MAIBA KAYA ANG PANGAKO NI MAYOR ISKO?

RATSADAHIN NATIN

THROWBACK muna tayo. Taon 1998-2001 nang maging konsehal ng Maynila si Isko Moreno. Na­ging vice mayor siya ni Lim noong 2007-2013. May 2012, hinikayat siya ni Estrada na maging running mate nito sa pagtakbong alkalde ng lungsod. Sabi sa kanya ni Estrada, one term lamang ito at ‘di na muling tatakbo sa mga darating pang mayoral race. Nag-bise nga siya kay Estrada noong halalan ng 2013. At kapwa sila nagwagi sa May 13, 2013 elections.

Pero ang pangako kay Moreno ni Estrada na “one term” lang na magme-ma­yor ay hindi nito tinupad. Kaya naman marahil nang panahong iyon ay napilitan siyang tumakbong senador para lamang hindi siya mawala sa limelight. Sa panunungkulan nina Lim at Estrada bilang alkalde ng Maynila ay nabansot ang kanyang political career.

oOo

Mauupo na si Isko Moreno bilang alkalde ng Maynila sa darating na June 30. Sa wakas ay natupad na rin ang matagal na niyang pangarap na maging mayor ng lungsod. Tinalo kasi niya noong nakalipas na May 13 elections sina ex-President Mayor Erap Estrada at ex-Mayor Alfredo Lim. Sabi-sabi, inilampaso raw niya sa botohan ang dalawang tanders. Ang kanilang iskor: Moreno — 357,925; Estrada — 210,605; at Lim – 138,923.

Ayon sa nakasalamuha nating mga miron na sumubaybay sa nakaraang mayoral race sa Maynila, masakit daw para kay Moreno ang pagkabigo matapos siyang magpaubaya at magbigay-daan noon  kina Lim at Estrada  na kapwa tumakbong alkalde ng lungsod. Ang malakas na isinisigaw ng kanyang damdamin ay tila na-feel umano ng mga botanteng Manileño. Hayun, siya na ngayon ang nasa dating pwesto nina Lim at Estrada.

Teka… Sa panahon ng mga pangangampanya noon ni Moreno ay marami siyang ipinangako sa mga Manileño. Aniya, pagtutuunan ng kanyang admi­nistrasyon ang nauukol sa usaping pang-edukasyon, pagkakaloob ng maayos na pabahay at serbisyong pangkalusugan sa mga mamamayan, tutugunan din ang problema sa trapiko at basura, at kung ano-ano pa.

Pero kasabihan nga, ang bottom line ng lahat ng kandidato na pumapaloob sa political arena ay ang maipanalo ang kanilang laban. Kaya syempre pa, pati na ang langit ay ipangangako nila sa panunuyo sa mga botante.

Maiba kaya ang mga pangako ni Mayor Isko sa tinatawag na pangakong politiko? Well, tsapter muna tayo. (RATSADAHIN NATIN / REY ATALIA)

Please follow and like us:
Read More

ILLEGAL DRUG VIRUS LAGANAP NA

RATSADAHIN NATIN

DAHIL sa pinaigting na kampanya ng ating gobyerno kontra illegal drugs, sa hanay ng mga drug pusher at user ay 5,176 na ang natitigbak at 170,689 naman ang nalalambat.

Ito ay resulta ng walang humpay na operasyon laban sa droga ng mga awtoridad mula noong July 1, 2016 hanggang January 31, 2019.

Tingin natin, tila yata hindi maubos-ubos ng administrasyong Duterte ang mga drug pusher at user sa buong bansa. Maaaring epekto na rin ito ng drug virus na bunga naman ng matinding kahirapan sa ating bayan. Sabi ng isang tambay sa kanto, mas okay sa kanya ang matodas sa bala ng baril sa pagtutulak ng droga, kaysa naman madedo na dilat ang mata sa gutom. At kahit pa-joke ang tono niyon ay maituturing din naman na isa nga ang matinding kahirapan sa mga totoong dahilan sa  pagsusulputan ng tulak sa ating mga komunidad.

Sa kasalukuyan, maging ang mundo ng politika sa ating bayang magiliw ay sinasabing infected na rin ng makamandag na illegal drug virus. Matatandaan na bago ang May 13 elections ay 46 na narco-politician ang pinangalanan ni PDu30. Sa bilang na ito, 36 ang tumakbo sa iba’t ibang pwesto sa naturang halalan. At ayon mismo sa ulat ng PDEA, 25 sa 36 na tinaguriang narco-politician ang nanalo sa idinaos na botohan.

Sabi ni PDEA Chief Aaron Aquino, posible umanong nanalo ang mga narco politician dahil sa pamumudmod ng pera o kaya ay dahil sa pagtulong sa mga kababayan nating walang-wala.

Gawin nating halimbawa ang pagsagot ng isang narco-politician sa mga gastusin ng isang maysakit na nangangailangan ng atensiyong medikal, pagpapalibing sa isang namatay na kalugar, pagbibigay ng scholarship sa mga dukhang mag-aaral, at iba pa.

Totoong laganap na sa “Pinas ang illegal drug virus. At hindi tayo kontra sa drug war na isinusulong ng administrasyong Duterte. Ang sa atin lang, pagtuunan din sana ng pansin ng Pangulo ang pagbaka sa kahirapan na nararanasan sa ngayon ng milyong  madlang pipol sa ‘Pinas. (Ratsadahin Natin / Rey Atalia)

Please follow and like us:
Read More

MAY PUSONG POLITIKO; RAISE YOUR RIGHT HAND, PLEASE!

RATSADAHIN NATIN

SA nagdaang Labor Day noong Mayo 1, hiniling sa ating gob¬yerno ng mga manggagawa at ng ordinaryong kawani na dagdagan ang kanilang minimum wage. Sa Metro Manila, ang arawang sweldo ay P512. Mas mababa rito ang rate ng mga nasa probinsya.

Ang hirit ng Trade Union Congress of the Philippines na sinusuportahan ng Anak-Pawis para sa minimum wage ay P750. Kasi nga, sobra na ang taas sa presyo ng mga bilihin, nariyan pa ang dagdag singil sa koryente at tubig. At maya’t maya rin ang oil price hike. Opkors, mayroon itong chain reaction.

Ang manggagawa at may-ari ng kompanya ay di-mabubuhay nang wala ang isa sa kanilang dalawa. Daig pa nga raw nila ang mag-asawa na kapag di-magkasundo ay pwedeng mag-babu sa isa’t isa. Kaya naman masasabing forever silang mag-partner in life.

Ang masaklap sa panig ng mga nabubuhay sa arawang sweldo, ang kanilang pamilya ay nakararanas na ng matinding gutom at wala pang kakayahang magpadoktor man lang. Kung minsan, naibubulalas tuloy ng ilan sa labor sector: “Gusto ‘ata ng mga nasa gobyerno at ng mga may-ari ng kompanya na sa leeg na kami dapat maghigpit ng sinturon.”

Idaraos ngayong Lunes ang May 13, 2019 elections. Sangkatutak ang mga kandidatong naghahangad na maluklok sa pwesto sa Senado at ma¬ging sa pamahalaang lokal man sa buong bansa.

Sa araw na ito gagamitin ng mga mamamayan ng bansa ang karapatan nila sa pagpili ng mga opisyal ng pamahalaang lokal o nasyunal. Boboto syempre ang isang botante ayon sa kanyang kursunada.

Para sa nabanggit na okasyon, ikinampanya ng ibang samahang sibiko ang pagtataguyod ng isang mapayapa at malinis na halalan. At may nagsasabi rin na dapat natin pusuan ang mga kandidato na karapat-dapat masulat sa balota ang pangalan.

Teka, pupusuan natin ang mga politiko. Pero sino-sino naman kaya sa kanila ang may puso na totoong magmamalasakit sa interes ng bayan at sa ating mga kababayan?

Sige nga, tingnan nga natin kung sino o sino-sino sa hanay ng mga kandidato sa ngayon ang makapagtataas ng kamay. Raise your hand, please! Kung nahihiyang magtaas ng kamay, paa na lang ang itaas. At kung may putok sa kilikili, huwag na lang, yuks!  (RATSADAHIN NATIN / REY ATALIA)

Please follow and like us:
Read More