P200,000 PABUYA VS INFO SA NAGTAPON NG PATAY NA BABOY

AFRICAN SWINE FEVER-4

(NI KEVIN COLLANTES)

MAGBIBIGAY ng dagdag-pabuya na P200,000 ang Marikina City government para sa sinumang makagbibigay ng karagdagang impormasyon sa mga taong nasa likod ng pagtatapon ng may 58 patay na baboy, na pinaniniwalaang dinapuan ng African Swine Fever (ASF), sa Marikina River, kamakailan.

Bagama’t may lead na, mga larawan at impormasyon, ang lokal na pamahalaan hinggil sa insidente, sinabi ni Marikina City Mayor Marcelino ‘Marcy’ Teodoro na wala pa umano silang mga testigo na makapagbibigay ng detalyadong impormasyon kung sino ang may kagagawan ng pagtatapon ng mga patay na baboy sa ilog.

Naipaabot na rin aniya nila sa Department of Agriculture (DA) ang nakalap na mga lead, ngunit naghahanap pa sila ng karagdagang impormasyon hinggil dito.

Matatandaang sinabi ng alkalde na nais nilang mapanagot ang mga taong nasa likod ng insidente, at plano nilang sampahan ang mga ito ng mga kasong kriminal at sibil dahil sa perwisyong idinulot ng kanilang ginawa.

Una na ring ipinagbawal ni Teodoro ang pangingisda at maging ang paliligo sa ilog hanggat wala pang katiyakan kung ligtas na ang tubig doon, para na rin sa kaligtasan ng mga residente.

Plano rin ng city government na maghain ng writ of kalikasan sa hukuman sa susunod na linggo base sa mga impormasyong kanilang nakalap.

 

Please follow and like us:
Read More

NAGPAANOD NG PATAY NA BABOY SA ILOG, MANANAGOT

(NI KEVIN COLLANTES)

TINIYAK ni Marikina City Mayor Marcelino ‘Marcy’ Teodoro na pananagutin na ang mga taong responsable sa pagtatapon at pagpapaanod ng mga patay na baboy na pinaniniwalaang tinamaan ng African Swine Fever (ASF) sa Marikina River.

Batay sa ulat ng Marikina Veterinary Office, mula Huwebes ng umaga hanggang nitong Biyernes, ay umaabot na sa 55 mga patay na baboy ang kanilang narekober na palutang-lutang sa kanilang ilog.

Kaagad naman nilang inililibing ang mga nakukuhang patay na baboy upang hindi na makahawa pa ng anumang sakit base na rin sa abiso ng Department of Agriculture (DA).

Matibay ang paniniwala ng Marikina City government na galing ang mga patay na baboy sa ilog sa bayan ng Rizal, partikular sa Rodriguez at San Mateo, dahil wala namang piggery o slaughterhouse sa lungsod ng Marikina.

Tiniyak naman ni Teodoro na patuloy ang isinasagawang imbestigasyon hinggil dito.

“Para hindi na maulit, dapat ay may managot. Dapat proper disposal. Hindi puwedeng walang mananagot, dapat may managot,” anang alkalde. “May proper disposal na dapat sundin para walang possible contamination.”

Kaagad ring ipinag-utos ni Teodoro ang pag re-activate ng quarantine checkpoints sa lungsod upang mapigilan ang pagpasok ng mga karneng apektado ng ASF.

Bukod dito ay inihinto na muna ng alkalde ang pangingisda sa kahabaan ng Marikina river sa pangambang nagkaroon ng kontaminasyon sa tubig dahil sa nagkalat na mga patay na baboy.

“We are checking if may river contamination. We are checking the water quality para mapangalagaan ang well-being ng Marikina residents,” pahayag pa ni Teodoro.

Sa kabilang dako, nabatid na nakipag-ugnayan na si Dr. Manuel Carlos, hepe ng VSO ng Marikina City sa Bureau of Animal Industry (BAI), para kumuha ng mga blood samples sa mga nakuhang patay na baboy upang isailalim sa pagsusuri ang mga ito.

“Pupunta yung teams ng BAI para kumuha ng sample sa baboy para malaman kung ano ang cause of death, including na doon ang ASF,” saad nito.

Nabatid naman na mismong mga netizens na din ang nagpapadala ng mga litrato at tumatawag sa awtoridad kapag may mga nakikitang patay na baboy na palutang-lutang sa ilog.

Please follow and like us:
Read More

MARIKINA BALIK NUTRIBUN SA PAARALAN

NUTRIBUN

(Ni Mac Cabreros)

LAYON na mapaganda ang kalusugan ng mga batang estudyante upang maisaayos ang pag-aaral ng mga ito at magkaroon ng de-kalidad na edukasyon, ibinalik ng Pamahalaang Lungsod ng Marikina ang pamamahagi ng masustansiyang tinapay na sumikat at nakilala noong panahon ni dating Pangulong Ferdinand E. Marcos.

Para kaalaman ng mga bagong sibol, ang pamamahagi ng nutribun sa paaralan ay isa sa magagandang programa ni Marcos para maagapan ang malnutrisyon noong

1971 sa ilalim ng Food for Peace program ng United States.

Ayon kay Marikina City Mayor Marcelino “Marcy” Teodoro, batid niya na walang matututunan ang isang batang mag-aaral kapag kumakalam ang sikmura o walang laman ang tiyan lalo na sa umaga kaya’t naisipan niyang mamahagi ng tinapay na nutribun na gawa sa harina, kalabasa, itlog at malunggay.

Naniniwala si Teodoro na kapag mahina ang katawan ng isang bata, hindi ito makakapasok araw-araw sa paaralan at ang madalas na pagliban nito sa klase ay posibleng humantong sa pagtigil sa pag-aaral o pagbagsak sa klase.

Totoong maraming aspeto ang pagtigil sa eskuwela ng mga mag-aaral at isa na rito ang kahirapan, pagkakasakit bunsod ng malnutrisyon at hindi magandang hygiene tulad ng pagkakaroon ng sirang ngipin na kapag sumakit ay grabe. Ang mga aspetong ito ay para sa mga batang nasa mga unang taon sa paaralan.

Para naman sa mga estudyanteng nasa medyo mataas na antas ng paaralan kaya natitigil sa pag-aaral  bukod sa sakit, hindi magandang hygiene, kahirapan ay puwedeng maidag­dag ang maagang pagkagumon sa bisyo, maagang pagbubuntis at pagkakasangkot sa paggamit at pagbebenta ng droga.

Sa ngayon, ipinapamahagi ang nutribun sa Kinder at Grade 1 sa paaralan sa Marikina.  Sa bawat 120 araw ay ti­timbangin ang mga bata upang mabatid ang resulta ng programa kung nakapagdulot ba ito ng pagbabago sa kalusugan ng bata.

Bukod sa pamamahagi ng  nutribun at pagmomonitor ng kalusugan ng mga bata, magiging mapagbantay din ang pamahalaang lungsod ng Marikina sa grado ng mga bata upang mabatid kung bumuti o tumaas ang grado ng mga ito upang matantiya o malaman kung nakakatulong ang pamamahagi ng masustansiyang tinapay sa kanilang performance sa paaralan.

Bakery sa paaralan

Dahil target ng Marikina City na mabigyan lahat ang mga mag-aaral sa lahat ng 17 paaralan at matutusan ang programa para makamit ang “zero malnutrition,” ipinagmalaki ng alkalde ng Marikina na mamumuhunan ang pamahalaang lungsod para magkaroon ng bakery sa mismong paaralan.

“Maglalagay ang pamahalaang lungsod ng in-house bakery sa 17 paaralan sa lungsod upang mapalakaw ang kasalukuyang pamimigay ng masustansiyang tinapay na nutribun sa mga mag-aaral ng kinder at grade 1,” anang alkalde.

“Bukod sa mapapaganda ang kalusugan at edukasyon ng mga mag-aaral, magiging dagdag income ito sa paaralan at magkakaroon pa ng trabaho ang ilang mga magulang na silang magiging panadero at mamamahala sa bakery,” dag­dag pa nito.

Iginiit pa nito na isa pang dahilan kung bakit nais niyang makapagtayo ng bakery sa paaralan ay upang makasiguro na malinis at freshly baked ang ipapamahaging tinapay sa mga bata.

Idinagdag ni Teodoro na pinagtutuunan din nila ang paggamit ng papel imbes na plastic bilang pambalot para maiwasan ang paglala sa basurang plastic gayundin na masiguro ang kalinisan at kalusugan ng mga bata o maiiwas sa sakit kapag kinamay (hinawakan) ang tinapay.

Ayon pa Teodoro, kuku­nin ang pondo sa Special Education Fund mula sa nakolektang buwis  (real property tax).

Ayon kay Teodoro, ibinabalik lang niya sa tao ang buwis na nakolekta ng pamahalaang lungsod dahil kapag malusog ang mamamayan, tiyak na magiging malusog at masaya ang pamayanan.

DepEd pabor sa programa

Pabor ang Department of Education (DepEd) sa hakbang ng Pamahalaang Lungsod ng Marikina na mamahagi ng masustansyang tinapay na nutribun sa mga mag-aaral.

Ayon sa DepEd, wala silang tutol sa lahat ng klase ng feeding program na makatutulong sa kalusugan at edukasyon ng mga mag-aaral.

“Mahalaga na malakas ang katawan ng mga bata para makapag-aral nang maayos,” pahayag DepEd.

Binanggit na hindi natututo ang isang bata kapag kumakalam ang tiyan at mahina ang katawan dahil sa malnutrisyon.

Mahigpit na ipinagbabawal ng DepEd ang paglalako ng sitsirya at inumang may masamang epekto sa katawan ng mga bata.

Please follow and like us:
Read More

MARIKINA NAKATUTOK SA PAGSUGPO SA DENGUE

(NI MAC CABREROS/PHOTO BY ITOH SON)

PINATUTUTUKAN ni Marikina Mayor Marcelino  “Marcy” Teodoro ang nakamamatay na dengue sa kanilang lungsod.

Sa pagbisita ni Mayor Teodoro sa Amang Rodriquez Memorial Medical Center, hiniling nito kay Director, Dr. Imelda Mateo, na ipagkaloob ang lahat na medical attention sa mga pasyente dito kung saan nailista na sa 26.

“I told the director of the hospital to accommodate all dengue patients, even they are not residents of Marikina City,” pahayag Mayor Teodoro. “Also, I told the hospital administrators to take good care of the dengue patients and to strictly monitor their conditions, and to provide all necessary help that they could give.”

Naunang idineklara ng Department of Health (DoH) ang national dengue epidemic matapos maitala sa 146,062 kaso simula Enero taon kasalukuyan saan mahigit anim na raan nang nasawi. Magagamit na ngayon ng mga LGUs ang kanilang Quick Response Fund para kalusugan ng mamamayan.

Bukod sa clean up drive, nagbabahay-bahay ang mga barangay officials at health workers para sa malawakang anti-dengue information campaign.

Please follow and like us:
Read More

PULIS NALUNOD SA BASIC SWIMMING COURSE SA NCRPO

lunod2

(NI NICK ECHEVARRIA)

PATAY ang isang police corporal matapos malunod habang sumasailalim sa Basic Swimming Course, Sabado ng tanghaling tapat.

Nakilala ang biktima na si P/Cpl. Adonis Serrano, 28, at nakatalaga sa Police Community Precinct 9 ng Marikina City Police Station.

Nangyari ang insidente sa isang swimming pool sa loob ng compound ng Natioanal Capital Region Police Office (NCRPO) sa Taguig City, bandang alas-12:00, habang sumasailalim ang mga participants sa nabanggit na basic swimming course.

Wala namang nakapansin na nalunod na ang biktima at natuklasan lamang nang magsagawa ng accounting sa hanay ng mga participants na nawawala ang pang 243 sa roster ng Charlie Company.

Makalipas ang 10 minutong paghahanap natuklasan ang bangkay ng biktima na nalunod sa swimming pool.

Nagsasagawa na nang imbestigasyon ang pulisya para malaman ang tunay na dahilan ng pagkalunod ng biktima.

 

Please follow and like us:
Read More

P100-K MEDICAL ASSISTANCE SA MARIKINA RESIDENTS

(NI KEVIN COLLANTES)

MAGANDANG balita para sa mga residente ng Marikina City dahil inianunsiyo na ni Mayor Marcelino ‘Marcy’ Teodoro na handa silang magkaloob ng maximum na P100,000 medical assistance sa bawat residente nito na mangangailangan ng tulong.

Ayon kay Teodoro, naaawa siya sa mga taong nangangailangan kaya’t nagpasyang lakihan ang ibibigay na tulong para sa medical assistance na kakailanganin ng mga ito.

“Naawa ako sa mga taong nangangailangan. If sa ibang LGU mababa ang binibigay nila, dito sa Marikina ay hindi ganoon. Hanggang sa P100, 000 ang tulong na pinapaabot namin sa mga ngangailangan na residente,” anang alkalde.

Sinabi ng alkalde na sakaling hindi makababayad ng kanilang hospital bills ay kinakailangan lamang ng mga residente na magtungo sa kanyang tanggapan tuwing Lunes at humingi ng tulong.

May mga tao aniya silang magtutungo sa mga pagamutan at siyang magse-settle ng mga hospital bills ng mga residente na walang kakayahang magbayad para sa kanilang hospitalisasyon.

“We send people to accompany residents seeking medical help. The Marikina LGU is committed to help our residents who are incapable paying for hospitalization and medicines,” ayon kay Teodoro.

Kaugnay nito, maging ang mga health benefits para sa mga residente ng Marikina, partikular na ng mga senior citizens, ay daragdagan pa aniya nila, kagaya ng isinasagawa sa Makati City government.

“We are now coordinating with the local government of Makati City to imitate their health care system,” aniya.

Sa sandali umanong magaya na ng Marikina City ang Health Plus Program (MHP) o Yellow Card ng Makati City, ang mga residente ng lungsod at kanilang mga rehistradong dependents ay magiging entitled na sa libreng outpatient consultation at mabibigyan ng subsidiya sa hospitalisasyon at diagnostic tests.

Maaari rin umano silang mai-refer sa mga partner-facilities upang makapag-avail ng specialized medical at diagnostic services, gamit lamang ang kanilang Yellow Card.

Mabibigyan na rin ang mga residente ng libreng gamot, kabilang ang maintenance medicines para sa hypertension, diabetes at iba pang lifestyle diseases, na ipapamahagi sa pamamagitan ng walong pharmacy outlets sa mga strategic locations sa lungsod.

Nabatid na sa kasalukuyan ay mayroong 50,000 senior citizens sa Marikina na inaasahang makikinabang sa naturang programa.

Ayon kay Teodoro, ang pangangalaga sa kalusugan ng mga residente ang isa sa kanyang pangunahing prayoridad, at tiniyak na gagawin ng kanyang administrasyon ang kanilang makakaya upang mapagkalooban ang mga ito ng de kalidad at accessible health care.

“The commitment of Marikina City is to provide accessible and quality health care services for all,” anang alkalde.

Please follow and like us:
Read More

MESSAGE SA FB BINULATLAT; GF BUGBOG SA SELOSONG BF

huli

(NI MAC CABREROS)

KALABOSO ang isang binatang estudyante na nambugbog sa kanyang 16-anyos na kasintahan sa Marikina City.

Desidido ang pamilya ng biktimang sinadyang itinago sa pangalang ‘Dmet’ na sampahan ng kaso laban kay Kyle Gabriel Coronado,18.

Sa imbestigasyon ng pulisya, pinuntahan ng lalaki ang bahay ng kasintahan sa Tuazon Ville, Brgy. Tanong, ng nasabing lungsod alas-10:00 ng umaga ng Martes at kinompronta hinggil sa mga mensaheng nababasa sa messenger account.

Nagkaroon ng mainit na pagtatalo ang dalawa hanggang sa hilahin ng lalaki,  na noo’y sinukluban ng matinding galit, ang kamay ng babae saka ibinalandra sa dingding kung saan nagtamo ng pinsala sa katawan ng huli.

Agad na humingi ng tulong  sa awtoridad ang tiyahin ng biktima kung saan agarang rumesponde at naaresto ang suspek.

Paglabag sa Republic Act 7610 o Anti-Child Abuse, Exploitation and Discrimination ang isasampa laban sa akusado.

 

Please follow and like us:
Read More

MAG-UTOL ARESTADO SA RAPE

arrested12

(NI KEVIN COLLANTES)

KAPWA naghihimas na ng rehas na bakal ang dalawang lalaking magkapatid na kapwa arestado dahil sa pagiging wanted sa kasong panggagahasa sa magkahiwalay na lugar sa Marikina City at Mandaluyong City, nitong Sabado. Batay sa ulat ng Marikina City Police, nabatid na magkasunod na naaresto ang mga suspek na nakilalang sina Ronnie Ric Paz, 27, parking boy at Ricky Ryan Paz, 38, sa kani-kanilang tahanan.

Lumilitaw na dakong alas-12:50 ng hapon nang unang maaresto  ng mga tauhan ng Intelligence Branch si Ronnie Ric sa Saint Mary Street, Provident Village, Barangay Tañong, Marikina City habang dakong ala-1:30 naman ng hapon nang maaresto si Ricky Ryan sa Piling Santos Street, Doña Petra, sa Barangay Tumana, Mandaluyong City.

Dinakip ang mga ito sa bisa ng warrant of arrest na inisyu ni Hon. Edwin Valdez, Presiding Judge ng Family Court Branch 7 dahil sa kasong rape, ngunit habang isinusulat ang balitang ito ay hindi pa nakapagbibigay ng anumang detalye hinggil sa kaso ang mga awtoridad.

Si Ronnie Ric ay itinuturing na No. 1 most wanted person habang si Ricky Ryan naman ay itinuturing na No. 2 most wanted person ng Marikina City Police dahil sa naturang kaso na kinakaharap nila.

Kapwa detenido na ang dalawa habang hinihintay pa ang commitment order sa kanila ng hukuman.

 

Please follow and like us:
Read More