MAGNA CARTA OF COMMUTERS IPASA – NOGRALES

Rep Juan Fidel Nograles-2

(PFI Reportorial Team)

NANAWAGAN ang isang bagitong kongresista sa kanyang mga kapwa mambabatas sa mababang kapulungan ng Kongreso na agad ipasa ang batas na nakikitang solusyon para mapabuti o mapahusay ang pagkilos ng mga Filipino sa buong bansa.

Layunin ng Magna Carta of Commuters na pagtuunan ng pansin ang hindi pagkakapantay-pantay na dulot ng ilang dekadang kabiguan na maipatupad ang wastong pagkokonekta sa ating bansa, pahayag ni Rizal 2nd District Rep. Fidel Nograles.

“Nananawagan tayo sa ating mga katrabaho. Bagong taon, bagong dekada, ngayon na ang tamang panahon bago pa mahuli para malutas ang araw-araw na bangungot ng ating mga commuter,” ayon kay Nograles.

Ang batas ay naglalayong kilalanin at itaguyod ang karapatan ng mga mananakay.  Saklaw ng karapatang ito ang pagbibigay ng serbisyo sa pampublikong transportasyon, ligtas at maaasahang imprastraktura hanggang sa malinis na hangin habang naglalakbay gayundin sa kapakanan ng commuter at pakikiisa ng mga ito.

Nakasaad din sa Magna Carta na kailangan nang lumipat ang bansa mula sa car-centric public policy and infrastructure patungo sa mas sustainable transport and mobility policy, upang bukod sa kapakanan ng mga commuter ay matiyak din na mapangangalagaan ang kalikasan at kalusugan ng mga mananakay na Filipino.

“Ang hakbang na ito ay naglalayong itakda ang ating mga direktang prayoridad sa kung paano ginagamit ang mga espasyo – sa mga gumagamit ng pampublikong transportasyon, sapagkat sila ang bumubuo ng pinakamalaking numero, kaya dapat silang bigyan ng prayoridad sa paggamit ng ating mga kalsada,” saad ng mambabatas.

Dagdag pa nito, upang matugunan ang lumalalang traffic na dinaranas ng bansa, partikular sa urban areas, kinakailangang pag-aralan o alamin ang sanhi o ugat nito tulad ng patakaran sa paggamit ng lupa at ang pagwawasto ng proporsyon ng pribado at pampublikong transportasyon.

“Kung iisipin, maaaring pilitin ng Magna Carta of Commuters ang mga gumagawa ng polisiya at nagpapatupad nito para tingnan ang mga suliranin ukol sa madaliang pagkilos bilang isang sistema ng inter-related issues na nangangailangan ng isang holistic at multi-stakeholder approach,” ayon pa kay Nograles na isa ring abogado na nagtapos sa Harvard.

Ang sukatan para sa pinakamimithing layunin ay matiyak ang mabilis na paggalaw at mabigyan ng dangal ang mananakay, pahayag pa ng mambabatas.

“Aayusin natin para ang Pinoy commuters, hindi hulas, hindi inis, hindi nakakaltasan ng sahod dahil na-late sa trabaho.

Please follow and like us:
Read More

REHAB CENTER SA RIZAL MAY AYUDA NG DDB

Nograles

(Ni JOEL O. AMONGO)

Nagbigay ng limang (5) milyong pisong ayuda para sa pondo ng pagtatayo ng community based rehabilitation center ang pamunuan ng Dangerous Drugs Board (DDB) sa San Mateo, Rizal bilang bahagi ng patuloy na kampanya kontra ilegal na droga sa bansa.

Pormal na nilagdaan ang Memorundum of Agreement (MOA) nina DDB Chairman Catalino Cuy, San Mateo Mayor Cristina Diaz at Rizal 2nd District Rep. Juan Fidel Nograles nitong nakalipas na Biyernes, Disyembre 20, 2019.

Pinagtibay ng MOA ang pagtutulungan ng pamahalaang lokal ng San Mateo, Rizal at DDB upang higit na paigtingin ang war on drugs na isinusulong ng liderato ni Pangulong Rodrigo Duterte.

“Ang pondo ay suporta po namin sa kanila, bahala na po sila Mayor Diaz at Cong. Nograles sa kanilang counterpart para maitayo ang rehabilitation center sa kanilang nasasakupan,” pahayag ni Cuy.

Nagpasalamat naman si Cong. Nograles para sa pondo sa kampanya kontra ilegal na droga sa ikalawang distrito ng Rizal. Gayundin, tiniyak ng mambabatas ang patuloy na suporta nito sa Kamara.

Idinagdag pa ni Nograles na sa kasalukuyan ay naghahanap sila ng lugar kung saan posibleng ipatatayo ang rehab center na may kapasidad na 6,000 katao na magiging accessible sa lahat.

Kabilang din sa mga dumalo sa MOA signing sina Usec. Benjamen Reyes, permanent member; Usec. Earl Saavedra, Executive Director ng DDB at Gen. Doris Dorigo, Executive Assistant ng Office of the Chairman.

Please follow and like us:
Read More

PARALEGAL SALAIN

Rep Juan Fidel Nograles-2

Pamantayan, benepisyo, ipinatatakda ni Rep. Nograles

(PFI Reportorial Team)

ISINUSULONG ng isang bagitong mambabatas ang tamang benepisyo at pagkilala sa mga papasok sa propesyong paralegal.

“Panahon na upang maging propesyonal ang paralegal work para matiyak ang kalidad ng serbisyong legal sa pamamagitan ng pagtatakda ng pamantayan para sa sinomang pumapasok sa ganitong uri ng trabaho.”

Ito ang dahilan kaya itinutulak ni Rizal 2nd district Rep. Fidel Nograles, ang House Bill 5886, isang komprehensibong panukala na nagsasaad ng tungkulin ng paralegal workers at magbibigay ng garantiya sa kanilang karera at propesyonal na pag-unlad sa legal profession.

Ayon sa pag-aaral, may nakikitang pagtaas ng demand para sa paralegal services sa maraming bansa, kabilang na ang Pilipinas, na mayroong 33% growth rate.

“Gayunman, maliban sa mahalagang tungkulin na kanilang ginagampanan sa legal profession, ang paralegals ay hindi nakatatanggap ng tamang kompensasyon at pagkilala na nararapat sa kanila,” pahayag ng kongresista.

Ayon kay Nograles, “Ang paralegals ay may napakahalagang papel na ginagampan sa propesyong legal. Sila ay nagbibigay ng suporta na kinakailangan ng legal practitioners para magampanan nang maayos ang kanilang iba’t ibang gawain at responsibilidad.”

“Ito ang tamang panahon na kilalanin natin ang kanilang trabaho at gawing propesyunal ang kanilang mga serbisyo, pati na rin ang paggawa ng hakbang para masiguro na mayroon silang sapat na pagsasanay bago sila pahintulutang gumanap sa kanilang serbisyo,” ayon pa sa mambabatas na isa ring abogado at nagtapos sa Harvard Law School noong 2016.

Sa ilalim ng HB 5886, ang mga nagnanais maging paralegal ay kinakailangang Filipino citizen na nasa wastong gulang, nakapagtapos ng high school at dapat munang sumailalim sa Paralegal Training and Education Program (PTEP) na magkatuwang na binuo at nilikha ng Department of Justice, Supreme Court at Commission on Higher Education.

Ang PTEP ay may kasamang 200 oras na on-the job training sa mga tanggapan ng gobyerno na naatasang gumawa ng legal na kasanayan o tungkulin, o sa isang accredited na pribadong law firms.

Sa oras na makumpleto ang PTEP, ang mga nagsanay ay sasailalim sa Paralegal Professional Exam- isang walong oras na pagsusulit na sesertipika sa sinomang indibidwal bilang professional paralegals kapag naipasa nila ang eksaminasyon.

Please follow and like us:
Read More

KOMISYON SA HEALTH PROMOTION ITINUTULAK NI REP. NOGRALES

REP NOGRALES-KALUSUGAN-2

(PFI REPORTORIAL TEAM)

TINUTULAK ng isang bagong mambabatas ang paglikha ng Health Promotion Commission na popon­dohan mula sa 20% ng natitirang incremental revenues na nakalaan para sa kalusugan alinsunod sa Republic Act 10351 o ang Excise Tax Reform Law.

Ang pangunahing tungkulin nito ay upang mabuo ang National Health Promotion Policy Framework and Action Plan para matiyak na kalusugan ang mangunguna sa lahat ng mga polisiyang gagawin, pati na rin ang pagpapakilos ng mga mekanismong panlipunan at ma-monitor ang kanilang pagpapatupad.

Gagawa rin ito ng rekomendasyon para sa pag-unlad ng pamumuhunan sa mga tiyak na sektor na makatutulong sa pagsulong ng kalusugan upang ganap na makamit ang mga layunin sa kalusugan ng buong bansa, kabilang pero hindi limitado ang mga programa para paghahatid ng kamalayan sa kalusugan, pag-aaral sa mga polisiya, pagsusuri sa kasalukuyang batas para matiyak ang proteksyon sa kalusugan, at pagpapatupad ng pilot health promotion projects na magiging basehan sa paggawa ng mga polisiya at mga irirekomendang programa.

Ayon kay Rizal 2nd District Rep. Fidel Nograles, ang Health Promotion Commission ay mangunguna sa pagkambiyo mula sa kasalukuyang uri ng pamumuno sa kalusugan patungo sa isang prayoridad ang pagsasala o maagang pagpigil.

“Ang pagtaas ng kaso ngayon ng mga nakahahawang sakit na kayang pagalingin ng vaccines ay nagpapahiwatig sa amin na baka mali ang ating diskarte,” ayon sa abogadong nagsanay sa Harvard.

Dagdag pa ni Nograles, kailangan tugunan ang ma­ling pananaw ng mga Filipino na nagkaroon ng takot sa bakuna sanhi ng kontro­bersyang hatid ng Dengvaxia.

Ang problema sa kalusugan ay kinabibilangan ng mga nakakaalarmang pagdami ng degenerative and lifestyle diseases gaya ng hypertension, cancer, diabetes at mga aksidente, na ayon sa mambabatas ay nangangailangan ng long term investments para maiwasan.

“Ito ang rason kung bakit kailangan natin ang Health Promotion Commission na multi-sectoral and inclusive. Hindi natin matatapos ang isyu sa kalusugan ng publiko sa pabagu-bagong paraan. Kailangang itong maging sistematiko, na may positibong pananaw para sa pangmatagalang tagum­pay,” ayon pa sa kongresista.

Ani Nograles, ang pangangailangan ng mga kabataan, kababaihan, mahihirap, matatanda, may kapansanan, at margina­lized sectors ay dapat unahin upang matugunan ang umiiral na kakulangan sa kalusugan.

Please follow and like us:
Read More

REP. NOGRALES: SIERRA MADRE PROTEKTAHAN

Rep Fidel Nograles-Sierra Madre-2

NAIS ng isang mambabatas mula sa Rizal na masigurong nabibigyan ng proteksyon ang bulubundukin ng Sierra Madre.

Ito ang layunin ni Rizal 2nd District Rep. Fidel Nograles kaya isinusulong niya sa Kamara ang pagbuo ng Sierra Madre Development Authority.

Magiging pangunahing gawain ng naturang ahensiya ay magsagawa ng komprehensibong survey ng pisikal at mga likas na yaman gayundin sa mga potensyal na makikita sa Sierra Madre region at gumawa ng komprehensibong tala at detalyadong plano batay sa resulta ng survey, at gumawa ng disenyo upang mapangalagaan at gamitin nang mabuti ang likas-yaman na matatagpuan sa rehiyong ito.

Ang SMDA ay maaari ring “gumawa ng rekomendasyon sa tamang mga ahensya para sa pananalapi o paglalaan ng pondo, technical support, pisikal na tulong at ang antas ng prayoridad ay nakatuon sa mga proyekto sa agrikultura, pang-industriya at komersyal, humiling o humingi ng tulong mula sa pamahalaan o alinman sa mga sangay nito.”

Ito rin ay gagawa ng “plano, pinansyal ng programa o magsagawa ng mga proyektong pang-imprastraktura tulad ng river, flood and tidal control projects, waste water and sewerage works, dams and water supply, mga kalsada, irigasyon, pabahay at iba pang kahalintudad na patrabaho, kung kinakailangan na isama ito sa konteksto ng ipatutupad na plano sa pagpapaunlad at mga programa kabilang na ang pagsasaayos, relokasyon o paglilipat sa mga residenteng naninirahan sa lugar na maaaring kailanganin at kapaki-pakinabang sa mga awtoridad.”

“Kailangan natin ng isang government body na may sapat na ngipin para siguruhin na ang pagsasaayos sa Sierra Madre ay kayang gawin na hindi masasalaula at hindi rin mababalewala ang karapatan ng mga katutubo na kung ilang siglo nang naninirahan dito at nagsilbing tagapag-alaga nito,” pahayag ni Nograles, na nagsanay ng abogasya sa Harvard.

Ayon pa sa mambabatas, ang pagnanais na magamit ang likas-yaman ng Sierra Madre ay maaaring makaambag sa pambansang kaunlaran ngunit dapat maging balanse na pangmatagalan at tama ang pag-iingat sa kalikasan.

Please follow and like us:
Read More

NOGRALES BIDA SA ABROAD SA PAGSUSULONG NG KAPAKANAN NG OFWs

REP NOGRALES-6

PINURI ng Alliance of Bonafide Recruiters for Overseas Filipino workers Advancement and Development (ABROAD) si Rizal 2nd District Rep. Fidel Nograles dahil sa panukalang batas na isinusulong nito na pagbuo ng hiwalay na ahensiya upang humawak sa overseas labor cases.

Ayon kay ABROAD Convenor Russel Garcia, maganda ang hakbangin ni Nograles bukod pa sa napapanahon na upang bigyang pansin ang kapakanan ng mga makabagong bayani ng bansa.

Sinabi ni Garcia na ang National Labor Relations Commission ay hango sa batas na inakda ng US Congress noong panahon ng Commonwealth Republic bagaman nagkaroon ng amyenda noong 2015.

“Ang NLRC ay ahensiyang itinatag para manguna sa paghawak ng domestic labor cases bagama’t ito ang kasalukuyang humahawak ng mga claim sa pera na isinasampa ng OFWs, hindi ito tiyak at sadyang nakadesinyo para hawakan ang dumarami at sunod-sunod na mga kaso mula sa mga manggagawang nasa ibayong dagat,” ayon kay Garcia.

“Ang mga kaso ng OFW ay may kinalaman sa foreign labor at immigration laws, at mga patakaran ng mga pamamaraan at magkakaiba ang lahat ng ito kung pagbabasehan ang bawat bansa,” dagdag pa nito.

Matatandaang inihain noong Oktubre 21, 2019 ni Nograles ang House Bill No. 5171 na layuning maitatag ang Overseas Labor Relations Commission na dapat mayroong “eksklusibo at sapat na kapangyarihan sa lahat ng kasong may kinalaman sa employer-employee relations, documented or undocumented workers, manindigan o umaksiyon na ayon sa anumang batas o kontratang kinasasangkutan ng mga Pilipinong manggagawa para magtrabaho sa ibang bansa.”

Sinabi ng mambabatas na “Hindi ito lilikhain upang subukang magpatupad ng “one size fits all” approach para sa paghawak ng mga reklamo ng OFW dahil ang ibang bansa ay may sensitibong karapatan sa kanilang soberenya na gaya rin sa atin.”

Naunang sinabi ni Nograles na anumang panukalang makatutulong sa kapakanan ng mga OFW, na pangunahing sektor na may malaking ambag sa ekonomiya ng bansa, ay dapat maipasa nang walang maraming tanong.

Ang hiwalay na labor relations commission para sa OFWs ay titiyakin din na ang migrant workers na mayroong hindi pagkakaunawaan sa paggawa, ay mabibigyan ng atensiyon at mapagkukunan na hindi nagagawa o kayang ibigay ng NLRC sa ngayon,” dagdag pa ni Nograles. PeryodikoFilipino Reportorial Team

Please follow and like us:
Read More

SINIGURO NI REP. NOGRALES SA 800 MAGSASAKA SA RIZAL: LUPA, KABUHAYAN

NOGRALES

MAHIGIT 800 agra-rian reform beneficiaries (ARBs) mula sa ikalawang distrito ng Rizal ang nakatanggap ng titulo ng kanilang sinasakang lupa bukod pa sa naipangakong tulong upang mapaunlad ang sakahan na saklaw ng 737 ektaryang lupaing agrikultural.

Sinabi ni 2nd District Rep. Fidel Nograles, hindi magtatapos sa pamamahagi ng lupa bilang pagtupad sa kautusang nilalaman ng Comprehensive Agrarian Reform Program (CARP) ang tulong na ibibigay sa ARBs.

“Magbabalangkas kami ng mga pamamaraan upang siguruhin na mapapakinapangan ng husto ng mga benepisyaryo ang lupa na kanilang natanggap. Magtutulungan kami hindi lang para mai-angat ang buhay nila, kundi para na rin umusbong ang agrikultura sa aming distrito,” ayon kay Nograles.

Nabatid ng PeryodikoFilipino Inc. na umabot sa kabuuang  807 magsasaka mula sa Rodriguez, San Mateo, Teresa, Morong, Baras, Pililia, Jalajala, Tanay at Pinugay ang tumanggap ng kanilang Certificate of Land Ownership Award (CLOAs) para sa lupaing may lawak na 737.0017 na ipinamahagi noong Setyembre at Oktubre.

Iginiit ng mambabatas na kumikilos ang kanyang mga tauhan upang direktang ilapit ang serbisyo ng gobyerno sa mga benepisyaryo ng lupa upang hindi na ang mga ito mamurublema sa paraan ng pagpapaunlad sa kanilang lupain at kung saan-saan tutungo para sa tulong.

“Madalas kasi hindi na priority ng farmers ang magtanong at lumapit sa pamahalaan para hu­mingi ng tulong. So hindi nila batid kung anong mga serbisyo ang pwede nilang makuha,” paliwanag ni Nograles.

“Mabilis na access sa mga credit facilities para magkaroon ng sala­ping magagamit sa pagpapaunlad ng ani at pagkakaloob ng kagamitan sa pagsasaka, pati na rin ng technical assistance at edukasyon sa pananalapi ang ating prayoridad upang matiyak na ang kabuhayan ng mga magsasaka ay umasenso.”

Idinagdag pa nito na ang pagbibigay ng mas madaling access sa pananalapi ay isa ring pa­raan upang hindi lumapit ang benepisyaryo sa mapagsamantalang nagpapautang o mauwi sa pagbebenta ng kanilang lupa.

Please follow and like us:
Read More

FREE LEGAL AID SA MAHIHIRAP ISUSULONG SA KAMARA PARA TUGUNAN ANG KAKULANGAN SA ABOGADO

REP NOGRALES-2

SA wakas ay matutuldukan na rin ang patong-patong na kasong hinahawakan ng Public Attorney’s Office, na hindi magkamayaw ang mga abogado ng ahensya sa pangangasiwa ng mga kasong idinudulog sa kanila.

Ayon kay Rizal Second District Rep. Fidel Nograles, isang solusyon ay ang pagsasabatas ng free legal aid program sa mga eskwelahang nagtuturo ng batas sa bansa “upang bigyan ng libreng tulong-legal ang mga mahihirap na Pilipino.”

“Ginagarantiya ng ating Konstitusyon ang pantay-pantay na pagkakataon sa katarungan ng mga mahihirap sa pamamagitan ng libreng serbisyong legal sa mga hukuman at mga quasi-judicial body, at ang pagtitiyak na naibibigay ang sapat na tulong-legal para sa lahat, kahit na sa mahihirap,” paliwanag ng abogadong nagtapos sa Ateneo.

“Ngunit iba ang karanasan ng ating mga kababayan dahil ang mga mekanismo ng estado para magbigay ng libreng tulong-legal ay nabubulunan ng sobrang dami ng kasong idinudulog sa Public Attorney’s Office. Nasa kanila ang aking paghanga ngunit malinaw sa bilang ng kanilang kasong hinahawakan na kailangan nating maghanap ng iba pang paraan upang masiguro na sapat ang natatanggap na ayudang legal at mga abogado para sa mga mahihirap,” ayon sa Congressman na nagtapos din sa Harvard.

Ayon kay Nograles, nag-umpisang manilbihan sa mga taga-Rizal sa pamamagitan ng kanyang libreng legal aid program hindi pa man nahalal bilang kintawan, nasa 11,616,916 mahihirap na kliyente ang natulungan ng PAO noong 2017 at nasa 906,251 mga kaso ang kanilang nahawakan sa buong bansa.

“Sa bilang ng abogado ng PAO na nasa 2,000 lamang, karaniwang umaabot sa 5,794 kliyente ang kanilang inaatupag at aabot sa 458 mga kaso bawat isang abogado kada taon. Kaya maiintindihan natin kung bakit minsan ay sa ibang paraan na lamang idinadaan ng ibang kliyente ang kanilang mga kaso’t hinaing makakuha lamang ng abogado,” ayon kay Nograles.

At pataas nang pataas taon-taon ang bilang ng kanilang mga kaso, daing ni Nograles, sa kabila ng kakaunting karagdagan ng mga abogado sa kanilang hanay. Noong 2016, natulungan ng PAO ang 8,839,742 mahihirap na kliyente at 850,298 ang mga kasong kanilang hinawakan sa bansa; noong 2015, nasa 7,747,735 ang kanilang kliyente sa kabuuang 848,516 kaso.

Upang tugunan ito, inakda ni Nograles ang panukalang batas na “Legal Aid Program Act of 2019.” Kapag naisabatas, lahat ng pribado at pampublikong law school sa bansa ay magkakaroon ng kani-kanilang legal aid program batay sa isang komprehensibong national legal aid program na itatatag ng Legal Education Board (LEB) sa ilalim ng pangangasiwa ng Korte Suprema at pakikipagtulungan ng Department of Justice at ng Local Government Units, Integrated Bar of the Philippines, Philippine Association of Law Schools,  Association of Law Students in the Philippines,  Office of Legal Aid ng University of the Philippines, at iba pang mga organisasyon.

Please follow and like us:
Read More