SAPATOS NI SION (2)

MARIKINA SHOES-5

Dumaan sa pagsubok, nanatiling matatag

(Ni Mac Cabreros)

BAGO isalang sa pagawaan, nagkakaroon ng elastic test ang mga sapatos na gawa sa Marikina kung kaya’t subok sa tibay ito. Sa madaling salita, pangmatagalan ang mga sapatos na gawa sa lungsod ng Marikina.

Bagaman dumaan ang bentahan nito sa malamlam na panahon tulad noong matapos ang EDSA Revolution, hindi pa rin nasiraan ng loob ang mga negosyanteng ang puso ay nakalaan na sa paggawa at pagbebenta ng sapatod.

Dumaan din ang Marikina sa mabigat na sakuna, ang paglubog ng lungsod dahil sa bagyong Ondoy kung saan ang karamihan sa mga pagawaan ay nasira ng baha at putik.

Ayon kay Neil Nepomu­ceno, vice president ng ­Philippine Footwear Federation, kung dati ay nasa 5,000 ang shoemaker ay bumagsak ito sa 150.

“Pero hindi kami nawalan ng pag-asa. Ginamit namin itong kahinaan upang kami ay magbubuklod-buklod at nagkaisang ibangon ang industriya ng pagsasapatos,” pahayag Mr. Nepomuceno.

“Dahil nagsama-sama ang aming lakas, unti-unti naming napabalik ang sigla ng pagsasapatos,” dugtong Mr. Nepomuceno.

Nagpasalamat ang grupo sa pamunuan ni Mayor Teodoro dahil sa ayuda at suportang ipinagkaloob sa industriya.

Ikinatuwa naman ng alkalde na kung dati ay kani-kaniya, ngayon ay ‘colloborative’ at nagtutulungan na ang mga manggagawa ng sapatos.

Nabatid na mayroon ngayong 54 manufacturers sa Marikina at libu-libo na ang manggagawa dito.

Para lalong mapalawak at mapalaki ang industriya, naglaan ang Pamahalaang Lungsod ng P60 milyon pondo sa itatayong paaralan para maituro ang pagdisensyo at paggawa ng matibay, de kalidad at maipagmamalaking sapatos.

“Ating pinagtutuunan ang quality at unique design para makasabay sa produkto ng ibang bansa  na bumabaha sa ating bansa na dulot ng binuksang kalakalan o merkado alinsunod sa pinasok sa kasunduan sa mga bansa sa Southeast Asia,” wika Mayor Teodoro.

Binanggit din Alkalde na magtatayo sila ng one stop shop o hub para sa ating kababayan na gustong pumasok sa shoe industry.

Nabatid na kasaluku­yang itinuturo sa Pamantasan ng Lung­sod ng Marikina (PLMAR) bilang bahagi ng Senior High School ang pagdisenyo at paggawa ng sapatos at iba pang produkto.

“We need to produce skilled workers – a new ­generation of shoemakers –to ensure continuation [of the shoe industry],” wika Teodoro.

Aniya, matutunan ng mga estudyante sa ilalim ng Kto12 program ang art at science o craftsmanship ng shoe industry.

Ipinabatid nito na kasalukuyang itinuturo bilang tech-voc course ang paggawa ng sapatos sa San Roque National High School at Marikina High School.

Nagsimula ang shoe industry noong 1887 dahil sa malikhaing kamay ni Don Laureano “Kapitan Moy” Guevarra.

Mula sa simpleng disensyo, unti-unti itong nagkaroon ng bagong hugis at kulay. Ngayon, maari nang magpa-costumize o magpagawa ng nais o gustong hugis, kulay, haba at laki, disenyo o porma at kung anong uri ng materyal na gagamitin.

Masidhi ang hangarin ng Pamahalaang Lungsod at shoepreneurs na itaas ang antas ng industriya.

Taun-taon ay itinataguyod ang Shoe Festival kung saan ipinaparada ang produkto ng Marikina. Dinadala at ­ibinebenta sa mga karatig lugar. Tampok din dito ang ‘Stilleto Race’ kung saan kailangang magsuot ng sapatos na mataas ang takong ang kasali sa takbuhan.

Mga kababayan, sali ba kayo sa takbuhan? Tara sa Marikina!

Please follow and like us:
Read More