BIKTIMA NG HAZING PAPANAGUTIN — REP. NOGRALES

Rep Fidel Nograles-3

NAIS ni Rizal 2nd District Rep. Fidel Nograles na maamyendahan ang umiiral na Anti-Hazing Law upang maparusahan na rin kahit ang mga biktima nito.

Ito ay dahil naniniwala ang kongresista na sa ganitong paraan ay matatapos na ang tinatawag na kultura ng impunity.

Ipinunto ni Nograles na maraming mga estudyante ang sumasali sa fraternity kahit alam nilang maaaring makaranas ng hazing.

“Umaasa tayo na sila’y mapipigilang sumali sa isang samahan na may kultura ng hazing kung may sapat silang kamalayan dito, gayundin, maaaring maparusahan ng batas,” pahayag ni Nograles.

Sinabi pa ni Nograles na pupuwede naman ding maging state witness ang biktima na nakaligtas sa lupit ng hazing.

“Kung may mga biktima tayo na handang proteksiyunan ng batas, mabigyan sila ng katiyakan laban sa posibleng paghihiganti, marahil sa susunod na hazing cases ay higit na magtatagumpay tayo kaysa mabigo,” ayon sa mambabatas.

Nakasaad sa isinusulong na batas ni Nograles na kailangang may mahanap na dalawang elemento sa biktima bago ikonsiderang kasabwat ng hazing.

Una, ang aplikante ay dapat nagkusang-loob at nagbigay pahintulot o pumayag na siya ay maging biktima ng hazing.

Pangalawa, ang biktima ay dapat na sadyang makipagtulungan sa aktwal na pagpapatupad ng hazing, nangangahulugan na ang ginawang hazing ay totoong nangyari at ang biktima ay kusang-loob na pinahintulutan ito na gawin sa kanya.

“Kung mawawakasan natin ang kultura ng impunity sa mga organisasyon na umaabuso sa kanilang hinihikayat na miyembro, dapat nating gawin na mas mahigpit ang anti-hazing law,” diin ni Nograles. “Gaya nga ng madalas sabihin, walang maaapi kung walang nagpapaapi,” dagdag pa ng kongresista.

Please follow and like us:
Read More

13 MIYEMBRO NG TAU GAMMA PHI, KINASUHAN SA SAN PABLO HAZING

(NI NILOU DEL CARMEN)

SINAMPAHAN ng kasong paglabag sa RA 8049  o  Anti Hazing Law ang 13 miyembro ng Tau Gamma Phi fraternity na umano ay sangkot sa hazing sa 18-anyos na si  Jonathan Concordia na estudyante ng Laguna State Polytechnic University (LSPU) sa San Pablo City.

Mismong ang mga kapamilya ng freshman na Criminology student ang nagsampa ng kaso sa City Prosecutor Office noong Miyerkoles, October 2.

Kabilang sa mga sinampahan sina Kier Martinez, umano’y leader ng grupo at ang mga miyembrong sina  Jholues Baldeo, Shairus Alegado, John Keith Pasco, Mark Anthony Grutas, Jay Averion, Justine Recto, Louel Jay Silang, Jincent Rose Diaz Sotero,Renze Valenzuela, Kyla Nicole Nepomuceno, Kevin Adrian Torrano at  Alfred Suarez.

Ayon kay PCol. Eliseo Bernales, hepe ng San Pablo City police, ang mga suspek ay pawang miyembro ng Tau Gamma Phi fraternity at lahat ay mga aktibong estudyante ng LSPU maliban sa leader na si Martinez na alumnus na ng paaralan.

Ayon pa kay Bernales, matibay na ebidensya ang palitan ng message ng grupo sa chat group sa messenger account ng biktima na nabuksan ng mga kapamilya.

Ang pamunuan ng paaralan ang mismong  nagbigay ng mga totoong pangalan ng mga sinampahan ng kaso.

Nakita umano dito ang pag-aalala at pagkatakot ng mga miyembro hinggil sa kinasapitan ng biktima matapos ang initiation rights.

Tutulong pa rin umano ang LSPU upang mahanap pa ang iba pang sangkot sa hazing kaya posibleng madagdagan pa ang kakasuhan.

Samantala ayon sa pamilya, nanatiling under observation pa rin sa ospital si Concordia matapos dapuan pa ng lagnat at idinadaing pa rin nito ang matinding pananakit ng ulo.

Hindi pa rin ito makausap ng normal at palaging sumisigaw kapag sinusumpong ng matinding sakit ng ulo.

 

Please follow and like us:
Read More

DAPAT MATULDUKAN NA ANG HAZING

BOMBAHAN NA FINAL

PAULIT-ULIT na lang ang nangyayaring pagpatay sa mga estudyante sa pamamagitan ng hazing.

Bakit hanggang ngayon ay hindi ito natutuldukan?

Panahon na para pabigatin ang parusa nito ng ating mga mambabatas.

Tulad kay Philippine Military Academy (PMA) cadet 4th class Darwin Dormitorio, lumalabas pala sa imbestigasyon ng Baguio City Police Office na nawalang combat boots lang ang dahilan kaya pinagmalupitan siya ng kapwa kadete.

Ibig sabihin, pinersonal siya ng kanyang mga kasamahan na idinaan sa pamamagitan ng hazing.

Kay Sanupao daw ang combat boots na nawala, siya ay upper class ni Dormitorio, ito ay ayon kay Police Col. Allen Rae Co ng Baguio City Police Office.

Sa ganun kaliit na bagay ay pinalaki nila at pinatay nila ang kawawang si Dormitorio?

Ganun ba kababaw at kakitid ang utak ng ating mga PMAyer?

Batu-bato sa langit ang tamaan, ‘wag po magagalit.

Mataas ang pagtingin ng taumbayan sa mga nagtapos sa PMA, pero kung paulit-ulit na nangyaya-ring may mamamatay na plebo. Dapat pa ba kayong hangaan?

Isa sa mga adhikain ng “Philippine Military Academy (PMA) ay “molding leaders of  our nation”.

Paano ka magiging mabuting pinuno ng bansa kung may poot sa iyong dibdib?

Estudyante ka pa lang ay may pinatay ka na.

Ang tao, kung ano nakasanayan niya ay paulit-ulit niya na itong gagawin kahit saan pa man siya mapunta.

Kung ang BOMBAHAN NA ang tatanungin, siguro panahon na para gumawa ng ‘special law’ para lang sa mga biktima ng hazing.

Hindi lang basta tulad ng mga ordinaryong kaso na isinasampa sa korte, mas pabigatin ang para sa mga suspek sa pagpatay at pagmaltrato sa kanilang kapwa estudyante sa pamamagitan ng hazing.

Ang ganitong klase kasing pagpapahirap ay pang-aabuso sa kanyang kasamahan na kapareho niyang estudyante.

Ang nangyayari tuloy pag naging upper class na ang pinahirapan gaganti rin siya sa magiging lower class niya.

Matagal nang nangyayari ang kalakarang ito sa PMA maging ang mga aktibo at retired generals ngayon ay naranasan din ito.

Masuwerte sila dahil nakaligtas sila, papaano kung ang nangyari kay Dormitorio ay nangyari rin sa kanila natural ‘di nila narating ang kanilang kinalalagyan ngayon.

May maasahan kaya ang taumbayan sa dating mga PMAyer na mga senador ngayon na maghain ng panukalang batas na magpaparusa nang mas mabigat laban sa mga gumagawa ng hazing na ikinamamatay ng biktima?

Ang hindi pa maganda riyan, ang mga nag-aaral sa PMA ay iskolar ng bayan tapos ganyan pa ang ginagawa nila sa kanilang kapwa estudyante.

Katatapos lang may namatay sa hazing sa Philippine National Police Academy (PNPA) sa Silang, Cavite kamakailan tapos ngayon nalipat naman sa PMA.

Hindi na natutuldukan, paulit-ulit na lang nangyayari kaya panahon na siguro para gumawa ng ‘special law’ ang mga mambabatas natin patungkol dito.

Hindi lang ang biktima ang nasisira ang kinabukasan, maging ang mga suspek dahil naparurusahan sila.

Kung hindi man gumawa ng ‘special law’ ay amyendahan ang batas na umiiral ngayon, mas pabigatin pa ang parusa.

Wala po tayong karapatan na kumitil ng buhay ng ating kapwa, kundi ang Panginoon lamang po. Amen.

oOo

Pasabugin ang katiwalian, magsumbong sa BOMBAHAN NA, mag-email joel2amongo@yahoo.com o mag-text sa cel# 0977-751-1840 (BOMBAHAN NA! / JOEL AMONGO)

Please follow and like us:
Read More