BAD NEWS NA PAMBAGONG TAON NG GOBYERNO SA TAUMBAYAN

CHRISTIAN BOMB

MAY bad news sa pagpasok ng year 2020 at ito ay ang taas pres­yo sa mga produktong petrolyo.

Sa bisperas pa ng Bagong Taon, sasalubungin ng taas-presyo sa mga produktong petrolyo ang mga konsumer, dahil sa Martes, Disyembre 31, madarag­dagan ang singil sa kada litro ng gasolina ng P0.80-P0.95/litro, P0.40-P0.50/litro sa diesel, at P0.30-P0.40/litro sa kero­sene.

Bukod diyan, nakaamba rin ang taas-pres­yo sa LPG na magsisimula sa Enero 1.

Tinatayang P7 hanggang P8 ang itataas ng kada kilo ng LPG o dagdag na P77 hanggang P88 sa 11-kilong tangke.

Sabi ng Department of Energy (DOE), hindi pa ito ang dagdag-si­ngil ng excise tax dahil kailangang ubusin pa ang lumang stock ng langis.

Kung ganun, ang taas-presyong ito sa mga produktong petrolyo ay madadagdan pa kapag ipinataw na ang excise tax na nakapaloob sa TRAIN (Tax Reform for Acceleration and Inclusion) Law.

Masamang balita iyan sa mamamayan dahil ang taas-presyo ng mga produktong petrol­yo, ang kasunod niyan ay taas-presyo ng mga bilihin.

Iyan ang masamang pang-bagong taon ng gob­yerno sa taumbayan.

oOo

TIMBRE: Paging PNP-OIC Gen. Archie Gamboa, isang alyas “Zhornak” daw ang guma­gamit sa PNP-Criminal Investigation and Detection Group (CIDG) para makapa­ngotong sa mga ilegalista sa Metro Manila. (CHRISTIAN’S BOMB / CHRISTIAN HERNANDEZ)

Please follow and like us:
Read More

KUNG MAY DELICADEZA SI USEC. VILLAR DAPAT MAG-RESIGN NA SIYA SA DOJ

CHRISTIAN BOMB

NABISTO, na si Justice Usec. Emmeline Aglipay-Villar, misis ni Department of Public Works and Highways (DPWH) Mark Villar ang isa sa mga nag-review sa water concession contract ng mga nakaraang administrasyong Ramos at Arroyo sa Manila Water at Maynilad.

Ang gobyerno ni dating Pangulong Fidel V. Ramos ang unang pumasok sa kasunduan na ang kontrata sa pamamahala ng Manila Water at Maynilad sa Metro Manila, Cavite at Rizal ay mapapaso sa taong 2022 at sa panahon ng dating gobyerno ni ex-Pres. Gloria Macapagal-Arroyo ay in-extend ang kontrata ng hanggang taong 2037.

Sa pinasok na kontrata ng gobyernong FVR sa Manila Water at Maynilad ay talo ang pamahalaan at taumbayan dahil isa sa nakasaad sa kasunduan, kapag nalugi ang mga kumpanya, ang lugi ay sa gobyerno babawiin ng Manila Water at Maynilad.

Iyan ang ikinagalit ni Pres. Rodrigo Duterte lalu’t natalo sa Permanent Court of Arbitration sa Singapore ang Pilipinas, na ang utos sa Philippine government ay bayaran ng pinagsamang mahigit P10 bilyon ang Manila Water at Maynilad dahil nalugi raw ang mga kumpanya nang tumanggi ang dating administrasyon ni ex-Pres. Benigno Aquino III na magtaas ang mga ito ng singil sa tubig.

Minura at pinagbantaan ni Pres. Duterte na sasampalin, kakasuhan, ipapakulong ang mga Ayala ng Manila Water at si Manny V. Pangilinan ng Maynilad, at pagkaraan niyan ay kinansela na ng MWSS ang kontratang hanggang 2037, na ibig sabihin, hanggang taong 2022 na lang ang pamamahala ng Manila Water at Maynilad sa serbisyo ng tubig sa Metro Manila, Cavite at Rizal dahil may iba nang kumpanyang papalit sa kanila.

Ang pagkansela ba ng MWSS sa kontratang ito ay ibinase sa review ng DOJ, na ang isa sa reviewer ay si Usec. Villar, na ang pamilya ay nagmamay-ari naman ng Prime Water ?

Malinaw na may conflict of interes diyan, kaya’t kung may natitira pang delicadeza si Usec. Villar sa kanyang sarili, dapat mag-resign na siya sa puwesto. (CHRISTIAN’S BOMB / Christian Hernandez)

Please follow and like us:
Read More

PAGKATAPOS NG TIGIL-PUTUKAN, SANA USAPANG-PANGKAPAYAPAAN NAMAN

CHRISTIAN BOMB

SA joint statement na nilagdaan sa Utrecht, Netherlands, nagkasundo ang gobyernong Duterte at National Democratic Front-Communist Party of the Philippines (NDF-CPP) na magpairal ng tigil-putukan sa panahon ng Kapaskuhan hanggang sa pagsapit ng Bagong Taon.

Magandang balita iyan para sa sambayanang Pilipino upang maging payapa ang pagdiriwang ng Pasko at Bagong Taon sa bansa.

Ngayon may deklarasyong tigil-putukan ang pamahalaan at NDF-CPP, sana ang kasunod nito ay pagpapatuloy ng usapang pangkapayapaan.

Natigil ang peace talks sa pagitan ng gobyerno at NDF-CPP dahil sa alegasyon na pagsalakay ng militar sa kampo ng mga New People’s Army (NPA), at sa alegasyon ng mga awtoridad na pananambang ng mga rebelde sa mga sundalo at pulis.

Dahil naniwala si Pres. Duterte sa ulat ng militar na nilalabag ng NDF-CPP ang napagkasunduang tigil-putukan ay kinansela ng Pangulo ang peace talks at inutusan ang tropa ng pamahalaan na lusubin ang mga kampo ng mga rebelde at dahil diyan nag-utos din si CPP Chairman Jose Ma. Sison sa NPA na magsagawa ng ambush sa mga sundalo at pulis.

Ngayong nagkasundo na uli ang gobyernong Duterte at NDF-CPP na magpairal ng tigil-putukan ngayon panahon ng Kapaskuhan at Bagong Taon, sana ay maging susi na iyan para ipagpatuloy na rin ang usapang pangkapayapaan.

Tutal, may alok na uli si Pres. Duterte na usapang pangkapayapaan, sana ay tanggapin na uli ito ng NDF-CPP.

Napakatagal na ang nangyayayaring “digmaan” ng Pilipino laban sa Pilipino sa kanayunan, kaya’t sana matuloy na uli ang peace talks alang-alang sa kapakanan ng bayan at mamamayan.

oOo

TIMBRE: Paging Bulacan PNP Director, Col. Emma Libunao, sa Meycauayan City ay tuloy pa rin daw ang operasyon ng pergalan o peryahang may sugalan ni “Lourdes Tomboy”…Paging Mayor Oscar Malapitan, sa Bagong Barrio, Caloocan City ay may pa-lotteng at bookies daw si “Dani Kamote.” (CHRISTIAN’S BOMB / CHRISTIAN HERNANDEZ)

Please follow and like us:
Read More

CRIMINAL JUSTICE SYSTEM BAGUHIN, ‘ONE DAY TRIAL’ SA HEINOUS CRIME IPAIRAL NA

CHRISTIAN BOMB

MAKALIPAS ang sampung taon, nakamit din ang hustisya ng 58 kataong biktima sa Maguindanao Massacre, na karamihan sa mga pinatay ay mga journalist at kababaihan.

Hinatulang guilty ni Quezon City Regional Trial Court Judge Jocelyn Solis-Reyes na may parusang habambuhay na pagkakakulong ang magkakapatid na Ampatuan na nasa likod ng krimen noong Nobyembre 23, 2009.

Ganito ang justice system sa ating bansa, kapag mayayamang politiko ang gumawa ng kasalanan ay umaabot ng dekada bago mapatunayang nagkasala.

Pero ang mahihirap, kapag nakagawa ng krimen ay simbilis ng kidlat kung hatulan ng korte.

May mga pagkakataon pa nga na may mahihirap na napagbintangan sa mga kasalanang hindi nila ginawa ay nakukulong agad.

Dahil nga sa isang dekada inabot ang kasong Maguindanao massacre, isang dekada rin naghirap ang kalooban ng pamilya ng mga biktima, isang dekada silang kakaba-kaba na posibleng may ga­wing masama sa kanila ang mga makapangyarihang akusado sa krimen.

Upang hindi na maulit ang ganyang katagal na pagdinig ng kaso, dapat ay ipairal na ng Supreme Court (SC) ang hiling ng Integrated Bar of the Phi­lippines (IBP) na “one day trial” sa mga kasong may kaugnayan sa mga karumal-dumal na krimen.

Panahon na talagang baguhin ang criminal justice system sa bansa upang mapabilis ang mga pag­lilitis sa kaso at makamit agad ng mga biktima ng karumal-dumal na krimen ang hustisya.

oOo

TIMBRE: Paging PNP-Region 4-A Commander, Brig. Gen. Vicente Danao, may isang alyas “Franz” daw ang may ilegal na drop balls sa Tanauan City, Batangas…Paging PNP-Region 3 Commander Brig. Gen. Rodel Sermonia, isang alyas “Carlito” raw may pa-video karera sa Meycauayan City, Bulacan. (CHRISTIAN’S BOMB / CHRISTIAN HERNANDEZ)

Please follow and like us:
Read More

TAMA SI PRES. DUTERTE NA SILIPIN DIN ANG KONTRATA SA IBANG KUMPANYA

CHRISTIAN BOMB

IISA-ISAHIN na raw ni Pangulong Rodrigo Duterte na silipin ang mga napasok na kontrata ng gob­yerno na may kinalaman sa pang-araw-araw na pangangailangan ng taumbayan, at kabilang sa aalamin ng Presidente kung talo o hindi ang mamamayan sa serbisyo sa kuryente ng Meralco.

Ito ang sinabi ni Presidential Spokesman Salvador Panelo, matapos na mabisto ni Pres. Duterte na talo ang mamamayan sa pinasok na kontrata ng gobyerno ni dating Pangulong Fidel V. Ramos sa Manila Water ng mga Ayala at Maynilad ni Manny V. Lopez noong 1997.

Sa kontrata ng Manila Water at Maynilad sa gobyernong Ramos ay nakasaad na kapag nalugi ang dalawang water firms ay sa pamahalaan nila ito sisingil, bukod pa sa nadiskubre na ang bayad sa corporate income tax ay sa konsyumer ipinapasa ng pamilya Ayala at ni Pangilinan.

Sa galit ng Presidente ay ipinakansela nito ang kontrata para sa taong 2037 ng Manila Water at Maynilad na nalagdaan naman noong panahon ni dating Pangulong Gloria Macapagal-Arroyo, na ibig sabihin ay hanggang taong 2022 na lang ang kontrata sa pamahalaan ng dalawang kumpanya ng tubig.

Sabi ni Panelo, nais ni Pres. Duterte na mabigyan ng proteksyon ang mga konsyumer na kumokunsumo ng mga pangunahing pangangailangan sa araw- araw.

Sinabi ni Panelo, hindi palalampasin ng Pangulo ang anumang makikita nitong ilegal na talo o agrab­yado ang publiko.

Bukod sa Meralco, sisilipin din ng Pangulo ang kontrata ng gob­yerno na may kinalaman sa transportasyon at telekomunikasyon.

Mainam ang mga gagawing iyan ni Pres. Duterte at kung sakaling talo rin ang mamamayan sa pinasok na kontrata ng mga nakaraang administrasyon sa kuryente, transportasyon at telekomunikasyon ay dapat ipakansela na rin agad ng gobyernong Duterte ang kontrata sa mga ito upang matigil na ang pagsasamantala ng mga abusadong kapitalista sa publiko.

oOo

TIMBRE: Paging Manila Police District (MPD) Director, Gen. Bernabe Balba, isang alyas “Tata Delo” raw ang nagbibigay proteksyon sa bookies nina alyas “Boy Abang” at “Lorna” sa Tondo, Manila, paki-aksyunan naman! (CHRISTIAN’S BOMB / CHRISTIAN HERNANDEZ)

Please follow and like us:
Read More

MILITARY TAKE-OVER SA MAYNILA AT MANILA WATER DAPAT SUPORTAHAN

CHRISTIAN BOMB

NAGBANTA ng military take-over si Pangulong Rodrigo Duterte upang patakbuhin ang Maynilad at Manila Water kung hindi raw niya magugustuhan ang paliwanag ng mga Ayala at ni Manny V. Pangilinan na may kaugnayan sa ipinasok na kontrata ng dalawang water firms sa gobyerno.

Hindi lang military take-over sa Maynilad at Manila Water ang banta ng Pangulo, kundi ipapa-warrantless arrest daw niya ang mga Ayala at si Pangilinan.

Dapat nga yata ay huwag lang banta, kundi totohanin na ni Pres. Duterte ang military take-over sa dalawang water firms at pagpapaaresto sa mga abusadong negosyanteng ito.

Nang kanselahin na kasi ng Manila Water Sewerage System (MWSS) ang extension ng kanilang kontrata ng hanggang 2037 sa dalawang water firms na ito, at ang paiiralin na lang ay ang original na kontrata na hanggang taong 2022 na lang magseserbisyo ng tubig sa Metro Manila, Cavite at Rizal ang Maynilad at Manila Water, ay nagbanta ang mga representante ng mga Ayala at ni Manny Pangilinan na ang kanselasyon ng kontrata ay posibleng maging sanhi ng pagtaas nila ng singil sa tubig.

Isipin n’yo, ang tagal na hinuthutan ng mga Ayala at ni Pangilinan ang publiko dahil ang corporate income tax na dapat binabayaran nila sa gobyerno ay sa konsyumer nila ipinapasa, tapos may lakas pa sila ng loob na magbanta ng taas singil sa tubig.

Malas lang nila dahil nang mabisto kanilang kawalanghiyaan ay sa panahon ni Pres. Duterte, kaya’t dapat suportahan ng taumbayan ang Presidente sakaling ipa-take-over na sa military ang Maynilad at Manila Water at ipakulong din ang mga Ayala at si Pangilinan para maturuan ng leksyon ang mga tulad nilang mapagsamantalang negosyante sa bansa.

oOo

TIMBRE: Paging NCRPO Director, Brig. Gen. Debold Sinas, sa Pasig City daw ay may pa-lotteng si alyas “Laarni:.. hindi pa rin daw tumigil ang video karera operations ni “Madam” sa Parañaque City. (CHRISTIAN’S BOMB / CHRISTIAN HERNANDEZ)

Please follow and like us:
Read More

KUNG MAY DELICADEZA SI USEC. VILLAR DAPAT MAG-RESIGN NA SIYA SA DOJ

CHRISTIAN BOMB

NABISTO na si Justice Usec. Emmeline Aglipay-Villar, misis ni Department of Public Works and Highways (DPWH) Mark Villar ang isa sa nag-review sa water concession contract ng mga nakaraang administrasyong Ramos at Arroyo sa Manila Water at Maynilad.

Ang gobyerno ni dating Pangulong Fidel V. Ramos ang unang pumasok sa kasunduan na ang kontrata sa pamamahala ng Manila Water at Maynilad sa Metro Manila, Cavite at Rizal ay mapapaso sa taong 2022 at sa panahon ng dating gobyerno ni ex-Pres. Gloria Macapagal-Arroyo ay in-extend ang kontrata ng hanggang taong 2037.

Sa pinasok na kontrata ng gobyernong FVR sa Manila Water at Maynilad ay talo ang pamahalaan at taumbayan dahil isa sa nakasaad sa kasunduan, kapag nalugi ang mga kumpanya, ang lugi nila ay sa gobyerno babawiin.

Iyan ang ikinagalit ni Pres. Rodrigo Duterte lalo’t natalo sa Permanent Court of Arbitration sa Singapore ang Pilipinas, na ang utos sa Philippine government ay bayaran ng pinagsamang mahigit P10 bilyon ang Manila Water at Maynilad dahil nalugi raw ang mga kumpanya nang tumanggi ang ­dating administrasyon ni ex-Pres. Benigno Aquino III na magtaas ang mga ito ng singil sa tubig.

Minura at pinagbantaan ni Pres. Duterte na sasampalin, kakasuhan, ipakukulong ang mga Ayala ng Manila Water at si Manny V. Pangilinan ng Maynilad, at pagkaraan niyan ay kinansela na ng MWSS ang kontratang hanggang 2037, na ibig sabihin, hanggang taong 2022 na lang ang pamamahala ng Manila Water at Maynilad sa serbisyo ng tubig sa Metro Manila, Cavite at Rizal dahil may iba nang kumpanyang papalit sa kanila.

Ang pagkansela ba ng MWSS sa kontratang ito ay ibinase sa review ng DOJ, na ang isa sa ­reviewer ay si Usec. Villar, na ang pamilya ay nagmamay-ari naman ng Prime Water ?

Malinaw na may conflict of interest diyan, kaya’t kung may natitira pang delicadeza si Usec. Villar sa kanyang sarili, dapat mag-resign na siya sa puwesto. (CHRISTIAN’S BOMB / Christian Hernandez)

Please follow and like us:
Read More

AYALA AT PANGILINAN, ATRAS SA TAPANG AT MALASAKIT NI PRES. DUTERTE

CHRISTIAN BOMB

HINDI na sisi­ngilin ng Manila Water at Maynilad sa gobyerno ang napanalunan nilang kaso sa Permanent Court of Arbitration PCA) sa Singapore na may kaugnayan daw sa pagkalugi ng kanilang negosyong tubig sa bansa.

Base sa desisyon ng PCA, pinagbabayad ang gobyerno ng Pilipinas ng P7.4 billion sa Manila Water ng mga Ayala at P3.4 billion sa Maynilad ni Manny Pangilinan.

Nag-ugat ang kaso nang tutulan ng gob­yerno ni dating Pangulong Benigno Aquino III ang hirit na dagdag-singil sa tubig ng Manila Water at Maynila, at ang ginawang basehan ng mga Ayala at ni Pangilinan ang kasunduan nuong 1997 sa gob­yerno ni dating Pangulong Fidel V. Ramos, na kapag tinutulan ang kanilang taas-singil sa tubig at sila ay nalugi, ang gobyerno ng Pilipinas ang dapat managot.

Minalas nga lang ang mga Ayala at si Pangilinan, dahil sa panahon ng gobyerno ni Pangulong Duterte inilabas ang desisyon na sila ay nanalo, at dahil dito, nagalit ang Pangulo at binantaang sila ay sasampalin at sasampahan ng kasong economic sabotage.

Sa takot sa banta ng Presidente, sinabi ng mga representante ng Manila Water at Maynilad na hindi na nila sisingilin ang gobyerno sa kanilang napa­nalunan sa kaso.

At hindi lang iyan, may bonus pa ang taumbayan, dahil nangako din ang Manila Water at Maynilad, na hindi  na rin nila ipapatupad ang dagdag-singil sa tubig sa Enero 2020.

Dapat saluduhan ng taumbayan si Pangulong Duterte dahil ipinakita niya ang tapang laban sa mga abusadong negosyante at malasakit sa mamamayan sa isyung ito.

oOo

TIMBRE: Paging NCRPO Director, Brig. Gen. Debold Sinas, isang alyas “Cruto” raw ang may pa-video karera sa Las Pinas City. Tuloy pa rin daw ang pasakla ni alyas “Amang” sa Quezon City…Isang alyas “Joy” daw ang may pa-lotteng sa Paranaque City. (CHRISTIAN’S BOMB / CHRISTIAN HERNANDEZ)

Please follow and like us:
Read More

PAG-USAD NG KASO SA ICC, BAD NEWS KAY DUTERTE

CHRISTIAN BOMB

KINUMPIRMA ng International Criminal Court (ICC) na sa susunod na taon ay dedesisyunan na nila kung dapat o hindi sampahan ng kasong crimes against humani­ty si Pangulong Rodrigo Duterte.

Ang kasong ito ay isinampa sa ICC ng mga da­ting miyembro umano ng DDS o Davao City Death Squad at pamilya ng mga biktima ng EJK o extrajudicial killings na mga sangkot sa ilegal na droga sa bansa.

Sakaling aprubahan ng ICC ang pagsasampa ng kaso ay agad magpapalabas ng warrant of arrest ang international court upang sakaling mahuli ay umpisahan na ang paglilitis kay Presidente Duterte at sa iba pang mga sangkot sa kasong crimes against humanity.

Kapag may warrant of arrest na laban kay Pres. Duterte ay malaking problema iyan sa Pilipinas dahil hindi na makapupunta sa ibang bansa ang pangulo para dumalo sa mga pandaigdigang pagpupulong ng mga lider ng mga bansa na may kinalaman sa ekonomiya, dahil maaari na siyang dakpin sa kanyang lugar na pupuntahan.

Sa Pilipinas ay malabong may mangahas na miyembro ng Philippine National Police (PNP) at National Bureau of Investigation (NBI) na hulihin ang Presidente, maliban na lamang kung may mga magpapakabayani na ares­tuhin siya at dalhin sa ICC sa Hague, The Netherlands.

Masamang balita ito para sa gobyerno ng Pilipinas, lalo na kay Pres. Duterte at sa mga kasama nitong nakasuhan sa ICC, pero para sa mga kamag-anak ng mga biktima ng EJK sa bansa ay good news ito dahil indikasyon na posibleng mabigyan na ng hustisya ang pagkamatay ng kanilang mga mahal sa buhay.

oOo

TIMBRE: Paging SPD Director, Brig. Gen. Nolasco Bathan, sa Makati City ay isang alyas “Bob” daw ang nagpapasakla sa Muntinlupa City, may pasakla rin daw ang isang alyas “Walter”. Sa Parañaque City ay isang alyas “Madam” daw ang may pa-video karera. Paki-aksyunan naman! (CHRISTIAN’S BOMB / CHRISTIAN HERNANDEZ)

Please follow and like us:
Read More

PANAWAGAN NG MGA TAGA-BULACAN KAY DOMINGUEZ, HUWAG HARANGIN ANG NMIA PROJECT

CHRISTIAN BOMB

UMAPELA ang local government units (LGUs) sa Bulacan kay Department of Finance (DOF) Sec. Carlos Dominguez III na huwag nitong harangin ang $15-B New Manila International Airport project.

Ang panawagan ay nang maantala ang groundbreaking ng proyekto na nakatakda sana ngayong buwan dahil sa panibagong isyu umano na inilutang ng kalihim.

Dahil diyan, nagdududa tuloy ang LGUs sa Bulacan kung ano ang tunay na motibo ni Dominguez para harangin ang proyekto at modernisasyong ito sa lalawigan.

Ang pagharang ni Dominguez sa proyektong ito ay parang kinumpirma na rin ni Transportation Sec. Arthur Tugade nang sabihin na nakabinbin sa Department of Justice (DOJ) ang concession agreement dahil may ilang isyung nais linawin daw ang DOF, partikular na ang ‘wording at interpretation’ sa terms ng proyekto matapos makakuha ang San Miguel Corporation (SMC) ng notice to proceed noong Setyembre 18.

Sa parte ni Tugade, nais niyang matuloy na ang groundbreaking ceremony para lumuwag ang Ninoy Aquino International Airport (NAIA) at magkaroon ng solusyon sa patuloy na pagsikip ng paliparan.

Nitong nakarang taon, nagpahayag ng kaniyang ‘reservation’ si Dominguez sa proyekto at idinahilan nito ang New Clark City na may 55 kilometro ang layo sa pagtatayuan ng modernong paliparan.

Kamakailan naman ay napaulat na inilutang nito ang paglilinaw sa interpretasyon ng ‘material adverse government action’ (MAGA) at hangganan ng pananagutan ng gobyerno sa proyekto.

Ang MAGA ay sumasaklaw sa kompensasyon ng concessionaire sa pagkakataong magkaroon ng negatibong epekto sa proyekto ang aksiyon ng pamahalaan.

Samantala, inamin naman ni SMC President and Chief Operating Officer Ramon S. Ang na delayed  na ang groundbreaking ceremony at huli na sila sa schedule sa kontruksiyon ng NMIA dahil naka-hold pa ito.

Matatandaan, isinara ng DOTr ang Swiss Challenge matapos na walang ibang kompanya ang nagbigay ng alok upang itayo ang P735 bilyong bagong paliparan, maliban sa SMC kaya dito ipinagkaloob ang “Notice of Award” na nagpapahintulot na mamuhunan, magdisenyo, gumawa at magpatakbo sa NMIA.

Base sa disenyo ng NMIA na nauna nang inilabas sa media, ito ay may tatlong dobleng kapasidad kumpara sa NAIA. Lalatagan ito ng apat na runway na kayang lumipad at lumapag ang apat na eroplano nang magkakasabay, walong taxiways, tatlong passenger terminal na may kapasidad na mula 100 hanggang 200 milyon kada taon. Mayroon din itong kapasidad na makapagparada ng aabot sa 240 na eroplano bawat oras at ikakabit dito ang 8.4 kilometrong expressway na lalabas sa North Luzon Expressway (NLEX) sa bahagi ng Marilao, Bulacan.

Pambihira naman itong si Dominguez, kasi mala­king tulong ang pagbubukas ng itatayong international airport sa turismo, trabaho at kabuhayan ng Bulacan, tapos hinaharang pa proyektong ito. (CHRISTIAN’S BOMB / CHRISTIAN HERNANDEZ)

Please follow and like us:
Read More

HINDI TAMANG GAWING BIRO NI DUTERTE NA MAY KRISIS SA PAGSASAMA NINA KIKO AT SHARON

CHRISTIAN BOMB

KAHIT biro, mali ang isinapubliko ni Pangulong Duterte na may problema ang pagsasama ng mag-asawang sina Sen. Kiko Pangilinan at Megastar Sharon ­Cuneta.

Ito ang buong ­litanya ni Pres. Duterte… “Pinapaalis na nga ng asawa niya sa bahay niya, ayaw kay wala ibang matirahan. Totoo. Tanungin mo. At kung sabihin mo nagsisinungaling ako, I will resign. Ang sinasabi ko, totoo ‘yan”.

Dahil sa sinabing iyan ng Presidente, inakala nga ng publiko na may malaking problema ang mag-asawang Kiko at Sharon at dahil diyan, naobliga ang megastar na maglabas ng mga litratong masaya siya sa piling ng kanyang mister na senador at pinabulaanang may krisis na ang pagsasama nilang ­mag-asawa, at ang sabi ng megastar, nasa oposisyon daw kasi ang kanyang asawa kaya’t nagbibiro nang ganyan ang Pangulo.

Sa inis ng anak nina Kiko at Sharon na si Frankie ay nag-post tuloy ito sa social media ng mga pambabatikos sa Pangulo.

Sana, bago nag-joke nang ganyan si Pres. Duterte ay inisip niyang may mga anak nina Kiko at Sharon na maaapektuhan sa kanyang biro.

Presidente siya at anumang sabihin niya ay maaaring paniwalaan ng publiko.

At dapat isipin din ni Pres. Duterte na hindi siya kapamilya nina Kiko at Sharon kaya’t mali talaga na idaldal niya sa publiko na may malaking problema na ang pagsasama ng senador at megastar.

oOo

TIMBRE: Paging PNP-OIC Lt. Gen. Archie Gamboa, sa CALABARZON (Cavite, Laguna, Batangas, Rizal at ­Quezon) daw ay may mga pulis na nanghihingi ng payola sa gambling lords. Ang pangalan daw ng mga pulis na kolektor ay sina alyas “Chan” at “Uruga”… Sa Caloocan City, isang alyas “Sherwin” daw ang may pa-lotteng sa bukid area ng lungsod. (CHRISTIAN’S BOMB / Christian Hernandez)

Please follow and like us:
Read More

OPENING NG SEA GAMES PATOK, PALPAK SA PRE-RECORDED LIGHTNING SA ‘KALDERO’

CHRISTIAN BOMB

PATOK ang opening ng 30th SEA Games sa bansa dahil sobrang galing ng productions at perfor­mers.

Ipinakita sa mga sayaw kung ano ang kultura ng Pinoy sa iba’t-ibang panig ng bansa. Nakaka-proud na makita ang players na naglalakad bitbit ang Philippine flag.

Isa sa highlights ay ang pagparada ng Pinoy legends na gold medalist sa nakaraang SEA Games.

World class din ang singers. Iba talaga ang ta­lentong Pinoy.

Okey na sana, kaya lang, umaga palang ay pumutok na ang balitang walang sisindihang kaldero o cauldron kaya hindi na pinapasok sa New Clark City ang mga reporter, cameraman at photographer.

Ang dahilan, bago simulan ang pagbubukas ng SEA Games, ay ini-record na pala ang pagsindi nina boxing legend Sen. Manny Pacquiao at gold medalist Nesthy Petecio sa cauldron na siyang ipinalabas sa Philippine Arena.

Ngayon lang nangyari na hindi aktuwal sinindihan ang cauldron sa opening ng SEA Games.

Sa nakaraang SEA Games sa ibang bansa, sa araw mismo ng pagbubukas ng palaro aktuwal na sinisindihan ang cauldron nila.

Dahil pre-recorded lighting ang ginawa, batikos na naman ang inabot ni Speaker Alan Cayetano, chairman ng PHISGOChisgoc (Philippine SEA Games Organizing Committee) Foundation na siyang namahala sa SEA Games.

Ayaw ni Cayetano na nababatikos ang pamamahala nila sa SEA Games, pero ayaw naman nilang gumawa ng tama.

oOo

TIMBRE: Paging PNP-Region 3 Director, Gen. Rhodel Sermonia, isang alyas “Jesica” at isang alyas “Leslie” daw ang may color games, beto-beto at drop balls sa Bulacan….Paging NCRPO Director, Gen. Debold Sinas, may pa-jueteng daw sa Cubao, Quezon City ang isang alyas “Tepang.” (CHRISTIAN’ BOMB / CHRISTIAN HERNANDEZ)

Please follow and like us:
Read More

BAKA MASIPA SA PAGKA-SPEAKER SI CAYETANO

CHRISTIAN BOMB

IKINAGALIT ni Pangulong Rodrigo Duterte ang na­ging kapalpakan ng mga organizer ng Southeast Asian (SEA) Games.

Bukod sa Pangulo, sa post ni Presidential daughter, Davao City Mayor Sara Duterte-Carpio ay binuska nito ang mga kongresistang sumuporta noon sa pagiging speaker ni Taguig City Rep. Alan Cayetano na sa ngayon ay nalalagay sa malaking kontrobersya dahil sa mga aberyang nangyari sa SEA Games na pinamamahalaan ng foundation nitong PHISCOG o Philippine Southeast Asian Games Organizing Committee.

May punto ang mag-ama na magalit at madismaya sa naging pamamahala ng foundation ni Cayetano sa SEA Games dahil ang lumalabas na kahiya-hiya rito ay ang gobyernong Duterte.

Dahil sa galit ng Presidente at pagkadismaya ng anak nitong si Mayor Sara sa mga kapalpakang nangyari sa SEA Games hosting, posibleng pagkatapos ng SEA Games ay magkaroon ng pagbabago sa liderato ng Kongreso.

At kung sakaling masipa sa pagka-speaker si Cayetano ay walang ibang dapat sisihin dito, kundi mismo ang sarili niya.

Ibinigay na kasi ng pamahalaan ang pondong hinihingi ng grupo ni Cayetano sa PHISCOG para pamahalaan ang SEA Games, tapos, pumalpak na naglagay tuloy sa malaking kahihiyan sa Philippine government.

PATI CORRUPTION IMBESTIGAHAN

Kahit humingi na ng paumanhin si Speaker Cayetano sa mga kapalpakan ng pinamumunuan niyang PHISGOC ay sinabihan pa rin ito ni Sen. Christopher Lawrence ‘Bong’ Go na hindi sapat ang sorry dahil nalagay sa malaking kahihiyan ang bansa dahil sa mga sablay na diskarte sa SEA Games.

Nauna rito, umamin si Cayetano, na may sablay sila sa mga samu’t saring problemang dinanas ng football team mula sa Timor-Leste, Myanmar at Cambodia.

Humihingi ng paumanhin ang PHISGOC sa mga naturang bansa dahil sa hassle na naranasan nila sa problema sa transportasyon, hotel arrangement at pati na sa pagkain.

“Bakit nangyari ang mga ganito? Hindi apo­logy ang kailangan natin ngayon. Hindi ito madadaan sa apology lamang. Ang kailangan ay gisingin lahat. Huwag papatay-patay,” ito ang pahayag ni Go sa kanyang privilege speech.

Dahil sa mga kapalpakan ng PHISGOC ay tiniyak ni Sen. Go na iimbestigahan niya ito kapag natapos na ang SEA Games sa bansa, at kahit sino raw ang masagasaan, ay dapat may managot.

Sana nga, totohanin ni Sen. Go ang sinabi niyang iimbestigahan niya ang kapalpakan ng PHISGOC at sana, hindi lang ang mga sablay ng grupo ni Cayetano ang imbestigahan, kundi pati ang mga napaulat na anomalya rito, kabilang ang P50 milyon ginastos sa SEA Games cauldron o kaldero.

oOo

TIMBRE: Paging NCRPO Director, Gen. Debold Sinas, hanggang ngayon daw ay tuloy pa rin ang lotteng at bookies nina “Kiko Payat” sa San Juan; “Rose” at “Cris” sa Pasig City;”Pedong Labo” at “Egay” sa Marikina City; “Ben Tanda”, “Dodo” at “Jerry” sa Mandaluyong. isang alyas “Noel” daw ang nag-o-operate ng video karera sa Malabon City at Navotas City. Pakitanong lang si Eastern Police District (EPD) Director, Gen. Johnson Almazan bakit wala siyang ginagawang aksyon sa mga gambling lord sa kanyang nasasakupan. Paging Laguna PNP Director, Col. Eleazar Matta, isang alyas “Rico” daw ang may mga pa-video karera sa Calamba City. (CHRISTIAN’S BOMB / CHRISTIAN HERNANDEZ)

Please follow and like us:
Read More

CORRUPTION AT MGA KAPALPAKAN SA SEA GAMES

CHRISTIAN BOMB

MATAPOS mabunyag ang P50 million overprice sa SEA Games cauldron (kaldero), ang sunod-sunod na kapalpakan naman sa palarong ito ang nabalita, kabilang ang hindi maayos na pag-istima ng PHISCOG (Philippine SEA Games Organizing Committee) Foundation Inc. sa mga atleta ng Timor Leste, Cambodia, Thailand at Myanmar na dumating sa bansa.

Kabilang sa mga kapalpakan ay ang late na pagsundo sa airport, sa mga mini-bus lang isinakay, sa maling hotel nadala, hindi maayos na tulugan at tini­pid sa pagkain at tubig ang mga dayuhang atleta.

Dahil sa kapalpakan ng PHISCOG, naobliga ang Malacañang na mag-sorry sa mga dayuhang atleta sa hindi magandang karanasang nangyari sa kanila sa Pilipinas.

Kung sana ay nasunod ang unang kagustuhan ni Pangulong Duterte na gobyerno ang mangasiwa sa SEA Games at hindi ang pribadong foundation ng grupo ni Speaker Alan Cayetano, maaari sanang naiwasan ang corruption at kapalpakan sa event na ito.

Dahil diyan, lumabas ngayon na kahiya-hiya sa mundo ang Pilipinas, kasi bukod sa may corruption na, sablay pa ang ginawang pangangasiwa ng PHISCOG sa SEA Games.

oOo

TIMBRE: Paging NCRPO Director, Brig. Gen. Debold Sinas, hindi pa rin daw tumitigil sa paghingi ng payola sa mga gambling lord sa Maynila ang mga pulis na sina alyas “Tata Jokson” at “Tata Itoy”… Paging PNP-Region 3 Director, Brig. Gen. Rhodel Sermonia, may pa-color games at drop balls daw sina alyas “Kiros” sa Brgy. Maragul, Angeles City at “Lourdes” sa Meycauayan City, Bulacan. (CHRISTIAN’S BOMB / CHRISTIAN HERNANDEZ)

Please follow and like us:
Read More

PAGPAPATIGIL NI DUTERTE NG RICE IMPORTATION, ‘FAKE NEWS’?

CHRISTIAN BOMB

NILINAW ni Sec. William Dar ng Department of Agriculture (DA) na hindi ihihinto ang pag-aangkat ng bigas sa ilalim ng Rice Tariffication Law (RTL).

Ang sabi ni Dar ay nagkausap sila ni Pangulong Rodrigo Duterte at wala naman daw itong direktiba sa kanya na ihinto ang pag-aangkat ng bigas sa ibang bansa dahil maayos naman na naipatutupad ang batas.

Dahil diyan, lumalabas na fake news ang sinabi ni Duterte sa mga mamamahayag na inutusan na niya si Dar na itigil na ang rice importation.

Ikinatuwa pa naman ng mga magsasaka at kanilang mga pamilya ang sinabi ng Pangulo na ititigil na ang pag-aangkat ng bigas, tapos sa statement ni Dar ay wala naman daw utos sa kanya ang Presidente na itigil na ang rice importation.

Dapat linawin ng Malacanang ang tungkol sa isyung iyan, kasi kung peke ang sinabi ni Duterte ay hindi magandang tingnan na ang mismong Pangulo ng bansa ay nagsasabi sa publiko ng fake news.

oOo

TIMBRE: Pa­ging DILG Sec. Eduardo Año, sa Kayang St., Baguio City ay isang alyas “Nestor” daw ang may color games, beto-beto, hi-lo at drop balls. Pakisabihan si Mayor Benjamin Magalong na ipatigil ang mga illegal gambling sa kanyang nasasakupan. Paging PNP-OIC Gen. Archie Gamboa, tuloy pa rin daw ang operasyon ng sakla ni alyas “Amang” at lotteng ni alyas “Pinong” sa jurisdiction ni Quezon City Police District director P/BGen. Col. Ronnie Montejo. (CHRISTIAN’S BOMB / CHRISTIAN HERNANDEZ)

Please follow and like us:
Read More

DAPAT INALAM MUNA NI SEN. GO ANG MANDATO NG CHR

CHRISTIAN BOMB

MALI pala ang pagkakaintindi ni Sen. Christoper “Bong” Go sa mandato ng Commission on Human Rights (CHR).

Sa budget hearing kasi sa Senado ay kinuwestiyon ni Sen. Go si CHR Chairman Chito Gascon dahil ang mga kriminal at mga sangkot lang daw sa droga ang binibigyan nito ng pagpapahalaga at hindi ang mga inosenteng biktima ng krimen, gayundin ang mga pulis na napapatay sa mga engkuwentro.

Ang tugon ni Chairman Gascon ay base sa nakasaad sa Konstitusyon, sa bill of rights ay lahat ng Pilipino, kriminal man, sangkot sa droga, pulis at inosenteng mamamayan ay saklaw ng mandato ng CHR, na ang sinomang sangkot sa pang-aabuso sa karapatang pantao at hindi kumikilala sa rule of law ay dapat managot sa batas upang mabigyan ng hustisya ang mga biktima ng human rights.

Dahil sa sinabing ito ni Chairman Gascon ay nalaman tuloy ng publiko na bilang isang senador o mambabatas ay hindi pala alam ni Sen. Go ang mandato ng CHR.

Sana, bago kumandidatong senador si Sen. Go ay inalam muna niya ang mandato ng CHR upang hindi siya nagmumukhang katawa-tawa sa publiko.

o0o

TIMBRE: Paging PNP-OIC Gen. Archie Gamboa at NCRPO chief, Gen. Debold Sinas, may mga pulis daw na protektor ng illegal gambling na color games, hi-lo, beto-beto at drop balls sina alyas “Mike” sa Talon at “Adrian” sa Pilar, Las Piñas City; “Elmer” sa Sto. Nino, Paranaque at Pateros; “Boknoy” sa Alabang, Muntinlupa; “Roy” sa Cubao, Quezon City. Paki-aksyunan kung totoo ang inyong “no-take policy.” (CHRISTIAN’S BOMB / Christian Hernandez)

Please follow and like us:
Read More

RAKET NA ROAD REBLOCKING NG DPWH AT MGA KONTRATISTA IMBESTIGAHAN NG KONGRESO

CHRISTIAN BOMB

KAHAPON, araw ng Linggo kamakalawa at  kamakalawa, araw ng Sabado ay nagsagawa na naman ng mga road reblocking sa mga pangu­nahing lansa­ngan sa Metro Manila ang mga kontraktor ng Department of Public Works and Highways (DPWH).

Nakaugalian na nila iyan na tuwing Sabado at Linggo, nagro-road reblocking sila, na ibig sabihin ay iyong mga maayos na kalsada sa Metro Manila ay sinisira ng mga kontraktor ng DPWH upang ayusin at sementuhan uli.

Sobra na ang kapal ng mukha ng mga kontratistang ito ng DPWH dahil hindi na sila nahiya na nakikita ng mga motorista na winawasak nila ang mga maaayos na kalsada (road reblocking) para ayusin uli.

Malinaw na raket ang ginagawang ito ng mga kontratista, at siyempre, hindi naman nila gagawin iyan kung walang permiso ng mga kasabwat nila sa loob ng DPWH na siyang naglalaan ng pondo sa road reblocking sa Metro Manila.

Nakakainis isipin na napakaraming kalsadang lubak-lubak sa mga probinsya, pero itong road reblocking ang mas pinagtutuunang pansin ng DPWH na ipagawa sa kanilang mga sub-contractor.

Dapat imbestigahan ito ng Kongreso dahil bukod sa perwisyo na sa motorista, ay tila may sabwatan pa sa pagitan ng DPWH officials at mga kontratista sa tinaguriang “road reblocking racket” sa Metro Manila para kumita sila ng limpak-limpak na salapi sa kaban ng bayan.

oOo

TIMBRE: Paging PNP-OIC Gen. Archie Gamboa, isang alyas “Jess” daw ang guma­gamit sa tanggapan ng Quezon City Police District (QCPD) para makapangolekta ng intelihensya sa gambling lords sa Quezon City… Isang alyas “Mang Tony” daw ang may pa-jueteng ngayon sa Rizal province. (CHRISTIAN’S BOMB / CHRISTIAN HERNANDEZ)

Please follow and like us:
Read More

DAPAT LANG SAMPAHAN NG KASO SINA AQUINO, PURISIMA AT NAPEÑAS

CHRISTIAN BOMB

NAG-FILE ng motion for reinvestigation sa Ombudsman ang ­Volunteers Against Crime and Corruption (VACC) para buksan uli ang kasong Mamasapano massacre dahil may mga bago raw silang testigo at mga ebidensya laban kay ­dating Pangulong Benigno Aquino, dating PNP Chief, Gen. Alan Purisima at dating PNP-Special Action Force (SAF) commander Getulio Napeñas.

Masamang balita ito para kina Aquino, Purisima at Napeñas dahil kapag kinatigan ng Ombudsman ang hirit na reinvestigation ng VACC ay baka diyan na sila makulong sa pagkamatay ng 44 pulis na ­tinaguriang “Fallen SAF 44”.

Sa totoo lang, dapat talagang may managot sa kasong ito dahil 44 pulis ang pinabayaan ng nakaraang gobyernong Aquino na mapatay ng mga rebeldeng Moro Islamic Liberation Front (MILF) noon sa Mamasapano, Maguindanao.

Humihingi na kasi ng responde noon ang na-trap na SAF 44, pero dahil ayaw ni Aquino na magkaproblema ang peacetalks ng kanyang gobyerno at ng MILF, hinayaan na lang na tadtarin ng bala ng mga rebeldeng MILF ang 44 pulis.

Sa parte nina Purisima at Napenas ay wala rin silang ginawang aksyon para hilingin kay Aquino na respondehan ang SAF 44.

Dahil 44 na pulis ang hinayaan nina Aquino, Purisima at Napeñas na mapatay ng MILF  kaya’t tama lang ang desisyon ng VACC na hilingin sa Ombudsman na buksan uli ang kaso upang makasuhan sila ng reckless imprudence resulting in multiple homicide.

oOo

TIMBRE: Paging PNP-OIC Gen. Archie Gamboa, wala pa rin daw aksyon si Batangas PNP Director, Col. Edwin Quillates para dakpin ang may pa-color games, beto-beto, hi-lo at drop balls sa Lipa City na si alyas “Tessie”… Isang alyas “Tepang” daw may pa-jueteng sa Cubao, Quezon City at wala rin daw aksyon dito si QCPD Director, Col. Ronnie Montejo. (CHRISTIAN’S BOMB / CHRISTIAN HERNANDEZ)

Please follow and like us:
Read More

DAPAT KUWESTYUNIN NG NAMFREL SA SC ANG POSTPONEMENT NG BRGY AT SK ELECTIONS

CHRISTIAN BOMB

HINDI pabor ang National Citizen’s Movement for Free Elections (NAMFREL) na ipagpaliban ang 2020 Barangay and Sangguniang Kabataan (SK) Elections.

Sa ngayon ay pasado na sa Senado at Kamara de Representante ang kanselasyon ng halalang pambarangay sa Mayo 2020 at tanging lagda na lang ni Pangulong Rodrigo Duterte ang kailangan upang maisakatuparan na sa ­unang Lunes ng Disyembre 2022 ang pagdaraos ng barangay at SK elections.

Para sa NAMFREL, hindi katanggap-tanggap ang ginawang pagpapalawig ng mga mambabatas sa termino ng mga kasalukuyang opisyal ng barangay na walang mandato mula sa mga botante, na anila ay malinaw na pagkakait sa karapatan ng publiko na pumili o bumoto ng gusto nilang opisyal na mamuno sa kani-kanilang barangay.

Sa isyung ito, kung nais talaga ng NAMFREL na matuloy ang eleksyon sa Mayo 2020 ay dapat magbakasakali sila na kuwestyunin sa Supreme Court (SC) kung nasa ­Konstitutsyon o ­unconstitutional ang ginawa ng gobyerno na pagpapaliban ng halalang pambarangay.

Kapag ang desisyon ng SC ay pabor sa ­gobyernong Duterte, walang magaganap na eleksyon, pero kapag sa NAMFREL pumanig ang SC at sabihing unconstitutional na ipagpaliban ang eleksyon, ibig sabihin niyan ay tuloy ang barangay at SK elections at walang magagawa ang administrasyong Duterte at Comelec kundi magdaos ng eleksyong pambarangay sa May 2020.

oOo

TIMBRE: Paging PNP-Officer-in-Charge Lt. Gen. Archie Gamboa, isang alyas “Zhornak” daw ang gumagamit sa ­tanggapan ng PNP-­Criminal Investigation and Detection Group (CIDG) para makapanghingi ng ­“payola” sa gambling lords sa Metro Manila at Luzon… Isang alyas “Chan” daw ang protektor ng jueteng ni alyas “Ariza” sa Cavite. (CHRISTIAN’S BOMB / Christian Hernandez)

 

Please follow and like us:
Read More

DAPAT ANG SUSUNOD NA PNP CHIEF WALANG BAHID

CHRISTIAN BOMB

NAGRETIRO na nitong nakalipas na Nobyembre 8, 2019 si resigned PNP Chief Gen. Oscar Albayalde.

Sa kanyang pagreretiro ay walang naganap na traditional honors, tulad ng fulldress parade na pangkaraniwang isinasagawa sa araw mismo ng pagreretiro sa serbisyo ng PNP chief.

Wala ring naganap na turn-over ceremony para sa bagong PNP chief na kapalit ni Albayalde dahil hanggang sa ngayon ay wala pang napipili si Pangulong Rodrigo Duterte na mamumuno sa pambansang pulisya.

Sa kasaysayan ng PNP, ngayon lang nangyari ang ganyan, na wala nang traditional honor na iginawad kay Albayalde, at wala ring naganap na turn-over ceremony.

Alam naman nating lahat ang dahilan, at ito ay ang pagkakasangkot ni Albayalde sa “ninja cops” o mga pulis na sangkot sa droga.

Para maiwasan uli ang ganyan sa susunod na PNP chief na magreretiro, dapat tiyakin ni Pangulong Duterte na ang maitatalaga niyang bagong hepe ng pambansang pulisya ay walang bahid-dungis ang pagkatao.

Dapat ang susunod na hihiranging PNP chief ni Pangulong Duterte ay may kakayahang pabanguhin ang pangalang PNP dahil masyadong bumaho ito sa ilalim ng liderato ng Albayalde.

oOo

TIMBRE: Paging NCRPO Director, Brig. Gen. Debold Sinas, sa jurisdiction ni QCPD-Station 7 police chief, Col. Giovanni Caliao, sa Cubao, Quezon City ay may color games, beto-beto, hi-lo at drop balls. Isang alyas “Roy” at isang alyas “Kit” daw ang nagpapa-jueteng sa Marikina City at Rizal province. (CHRISTIAN’S BOMB / CHRISTIAN HERNANDEZ)

Please follow and like us:
Read More

KAYA PALA PANAY BANAT NI LENI GUSTONG MAGING GABINETE

CHRISTIAN BOMB

NOONG una ay tutol ang oposisyon na tanggapin ng kanilang lider na si Vice President Leni Robredo ang alok sa kanya ni Pangulong Duterte na maging co-chairman ng Inter-Agency Committee on Anti-Illegal Drug (ICAD), pero nang tanggapin ito ng bise presidente ay naobliga ang mga tinatawag na “dilawan” na suportahan si Robredo.

Bago inalok ng puwesto ni Duterte si Rob­redo ay binatikos nito ang gobyerno dahil palpak daw ang “war on drugs” nito, at dahil nabuwisit ang Presidente sa pagpuna sa kanyang giyera kontra droga ay inalok nito na maging co-chairman ng ICAD ang bise presidente.

Nagkakaisa ang mga miyembro ng oposisyon na nagsabi kay Robredo na huwag tanggapin ang alok.

Ito na ang siste, nang tanggapin ni Robredo ang posisyon, nagkakaisa na ngayon ang statement ng oposisyon na sumusuporta sila sa bise presidente bilang co-chairman ng ICAD.

Diyan makikita na itong mga nasa oposisyon ay walang mga isang salita o palabra de honor.

Dapat kasing ginawa nila ay binatikos si Robredo sa pagtanggap ng panibagong posisyon sa gobyerno, kasi panay ang batikos nila kay Duterte, pero nang alukin ng posisyon, sinunggaban agad.

Lumalabas kasi na kaya lang binabatikos ni Robredo ang Presidente ay dahil gusto lang pala nitong magkaroon uli ng puwesto sa Gabinete ni Duterte.

oOo

TIMBRE: Paging PNP-OIC Gen. Archie Gamboa at NCRPO Director Gen. Debold Sinas, isang alyas “Jess” daw ang kumukuha ng payola sa gambling lords sa Quezon City… isang alyas “Tata Delo” raw ang payo­la collector sa Maynila. (CHRISTIAN’S BOMB / CHRISTIAN HERNANDEZ)

Please follow and like us:
Read More

DAPAT LANG GAWING BIGAS AT HINDI CASH

CHRISTIAN BOMB

DALAWAMPU’T isang senador ang bumoto pabor sa resolusyon na ­palitan ng bigas ang cash na tinatanggap ng mga benepisyaryo ng 4Ps o Pantawid ­Pamilyang Pilipino Program ng pamahalaan.

Tama ang desisyong ito ng Senado.

Base sa imbestigasyon ng DSWD (Department of Social Welfare and Development) ay kanilang natuklasan na ang perang ibinibigay nila sa mahihirap na benepisyaryo ng 4Ps ay ipinangbibisyo lang, na kundi ipinangsusugal ay pinangbibili ng alak o shabu.

Ang 4P’s ay programa ng pamahalaan na nagbibigay ng buwanang P200 sa bawat miyembro ng mahihirap na pamilya, na kung tawagin ay “poorest of the poor” upang ­maipandagdag sa pambili ng ­pagkain para hindi magutom ang mga anak ng mga maralitang Pilipino, pero sa halip na ipambili ng pagkain, karamihan sa kanila ay ipinangbibisyo lang ang tinatanggap na biyaya sa gobyerno.

Dahil pasado na sa Senado ang resolusyong bigas na lang at hindi na cash ang ibigay sa mga benepisyaryo ng 4Ps ay nakasisiguro na ngayon ang pamahalaan at ang publiko na sa sikmura na ng mga maralita ­mapupunta ang ayuda sa kanila ng gobyerno at hindi sa kanilang bisyo.

ASEAN SUMMIT MAS IMPORTANTE KAY DUTERTE

Niyanig ng magnitude 6.6 lindol ang Mindanao nito lang October 31 at kinabukasan, November 1, umalis ng bansa si Pangulong Duterte para dumalo sa ASEAN Summit sa Thailand.

Dahil sa ginawang iyan ni Pangulong Duterte ay batikos ang ­inabot niya sa netizens sa social media, kasi nagawa niyang lumabas ng Pilipinas sa panahon na maymatinding ­trahedyang tumama sa bansa.

Sa Thailand noong November 2011, ang bansang ito ay ­sinalanta ng matinding baha dulot ng bagyo at sa panahong iyon ay may APEC Summit sa United States (US), pero ang ginawa ng noo’y prime ­minister na si Yingluck ­Shinawatra ay kinansela ang pagdalo dito upang personal na tutukan ang trahedyang tumama sa kanilang bansa.

Dapat ay tinularan ni Pangulong Duterte ang ginawa ni dating Thailand PM Shinawatra, pero hindi niya ito ginawa.

Sobrang lakas ang lindol na tumama sa Mindanao at patunay diyan na nasa 21 na ang iniulat na namatay at ­inaasahang madaragdagan pa dahil marami pa ang missing.

Sa ganyang sitwasyon, dapat personal na nakatutok dito ang Presidente dahil buhay at kabuhayan ng mga Pilipino ang nakataya rito, pero mas binigyang halaga niya ang ASEAN Summit kaysa ­kapakanan ng mamamayang naging biktima ng lindol.

oOo

TIMBRE: Paging PNP-OIC Archie Gamboa at NCRPO Director, Gen. Debold Sinas, nag-o- operate na raw ngayon ang mga color games, beto-beto, hi-lo at drop balls nina alyas “Roy” sa Cubao, Quezon City; “Elmer” sa Himlayan, QC, Parañaque City at Pateros; “Mike” sa Pasay City at “Edrian” sa Las Pinas City.

Paging Manila Police chief, Gen. Bernabe Barba, isang alyas “Lito” raw ang nagpapa-jueteng at lotteng sa Maynila. Paging Eastern Police chief, Gen. Johnson Almazan, isang alyas “Kit” daw ang may pa-jueteng sa Marikina City. (CHRISTIAN’S BOMB / Christian Hernandez)

Please follow and like us:
Read More

CAYETANO WALA NANG PALABRA DE HONOR, SAKIM PA?

CHRISTIAN BOMB

ANG sabi ni Speaker Alan Cayetano na kung gugustuhin daw ni Marinduque Rep. Allan Lord Velasco ay tatapusin na niya ang kanyang termino bilang speaker hanggang June 30, 2022.

Hindi katanggap-tanggap kay Velasco ang sinabing iyan ni Cayetano dahil may malinaw silang kasunduan at ito ay ang term sharing sa pagiging speaker ng House of Representatives.

Ayaw sana noon ni Velasco ang sistemang term sharing sa posisyong speaker dahil mas marami ang kongresistang kapartido niya sa PDP-Laban kumpara kay Cayetano na kakaunti lang ang mga kapartido nitong Nacionalista Party (NP) sa Kongreso.

At dahil alam ni Cayetano na tagilid siya sa laban kaya’t kinausap niya noon si Pangulong Duterte na mag-term sharing na lang sila ni Velasco, na sinang-ayunan naman ng Presidente.

Sa kasunduan, si Cayetano ang unang uupong speaker sa loob ng 15 buwan at si Velasco naman ang susunod na speaker sa loob ng 21 buwan.

Kaya iyong sinabi ni Cayetano na puwede niyang tapusin hanggang June 30, 2022 ang pagiging speaker niya ay mali kasi kung ipipilit niya ‘yan at balewalain ang napagkasunduan nilang term sharing ni Velasco ay lalabas na bukod sa wala siyang palabra de honor, ay sakim pa siya sa kapangyarihan.

oOo

TIMBRE: Paging Bulacan PNP Director, Col. Chito Bersulana, sa Area H sa Sapang-Palay, San Jose del Monte City ay may pa-color games at drop balls daw sina alyas “Tessie” at alyas “Leslie. Paging Batangas PNP Director, Col. Edwin Collates, sa Lipa City raw ay may pa-sakla si alyas “Gerry Muslim”. Paging Cavite PNP Director, Col. William Segun, sa Bacoor City raw ay may pa-jueteng si alyas “Areza”. (CHRISTIAN’S BOMB / CHRISTIAN HERNANDEZ)

Please follow and like us:
Read More

ADMINISTRASYON AT OPOSISYON MAGKAISA LABAN SA DROGA

CHRISTIAN BOMB

NAGPAPATUTSADAHAN na naman ang administrasyon at oposis­yon sa isyu ng kampanya laban sa droga.

Dahil sa nasiwalat na pamamayagpag ng “ninja cops” o mga pulis na sangkot sa droga at sa pagtaas ng bilang ng mga drug addict sa bansa, pinatutsadahan ni Vice President Leni Robredo si Pangulong Rodrigo Duterte na palpak daw ang “war on drugs” nito at dapat daw ay baguhin na ang style sa paglaban sa droga at hindi sa pamamagitan ng madugong giyera kontra droga.

Hindi nagustuhan ni Pangulong Duterte ang patutsada ni VP Robredo, kaya’t ang sabi ng Presidente ay ibibigay niya ang police power sa Bise Presidente para pamunuan ang paglaban sa droga sa loob ng anim na buwan, na agad namang tinugon ng oposisyon na kulang ang anim na buwan at mas mainam pa raw ay kusa nang magbitiw sa puwesto ang Pangulo at ipaubaya na sa Bise Presidente ang pamumuno ng bansa.

Dahil diyan, sumali na rin sa patutsadahan ang iba pang maka-administrasyon at maka-oposis­yon.

Para kasi sa mga maka-administrasyon, tagumpay ang “war on drugs” at patunay raw ang pagbaba ng crime rate sa bansa, pero ayon sa oposisyon ay bigo raw dahil kung pagbabasehan ang data, imbes mabawasan ay mas dumami pa raw ang naging lulong sa droga.

Ang patuloy na patutsadahan ng administrasyon at oposisyon sa isyung ito ay hindi makatutulong para mawakasan na ang problema ng droga sa bansa.

Imbes magpatutsadahan, dapat ay magkaisang maglatag ng solusyon sa paglaban sa droga ang administrasyon at oposisyon, at baka sakali, kapag napagsama-sama ang ideya nila ay tuluyan nang matigil ang bentahan ng droga at drug addiction sa bansa.

oOo

TIMBRE: Paging Eastern Police District (EPD) Director, Gen. Johnson Almazan, isang alyas “Rose” daw ang may pa-lotteng at bookies sa Marikina City. Paging Southern Police District (SPD) Director, Gen. Nolasco Bathan, tuloy pa rin daw ang bookies ni alyas “Toto” sa Makati City at lotteng ni “Joy” sa Para­ñaque City. (CHRISTIAN’S BOMB / CHRISTIAN HERNANDEZ)

Please follow and like us:
Read More