30th SEA GAMES: SIMULA NA NG TOTAL GUN BAN

guns

(NI JESSE KABEL)

SIMULA bukas (Nobyembre 20) ay mahigpit nang ipatutupad ng Philippine National Police ang total gun ban sa apat na rehiyon sa Luzon kaugnay sa seguridad na inilalatag para sa idaraos na 30th Southeast Asian Games.

Bahagi ng security blanket na inilatag ng PNP at maging ng Armed Forces of the Philippine ang pagpapairal  ng gun ban sa mga lugar na pagdarausan ng kada dalawang taon na biennial meet.

Ayon kay PNP spokesperson Brig. Gen. Bernard Banac, iiral ang total gun ban partikular sa Region 4A o CALABARZON areas, National Capital Region (NCR)  Region 1 (La Union) at Region 3 (Central Luzon).

Nabatid na magtatalaga rin ang AFP-Joint Task Force NCR ng sapat na puwersa para ayudahan ang may 27, 440 pulis na idedeploy ng PNP para sa  SEA Games security kasama na rito ang mga escort sa mga convoy ng mga delegado ng iba’t ibang mga bansa na kasali sa SEA Games.

Ang gun ban sa apat na rehiyon ay ipatutupad simula sa November 20 (Miyerkules) hanggang sa December 14 (Sabado).

Ang pormal opening ceremony ng 30th SEA Games ay gaganapin sa Philippine Arena sa Bocaue, Bulacan sa darating na Nobyembre 30, 2019 habang ang  closing ceremony ay gaganapin sa December 11.

Sa mga nakalipas na araw ay todo na ang mga aktibidad ng AFP at PNP bilang bahagi ng iba’t ibang uri ng paghahanda, kasama na rito ang send off ceremony sa mga pulis na itatalaga sa mga venues at mga magiging parte ng delegasyon sa biennial meet.

Please follow and like us:
Read More

TSERMAN NANUTOK NG BARIL SA PARTY, ARESTADO

ARRESTED-9

(NI NICK ECHEVARRIA)

ARESTADO ang isang barangay captain makaraang manutok ng baril sa isang birthday party sa Camarines Norte.

Nakilala ang suspek na si Arnel Bayani, 57, ng barangay Hinampacan, Basud ng naturang lalawigan, habang ang biktimang tinutukan ng baril ay si Melchor Felomino, 49, residente ng nasabing barangay.

Ayon sa report ng Basud Municipal Police Station (MPS), nairita umano ang nasabing kapitan ng barangay sa ingay ng  selebrasyon ng kaarawan ng nanay ng biktima matapos itong komprontahin na nagtulak sa suspek para bunutin ang kanyang 9mm snub nose na baril at saka itinutok sa mukha ni Felomino.

Agad namang nagresponde ang mga tauhan ng Basud MPS makaraang humingi ng tulong ang mga kaanak ng biktima na nagresulta sa pagkakadakip ng punong barangay.

Nahaharap ngayon ang barangay captain sa kasong grave threats at paglabag sa RA 10591 in relation to Omnibus Election Code.

 

Please follow and like us:
Read More

38 PULIS, 17 MILITAR, 9 CAFGU, HULI SA GUN BAN

gunban12

(NI NICK ECHEVARRIA)

MAHIGIT 4,700 inidibidwal ang nadakip ng pulisya simula nang ipatupad ang  Commission on Elections (Comelec) gun ban noong January 13.

Ayon kay Philippine National Police (PNP) spokesperson P/Col. Bernard Banac, hanggang nitong alas- 6 ng umaga ng Biyernes nasa 4,729 katao ang nahuli sa kabuuang 576,983 na mga police operations na kanilang inilunsad kaugnay sa gun ban.

Sa kabuuang bilang na ito 2,634 na mga suspek ang nasabat sa mga police patrol response, 977 naman mula sa mga isinilbing search warrants, at 723 naman ang nalambat sa kanilang “Oplan Bakal, Sita, Galugad” operations.

Kasama sa nabanggit na bilang ang 331 inidibidwal na nadakip sa mga checkpoints at 64 sa mga ipinatupad na warrants of arrest.

Sinabi pa ni Banac na 4,449 sa mga naaresto ay pawang mga sibilyan, 79 naman ang mga security guards, 75 ang mga government at elected officials, 38 ang mga police officers habang 17 naman ang military personnel, 12 ang mga law enforcers, 9 naman ang mga miyembro ng CAFGU, 4 mula Bureau of Jail Management and Penology at 9 na mga dayuhan.

Nakaaresto rin ang mga awtoridad ng 31 katao na kasapi ng mga “threat groups” at 8 mula sa mga private armed groups.

Idinagdag pa ni Banac na umaabot na sa 3,942 ang nakumpiskang iba’t ibang uri ng mga armas ng PNP samantalang 35,967 na mga deadly weapons naman kasama na rito ang mga granada at iba pang mga pampasabog, mga bladed/pointed weapons, mga bala at gun replicas.

Ang Comelec gun ban ay ipinatutupad kaugnay sa nalalapit na May 13 elections hanggang June 12.

 

Please follow and like us:
Read More

KAGAWAD HULI SA ‘KARGADA’ SA CHECKPOINT

sanpablolaguna12

(NI NILOU DEL CARMEN)

NADAKMA ng mga pulis sa Comelec checkpoint  ang isang barangay kagawad dahil sa pagdadala ng baril na walang gun ban exemption sa  San Pablo City, Laguna, bago maghatinggabi noong Sabado.

Kinilala ng San Pablo City police ang naaresto na si Anthony Manikad Cornista, 45, residente at Kagawad ng Barangay Sto. Anghel.

Batay sa report, pinara ng mga nagmamandong pulis sa checkpoint sa Brgy. VII-C ang suspek dahil sa pagmamaneho nito ng walang helmet at walang plakang motorsiklo.

Subalit habang kinukuha ng suspek ang driver’s license sa kanyang bag ay lumitaw mula sa loob ang puluhan ng isang baril na kalibre .45.

Wala naman itong  maipakitang kaukulang papeles para sa pagdadala ng armas.

Nasa kostudiya na ngayon ng San Pablo City police ang suspek at sasampahan ng kasong paglabag sa RA 10591 in relation to Omnibus Election Code (gun ban), Violation of RA 10054 at  RA 4136.

Please follow and like us:
Read More

20 LOCAL OFFICIALS ARESTADO NG CIDG SA BARIL

CIDG12

(NI JG TUMBADO)

NASA 23 lokal na opisyal ang arestado ng PNP-CIDG sa loob lamang ng isang linggong operasyon mula March 22 hanggang 28.

Kabilang sa mga naaresto si Mayor Romeo Vargas ng Tubajon, Dinagat Island at Vice Mayor Antonio Adlao ng Tagbina, Surigao del Sur.

Bukod sa kanila, arestado rin ang isang myembro ng Sangguniag Baranggay, siyam na barangay chair, 10 barangay councilor at isang general service officer.

Samantala, aabot naman sa 145 na sibilyan ang naaresto ng CIDG sa kaparehong petsa.
Mahaharap ang mga naaresto sa paglabag sa RA 10591 o Firearms law.

Sa kabila naman nito, patuloy ang paalala ng CIDG sa publiko na isuko ang kanilang mga armas lalo pa’t umiiral ngayon ang election gun ban.

Please follow and like us:
Read More