BEERMEN, KATROPA UNAHAN SA GAME 5: ‘TOSS COIN’

(NI ANN ENCARNACION/PHOTO BY MJ ROMERO)

“BACK to square one” ang TNT Katropa at San Miguel Beer matapos magtabla, 2-2, kaya’t inaasahang  mas magiging mahigpit ang sagupaan ng dalawang team sa krusyal na Game 5 ng 2019 PBA Commissioner’s Cup best-of-seven finals Miyerkoles sa Araneta Coliseum.

Mag-uunahan ang Katropa at Beermen na masungkit ang ikatlong panalo para magkaroon ng bentahe at makalapit sa Commissioner’s Cup crown sa alas-7:00 ng gabi.

Nagawang maitabla ng Beermen ang serye Linggo ng gabi matapos maisahan ang Katropa, 106-101.

Muling ipinamalas ni San Miguel big man June Mar Fajardo kung bakit siya ang natatanging five-time league MVP nang akayin sa panalo ang Beermen sa Game 4 at maitabla ang serye. Nagposte si Fajardo ng 22 points at seven rebounds sa harap ng 13,578 manonood na biggest “so far” sa mid-season conference at “largest finals attendance without Barangay Ginebra” simula noong Game 7 ng 2016 Philippine Cup finals sa pagitan ng San Miguel at Alaska.

“Buti nakuha namin yung panalong ito. Mahirap kasing mabaon sa 1-3, so buti naitabla namin yung series,” sabi ng 6-foot-10 Fajardo matapos ang laro kung saan ginawaran ng Best Player of the Conference si Jayson Castro at Best Import of the Conference si Terrence Jones, kapwa ng TNT Katropa.

Binigyan keredito naman ni Fajardo ang kanyang teammates sa magandang inilaro niya. “Hinahanap ako ng mga teammates ko. Kahit nagmimintis ako, pero hinahanap pa rin nila ako. Binibigyan nila ako ng kumpiyansa, kaya kailangan suklian ko yung tiwala nila.”

Inaasahang sasandigan din ng Beermen ang kanilang import  na si Chris Mccolough na nagtala ng 27 puntos, 22 rebounds, apat na assists, isang steal at isang block at nagbigay ng krusyal na pasa kay Fajardo na nagselyo ng kanilang panalo.

“We just have to play harder and tougher on both offense and defense,” sabi naman ni Katropa coach Bong Ravena.

Umaasa rin si Ravena na mas magkakapagpokus sa kanyang game ang kanilang import na si Jones, na laging may nakakabanggang Beermen, ang pinakahuli ay si Arwind Santos na nakasigawan niya.

 

Please follow and like us:
Read More

GAME 3 KATROPA VS BEERMEN: UNAHAN MAKA-2

(NI ANN ENCARNACION/PHOTO BY MJ ROMERO)

INAASAHANG mas pisikal na laro ang magaganap sa pangatlong paghaharap ng TNT KaTropa at San Miguel Beer ngayong Biyernes matapos maitabla ng Beermen ang serye sa 2019 PBA Commissioner’s Cup.

Ganap na alas-7 ng gabi muling magsasagupa ang Katropa at Beermen na mag-uunahang makakuha ng bentahe sa Game 3 ng kanilang best-of-seven final series sa Araneta Coliseum.

Animo dumaan sa ‘butas ng karayom’ ang Beermen na kinailangan ang double overtime bago tinalo ang Katropa, 127-125, Miyerkoles para maidikit ang serye sa 1-1.

Sinamantala ng Beermen ang pagkakatalsik sa laro nina TNT import Terrence Jones at keyman Troy Rosario para maitakas ang panalo sa Game 2.

Napatalsik si Jones matapos ang ikalawang technical foul dahil sa pagbangga sa bantay niyang si Chris Ross ng Beermen sa first overtime.

Nasayang din ang mainit na laro ni Rosario nang matawagan ng ikaanim at huling foul sa rebound play kontra kay June Mar Fajardo sa natitirang 1:15 minuto ng laro.

Mula sa 17 puntos na pagkakaiwan ay nagawa ng Katropa, sa pangunguna ni Rosario na nagtala ng career-best 34 points sa kanyang 8-of-12 three point shooting, na makahabol. Ngunit dala ng experience ay nanaig sa huli ang SMB.

Inaasahang muling sasandigan ng Beerme si Chris McCullough na kumamada ng 32 puntos, 22 rebounds at pitong assists. Nagambag sina Romeo ng 29, 25 si Ross, 19 si Cabagnot at 12 points at 10 rebounds naman si Fajardo.

Nagtala naman si Jones ng kabuuang 28 puntos, 13 boards, pitong assists, limang steals at tatlong blocks bago napatalsik sa laro.

Please follow and like us:
Read More

‘STOP JONES AT ALL COST!’

(NI ANN ENCARNACION/PHOTO BY MJ ROMERO)

HINDI pa ‘panic mode’ ang San Miguel Beer lalo’t pangalawang game pa lang ngayon sa Commissioner’s Cup best-of-seven final series nila ng TNT Katropa, ngunit matindi ang hangarin ng Beermen na maitabla ang serye.

At upang magawa ito, kailangan ng SMB na madepensahan ng husto si Katropa import Terrence Jones, pinulutan ang Beermen sa Game 1 ng serye nang magposte ng almost perfect game 41 points, 12 rebounds, at walong assists sa 109-96 win ng team noong Linggo.

Ginawa naman ni San Miguel Beer coach Leo Austria at ng kanyang players ang assigment nila laban sa TNT, subalit sadyang hindi nila kinaya ang dating Houston Rockets player.

“The problem is they have Jones, and he really took over,” ayon kay Austria.

“Magaling talaga at ang dami niyang dala-dala sa team–puntos, pasa, depensa at rebounds,” pagamin ni SMB’s Arwind Santos.

Ngunit kaya naman umanong talunin ang Katropa basta’t mapigilan lang nila si Jones o ang local players ng TNT.

“Sa Game 1 maganda ang laro ni Jones, maganda pa laro ng locals,” ani Santos. “Kailangan hindi dapat ganun ang mangyari. Kung ma-off namin import, okay lang maganda laro ng local. Kung ma-off namin local, dapat ‘yung import, hindi na. Mamimili kami sa side na ‘yun.”

Ayon sa ilang basketball analysts, malaking paktor sa pagkatalo ng Beermen ang kawalan nila ng pahinga lalo’t isang araw lang ang pagitan ng huling semifinal game nila kontra sa Rain or Shine Elasto Painters at unang game sa final series nila ng Katropa.

Kaya naman ngayong nakapagpahinga na ang SMB, inaasahang mas handa na silang sagupain ang TNT, na sasandal pa rin kay Jones at local players na sina Jayson Castro, RR Pogoy, Troy Rosario at Don Trollano.

Please follow and like us:
Read More

COMMISSIONER’S CUP FINALS GAME 1: SIMULA NA NG GIYERA

(NI ANN ENCARNACION)

HINDI pa man nakapagpapahinga ay agad nang sasabak sa panibagong ‘digmaan’ ang San Miguel Beer kontra TNT Katropa sa pagsisimula ng kanilang best-of-seven Commissioner’s Cup championship series.

Ganap na 6:30 ng gabi sa Araneta Coliseum magsasagupa ang nagbabalik sa kampeonato makalipas ang dalawang taon na Katropa laban sa naghahangad na muling maka-grandslam na Beermen.

Nagawang ibulsa ng Beermen ang ikalawang silya sa kampeonato matapos nitong tuluyang takasan ang Rain Or Shine Elasto Painters, 98-95, sa Game 4 ng kanilang best-of-five semifinals Biyernes ng gabi.

Nauna rito ay sinipa naman ng KaTropa noong Huwebes ng gabi sa Game 4 din ang Barangay Ginebra, 103-92.

Gaya ng mga naunang games sa kanilang semifinal series ng ROS, naghabol na naman ang Beermen sa ikaapat na paghaharap nila bago nanalo sa E-Painters.

Inaasahang magiging kapanapanabik ang bakbakan ng TNT at SMB na parehong may dating NBA player na import sa katauhan nina Terrence Jones ng Katropa at Chris Mccollough ng Beermen.

Isa pang kaabang-abang sa finals matchup ng dalawang team ay si Terrence Romeo. May gusto ba siyang patunayan sa pakikipagsagupa sa dating ballclub na ipinamigay siya sa SMB?

“Wala sa akin yun. San Miguel vs TnT,” giit ni Romeo. “Wala, normal game. May the best team win.”

Matatandaan na si Romeo ang dating franchise player ng Katropa ngunit nagkaroon sila ng  “fall-out” kaya’t nagdesisyon ang koponan na i-trade siya sa Beermen kapalit nina Brian Heruela, David Semerad, at future first round pick (2020).

At mula sa pagiging bida sa TNT ay naging supporting role na lang si Romeo sa SMB. Sa kabila nito ay masaya ang 27-anyos na guard na sa wakas ay nakaranas mag-champion noong 2019 All Filipino Cup matapos ang anim na taong paglalaro sa PBA.

“Mahirap silang kalaban. Kailangan mag-focus kami, kailangang makagawa kami ng magandang game plan para sa kanila,” pag-amin ni Romeo. “Siyempre hindi magiging madali, lahat maganda yung nilalaro. Any given night puputok yung locals nila.”

Batid din nito na hindi sila maaaring magrelaks kontra sa Katropa kahit sa unang bahagi ng game, gaya nang nangyari sa serye nila ng Elasto Painters.

“Pag nalamangan kami ng TNT, hindi namin masasabi kung kaya namin ulit bumalik kasi sobrang organized ng TNT. Every possession nila, very organized sila.”

Ayon pa kay Romeo, “I’m sure hindi magiging madali ito kasi sobrang ganda ng nilalaro ng TNT. Kaya kailangan paghandaan namin sila.”

Please follow and like us:
Read More

 2019 COMMISSIONER’S CUP FINALS; KATROPA KONTRA BEERMEN 

(PHOTO BY MJ ROMERO)

HINDI na pinagtagal ng San Miguel Beer ang paghihintay ng una nang nakapasok sa Commissioner’s Cup finals na TNT Katropa matapos dispatsahin ang karibal na Rain or Shine, 98-95, sa Game 4 ng kanilang best-of-five semifinal series Biyernes ng gabi sa Araneta Coliseum.

Magsisimula sa Linggo ang una sa best-of-seven finals showdown ng Beermen at Katropa, na sinipa naman ang Barangay Ginebra noong Huwebes sa ikaapat na paghaharap nila.

Angat pa ng one point ang Elasto Painters ngunit naagaw ng Beermen ang kalamangan nang pumasok ang tres ni Chris McCullough na sinundan pa ng isang long 2-pointer ni Terrence Romeo, 98-94, less than two minutes sa game.

Isa ang naipasok ni Rey Nambatac sa dalawa niyang freethrows kaya’t naibaba ang lamang ng Beermen sa tatlo, 98-95.

May pagkakataon pang maka-tie ang E-Painters ngunit nabigo si James Yap na  maisakatuparan ang planong three-point shot kaya’t tuluyang naitakas ng Beermen ang panalo.

 

Please follow and like us:
Read More

MISIS ‘NILALANDI’; MISTER NAMARIL NG KA-TROPA

crime100

(NI SIGFRED ADSUARA)

SUGATAN ang dalawang kalalakihan nang pagbabarilin ng isang contractor dahil  “feeling” nilalandi nito ang kanyang kinakasama habang nag-iinuman sa Tanza, Cavite.

Ginagamot ngayon sa Divine Grace Medical Center ang biktimang sina Luciano Mijares , 52, may-asawa  at  Reynaldo Regalado,  31 binata, kapwa residente  ng Brgy. Santol, Tanza, Cavite, dahil sa tama ng bala sa tiyan.

Naaresto naman sa isinagawang follow-up operation ang suspek na si Antonio Onorio Jr, 41.

Sa ulat ni PSSgt Dennis Magsaysay, ng Tanza Municipal Police Station, kabilang sa inimbitahan ng suspek sa kanilang bahay sa birthday ng kanyang anak ang mga biktima kung saan nag-inuman dakong alas-9:30 Linggo ng gabi.

Sa kalagitnaan ng kanilang inuman ay napansin ng suspek na kinakausap ng dalawa ang kanyang misis na si  Alona at pakiramdam niya ay nilalandi pa ito ni Mijares.

Dahil dito,  kinompronta niya si Mijares at sa galit ay binaril nito sa tiyan bago isinunod na binaril si Regalado.

Matapos ang pamamaril ay tumakas ang suspek subalit naaresto sa isinagawang follow-up operation kung saan narekober sa kanya ang isang kalibre 9mm na pistola at bala.

Sa kabila nito, iniurong ng mga biktima ang kaso sa suspek dahil hindi naman umano sila napuruhan basta’t balikatin ng suspek ang gastusin sa ospital.

 

Please follow and like us:
Read More