ALAALA NG ISANG ALAMAT

FPJ-10

Fernando Poe Jr. (1939-2004)

(Ni Guillermo Octavio)

APAT na taon nang namamamayagpag sa telebisyon ang programang “FPJ’s Ang Probinsyano.”  Sa mga nakababatang tagasunod ng nasabing programa, si Coco Martin  si Cardo Dalisay, ang magiting na pulis na nakikipaglaban para sa kapakanan ng naaapi kahit siya mismo ay ‘di lang minsang natapakan, nasaktan at nawalan, tapagapagtuwid ng mga baluktot sa lipunan, at tagapagtanggol ng katarungan.

Marahil, muli sa mga nakababata ay palaisipan kung sino ang FPJ na lumikha ng Ang Probinsyano, at ang alam  lamang nila ay ang mga napanonood na sinasabi ng mga dati niyang kakilala sa mga tribute sa mga pang-Linggong programa sa  telebisyon.

Pero tiyak na kung botante ka na noong halalalan 2004, tiyak na kilala  mo  si Fernando Poe Jr., na lumahok sa politika sa unang pagkakataon bilang kandidato sa pagka-pangulo ng oposisyon, at tinalo ng nakaupong pangulo noon na si Gloria Macapagal-Arroyo, sa eleksyong hanggang ngayon ang resulta ay pinagtatalunan, at ‘di iilan ang ayaw itong paniwalaan.

Ronald Allan Kelley Poe

Labinlimang taon na kahapon (Disyembre 14) mula nang pumanaw si Ronald Allan Kelley Poe (Agosto 20, 1939 – Disyember 14, 2004) na mas kilala ng mga Pilipino bilang si Fernando Poe Jr..  Bantog din siya sa kanyang mga inisyal na FPJ, sa kanyang pangalang ginagamit na Ronwaldo Reyes bilang direktor,  at sa tawag na Da King, dahil malaon na, at patuloy siyang kinikilala bilang Hari ng Pelikulang Pilipino.

Si FPJ ay isinilang sa lungsod ng Maynila noong Agosto 20, 1939.  Siya ay anak ng aktor na si Fernando Poe Sr. na ang tunay na pangalan ay Allan Fernando Poe y Reyes, tubong San Carlos, Pangasinan at Elizabeth “Bessie” Kelley, isang mestisang Irish- American.

Ikalawa sa anim na magkakapatid, si FPJ Poe,  ang orihinal na pagkakabaybay ng apelyido FPJ mula sa kanyang lolo sa ama,ang manunulat ng dula na si Lorenzo Pou na nanirahan sa Pilipinas mula sa Majorca, España at nagmina at nagnegosyo sa Pilipinas.

Nagtapos ng elementarya si Poe sa San Beda College, Lepanto noong 1953, at lumipat sa San Sebastian College noong high school.  Matapos ito ay nagkolehiyo si Da King sa Mapua Institute of Technology at University of the East at theater arts ang kanyang naging kurso.

Ang pagsibol

Nang mamatay ang kanyang ama dahil sa rabies sa edad na 35, naobligang kumayod, maging breadwinner ng pamilya si FPJ at tumigil sa pag-aaral at nagsimulang magtrabaho bilang mensahero sa industriya ng pelikula.  Nakakuha rin siya ng mga papel sa mga pelikula at naging stuntman sa Everlasting Pictures, hanggang sa magbida sa “Anak ni Palaris”  noong 1955 sa edad na 14 ngunit hindi ito gaanong tinangkilik sa takilya.

Noong 1956 gamit ang screen name  na Fernando Poe Jr., na nakuha niya sa kanyang kapatid na si Andy, na ang tunay na pangalan ay Fernando Poe II, ay nagbida si FPJ sa pelikulang ‘‘Lo Waist Gang’’, at simula noon ay naging patuloy na ang kanyang kasikatan.

Itinatag ni Da king ang FPJ Productions noong 1961 at kinalaunan ay bumuo pa ng ibang kumpanya ng pelikula.   Noong 1963, tumestigo siya laban sa grupo ng mga kriminal, ang Big Four, na umano ay hinuhuthutan ang industriya ng pelikulang Pilipino.

Noong 1965, kasama niyang nagbida si John Saxon sa pelikuilang “The Ravagers,” isang pelikulang tumatalakay sa pagsasanib-pwersa ng mga Pilipino at Amerikano laban sa mga Hapon.

Ikinasal si FPJ sa aktres na si Susan Roces, Jesusa Sonor sa tunay na buhay, sa isang civil wedding noong Disyembre 1968. Ikinasal din sila sa simbahan kinalaunan. Inampon ng mag-asawa ang isang batang babae, si Grace Poe, na ngayon ay isang senadora.

Nagwagi si FPJ ng mga pagkilala bilang pinakamahusay na aktor ng  Filipino Academy of Movie Arts and Sciences  (FAMAS) para sa mga pelikulang Mga Alabok ng Lupa (1967), Asedillo (1971), Durugin si Totoy Bato (1979), Umpisahan Mo, Tatapusin Ko (1983), at Muslim .357 (1986), o limang beses sa 15 nomnasyon, ang pinakamarami sa kasaysayan ng  FAMAS.   Nanalo din siya bilang Best Director ng dalawang beses at nakakuha rin ng parangal para sa Best Screenplay.

Kabilang sa iba pang mga hindi malilimutang karakter na ginampanan ni Da King ay ang papel na Flavio sa seryeng Ang Panday at Aguila.  Karamihan sa mga  batang-bata, pinakamagaganda at seksing aktres  sa Pilipinas ay naging leading lady din ni Da King kahit noong may edad na siya kabilang sina Alice Dixson, Nanette Medved, Anjanette Abayari at Ara Mina.

Ang huling pelikula niya, sa humigit kumulang 250 niyang ginawa sa loob ng halos limang dekada niyang pamamayagpag sa pinilakang tabing ay ang Pakners, kasama ang isa pang alamat, si all-time billiards great Efren “Bata” Reyes noong 2003.

Noong 2012 ay kinumpirma sa pamamagitan ng Proclamation 435  ang pagiging National Artist ni Da King na unang idineklara noong 2006 dahil sa kanyang ‘di matatawarang ambag sa pelikulang Pilipino.

Isang  umagang tila hindi sumikat ang araw

Sa kanyang mga pelikula ay pirming api at malimit magulpi sa simula si FPJ ngunit nananatiling lumalaban hanggang sa manalo sa dakong huli, ngunit malungkot man ay kailangang tanggapin na iba ang pelikula sa tunay na buhay.

Noong gabi Disyembre 11, 2004 ay isinugod sa St. Luke’s Medical Center si FPJ  matapos na mahilo sa Christmas Party sa kanyang production studio.

In-admit siya sa nasabing ospital dahil sa stroke at na-comatose habang ginagamot ang kanyang brain clot .  Inilarawan ng mga manggagamot ang kalagayan niya bilang cerebral thrombosis with multiple organ failure at ala-12:01 noong Disyembre 14 ay pumanaw na si Da King.

Gaya ng dapat asahan, dinumog ang burol at libing ni Da King.  Inilibing siya sa lupa ng pamilya Poe sa Manila North Cemetery.

Marami ang nagpapalagay na sama ng loob ang ugat ng pagkakasakit at kamatayan ni Da King dahil alam umano nitong siya ang tunay na nagwagi sa nakalipas na halalan.

Please follow and like us:
Read More