PVL OPEN CONFERENCE SWEEP: CREAMLINE KAMPEON!

(NI LOUIS AQUINO/PHOTO BY MJ ROMERO)

WINALIS ng Creamline ang Petro Gazz, 29-27, 25-22, 27-25, sa kanilang best-of-three finals series Sabado sa The Arena, San Juan para angkinin ang Premier Volleyball League Open Conference title.

Umiskor ng 18 puntos si Alyssa Valdez, habang nagdagdag ng 16 ang tinanghal na Open Conference MVP na si Jema Galanza para sa Cool Smashers na nagtala ng pambihirang 20-0 record sa buong tournament.

“Alam niyo, napakasarap sa pakiramdam na nananalo talaga, lalo na’t na-sweep din namin,” sabi ni Valdez, nagtamo ng mid-foot injury sa kalagitnaan ng conference.

“We grew as a team din this conference, actually napakahirap ng pagkuha ng panalo namin, but I believe we had so many struggles and challenges this conference, that’s why we pulled through,” dagdag niya.

Lamang pa ang Petro Gazz sa third set, 19-16, nang tatlong magkakasunod na puntos ang pinalo ni Valdez upang itabla ang iskor sa 19-all.

Muling inagaw ng Gazz ang abante, 21-20, ngunit umatake ng back-to-back si Galanza upang muling makuha ng Creamline ang kalamangan, 23-22.

Nakuha ng Angels ang set point, 24-23, matapos tumama sa antena ang tira ni Galanza, na agad bumawi para muling itabla ang iskor sa 25-all.

Dinala ni Valdez sa match point ang Cool Smashers at sa error ni Angels’ Paneng Mercado ay tuluyang naselyuhan ang panalo ng Creamline.

Ito ang third title overall ng koponan matapos silang magkampeon sa Open Conference at Reinforced Conference noong nakaraang taon.

Samantala, dahil sa pag-sweep ng Creamline sa Petro Gazz, awtomatikong nakuha ng BanKo  ang bronze medal finish.

Nakuha ng Banko ang Game One sa straight sets, habang nakabawi ang Motolite sa four sets sa kanilang Game Two best-of-three for third series.

Please follow and like us:
Read More