ISANG KISAP MATA ANG BUHAY

NIPIS

MALUNGKOT na Lu­nes ang sumalubong sa mga opisyales at miyem­bro ng National Press Club at Remate, Ang Dyaryo ng Masa, kaugnay sa pamamaslang sa kolumnistang si Jupiter Gonzales, alyas “Spider” at kasama nitong si Christopher Tiongson sa Arayat, Pampanga.

Ang buhay nga talaga ay isang kisapmata. Hindi mo aakalain na ang taong kasama mo lang nang Linggo ng umaga sa isinagawang clean up drive sa Navotas City Centennial Park and Bay at feeding program ay pinaslang nang gabi sa Pampanga.

Ang masaklap, manga­ngapa na naman sa motibo nang pamamaslang ang Presidential Task Force on Media Security na pina­ngungunahan ni Undersecretary Jose Sy-Egco at maging ang NPC, sa pa­ngunguna ni President Lakay Gonzalo, na naunang kumondena sa pamamas­lang.

Ilang buhay na rin ng mga mamamahayag ang inutang ng mga hindi kilalang salarin na ang motibo ay siguradong pawang pansarili at hanggang ngayon ay hindi pa nabibigyang katarungan. Dasal natin na sana’y ma­lutas ang kaso ni Jupiter Gonzales at mabigyang katarungan ang kanyang pagkamatay.

Sa isang buwan naman, sasapit na ang ika-10 taong paggunita  sa walang awang pamamas­lang sa 58 katao kabilang ang 32 miyembro ng media sa Maguindanao. Nobyembre 23, 2009 nang paslangin ng may 100 katao kabilang ang ilang miyembro ng Philippine National Police at private armies ng pamilya Ampatuan ang mga taong nakasuporta sa noo’y vice Mayor na si Esmael Mangudadatu na pinangunahan naman ng asawa ng huli na si Genalyn.

Bilang isang mamamahayag, dalangin natin na nawa’y magkaroon ng liwanag sa mga kaso ng mga mamamahayag na pinaslang.

Isang pakikiramay sa pamilya ni Jupiter.

Dumako naman tayo sa magandang balita para sa mga mamamayan ng  Caloocan at Malabon Cities dahil kabilang ang dalawang nasabing lungsod sa 2019 Seal of Good Local Governance awardees sa National Capital Region.

Malaki ang pasasalamat ni Mayor Len Oreta dahil ikatlong taon na nila itong 2019 bilang awardee sa SGLG ng Department of Interior and Local Go­vernment na nagpapatunay na maayos ang kanyang pamamalakad sa kanyang lungsod.

Samantala, gayundin ang Caloocal City sa ilalim ni Mayor Oscar Malapitan na kabilang din sa tatanggap ng pagkilala at parangal mula sa DILG.

Samantala, talagang napakasuwerte nitong Caloocan City sa pamumuno ni Malapitan sapagkat ang dating kulelat na lungsod ngayon ay nagsisimulang bumangon at maki­lala bilang isa sa pinakamayamang lungsod sa buong bansa.

Sa inilabas na financial report ng Commission on Audit, pumalo ang Caloocan sa ika-7 puwesto bilang pinakama­yamang bayan sa Pilipinas kung annual income nitong 2018 ang pag-uusapan na umabot sa P18.31 bilyon kumpara sa P17.01 bilyon noong 2017.

Gayunman, nangunguna pa rin ang Makati City sa usapin ng mataas na koleksyon sa annual income kung saan nakapagtala ito ng P230.833 bilyon na pinangalawahan naman ng Lungsod ng Quezon na nakapagtala ng P87.285 bilyon.

Sanay tuloy-tuloy ang gagawing pagpapaunlad ni Mayor Malapitan sa Caloocan City sapagkat hindi lang naman para sa kanya ang pagbabagong nagaganap sa lungsod subalit mas higit na makikinabang ang mga mamamayan at ang mga mamamayan sa susunod na henerasyon. (NIPIS / LEA BOTONES)

Please follow and like us:
Read More

NAUNA SI MAYOR OCA

NIPIS

NANG ipag-utos ng Department of Interior and Local Government ang pagpapaluwag ng mga kalsada upang maibsan ang problema sa trapiko base sa kautusan ni Pa­ngulong Rodrigo Roa Duterte sa kanyang State of the Nation Address (SONA) noong Hulyo, taong kasalukuyan, nauna na ang pamunuan ni Caloocan City Mayor Oscar “Oca” Malapitan.

Mabilis ang pagtalima ng alkalde ng Caloocan sa kautusan ng DILG  gamit ang ‘Oplan Sagabal’ na siyang sumuyod sa ilang subdibisyon sa North Caloocan upang wasakin ang mga sagabal sa mga kalye bukod pa sa pagpapabukas nito sa mga gate ng mga subdivision upang makasiguro na madaraanan ang mga ito upang  magluluwag ang daloy ng traffic sa kanyang nasasakupan.

Tahimik lang naman ang pagkilos ni Mayor  Oca at maging ang kanyang anak na si Congressman Dale Gonzalo “Along” Malapitan, Caloocan City 1st District Representative kaya’t  ramdam na ramdam ng mga residente ang kanilang mga ginagawa upang maisaayos ang daloy ng trapiko.

Maraming pagbabago na rin namang naipatupad ang alkalde ng Lungsod ng Caloocan tulad ng pagkakaroon ng bagong City Hall mula sa Mabini St. ay nailipat na sa East Grace Park, mayroon na ring Caloocan City Sports Complex sa Bagumbong, maayos na mini-city hall sa North Caloocan at ma­rami pang iba.

Dahil sa mga naipagawa ng mga Malapitan, ramdam na ramdam ng mga mamamayan ng Caloocan City ang pag-unlad, ang progresong kanilang matagal na inantabayanan. Dito nila ibinase ang pagmamahal sa kanila ng alkalde.

Naniniwala kasi itong si Mayor Oca na “walang imposible kung mayroon tayong sipag, tiyaga at determinasyon upang mapa-unlad ang ating buhay,” na  isinasalin niya sa kanyang mga anak na si Along na gayundin ang panuntunan lalo na sa pagpapakita bilang ehemplo sa mamamayan.

Sa aking pagkakatanda, maraming mga bakod ng residente ng Sunriser Village ang giniba dahil sa kautusan ni Mayor Oca na alisin ang mga balakid at paluwangin ang kal­ye upang madaanan ng maayos ng mga sasakyan na makikiraan sa nasabing lugar.

Nainis ang inyong lingkod dahil hindi nakita ng pamunuan ng barangay at ng city hall ang mga sagabal sa kalye ng Llano mula Silanganan hanggang tapat ng Llano Elementary School  na talaga namang nagsisikip kapag naglabasan na ang mga sasakyan sa umaga at mga trak naman sa gabi.

Dahil sa pagbubukas ng Sunriser Village sa mga dumaraan, posibleng malagay sa panganib ang buhay at ari-arian ng mga nakatira roon.

Subalit hindi puwedeng ihagis kay Mayor Oca ang sisi dahil ipinatutupad nito ang tagubilin ng DILG na linisin ang mga kalsada mula sa mga sagabal pero iba ang pag-unawa ng mga opisyal ng barangay na laging gamit ay sumusunod lang sila sa utos ng pangulo.

Naman! Naman! Ang sabi ng pangulo, linisin ang mga bahagi ng pag-aari ng pamahalaan na ginagamit ng mga pribadong mamamayan sa kanilang negosyo o pagkakakitaan.

Natapos na ang 60 days na palugit na ibinigay ng DILG sa mga Local Government Units upang linisin ang mga nasasakupan nila na nagiging dahilan nang mabagal na daloy ng trapiko. At nagsabi ang DILG na magtutuloy-tuloy ang kanilang programa upang mas mapaluwag pa ang mga daanan sa bansa.

Pagtutuunan ng pansin ang mga maliliit na kalye na marami ring sagabal sa pagdaan ng mga sasakyan at mga tao.

Sa Caloocan, hindi na kailangang tingnan ang nagawa ni Mayor Oca dahil nauna na ito sa paglilinis ng mga maliliit na kalye at maging pribadong subdibsiyon kaya dapat na bigyang papuri ito sapagkat hindi pa man iniuutos ng DILG, nauna na si Mayor Oca Malapitan.

Pahabol: Congratulation kay P/MGen. Guillermo Lo­renzo Eleazar, dating director ng National Capital Region Police Office sa pagkakatalaga nito nilang The Chief Directorial Staff ng Philippine National Police. Gayundin, congrats kay P/BGen. Debold Sinas, bagong director ng NCRPO na pumalit kay Eleazar. (NIPIS /  LEA BOTONES)

Please follow and like us:
Read More

PAGBABAGO SA BuCor TULOY-TULOY NA?

NIPIS

MARAMING ipinatupad, ipinatutupad at ipatutupad  na pagbabago ang bagong upong Bureau of Corrections chief Gerald Bantag sa kanyang nasasakupan lalo na sa New Bilibid Prison (NBP) sa Muntinlupa.

Sinimulan ni Bantag, miyembro ng Philippine National Police Academy class ’96 (Kaagapay), ang paglilinis sa mismong kulungan kung saan ipinawasak ang mga maliliit na bahay-bahayan at kubol-kubol sa loob mismo ng maximum security compound ng NBP na noon pa man ay naitayo na bago pa man maupo sina dating BuCor chiefs Ronald “Bato” dela Rosa at Nicanor Faeldon.

Bukod sa paglilinis ng mismong kapaligiran, ang dating opisyal ng Bureau of Jail Management and Penology ay naglilinis din ng mismong tanggapan niya kung kaya’t sinibak nga niya ang may 300 guwardiya ng maximum security compound.

Marunong din naman magpakumbaba ito si Bantag at sa halip na iyabang ang kanyang naabot ay hiningi niya ang tulong ni dating National Capital Region Police Office director P/MGen. Guillermo Eleazar sa paggiba ng mga kubol na ginagawang taguan umano ng kontrabando ng mga preso o persons deprived of liberty (PDL) at pagpapatupad ng pagbabago sa BuCor kaya’t nasa mahigit 500 pulis ang itinalaga sa kulungan.

Naunang nagkaroon ng pagsabog sa mga illegal structures sa loob ng NBP na tila pauna na upang huwag buwagin ang mga nasabing taguan ng mga kontrabando lalo na ng mga ilegal na droga. Subalit nagkamali ng tantiya ang mga mayayaman at financier ng droga o mga drug lords na nasa mismong kulungan sapagkat iyon ang gusto talaga ni Bantag, ang magkaroon ng mga banta sa kanya na huwag ituloy ang anumang balak na mga pagbabago sa loob ng kulungan.

Hay naku, di kasi nag-iisip ang mga may pakana ng pagsabog dahil hindi nila basa ang utak ni Bantag na utak kalye o masasabing kanto boy na sanay sa gulo at away bukod pa sa lalong nag-iinit at nang-aasar kapag inunahan ng pananakot.

Sa unang pahayag pa lang ni Bantag, makikita o mababasa na ang nilalaman ng bao ng ulo nito lalo nan ang sabihin niya na hindi siya mag-aahit ng balbas hangga’t hindi naisasaayos ang buong BuCor na ang ibig niyang sabihin ay hangga’t hindi nawawala ang korapsyon sa pamunuan.

Natural, ayaw ni Bantag na mukha siyang marumi dahil sa kanyang balbas at bigote dahil sanay siyang malinis ang mukha lalo na’t naka-uniporme kaya’t mamadaliin niyang maisaayos ang tanggapang kanyang pinamumunuan.

Basta para kay Bantag, bukas ang kanyang tanggapan sa pagbabago. Handa siyang magbigay ng deve­lopment na nangyayari sa Pambansang Piitan sa ilalim ng kanyang pamunuan dahil hindi niya ipag­dadamot ang nangyayari sa opisinang ipinagkatiwala sa kanya sapagkat nais niyang suklian ang tiwala sa kanya ni Pangulong Rodrigo Roa Duterte.

Mukhang malabong mangyari sa pamunuan ni Bantag ang pagbebenta ng Kalayaan ng mga PDL o yung pagpapabayad sa mga preso sa good conduct time allowance (GCTA) sapagkat ayaw niyang kutyain tulad nang nangyari sa kanyang sinundan na si Faeldon kung saan napakaraming napalawa gamit ang GCTA pero mukhang nagkabayaran naman.

Sa isang banda, pawang maaayos na opis­yal ang naisama ni Bantag sa BuCor at isa na rito ang kanyang spokesperson na si Atty. Wena Fe Dalagan, dating hepe ng Public Information Office ng BJMP-National Capital Region.

Mahusay ang pagpi­ling ginawa ni Bantag sa dati niyang kasamahan sa BJMP sapagkat si Major Dalagan ay napakagaling sumagot dahil isa itong abogada. Malaki ang maitutulong nitong kanyang spokesperson sa mga pagbabagong nais niyang ipa­tupad sapagkat marami itong nalalaman sa batas at puwede rin niyang gawing adviser ito.

Sa ngayon, malinaw sa isip ng bagong BuCor chief ang paglilinis sa kanyang tanggapan. Unang nais lini­sin ni Bantag ay ang gulo kaugnay ng GCTA bukod pa sa nais niyang ipatupad ang computerization sa kanyang tanggapan.

Pero ang pinamatindi sa isip ni Bantag na nais niyang mabura sa pambansang piitan ay ang kalakalan ng bawal na droga. Matindi ang pagnanais ni Bantag na maisaayos ang kulungan at hindi magamit sa paggawa at pinagmumulan ng droga na sumisira sa buhay ng maraming mamamayan lalo na ng mga kabataan.

Para kay Bantag, ang kulungan ay dapat maging sagrado para sa pagbabago ng mga taong nagkasala na maisip nila ang kanilang nagawang kamalian at maisapuso at maisaisip ang pagbabagong buhay upang sa kanilang paglaya ay hindi naman sila nangangapa at sa huli ay muling babalik sa buhay kulungan.

Kaya nga sa mga naunang ipinatupad na pagbabago ni Bantag, may mga nagtatanong lalo na yung mga hindi nakakakilala ng lubos sa kanya kung tuloy-tuloy na ba ang pagbabago sa BuCor?

Let’s keep our fingers crossed. Ako, naniniwala na magkakaroon ng mala­king pagbabago sa pambansang piitan. (NIPIS / LEA BOTONES)

Please follow and like us:
Read More

PRRD AYAW NA MADAPA

NIPIS

HAWAK na ni Pangulong Rodrigo Roa Duterte ang pangalan ng magiging kapalit ni Philippine National Police chief Gen. Oscar Albayalde na magreretiro sa Nobyembre 8.

Binanggit ni Presidente Digong na pag-aaralan na niyang mabuti ang pagpili ng magiging kapalit na hepe ng pulisya dahil ayaw na niyang madapa. Sa madaling salita, parang sinabi na rin niya na nagkamali siya sa pagpili kay Albayalde na pinaniniwalaan ng marami sangkot sa usapin ng “ninja cops.”

Gayunman, kung hihimayin ang aksyon ng pangulo, makikitang may tiwala pa rin ito kay Albayalde sapagkat hindi niya ito kaagad sinibak sa puwesto  matapos madiniin sa Senado kaugnay sa usapin ng kanyang mga tauhan na nasangkot sa droga noong panahong siya ay provincial director ng Pampanga at sa halip ay hiningian niya ng matibay na ebidensiya ang mga nag-aakusa.

Si Albayalde, kaklase ni dating PNP chief at ngayon ay Senador Ronald “Bato” dela Rosa, ay iniendorso ng dating PNP chief at maging ni dating pangulo at Speaker of the House na si Gloria Macapagal Arroyo.

Sa pagkakataong ito, isang malapit na kaibigan at itinuturing na niyang anak-anakan ang posibleng pakinggan ni Pangulong Duterte sa pagtatalaga ng hepe ng PNP kapalit ni Albayalde. Maging ang kanyang mga totoong anak ay hindi pakikialaman o panghihimasukan ang magiging pasya ng kanilang ama sa pagpili ng gusto nitong mamuno sa pulisya.

Kawawa ang heneral na dapat sana ay siyang ieendorso ni Albayalde bilang kapalit niya dahil sa mahusay nitong performance sa trabaho. Subalit dahil walang maisip na paraan ang ilang may alaga sa mga contender para sa PNP chief post, naging “wakwakan” ang labanan.

Pero teka, tila iniligaw lang ng usaping “ninja cops” ang totoong pakay ng Senate Blue Ribbon Committee na lumabas ang katotohanan kaugnay sa good conduct time allowance (GCTA) na kinasasangkutan ni dating Bureau of Corrections Director General Nicanor Faeldon.

Hindi kaya dahil ito sa may nakatakda pang lumaya sa mga presong maituturing na personalidad sa lipunan na noon pa man ay napirmahan na ang papeles?  Aba, dapat sigurong mag-ingay muna ulit si Senador Panfilo Lacson.

Sa usapin nang ayaw madapa sa pagpili, hindi ba nadapa si Pangulong Rodrigo Duterte sa pagpili niya bilang director general ng BuCor si dating Bureau of Jail Management and Penology warden Gerald Bantag? Si Bantag, mula sa Philippine National Police Academy class ’96, ay hinihinalang inirekomenda ng kanyang kaklase na miyembro ng Davao group.

Naitalaga si Bantag ilang araw matapos sabihin ni Senador Christopher Lawrence “Bong” Go na ang nais ni Presidente Duterte  na mamuno sa BuCor ay isang “killer.” Si Bantag ay kinasuhan ng 10 counts of murder matapos magkaroon ng pagsabog sa kanyang tanggapan sa Parañaque City Jail kung saan 10 preso ang namatay.

Pero mukhang hindi nagkamali ang presidente sa pagtatalaga kay Bantag dahil matatag ang desisyon nito na hindi siya kayang subukan pagdating sa pananalapi at lalong hindi siya puwedeng ikorap ng mga magtatangkang gumawa ng anomalya sa kanyang pamumuno.

Sa madaling salita, matatag ang disposisyon ni Bantag at lalong mahihirapan ang mga magtatangkang suhulan siya pagdating sa isyu ng GCTA.

Kaya, mas makabubuting magtiwala si Pangulong Duterte sa kanyang instinct sa pagtatalaga ng opisyal na kanyang nais sapagkat kung sakaling magkamali man siya, wala siyang puwedeng sisihin kung hindi ang kanyang sarili at puwede niyang sibakin anumang oras niya naisin. (NIPIS / LEA BOTONES)

Please follow and like us:
Read More

MABUTING NAKAPAG-ISIP SI PRRD

NIPIS

NOONG isang linggo bago umalis si Pangulong Rodrigo Duterte patungong Russia, nagkaroon ng laglagan sa imbestigasyon sa Senado kaugnay sa droga kung saan muling nabuhay ang usapin sa ‘ninja cops.’

Marami pala ang ninja cops na ang original ay pawang mula sa Manila Police District tulad nang unang nabanggit sa pagdinig sa Senate Blue Ribbon committee kung saan sinabi pang isinasalya ng mga pulis na sangkot sa droga ang kanilang mga nakumpiskang bawal na gamot sa drug queen na si Guia Gomez Castro.

Kaya lang biglang nagbago ang takbo ng pagdinig at nauwi sa usapin na ang mga ‘ninja cops’ ay pawang mga alaga umano ni Philippine National Police Chief Gen. Oscar Albayalde noong siya ang Provincial Director ng Pampanga.

Nagisang mabuti si Albayalde sa Senado na pinamumunuan ni Senador Richard Gordon matapos ilaglag nina dating Criminal Investigation and Detection Group chief  Gen. Benjie Magalong, ngayon ay mayor ng Baguio City, at Philippine Drug Enforcement Agency director Aaron Aquino.

Bago nagtungo si Presidente Digong sa Russia, nagkaroon umano nang pagkakataon sina Magalong at Aquino na humarap sa una at magsalita ng mga impormasyon hinggil sa droga. Kaya naman nang nasa Russia ang ‘haligi ng bansa’ nasabi nito na dalawang heneral sa PNP ang protektor ng droga.

Nabanggit pa nga umano ni Magalong sa ilang kaibigan niya at kakilala sa media nan ang magtungto sila  kay Pangulong Duterte, napakatapang at lakas ng loob ni Aquino na magsumbong kay Pangulong Duterte subalit pagdating sa Senado ay parang asong bahag ang buntot kaya’t ilang beses niya itong sinabihan na “Aaron, magsalita ka.”

Dahil sa sumbong umano nina Magalong at Aquino kay Pangulong Digong, nabigla na rin ang pangulo sa mga binitiwang salita niya sa Russia  na ‘dalawang heneral ang protektor ng droga sa bansa. ‘

Subalit maaaring nakapag-isip ang pangulo at napag-aralang mabuti ang takbo ng pangyayari sa Senado. Posibleng nabasa rin ng president na may motibo ang mga gumigiba kay Albayalde.

Kasi nga naman, bakit naman kung kailan magreretiro na si Albayalde sa Nobyembre 8 ngayong taon ay saka pa nila ilalabas ang mga pangyayaring may kaugnayan sa droga.

Hindi kaya sindikato ito ng Philippine National Police sa pagtatalaga ng susunod na PNP chief o ng posibleng kapalit ni Albayalde?

Kapag sirang sira o basing basa ang pangalan ng kasalukuyang PNP chief ay hindi na ito papaniwalaan ng tao lalo na ni Pangulong Duterte kaya’t hindi na ito makakapag-endorso ng bata niya sa PNP bilang kapalit niya sa puwesto.

Natural, mauupo ang iba pang contender at higit sa lahat ay ang Davao group o Davao connection.

Kaya naman nabigo ang ilang umaasa na pagdating ni Pangulong Digong ay sisibakin na sa puwesto si Gen Albayalde dahil sa pagputok ng pangalan nito na ‘may alagang mga pulis na sangkot sa droga.’

Mabuti na lang, nabigo ang mga may pakana ng iskandalo dahil naiba ang ihip ng hangin. Pagdating ng pangulo sa bansa, wala muna siyang naging aksyon sa imbestigasyong isinagawa ng Senado at sa halip ay inatasan ni Interior and Local Government Secretary Eduardo Año na magsagawa ng malalimang imbestigasyon kaugnay sa pagkakasangkot ni Albayalde sa ‘ninja cops.’

Kasi nga naman sa hearing sa Senado, puro salita at walang matibay na ebidensiya na magsasangkot kay Albayalde sa mga akusasyon sa kanya.

O, eh di matatahimik na pansamantagal este pansamantala ang mga mandirigmang salto sa plano nila na mapagtulungan ang PNP chief na kung sakali nga namang nakalusot sila sa plano ay posibleng masungkit ng mga bata nila ang puwesto at doon pa lang magkakatotoo na may mga pulis na sangkot sa droga.

Sobrang NIPIS kasi ng mga akusasyon ninyo kay Albayalde. Sana, bago maglabas ng anumang akusasyon, dapat may mga hawak na ebidensiya upang hindi pumalpak ang plano.

Kaya ngayon, doble trabaho muli si Albayalde upang maisaayos ang problemang nilikha ng mga upperclassman niya sa Philippine Military Academy. Parang hindi nag-iisip ang mga ito na ang kasiraan ng puno ng PNP ay kasiraan ng buong kapulisan.

Bakit kaya hindi subakan ni Pangulong Duterte na mula sa Philippine National Police Academy ang ipalit na PNP chief kay Albayalde? Marami namang mahuhusay na opisyal mula sa PNPA pero ipinipilit lagi ang PMA. Baka sakaling kapag PNPA ang nakaupo ay magtulungan ang mga ito sa halip na magkainggitan. (NIPIS / Lea Botones)

Please follow and like us:
Read More

USAPING PAWANG ‘ITUTULOY’

NIPIS

NAGSIMULA sa imbestigasyon ng Good Conduct Time Allowance (GCTA) ang Senate Blue Ribbon committee ni Senador Richard Gordon dahil sa pagputok ng balitang pagpapalaya kay dating Calauan Mayor Antonio Sanchez.

Nasangkot sa usapin ng planong pagpapalaya kay Sanchez si dating Bureau of Corrections director Nicanor Faeldon na hinihinalang nagpalabas ng malaking halaga upang maisaayos ang kanyang rekord sa bilibid.

Sinabi nina Senators Panfilo Lacson at Franklin Drilon na walang ebidensyang direktang magsasangkot kay Faeldon subalit dapat ay napigilan nito ang korapsyon sa ahensiyang kanyang pinamumunuan.

Bagaman walang direktang ebidensiya laban kay Faeldon kaugnay sa planong pagpapalaya kay Sanchez, naniniwala pa rin ang mga mambabatas na may usapan na sina Faeldon at pamilya Sanchez kaugnay sa pagpapalaya sa dating alkalde na nahatulan ng parusang habambuhay na pagkabilanggo dahil sa pagpatay at panghahalay kay Aileen Sarmenta at pagpatay kay Allan Gomez, kapwa estudyante ng University of the Philippine.

Hinahanap ng Senado ay ang kaugnayan ni Faeldon sa pagpapalaya sa mga preso gamit ang GCTA subalit lumayo nang lumayo ang usapin at nauwi na sa mga lumang isyu kaugnay sa droga.

Pumasok ang usapin ng ‘ninja cops’ at recycle drugs kasabay ng mga recycle na issues na pilit sinisira naman ang career at mga programa ni Philippine National Police chief Gen. Oscar Albayalde.

Mahigit isang buwan na lang at magreretiro na si Albayalde subalit tila sa kanya na umikot ang usapin sa ilegal na droga at sa ninja cops. Sa mada­ling salita, nawala na ang usapin sa GCTA.

Ang mga nangyayari sa hearing ng Senado ay pinagtatawanan lang ni Faeldon sapagkat sa ibang usapin na napunta ang la­yon na alamin ang lalim ng kaugnayan niya sa GCTA.

Tila talagang pinasulpot ang usapin ng ‘ninja cops’ at recycle drugs upang mawala ang focus kay Faeldon at masira naman ang ang kredebilidad at tiwala ng mga tao kay Albayalde dahil pagkatapos nito bilang PNP chief ay malaki pa rin ang posibilidad na maupo ito bilang director ng BuCor bagaman nakatalaga na bilang acting director si dating Bureau of Jail Management and Peno­logy official Jail Superintendent Gerald Bantag.

Masakit na magreretiro si Albayalde na sira ang kanyang pangalan subalit mas masakit na ang sambayanang Pilipino ay  lumalabas na napapaikot at kayang kayang lokohin ng mga opisyal ng pamahalaan na iniluklok ng mga mamamayan sa puwesto. (NIPIS / LEA BOTONES)

Please follow and like us:
Read More

PDEA CHIEF IYAKIN

NIPIS

NAKAKATAWA namang parang bata si Philippine Drug Enforcement Agency (PDEA) chief Dir. Gen Aaron Aquino sa ginawa niyang pagsusumbong kay Pangulong Rodrigo Duterte sa pagtanggal ng Philppine National Police (PNP) sa kanyang 15 police escorts.

Kulang na lang ay ngumalngal si Aquino dahil sa recall order sa mga pulis na nakabantay sa kanya at siyempre, sa sumbong niya kay Presidente Digong, si PNP chief P/Gen. Oscar Albayalde ang may pakana.

Idinawit pa niya sa sumbong niya si Regional Police Office 3 Director P/BGen. Napoleon Joel Coronel na hinilingan niya na huwag pabalikin sa kanilang unit ang mga nagbabantay sa kanya dahil marami siyang death threat.

Hindi lang basta sumbong ang ginawa nitong miyembro ng Philippine Military Academy ’85 Sandiwa class subalit halos wakwakin na niya ang kanyang underclass sa PMA ’87 Hinirang class nang sabihin nitong hindi siya pinakinggan ni Coronel sa halip ay pinagpaliwanag pa ang mga escort na nakatalaga sa kanya.

At talagang kinaladkad pa niya ang pangalan ni Pangulong Duterte kaugnay sa recall order sa kanyang mga escort.

Hindi maintindihan ni Aquino na ang purpose nang recall order ay dahil sa nalalapit na 30th Southeast Asian Games (SEAG) at hindi dahil sa kung anupaman. Paano naman kasi, puro pulis na taga Region 3 ang pinili niyang bantay.

Sana naman, kumuha si Aquino ng ilan lang mula sa Camp Crame at ang ibang bantay niya ay pawang mga tao niya sa PDEA. O baka naman wala ring tiwala si Aquino sa mga tauhan niya mismo sa ahensiya.

Eh bakit naman kasi napakarami ng escort ni Aquino? Labinlima? Aba’y kanino ba nanggagaling ang suweldo ng mga escort nyang yan? Siyempre, hindi naman sa kanyang sariling bulsa.

Balik muna sa totoong isyu. Sinabi niya na kaya tinanggal ang kanyang mga escort ay dahil sa pagbubunyag niya sa “Ninja Cops.”

Meron pa bang ‘ninja cops’? Panahon pa ni Pre­sidente Benigno Aquino III nang sumikat ang mga pulis na ang gawain ay manghuli ng droga na ipinakakalat ng mga Chinese drug lords sa bansa.

Mabuti pa noong panahon na iyon, maraming huling drug lords na hindi nakapamayagpag dahil inaaresto sila. Ngayon ba may malalaking isda na huli ang PDEA?

Lumalabas, maraming huling droga ang PDEA pero walang tao? Anong nangyari? Meron man, ang mga ito ang tinatawag  na ‘pyaet’ o ‘mga dagang dingding’ na ang ibig sabihin ay pawang maliitan lang ang transaksyon.

Kaya naman, dalawa lang ang maiisip ng mga tao sa nangyayaring ito. Maaaring may pinoproteksyunan na malala­king supplier o drug lord o di naman kaya ay mahina talaga ang intelligence network.

Sa totoo lang, ang tinaguriang ‘ninja cops’ ay matagal nang nagretiro sa trabaho. Ilan sa kanila ay ipinapatay na o na­ging bahagi na ng kampanya sa pagsugpo ng droga. Noong kapanahunan ng mga ito, pawang karangalan ang ibinigay nila sa kanilang mga hepe dahil sa kilo-kilo ang kanilang huli at milyong pera ang naipasusubi nila sa kanilang director.

Alam yan ni dating Criminal Investigation and Detection Group at ngayon ay Baguio Mayor Benjamin Magalong dahil minsan niyang naging tao ang mga ito at mismong direktang nagrereport sa kanya. Maliban na lang kung itatanggi niya ito.

Sana nga ay matalakay na mabuti sa Senado ang totoong isyu at hindi pawang panligaw lamang sa hinahanap na katotohanan. (NIPIS / LEA BOTONES)

Please follow and like us:
Read More

MAGANDANG LAYUNIN NI PRRD, MASAMANG GAWAIN NG MGA NAKAPALIGID

NIPIS

MAGAGANDA ang mga pangarap ni Pangulong Rodrigo Roa Duterte para sa Pilipinas  na batid niyang magbibigay daan upang umunlad ang a­ting Perlas ng Silangan at makaahon ito mula sa pagkakalubog sa utang sa labas ng bansa.

Ang pagpapalagay ng operasyon ng Philippine Offshore Gaming Ope­rator (POGO) ay batid ni Presidente Digong na magbibigay ng milyon-milyong kita sa buwis para sa kaban ng bansa bukod pa sa magkakaroon ng trabaho ang marami sa mga Filipino.

Subalit dahil sa may mga nakapaligid sa pa­ngulo na mga ‘switik’ at tanging nasa isip ay mas lalong pagpapayaman o paglalaman sa kanilang bulsa, nagkakaroon tuloy ng problema sa implementasyon ng mga programa at proyekto ng pamahalaan.

Sa POGO lang, bil­yon-bilyong  piso ang dapat kitain ng bansa bilang buwis mula sa operasyon nito subalit dahil may mga taong sadyang minali ang interpretasyon at implementasyon ng  mga program ani Pangulong Duterte, hindi pumapasok sa ‘kaban ng bayan’ ang salaping dapat ay magagamit para pambayad sa mga utang sa labas na ginamit sa build, build, build program ng pamahalaan.

Maging ang mga tauhan sa operasyon ng POGO na dapat ay mga Pinoy ay nabulilyaso dahil sa pagbibigay ng permiso sa mga Chinese bukod sa makapagnegosyo ay nabig­yan din ng papeles para makapagtrabaho. Natural, kapalit nito ang malaking halaga na hindi naman pumasok sa pamahalaan sa pamamagitan ng buwis na dapat na tinatanggap ng Bureau of Internal Revenue mula sa mga dayuhang kumpanya at mga dayuhang empleyado.

Kawawang mga Filipino na tinanggalan ng pagkakataon na mabuhay o maghanap buhay dahil pinayagang makapagtrabaho ang mga dayuhan sa ating bayan.

Bukod pa rito na ilang tauhan ng Palasyo ang mismong may kaugnayan sa ilegal na operasyon ng ilang negosyo ng Chinese sa Pinas.

May mangilan-ngilang tapat sa tungkulin at handang isakripisyo ang kanilang career para lang malinis mula sa katiwalian ang pamahalaan subalit natatabunan ang kanilang magandang hangarin dahil sa nagtutulong-tulong ang ilang opisyales ng pamahalaan na huwag mabun­yag ang kanilang mga katarantaduhan.

Sa madaling salita, marami sa mga ito ang nagtatakipan upang huwag lang umalingasaw ang baho na kanilang ginagawa.

Sa totoo lang, karamihan nga ng gumagawa ng kalokohan ay pawang malapit kay Pangulong Duterte. Ito yung mga taong inisip ng pangulo na hindi siya lolokohin at kasama niya sa pagpapalago ng kabuhayan ng bansa. Pero ang mga taong ito ang sila pang mas lalong nagpapalubog sa ekonomiya ng bansa.

Kailan nga kaya may totoong tao na makakasama ni Pangulong Digong na magmamalasakit para sa Inang Bayan at  makiisa sila sa paggawa ng mga magagandang programa na magpapaangat sa ekonomiya ng bansa?

Sabagay, hindi tayo dapat mawalan ng pag-asa dahil may dalawang taon pa ang pangulo upang makilala at makaliskisan ang mga taong nasa paligid niya na silang nagdudumi sa bakuran ni Presidente Duterte. (NIPIS / LEA BOTONES)

Please follow and like us:
Read More

DISIPLINA ANG SUSI SA PAG-UNLAD NG BAYAN

NIPIS

DAHIL sa pag-iikot ni Manila Mayor Francisco “Isko Moreno” Domagoso sa lupaing kanyang nasasakupan, ang kabuuan ng lungsod ng Maynila, nakita niya na isa sa dahilan kung bakit nagsisikip ang daloy ng trapiko ay ang naglipanang tricycle, pedicab at kuliglig na ang mga driver ay walang disiplina.

Nakita at naobserbahan nitong alkalde ng Maynila na ayaw na yata tumigil sa kanyang bahay at opisina at sa halip at panay ang paggagala sa kanyang na teritoryo na hindi na ang mga jeepney driver ang hari ng kalsada subalit ito ng mga tricycle driver.

Dapat alam ng mga driver na ito na hindi nila dapat sinasakop o hindi sila dapat bumibiyahe sa mga pangunahing lansa­ngan subalit tila nabili ng mga ito ang kalye kaya wala silang pakundangan sa pagbiyahe.

Kaya naman, inatasan ni Mayor Domagoso si Vice Mayor Honey Lacuna at ang mga kasapi ng city council na buwagin na ang Manila Tricycle Regulatory Office (MTRO) sa pamamagitan nang pagpasa ng isang ordinansa.

Tama ang sapantaha ni Yorme Kois na kaya malakas ang loob ng mga dri­ver na sumasakop sa mga pangunahing lansangan kaya nagkakaroon nang pagbubuhol ng trapiko at pagsisikip ng kalye ay dahil sa kawalan ng disiplina ng mga ito.

Nagpaglimi-limi ng batang alkalde na kaya malakas ang loob ng mga ito na lumabag sa batas ay dahil sa proteksyon na tinatanggap ng mga ito mula sa tauhan ng MTRO dahil nga ay naglalagay sila sa mga ito ng lingguhan kung hindi man arawang suhol.

Napagpasyahan din ni Mayor Isko Moreno na lusawin na ang MTRO sapagkat marami na siyang natanggap na reklamo mula sa mga driver ng tricycle, pedicab, e-trike at mga katulad na ginagawa silang ‘palabigasan’ ng mga tauhan ng MTRO na patuloy na nangingikil sa mga nagpapapawis na mahihirap.

Binanggit ni Moreno na ang dahilan kung ba­kit walang disiplina ang mga tricycle driver ay dahil nga sa lagay na kanilang iniaabot. Kaya nga kailangang lusawin ang MTRO upang hindi na makagawa pa ng kalokohan ang mga empleyado nito na nabubuhay sa pagsipsip sa pera ng mga mahihirap na tricycle drivers.

Inasahan na rin ni Moreno na babatikusin siya at sasabihing anti-poor ang kanyang hakbang na pagbuwag sa MTRO kaya’t nauna na ang kanyang paliwanag na isang paraan ito upang matigil na ang katiwalian o korapsyon sa MTRO.

Iginiit pa nito na kung hindi kasi niya lulusawin ang nasabing tanggapan, ang mga tauhan nitong tiwali ay hindi mawawala at sa halip ay lilipat lang ng tanggapan.

Nabatid na ang matitinong empleyado ng MTRO ay ilalagay naman sa Manila Traffic and Parking Bureau (MTPB) habang ang mga sangkot sa kotong ay  sasampahan ng kaso at tuluyang sisibakin.

Ayon naman sa isang da­ting empleyado ng MTRO, kasalanan ng dating pamunuan at ng city council ang pagiging abusado ng mga tricycle driver at MTRO employees sapagkat walang kongretong batas na ipinasa ang konseho ng Maynila.

Anang dating tauhan, hinayaan na lang ng city council na walang regulasyon para sa mga driver ng tatlong gulong na sasakyan na ginagawang pangunahing serbis sa mga lugar na walang dumaraang jeep.

Tama naman ang katwiran ni Yorme Kois na labag man sa kanyang kalooban ang pagtanggal sa mga empleyado, kailangan pa rin niyang mamuno ng tapat at patas.

Kailangan niyang matutong disiplinahin ang lahat kahit pa ang tamaan nito ay mga taong naging kakampi niya noong halalan sapagkat sa pagbibigay disiplina lang magiging maunlad ang lungsod ng Maynila.

Malaki ang paniwala ni Mayor Moreno na disiplina ang kailangan ng mga mamamayan upang umunlad ang ating bayan. (NIPIS / LEA BOTONES)

Please follow and like us:
Read More

BAGONG BUCOR CHIEF, ISANG ‘KILLER’

NIPIS

ITINALAGA ni Pangulong Rodrigo Duterte bilang bagong director-general ng Bureau of Corrections (BuCor) ang dating opisyal ng Bureau of Jail Management and Penology (BJMP) na si Jail Superintendent Gerald Bantag.

Kamakailan, sinabi ni Senador Christopher Lawrence “Bong” Go na irerekomenda niya kay Presidente Digong na ang susunod na mamumuno sa BuCor ay isang mamamatay tao. Sabi ni Sen. Go kailangan ay ‘killer.’

Kaya nga nagpahanap si Pangulong Duterte ng dating militar o dating pulis na papalit kay Faeldon na maraming sinabitang isyu sa panunungkulan niya sa pamahalaan mula pa sa Bureau of Customs hanggang sa BuCor.

Sa panunungkulan ni Faeldon nagkaroon ng alingasngas kaugnay sa Good Conduct Time Allowance (GCTA) na sinasabing may kumite ng malaki sa ibinebentang Kalayaan para sa mga preso.

Sa madaling salita, nasunod si Sen. Bong Go sa kagustuhan niyang isang killer ang pumalit kay Faeldon. Matapos kasing hingin ni Pangulong Duterte kay Faeldon na lisanin na ang BuCor, itinalagang officer-in charge si retired Gen. Melvin Buenafe, na mi­yembro ng Philippine Military Academy class ’86.

Mahusay na intelligence official si Buenafe na kaklase ni dating Phi­lippine National Police chief at ngayon ay Sen. Ronald “Bato” Dela Rosa. Maayos ding opisyal ang taong ito at hindi nagkaroon ng isyu sa kanyang panunungkulan noong siya ay nasa serbisyo pa.

Sa ngayon, tumatayo si Buenafe na Deputy Director General for Security and operations.

Mismong si Pangulong Duterte umano ang nagdesisyon na si Bantag ang maupong Director General ng BuCor at nakasuporta ang Malakanyang sa desisyon ng pangulo. Sus, alam naman yan. Sino ba sa Palasyo ang kumontra sa pangulo?

Malaki umano ang tiwala ng pangulo kay Bantag na ipagpapatuloy nito ang kampanya ng pamahalaan laban sa korapsyon.

Nabatid na si Bantag ay dating warden ng Paranaque at Manila City Jails noong siya ay kaanib pa ng BJMP.

Noong warden pa siya ng Parañaque City Jail, ipinaaaresto si Bantag at dalawa pang jailguards dahil sa pagkakasangkot nila sa pagsabog sa kulungang kanilang kinatatalagaan.

Naharap si Bantag at Jail Officer 2 Ricardo Zulueta at Jail Officer 2 Victor Pascua sa kasong 10 counts of murder dahil sa naganap na pagsabog sa Pa­rañaque City Jail noong August 11, 2016 kung saan nasawi ang 10 preso kabilang sina Jacky Huang at Yonghan Cai, kapwa Chinese na nahaharap sa kasong may kinalaman sa droga.

Naging warden ng Manila City Jail si Bantag subalit kaagad itong sinibak sa puwesto nang magpalabas ng warrant of arrest si Judge Madrona Fortunito, ng Parañaque City Regional Trial Court branch 274.

Sana nga ay tama ang suhestiyon ni Sen. Bong Go na ‘killer’ dapat ang susunod na BuCor chief at tama ang desisyon ni Pangulong Duterte na si Col. Gerald Bantag ang kanyang hinirang na mangangasiwa sa pambansang kulungan.

Nawa’y maging maayos ang pamamahala ni Bantag sa BuCor at nawa’y hindi ito masangkot sa kung anumang anomalya na naunang kinasangkutan ni Faeldon at iba pang nauna rito.

Salamat kay P/Lt. Col. Rodrigo Soriano, Quezon City Police District-Masambong Police Station commander, sa paunlak na interview sa special report na binubuo ng inyong lingkod, gayundin kay P/Lt. Col. Carlito Grijaldo, Manila Police District- Sta Mesa Police Station commander, sa pakikipagtulungan sa isinagawang “Blood Letting” sa United Bethel Church sa Manga Avenue, Sta. Mesa Manila noong Sept. 14. Salamat din kay P/MSgt. Alma Dipasupil at mga kasamang pulis sa Sta. Mesa Police Station. (NIPIS / LEA BOTONES)

Please follow and like us:
Read More

MAGANDANG PASALUBONG

NIPIS

NGAYONG araw ay kaarawan ni outgoing  Quezon City Police District director P/Brig. Gen. Joselito Esquivel Jr. Happy Birthday Sir Joyet.

At ngayong araw din lilisanin ni Gen. Esquivel ang Camp Karingal, Sikatuna Village dahil uma­ngat na siya ng puwesto at naging regional director ng Caraga Police Regional Office.

Sa madaling salita, ngayon ang turn over ce­remony sa QCPD kung saan papalitan si Esquivel ni incoming director P/Col. Ronnie Montejo.

Si Montejo, kilalang taga QCPD bago pa siya mapunta sa region, ay batid na noon pa man na papalit kay Esquivel dahil siya ang napipisil ng mga opisyal at miyembro ng relihiyong kanyang kinabibilangan.

Noon pa man ay nakapila na ang miyembro ng Philippine National Police Academy Tagapagbuklod class of  ’89 sa trono ng QCPD.

Hindi sumala ang sandok sa palayok dahil talagang inilaan ang puwesto kay Montejo.

Kaya naman bilang pasalubong sa pagda­ting ni Montejo sa QCPD, maganda ang kasong ibi­nigay sa kanya ng Cubao Police Station at Regional Drug Enforcement Unit.

Nakakumpiska ang mga tauhan ng Cubao Police Station at NCRPO-DEU ng P27-M halaga ng shabu mula sa isang Edgardo Labay Alfonso, ng Barangay Tramo, Pasig City, na nasawi matapos manlaban sa mga operatiba na humuli sa kanya.

Tinatayang apat na kilo ng shabu ang nabawi mula sa suspek na nakalagay sa bag. Nabawi rin ang isang kalibre .45 baril na may mga bala.

Sinasabing ang napatay na suspek at isa sa mga target na bigtime drug pusher na nag-ooperate sa Metro Manila.

Maituturing na magandang pasalubong o accomplishment ang pagkakapatay kay Alfonso at pagkakabawi ng P27 mil­yong halaga ng droga.

Nakaabang din ang 12 station commanders ng QCPD upang magbigay ng magandang trabaho para sa pagdating ni Montejo sa Quezon City.

Samantala, isang station commander sa Manila Police District ang halos isuka na ng kanyang mga tauhan dahil sa umano’y sobrang sama ng ugali nito.

Sinasabing ang station commander na ito ay madalas magmura sa kanyang mga tauhan subalit wala namang maipakitang magandang halimbawa pagdating sa trabaho.

Ang tanging alam umano ng hepe na ito ay magpauwi ng kung anu-anong pagkain sa kanyang pamilya subalit hindi inaasikaso kung may pahinga na ba ang kanyang mga tao na isinusuga niya sa pagdu-duty ng halos 24 oras.

Ayon sa mga tauhan nito, walang awa sa kanyang mga tao ang opisyal na ito na walang ipinagmamalaki kung hindi ang kanyang lakas kay MPD director P/Brig. Gen. Vicente Danao Jr.

Teka, hindi ka naman tao ni Gen. Danao, paano ka naging malakas kay Danao na isang Davao Boy.

Bukod sa balasubas sa kanyang mga tauhan ang opisyal na ito, ayaw umano maglabas ng pera nito para sa mga proyekto ng istasyon at hinahayaang mag-abono ang kanyang mga tauhan. Naman! Grabe naman ang opisyal na ito. Naku kapag ganyan ka, hindi ka tatagal sa kinauupuan mo. Kapag inireklamo ka ng mga tao mo, tiyak na may kalalagyan ka ilang araw mula ngayon.

Maraming salamat sa Manila Police District – Station 8 Police Community Relations and Station Strategic Performance Management System sa pakikipagtulungan sa ginawang blood letting activity ng Red Bank Foundation, RC Raha Sulayman Manila at Y’s Men Raha Philippines sa United Bethel Church sa Sta Mesa, Manila noong Setyembre 14, 2019. Naging matagumpay ang aktibidad dahil sa pakikipagtulungan ng lahat lalo na ng mga miyembro ng United Bethel Church. (NIPIS / LEA BOTONES)

Please follow and like us:
Read More

DOH, ROTARY INTERNATIONAL VS POLIO

NIPIS

MARAMI sa mga Filipino ang ngayon ay nakatutok sa dengue na talaga namang talamak at kalat na kung saan-saang panig ng bansa.

Umabot na sa daang libo ang naging biktima ng dengue at halos pumalo na sa isang libo ang mga nasawi na karamihan ay bata dahil sa sakit na ito na nagmula sa kagat ng lamok na Aedes aegypti.

Kaya nga tuloy-tuloy ang paghikayat ng Department of Health sa mga lokal na pamahalaan sa buong bansa na gawin ang tamang paraan nang paglilinis ng mga lugar na pinamumugaran ng mga lamok na nagdadala ng sakit.

Pilit na ipinauunawa ng DoH na kalinisan talaga ang susi upang mawala ang mga lamok na ang kagat ay delikado.

Itinuturo din ng mga kawani ng nasabing ahensiya sa mga nasa lokal na pamahalaan ang pagiging matiyaga sa pagpapaalala sa mga mamamayan na kalusugan nila ang nakasalalay kapag hindi sila sumunod sa ipinapayong paglilinis ng kanilang tahanan at paligid nito.

Bukod pa rito ang paghingi ng tulong sa pamahalaan para sa libreng defogging sa mga barangay upang mamatay ang mga itlog ng lamok na namamahay sa mga tagong lugar at maging sa mga maruruming tubig ilog, estero at kanal.

Dahil sa pagkakatutok sa sakit na dengue, halos nakalimutan na ng mga Pinoy ang sakit na polio. Sabagay, ilang beses na rin namang naiulat na “zero” polio na ang Pilipinas.

Sa madaling salita, ang dating sakit na karaniwang tumatama sa mga Pinoy sa hindi malamang dahilan ay nakalimutan na dahil sa halos wala na nga ito.

Sa pagkawala ng polio, isa ang Rotary International sa natatanging dapat pasalamatan dahil sa paglaban sa sakit na ito. Ang mga miyembro nito ay talagang nagbigay ng pansin kasama ang tulong upang maisakatuparan ang “End Polio Now”.

Noong 2017 hanggang 2018, malakas pa rin ang kampanya ng Rotary International sa “End Polio Now”. At dahil halos “zero” na ito, medyo tumamlay ang kampanya laban sa sakit na ito.

Muli ko lang narinig ang paghikayat na mu­ling palakasin ang laban sa polio kay Congresswoman Bernadette Herrera, ng BH Partylist, na nagkataong District Governor ng 3780 na kabilang ang mga rotary club sa Quezon City, nang hikayatin niya ang lahat ng kanyang mga presidente sa kanyang distrito at maging ang mga bisitang rotarian mula sa ibang distrito at clubs na muling buhayin ang paglaban sa polio.

Sa kanyang paghikayat, sinabi ni Herrera na “zero” na ang polio subalit kailangang makasiguro ang lahat na wala na talaga ito at hindi na babalik pa.

Inamin nito na masasabing bigo siya sa panunungkulan kapag bumalik pa ang “polio” sa bansa dahil may magagawa naman siya kaya nga masidhi ang kanyang pagkumbinsi sa lahat ng mga dumalong rotarians sa 18th Induction Ceremony and Governor’s Visit ng RC Eastwood, isang club sa rotary na pawang mga babae ang mi­yembro, na kumbinsihin ang kanilang mga kabarangay na dalhin ang kanilang mga anak sa barangay health centers upang mapabakunahan laban sa polio.

Kaagapay sa pagbabakuna ng Department of Health ang barangay upang maging matagumpay ang kanilang laban sa polio. Maging ang Rotary International ay nakiisa na upang labanan ang polio.

Ito ay matapos makita sa “sewage” o alkantarilya ang pagsulpot ng virus na nagiging sanhi ng sakit na polio. Kaya naman matindi ang panawagan ni Health Secretary Francisco Duque na kailangang maturukan ng vaccine ang mga bata upang mapataas ang resistensiya ng mga ito laban sa mga nagsusulputang sakit.

Ngayon pa lang sana ay maunawaan na ng mga magulang ang kahalagahan ng bakuna sa kanilang mga anak upang hindi tayo magsisi sa bandang huli. (NIPIS / EA BOTONES)

Please follow and like us:
Read More

SOLIMAN: MAGSASAKA, PANAHON NA UPANG  UMANGAT ANG PAMUMUHAY

NIPIS

ANG inyong lingkod ay para lang si Dora the Explorer na dahil nais makatuklas ng kung anu-anong bagay ay kung saan-saan nakakarating at suwerteng nakatiyempo ng isang taong makapagbubukas ng isipan kaugnay sa problema ng pamahalaan at ng bayan kaugnay sa bigas.

Totoong suwerte dahil nakakiskisang siko ng NIPIS ang rice trader na si Jomerito “Jojo” Soliman sa bloodletting na isinagawa sa Sky Med Health and Laboratory Center Inc. sa Dasmariñas St., Binondo, Manila noong Sabado kung saan nagtungo ito upang magdonate ng dugo.

Naglakas ng loob ang inyong lingkod na magtanong kaugnay sa kanyang maitutulong sa problema ng bansa kaugnay sa bigas na kanya namang pangunahing negosyo.

Sinabi ni Jojo Soliman na tama ang utos ni Pangulong Rodrigo Duterte sa National Food Authority (NFA) na bilhin ang palay ng mga magsasaka sa medyo mataas na presyo sapagkat ito ang tamang panahon upang umangat ang mga ito sa kanilang pamumuhay.

Ang kikitain ng mga magsasaka ay magiging sagot sa gastusin nila sa araw-araw bukod pa sa puhunan na rin sa kanilang muling pagtatanim.

Upang makatulong sa mga magsasaka na basa ang palay, handa si Soliman, kabilang sa nagtataguyod ng Rosita Soliman Foundation kasama ang mga miyembro ng Rotary Club of Raha Sulayman-Manila, na ipahiram ang kanyang makina sa pagpapatuyo ng palay.

Sinabi rin ni Soliman na handa siyang ipagamit sa mga magsasaka ang kanyang gilingan ng palay o rice mill sa iba’t ibang bahagi ng norte na ang babayaran lang ng mga ito ay minimal amount.

Malaki ang pagnanais ni Soliman na makatulong sa ating mga kababayang magsasaka upang maiangat ang antas ng pamumuhay ng mga ito dahil batid niya ang hirap na pinagdaraaanan ng mga ito upang maitaguyod lang ang pagsasaka sa bansa.

Ayon pa sa negosyante, kapag nagiling na sa kanyang rice mill ang palay ng mga magsasaka, bahala ang mga ito na magbenta sa palengke sa mas mataas na halaga upang kumita naman ang mga ito at hindi na pagsamantalahan ng mga negosyante nang-iipit sa mga ito.

Nabatid na kaya alam ni Soliman ang pinagdaraanan ng mga magsasaka ay dahil halos animnapu’t limang (65) taon na ang kanilang negosyo at halos apat na henerasyon na ang dinaanan kaya’t malabong maging rice smuggler siya.

Matatandaang noong maupo si Presidente Digong, lumabas ang balita na rice smuggler si Soliman na sa bandang huli ay nalinis ang kanyang pangalan. Natural, negosyo ang lakad nito kung kaya’t ang kanyang kalaban ay gumawa ng paraan upang mawakwak siya at masira ang pangalan. Pero may kasabihan nga “You can never put a good man down,” kaya’t vindicated si Soliman nang lumabas ang totoo na siya pa nga ang biktima ng ilang tiwaling tauhan ng Bureau of Customs (BoC).

Nasabi rin ni Soliman na sana ay bigyang pansin ang mga magsasaka sa rice tarrification law sapagkat talaga namang kaawa-awa ang kalagayan ng mga ito. Aniya, sa Pilipinas lang mababa ang kategorya ng mga magsasaka dahil sa ibang bansa, sila ang kinikilalang mga bayani at pag-asa ng bansa lalo na ang mga rice consuming countries.

Idinagdag ni Soliman na sana, matapos mabili ng NFA ang palay ng mga magsasaka sa mataas na presyo, magbigay din ang mga ito sa bawat bayan ng makinang pantuyo ng palay upang sa ganoon ay hindi baratin ng mga negosyanteng namimili ng palay ang produkto ng mga magsasaka.

Kapag tuyo, ani Soliman, mas mahal ang benta at mas malaki ang kita ng mga magsasaka na sa umaga pa lang ay nasa bukid na at doon na inaabot ng takipsilim upang masiguro na maayos ang kanilang mga pananim.

Iginiit pa ng negosyante na sumusuporta sa Raha Fire Volunteer at Raha Medics na sakaling magbibigay ng mga makinang magiging kapakipakinabang sa mga magsasaka tulad ng pantuyo sa palay at gilingan, huwag na itong gawing pera na ibibigay sa halip ay makina na kaagad upang hindi na mapamahal ang pagbili at gugugol pa ng panahon sa paghahanap ang mga magsasaka. May posibilidad nga naman kasi na makuha ng mahal pero mahinang klase kaya mas makabubuting ang pamahalaan na mismo ang bumili. (NIPIS / LEA BOTONES)

Please follow and like us:
Read More

MALI ANG INTERPRETASYON, KAYA MALI ANG IMPLEMENTASYON

NIPIS

MAAARING hindi pa rin nakakarating kay Caloocan City Mayor Oscar Malapitan ang hinaing ng mga residente ng Sunriser Village sa Barangay Llano kaugnay sa paggiba ng ilang bahagi ng kanilang bahay bilang daan sa pagbubukas ng subdivision bilang alternatibong daan upang magkaroon ng lunas ang mabagal na daloy ng trapiko sa Llano Road.

May mga nagiba na ang Task Force Alis Sagabal sa lugar na ang gamit na linya ay “utos ni Pangulong Rodrigo Duterte sa Department of Interior and Local Government (DILG) at Metropolitan Manila Development Authority (MMDA)” kaya walang nagawa ang mga residente kung hindi pumayag bagaman labag sa kanilang kalooban.

Parang mali ang pagkakaintindi o interpretasyon ng DILG, MMDA at maging ng  pamahalaang lungsod ng Caloocan o ng administrasyon ng Mayor Malapitan sa binitiwang salita ni Pangulong Duterte noong kanyang ika-4 na State of the Nation Address (SONA) kung saan binigyan nito ng kautusan si Secretary Eduardo Año na “ dealt with vendors and illegally parked vehicles to decongest public roads.”

Maging si Año ay nagsabi na “government will make an inventory of all public roads in Metro Manila being unlawfully used for private purposes.”

Hindi po sinabing “take over the private properties or part of the properties of homeowners whose subdivision has been turned over to the LGU’s.

Sa totoo lang, ang pagbubukas ng subdivision sa mga tagalabas ang magbibigay ng problema sa mga residente ng lugar. Bakit? Kung dati ay tahimik ang lugar, posibleng maging maingay dahil sa mga daraang sasakyan na hindi naman pag-aari ng mga residente. Magiging prone pa sa polusyon ang village dahil sa puwedeng magpadaan-daan ang mga sasakyan na mausok.

Isang posibleng maging problema kapag ginawang alternate route ang lugar ay maging delikado sa mga residente. Ang dating bihira ang krimen na lugar ay posibleng mapasok na ng mga magnanakaw, kidnapper at iba pang klase ng kriminal.

Sana, makaikot si Mayor Malapitan sa kabuuan ng Barangay Llano o pumasyal lang sa Llano Road upang makita niya na kapag binuksan ang Sunriser Village ay wala pa ring katiyakan na luluwag o bibilis ang daloy ng mga sasakyan sa Llano.

Bakit nasabi ng inyong lingkod? Dahil taga-roon ako at araw-araw akong dumaraan sa Llano Road na ang dahilan ng traffic ay ang masikip na daanan na sinakop na ng mga establisimyento na nakatayo roon. Kung ang lugar na iyon ang inunang paluwagin, makakasiguro pa ang pamahalaang lungsod ng Caloocan na maiibsan ang traffic sa lugar.

Alam ba ni Mayor Oca na ang ilan sa mga ari-arian na halos sinakop na ang bangketa ng Llano Road ay pag-aari ng ilang politiko? Yes! Politiko sa barangay at sa konseho.

Baka iyon ang dahilan kung bakit pinanggigilang gawing alternate route ang Sunriser Village dahil hindi mabaklas ang mga pader o negosyo ng ilang politiko?

Naman! Hindi ang pagbubukas ng Sunriser Village sa mga sasakyan ang lulutas sa problema sa trapiko sa Llano Road, subalit ang pagpapaluwang sa mismong Llano Road. At please lang, tigilan na ninyo ang paggamit sa pangalan ni Pangulong Duterte habang ginigiba ninyo ang mga bakod ng taga Sunriser.  (NIPIS / LEA BOTONES )

Please follow and like us:
Read More

NOGRALES: DAPAT PAGBAYARAN ANG KRIMEN

NIPIS

SA mga hindi sinasad­yang pagkakataon, nakasalubong, nakasalamuha at nakapanayam ng inyong lingkod ang isang batambatang mambabatas mula sa ikalawang distrito ng Rizal na si Juan Fidel Nograles na siya ring vice chair ng House Committee on Justice.

Masarap makipagtalastasan sa abogadong mambabatas sapagkat marami itong kaalaman tungkol sa batas, na dapat naman dahil nagtapos lang naman siya ng abogasya sa Harvard University at nakakuha ng Juris Doctor degree sa Ateneo de Manila University.

Para kay Rep. Nograles, hindi dapat palayain ang mga gumawa ng heinous crime tulad ni dating Calauan Mayor Antonio Sanchez na nasa New Bilibid Prison.

“They should be held accountable to the crimes they have done against the people,” ayon sa batambatang congressman.

Sinabi nito na sa simula pa lang ay hindi na dapat makasama pa si Sanchez sa mga palalayain dahil hindi naman ito kwalipikado sa good conduct time allowance (GCTA) o RA 10592 sapagkat ilang beses ding nakuhanan ang selda nito ng ipinagbabawal na droga. Ang una ay noong 2006 habang ang ikalawa ay noong 2010 kung saan ang shabu ay nakatago sa imahe ni Birheng Maria.

Malaki rin ang paniwala ni Congressman Nograles na maliit na lang ang posibilidad na makalaya si Sanchez dahil na rin sa public outrage at naunang sinabi nito na tapos na ang usapin ng paglaya nito dahil mismong si Presidente Rodrigo Duterte ang nagsabi na hindi dapat makalaya ang sinumang akusado na sangkot sa karumal-dumal na krimen.

Sa paniwala ng batang mambabatas, hindi na kailangan pang ibalik ang usapin nang paglaya ni Sanchez dahil sa simula pa lang ay diskwalipikado na ito.

“Mas mahalagang mapangalagaan ang lipunan laban sa kanyang mga baluktot na paniniwala at gawaing masama noong nasa laya pa lang siya. Maituturing bang good conduct ang mahulihan ng droga sa loob ng kulungan?,” balik tanong ni Nograles.

Bilang abogado, batid ni Rep. Nograles, pamangkin ng dating House Speaker Prospero Nograles, na  malaki ang pangangailangan na repasuhing muli ang RA 10592 sapagkat may ilang probisyon na dapat bigyang linaw at dahil bahagi siya ng Committee on Justice, handa siyang tumulong upang ayusin ang mga probisyong napapaloob sa nasabing batas.

Makabubuti, para kay Nograles na suriing mabuti, busisiin ang kwalipikasyon ng mga nahatulan sa heinous crime kung karapatdapat ba ang mga ito na mabigyan ng pagkakataong makalaya muli at mamuhay sa labas ng kulungan.  (NIPIS / LEA BOTONES)

Please follow and like us:
Read More

PINAS MABUBURA SA MAPA

NIPIS

HINDI maikakailang parami nang parami ang mga dayuhan sa ating bansa na tila mga langgam na nag-iikot, naggagala at nagpapasarap sa iba’t ibang bahagi ng Pilipinas lalo na sa Kamaynilaan.

Kapag inalam natin sa ngayon kung bakit sila nandito sa Pilipinas ay tila hirap ang ating kaisipan at damdamin na pakalimiin ang totoong dahilan nang patungo at pananatili sa ating bansa.

Pero dati, batid na­ting dumadalaw sa Pilipinas ang mga dayuhan bilang turista dahil nais nilang makita ang pambihirang ganda ng ating bayan na hindi nila masisilayan sa kanilang sariling bansa.

Sa mga dayuhang nasa ating bansa, pinakamarami ang mga Tsino na lubhang nagpapakaba sa atin kaugnay sa dahilan nang kanilang pagpunta rito. Ano nga ba talaga ang kanilang pakay?

Makikita natin na ang karamihan sa mga Tsino na nandito sa Pilipinas ay mula sa Mainland China na pawang nagtratrabaho sa mga establisismyento o negos­yo na na pag-aari ng kanilang mga kababayan.

Nakapagtataka naman kasi kung bakit nagsulputang parang kabute ang karamihan sa mga pasugalan dito sa bansa na pinapalakad ng mga dayuhan na karamihan ay mga Tsino. Marami ring negosyo na pawang pag-aari ng mga dayuhang ito at ang kinukuha nilang mga manggagawa ay kanilang mga kababayan.

Anong nangyari na ba sa ating bansa?

Nagpapabaya na ba sa kanilang  trabaho ng mga tauhan ng Bureau of Immigration? Bakit nakakapasok ang mga da­yuhang ito at nabibigyan pa ng permiso na makapagtrabaho?

Hindi nga siguro naghihigpit ang mga taga BI basta may padulas na dumaraan sa kanilang mga kamay.  Teka, di ba ang trabaho ng mga nasa ahensiyang ito ay suriin ang pagpasok at paglabas ng mga dayuhan?

Pero bakit tila sa tanggapan ding ito nagmumula ang mga papeles ng mga dayuhan para makapagtrabaho sa ating bansa?

Hindi na yata tama ito. Malaman sa alamang, hindi nasisingilan ng buwis o tamang buwis ang mga dayuhang ito na nagtratrabaho sa Pilipinas.

Hindi naman yata tama ito. Aba’y hindi na parehas ang labas. Luging-lugi tayong mga Pinoy na kapag nagtrabaho sa kanilang bansa ay pinaghihigpitan kaya’t napakahirap bago makapasok at sinisingilan ng buwis.

Hindi kaya sa bandang huli, sa tuloy-tuloy na pagdami ng mga Tsino sa ating bansa ay makopo na nila ang Pilipinas?

Wala bang plano na maghigpit ang BI sa pagpasok ng mga ito sa ating bansa? Aba’y kapag nagtungo ka sa mga bagong tayong mall sa Metro Manila ay pawang mga lahing ito ang makakasalubong at makakasabay mong kumain sa mga restaurant.

Maraming mga condominiums pa ang kanilang inuukupa na kapag nagkaroon ng gulo ay pinagtutulung-tulangan pa nila ang mga lehgitimong residente ng Pilipinas.

Kapag ganito nang ganito ang mangyayari, aba’y nakakatakot na dahil baka isang araw, mabura na ang Pilipinas sa mapa at masama na sa China.

Kelan pa kikilos ang mga opisyales ng Pilipinas? Kapag huli na at wala na tayong magagawa pa?  (NIPIS / LEA BOTONES)

 

Please follow and like us:
Read More

PAGMAMAHAL SA SARILING WIKA

NIPIS

DAHIL normal para sa isang mamamahayag at kolumnista na maharap sa kasong libelo kaugnay sa mga sinusulat na artikulo, ang inyong lingkod ay dumalo sa pagdinig kamakailan sa tanggapan ng isang piskal sa lungsod Quezon upang isumite ang kanyang counter-affidavit sa reklamong kanyang kinakaharap.

Halos pagpawisan ang Nipis nang marinig na pinapagalitan ng isang piskal ng QC ang isang respondent o inirereklamo dahil sa ang sagot nito sa reklamo ay nakasulat sa ating sariling lengguahe. Naibulong ng inyong lingkod sa sarili na “Suerte ko dahil English ang counter-affidavit ko.”

Sinabi ng piskal na ‘Ingles’ lang ang tatanggapin niyang lengguahe dahil ayaw niyang maglipat pa nito sa sarili nating wika. Aniya, nakasulat sa ingles ang reklamo at maging ang mga subpoena ng piskalya ay nakasulat sa ingles at hindi tagalog kaya’t dapat ang sagot ay ingles din.

Naisip ko tuloy, parang mali naman ang gustong mangyari ng fiscal dahil nasa sarili natin tayong bansa, eh bakit salita ng dayuhan ang a­ting niyayakap?

Sa totoo lang, nawala na talaga ang ating pagiging Makabayan. Eh kung tagalog lang ang nakayanang sagot ng ini­rereklamo sa akusasyon sa kanya, bakit hindi tinanggap ng piskal?

Panuntunan na ba ito ng Department of Justice na huwag tanggapin ang mga reklamo at sagot sa reklamo na nakasulat sa sarili nating salita? Gayundin ba ang paninindigan ng Korte Suprema na dapat ay sa salitang ban­yaga ang sagot sa rek­lamo? Paano kung wala silang abogado kaya’t nakasaad sa tagalog o wikang sarili ang kanilang sagot?

Nasaan na ang ating pagmamahal sa sariling wika? Mawawala ba ang posisyon ng piskal na ito kung tagalog ang magi­ging sagot sa reklamo? Bababa ba ang kanyang sweldo?

Hindi naman yata tama na hindi niya tanggapin ang isinusumiteng sagot ng inirereklamo dahil tagalog ito. Bukod pa ito sa pamamahiya ng piskal sa mga ini­rereklamo na sa totoo lang naman ay may mga edad na rin kaya medyo hindi sanay na masampahan ng reklamo.

Bakit ba asensado ang bansang Japan? Ang China? Di ba dahil sa pagmamahal nila sa sarili nilang wika? Nang mapunta ang inyong lingkod sa Japan, dahil hindi marunong ng Nihonggo, hirap na hirap talaga na makisalamuha. Ang sinumang kausapin sa salitang banyaga ay sumasagot ng “No English, No English.”

Tama lang naman na ang mga turista ang mag-adjust sa kanila. Tama lang na mag-aral ng salita nila ang mga dayuhan bago magtungo upang mamamasyal o kaya ay magtrabaho sa kanilang lugar. Sa madaling salita, mahal nila ang kanilang wika.

Naniniwala ang inyong lingkod sa sinabi ni Gat Jose Rizal na “Ang di magmahal sa sariling wika ay higit sa hayop at malansang isda.” Kaya sana, makapag-isip ang pamahalaan na sana’y magsanay na ang ilang proseso sa kanilang tanggapan ay gawin sa tagalog o Filipino at huwag sa banyagang salita.

Huwag ikahiya ang a­ting wika sapagkat isa ito sa tumatayong simbolo ng ating pagka-Pilipino. Dapat ikintal sa muli sa puso at isip ng bawat mamamayang Pilipino ang kahalagahan ng ating sariling wika.

Isang mapagpalang “Buwan Ng Wika” sa lahat at nawa’y maipakita natin ang pagiging Makabayan hindi lang sa salita subalit maging sa isip at gawa. (NIPIS / LEA BOTONES)

Please follow and like us:
Read More

HINDI KAYANG RESOLBAHIN ANG TRAFFIC?

NIPIS

KUNG anu-ano ang inirerekomenda ng mga opisyales ng pamahalaan at maging mismong ng mga mamamayan upang malutas lang ang ma­tinding trapiko sa ating bayang Sinilangan.

Nandiyang irekomenda ni Senate President Vicente Tito Sotto III ang pagbabawal ng pagparada sa lahat ng lansangan sa Metro Manila.

Merong nagrerekomenda na ipatupad ang no garage, no car policy at mga katulad nito at meron din namang nagsasabi na huwag na hayaang bumiyahe sa Metro Manila ang mga sasakyang bulok na o mahigit labinlimang taon nang tumatakbo sa kalye.

Iba-iba ang ibinibigay na rekomendasyon subalit iisa lang naman ang nais ng mga itong puntahan – ang mawala ang matinding trapiko sa Metro Manila na nagiging sagabal sa pag-unlad ng ating ekonomiya.

Pero sa totoo lang, dalawa ang dapat sisihin sa pagbagal ng daloy ng trapiko sa bansa. Ito ay ang kawalan ng disiplina ng marami sa ating mga dri­vers at ang ipinatutupad na patakaran ng pamahalaan.

Kung sana’y noon pa lang ay matindi na ang ipinatutupad na disiplina sa mga mamamayan lalo na sa mga tsuper, tiyak na hindi hahantong sa perwisyong traffic ang sinasapit ng marami sa moto­rista at mananakay.

Magandang makaisip ang mga mambabatas ng isang polisiya na susupil sa pagiging pasaway ng maraming driver maging pampubliko o pribado.  Isang panuntunan na magbibigay aral sa mga pasaway sa lansangan.

Kasi naman, marami sa ating mga driver, ma­ging tricycle, motorcycle, jeepney, taxi, truck, bus at pribado na hindi naman talaga nakakaintindi ng mga regulasyong pantrapiko o traffic rules and regulations. Marami sa kanila, natuto lang humawak ng kambiyo at manibela kasunod ng pag-atras at abante ng sasakyan, kasabay nang paghanap ng Land Transportation Office examiner na tutulong sa kanila ay nakakakuha na ng lisensiya upang magmaneho.

Kailangan na talagang mawala sa lansangan ang mga pasaway at ba­lasubas na drivers upang mabawasan kung hindi man mawala ang mabagal na daloy ng trapiko.

Kapag nakapaglagay ng magandang formula ang pamahalaan na magbibigay ng matinding leksyon sa mga pasaway na tsuper, siguradong mababawasan ang mga pasaway at ang mga matitirang matitinong drivers ay mas lalong magtitino dahil ayaw natural nilang mawala sa kalsada.

Sa mga nagpapatupad ng trapiko, kapag nagkaroon ng kaso lalo na katiwalian kaugnay ng suhulan, tiyak na dapat na ring tanggalin sa trabaho at wag na bigyan ng isa pang pagkakataon.

Kapag nagawa ito, hindi pa kaya mareresolba ang traffic?

Tingnan muna sana para malaman kung ano nga ang talagang problema.  (NIPIS / LEA BOTONES)

Please follow and like us:
Read More

TASK FORCE ALIS SAGABAL HINDI PAREHAS

NIPIS

MAGANDA ang ginagawang paglilinis at pagtatanggal ng mga perwisyo at balakid sa daraanan na ipinatutupad ng pamahalaang lungsod ng Caloocan at Metropolitan Manila Development Authority (MMDA) sa pamamagitan ng Task Force Alis Sagabal.

Bagaman hindi tulad ng ginagawa ni Manila Mayor Francisco “Isko Moreno” Domagoso na personal ang pag-iikot at pagpapatupad ng batas sa kanyang nasasakupan, masasabing ginagawa naman ni Caloocan City Mayor Oscar “Oca” Malapitan ang kanyang trabaho bilang “ama ng lungsod” sa tulong ng kanyang mga pinagkakatiwalaan opisyal at tauhan.

Isa sa pinagkakatiwalaan ni Mayor Oca ay si Engr. Jay Bernardo, hepe ng Department of Public Safety and Traffic Management (DPSTM)  ng Caloocan City na nasasakop ng District 1 ng lungsod na kilala bilang Caloocan North o Bukid.

Nakakapagtaka lang, nasa district 2 o mismong Caloocan City proper ang traffic subalit bakit mas inuna ng pamunuan ng Task Force Alis Sagabal ang isang subdivision sa Barangay Llano?

At isang punto pa, bakit inuna ang loob ng subdivision gayung ang dinaraanan papasok ng nasabing lugar ay ang lugar kung saan madalas mag-traffic dahil na rin sa mga pasaway na may-ari ng mga sasakyan at tricycle drivers na walang pasintabi kung sumungit-singit sa kung saan-saan.

Inunang baklasin ang mga pader sa loob ng subdivision na tama rin naman dahil naging abusado ang mga may-ari ng bahay na lumampas sa tinutungtungan ng kanilang bahay o garahe o kaya naman ay negosyo tulad ng tindahan.

Subalit ang hindi katanggap-tanggap ay bakit inuna pa ang loob gayung mas makabubuti at mas mapapabilis ang pagtanggal ng traffic kung uunahin ang mga bara sa labas pa lang o yung main road na talagang dinadaanan ng mga sasakyan lalo na ng mga cargo trucks.

Napakaraming may-ari ng negosyo at bahay sa barangay Llano ang inukupa na ang bangketa kung kaya’t wala na halos daanan ang mga tao at may mga may-ari ng sasakyan na sa kalye nakaparada. Hindi sana makakasama ng loob ang pagbabaklas ng mga lagpas sa takdang daraanan na dapat ay para sa mga naglalakad na tao, pero hindi ginalaw ng Task Force Alis Sagabal. Dahil ba ang ilan sa mga nagmamay-ari ng negosyo at bahay sa nasabing lugar ay mga kaalyado sa pulitika?

Ang ilang sa kanila ay dating opisyal ng barangay habang ang iba naman ay miyembro pa rin ng Sangguniang Barangay. Ito ba ang isa sa mga dahilan kung bakit hindi sila magalaw-galaw?

Naman! Unfair naman sa mga taga-subdivision na kaya ang kanilang kinalalagyan nila ngayon ang kanilang pinagtiisang bayaran ay upang makasigurado na maayos ang kanilang tirahan.

Kaya kasi iniisa-isa umano ang pagbabaklas ng mga lumampas sa kanilang terirtoryo ay dahil gagawing alternate route ang nasabing subdivision upang mabawasan ang traffic sa national road.

Pero naisip ba ng mga opisyal ng barangay at maging ng local government unit na malalagay sa panganib ang buhay ng mga naninirahan sa lugar na iyon na dating isang matahimik na pamayanan?

Bagaman, na-turn over na sa city government ang subdivision, sana ay nagsagawa pa rin sila ng consultation sa homeowners upang maliwanagan ng mga ito ang totoong nangyayari.

Mayor Oca, alam ng mamamayan ng Caloocan na ikaw ay makatao at para sa iyo, una ang tao, kaya sana ay mabigyang pansin ang suliraning ito ng taga-subdivision.  (NIPIS / LEA BOTONES)

Please follow and like us:
Read More

MAY PUNTO KAUGNAY SA REGALO

NIPIS

NAUNANG ipinahayag ni Pangulong Rodrigo Duterte na walang masama kung tumanggap ng regalo ang mga pulis mula sa mga taong kanilang natulungan basta hindi ito gagawing sapilitian o magiging bahagi ng katiwalian.

Para sa pangulo, bahagi lang ng pagiging matanawin ng utang na loob ng mga Pinoy ang pagbibigay ng regalo kapag natulungan sila.

Pero para kay Phi­lippine National Police chief Gen. Oscar Alba­yalde, hindi kailangang magbigay ng regalo ng sinumang mamamayan na nabigyan ng tulong ng mga  kawani ng pambansang pulisya dahil bahagi ito ng kanilang pagtupad sa tungkulin.

At tama ang dahilan ni Gen. Albayalde na hindi naman kailangan ng pulis na bigyan ng pabuya sa kanyang ginawang pagtulong dahil iyon ay bahagi ng kanyang mandato bilang alagad ng batas bukod pa ito sa binabayaran ng pamahalaan ang mga pulis upang magserbisyo.

Nais ihayag ni PNP chief na may hangganan ang pagbibigay ng pabuya sa mga pulis na ginagawa ang kanilang tungkulin. Ang pagbibigay ng parangal sa mga ito ang isa sa pinakamaayos na pagkilala sa kanilang nagawang kabutihan sa kap­wa at sa bayan.

Kapag masyadong malaki o may halaga na ang ibinigay na regalo ng isang mamamayang natulungan ng isang pulis, maituturing na itong isang klase ng panunuhol.

Hindi nabanggit ni Pangulong Duterte kung ang naitulong ng pulis sa isang mamamayan ay kaugnay sa negosyo. Hindi nga ba masama na tumanggap ng regalo?

Alam ba ni Pangulong Duterte na may mga pulis na bukod sa kanilang suweldo sa PNP ay tumatanggap din ng buwanang suweldo bilang consultant (er sulsultant) ng ilang kumpanya na binibigyan nila ng serbisyo?

Maaaring hindi rin alam ng presidente na may mga pulis lalo na hepe ng unit, presinto at istasyon na tumatanggap ng lingguhan mula sa ilang negos­yo na nakikinabang sa ibinibigay na proteksyon ng mga pulis.

Posibleng ang alam lang ni Tatay Digong ay ang mga iligal tulad ng sugal, sidewalk vendors, video karera, bookies at lotteng na ang mga ope­rator ay nagbibigay ng weekly payola.

Hindi lang po ang mga iligal na yan ang tinatanggapan ng mga pulis ng lagay subalit maging ang ilang legal na negosyo ay nagiging iligal na rin dahil hinihingian ng lingguhang parating.

Dapat na bigyan ng atensyon ng PNP at ng Department of Interior and Local Government (DILG) ang mga ginagawang kabulastugan ng ilang pulis na ang iniuuwing pera sa kanyang pamilya at ginagamit sa luho ay mula sa pawis ng ilang negosyante na ang negosyo ay legal subalit nagiging iligal dahil na rin sa kagustuhang kumita kaya nakikipagsabwatan sa mga pulis.

Ilang panahon na lang ay magreretiro na si Gen Albayalde kaya nararapat lang na mapaimbestigahan na niya ang nangyayaring kalokohan sa laylayan ng kanyang tanggapan. Makabubuti rin kung susuportahan ng DILG at National Police Commission ang adhikaing maisaayos ang pambansang pulisya at tuluyang makalaya sa katiwalian at kotong.  (NIPIS / LEA BOTONES)

Please follow and like us:
Read More

WALA SA HULOG

NIPIS

ILANG araw na­ging problema ang pagkahaba-habang pila ng mga sasakyan sa kahabaan ng Efipanio Delos Santos Avenue (EDSA) kaya’t mara­ming motorista at commuter ang inis na inis sa Metropolitan Manila Development Authority (MMDA) dahil inakala nila na walang ginagawa ang mga ito.

Habang si Manila Mayor Francisco “Isko Moreno” Domagoso naman ay walang tigil sa pag-aksyon upang maisaayos ang daloy ng trapiko sa kanyang nasasakupan kaya nga nawala ang mga nagtitinda sa lansangan dahilan upang tuloy-tuloy lang ang pasada ng mga pampasaherong sasakyan at daloy ng mga pribadong sasakyan.

Kaya naman, upang maipakitang hindi inutil ang ibang opisyales ng ibang lungsod ay nag-utos ang ang Department of Interior and Local Government (DILG) na kumilos sa kanilang nasasakupan upang hindi sila magmukhang walang ginagawa upang isaayos ang kanilang pamayanan.

Pero parang overacting (OA) naman ang ginawang aksyon sa Caloocan (North) kung saan ang ilang subdivision ay pinakialaman ng ilang pinagkakatiwalaan ni Caloocan City Mayor Oscar Malapitan.

Isa ang Sunriser Village sa Barangay Llano na apektado sa pagmamaga­ling ng ilang opisyales ni Mayor Malapitan dahil minamadali nila ang road widening sa nasabing subdibisyon na kung tutuusin naman ay hindi dinaraanan ng mga sasak­yan maliban na lang sa mga nakatira sa lugar.

Susunod naman ang mga residente kung makikitang totohanan at walang pinipili ang nagpapatupad. Lamang, palaisipan sa kanila kung bakit inuna ang subdibisyon, gayung sa labas pa lang ng Llano Road ay marami na ang dapat gibaing pader dahil lumampas sa talagang sakop ng kanilang pag-aari.

Ayon sa isang opis­yal na nakausap ng NIPIS, sumusunod lang sila sa kautusan ni Pangulong Rodrigo Duterte na paluwagin ang mga daanan. Plano umano ng pamahalaang lungsod ng Caloocan na gawing daanang pampubliko ang Sunriser Subdivison kaya’t pinapaluwagan ang kalye.

Teka muna, naisip ba nila na posibleng ang pagbubukas ng subdivision bilang alternate route sa mga sasakyan ay magpapataas ng “crime against property” sa lugar.

Kapag bukas sa lahat ng daraan ang subdibisyon, magiging target na ito ng mga magnanakaw. Nalagay na sa balag ng alanganin ang ari-arian ng mga tao, posibleng pati ang kanilang buhay ay malagay din sa peligro.

Mayor Oca Malapitan, paluwagin muna ang mga pangunahing daanan sa iyong nasasakupan, bago naman ang mga subdibisyon na posibleng maging target naman ng mga kawatan kapag nabuksan.

Isa pa, huwag na gamitin si Presidente Duterte sa mga maling diskarte. May gustong kumitang contractor na hawak ng isa sa mga alaga ni Mayor kaya gustong unahin ang subdibisyon. (NIPIS / LEA BOTONES)

Please follow and like us:
Read More