice Sec. Menardo Guevarra na maaari ngang mapalaya si Sanchez dahil naging mabuti ito habang nasa loob ng bilangguan.

Naglabas ng saloobin ang pamilya ng mga biktima, gayundin ang sambayanang Pilipino na tila hindi matanggap na sakop nito si Sanchez pagkat may mga pagkakataon na nahuli itong lumabag sa batas habang nasa loob.

Tila hindi akalain ng ilan na ganito ang magiging pagtanggap ng ating mga kababayan kung kaya biglang kambiyo sila sa unang pahayag at pinatigil muna ang pag-aaral sa pagsali ni Sanchez sa listahan ng lalaya.

Napabalita rin na humihingi si Sen. Leila De Lima ng pagkakataon na makatrabaho sa Senado gamit ang ­teleconferencing para makapagdebate at hearing. Matatandaan na patuloy pa ang kaso nito ukol sa droga ilang taon na ang lumipas. Hindi naman naging pabor si Sen. Bong Revilla dahil siya rin ay hindi napagbigyan ng pagkakataon noong siya naman ang nalagay sa piitan ukol sa kaso ng PDAF.

Sa aking opinyon, kailangan natin sundin ang batas sa lahat ng pagkakataon. Hindi lamang kung ito ay pabor sa ating sitwasyon. Ang batas ay sagrado at ang simbolo ng matatag na pundasyon ng isang bansa. Kung ­maliwanag ang batas na hindi maaaring makalabas si Sanchez pagkat diskwalipikado ito ay dapat itong sundin. Wala nang iba pang interpretasyon ang kakailanganin. Kung hindi rin maaaring pagbigyan si De Lima dahil hindi rin ito naibigay sa iba na parehong sitwasyon sa kanya ay dapat din itong sundin.

Sa ganitong panahon maipakikita na patas ang batas para sa lahat ng Pilipino kesyo mayaman man o mahirap, may kapangyari-han man o wala, kailangan pa ring pantay-pantay tayo. (RESPONDE / Kuya Joe)

Please follow and like us:
Read More

PAGPASOK NG MGA DAYUHAN DAPAT NAAAYON SA BATAS

RESPONDE.jpg

PINAIIMBESTIGAHAN ng ilang mambabatas ang biglaang pagdami ng mga Tsinong manggagawa sa Pilipinas partikular na tinutukoy ngayon ay ang mga nasa Philippine Offshore Gaming Operations (POGO). Nakababahala ang pagdagsa nila mula sa Tsina lalo na may mga ilang ulat na hindi umano dumaan sa tamang proseso at walang tamang working visa ang mga ito. Ang ilan sa kanila ay nakapapasok bilang turista ngunit tumutuloy na bilang mga manggagawa kaagaw ang mga Pilipino sa trabaho rito sa ating sariling bansa.

Heto na nga at pinatatawag na ng Kamara ang mga taga-Bureau of Immigration (BI) para ma­bigyang-linaw kung ligal ba ang mga papeles ng mga ito. Ayon kay Rep. Eric Yap, chairman ng House Committee on Games and Amusement, kanilang susuriin ang tamang bilang ng mga manggagawang mula sa ibang bansa na ngayon ay nasa POGO hubs. Dapat maayos ang mga dokumento ng bawat isa sa kanila pagkat may mga ulat na may ilang grupong mula Tsina na siya rin namang nambibiktima sa mga kapwa Tsino sa iba’t ibang iligal na paraan.

Mula naman kay Senador Win Gatchalian sa kanyang Senate Resolution No. 89, hindi umano nakakokolekta ng tamang buwis ang ating pamahalaan sa mga manggagawa sa industriya ng POGO na tinatayang nasa 130,000 indibidwal na.

Sa ibang balita naman ukol pa rin sa mga dayuhan sa bansa, inireklamo ng isang turista sa Boracay ang pagpapadumi ng isang dayuhang babae sa kanyang anak sa baybayin at gayundin ang pagtatago ng dumi nito sa buhangin.

Bawal ito base sa nakasaad sa Municipal Ordinance Number 311 o “Anti-Littering Law” sa Malay, Aklan na saklaw nito ang pagdumi, pag-ihi at pagdura sa pampublikong lugar katulad ng Boracay.

Sa aking opinyon, maaari namang magtrabaho ang mga dayuhan dito sa atin basta sumunod sila sa mga batas, magkaroon ng tamang permits at visa, magbayad ng nararapat na buwis, bigyang halaga ang ating kultura at higit sa lahat ay ‘wag agawan ang mga Pinoy sa trabaho na kaya nating gampanan. Dapat mas maging alerto tayo sa mga hindi magandang nangyayari sa ating paligid at ipagbigay-alam agad sa otoridad upang agarang mahuli ang mga ito. Protektahan natin ang bansang Pilipinas at ang bawat Pilipino na naririto!  (RESPONDE ORA MISMO / KUYA JOE)

Please follow and like us:
Read More

LABAN-BAWI SA PCSO

RESPONDE.jpg

NAGULANTANG ang taumbayan sa biglaang berbal na direktiba ni Pangulong Rodrigo Duterte noong nakaraang Biyernes na ipatigil ang lahat ng gaming operation sa pangangasiwa ng Philippne Charity Sweepstakes Office (PCSO) kasama na rito ang lotto, small time lottery (STL), peryahan ng bayan at Keno. Ito ay dahil na rin umano sa talamak na korapsyon sa ahensya.

Mula sa 2018 Annual Audit Report sa PCSO, lagpas dalawang bilyong pisong gastos ng PCSO ang inisyuhan ng Notice of Disallowance dahil sa paglabag sa patakaran ng paggastos nito. May lumabas na lagpas sa nararapat ang mga natatanggap ng ilang opisyales at empleyado.

Inatasan ang Philippine National Police (PNP) sa pamumuno ni Director General Oscar Albayalde at katuwang si PNP–NCRPO Director Police Major General Guillermo Eleazar na isara sa loob ng 24-oras ang mahigit dalawang libong lotto outlets ng PCSO sa buong bansa. Tila walang takot si Pangulong Duterte sa kanyang pahayag na hindi niya kikilalanin ang anomang court order na maaaring humadlang sa kanyang direktiba.

Ilan sa ating mga lokal na opisyales ang mabilis ang aksyon sa direktiba ng Pangulo. Si Mayor Isko Moreno ng lungsod ng Maynila ay inatasan ang business licensing office na kaagad i-withdraw ang business licenses and mayor’s permit sa lahat ng lotto, STL, at iba pang gaming activities sa ilalim ng PCSO. Ngunit nang binawi ni Pangulong Duterte ang direktiba para sa Lotto ay mabilis din naman sumunod si Mayor Isko. Si Mayor Abby Binay naman ng lungsod ng Makati ay nagpahayag ng pagsunod sa direktiba. Ngunit hindi nito babawiin ang business permits at lisensya ng mga may-ari sapagkat wala umano itong legal na basehan kung walang direktiba mula sa PCSO.

Tama nga ba ang hakbang ng administrasyon at mga lokal na opisyales sa pagkakataong ito? Kung ating susuriin ang Saligang Batas ng Pilipinas, tila may ilang mga paglabag sa mga nakasaad dito. Tulad na lamang ng pagsunog sa due process o ang tamang proseso at impairment of contracts o ang paglabag sa mga pormal na kontrata. Mahalaga ang mga ito sapagkat pinangangalagaan ang mga karapatan ng bawat mamamayan.

Sa aking pananaw, maayos ang hangarin ng administrasyon sa agarang paglutas sa korapsyon sa isang ahensya ng gobyerno. Ngunit tila nauna nang parusahan ang lahat ng may-ari ng gaming outlets na wala pang tamang proseso ng imbestigasyon. At ang kanilang hawak na mga kontrata ng franchise mula sa PCSO at business permits mula sa lokal na pamahalaan na dumaan naman sa wastong proseso ay biglaang pinawalang bisa.

Kung anoman ang korapsyon sa loob ng PCSO o mga bali-balitang gulo sa mga opisyales na naitalaga rito, sana naman ay hindi apektado ang mga Pilipinong may malinis na kabuhayan at gayundin ang libo-libong kababayan nating may mga sakit at karamdaman na natutugunan ang mga pangangailangan dahil sa mga programa ng PCSO. (RESPONDE ORA MISMO /KUYA JOE)

Please follow and like us:
Read More

SUBUKAN ANG MAKABAGONG TEKNOLOHIYA

RESPONDE.jpg

NAGDAAN muli ang SONA ni Pangulong Duterte. Dinumog na naman ng kilos protesta ang Commonwealth Ave. at gayundin ang iba’t ibang probinsya. Kani-kanyang diskarte ang mga raliyesta para ipakita ang kanilang dismaya sa administrasyon. Sa loob naman ng Batasan Pambansa, nagpabonggahan ng kasuotan ang mga mambabatas. Sa ikaapat na pagkakataon, inilathala ng Pangulo ang nagawa ng kanyang administras­yon at ang mga hakbang na tatahakin para sa susunod na taon.

Kung ating susuriin, maraming pangako mula sa mga nakalipas na SONA ang tila hanggang ngayon ay hindi pa rin lubusang nabibigyan ng lunas ng administrasyon. Una na riyan ang laban sa droga at pangalawa ang korupsiyon sa gobyerno. Pareho itong tila hindi kakayanin malutas nang mabilisang panahon. Ngunit ang mainam na gawin ay ibahin ang estratehiya lalo pa nakita na nila na hindi naman ubra.

Nasabi ng Pangulo ang hiling na maibalik ang death penalty para sa mga krimen ukol sa iligal na droga at korupsiyon. Hindi naman pinagtakpan ng Pangulo na talamak pa rin ang katiwalian kahit pa malakas ang kampanya ng administrasyon para labanan ito. Nabanggit niya ang Land Transportation Office (LTO), Social Security System (SSS), Bureau of Internal Revenue (BIR), Land Registration Authority (LRA), at Pag-IBIG na mga ahensya ng gobyerno na nangunguna sa dami ng reklamo mula sa taong bayan.

Sa aking pananaw, dapat na ngang gawing digital at online ang ilan sa mga serbisyo ng mga ahensyang ito. Naisagawa ito ng DFA sa online application ng pasaporte. Gayundin ang NBI sa kanilang NBI clearance. Para maputol na rin ang kalakaran ng mga “fixer” dito.

Panahon na upang mas maging mahusay at epektibo sa pamamalakad ng mga serbisyo mula sa pampubliko at pribadong sektor. Gamitin ang SMART na teknolohiya at proseso na swak sa pangangailanagan ng a­ting bansa.

Nabanggit din ng Pangulo ang pagtatatag ng ilang bagong ahensya na tutugon sa tunay na pangagailangan ng mga OFW at gayundin maibsan ang mga problema sa tubig at sakuna. Mainam naman ang planong ito ngunit marami na tayong ahensya sa kasalukuyan. Nandyan ang Metropolitan Waterworks and Se­werage System at National Water Resources Board para sa water resources, Overseas Workers Welfare Administration at Philippine Overseas Employment Administration, para sa mga OFW at National Disaster Risk Reduction Management Council para sa mga sakuna at delubyo.

Ang aking opinyon dyan ay ayusin lamang ang mga ahensyang ito, bigyan ng mas maliwanag na mandato at siguraduhin na nababantayan nang husto ang pamamalakad nito. Hamon ko sa administras­yon ngayon, tanggalin na ang makalumang pamamaraan at ipa­sok ang makabagong teknolohiya na naging matagumpay para sa ibang karatig bansa sa Asya. Gising Pilipinas!  (RESPONDE ORA MISMO /KUYA JOE)

Please follow and like us:
Read More

GINHAWANG DULOT NG MGA PROYEKTO NG DUTERTE ADMIN

RESPONDE.jpg

SA Lunes, magbubukas na ang opisyal na session ng 18th Congress at mapakikinggan din ng taumbayan ang taunang ulat ng ating Pangulo o State of the Nation Address (SONA).

Ito ang pang-apat na SONA ni Pangulong Duterte at inaasahan natin na dito niya ihahayag ang kanyang magiging mga prayoridad sa natitirang 1,074 days ng kanyang termino.

Marami na ang nagawa ng Duterte administration, lalo na patungkol sa public infrastructure kagaya ng projects sa railways, airports, seaports, land transport at roads, bridges and highways. Marami at naglalakihan ang mga proyekto na ito na sa ilalim ng BUILD, BUILD, BUILD program ng gobyerno, at nakasisiguro tayo na malaki ang magiging impact ng mga ito, hindi lang sa ekonomiya ng a­ting bansa, kundi sa mismong pang-araw-araw na kalakaran natin.

Mas higit sa benepisyo sa ekonomiya, ang mga proyekto ng BBB ang tunay na makapagbibigay sa ating mga mamamayan ng mas kumportableng buhay, na siyang primerong hangarin ng ating Pangulo.

Kaya asahan natin na sa SONA, mas pagdidiinan ni PRRD ang kanyang nais na makita na karamihan sa mga proyekto ng BBB ay magbukas o mag-umpisa dahil ito ang kanyang magiging legacy.

Kaisa po tayo ng ating pamahalaan na isulong ang mga proyekto na yan. Makaaasa po ang taumbayan na kasama tayo sa magtutulak at magtataguyod na mabuksan o maranasan natin lahat ang mga proyekto at ang ginhawang idudulot nito sa atin.

Mabuhay ang Pilipinas!  (RESPONDE ORA MISMO / KUYA JOE)

Please follow and like us:
Read More

SINO ANG TUNAY NA PANALO?

RESPONDE.jpg

USAP-USAPAN na naman ang labanan para sa “Speaker of the House” sa dami ng balitang naglabasan nitong nakaraang mga araw.

Sa ating inihaing opinyon ilang linggo na ang lumipas, aking ipinakita ang mga posibleng sitwasyon na mangyayari.

Kung inyong matatandaan ibinahagi ko na maaaring ang magwagi ay si Cong. Martin Romualdez or “term-sharing” nina Cong. Romualdez at Cong. Lord Allan Velasco. Eto ay kung mag-uusap si ­dating Speaker Gloria ­Macapagal Arroyo at Mayor Sara Duterte. Ngayon tila nagbago ang ihip ng hangin dahil nakialam ulit si Pangulong Duterte sa pamamagitan ng pag-endorso kay Cong. Alan Peter ­Cayetano at Cong. Velasco sa ilalim ng hatian sa termino.

Ang mga pangyayaring ito ay bunga na rin ng gulo na dala ng iba’t ibang panig. Tulad ng pagdedeklara ni Cong. Paolo Duterte ng kanyang pagtakbo at mabilisang pagbawi rito. Biglaan namang pumasok sa labanan si Cong. Isidro Ungab ng pangatlong distrito ng Davao City na napabalitaang suportado ni Cong. Duterte at ng HNP ni Mayor Sara Duterte.

Sa totoo lamang, hindi na ito isang maayos na labanan ngunit tila paligsahan sa isang sabu-ngan. Magulo, maingay at walang kasiguruhan. May ilan nga sa atin ang napapaisip na tila sadya ang mga pangyayari.

Ninais guluhin ng iba’t ibang panig ang sitwasyon upang pumasok si Pangulong Duterte at iendorso sina Cong. Ca-yetano at Cong. Velasco sa isang “term-sharing” na magbibigay ng 15 buwan kay Cayetano at 21 buwan naman kay Velasco.

Hindi man ­sinasadya ng HNP at ni Cong. Duterte na matulungan si Cong. Cayetano upang maging ispiker ay kabaliktaran ang nagyari at lalo pa nila siyang nailagay sa pwesto.

Tila hindi pa tapos ang mala-teleseryeng kwento sa ating kongreso. Sa aking opinyon, ang lahat ng pangyayari ay isang malaking istratehikong hakbang na pinag-aralan at isinagawa ng isang grupo at gayundin ang di sinasadyang hakbang ng HNP at ni Cong. Duterte.

Para sa akin, ang lumalabas na talo ay si Cong. Romualdez na sa simula ay siyang tunay na nangunguna sa mga boto ng nakararami sa kanyang mga kasamahan, sa tulong na rin ni dating Speaker Gloria Macapagal-Arroyo. Si Cong. Velasco naman ay ­masasabi nating hindi buo ang maaaring pagkapanalo sapagkat pwede sanang nakuha niya ang ­pagiging ispiker nang walang kahati sa termino.

Ang tingin kong panalo sa lahat ng ito: una, si Cong. Cayetano dahil ang totoo hindi nya makukuha ang boto ng karamihan sa Kongreso kung wala ang endorso ng Pangulo. Pangalawa, si Pangulong Duterte dahil lalabas na hawak pa rin niya ang Kongreso.  (RESPONDE ORA MISMO / KUYA JOE)

Please follow and like us:
Read More

BANTAYAN ANG MGA HINDI TAPAT SA BAYAN

RESPONDE.jpg

NAGSIMULA na sa tungkulin ang mga hinirang na lokal na opisyal sa iba’t ibang panig ng Pilipinas. Umusbong ang mga tila bagito pa ngunit puno ng mga ideyang maaaring magpabago sa mga lokal na pamahalaan sa ating bansa.

Mula man sa mga kilalang pamilya ang ilan ngunit may bitbit na bago at sariwang mandato para sa taumbayan. Nandyan si Mayor Joy Belmonte ng Quezon City, Mayor Vico Sotto ng Pasig City, Mayor Isko Moreno ng Manila City.

Eto na ang maulan na panahon. Kinakabahan muli ang taumbayan sa mga baha at sakuna na dala nito. Nakita natin ang agarang responde ng a­ting mga bagong halal lalo na sa lungsod ng Quezon. Ikinatuwa ng mga estudyante at magulang ang maaga at maayos na pag-anunsyo ng walang pasok. Magandang pangitain ito na maagap ang ating mga opisyales.

Nangunguna rin sa aksyon itong si Mayor Isko Moreno na nagbigay ng magandang balitang 50% discount sa tuition fee sa Emilio Aguinaldo College sa ilang estudyanteng residente ng Maynila. Ito ay pagkatapos na rin ng sunod-sunod na clearing operations na kanyang isinagawa sa Blumentritt, Divisoria at Carriedo. Sabi nga nila, hindi na basura, tindero at pansamantalang istruktura ang naglipana sa mga daan ng Maynila. Unti-unti nang may liwanag sa daan at patungo na sa tunay na sadya – ang maga­mit ito ng mga motorista.

Hindi rin nalalayo ang mga plano ni Mayor Vico Sotto sa Pasig nang ilabas ang unang executive order na bumuo ng task force na pag-aaralan ang sitwasyon ng trapiko. Kasama na rito ang pagpapatigil muna sa odd-even scheme sa kanilang siyudad. Mainam ngang “unified” or isahan na lang ang patakaran sa lahat para na rin maibsan ang problema sa daan na nakaaapekto sa buhay at negosyo ng bawat Pilipino.

Maliwanag na sabik sa pagbabago ang taumbayan lalo na at mara­ming natibag na dinastiya sa nakaraang halalan. Bumabalik ang usapan ukol sa Anti-Political Dynasty Bill. Ilang dekada na itong nais gawing batas mula pa nang patalsikin sa Pilipinas ang mga Marcos. Hindi maipasa dahil na rin tila ayaw ng mga mambabatas na mawala sila sa kanilang mga pugad lalo pa at sunod-sunod na ang pag-upo ng kani-kanilang mga kapatid, asawa, anak at malapit na kamag-anak. Ang tanong – sila ba ay nagbibigay serbisyo sa bayan o sa kanilang pamilya at pangsariling kapakanan.

Suportahan natin ang mga bagong halal na buo ang loob para sa bayan. Bantayan ang mga politikong hindi tapat sa tungkulin at mapanlinlang. (RESPONDE ORA MISMO / KUYA JOE)

Please follow and like us:
Read More

DAPAT MANAIG ANG KAPAKANAN NG TAUMBAYAN

RESPONDE.jpg

ANG Ispiker sa Kongreso ang ika­apat na pina­kamataas at makapangyarihang opisyal sa pa­mahalaan ng Pilipinas. Nakasaad sa ating batas ang maliwanag na res­ponsibilidad ng isang Ispiker. Ngunit hindi na rin bago sa lahat na ma­rami pang ibang kapangyarihan maliban dito. Kung kaya ganun na lamang ang paligsahan sa pagkamit ng estratehikong posisyon.

Mag-iisang taon na rin nang sapilitang pinagbitiw si dating Speaker Pantaleon Alvarez sa kanyang termino nang mawala ang suporta ng karamihan sa mga kinatawan at naihalal na bagong ispiker nuon si Gloria Macapagal Arroyo. Eto nanaman tayo at nag-aabang sa kung sino ang susunod na hihira­nging makapangyarihang “Speaker of the House”.

Lumitaw ang mga pangalan para sa Speaker­ship. Nandyan sina da­ting Speaker Pantaleon Alvarez ng Davao del Norte, Martin Romualdez ng Leyte, Lord Allan Velasco ng Marinduque, Allan Peter Cayetano ng Taguig City, Aurelio Gonzales ng Pampanga. Napabalitang umugong din ang pangalan ni Paolo Duterte na agaran naman niyang pinabulaanan.

Ngayong papalapit na ang 18th Congress, tumitindi na ang labanan. Sa mga nakaraang linggo, lumabas na tila nais i-endorso ni Pangulong Duterte ang “term sharing” nina Velasco at Cayetano. Ngunit kahapon lamang nagsabi na ang Pangulo na hindi ito makikialam.

Kaya malakas ang ugong-ugong na ang maaaring kampeyon ay eto ngang si Romualdez dahil na rin sa impluwensya ni Speaker Arroyo. Ngunit hindi rin natin maaaring isantabi ang lakas ng hatak ng anak ng Pangulo na si Mayor Sara Duterte na siya namang malapit kay Velasco. Sabihin man ng ilan na siya ay bagito pa, hindi makalilimutan ang bali-balita na naging malaking bahagi ang anak ng Pa­ngulo sa biglaang pagpapalit kay dating Speaker Alvarez at pag-upo ni Speaker Arroyo.

Kung kaya aking nakikinita ang dalawang sitwasyon: Una, si Romualdez ang uupo na Ispiker kung hindi mag-uusap si Sara Duterte at Speaker Arroyo; o Pangalawa, kung sila naman ay mag-uusap, maaaring “term sharing” ni Romualdez sa unang bahagi at Velasco sa natitirang bahagi ng termino.

Anoman ang kalabasan ng seryeng ito sa Kongreso, ang bawat mamamayan ay dapat patuloy na maging mapagmasid. Pagkat sa suma tutal ng lahat, hindi ang kapakanan ng isang tao o isang partido o isang pamilya ang siyang dapat manaig kundi ang kapakanan ng taumbayan, ng bawat Pilipino, ng Pilipinas nating mahal!  (RESPONDE ORA MISMO / KUYA JOE)

Please follow and like us:
Read More

AKSYON LABAN SA MGA SCAM

RESPONDE.jpg

SUNOD-SUNOD ang balita sa mga “scam” nitong mga nakaraang linggo. Una na ngang napabalita ang KAPA sa Southern Mindanao na diumanoy humihingi ng donasyon sa kanilang mga mi­yembro at kumikita ng malaking pera mula rito. Eto ay pinabulaanan ng kanilang mga lider at miyembro. Milyon-milyong katao ang sumisigaw na KAPA ang naging sugo ng kanilang buhay. Halos gabi-gabi ang kanilang prayer rally para maibalik ang operasyon ng mga opisina at umaasa pa rin ang bawat isa na makatatanggap ng kanilang inaasam-asam na payout.

Ang nakagugulat ay wala ni isa mang pribadong complainant ang lumabas upang maumpisahan ang proseso para sa kasong estafa or syndica­ted estafa. Gayunpaman, mabilis pa sa alas kwatro ang NBI matapos iutos ni Pangulong Duterte na ipa­sara ang KAPA at matigil na ang patuloy na panlilinlang sa taumbayan.

Hindi pa nga lumipas ang ilang linggo, heto naman at may napabalitang “scam” din sa hanay mismo ng gobyerno sa opisina ng Philhealth. “Ghost Patients” o iyong mga patay na diumano ay nagpapa-dialysis pa sa mga center at ospital. At isa na rito ang WellMed Dialysis and Laboratory Center o WellMed na patuloy umano sa pa­ngungubra sa Philhealth kahit nga patay na ang pasyenteng nabigyan ng serbisyong dialysis.

Sa pagkakataong ito, merong complainants na naglabasan, mga whistleblower na dating empleyado ng WellMed na nagsiwalat sa scam na umuubos sa pondo ng gob­yerno para sa tunay na maysakit. Muling nagpalabas ng statement si Pangulong Duterte, inaatasan ang NBI “to arrest the idiot” upang mapabilis ang paghuli sa mga sangkot dito.

Dalawang pagkakataon ng pandaraya. Isa, mula sa pribadong sektor at isa mula sa sektor ng gobyerno. Isa, walang complainant at isa, meron. Ngunit sa dalawang pagkakataon, nanindigan ang ama ng sambayanang Pilipino! Itigil na ang panlilinlang na ito.

Mainam ang na­ging aksyon ng ating Pa­ngulo sa parehong kaso. Ang naglalaban lamang sa aking isipan ay kung tama ba ang naging pro­seso sa KAPA? Ang sabi ng mga abogado, base sa ating mga batas, dapat may complainant bago maumpisahan ang anomang aksyon. Ngunit kung ating susuriin, “pre-emptive measure” ang naging hakbang ni Pangulong Duterte upang mapatigil ang “scam”. Saludo ako sa ‘yo sa pagkakataong ito.  (RESPONDE ORA MISMO / KUYA JOE)

Please follow and like us:
Read More

MABUHAY ANG PILIPINAS!

RESPONDE.jpg

SABAY-SABAY nating sinalubong ang Araw ng Kalayaan ng ating bansang Pilipinas! Ang kalayaan na ating natamo nuong 1898 mula sa bansang Espanya ay simbolo ng katatagan ng ating mga ninuno na nagbuwis ng buhay upang tayo ay umabot sa panahong ito. Napakahalaga ang magbalik-tanaw lalo na sa mga kabataan nga­yon na tila hindi nagkaroon ng pagkakataong masilayan ang istorya ng nakaraan.

300 taon na ang lumipas. Napakaraming bayani ang humarap sa tawag ng ating bayan. Marami ang mga lumaban sa sulat-kamay at gayundin sa kamaong bakbakan. Sila ay kinilala at binigyang pugay. Marami rin ang tahimik lamang lumaban at s’ya namang bumago sa ating kasaysayan.

Sa Pilipinas man o sa ibayong bansa, patuloy ang laban ng bawat Pilipino para sa kani-kanilang bersyon ng kalayaan. Kung kaya atin ding ipagdasal sa Poong Maykapal na gabayan tayong lahat sa ating hamon sa buhay.

Matatandaang tumindig ang Administras­yong Duterte laban sa basura ng Canada. Eto muli ang pagsubok mula naman sa Tsina pagkatapos ng banggaan ng mga bangka sa West Philippine Sea. Ang “collision” sa dagat ay minsan hindi maiiwasan. Ngunit ang pag-abandona sa ating mga Pilipinong mangingisda ay isang paglabag sa internasyonal na kasunduan sa ilalim ng UNCLOS. Kung kaya ito ay hindi dapat palagpasin at ating labanan.

Kung ating susuriin ay mahusay ang ating liderato, sapat ang ating mga batas. Ngunit, sa suma total, nasa ating mga kamay pa rin nakasalalay ang ating buhay at kinabukasan. Lumaban tayo pag tayo’y inaapi. Patuloy na isulong ang kalayaan laban sa pang-aalipusta ng ibang bansa at gayun na rin sa iligal na droga, krimen, at korapsyon.

Mainam na naglipana ang pagdiriwang ng bawat isa mula sa gobyerno at pati na rin sa pribadong sektor, dito sa atin at sa bawat sulok ng mundo. Ang paggunita ng sambayanang Pilipino ay nagbibigay pag-asa na kahit anoman ang a­ting pagkakaiba sa ating paniniwala at sa ating pinagmulan, isa lamang ang ating hangarin – ang magbuklod bilang isang malayang Pilipinas kung saan masaya, malusog, maayos at maunlad ang bawat Pilipino.

Binabati kita sa iyong kalayaan! Mabuhay Pilipinas! (RESPONDE ORA MISMO / KUYA JOE)

Please follow and like us:
Read More