TUBIG O LASON?

(NI KEVIN COLLANTES)

INAALAM pa ng awtoridad ang dahilan ng pagkamatay ng isang ginang na uminom lamang ng tubig sa kanyang tahanan sa Barangay Tumana, Marikina City, nitong Huwebes ng gabi.

Batay sa ulat ng Marikina City Police, ang biktimang si Rosalyn Castillo, 47, residente ng Block 48, Vergara Street, Barangay Tumana, ay binawian ng buhay matapos uminom ng tubig sa dakong alas-10:55 ng gabi.

Sa salaysay sa pulisya ni Rolando Castillo, 53, asawa ng biktima, bago ang insidente ay naghapunan umano ang kanilang pamilya sa tahanan ng kanilang anak na si Danisa Castillo sa Block 25, Singkamas Street, Barangay Tumana.

Pagsapit ng 10:30 ng gabi ay umuwi na umano ang ginang sa kanilang tahanan at pagdating ay kaagad na uminom ng isang basong tubig.

Nang makainom ay dito na umano biglang nagsuka ang biktima at bumula ang bibig, na tila nalason.

Kaagad namang humingi ng tulong si Rolando sa mga kapitbahay at tumawag sa Rescue 161 upang maisugod sa pagamutan ang biktima, ngunit patay na ito.

Nakatakda namang isailalim ang biktima sa awtopsiya upang matukoy ang posibleng dahilan ng pagkamatay nito.

Please follow and like us:
Read More

P400-K CASH, CREDIT CARDS, TINANGAY NG ‘BASAG-KOTSE’ 

crime robber12

(NI NICK ECHEVARRIA)

NILIMAS ng mga hindi pa nakikilalang miyembro ng “Basag Kotse” ang P400,000 na cash, credit cards at ATM cards mula sa isang  puting Toyota Fortuner (VAN 99) sa Marikina City, na pag-aari ng isang negosyante.

Nabatid na bandang alas-8:00 ng gabi nitong Biyernes nang iparada ng negosyanteng si Tony Pangan, 39, ang kanyang kulay puting Toyota Fortuner (VAN 99) sa harap ng Alchemy sa kahabaan ng Lilac St., Brgy. Concepcion Dos, Marikina City, para magkasiyahan kasama ang kanyang mga kaibigan.

Bandang ala-1:00 na ng madaling araw nitong Sabado nang madiskubre ng biktima ang insidente nang bumalik ito sa kanyang sasakyan matapos ang limang oras na kasayahan.

Nagulat na lamang ang negosyante nang makitang basag na ang kaliwang bahagi ng bintana sa likuran at nawawala na ang kanyang sling bag na naglalaman ng P400,000 cash, mga credit cards, ATM Cards, lisensya at mga identification cards.

Patuloy na iniimbestigahan ng pulisya ang insidente.

 

Please follow and like us:
Read More

13 PASAHERO SUGATAN SA NAGCOUNTER-FLOW NA JEEP

accident135

(NI MAC CABREROS)

LABINGTATLONG pasahero ang nasugatan nang bumangga ang sinasakyang jeep na minamaneho ng kaskaserong driver na nagcounter-flow pa sa Marikina City, gabi ng Miyerkoles.

Inihahanda na ang kasong reckless imprudence resulting to multiple injuries laban kay Wawi Gerbacio, 21, driver, na tumakas matapos ang insidente.

Sa imbestigasyon ng awtoridad, naganap ang insidente sa Brgy. Parang, Marikina City alas- 11:15 ng gabi.

Mabilis ang takbo at tinatahak ng Isuzu passenger jeep na may plakang TWG 497 ang BG Molina Street patungong Silangan nang lumipat sa ibang linya saka magcounter-flow.

Dahil babangga sa isa pang sasakyan, kinabig pakanan ng driver ang manibela upang umiwas sa head-on collision na nagresulta upang dumiretso ang sasakyan at bumangga sa bakod ng bahay sa nasabing lugar.

Dahil sa bilis ng momentum at malakas na impact, naalog ang mga pasahero kung saan nahilo at nagtamo ng pinsala sa katawan ang mga ito.

Nagsasagawa ng follow-up operation ang awtoridad upang maaresto ang driver at mapanagot sa nilabag nitong batas.

 

Please follow and like us:
Read More

KASKASERONG DRIVER SUMEMPLANG SA PUNO

accident12

(NI MAC CABREROS)

NASAWI ang isang lalaki nang sumemplang ang kanyang motorsiklo na mabilis ang takbo sa Marikina City. Hindi na umabot nang buhay sa ospital si Lloyd Somido, 29, tricycle driver, sanhi ng matinding pinsala sa katawan lalo sa ulo.

Sa imbestigasyon, binabagtas ni Somido sakay ng Suzuki FU150 motorsiklo nito sa BG Molina St., alas-4:30 umaga ng Martes nang mawalan ng kontrol sa manibela at
mahagip ang isang puno.

Bunsod ng mabilis na takbo, malakas na pagkabangga na nagresulta upang matumba ang sasakyan at magtamo ng matinding pinsala sa katawan at ulo si Somido na siyang ikinasawi nito pagdating sa ospital.

Samantala, naaresto ng awtoridad si Eleinol Ocania, 22, habang pinaghahanap ang kasabwat nitong menor de edad nang tangayin ang motorsiklo ni Joseph Vales, 27, alas-10:45 ng umaga ng Martes sa No. 2 Bougainvilla St., Brgy. Malanday, Marikina City.

Please follow and like us:
Read More

BF SINAKSAK NG UTOL NG GF

stab

(NI MAC CABREROS)

HINDI sukat inakala ng isang lalaki na ang pagsundo nito sa bahay ng girlfriend ang maglalagay sa kanya sa kritikal na kondisyon nang saksakin ng kapatid na lalaki ng kanyang syota sa Marikina City.

Matamang binabantayan ang kalagayan sa Amang Rodriguez Memorial Medical Center sanhi ng tama ng patalim sa likod si Julius Lovendico, 24, gas attendant, habang nakakulong ang suspek na si Jayson Gonzales, 29, residente ng Angel Santos St., Brgy. Tumana ng nasabing lungsod.

Sa imbestigasyon ng pulisya, sinundo ni Lovendicio ang kanyang girlfriend sa bahay nito para sa isang date alas-5:00 ng hapon ng Sabado.

Sa hindi pa malamang kadahilanan ay nagkaroon ng mainitang pagtatalo ang
biktima at suspek hanggang sa kumuha ng kutsilyo ang suspek at sinaksak sa likod ang biktima.

Agad namang naaresto ng nagrespondeng awtoridad ang suspek  at nakatakdang sampahan ng kaso.

Samantala,  nakaratay din sa ARMMC si Malbert Baguio, 21, construction worker, nang saksakin ng nakainumang sina Joel Aquino Jr., 20 at Gerald Aquino, 24, na pinaghahanap ngayon ng mga awtoridad.

Ayon sa pulisya, nag-inuman ang biktima at dalawang suspek alas-8:00 ng gabi nitong Sabado sa Lot 11 Block 73 Katipunan St., Brgy. Concepcion Dos nang saksakin ni Aquino ang biktima. Nagtamo ng saksak sa dibdib ang biktima at inoobserbahan sa pagamutan.

Please follow and like us:
Read More

BABAENG BAKWIT NG MARAWI, 1 PA, HULI SA SHABU

arrested12

(NI MAC CABREROS)

ARESTADO ang dalawa katao dahil sa pagtutulak ng iligal na droga na nagkakahalaga ng P80,000, Lunes ng gabi sa Marikina City.

Sa ulat ni Col. Redrico Maranan, hepe ng Marikina City Police kay Eastern Police District Office director, BGen. Christopher Tambungan, nakilala ang mga naarestong sina Idawiya Mithonong, alyas Ipah, 30, may-asawa, tubong Marawi at Saad Dida Agun, alyas Gerry, 29, tubong Cagayan de Oro, at kapwa residente ng Brgy. Tumana, Marikina City.

Sa ulat, nakatanggap ng impormasyon ang awtoridad na may nagaganap na bentahan ng shabu sa Singkamas St., Brgy. Tumana, alas-10:30 ng gabi.

Agad nagsagawa ng operasyon ang Anti-Drug Enforcement Unit,  sa pamumuno ni Lt. Elmer Rigonan, at naaresto ang dalawang suspek.

Idinahilan ng dalawa na kahirapan sa buhay matapos silang lumikas sa Marawi City nang magkaroon ng digmaan sa pagitan ng puwersang militar ng gobyerno at teroristang Maute kaya sila
napilitang magtulak ng shabu.

Ang dalawang suspek ay nahaharap sa kasong paglabag sa RA 9165 o Comprehensive Dangerous Drugs Act.

Please follow and like us:
Read More

2 KARNAPER ARESTADO SA ENTRAPMENT

arrested12

(NI KEVIN COLLANTES)

KALABOSO ang dalawang lalaking umano’y karnaper nang maaktuhang nagbebenta ng nakaw na motorsiklo, sa isang entrapment operation sa Marikina Heights, Marikina City.

Ang mga suspek na sina Jayson Enotacio, 30, construction worker, ng Barangay Cupang, Antipolo City at Ralph Alvin dela Cruz, 29, sales assistant, ng Barangay Marikina Heights, ay kapwa nakapiit sa Marikina City Police at sasampahan ng mga kasong paglabag sa Presidential Decree 1612 (Anti Fencing Law) in relation to Anti-Carnapping Law, paglabag sa Republic Act 9165 o The Comprehensive Dangerous Drugs Act of 2002,  at Batas Pambansa 6 (illegal possession of bladed weapon), in relation to Omnibus Election Code, sa piskalya.

Sa ulat na nakarating sa tanggapan ni Eastern Police District (EPD) Director P/BGen. Christopher Tambungan, nabatid na dakong alas-5:15 ng hapon nitong Huwebes, nang maaresto ang mga suspek ng mga tauhan ng Anti-Carnapping Unit at Intelligence Branch ng Marikina City Police Station, sa isang entrapment operation sa Champagne Street, Marikina Heights.

Nauna rito, nakatanggap ng confidential information ang mga operatiba ng Intelligence Branch dakong alas-2:30 ng hapon, na may dalawang lalaki ang nagbebenta umano ng nakaw na motorsiklo sa lugar, sa halagang P10,000.

Nang beripikahin, nadiskubre ng mga awtoridad na ang naturang motorsiklo ay posibleng ang nawawalang motorsiklo ni Nilda Tribaco, 57, negosyante, ng Barangay Cupang, Antipolo City, na iniulat na nawala dakong alas-8:00 ng umaga noong Abril 24.

Ipinarada lamang umano ni Tribaco ang kanyang Honda TMX 125 motorcycle sa parking area ng isang gasolinahan sa 224 Sumulong Highway, sa Barangay Mayamot, nang mawala ito.

Kaagad namang nagkasa ng entrapment operation ang mga awtoridad at isang pulis ang nakipag-transaksiyon kay Enotacio, para bilhin ang motorsiklo.

Nagkasundo ang mga pulis at mga suspek na magkita sa naturang lugar para sa transaksiyon, at nang makumpirma na ang ipinagbibiling motorsiklo ay ninakaw mula kay Tribaco ay kaagad nang dinakma ng mga pulis ang mga suspek.

Nadagdagan naman ang mga kasong isinampa ng mga awtoridad laban sa mga suspek, nang makumpiskahan si Enotacio ng isang pakete ng shabu, habang si dela Cruz naman ay nakuhanan ng isang balisong.

 

 

 

Please follow and like us:
Read More

BATA TINANGKANG KIDNAPIN SA B-DAY PARTY

kidnap12

(NI NICK ECHEVARRIA)

ARESTADO ang isang babae sa tangkang pagdukot sa isang bata sa kasagsagan ng birthday party sa Marikina City, Biyernes ng gabi.

Sa report na nakarating sa tanggapan ni Marikina City Police Chief P/Col. Redrico  Maranan, naganap ang tangkang pangingidnap bandang alas-8:00 sa  harap ng No. 28 Dama de Noche St., Olandes, Brgy. IVC ng nabanggit na lungsod.

Nabatid sa paunang imbestigasyon ng pulisya na napadaan umano ang suspek sa harap ng bahay kung saan may nagaganap na birthday party.

Nasa gate noon ang bata na agad nilapitan ng suspect sabay puwersahang tinangay.

Tiyempo naman na naroon din sa nasabing lugar ang nakasaksi sa pangyayari na agad kinompronta ang suspek kung ano ang ginagawa nito sa bata.

Dahil sa pagkompronta ng saksi sa suspek, napilitan itong ibaba ang kargang bata at mabilis na umalis sa lugar.

Nagmamadali naman na sinabihan ng nakasaksi ang nanay ng bata  na kaagad  nagsumbong at humingi ng tulong sa pulisya.

Naging maagap naman ang pagtugon ng mga tauhan ng Police Community Precinct 2 sa pamumuno ni  PCapt. Mauro Guerrero sa sumbong ng nagrereklamong nanay ng batang biktima na nagresulta sa pagkakadakip sa suspek.

Nakakulong na ngayon ang naarestong suspek sa Marikina detention cell at nahaharap sa kasong Attempted Abduction in relation to RA 7610 o Anti-Child Abuse Law.

 

Please follow and like us:
Read More

LALAKI NAGSAKSAK SA SARILI MATAPOS SAKSAKIN ANG PARTNER

crime08

(NI KEVIN COLLANTES)

TINARAKAN muna ng isang mister ng dalawang ulit ang kanyang live-in partner bago pinagsasaksak ang sarili, sa kainitan ng kanilang pag-aaway sa Barangay Tumana, Marikina City, Sabado ng gabi.

Bigo naman ang mga doktor ng Amang Rodriguez Medical Center na isalba pa ang buhay ni Rogelio Bulalaque, 40, habang sugatan naman at under observation pa sa Quirino Memorial Medical ang kanyang live-in partner na si Christine Servidad, 39.

Batay sa ulat ng Marikina City Police, sa tanggapan ng Eastern Police District (EPD), nabatid na dakong 10:00 ng gabi nang maganap ang krimen sa loob mismo ng tahanan ng mag-live in partner sa Block 5, Singkamas Street, sa Barangay Tumana.

Nabatid na bago ang krimen ay lasing na umuwi ang suspek at sa di pa malamang dahilan ay nagkaroon sila ng mainitang argumento ng kanyang kinakasama.

Sa kainitan ng argumento, bigla na lang nagtungo sa kusina ang suspek at kumuha ng kutsilyo.

Kaagad na tinarakan ng suspek ng dalawang ulit ang biktima sa katawan.

Nang inakalang napuruhan ang kinakasama, pinagsasaksak rin ng suspek ang kanyang sarili.

Isinugod ng ilang kaanak sa Amang Rodriguez Medical Center ang biktima ngunit binawian na rin ng buhay ang suspek dakong 3:13 ng madaling araw habang inilipat naman ang biktima sa Quirino Memorial Medical Center upang doon lapatan ng lunas.

Please follow and like us:
Read More

AMOK: 1 PATAY; LIVE-IN PARTNER, 3 KAANAK SUGATAN

stab20

(NI KEVIN COLLANTES)

ISANG vendor ang arestado matapos na mag-amok at pagsasaksakin ang kanyang live-in partner at tatlong kaanak nito, sa loob mismo ng kanilang tahanan sa Barangay Malanday, Marikina  City, Miyerkoles ng umaga.

Patay ang isa sa mga biktima na si Alvin Siasat, 53; habang sugatan naman ang kanyang mga kaanak na sina Edwin Carlos, 58; Merlina Carlos, 55; at Arianne Kimberly Carlos, 30.

Samantala, naaresto naman ng mga rumespondeng awtoridad ang suspek na si Peter Jovannie  de Leon, 31, live-in partner ni Arianne Kimberly.

Batay sa ulat ni Marikina City Police chief, P/Senior Supt. Roger Quesada, kay Eastern Police District (EPD) Director P/Chief Supt. Bernabe Balba, dakong 11:40 ng umaga nang maganap ang krimen sa loob ng tahanan ng mga biktima, sa #1 Lucia Street, Sta. Teresita Vil. Lamuan, sa Barangay Malanday.

Sa imbestigasyon, nabatid na bago ang krimen ay nagluluto ng tanghalian si Merlina sa kusina nang lapitan ng suspek at walang sabi-sabing binuhusan ng mainit na tubig na nasa kaserola.

Hindi pa nasiyahan, kumuha ng kutsilyo ang suspek at pinagsasaksak si Merlina.

Nakita naman nina Alvin, Edwin at Arianne Kimberly, ang insidente kaya’t tinangka nilang awatin ang suspek.

Sa halip namang magpaawat, sila naman ang binalingan nito at sunud-sunod ring inundayan ng saksak.

Kahit sugatan, nagawa ng mga biktima na lumabas ng bahay at nanghingi ng tulong sa kapitbahay.

Mabuti na lamang at papadaan sa lugar ang isang personnel ng City Veterinary office kaya’t kaagad na tumawag sa Marikina Rescue 161 at inireport ang pangyayari.

Rumesponde ang mga tauhan ng Police Community Precinct 4 (PCP 4) at Special Weapons and Tactics (SWAT) team ng Marikina City Police, na nagresulta sa pagkakaaresto ng suspek.

Isinugod sa pagamutan ang mga biktima, ngunit binawian din ng buhay si Alvin.

Narekober ng mga awtoridad sa crime scene ang isang kutsilyo, isang butcher knife at isang Swiss knife, na pinaniniwalaang siyang ginamit ng suspek sa krimen.

Si de Leon ay nakadetine sa Marikina City Police at sasampahan ng kasong murder at tatlong bilang ng kasong bigong pagpatay.

 

 

 

Please follow and like us:
Read More

MARUMING KUSINA: 1 KRITIKAL SA PALO 

crime

(NI NICK ECHEVARRIA)

NAUWI sa pamamalo ng 2×4 na kahoy na muntik nang ikamatay ng biktima ang mainit na pagtatalo ng dalawang magkapit-bahay  kaugnay sa marumi nilang kusina bandang alas-6:30 Linggo ng gabi sa Marikina City.

Naganap ang insidente sa Blk. 55 Pipino St., Bgy. Tumana ng nasabing lungsod na kapwa tinutuluyan ng biktimang si Michael Aviles, 53, at suspek na si Nepthale C. Omelda, 36, kung saan sila nagkaroon ng mainitang diskusyon sa kalinisan ng common kitchen na kanilang ginagamit pero naawat naman sila ng isa pa nilang kapitbahay.

Nabatid na nagbalik  ang suspek bitbit ang isang metrong 2×4 na kahoy  at pinuntahan ang biktima sa tinutuluyan nitong kwarto at saka walang tanong-tanong na hinataw sa ulo ang nakaalitang kapitbahay sa harap ng pitong taong gulang na babaeng  anak nito na naging sanhi ng pagkawala ng ulirat.

Matapos ang insidente ng pamamalo mabilis namang tumakas ang biktima. Isinugod ang biktima sa Amang Rodriguez Medical Center at patuloy na inoobserbaha.

Nahaharap sa kasong frustrated murder ang tumakas na suspek na pinaghahanap ngayon ng pulisya.

Please follow and like us:
Read More

MAG-INA TULAK NG DROGA

duo

(NI DEREK LIPANA)

NABISTO ang isang mag-ina sa pagtutulak ng droga matapos madakip ng pulisya sa isang buy-bust operation sa Marikina City Biyernes ng gabi ang isang lalaking suspek na kanilang kasabwat.

Nakilala ang mag-ina na sina Beverly Bon y Bejerano, 46-anyos at Michael Ordones y Bon, 19, na dawit sa pagbebenta ng shabu ng naarestong suspek na si Mohammar Ganda y Gandaros, alyas Raizen, 25, na pawang mga residente ng Barangay Tumana sa nabanggit na lungsod.

Dinakip ang tatlong suspek sa Blk 24, Singkamas St., Bgy. Tumana, ganap na alas-9: 15 ng gabi matapos pagbentahan ng shabu ni alyas Raizen  ang isang pulis na nagpanggap na poseur buyer.

Nang iabot ng suspek ang binibiling item sa kanyang ka-transaksyon na isang undercover , agad itong inaresto ng mga tauhan ng Marikina Drug Enfocerment Unit na pinamumunuan ni P/Insp. Greco Gonzales kasama ang mag-inang sina Beverly at Micahel.

Nakumpiska sa mga suspek na ngayon ay nakakulong sa Marikina Police Station ang walong sachet ng hinihinalang shabu at P500 na ginamit bilang buy-bust money.

Please follow and like us:
Read More

MGA DALIRI LAPNOS SA KWITIS

kwitis

LAPNOS ang daliri ng isang binata matapos maputukan ng kwitis sa Marikina City, Huwebes ng madaling araw.

Isa na ang 18-anyos na binata sa listahan ng Department of Health sa mga biktima ng paputok ngayong taon.

Isinugod ang lalaki sa Amang Rodriguez Memorial Medical Center. Sya rin ang kauna-unahang naitala ng ospital na biktima ng paputok.

Ayon kay Dr. Federico Miguel Tagarda, chief resident ng Department of Surgery ng ospital, agad na nag-spark ang kwitis na sinindihan ng binata dahilan upang siya ay magtamo ng paso sa kanyang mga daliri.

Isa ang kwitis sa mga ipinagbabawal na paputok sa Marikina City.

Please follow and like us:
Read More