BARIL NA HAWAK NI MANOY NUNG MATUMBA, KANINO?

PANALO KA

MAY naglabasan na mga ulat na ang ripleng hawak-hawak ng batikang actor na si Eddie Garcia, o mas kilalang Manoy, ang tumama sa kanya na posibleng isa sa mga sanhi ng pinsala sa kanya nang siya ay mapatid sa kable at madapa sa set ng teleserye ng GMA7. Noong Huwebes ng nakaraang linggo, binawian na ng buhay ang aktor makaraan ang ilang araw na pagkaka-ospital.

Sa footage, riple ang hawak ni Manoy nang siya ay madapa. Kung anong klaseng riple ito ay wala pa akong alam. Pero ang akin lang, marami akong tanong gaya nang kanino at rehistrado ba ang riple.

Sa batas, tanging military at pulis at iba pang sangay ng law enforcement units ng gob­yerno ang puwedeng magkaroon ng mataas na kalibre ng baril gaya ng M-16 at M14 at iba pang mataas na klase ng riple. Bawal ito sa sibilyan.

Kaya malamang ang ripleng hawak ni Manoy nang siya ay madisgrasya ay mula sa isang pulis o sundalo, posibleng rumaket ang may hawak nito. O kung hindi naman, “loose firearm” ito.

Tingin ko, dapat magpaliwanag ang production manager ng set ng GMA7. May mga importanteng bagay na dapat ipaliwanag niya sa Firearms and Explosives Office (FEO) ng Philip­pine National Police (PNP) para makaiwas sa anomang pananagutan sa Revised Implementing Rules and Regulations (IRR) ng Republic Act 10591, o ang Firearms Law.

oOo

Para sa Malakanyang, tapos na ang boksing sa trahedyang sinapit ng 22 na mangingisda natin mula sa mga mapang-aping Intsik sa Recto Bank sa West Philippine Sea (WPS). Hintayin na lamang natin ang resulta ng opisyal na imbestigasyon at “pag-aayos” sa gusot sa pagitan ng gob­yerno natin at gobyerno ng China.

Isaksak sa baga niyo ang joint PH-China investigation na ‘yan! Sa puntong ito, kakampi ako ni Teddy Boy Locsin, ang aking dating boss sa pahayagang Today na nga­yon ay kalihim ng Department of Foreign Affairs (DFA).

Dahil sa paulit-ulit na insidenteng ito sa ating karagatan na ang sangkot ay mga Intsik laban sa a­ting mga mangingisda, baka bukas o sa susunod na araw ay ang kinakalawang na barko naman natin sa Ayungin Shoal ang babang­gain ng mga Intsik.

Ang kalawanging barko ay kung saan nagsisilbing detachment ng ilan nating sundalo ng Philippine Marines. Malapit lamang ito sa Pagasa Island kung saan meron din tayong mga sundalong nakadestino doon at mga sibil­yan. Ang Ayungin at Pagasa ay sakop ng munisipalidad ng Kalayaan Island Group (KIG), Palawan.

oOo

Kaabang-abang itong binubuong programa sa tele­radyo hinggil sa ating lumala­gong gun industry na dapat suportahan ng mga lehitimong kompanya na nasa negosyo. Well, nasa kamay ni FEO chief Police Brigadier General Valeriano De Leon kung matutuloy ito o hindi.

Alam niyo po, kapag u­sapin ng baril sa ating bansa ay marami ang natatakot dahil sa umiiral na paglipana ng private armed groups o PAGs. Nariyan din ang di matapos-tapos na rebelyon ng iba’t ibang grupo laban sa ating gobyeno. At mas takot ang mamamayan sa terorismong dala ng mga Islamist group.

Sa binubuong programa, sana matuloy, dito komprehensibong tatalakayin ang U­SAPANG BARIL sa pangu­nguna ng tanggapan ng FEO, paano maging responsible gun owner, ang kasanayan sa baril bilang sports, ang lumalagong gun industry sa ating bansa, at marami pang bagay na dapat talakayin at pag-usapan.  (PANALO KA! /  FLORANTE SOLMERIN)

Please follow and like us:
Read More

WALA NAMANG NAMATAY KAYA OK LANG?

PANALO KA

“THE first sound is the name of the game. The name of the game is the first sound.”

Magandang ice-breaker itong laro na ito sa mga aktibidad dahil hindi lamang masusubok ang iyong mabilis na pagsagot sa tanong kundi masusubok din kung gaano katalas ang iyong utak sa mabilis na pagtasa para tama ang iyong sagot.

Kaso mukhang ‘di uubra ang ice-breaker na ito para sa mga tagapagsalita ng Palasyo ng Malakanyang gaya nina Presidential Spokesman Salvador Panelo, Agriculture Secretary Manny Piñol, Energy Sec. Alfonso Cusi, at pati na si Cabinet Sec. Karlo Nograles.

Bakit? Well, gaya ng mga tagapagsalita ni Chinese President Xi Jin Ping, huli sila mismo na nag-iimbento ng sagot. Sa madali’t sabi, mga sinungaling.

Kung nabasa niyo ang unang pahayag ng embahada ng China na inilagay sa social media at pagkatapos tinanggal, sinasabing kinuyog daw umano ng mga Pilipinong mangingisda ang mga Intsik na sasagip sana sa mga mangingisda natin makaraang banggain nila ang kanilang bangka kung kaya ang mga Intsik na ito ay natakot at tumakas.

Dito pa lang ay sinungaling na ang mga tagapagsalita ng China.

Sa atin naman, sa mga unang pahayag ng mga tagapagsalita ng Palasyo, matapang ang dating pero nang si Pa­ngulong Duterte na mismo ang napilitang magsalita at sinabing “little maritime accident” lamang ang pangyayari, nagbago ang ihip ng hangin.

Kaiba naman ang pagtasa ng ilan nating opisyal sa Armed Forces of the Philippines (AFP), retirado at hindi pa retirado, independenteng personalidad at mga eksperto na talagang sinadya ang pagbangga sa mga ma­ngingisda natin.

Ang ebidensiya? Malinaw pa sa sikat ng araw ang barbarismo ng mga Intsik na sangkot dahil hindi pa sinagip ang mga mangingisda natin makaraang banggain nila ang kanilang bangka!

Lubos na nasaktan ang 22 mangingisda natin dahil pakiramdam nila, sila ang lumalabas na sinu­ngaling. Sabi nga ng ilan sa kanila, siguro dehado sila dahil hindi naman sila namatay sa laot. Tanong nila, kung bangkay na silang nakuha o baka mis­sing pa ano kaya ang magiging pagtasa at posisyon ng ating gob­yerno sa pangyayari?

Hindi na dapat tinatanong pa kung dapat bang depensahan ang sarili nating mga ma­ngingisda pati na ang teritoryo nating pinangingisdaan nila. Dito nakasalalay ang buhay ng ating mga mangingisda, sa a­ting lahat, ng ating bansa.

Pero ang depensahan ang kasakiman at kawalanghiyaan ng mga Intsik ay nakapag-aaklas nga naman ng damdamin at kamalayan ng mga naaapi. Pero, hamon nga ni Pangulong Duterte, OK lang kahit giyera pa sa susunod na 50 taon.  (PANALO KA! / FLORANTE SOLMERIN)

Please follow and like us:
Read More

‘BERLIN WALL’ BINASAG NI FEO CHIEF PBGEN VAL DE LEON

PANALO KA

MASAYA ang la­hat sa na­ging resulta ng UNITY CUP 2 ni Firearms and Explosives Office (FEO) chief Police Brigadier General Valeriano T. De Leon dahil tuluyan nang nabasag ang tila “Berlin Wall” sa pagitan ng Philip­pine Practical Shooting Association (PPSA) at Philippine Shooters and Match Officers Confederation (PSMOC).

“Puwede kong ipag­yabang ‘yan dahil sa a­­king panunungkulan bilang chief, FEO nangyari ito at maraming salamat sa mga taong tumulong sa akin para mangyari ito. The UNITY CUP 2 was really a success for all of us, the shooters who participated, our working horses such as the range and match offi­cers, our sponsors especially the unified efforts of PPSA and PSMOC to make the shooting event successful. For me, what is important here is this is the first time I saw these prestigious practical shooting organizers coming together to a ‘One Goal, One Family and One Sports.’ Congratulations!” sambit ni Gen. de Leon sa ginanap na Range Officers at Match Officers (RO-MO night) noong Hunyo 15, 2019.

Ang awarding sa mga nanalo sa kumpetisyon ay gaganapin na sa Camp Crame na ang iskedyul ay isasaayos pa ng UNITY CUP 2 Secretariat sa pamumuno ng masipag na si Police Staff Sergeant Carl Gonzales at classmate nitong si PSSgt. Angelito dela Cruz, PSSgt. Rustom Ocampo kasama sina Jobelle Mones at Gelene Axalan, lahat sa ilalim ng opisina ni Gen. de Leon.

Espesyal mention ko rito si Raoul Esperas, broadcaster ng DWIZ at siya ang may hawak sa PPSA Media Bureau, dahil sobrang sigasig nito bilang kasama sa mga organizer ng FEO UNITY CUP 2 Secretariat dahil 9 araw lamang ang preparasyon, napakaimposible pero kanilang nagawa!

Ang Armscor, Asso­ciation of Firearms and Ammunition Dealers of the Philippines (AFAD), Trust Trade, Lock ‘n Load, at iba pa ang talaga namang sumuporta nang todo sa UNITY CUP 2.

Napakalaki ng Magnus Front-sight Firing Range sa may Lipa City, Batangas kung saan ginanap ang UNITY CUP 2 mula Hunyo 14-16. Dito nakabahay ang PPSA sa ilalim ng kanilang presidente na si Mr. Edwin Lim. Ako mismo ang nakasaksi kung gaano kagalante si Mr. Lim sa mga RO at MO ng PPSA at PSMOC sa laki ng pinakawalan niyang cash sa raffle dahil aniya, ang mga RO at MO ang gulugod ng alinmang kumpetisyon ng practical shooting.

Sangkaterba rin na goodies ang pinakawalan ng may-ari ng MACMAC Firing Range na si Mr. Ernie Santiago na nakabase sa Plaridel, Bulacan para sa raffle ng mga RO at MO na abot hanggang langit ang kanilang saya at galak dahil sa UNITY CUP 2 lamang anila nangyari ang ganitong pagtitipon.

Siyempre, hindi ma­wa­wala si PSMOC president Teng Mangudadatu na talaga namang humanga ako, gaya ni Mr. Lim, sa galing niya sa riple.

At siyempre, nandiyan si Gina Marie Angangco, presidente ng Armscor; AFAD president Alraic Topacio; Bogie Castro Jr., Corporate Secretary ng PSMOC; Bong Belmes, Range Manager ng Armscor; Pamela Uyami-Comia ng Lock ‘n Load; at marami pang iba na aktibong sumuporta para sa UNITY CUP 2.

Pero ito ang kahanga-hanga kay Gen. de Leon, bahagi ng kinita sa UNITY CUP 2 ay mapupunta sa indigent students sa ilalim ng programang “Happy Eskwela” ng Alagang Kapatid Foundation Inc. (AKFI) ng TV5. Nagpasalamat din ang heneral kina Menchie Silvestre at Nancy Galang ng AKFI sa pag-cover ng TV5 news sa kanyang UNITY CUP 2.

Sana, ang sinimulang pagkakaisa ng PPSA at PSMOC na sinuportahan ng malalaking kompanya ng gun industry sa ating bansa sa pamamagitan ni Gen. de Leon ay magbubunga ng mas maganda pang samahan ng mga ito para sama-sama nilang maisulong at maitaguyod ang mandato ng FEO para sa responsible gun ownership at practical shooting bilang sports.  (PANALO KA! /FLORANTE SOLMERIN)

Please follow and like us:
Read More

CHINA, BANTA SA KALAYAAN

PANALO KA

KUNG sinoman ang magsasabi at ipaggigiitan pa na ang China ay hindi banta sa kasarinlan at kalayaan ng ating bansa ay isa siyang dakilang tanga.

Sa ngayon, kung meron mang nagagawang maganda ang gobyerno ng China sa ating bansa sa pamamagitan ng administrasyong Duterte ay marapat lamang na magpasalamat tayo. Pero sabi ko nga, mas malaki ang bantang dulot ng puwersahang pagsakop ng China sa ating teritoryo sa West Philippine Sea (WPS) dahil ‘yan ang tunay na banta sa kalayaan nating mga Pilipino.

Kung totoo ang mga naglalabasang datos na halos nasa kalahating milyong Intsik na ang nandito sa ating bansa at iligal na nagtatrabaho sa iba’t ibang sektor ng a­ting lipunan, aba e, kabahan ka na!

Bakit? Sakaling sumiklab ang putukan sa pagitan ng US at kanyang mga kaalyadong bansa laban sa mga Intsik sa WPS, ang halos kalahating mil­yong Intsik na ‘yan ay puwedeng mag-armas at manggulo sa loob mismo ng ating bansa.

Talo pa sa bilang ang pinagsanib na pu­wersa ng Armed Forces of the Philippines (AFP) at Philippine National Police (PNP).

Sabi nga ng mga magagaling, kasama na ang mga bobo, ay ‘yang bilang na ‘yan ng mga Intsik na nasa ating bansa, karamihan ay intelligence operatives kung hindi man sundalo mismo ng China na nagsuot sibilyan. Totoo man o hindi ito, nanganganib na ang kasarinlan at kalayaan nating mga Pilipino.

Sakaling sumiklab nga ang digmaan sa WPS, sasaklolo ba ang US sa atin? Hindi, kahit na meron pa ang tinatawag na Mutual Defense Treaty sa pagitan ng dalawang bansa. Pansariling interes ng mga Kano ang kanilang uunahin, lalo na ang mas malawak na interes nila sa rehiyon. Hindi nga natulungan ng US na i-modernisa ang kaga­mitan ng AFP sa tinagal-tagal ng “pagkakaibigan” ng dalawang bansa. Kaya naghahalusinasyon ang mga Amboy sa gobyerno na sasaklolo ang US para sa mga Pilipino.

Walang mangunguna sa pagtatanggol sa ating kasarinlan at kalayaan kundi tayong mga Pilipino mismo.

oOo

Lalo pang umiinit ang gusot sa pagitan ng retiradong Army Lieutenant General Rolando Bautista at ang broadcaster na si Erwin Tulfo. Mas pinapalala pa ngayon ang bangayan ng mga cyber warriors ng magkabilang kampo.

Nagtataka lamang ako kung bakit pinapalawig pa ang bangayang ito na puwede namang ayusin ng magkabilang kampo. Parehas lang naman na masugid na tagasuporta ni Pangulong Duterte. At sa katunayan, mauuwi naman ito sa pag-aayos ng dalawa. Pinatatagal pa e.

Isantabi na muna ang kamalian ng bawat isa. Kung saan-saan na napunta ang usa­pin hanggang sa may persona non-grata pa. Kung minsan, nakatatawa na ang mga ganitong desisyon na dala siguro ng bugso ng damdamin.

Ang kailangan lang naman ay magkausap nang personal sina Bautista at Tulfo, ‘yan lang. Pustahan tayo, magkakahiwalay ang dalawa na nakangiti at may photo-ops pa.  (PANALO KA! / FLORANTE SOLMERIN)

Please follow and like us:
Read More

ROTC, RANGER MATEO, RESERVIST ROBIN

PANALO KA

HINDI ako pabor sa panunumbalik ng Reserve Officer Training Corps (ROTC).

Pero pabor ako sa pagpasok sa training ni showbiz actor Mateo Guidicelli sa Scout Ran­ger ng Philippine Army at ang napapabalitang pagpasok bilang reservist din sa Army ni “Bad Boy” Robin Padilla.

May tinatawag na CAT (Citizenship Advancement Training) noong nasa sekondarya ako. Noon pa man ay may paboritismo o “bata-bata system” na sa pagpili ng mga magiging opisyal dahil kahit mas angat ka sa academics at pisikal na katangian kung wala kang kapit sa mga humahawak ng CAT ay malas mo talaga. Naging first platoon leader ako sa CAT at yung may mga average na 75% hanggang 80% sa academics ay na­ging company at battalion commanders, adjutant at iba pa. Pati sa unipormeng fatigue ay ang may hawak na sundalo sa CAT na rin ang supplier. O, di ba? Dito pa lang may anomalya na! Pero di ko alam ‘yan noon.

Kalakasan noon ng New People’s Army (NPA) sa Cagayan. Tinambangan nga nila ang supply convoy ng Army sa may Kinali, Sta. Teresita at isa lamang daw ang nakaligtas na sundalo. Nakita ko mismo ang mga naka-brip na lamang na mga bangkay ng mga sundalong nakahilera sa tabi ng kalsada pagdaan ng aming sasakyan pagpasok sa eskwela.

Pero masaya ang CAT noong panahon namin sa St. Francis Academy sa Sta. Tere­sita, Cagayan. Sa CAT, natutunan ko ang tamang “kaliwa, kanan”, “harap sa kanan, harap sa kaliwa”, “talupad”, “tikas pahinga”; pagsaludo nang tama; paggamit sa espada at kahoy na riple nang tama sa drill; pagsunod sa utos ng opisyal; at higit sa lahat, disiplina.

Pero ni minsan ay walang nag-indoktrina na sundalo sa aming CAT para ipaliwanag kung ano ang patriotismo at maski na kung ano ang ibig sabihin ng digmaang isinusulong ng NPA.

Noong kolehiyo naman ako sa seminaryo, hindi ako pinaakyat sa entablado ng isang pari noong graduation day namin nang itsinuchu ng ilang sipsip kong ka­klase na binayaran ko ang last semester ng ROTC ko dahil puwede naman palang bayaran para di na pumasok pa kada Sabado. Sa ROTC, sangkatutak na kontribusyon ang sinisi­ngil sa amin. Para raw kay Sir.

Kaya ayokong ibalik ang ROTC kung sa bandang huli ay gagawing raket lamang ito ng mga tiwali sa serbisyo. Kaya sa ating Armed Forces of the Philippines (AFP), dapat natuto na po tayo sa nakaraan na nabahiran pa ng ilang madugong insidente laban sa mga biktimang kadete.

Ergo, para sa akin, mapakikinabangan ang ROTC kung gagamitin ito sa tamang oryentasyon at pakinabang ng bawat estudyante para mapanday sila sa tamang disiplina at pagtatanggol ng kasarinlan ng ating bansa.

oOo

Ayokong isipin na “PR stunt” lamang ng AFP ang pagpasok ni Guidicelli sa Scout Ranger course. Maski na ang pag-iingay ni Padilla na papasok siyang reservist sa Army. Trending nga sa social media si Guidicelli na ngayon ay sumasabak na sa pagka-musang.

Tingin ko, kayang-kaya ni Guidicelli ang pisikal na dala ng training dahil triathlon athlete naman siya. Ang inaabangan ko lang ay magagawa kaya ni Guidicelli sa mga susunod na panahon na maging mouthpiece ng AFP laban sa mga rebelde? Gaya na lamang ang pagkondena sa Communist Party of the Phi­lippines-New People’s Army-National Democratic Front (CPP-NPA-NDF).

Aba, kung magagawa ito ni Guidicelli ay magandang “propaganda machine” siya ng AFP.

Ang isa pa na aking ina­abangan ay ang aktwal na pagsabak ni Guidicelli sa mission. Ipadadala kaya siya sa Sulu o Basilan laban sa Abu Sayyaf Group (ASG) o sa NPA-infested area?

Paano naman si Robin? Marami na siyang nagawang pelikula hinggil sa buhay ng sundalo at maski na pulis. Hayaan na natin siyang ma­ging reservist.  (PANALO KA! / FLORANTE SOLMERIN)

Please follow and like us:
Read More

ERWIN TULFO, PINADEDEPOSITO ANG MGA BARIL

PANALO KA

KABILANG ang kontrobersyal na broadcaster na si Mr. Erwin Tulfo sa mga inatasan ng Firearms and Explosives Office ((FEO) ng Philippine National Police (PNP) na agarang ideposito sa pinakamalapit na istasyon ng pulisya ang kanilang mga pag-aaring baril dahil paso na ang kanilang License To Own and Possess Firearm (LTOPF).

Aking napag-alaman na noong nakaraang Marso 2019 pa napaso ang LTOPF ni Mr. Tulfo, pero siguro naman ay nilalakad na niya ang renewal na madali lang namang gawin. Pero habang wala pa siyang renewal, paliwanag sa akin ng mga tauhan ng Records Section ng FEO na kailangang ideposito na muna sa PNP ang mga hawak na baril.

Sa Revised Implementing Rules and Regulations (IRR) ng Republic Act 10591 (Comprehensive Law on Firearms and Ammunition), hindi ka maaaring magkaroon ng sariling baril kung wala kang LTOPF. Kung paso na ang LTOPF mo kahit na hindi pa paso ang rehistrasyon at lisensiya ng baril mo ay maituturing na itong “loose firearm”. Kaya dapat laging upda­ted ang iyong LTOPF para ‘di magkaproblema sa hawak na baril. Ito ‘yun:

Section 19. Renewal of Licensee and Registration// 19.1 . All types of licenses i.e. License to Own and Possess Firearm, Long Certificate of Registration and Short Certificate of Registration shall be renewed every two (2) years. Failure to renew the license on or before the date of expiration shall cause automatic revocation of the license and of the registration of the firearm/s under said licensee.

Muling naging kontrobersyal si Mr. Erwin Tulfo makarang mapikon ito sa kanyang programa sa radyo at pinagsalitaan ng hindi maganda si Department of Social Welfare and Development (DSWD) Secretary Rolando Bautista dahil sa hindi nito pagpapaunlak sa kanya na siya’y makapanayam live. Si Bautista ay retiradong heneral na naging commanding gene­ral ng Army at siya ang unang Presidential Security Group (PSG) chief ni Pangulong Duterte.

Una nang binawi ng Philippine National Police (PNP) ang police security escorts ng broadcaster sampu ng mga police escort ng dalawa pa niyang kapatid. Sa pagkakaalam ko, mananatili ang mga sundalong escorts ni Ramon Tulfo dahil siya’y Special Envoy to China.

Dalawang beses na ring nag-isyu ng public apology si Mr. Erwin Tulfo kay Bautista kaugnay sa pangyayari.

Sana magsilbing aral at matinding babala sa lahat ng mga kasamahan natin sa industriya ang pangyayaring ito upang ang tinatawag na “4th State” dito sa ating bansa ay hindi kamuhian ng malawak na mamamayan.

Sinabi ni FEO chief Police Brigadier General Valeriano De Leon na hindi maituturing na “panggigipit” ang babala dahil mainit ang isyu kay Mr. Erwin Tulfo dahil hindi lang naman siya ang may expired LTOPF.

“Bukod sa kanya (Erwin) ay meron pang iba. Dahil diyan, ako na mismo na nagsasabi na lahat ng may expired LTOPF ay mabuting pakideposito na muna ang inyong baril sa pinakamalapit na police station dahil maituturing nang ‘loose firearm’ ang inyong mga hawak. Nasa batas po ‘yan. Kaya, para makaiwas tayo sa pananagutan sa RA 10591 ay sumunod po tayo,” paliwanag ng heneral.

Ergo, hindi biro ang makasuhan ng illegal possession of firearm.  (PANALO KA! / FLORANTE SOLMERIN)

Please follow and like us:
Read More

FEO UNITY CUP 2: UNANG PUTOK PAGKATAPOS NG GUN BAN

PANALO KA

DITO natin nga­yon masusubukan ang pagkakaisa ng mga major player ng shooting associations sa bansa sa gagawing Unity Cup 2 ni Police Brigadier General Valeriano De Leon, ang hepe ng Firearms and Explosives Office (FEO) ng Philippine National Police (PNP). Ang heneral ay miyembro ng Philippine Military Academy (PMA) “Makatao” Class of 1989.

Ang kumpetisyon ay nakakasa na sa Hunyo 14-16, isang araw makaraang tatanggalin ng Commission on Elections (COMELEC) ang gun ban policy sa Hunyo 13.

Tatlo ang pinagpi­liang lugar kung saan gaganapin ang kumpetis­yon: Mac Mac sa Plaridel, Bulacan; Armscor sa Marikina City; at Magnus sa Lipa City, Batangas.

Subaybayan lamang natin ang updates sa http://www.facebook.com/PBgen-Val-T-De-Leon-CHIEF-FEO-UNITY-CUP-2-33862440682 4251.

Sa Unity Cup, hangad ng FEO chief De Leon na umpisahan ang pagkakaisa ng Philippine Practical Shooting Association (PPSA), Philippine Shooters and Match Officers Confederation (PSMOC), Armscor Global Defense Inc. at Association of Firearms and Dealers of the Philippines (AFAD).

Nakatutuwa nga kung bakit nabuo ang Unity Cup 2 dahil nagsimula lamang ito sa a­king suhestiyon sa FEO chief makaraang sumagi sa aming usapan na baka kailangang simulan nang pagkaisahin ang samahan ng PPSA at PSMOC. Alam ng lahat na may hidwaan ang dalawang assosasyon sa ilang bagay na puwede namang ayusin alang-alang sa pagsusulong ng pangkabuuang mandato ng FEO para sa promosyon ng responsableng pag-aari at paggamit ng baril para sa kapakanan at pakinabang ng mamamayan.

Ang sabi ko sa he­neral, kung masimulan mo ang pagkakaisang ito ng PPSA at PSMOC katuwang ang AFAD at Armscor ay legacy mo na ‘yan bilang FEO chief. Agad, nag-thumbs up at, sabi niya sa akin, sige simulan mo nang i-organisa.

Biruin mong dalawang linggo lamang ang gagawing preparasyon para sa Level 3 competition at ang minimum pa lamang na dadalong shooters ay 600 na!

Buti na lamang at agad kong natumbok ang batikang DWIZ broadcaster na, shooter pa na si Raoul Esperas, ang vice president for Media Affairs ng PPSA. At sa tulong ni Police Staff Sergeant Carl Gonzales ng FEO, tinumbok na niya rin agad si Rosendo “Bogie” Castro Jr., ang Corporate Secretary ng PSMOC. Malamanlaman ko rin na si Castro ang siyang nagpasimuno para sa organisahin ang PPSA Media Bureau. Ngayon, gusto naman ni Castro na magkaroon ng media bureau ang PSMOC.

Sa pangalawang meeting kahapon na aktibong pinagtulungan ni Esperas at Gonzales, dumalo na rin ang si AFAD president Alaric Topacio at Paldo Belmes Jr., Range Ma­nager ng Armscor. Agad na naisapinal ang plano sa Unity Cup 2 at inaprubahan ni FEO chief ang plano para sa agarang implementasyon.

Napakadali palang pagkaisahin ang PPSA at PSMOC, kailangan lang talaga ng third party. Hindi nga biro ang pagkakaiba ng kanilang sistema pero sa hinaba-haba ng mga usapin ay napagkakaisahan din sa bandang huli.

Shooters, malalaman niyo sa shooting competition mismo kung paano nagkaisa sa mga masalimuot na usapin ang PPSA at PSMOC sa range arrangement pa lang! Nakatutuwa talaga ang nasimulang pagkakaisa ng dalawang magkaibang bakod na grupo na mangyayari lamang sa liderato ni FEO chief De Leon.  (PANALO KA! / FLORANTE SOLMERIN)

Please follow and like us:
Read More

FEO CHIEF HINIHILA PABABA

PANALO KA

BAKIT ba tila may natatakot sa Philippine National Police (PNP) at pilit na hinihila pababa ang promosyon ni Firearms and Explosives Office (FEO) chief Police Brigadier General Valeriano de Leon?

Ayon sa aking matibay-tibay na source, alam na alam ni Police General Oscar Albayalde ang mala-talangkang paghila pababa sa promosyon ni Val. Nitong buwan ng Mayo 2019, mahigit dalawang taon sa FEO si Val, hinog na hinog nang maging regional director.

Pero ang lagi raw chorus ng mga senior ay “bata pa ‘yang si Val”. Baby face kasi, kambal daw ni actor Tonton Gutierrez.

Noong nakaraang Mayo 7, 52-anyos na si Val at apat na taon na lamang ang natitira sa kanyang serbisyo sa PNP. Siya ay miyembro ng Philippine Military Academy (PMA) “Makatao” Class of 1989.

Ang totoo, ayon sa iba ko pang source, pinigilan ang pag-upo ni Val sa Region 11 dahil takot na takot silang mapalapit siya kay Pangulong Rodrigo Duterte. E magkakilala naman sila ng Pangulo, lalo na kay Davao City Mayor Inday Sara dahil si Val ay nadestino na noon bilang Deputy Regional Director for Operations (DRDO) ng Reg. 11 at concurrent pa bilang Officer-in-Charge provincial director ng Davao Occidental. Ang matindi, nang pumutok ang Davao City bombing noong Setyembre 2016, itinalaga bilang concurrent Davao City police chief din siya.

Kapatid ni Val ang kasalukuyang hepe ng Public Safety Security Command Center (PSSCC) ng Davao City na si retiradong Army Major General Benito de Leon (PMA “Dimalupig” Class ’81).

Kaya pala takot na takot silang i-promote si Val sa regional director position!

oOo

Kung maalala natin, kabahagi ng “demolition job” laban kay Val ay nung intrigahin siya sa media na halata namang pina-operate  sa “PR man” sa umano’y maraming katiwaliang nangyayari sa FEO, hinggil sa pag-iisyu ng lisensiya sa baril. Lumabas ang ganitong intriga laban kay Val ilang buwan pa lamang ang nakararaan nang umugong ang pangalan niya na maging RD ng Reg. 11.

Wala namang imbestigasyong ginawa ang pamunuan ni Albayalde at bagkus ang balita ko, sila na mismo ang nagptigil sa intriga dahil hindi nila mapatutunayan ang mga isyung ibinato kay Val. Sa madali’t sabi, siniraan lamang ang pangalan ni Val.

Pagkatapos mapahiya sa pagsira kay Val, eto na, naging awardee ang heneral noong Marso 2019 ng Presidential Anti-Corruption Commission (PACC)! Mas lalong napahiya ang mga senior na humihila pababa kay Val!

Eto ang post ni Val sa kanyang Facebook account sa pagtanggap ng naturang award:

“As I received this award last week on behalf of the PNP FEO Team, let me thank the Presidential Anti-Corruption Commission for making us a part of its 1st Anniversary Celebration after fairly validated FEO’s commitment and effort towards ensuring genuine public service. Let me also acknowledge the past and present PNP leadership for their unselfish support, and friends and those who are “not” who provide both positive and negative criticism that heighten our passion of excellence. May I recognize the untiring support of FEO Team even in the midst of a long cultured, negative systemic, who were wanting to be part of the legacy and turn around history. Special thanks to the core team who worked hard against all odds to achieve the desired goal. Above all, thanks to God Almighty who always provide me strength, knowledge and wisdom to remain steadfast, composed and remain faithful to hurdle challenging tasks along the way.” (PANALO KA)

Please follow and like us:
Read More

ANO BA ANG ‘GAME PLAN’ NI DIGONG SA CHINA? 

PANALO KA

LAHAT ng bansa gaya ng Pilipinas ay gustong makipagkaibigan sa ibang bansa. Sabi nga ni Pangulong Duterte, gusto lamang makipagkaibigan ang China sa ating bansa sa gitna ng pangamba na nananakop na ang “nakikipagkaibigang” bansa.

Kung anoman ang “game plan” ng Pangulo para sa “pagkakaibigang” ito ng kanyang administrasyon sa pagitan ng China ay dapat lang na malaman din ng sambayanang Pilipino.

Ang siste, alam kaya ng Armed Forces of the Philippines (AFP) ang game plan ng Pangulo? Alam natin na mahal na mahal ng Pa­ngulo ang AFP, sabi nga ng ilan e masyado nang “binebebe” ng Pangulo.

Hindi lang sa bukana, nakapasok na mismo ang sandamakmak na mangingisda, militia at pati na militar ng China sa loob ng teritoryo ng Pilipinas. Well, OK lang kung sila’y nakikipagka­ibigan sa atin.

Minsan na akong nakasama sa isang pagbisita ng mga opisyal ng AFP sa Pagasa Island. Marami kami noon, taong 2008 kung ‘di ako nagkakamali, kasama ang local, national at foreign reporters and correspondents. Ngayon, may balita na pinalilibutan ng daan-daang bangka ng China ang isla.

Ang Pagasa ay isang munisipalidad ng Palawan. Ang isla ay isa lamang sa mga barangay nito. Napaganda ang isla at may sistema ng gobyerno doon, gaya rin ng pangkaraniwang barangay.

Sa isla, meron tayong sistemang seguridad para sa mga nani­nirahang sibilyan. May mga tauhan ng ating Philippine Army, Navy/Marines, Coast Guard, Air Force, at Philippine National Police (PNP). Meron ngang Barangay Kapitan, Konseho at Barangay Tanod e.

Ngayon, ano ang ibig sabihin ng pagpapalibot ng mga Instik na kung tawagin ng gob­yerno ng China ay “militia”? Luma na ‘yan, kung hindi man sila nananakot ay may balak na sila talagang sakupin, giyerahin at lipulin ang mga kapwa nating Pilipino doon para mapasakanila ang isla.

Kung ito ang konteksto ng pakikipagkaibigan ng China sa bansa natin ay dapat nang magising ang lahat, lalo na ang ating Pangulo at ang AFP natin. Oo nga’t wala tayong ibubuga kung sa lakas ng sandatahan natin haharapin ang China.

Pero maraming pa­raan sa tulong ng international community para kahit papaano ay makapag-isip-isip din ang China sa kanyang ginagawa laban sa bansa natin.

Alam ‘yan ng ating Pa­ngulo at ng AFP. Ang atin lang ay dapat transparent ang administrasyon, hindi ‘yung ang mamamayan pa ang nakadidiskubre sa mga palihim na pakikipag-usap o pakiki­pagkontrata ng kasalukuyang administrasyon sa China.

Gaya nung dekada ‘70 at ‘80, ang mga ganitong usapin ang bumabasag sa pagkakaisa ng mamamayang Pilipino, isang kondisyon kung saan umuusbong ang ideya ng pag-aklas ng mamamayan laban mismo sa kanilang gobyerno.  (PANALO KA! / FLORANTE SOLMERIN)

Please follow and like us:
Read More

ANO BA ANG ‘GAME PLAN’ NI DIGONG SA CHINA?

PANALO KA

Lahat ng bansa gaya ng Pilipinas ay gustong makipag-kaibigan sa ibang bansa. Sabi nga ni Pangulong Duterte, gusto lamang makipag-kaibigan ang China sa ating bansa sa gitna ng pangamba na nananakop na ang “nakikipagkaibigang” bansa.

Kung ano man ang “game plan” ng Pangulo para sa “pagkakaibiganang” ito ng kanyang administrasyon sa pagitan ng China ay dapat lang na malaman din ng sambayanang Pilipino.

Ang siste, alam kaya ito ng Armed Forces of the Philippines (AFP) ang game plan ng Pangulo? Alam natin na mahal na mahal ng Pangulo ang AFP, sabi nga ng ilan e masyado nang “binebebe” ng Pangulo.

Hindi lang sa bukana, nakapasok na mismo ang sandamakmak na mangingisda, militia at pati na militar ng China sa loob ng teritoryo ng Pilipinas. Well, OK lang kung sila’y nakikipagkaibigan sa atin.

Minsan na akong nakasama sa isang pagbisita ng mga opisyal ng AFP sa Pagasa Island. Marami kami noon, taong 2008 kung ‘di ako nagkakamali, kasama ang local, national at foreign reporters and correspondents. Ngayon, may balita na pinapalibutan ng daang-daang bangka ng China ang isla.

Ang Pagasa ay isang munisipalidad ng Palawan. Ang isla ay isa lamang sa mga barangay nito. Napaganda ang isla at may sistema ng gobyerno doon, gaya din ang pangkaraniwang barangay.

Sa isla, meron tayong sistemang seguridad para sa mga naninirahang sibilyan. May mga tauhan ng ating Philippine Army, Navy/Marines, Coast Guard, Air Force, at Philippine National Police (PNP). Meron ngang Baragay Kapitan, Konseho at Barangay Tanod e.

Ngayon, ano ang ibig sabihin ng pagpapalibot ng mga Instik na kung tawagin ng gobyerno ng China ay “militia”? Luma na ‘yan, kung hindi man sila nananakot ay may balak na sila talagang sakupin, giyerahin at lipulin ang mga kapwa nating Pilipino doon para mapasakanila ang isla.

Kung ito ang konteksto ng pakikipagkaibigan ng China sa bansa natin ay dapat nang magising ang lahat, lalo na ang ating Pangulo at ang AFP natin. Oo nga’t wala tayong ibuguga kung sa lakas sandatahan haharapin natin ang China.

Pero maraming paraan sa tulong ng international community para kahit papaano ay makapagisip-isp din ang China sa kanyang ginagawa laban sa bansa natin.

Alam ‘yan ng ating Pangulo at ng AFP. Ang atin lang ay dapat transparent ang administrasyon, hindi ‘yung ang mamamayan pa ang nakakadiskubre sa mga palihim na pakikipag-usap o pakikipagkontrata ng kasalukuyang administrasyon sa China.

Gaya nung dekada ‘70 at ‘80, ang mga ganitong usapin ang bumabasag sa pagkakaisa ng mamamayang Pilipino, isang kondisyon kung saan umuusbong ang ideya ng pag-aklas ng mamamayan laban mismo sa kanilang gobyerno. (PANALO KA)

Please follow and like us:
Read More

KITA SA STL, ‘DI MALAYONG BUMULUSOK

PANALO KA

MASUSUBUKAN ngayon ang pamunuan ni Chairman Anselmo Simeon Pinili na siya ring OIC-General Manager ng Philippine Charity Sweepstakes Office (PCSO) kung mapapanatili nito sa loob ng tatlo hanggang anim na buwan na humigit-kumulang na P2 bilyon ang buwanang ingreso mula sa Small Town Lottery (STL).

Umupo bilang OIC-GM si Pinili noong Marso 11, kung hindi ako nagkakamali, makaraang magbitiw si General Alexander “Mandirigma” Balutan bilang delicadeza sa mga alegasyon ng kurupsyon sa ahensiya, lalo na ang umano’y kinasasangkutan ng mga opisyal na nasa 4th floor ng PCSO building.

Muli, malinaw na hindi “tinanggal” o “sinipa” ni Pangulong Rodrigo Duterte si Mandirigma sa kanyang puwesto na ayon mismo kay Presidential Spokesman Salvador Panelo ay lumalabas na utos ito ng “someone from the Office of the President”, ito ang direct quote ng media reports sa kanya. Sa bandang huli, mismong ang Palasyo ang naglinis sa unang pahayag ni Panelo na “sinibak” ng Pangulo si Mandirigma. Klaro na po tayo sa isyung ito.

Ang dapat bantayan ngayon ng mamamayang Pilipino ay ang kikitain mula sa STL. Sa aking huling pagkakaalam, merong kasalukuyang 86 na Authorized STL Agents (ASAs) na naglalaro ng STL sa buong bansa. Merong 82 na probinsiya at mahigit 20 na chartered cities ang bansa. Bawat isa sa mga ito ay dapat may isang otorisadong STL agent.

Gaya ng sinabi ko, humigit-kumulang na P2B ang kinikita ng PCSO sa administrasyon ni Mandirigma bago siya nagbitiw sa PCSO. Matatandaan na itinalaga ng Pangulo si Mandirigma bilang general manager noong Setyembre 2016. Pagkatapos ng tatlo at kalahating buwan, tumaas ang kita sa STL mula P4.7B na naging P6.7B dahil sinimulan ni Mandirigma at ng Board na i-expand ang STL na hanggang 18 agents lamang mula noong 2007.

Tumaas pa ang kita ng STL sa P15.7B matapos ang 2017 dahil hanggang 84 na agents na ang naglalaro ng STL. Record-breaking ito para sa palarong STL.

Mas naging kamangha-mangha ang palarong STL nang tumabo ito ng P26.1B noong 2018.

Ngayon, bantayan natin ang pagganap ng liderato ni Pinili kung mapapataas ba niya kasama ang Board ang kita sa STL na sa tingin ay nasa balag ng alanganin na.

Anoman ang mangyari sa kita ng STL ay tanging ang liderato lamang ng PCSO ang makasasagot.

Hindi rin naman dapat ipagmayabang ang naging resulta ng liderato ni Mandirigma dahil ginawa niya lang ang utos ng Pangulo na ayusin ang pamamalakad sa PCSO na rebisahin ang maanomalyang pamamalakad sa STL.

Gaya ng sinabi ko, bantayan natin ang palarong STL. Nagmamatyag kami.  (PANALO KA!/ FLORANTE SOLMERIN)

Please follow and like us:
Read More

‘MEETING SA PALASYO’ 

PANALO KA

KINAGABIHAN bago ipatawag ni Executive Secretary Salvador Medialdea sa Palasyo si Gen. Alexander “Mandirigma” Balutan, ayon sa aking A1 information, naroon na sina Philippine Charity Sweepstakes Office (PCSO) Chairman Anselmo Si­meon Pinili at PCSO Board Member Sandra Cam, ang mga taga-4th floor. Ang kuwento, “pinulutan” na umano nila si Mandirigma.

Kinabukasan, kasama sana ako ni Mandirigma papunta sa Department of Justice (DOJ) para sa isang pulong kasama ang Department of Interior and Local Government Unit (DILG) pero biglang naiba ang ruta sa Palasyo.

Parang walang nang­yari, ito ang nakita ko sa nakangiting mukha ni Mandirigma nang dumaan sa aking cubicle. Nabigla na lamang ang lahat nang malaman na magre-resign na siya. Wala nang puknat ang pagpasok ng mga empleyado sa kanyang opisina, paalaman at nag-iiyakang nakayakap kay Mandirigma. Hindi ko nakita ang mga ganung eksena dahil minabuti kong manatili muna sa aking cubicle, nag-oobserba.

Pero di rin ako nakatiis na di alamin habang papahaba nang papahaba ang pila sa kanyang opisina. Tinawag ko ang isa sa kanyang close-in security at nagtanong. Ang sabi, di na niya masikmura ang gusto ng mga demigods sir; malalaking tao ang kanyang binabangga sa mundo ng illegal gambling at hinihingi ang kanyang ulo sir; ayaw na niya sir, lone soldier in the battlefield fighting the enemy without reinforcement na sir.

Eto na, kasabay ng sitwasyon sa loob ng Office of the General Manager sa 10th floor, hindi po sa 4th floor, ay binagyo na ako ng tawag mula sa media. Gusto kong magpatay ng cellphone, pero di ako nagpatay. Outside office hours na nung pumasok na ako sa opisina ni Mandirigma na umuusok pa rin ang kanyang cellphone. Pagkatapos ng isa pang tawag ay saka niya ako hinarap na ilang minuto na ring nakaupo sa harap ng kanyang mesa.

Simple ang tanong ko at halos kasabay na pinakita ko ang sagot para sa sandamakmak na tanong ng media:

“PCSO General Ma­na­ger Alexander “Mandirigma” Balutan has opted to resign for personal reasons.”

Aba, naunahan na pala kaming maglabas ng palasyo at sinabing “sinibak” ni Pangulong Duterte si Mandirigma dahil sa “serious allegations of corruption!” Siyempre naman, mas may dating ang salitang sinibak kaysa nagbitiw o nag-resign para sa media upang mas maintriga ang publiko. Noong una, iginigiit ko sa mga reporter na tumatawag sa akin na nag-resign si Mandirigma, pero sa ibang reporter na “na­langisan” (media vultures) ay myopic na siyempre.

Napilitan tuloy na maglabas ng personal statement si Mandirigma bilang sagot niya sa isang katanungan ng mga netizen sa social media.

Ayon sa aking source, pati ang Pangulo ay nagtaka sa inisyung sibak statement kung kaya pinabawi niya ito. But the damage has been done! Binawi nga ni Presidential Spokesman Salvador Panelo ang sibak statement makaraang inulan siya ng tanong na hindi niya masagot nang diretsahan sa Malacanang press briefing. Sal-Sal (Salvador at Salvador) ang sagot, nag-resign daw si Mandirigma dahil sa “delicadeza”.

Kinabukasan, muling umamin si Panelo na “someone from the Office of the President” ang nag-utos sa sibak statement. Sal-Sal uli!

At the end of the day, inilabas araw ng Miyerkoles, ang termination order sa tanggapan ni Mandirigma at ang nakapirma ay si “someone”, hindi si Duterte na siyang appointing authority. Sal-Sal pa more!  (PANALO KA! / FLORANTE SOLMERIN)

Please follow and like us:
Read More

15 PROBINSYA LAMANG ANG SAKOP NG NA-TERMINATE NA ‘PERYAHAN NG BAYAN’ 

PANALO KA

HUWAG magpalinlang sa ikinakalat ng mga tauhan ng mga may pasimuno ng iligal na “peryahan ng bayan” na sakop di umano ng kanilang operasyon ang buong bansa.

Sa opisyal na listahan ng Branch Operations Sector ng Philippine Charity Sweepstakes Office (PCSO), 15 na probinsya lamang ang sakop ng Deed of Authority (DOA) ng Globaltech Mobile Online and Gaming Corp. para sa kanyang operasyon ng peryahan, pero binawi ng PCSO ang naturang DOA noong Marso 2016 dahil sa hindi pagre-remit ng Globaltech ng dapat nitong i-remit na kita sa gobyerno. Sa madali’t sabi, lumabag ang Globaltech sa pinirmahan nitong kontrata sa pagitan ng PCSO.

Muli, uulitin ko dito sa aking column ang 15 na probinsiya na ito na sakop lamang ng peryahan at hindi ang buong bansa. Ito ang mga sumusunod:

Quezon City, Panga­sinan, Oriental Mindoro, Marinduque, Palawan, Rizal, Catanduanes, Negros Oriental, Cebu, Bohol, Agusan del Norte, Davao Del Sur, Misamis Oriental, South Cotabato, at Zamboanga del Sur.

Dapat bigyan ng pamunuan ng PCSO ng kopya ng listahan ang mga branch manager. Kailangan nila ang listahan!

Ngayon, magpakita ang mga alipores ng Globaltech ng opisyal na listahan ng PCSO na hawak nila na nagpapatunay na kasama ang Nueva Vizcaya at alinmang probinsya na wala sa opisyal na listahan na legal silang magsagawa ng peryahan.

Gayundin sa Albay, wala sa listahan ang peryahan kaya dapat salakayin at patigilin ng ating provincial police diyan ang iligal na palarong ‘yan. At sa alinmang probinsya na merong peryahan at wala riyan sa opisyal na listahan ng PCSO.

Kaya para sa ating mamamayan na masugid na tagatangkilik ng mga produkto ng PCSO gaya ng Lotto, Keno Digit Games, Sweepstakes, at Small Town Lottery (STL) kailanman ay huwag magpalinlang sa mga alipores ng Globaltech.

Mantakin niyong sinabi pa diumano ng mga alipores nang hanapan sila ng DOA na nagpapakita na kasama ang Nueva Vizcaya na puwedeng paglaruan ng peryahan, sandali lang daw at kukuha sila kay mayor. Hoy mga manlilinlang, ang DOA ay iniisyu ng PCSO, hindi si mayor, governor, congressman o kung sino pa man, kahit na korte ay wala niyan!

Hindi ko rin lubos maisip kung bakit walang pag-alalay sa mga PCSO branch manager pagdating sa usaping legal na may kaugnayan sa kontrobersyal na peryahan.

Nasa legal na ang usapin kung kaya dapat “well verse” sa usa­pin, ‘ika nga, ang bawat branch managers. Kahit sino ay mapapaisip kung bakit kapos na kapos ang legal advise para sa mga taong nasa ground. Anong meron o ganap mga kabeshies?! Balitaan niyo naman kami.  (PANALO KA!/ FLORANTE SOLMERIN)

Please follow and like us:
Read More

PCSO HELPLINE, GAMITIN ANG IYONG SMARTPHONE 

PANALO KA

SA libo-libong text messages na natatanggap ko sa araw-araw na nakikipag-ugnayan kay Philippine Charity Sweepstakes Office (PCSO) General Manager Ale­xander “Mandirigma” Balutan mula sa mga kababayan nating dumudulog ng ayuda sa kanilang bayarin sa pagkaka-ospital, pang-dialysis, chemo, implant/transplant, pati na ang wheelchair at hearing aid, ramdam na ramdam na ng mga kababayan natin ang aktibong pagtugon ni “Mandirigma sa Kawanggawa” lalong-lalo na ang mga kapuspalad.

Para mas mabilis, bukod sa pakikipag-ugnayan natin kay Mandirigma sa mga textline na 09397242762 at 09985934759, gamitin din natin ang ating smartphone kung tayo po ay konektado sa internet at meron kayong Facebook para idulog ang inyong kahilingan sa PCSO.

Ito po ang inyong gagawin, i-LIKE at FOLLOW niyo ang Mandirigma sa Kawanggawa (public group at community page), magkaiba po ‘yan. Lalo na sa public group, puwede niyong i-post doon ang inyong idudulog para makakuha ng ayuda sa PCSO, sasagutin kayo agad, direkta mula kay Mandirigma mismo, staff at maski na opisyal mismo mula sa Charity Assistance Department (CAD). Masipag sumagot sa mga katanungan si Mandirigma kahit na santambak pang mga dokumento ang binubusisi nito at pinipirmahan araw-araw. Kahit na nga meron siyang kausap sa harapan ng kanyang mesa kung makikita niyang kailangang sagutin agad ang inyong tanong ay gagawin niya.

Sa mga naturang social media page, talagang mabilis ang ugnayan at nakakapagtalastasan kay Mandirigma at iba pang opisyal at staff ng kanyang tanggapan.

Subukan niyo ngayong idulog ang inyong kahilingan para sa ayuda mula PCSO sa Mandirigma sa Kawanggawa public group at community page, sasagutin kayo agad lalo na si Mandirigma mismo at si Dr. Joby Gochoco, ang manager ng Medical Services Department (MSD) ng PCSO!

Alam din ng tanggapan ni Mandirigma kung sino ang mga netizen na nanloloko o nang-aassar lamang. Kundi block kayo sa pages ni Mandirigma.

Sa mga pasyenteng nakaospital at may abiso na ang doktor isa o dalawang araw bago ma-discharge sa ospital, i-text niyo po ang kumpletong pangalan ninyo, ospital kung saan kayo naka-confine at celfon number niyo (kung di niyo kayang mag-text sa inyong celfon o smartphone ay ma­kisuyo sa nagbabantay na kaanak o kaibigan sa inyo) sa textline na 09397242762 at 09985934759, may tatawag sa inyo na opisyal o staff ng PCSO para asistehan kayo para sa inyong bayarin sa ospital.

Ihanda niyo na rin at isumite ang kopya ng inyong medical abstract, final bill at personal na letter (kahit nakasulat-kamay) na dumudulog ng ayuda mula sa PCSO at naka-address kay PCSO General Manager Alexander Ferrer Balutan, si Mandirigma mismo.

Pagpasok pa lamang ng pasyente sa ospital ay alamin agad kung merong PCSO ASAP Desk, o ang tinatawag nating At-Source-Ang-Processing. Dito niyo na mismo isumite ang mga dokumentong nabanggit sa itaas.

Partikular sa bayarin sa ospital, hindi kasama sa mandato ng PCSO na ayudahan ang professional fee ng doktor at bayad sa kuwarto. Bubusisiin ang inyong bill pagkatapos makaltas lahat ang dapat makaltas gaya ng Philhealth, senior citizen at iba pa. Muli, hindi po lahat ng bayarin sa inyong bill ay maibibigay ng PCSO, pero kapag kapuspalad ay hanggang 100% ang ayuda.

Hawakan na ang inyong smartphone at i—LIKE at FOLLOW na ang Mandirigma sa Kawanggawa public group at community page!

LIKE and FOLLOW niyo na rin ang aking personal FB na FZaff S. Solmerin at ang aking FB page na Fzaff Sol­merin.  (PANALO KA! / FLORANTE SOLMERIN)

Please follow and like us:
Read More

KAWAWANG MAMAMAYAN

PANALO KA

NOONG nagkaroon ng raid sa Quezon City sa mga puwesto ng kontrobersyal na “peryahan ng bayan” na ino-operate ng Globaltech Mobile Online and Gaming Corp., walang nahuling “mastermind” o mga taong nasa likod ng iligal na operasyon. Ang mga nahuli ng mga operatiba ng National Bureau of Investigation (NBI) katuwang ang mga kinatawan ng PCSO ay ang mga kawawang mamamayan na siyang nakasuhan at nakulong, karamihan sa kanila ay hindi nakapagpiyansa, iniwan sila ng kanilang principal.

Nagsisilbing “sacrificial lamb” o “palit-ulo” ang mga ordinaryong mamamayan sa iligal na aktibidad ng mga gambling lord at kanilang protektor sa gobyerno. Kapag nagkasukulan, mawawala na parang bula ang mga tunay na salarin at ang laging swak sa rehas ay ang mga nadedenggoy nilang mamamayan. Malinaw kung sino ang panalo at talo sa ganitong sitwasyon.

Ilan sa mga ito o di kaya ay kaanak ng mga nahuli’t nakulong ay nagtatanong kung bakit sila ang pinag-iinitan ng batas samantalang naghahanapbuhay lang naman sila para sa pang-araw-araw nilang ikabubuhay. Bakit hindi raw ang mga pasimuno ng peryahan ang hulihin imbes na sila?

Simple lamang po, alam niyo po ba na iligal ang pinasok niyo at may kalalagyan kayo sa batas kapag nahuli kayo? Ang sagot po nila ay hindi daw nila alam. Pangalawang tanong, bago niyo ba pasukin ang alok na trabaho ay inaalam niyo muna kung ligal o iligal ito? Ang sagot nila ay sinabi raw sa kanila na ligal ang operasyon ng peryahan. Ang tanong nila, e kung ligal bakit kami ang hinuhuli, kinukulong at kinakasuhan? Sagot ko sa kanila, naloko po kayo ng mga pasimunong iliga-lista!

Ngayon, sino ang nakinabang sa illegal operation ng peryahan na ito? Batay sa datos mismo ng PCSO, tumataginting na P506.1 Milyon, kasama na ang penalty charges, ang dapat na i-remit ng peryahan. Kailangan pa bang pagdiskusyunan natin ‘yan! Kung ang naturang halaga ay nai-remit sana ay di marami sanang mga kababayan nating nagkakasakit ang naayudahan para sa kanilang ospitalisasyon at gamot. Wala rin sanang gusot sa pagitan ng PCSO at Globaltech, di po ba?

Kaugnay sa illegal gambling, tandaan po natin na merong Executive Order No. 13 ang Pangulong Rodrigo Duterte, ang kanyang “all-out war” sa illegal gambling. Meron ding batas, Republic Act 9287 (An Act Increasing the Penalties for Illegal Numbers Games, Amending Certain Provisions of Presidential Decree 1602). Higit na katuwang dapat ng Duterte administration ang Philippine National Police (PNP) sa pagsugpo ng iligal na sugal. Pero kadalasan, NBI pa ang mas aktibo katuwang ng gobyerno at PCSO.

Sa mga kababayan natin gaya ng mga naloloko ng mga pasimuno ng peryahan, puwede nating mabasa at pag-aralan nang mabuti ang mga batas na aking nabanggit sa pamamagitan ng internet, kayong mga may smartphone ay i-google search niyo lamang, para alam natin ang mga dapat nating malaman na batas pagdating sa illegal gambling at katapat na kaparusahan.

Sabi nga sa English: “Ignorance of the law excuses no one.” (PANALO KA! / FLORANTE SOLMERIN)

Please follow and like us:
Read More