3 PULIS INIREKLAMO: PUWET NG 2 HULI PINASAKAN NG SILI

SILI

NAGA CITY – Nasa hot water ang tatlong pulis makaraang ireklamo ng pagtortyur sa dalawang lalaking kanilang hinuli na umano’y pinasakan nila ng sili sa puwet, iniulat nitong Huwebes sa lungsod na ito.

Ayon sa reklamo nina Joseph Asignado Jr. at Eduardo Palmiano, Jr., kapwa residente ng Barangay Abella, Naga City, basta na lamang silang dinakip ng tatlong tauhan ng Naga City Police Office, nang walang kaukulang dokumento.

Pagkaraan ay binugbog umano sila at pinasakan ng sili ang kanilang puwetan.

Ayon naman kay Police Community Relations chief P/Maj. Augusto Manila ng Naga City Police Office, hawak na nila ang tatlong pulis na inirereklamo at hindi muna nila ito pinangalanan.

Sinabi pa nito, pinagpapaliwanag nila ang tatlong pulis at nagsasagawa ng imbestigasyon at kapag napatunayang may paglabag sa batas ay kanila itong parurusahan at mahaharap sa kaukulang kaso.

Siniguro rin ng pamunuan ng NCPO na mabigyan ng agarang aksiyon ang nasabing insidente at hindi nila ito kukunsinthin bilang bahagi ng internal cleansing sa hanay ng PNP. (ANNIE PINEDA)

Please follow and like us:
Read More

14,000 PUWERSA NG PNP KASADO NA SA TRASLACION 2020

TINIYAK ni Interior and Local Government Secretary Eduardo Año na sasapat  ang kabuuang 13,624 pulis na pakikilusin para sa seguridad at kaayusan ng Traslacion ng Poong Itim na Nazareno ngayong Huwebes.

Sinabi ng kalihim na bagama’,t pinaigsi ang ruta ng traslacion, kinakailangan pa ring masiguro ang kaligtasan ng libu-libong deboto na inaasahang daragsa sa prusisyon.

“Despite it taking a shorter route than usual, we guarantee the public and the devotees of the Black Nazarene that all bases are covered and all security measures are in place for the Traslacion 2020,” pahayag ni Año.

“This annual display of faith is expected to attract thousands of believers kaya naman siniguro namin na makakaagapay tayo sa pagtitiyak ng seguridad ng lahat,” dagdag pa ng kalihim.

Nauna na aniyang naplantsa ng DILG, Philippine National Police at Bureau of Fire Protection gayundin ng iba pang law enforcement units ang plano ng seguridad at ang daloy ng prusisyon mula sa Quirino Grandstand pabalik ng Quiapo church sa Maynila.

Sinasabing mayroong 2,144 pulis na binubuo ng Regional Mobile Force Battalion at Special Action Force ang magse-secure sa tinawag na “andas wall” habang mayroong 1,065 pulis mula sa Eastern Police District (EPD) ang mangangasiwa sa crowd control at 1,206 pulis mula sa Regional Headquarters at patrolmen ay nakaposisyon sa paligid ng Quiapo.

Hiwalay pa ito sa malaking grupo ng puwersa ng PNP at BFP na nakatutok sa mga ruta ng traslacion at sa iba pang krimen na maaaring mangyari sa panahon ng pagdiriwang ng Kapistahan ng Poong Itim na Nazareno.

“Alam nating ang Traslacion sa kapistahan ng Itim na Nazareno ay isa sa mga pinakamasidhing pagpapakita ng pananampalataya ng ating mga kababayan na nagtitipon ng daang libong Filipino kaya naman ginawa natin ang kinakailangang paghahanda at itinalaga ang ating kapulisan para sa kaligtasan ng lahat,” ani Año.

“Sa lahat po ng ating ginagawa, hinihiling po namin na sana disiplina muna. Nauunawaan po namin na ito ay pagpapahayag ng inyong pananampalataya, ngunit una pa rin po ang hangarin nating walang masaktan at maging ligtas ang lahat kaya sana po makiisa tayo,” paalala pa ng kalihim.  (JG Tumbado)

Please follow and like us:
Read More

PULIS NCRPO SUMUNDO SA MISIS SA PARTY, INAMBUS

(NI DAVE MEDINA)

AGAW buhay sa pagamutan ang isang aktibong pulis makaraang tambangan ng riding in tandem sa Muntinlupa City, Sabado ng madaling araw.

Sinundo lamang ni NCRPO Base Policeman Ariel Gatdula ang kanyang asawa sa Christmas party ng Bgy. Putatan at sakay ng kanyang motor pabalik na ng kanilang bahay sa B5 L4 Manggahan St., Esporlas Itaas, Brgy Putatan, Muntinlupa City, nang buntutan ng riding in tandem saka binaril nang minsanan sa ulo bandang ala una ng madaling araw, sa Bruger St., malapit sa Boss Burger, Brgy Putatan, Muntinlupa City.

Ayon sa witness na si Frances Mira Dela Cruz, hepe ng VAWC  Brgy Putatan, Muntinlupa City, dalawang lalaki ang nakasakay sa motorsiklo na biglang sumulpot at pinaputukan sa ulo ang biktima.

Tumakas aniya ang riding in tandem patungo ng South Bound direction na dala ang baril na ginamit sa ambush .

Isinugod naman ng mga sumaklolong Bgy. Staff si Gatdula sa Medical Center Muntinlupa at doon ginagamot.

Agaran ding nagsagawa ang Police Community Precinct 2 Muntinlupa City Police Station sa pangunguna nina  PSSg Ronald Allan Belarmino at PCpl Randolf Kampoli ng follow-up operation para makilala at maaresto ang mga suspek pero nabigo ang mga ito.

Samantala, tuloy ang pagsasagawa ng malalim na imbestigasyon nina PSMS Arthur  Cortez, PSMS Mark Sherwin  Forastero, PMSg Allan Besa at PSSg Jomil Angelitud ng Criminal Investigation Unit ng Muntinlupa City Police Station.

Please follow and like us:
Read More

2 PULIS PATAY, 4 PA SUGATAN SA SUV NA SUMALPOK SA PUNO

zamboanga sibugay

(NI NICK ECHEVARRIA)

PATAY ang dalawang pulis habang sugatan ang apat na iba pa matapos bumaligtad ang sinasakyan nilang sports utility vehicle (SUV) nang mawalan ng kontrol sa matalim na kurbada sa kahabaan ng national highway sa bayan ng Malangas, Zamboanga Sibugay Lunes ng gabi.

Dead on the spot matapos magtamo ng malubhang pinsala sa ulo at katawan ang mga biktimang sina P/Cpl. Jourecel Jake Revilla Celestial at Patrolman Alexander Toribio Laquinon, habang kasalukuyang nakaratay sa Wilfredo Palma Memorial Hospital sa Diplahan, Zamboanga Sibugay ang apat nilang kasamahan na sina P/Cpl. Rommel Pangate Apiong; P/Pat. Stephen Ray Lanigao Alicando, 23, P/Pat. Logie Suarez Servo, 24, at P/Pat. Arcel Sugabo Matugas, na pawang mga miyembro ng 903rd Maneuver Company Regional Mobile Force Battalion 9 na nakabase sa Camp Del Castillo sa Barangay  Candilis, Malangas, Zamboanga Sibugay.

Sa ulat na ipinadala ng Police Regional Office (PRO) 9 sa Camp Crame, naganap ang insidente dakong alas 6:30 ng gabi sa kahabaan ng National highway sakop ng Purok 3, Barangay Guilawa ng nabatid na bayan.

Lulan ng Nissan Frontier Navara na may plakang KEX-497 ang mga biktima na minamaneho ni P/Cpl. Apiong ng mawalan ito ng kalkulasyon pagsapit sa kurbadang bahagi sa nabanggit lugar at bumangga sa tatlong puno ng mahogany hanggang sa bumaligtad ang sinasakyang SUV ng mga pulis na naging sanhi ng kamatayan ng dalawang pulis at pagkakasugat ng apat na kasamahan ng mga ito.

Mabilis namang naisugod sa pagamutan ang mga sugatang pulis kung saan naka confine ang mga ito dahil sa tinamong mga pinsala sa ulo at katawan.

Please follow and like us:
Read More

PULIS PATAY SA AMBUSH

(NI KOI HIPOLITO

PALAISIPAN pa sa ngayon ang motibo sa pamamaril hanggang sa mapatay ng isang pulis habang sakay ng motorsiklo bandang 7:20 ng gabi ng Lunes sa MLQ St., Purok 1 ng Bagumbayan sa Taguig City.

Nakilala ang biktima na si PMSgt. Napoleon Zamora, 45, naka-assign sa Regional Health Service Unit (RHSU) ng Camp Bagong Diwa sa Taguig City.

Base sa inisyal na imbestigasyon ng pulisya lulan ng kanyang motorsiklong Yamaha NMAX 155 na kulay gray at walang plaka ang biktima nang harangin ng hindi bababa sa apat na mga hindi kilalang suspek at pinaputukan ng maraming beses sa iba’t ibang parte ng katawan ng hindi pa batid na mga kalibre ng baril na naging sanhi ng agarang pagkamatay nito.

Mabilis naman tumakas ang mga suspek matapos ang krimen.

Naglatag na ngayon ng follow up operation ang Taguig City police station para malaman ang mga posibleng pagkatao ng mga suspek at malaman ang motibo ng pamamaslang.

Please follow and like us:
Read More

2 PULIS, 30 PA TIMBOG SA TUPADA

(NI JG TUMBADO)

KALABOSO ngayon ang dalawang aktibong pulis gayundin ang 31 iba pa matapos mahuli sa ilegal na sabungan sa Caloocan City, Linggo ng umaga.

Kinilala ang mga pulis na sina sina Patrolman Randy Yape at Police Corporal Mark Joseph Patayan na dinakip ng mga tauhan ng Philippine National Police Integrated Monitoring and Enforcement Group (PNP-IMEG).

Dakong alas-10:45 ng umaga nang ilunsad ng mga otoridad ang anti-illegal cockfighting operation nito sa Rosal Street, San Lazaro Tala, ng nasabing lungsod.

Narekober din sa lugar ang mga manok na panabong at iba pang gamit.

Hawak na ng IMEG ang kustodiya sa mga pulis habang nai-turn over sa Northern Police District (NPD) ang mga sibilyang dinampot sa operasyon.

Nahaharap ang mga suspek sa kasong paglabag sa Presidential Decree 455 o Illegal Cockfighting at kasong administratibo para sa mga suspek na pulis.

 

Please follow and like us:
Read More

TRAFFIC ENFORCER RUMESPONDE SA AKSIDENTE PATAY SA SUV NG PULIS 

accident12

(NI ANNIE PINEDA)

PATAY ang isang traffic enforcer makaraan mahagip ng humaharurot na sports utility vehicle ng kasapi ng Philippine National Police (PNP) iniulat, Huwebes ng hapon sa Davao City.

Kinilala ang biktimang si Rey Sison, kasapi ng traffic enforcer sa Davao City Transport and Traffic Management Office (CTTMO) habang hawak naman ng pulisya ang suspek at driver ng SUV na kinilalang si PLt. Julius Edpalina, na sumasailalim sa Officer Basic Course sa Regional Training Center sa Mintal.

Batay sa report ng Talomo Police, dakong alas 5:00 ng hapon nang maganap ang insidente sa bypass Road Maa, Davao City.

Lumabas sa imbestigasyon, kasalukuyan nag-iimbestiga ang biktima sa naturang lugar na may naganap na aksidente nang mag-overtake umano ang suspek .

Sa bilis ng pagpapatakbo ng suspek sa kanyang sasakyan nahagip nito ang biktima at tumilapon ng ilang metro ang layo at nabangga pa ng van na agad nitong ikinamatay.

Dinakip naman ng otoridad ang suspek at nahaharap sa kasong reckless imprudence resulting in homicide.

 

Please follow and like us:
Read More

2 HOLDAPER, PATAY; 1 PULIS KRITIKAL SA MANILA SHOOTOUT

(NI RENE CRISOSTOMO)

DALAWANG hinihinalang holdaper ang napatay ng mga operatiba ng Manila Police District habang patuloy na inoobserbahan sa pinagdalhang pagamutan ang isa sa pulis,sa tinamaan ng 4 na beses sa katawan kamakalawa ng gabi sa Sta.Cruz,Manila.

Unang naka engkuwentro ng mga tauhan ni P/ Lt.Col. Reynaldo Magdaluyo ,Station Commander ng MPD-PS 3 ,ang suspek na si Rodel Vicente, 34, ng 1555 New Antipolo St.Sta.Cruz.

Si Vicente ang bumaril at kasalukuyang kritikal sa  Jose Reyes Memorial Medical Center (JRMMC), kay  PCpl Edgil Bombase dahil sa 4 na  tama nang bala sa tiyan at sa atay.

Matapos  ang insidente nang shootout, nagsagawa ng follow- up operation sa hanay ni P/ Insp. Rowell Robles , hepe ng MPD-Alvarez Police Community Precinct hanggang sa mamataan ng mga ito ang unang suspek ,na nakilalang  si Antonio Yap, 45, at residente ng 649 Blk15 Port Area, Manila.

Batay sa ulat ni Det. Jansen Rey San Pedro, naganap ang unang engkuwentro ng bandang alas-10:35 ng gabi sa riles ng tren sa panulukan ng Tomas Mapua St.,at Old Antipolo St., Sta.Cruz

Papasok pa lamang si Cpl.Bombase nang salubungin   ito mga putok ng baril, galing kay Vicente .

Narekober ng mga awtoridad ang baril na  9 mm na kalibreng baril; 50 gramong hinihinalang shabu ; P130,000 cash ; 26 na tabletang ecstasy ; timbangan; iba’t ibang klase ng mga alahas na silver .

Gayunman ,nagpasiya si P/Insp. Robles ang mag follow – up sa kaso ng bandang 11: 30 ng hatinggabi  hanggang sa maka engkuwentro nila si Yap sa kahabaan ng  Rizal Avenue, malapit sa Quiricada St. sa Sta.Cruz .

Napatay si Yap at narekober dito ang Glock 17 pistol at ilang gamit.

Bago ang insidente inutusan umano ni P/ Capt. Kherwin Evangelista, block commander ng MPD – Blumentritt Police Community Precinct ng Station 3,  si Cpl. Bombase at dalawa pang pulis  na magsagawa ng beripikasyon at follow-up operation sa naganap na holdapan sa kanilang nasasakupan sa  Blumentritt St.sa Sta.Cruz.

Dito na nakatanggap ng impormasyon si Bombase na may ilang armadong indibiduwal ang namataan sa panulukan ng Tomas Mapua at Antipolo St. kaya nirespondehan ng mga pulis. Lumalapit pa lamang sa grupo ang mga pulis nang paputukan si Bombase na tinamaan agad ng 4 na bala.

 

Please follow and like us:
Read More

PULIS, 1 PA, DEDBOL SA BUY BUST OPERATION SA BULACAN

(NI JG TUMBADO)

DEDBOL ang isang aktibong pulis at kasabwat nitong lalaki makaraan silang makipagbarilan sa pulisya sa kalagitnaan ng buy bust operation sa San Jose Del Monte City, Bulacan, Huwebes ng gabi.

Nakilala ang dalawang napaslang na sina Police Corporal Jayvee Ancho, at ang target ng operasyon na si alyas “Jun”.

Si Ancho ay nakadestino umano sa Provincial Police Office ng Bulacan Provincial Drug Enforcement Group.

Ayon kay Police Lt. Col. Orlando Castil, Jr., chief of police ng San Jose Del Monte, nangyari ang engkuwentro sa Barangay Gaya-Gaya, pasado alas 10 ng gabi.

Nagawa umano ng poseur buyer na makabili ng P500 halaga ng shabu sa dalawa pero nakatunog ang mga ito na pulis ang kanilang nakatransaksyon kaya bumunot na sila ng baril at pinaputukan ito.

Agad namang nakaganti ang mga pulis kung saan napuruhan ang mga suspek na kapwa wala nang buhay na bumulagta.

Please follow and like us:
Read More

MEAL, LOAD ALLOWANCE DAGDAG BENEPISYO SA PULIS NG SEA GAMES

PULIS-8

(NI LYSSA VILLAROMAN)

IPINAHAYAG ni National Capital Region Police Office chief, Brigadier Debold Sinas na makatatanggap ng allowance ang mga pulis na nakatalaga sa 30th Southeast Asian Games.

“Lahat ‘yan sa first pa lang na deployment, you receive P500 saka P100, for the allowance and cellphone load tapos daily mayroon pa ‘yang pagkain, P100 per meal—three times po ‘yan,” ayon kay Sinas.

Sinabi ni Sinas na dalawang shift ang kanilang isasagawa bilang bahagi ng security measure ng SEA games.

“Maski sa gabi ka naka-shift, mayroon kang allowance na P300,” ayon kay Sinas at dagdag pa nito na ang meal allowance ay matatangap lamang ng mga pulis sa kanilang isasagawang daily accounting.

Pahayag pa ni Sinas na nasa 10,000 security forces ang naka-deploy na sa ilang bahagi ng Metro Manila na ang 8,000 ay mga pulis samantalng ang 2,000 ay galing naman sa kanilang counterpart na militar.

Sinabi pa ni Sinas na ang mga pulis na naka-deploy sa SEA games ay handa na upang tugunan ang kanilang mga responsibilidad sa panahon ng SEA games.

Nasa 27,000 pulis ang naka-deploy na sa apat  ng region ng bansa kung saan gaganapin ang iba’t ibang sport events.

Ayon pa kay Sinas na nasa 1,680 atleta na ang dumating sa bansa at kasalukuyan ngayong nanunuluyan sa mga hotel sa Metro Manila.

“As of now, 6 a.m., 1,680 athletes na po ang dumating sa lahat ng 27 billet areas. There are 30 billet areas, ‘yung tatlo wala pa po naka-schedule pa po sa December ang arrival noon,” ayon kay Sinas.

Sinabi rin ni Sinas na ang crime rate sa capital region simula November 25 hangang 28 ay bumaba dahil sa heightened police visibility.

 

Please follow and like us:
Read More

PULIS KULONG SA RAPE NG INMATE 

rape 12

(NI ANNIE PINEDA)

KULUNGAN ang kinabagsakan ng isang kawani ng Philippine National Police (PNP) nang hindi ito nakapagpigil sa panggigigil matapos ireklamo ng panggagahasa ng isang babaeng preso, sa lalawigan ng Quezon.

Kinilala ang suspek na si Police Master Sergeant Romulo Carpio, ng Atimonan Police.

Ayon kay PMaj. Alejandro Onquit, Chief of Police ng PNP-Atimonan, bandang  alas 11:00 ng umaga noong Nobyembre 24 naganap ang insidente at na-ireport lamang ito ng biktima kinaumagahan.

Kuwento ng 49-anyos na biktima, habang naliligo siya sa banyo sa nasabing himpilan ng pulisya, nang biglang katukin ng suspek ang pintuan at sapilitan siyang ginahasa .

Sinabi pa nito, sa takot niya ay hindi agad-agad siya nakapagsumbong at kinabukasan pa niya ito inireport.

Isinailalim naman sa pagsusuri ang biktiam at positibong ginahasa ito ng suspek.  Agad naman dinakip ng kanyang mga kabaro ang suspek at posibleng mahaharap sa kasong rape at administratibo.

Nanganganib din umanong matanggal sa serbisyo ang suspek dahil sa insidente.

 

Please follow and like us:
Read More

NANAY UMAWAT SA AWAY MAG-ASAWA NG ANAK, PATAY; 1 PA SUGATAN

(NI ELOISA SILVERIO)

PATAY ang isang 78-anyos na ginang makaraang mabaril ng sarili nitong anak na pulis matapos subukang umawat sa umanoy away ng kaniyang anak na pulis at ng ka-live-in nito, at pagkakasugat ng isang menor de edad, Lunes ng hapon sa loob ng kanilang bahay sa Sitio Pader, Barangay Pulong Maragul, Angeles City, Pampanga.

Kinilala ni Angeles City Police Station 3 chief PCol. Joyce Patrick Sanggalang ang suspek na si Police Major Dante Cabungcal, nakatalaga umano bilang deputy chief of police ng Talavera Police Station, at nakatira sa nasabing lugar.

Kinilala naman ang biktima na si  Patricia Cabungcal, ina ng suspek, habang sugatan din ang pamangkin ng suspek na kinilala lang na si “Moquito”, 17, pawang ng nasab ring bayan.

Base sa imbestigasyon, naganap ang pamamaril bandang alas-4:30 ng hapon sa loob ng pamamahay ng mga suspek.

Nabatid na narinig umano ng inang biktima ang kanyang anak na nakikipagtalo sa kalive-in nito na si Connie Brillo, 40, at sinubukan umanong pumagitna at awatin ang mag-partner.

Ayon sa mga kapitbahay, nakarinig umano sila ng tatlong putok mula sa loob ng bahay at nasundan ng lima pang putok at dito nakitang lumalabas ang duguang pamangkin ng suspek at humihingi ng saklolo na agad naman naidala sa ospital.

Mabilis naman nakaresponde ang mga operatiba ng Angeles Police Station 3 sa pangunguna ni Col. Sanggalang at sinubukan na pasukuin ang suspek na nagkulong sa kanyang kuwarto kasama ang kalive-in subalit hiniling ng suspek na sa isang media person lang siya susuko.

Dumating sa area ang mga tauhan ng Special Weapon And Tactics (SWAT) kasama ang ni-request na media at sinimulan ang negosasyon.

Pagkaraan ng halos apat na oras ay kusang sumuko ang suspek ngunit hindi nito idinetalye kung paano niya nabaril at napatay ang ina.

Kasalukuyan nakapiit ang suspek sa himpilan ng pulisya at inihahanda na ang kaukulang kasong kakaharapin nito.

 

Please follow and like us:
Read More

OPISYAL NG PNP ITINUMBA SA HARAP NG MISIS 

(NI ANNIE PINEDA)

DUGUANG bumulagta sa harap mismo ng kanyang misis ang isang opisyal ng Philippine National Police (PNP) matapos pagbabarilin ng hindi pa kilalang suspek na naka-motorsiklo habang naglalakad kasama ang asawa, Huwebes ng gabi  sa Cebu City.

Kinilala ang biktimang si Police Lieutenant Colonel Joie Yape, dating Provincial Intelligence Branch ng Cebu Provincial Police Office.

Batay sa report ng Police Station 2 ng Cebu City,  bandang alas 6:00 ng gabi nang maganap ang insidente sa Sitio Molave sa Barangay Kamputhaw, Cebu City.

Lumabas sa imbestigasyon, magkasama ang biktima at asawa nitong naglalakad sa nasabing lugar nang biglang dumating ang suspek na nakamotorsiklo.

Dito, hinarang ang kanilang daanan at pinagbabaril ang biktima na agad nitong ikinamatay habang mabilis na tumakas ang suspek.

Nabatid, dumadalo ang biktima ng 3-araw na seminar sa lungsod at bandang alas 2:00 ng hapon ay umatend pa ito ng pagdinig sa CCPO na may kinalaman sa kasong iligal na drorga.

Si Yape ay spokesperson ng Bohol Provincial Police Office at nadestino sa Internal Affairs Services sa Camp Crame.

Nagpapatuloy naman ang imbestigasyon sa insidente at inaalam na ang tunay na motibo sa krimen.

 

Please follow and like us:
Read More

PNP: WALANG BAYAD SA GUSTONG MAG-PULIS

(NI NICK ECHEVARRIA)

PINAALALAHANANG muli ng Philippine National Police (PNP) ang publiko  na libre at walang dapat bayaran ang mga aplikante ng gustong mag-pulis.

Ginawa ni PNP spokesperson B/Gen. Bernard Banac ang  paalala matapos maaresto ang isang pulis sa Parang, Maguindanao na nahuli sa aktong nangongotong sa mga PNP applicants.

Nabatid na nitong Huwebes, nasakote ng mga tauhan ng Police Regional Office ng Bangsamoro Autonomous Region in Muslim Mindanao (PRO-BARMM) sa isang entrapment operation si P/Cpl. Harold Julaton na nakatalaga bilang Liason Officer sa Lanao Del Sur Provincial Police Office at ang sibilyan na kasabwat nitong si  Janet Sarip.

Hinihingan umano ng mga suspek ng P25,000 ang bawat aplikante kapalit ng pangakong tiyak na maipapasok ang mga ito sa serbisyo.

Niliwanag ni Banac na binabalikat ng PNP ang lahat ng gastusin para sa pagpoproseso ng aplikasyon at walang kahit ni singko na sinisingil sa mga aplikante.

Kasunod nito, umapela ang PNP sa publiko na agad ipagbigay-alam sa kanilang mga himpilan  sakaling may mga kabaro silang sinasamantala ang recruitment program ng PNP para kumita.

 

Please follow and like us:
Read More

PULIS, DRUG SUSPECT PATAY SA BUY BUST/ HOSTAGE

(NI KEVIN COLLANTES)

ISANG pulis, na nagsilbing poseur buyer, ang patay habang sugatan ang dalawa pa niyang kasamahan, nang pagbabarilin ng isang drug suspect na napatay rin ng mga awtoridad matapos mang-hostage pa ng siyam na bata, sa isang buy-bust operation na nauwi sa madugong engkwentro sa Pililla, Rizal, nitong Biyernes.

Batay sa imbestigasyon nina P/SSgt Dave Bias at P/Cpl Jimbo Sagofian, ng Pililla MPS sa Rizal Police Provincial Office (RPPO), nakilala ang napatay na police poseur buyer na si P/SSgt Michael Cabillo, habang sugatan naman sina P/SSgt Lazaro Guinao-wa at Pat. Paul Ryan Santos.

Samantala, patay rin ang drug suspect na si Neser Tena, residente ng Barangay Bagumabayan, ng naturang bayan.

Nabatid na dakong alas-11:10 ng umaga nang maganap ang madugong buy-bust operation sa Aida’s Farm sa Barangay Bagumbayan.

Nauna rito, nagkasa umano ng buy-bust operation ang mga tauhan ng Drug Enforcement Team (DET) ng Pililla MPS laban sa suspek, sa superbisyon ni P/Major Florante Yu, acting Chief of Police, kasama ang mga tauhan ng Explosive Ordnance Division at Special Weapons and Tactics (SWAT), matapos makatanggap ng tip hinggil sa ilegal nitong aktibidad.

Nagsilbing poseur buyer si Cabillo at bumili ng isang pakete ng shabu mula sa suspek.

Gayunman, bago pa man maaresto, ay nakahalata ang suspek na pulis ang katransaksiyon kaya’t kaagad na bumunot ng baril at pinaputukan ito, na nagresulta sa kanyang kamatayan.

Kaagad namang rumesponde ang mga back-up cops at hinabol ang tumatakas na suspek, ngunit maging sila ay pinaputukan ng suspek, na nagresulta upang masugatan ang dalawa pang pulis.

Nagawa naman umano ng suspek na makapasok sa kanyang inuupahang tahanan at hinostage ang tatlong batang nasa loob nito.

Naging siyam naman ang batang hostage ng suspek, nang matakot ang anim na bata pa sa nagaganap na putukan, at pumasok sa katabing apartment, kung saan sila pinuntahan rin ng suspek at ginawa na ring hostage.

Tinangka ng mga pulis na makipag-negosasyon sa suspek upang sumuko na at palayain na ang mga bata ngunit nagmatigas umano ito.

Nang makahanap ng tiyempo, kaagad nang binaril ng mga pulis ang suspek, na ikinamatay nito, at nasagip ang mga batang kanyang ginawang hostage.

Please follow and like us:
Read More

2 PULIS BINUGBOG, TINANGAYAN NG BARIL NG TAMBAY

(NI ALAIN AJERO)

SUGATAN ang dalawang pulis matapos romansahin ng gulpi ng isang pangkat ng mga kalalakihan sa harap ng resto-bar sa Malabon City.

Kinilala ang mga biktima na sina P/Cpl. Jefferson Apit, nakatalaga sa Malabon Police Community Precinct (PCP) 7; at Pat. Janrex Anguluan, ng PCP-1 habang malayang nakatakas ang mga hindi nakilalang suspek.

Nabatid na nasa paradahan ng IAMS Restobar sa  Brgy. Tañong ang mga biktima Linggo ng madaling-araw para umano bumili ng pagkain nang pagtulungan ng mga suspek si Cpl. Apit na pasakay na sa kanyang motorsiklo.

Kumaripas si Apit papuntang barangay hall ng Tañong at humingi ng tulong habang tinangkang habulin ni Anguluan ang mga suspek matapos na magpakilalang pulis.

Gayunpaman, pagsapit sa 2nd Street sa Brgy. Tañong, ay si Anguluan  naman ang binugbog ng mga suspek na umano ay nawalan ng malay kaya’t nakuha ng mga suspek ang kanyang service firearm. Itinakbo sa Tondo Medical Center si Anguluan kung saan siya patuloy na inoobserbahan.

 

Please follow and like us:
Read More

PULIS, 1 PA, PATAY SA BULACAN ENCOUNTER

PATAY ang isang pulis, kasama ang hinahabol na lalaking sangkot sa droga, matapos mauwi sa engkuwentro ang follow-up operation sa Plaridel, Bulacan.

Kinilala ang biktima na si Police Cpl. Ronnie Tamaliwan, ng Bulacan Provincial Police Office (BPPO).

Isang tawag mula kay Lalangan Barangay chair Danilo Tayaw ang natanggap ng police station hinggil sa umano’y armadong lalaki na pinangungunahan ni Nesty Nacino ang gumagala sa Alveo relocation site ng naturang lugar.

Agad na nirespondehan ng provincial intelligence branch at Swat team ng BPPO ang reklamo.

Pinuntahan ng mga pulis ang bahay ng suspek ngunit palapit pa lang ay agad nang nagpaputok ng baril si Nacino.

Nagkabarilan na hanggang tamaan sa katawan ang pulis.

Nagpatuloy ang engkuwentro hanggang sa nakalipat ng pinagtataguan si Nacino sa isang ginagawang bahay.

Naghagis pa ng granada ang suspek pero tumama ito sa pader at bumalik kay Nacino pero hindi ito sumabog.

Matapos ang ilang minuto ay nasukol si Nacino at napatay.

Naisugod pa sa Dr. Peralta Hospital si Tamaliwan pero idineklara itong dead on arrival.

Please follow and like us:
Read More

PULIS PATAY SA YAKAP NA ARMALITE

(NI DONDON DINOY)

KIBLAWAN, Davao del Sur-  ISANG miyembro ng Philippine National Police (PNP) ang agad binawian ng buhay matapos maputukan ng sariling armas, Martes ng umaga.

Kinilala ang biktima na si Police Master Sergeant Brigham Wayner Pascual, 41, ng Purok Lomboy, Lapu-Lapu Extension sa lungsod ng Digos at nakadestino sa Kiblawan Police Station.

Ayon kay Police Captain James Carumba, hepe ng Kiblawan Police Station, nakahiga ang biktima sa duyan na nasa likod ng kanilang istasyon nang bigla na lang umalingawngaw ang putok ng armas.

Sa pagresponde ng mga kasamahan nito nakita na lang na naliligo na sa sariling dugo ang biktima.

Sa inisyal na imbestigasyon ng mga awtoridad napag-alaman na pumutok ang lumang M-16 armalite rifle na nakapatong sa dibdib ng biktima.

Hindi umano naka-safety ang naturang armas kung kaya’t agad na pumutok at tumagos sa ulo ng biktima na sanhi ng kanyang pagkamatay.

Naniniwala ang mga otoridad na aksidenteng nakalabit ng biktima ang kanyang armas habang naidlip dahil mula alas 2:00 hanggang alas 4:00 ng madaling araw ang duty nito.

Narekober din sa crime scene ang isang basyo ng bala ng nasabing armas.

Ngunit, kumbinsido naman ang pamilya na aksidente nga ang nangyari at hindi nagpakamatay ang biktima dahil wala naman itong dinadalang problema.

Please follow and like us:
Read More

PULIS PATAY SA TRUCK

accident12

(NI DONDON DINOY)

DAVAO CITY–DEAD on the spot ang isang opisyal na pulis matapos madisgrasya ang kanyang sinasakyang motorsiklo alas 5:00 ng umaga ng Lunes sa Lower Tamugan, Marilog District.

Nakilala ang biktima na si Police Lieutenant Aliper dela Camara Mendoza, residente ng Lanao del Sur at nakadestino sa Police Regional Office-Northern Mindanao.

Ayon sa inisyal na imbestigasyon sa traffic section ng Marilog Police Station, isang Saddam truck ang nakabangga sa motorsiklo na minamaneho ng biktima sa madulas na daan sa Lower Tamugan.

Galing sa Lanao ang biktima at papunta ito sa Regional Training Center-Davao sa Mintal, Davao City kung saan nag-schooling para sa Public Safety Officers Basic Course.

Sumuko ang driver ng truck at sasampahan na ng kaukulang kaso.

Please follow and like us:
Read More

PULIS TODAS SA NAKAPARADANG JEEP

accident121

(NI JG TUMBADO)

NAISUGOD pa sa ospital pero agad din binawian ng buhay ang isang pulis na motor rider matapos bumangga sa nakaparadang jeep.

Ayon kay Police Lt. Col. Soc Faltado, Spokesperson ng Police Regional Office 4B, ang biktima ay nakilalang si Police Master Sgt. Arcel Villa Alimane.

Ayon kay Faltado, mag- aalas-10:00 ng gabi ng Miyerkoles habang binabagtas ang Pablico Road 1, Brgy. Tiniguiban sa Puerto Princesa City nang sumalpok si Alimane sa nakaparadang jeepney.

Lumalabas sa imbestigasyon, na walang early warning device na inilagay ang driver ng jeepney dahilan para hindi ito mapansin ng biktima.

Sa lakas ng impact nang pagbangga, tumilapon ang sakay ng motor at nagtamo ito ng malalang injury sa katawan.

Please follow and like us:
Read More

PULIS INATAKE SA PUSO SA TRAINING

crime12

(NI KOI HIPOLITO)

NAMATAY habang sumasailim sa kalagitnaan ng pagsasanay ng physical strengthening and conditioning ang isang pulis na hinihinalang inatake sa puso sa National Capital Region Training Camp (NCRTC), Regional Mobile Force Battalion (RMFB) road ng Camp Bagong Diwa sa Taguig City, Miyerkoles ng medaling araw.

Nakilala ang biktima na si PSSG. Victorino Oriero, 39, nakadestino sa Taguig City Police Community Precinct (PCP3).

Base sa report na nakarating sa opisina ni Taguig City police chief  PCol. Alexander Santos, nagjo-jogging ang biktima sa nasabing lugar nang bigla na lang umanong bumagsak ito at mag-collapse kaya’t agad binigyan ng paunang lunas ng mga kasamahan. Naisugod sa Parañaque City Doctors Hospital kasama si PLtCol. Rene Zunega, medical doctor sa Regional Health Service ng NCRPO, ang biktima subalit idineklarang dead on arrival sa ospital.

Please follow and like us:
Read More

PULIS NAGWALA SA KAMPO; 2 KABARO TINODAS

shooting incident123

(NI ANNIE PINEDA)

HINDI umano matanggap ng isang kasapi ng Philippine National Police (PNP) nang matalo ito ng kanyang kasamahan sa larong ‘bunong daliri’ , dahilan para pagbabarilin nito ang kanyang kalaro at isa pang kasamahan na tumangkang umawat, sa Tuguegarao City.

Kinilala ang mga namatay na sina Police Staff Sergeant Romualdo Ngina Jr, 32, residente ng Otucan, Bauko, Mountain Province at Patrolman Rey Wanaten, 30, residente ng Kibungan, Benguet.

Nadakip naman ang suspek na kinilalang si Police Corporal Paul Cungihan Badangayon, 28, residente ng O-ong, Hingyon, Ifugao at pawang mga nakatalaga sa 151 Regional Mobile Force Battalion sa Barangay Viewpoint,  Banaue, Ifugao.

Batay sa report ng pulisya, naganap ang insidente alas 3:30 ng madaling araw ng Linggo, sa loob ng kampo ng tatlo.

Lumabas sa pagsisiyasat, madalas na nilalaro ng mga pulis na duty sa gabi ang ‘bunong braso’, para hindi makatulog hanggang sa dumating ang oras ng kanilang palitan.

Subalit, nang matalo umano si Badangayon ni Ngina, bigla na lamang silang nagtalo, nakita naman ni Wanaten na nagtatalo ang mga ito kaya sinubukan silang awatin.

Dito na bumunot ng baril ang suspek at binaril si Ngina saka isinunod si Wanaten na kapwa tinamaan sa dibdib na agad naman dinala sa Bontoc Gene­ral Hospital pero hindi na rin umabot pang buhay ang mga ito.

Nakatakda naman sampahan ng kaukulang kaso si Badangayon na agad nadakip ng kanyang mga kabaro.

 

Please follow and like us:
Read More

PULIS NAKATULOG SA PAGMAMANEHO, PATAY

accident12

(NI ANNIE PINEDA)

POSIBLE umanong nakaidlip ang isang kawani ng Philippine National Police (PNP) dahilan para sumalpok ito sa puno habang minamaneho ang kanyang motorsiklo na naging dahilan ng kanyang kamatayan, sa lalawigan ng Pangasinan.

Kinilala ang biktimang si Patrolman Ervin Ocampo, ng Bgy. Laois, Labrador Pangasinan.

Batay sa report ng pulisya, naganap ang insidente sa Tarlac-Pangasinan highway sa Brgy. Buer, Aguilar, Pangasinan.

Sa inisyal na imbestigasyon, pauwi na ang biktima sa kanilang tahanan habang minamaneho ang kanyang motorsiklo nang bigla na lamang itong bumangga sa puno ng na nasa gilid ng kalsada.

Isinugod ito sa Blessed Holy Trinity Hospital, Mangatarem, Pangasinan pero idineklara na rin itong patay ng doktor sanhi ng matinding pinsalang tinamo sa ulo at katawan.

Paniwala ng mga awtoridad, maaring nakaidlip sa daan ang biktima at hindi na nito napansin ang malaking puno dahilan para sumalpok ito.

Please follow and like us:
Read More

PULIS BINARIL NG 17-ANYOS GANG LEADER SA LOOB NG BGY HALL

(NI FRANCIS SORIANO)

NAKALIGTAS sa tiyak na kamatayan ang isang police corporal matapos barilin ng isang umanong gang leader ng mga kabataan  sa loob mismo ng isang barangay hall sa Navotas City, Biyernes ng gabi.

Kinilala ni Navotas police chief P/Col. Rolando Balasabas ang biktima na si P/Cpl. Mark Jhon Abiva, 31, ng Bagong Barrio, Brgy. San Jose, na agad isinugod sa Tondo Medical Center dahil sa tama sa kaliwang balikat at kamay.

Ayon kay Balasabas, kasalukuyang nagsasagawa ng  ‘Pulis sa Barangay’ ang biktima at kasamang si Cpl. Christopher Binuhe sa loob ng barangay hall ng Brgy. Sipac Almacen, nang bigla umanong pumasok dakong alas 11:20 ng gabi ang suspek na si alias ‘Kian’, 17-anyos at pinagbabaril ang biktimang pulis.

Matapos ang pamamaril ay tumakas ang suspek na binatilyo sa hindi malamang direksyon.

Sugatan man ang biktima ay pinilit pa rin umanong habilan ang suspek kasama Binuhe pero nabigo sila kaya mabilis na isinugod sa naturang pangamutang ang biktima na nasa maayos nang kalagayan.

Ang suspek ay pinaghahanap ng mga awtoridad at madalas masangkot sa petty crimes sa Brgy. Sipac Almacen at malakas lumabag sa city ordinances sa tuwing nagsasagawa ng Oplan Galugad ang mga awtoridad.

Isa sa mga miyembro ng suspek ay nahuli  at kinasuhan ng alarm and scandal.

Naniniwala ang awtoridad na ang bigong pagpatay kay Abiva ay bahagi ng pagganti ng suspek  sa biktima na patuloy na nagsasagawa ng police operation sa mga youth offenders sa nabangit na lugar.

Please follow and like us:
Read More