GENERIC DRUGS

generic drugs.jpg

Gaano kaligtas ang masang Filipino?

(Ni Nenet L. Villafania)

SA hirap ng buhay sa Pilipinas, bawal magkasakit. Mahal kasi ang bayad sa ospital, at kung hindi ka man maospital, mahal din ang gamot. Sa mga ka-batch ko noong college at high school, mabibilang mo sa daliri ang walang iniinom na maintenance medicine, at ang reklamo nila, libo-libong piso ang kanilang ginagastos para sa gamot, kaya napipilitan silang uminom ng herbal medicine o generic drugs. Pero gaano kaya ka-safe ang generic drugs? Pwede ba nitong palitan ang inireseta ng doktor?

Nag-interview tayo ng i­lang doktor upang sagutin ang mga katanungang ito: “Gaano nga ba ka-safe ang generic drugs para sa masang Filipino?”

Simon Peter Belvis, internist

Kung ang sinasabi mo ay generic drugs, generally spea­king, okay naman. Siguruhin lamang na hindi sila fake. Actually, nasa batas na natin na kapag nagreseta ng gamot ang doktor, dapat ay may generic name para makapili ang pasyente kung bibilhin ang branded o magse-settle na lang sa generics.

Rose Hina Loma, biyuda na may apat na apo

Lahat ng binibili naming gamot ay generics kahit pa ang vitamins ng mga baby. Sobrang mahal kasi nung inirereseta ng doktor. Lahat pa naman kami sa bahay, may maintenance drugs. Hindi lang naman gamot ang pinagkakagastusan sa bahay. Awa ng Diyos, okay naman kami. Hindi naman kami nalalason.

Rexie Maullon, public school teacher

Niresetahan kami ng duktor ng branded medicine pero may alam akong generic medicine na parehong pareho rin ang composition at mas mura, kaya iyon ang binili ko. Sabi ng doktor ko, dapat daw, kinunsulta ko muna siya, pero sabi ni Dr. (?), okay lang. Sino kaya ang tama sa kanilang dalawa?

Josie Javier, Pharmacy Assistant

Minsan, may nababasa akong reseta na may nakalagay na ‘No substitutes allowed’ pero bakit? Sabi naman ng pharmacist namin, okay lang ang gene­rics.

Lalaine Canete, neuro-surgeon sa USA

Sa USA, higit pa sa  85% ng mga prescription drugs ang generics. Yung ibang doktor nga, ni hindi alam kung ano ang mga branded medicine, liban na lang yung may advertisement sa TV dahil mas sanay kami sa generic names. Karamihan din sa pasyente sa US, generic version ang ginagamit sa halip na branded. Bakit, sa Pilipinas ba, problema pa yan?

Bal Carcillar, taxi driver

Taxi driver ako, hindi doktor, pero sa dami ng iniinom kong gamot – may sa diabetes, sa high blood, sa rayuma – kung pwede ang generics, sa generics ako.

Romeo Lucas, retired cardiologist

Kung murang gamot, at ang ibig mong sabihin ay generic, oo naman, kung papayag ang doktor mo. Pero kung nabili lang over-the-counter at walang reseta, HINDI! Basta kunsultahin mo ang iyong doktor para sigurado. Ako mismo, doktor na ako, kumukunsulta pa rin ako sa ibang doktor. Kelan lang, niresetahan ako ng doktor ko ng 400mg ng ibuprofen, ordinaryong gamot na mabibili kahit walang reseta. Bibili sana ako ng generics, pero sabi ng pharmacists, wala raw generics na 400mg. Kaya raw mas mura ang generics ay dahil 200mg lang ito. Nagulat naman ako. Pwede ngang generics, pero dalawang tablets naman ang iinumin ko. At bilang doktor, kahit pa retirado na ako, alam kong ang absorbtion rate ng dalawang tableta at isang tableta ay magkaiba. Kaya nga, dapat, kumunsulta muna sa doktor para sigurado.

Asuncion Lucas, pediatrician

Basically yes! Safe ang generic drugs. Ang ilang percentage ng ibinigay na dosage ng gamot na nakakarating sa  drug na nakararating sa systemic circulation ay depende sa maraming bagay, kasama na ang absorption at metabolism. Ang tawag doon ay bioavailability. Generally, ang dalawang brand ng parehong gamot ay bioequi­valent, kung may pareho silang bioavailability. Pero may exceptions. May mga gamot na hindi pwedeng bigyan ng substitute kaya hindi pwede ang generics, enless rekomendado ng doktor. Maiiba kasi ang epekto.

Liza Limpin, Pharmacist

Okay naman ang gene­rics kung ordinaryong gamot lamang, pero kung ako ang tatanungin, hindi dapat pinapalitan ang mga inirereseta sa mga psychiatric patients. Bawat gamot kasi, may kani-kanyang epekto. Hindi pwedeng papalit-palit ng gamot sa mga may sakit sa utak. Quality kasi ang pinag-uusapan kung branded o generics ang gamot. Ilang pharma brands ang talagang maganda ang kalidad, kahit pa may mas murang pagpipilian na pwede na rin naman. Isa pa, maraming kumakalat na fake cheap brands na nabibili sa ilang maliliit na botika. Akala natin branded, fake pala.

Sa kasalukuyan, nag-uusap na ang mga opisyal ng Pilipinas at India upang pagkasunduan ang pag-angkat ng Pilipinas sa kanila ng murang gamot.

May posibilidad raw na magtayo ng Indian pharmaceutical firms sa Pilipinas – na makabubiti sa bansa dahil bukod sa magkakaroon ng murang gamot ay mabibigyan pa ng trabaho ang ilang Filipino. Gayunman, wala pang malinaw na usapan, at wala pa ring Indian medicine sa Pilipinas, kaya mas makabu­buting kumunsulta sa mga health centers kung may sakit, at magpareseta na rin ng murang gamot sa doktor doon.

At base nga sa ating mga interviews, may bentahe at dis­ad­bentahe ang paggamit ng generic drugs – depende kung ano ang sakit na ginagamot. Pero sa masang Pilipino na pinagkakasya lamang ang kakatiting ang sweldo sa pagkain at iba pang gastusin sa bahay, na iaagaw lamang sa badyet sa gamot para sa miyembrong magkakasakit, iisipin pa ba ang mga ganitong kumplikasyon? Mas iniisip syempre ng karaniwang mamamayan na bumili na lamang ng murang gamot dahil mas mabuti nang malapatan ng pansamantalang lunas.

Please follow and like us:
Read More