MAG-INGAT SA MENINGO (1)

meningococcemia-5

Meron ngunit di kailangang mag-panic

(Ni Nenet L. Villafania)

KINUMPIRMA ng Department of Health (DOH) na isang 53-anyos na babae ang namatay dahil sa meningococcemia sa isang hospital sa Tanauan City, Batangas noong huling linggo ng Setyembre.

Ayon kay DOH Calabarzon Director Eduardo Janairo, kumpirmado ito base sa mga test results ng Research Ins­titute for Tropical Medicine (RITM).

Ang mga sintomas na naranasan ng biktima ay mga pasa at galos sa katawan, pananakit ng ulo, at mataas na lagnat ang nagtulak sa mga awtoridad upang kumuha ng sample ng dugo ng babae upang mabatid kung pangkaraniwang trangkaso o sa mas malalang dengue. Gayunman, hindi ito agad binibigyan ng pansin ng mga nagkakasakit.

Hinihintay pa ng DOH ang resulta sa blood test ng tatlo pang hinihinalang kaso ng meningococcemia na nagresulta rin sa kanilang kamatayan noon ding isang buwan, kasama na ang isang taong batang isinugod sa emergency room ng Apacible Memorial District Hospital sa Nasugbu, isang dalawang taong batang lalaki na taga-Nasugbu rin at isang 46-anyos na babaing taga-San Jose, pawang sa Batangas.

Ngunit pinabulaanan ni Janairo na may outbreak ng meningococcemia sa Batangas dahil may tatlong kaso pang hindi beripikado, at hindi rin ito naka-concentrate sa iisang bayan. Gayunman, binalaan niya ang madla na maging mapagmatyag, ngunit huwag din naman umanong magpa-panic.

Base sa tala ng DOH, abot na sa 130 ang mga kaso ng Meningococcemia sa bansa mula Enero 1 hanggang Hun­yo, 2019 – kung saan karamihan sa kaso (18%) ay sa NCR at Region IV-A o CALABARZON (16%).

May animnaputwalo (68) na rin ang namamatay.

Noong 2018, 17 ang kaso nito sa CALABARZON kung saan 9 ang namatay. Naging 21 ang kaso dito nitong  Hun­yo at 11 naman ang namatay.

Paalala ni Janairo, “U­nang-una, huwag magpapanic. Napakaimportante pa-check up kaagad, humingi ka ng prophylaxis sa isang epidemiologist o mga doctor at may mga gamot naman sa kahit bata na para ibigay na prophylaxis ‘yung proteksyon, para hindi siya magkaroon ng meningo”.

Sa Nasugbu, pinitisyon ng mga mamamayang pansamantalang isara at ipa-qua­rantine ang Nasugbu Doctors Hospital at Apacible Memorial District Hospital matapos malamang dito itinakbo ang tatlong pasyenteng hinihi­na­lang namatay dahil sa meningo­coccemia.

Nakiusap naman si Na­sug­bu Mayor Antonio Barcelon na huwag mag-panic ang mga tao upang hindi lumala ang sitwasyon.

“Hindi airborne ang meningococcemia,” ani Barcelon. “Hindi ito makakahawa kung hindi ka masyadong malapit sa may sakit.”

Gayunman, hindi pa rin naiwasang magkaubusan ng disposable face mask sa mga botika. Makikita ring karamihan sa mga lumalabas ng bahay, lalo na ang mga bata, ay nakasoot ng face mask bilang proteksyon. (May kasunod)

Please follow and like us:
Read More

53-ANYOS PINAY GALING DUBAI PATAY SA MENINGO

batangas1

KINUMPIRMANG meningococemia ang ikinamatay ng isang 53-anyos na babae sa Tanauan City, Batangas, habang tatlong  iba pa ang hinihinalang nasawi rin sa nasabing sakit.

Kinumpirma ni Dr. Eduardo Janairo, direktor ng Department of Health (DOH) sa Calabarzon, ang pagkamatay ng babae dahil sa meningococcemia.

Galing umanong Dubai sa United Arab Emirates ang babae at namatay noong Setyembre 21 sa isang ospital sa Tanauan, ani Janairo.

Kaugnay nito, hinihintay pa ng DOH-Calabarzon ang resulta ng pagsusuri sa blood sample ng tatlong  namatay sa Lian, Nasugbu at San Jose na hinihinalang dahil din sa meningococcemia.

Ang meningococcemia ay malubhang sakit dulot ng bakterya. Maaari itong magdulot ng impeksiyon sa utak, gulugod at dugo.

Maaaring mahawa ang isang tao ng meningococcemia sa pamamagitan ng pag-ubo at paghalik.

Ilan sa mga sintomas nito ay mataas na lagnat, pananakit ng ulo, sore throat, pananakit ng kalamnan, pagsusuka at pagkakaroon ng rashes o mga pantal.

 

Please follow and like us:
Read More

PAGKAMATAY NG 4-ANYOS SA DAVAO, KINUMPIRMANG MENINGO

(NI DONDON DINOY)

DAVAO CITY– Isang opisyal ng Department of Health (DOH) sa Davao Region ang nagsabing meningococcemia ang ikinamatay ng isang 4-anyos na bata na isinugod sa Brokenshire Hospital noong Agosto 30.

Ayon kay DOH-XI Regional Director Annabelle Yumang, hinihintay na lamang nila ang opisyal na report ng pagamutan kung saan dinala ang bata.

Tinutukoy na rin ng mga opisyal ng kagawaran ng kalusugan ang pinanggalingan ng sakit.

Nagsagawa na ng ‘contact tracing’ ang mga otoridad sa mga taong nakapag-kontak sa biktima kagaya ng mga kaklase nito kung saan nag-aral ng pre-school ang bata, pati na rin sa bahay at sa mga miyembro ng pamilya.

Napag-alaman na hindi na pumasok ang bata simula noong Agosto 29 hanggang sa isinugod na sa ospital noong Agosto 30.

Batay sa ulat ng GMA News, sinabi ni Health Secretary Francisco Duque, na namatay ang bata sa loob ng isang pribadong pagamutan noong Biyernes dahil sa meningococcemia.

“It’s true. There’s a four-year old boy who died of meningococcemia,” ayon kay Duque.

Idinagdag nito na ginagawa na nila ngayon ang imbestigasyon kung sino ang mga naging malapit sa bata.

“Meaning they went to the school where the boy attended school. And they have given prophylaxis to the hospital staff who attended or got exposed to the case of meningococcemia,” ani Duque.

Nag-abiso rin ang opisyal sa publiko at sinabing “very contagious” ang naturang sakit.

Una nito, itinanggi ng Brokenshire Integrated Health Ministries Inc., na walang meningococcemia outbreak sa pagamutan.

“The patient was a suspected case who exhibited signs and symptoms similar with the case definition of the disease,” sa opisyal na pahayag ng Brokenshire na naka-post din sa kanilang official Facebook account.

Sinabi ng pagamutan na kumuha na sila ng specimen mula sa pasyente upang ipasailalim sa pagsusuri.

“The ER (emergency room) and the hospital has been cleared by the Infection Control Committee and is now safe and operating normally as usual,” paglilinaw ng Brokenshire.

Ayon sa World Health Organization (WHO) ang meningococcemia ay isang bihirang ‘infection’ dahil sa Neisseria meningiditis bacteria. Ito ay isang uri ng bakterya na nagbubunga ng meningitis.

Nilinaw nito na hanggang sa 10 porsyento ng mga tao ay nagdala ng nasabing bakterya ngunit hindi aabot sa isang porsiyento ng meron nito ang magkakasakit.

 

Please follow and like us:
Read More