BOLADAS SA SONA NG PRESIDENTE

CHRISTIAN BOMB

SA Lunes, Hulyo 22, 2019 ay SONA (State of the Nation Address) na naman ni Pangulong Rodrigo Duterte. Pang-apat na niya itong SONA.

Tulad ng mga nakaraang Presidente, asahan nang hitik lamang sa mga boladas ang SONA ni Pres. Duterte.

Pinaganda o inimbentong estadistika ng ­gobyerno ang asahang laman ng SONA ng Pangulo.

Ang karaniwang laman ng SONA, na gawa ng mga salamangkero ng Malakanyang ay kung paano pagagandahin ang pangit na reyalidad o tunay na pambansang kalagayan upang patuloy na iduyan sa ilusyon at panlilinlang ang mamamayan, lalo na ang nasa hanay ng masa.

Asahan nang palilitawin sa SONA na papaunlad ang ekonomiya, nababawasan ang talamak na katiwalian sa burukrasya, napangangalagaan at hindi nasasalaula ang demokratikong mga proseso, napaghahari ang kapayapaan at kaayusan sa buong bansa.

Natural din, palilitawing bida o bayani at nagsasakripisyo nang husto ang Presidente ng bansa para “matapat” na mapaglingkuran ang sambayanan.

Bukod diyan, tiyak na kasama ang panawagan sa mga kritiko ng administrasyon na kinakailangang magkaisa na ang lahat, magtulungan, para sa ikauunlad pa ng Pilipinas.

Ilang ulit nang ipinagyabang ni Pres. Duterte na ihahatid niya sa minimithing kaunlaran ang Pilipinas at ang mamamayang Pilipino, pero ang katotohanan, hanggang ngayon ay lugmok pa rin sa kahirapan ang bansa at patunay riyan ang kaliwa’t kanang pangungutang ng gobyerno sa ibang bansa, lalo na sa China.

At habang lugmok sa kahirapan ang mamamayan, nagpipiyesta naman sa grasya at pribilehiyo ang mga nasa katungkulan, at kasama na riyan ang mga sundalo at pulis.

Napakaraming boladas ang nagaganap sa SONA ng Presidente upang maipinta lamang sa mata ng publiko na maganda’t mahalimuyak ang pambansang kalagayan, pero ang katotohanan ay lalo lang ibinubulid ng rehimen sa kumunoy ng karalitaan at kawalang-pag-asa ang Republika at ang kahabag-habag na pamumuhay ng nakararaming ordinaryong mamamayan. (CHRISTIAN’S BOMB / CHRISTIAN HERNADEZ)

Please follow and like us:
Read More

MGA FORMULA NI CARPIO SA ISYU NG WPS DAPAT SUNDIN NI DUTERTE

CHRISTIAN BOMB

MATAPOS hamunin ni Pa­ngulong Rodrigo Duterte si Senior Associate Justice Antonio Carpio ng Supreme Court (SC) na magbigay ng formula kung paano ipatutupad ang desisyon ng arbitral tribunal at gagawin daw ito ng kanyang pamahalaan, ay inilatag ng mahistrado ang mga paraan kung paano ipatutupad ang panalo ng Pilipinas sa arbitral tribunal nang hindi nakikipaggiyera sa China.

Una, sinabi ni Carpio na maaaring bumuo ng convention ang Pilipinas, Vietnam, Malaysia, Indonesia at Brunei na idedeklara nila na walang exclusive economic zones sa Spratlys tulad ng nasasaad sa desisyon ng arbitral tribunal dahil maaari lamang ito sa bahagi ng karagatan na mas mataas sa tubig ang isla kapag high tide.

Sa pamamagitan nito, maiiwan aniyang nag-iisa ang China na umaangkin ng EEZ sa Spratly Islands.

Pangalawa, maaari aniyang maghain ng extended continental shelf claim sa West Philippine Sea (WPS) ang Pilipinas sa labas ng kanyang EEZ sa bahagi kung saan ta­nging ang China ang opposite coastal state.

Pangatlo, maaaring magpatrol ang sampung bagong 44 meter multi role response vessels na donasyon ng Japan sa EEZ ng Pilipinas para itaboy ang mga dayuhang mangingisda.

Maaari rin umanong i-encourage ng Pilipinas ang malayang paglalayag at overflight operations ng Unites States, United Kingdom, France, Australia, Japan, India at Ca­nada sa South China Sea at maaari rin umanong lumahok dito ang Pilipinas.

Nagpahayag ng pag-asa si Carpio na susundin ng pangulo ang pangako na ipatutupad niya ang desisyon ng arbitral tribunal kung may mailalahad siyang formula rito.

Malinaw na iyan ang mga formula na puwedeng gawin ng Pilpinas nang hindi kailangang makipaggiyera sa China.

Ang nakalulungkot nga lang, tila “joke” na naman ni Pangulong Duterte ang hamon niyang ito kay Justice Carpio, dahil matapos ilatag ng mahistrado ang mga opsyon at formula sa isyung ito ay wala pang tugon ang Presidente at Malacañang tungkol dito.

Dahil may mga formula naman pala na dapat gawin nang hindi makikipaggiyera, dapat na itong gawin ni Pa­ngulong Duterte, at ipamukha niya sa China na ang West Philippine Sea ay pag-aari ng Pilipinas.

Ngayon, kung wala pa rin gagawing aksyon si Pangulong Duterte sa kabila na naglatag na ng mga formula si Justice Carpio, ay nangangahulugan iyan na wala talagang plano ang gobyernong Duterte na ipag­laban ang karapatan ng mga Pilipino na mabawi ang mga isla at dagat ng Pilipinas mula sa pananakop ng China. (CHRISTIAN’S BOMB / CHRISTIAN HERNANDEZ)

Please follow and like us:
Read More

KUNG ANG MGA NUISANCE CANDIDATE NANGANGARAP MAGING PRESIDENTE, SI MAYOR ISKO PA KAYA?

CHRISTIAN BOMB

NAGSISINU­NGALING si Manila Mayor Isko Moreno sa sinabi niyang wala siyang ambisyong maging presidente ba­lang araw.

Ang lahat kasi ng mga politiko, magmula kagawad hanggang senador, o maging vice president, may pangarap ang mga iyan na maging Pa­ngulo ng Pilipinas.

Ibig sabihin, marami talaga ang gusto ay ma­ging Presidente sila ng Pilipinas, pero ang problema nga lang, ang pagi­ging Presidente ay nakatadhana sa mga personalidad na tanyag ang pangalan.

Ika nga, kung ang Presidential election ay gagawin sa susunod na linggo, at si Mayor Isko ay kandidato for President, malamang manalo siyang Presidente dahil sa tinatamasa niyang kasikatan ngayon.

Ganyan ang mga Pilipino, na kung sino ang sikat, iyon ang nais nilang iboto at iluklok sa posis­yon.

Sa ginagawa nga­yong reporma ni Mayor Isko na talaga namang nagpapaganda sa Maynila, bukod pa sa siya ay sikat na dating artista, ay malaki talaga ang tsansang maluklok sa mas mataas na posisyon.

Kaya’t huwag magpaka-ipokrito si Mayor Isko para tuldukan ang tanong ng mga mamamahayag kung may plano siyang kumandidatong presidente balang araw, na ang tugon niya ay wala raw sa isip niyang maging presidente.

Ang dapat na tugon niya sa mga ganyang tanong ay “tadhana ang magtatakda” at hindi ang wala siyang ambisyong maging presidente, kasi kung ang katanyagan niya ngayon ay aabot sa susunod na eleksyon, ay baka kainin niya ang kanyang sinabi at sabihing hindi niya mahindian ang hiling ng taumbayan na tumakbo siya sa pagka-pangulo ng bansa.

Kapag ganyan ang mangyayari, lalabas na nagsinungaling si Mayor Isko sa sinabi niyang wala siyang ambisyong maging presidente.

Ultimo nga mga “nuisance candidate” na siraulo, nagbabaliw-baliwan at mga KSP (kulang sa pansin) na gustong magpapansin, ay nagpa-file din ng candidacy for president sa tuwing may Presidential election sa bansa, na ibig sabihin ay nangangarap din silang maging presidente, si Mayor Isko pa kaya ang hindi mangarap na maging pangulo ng bansa?

Sa kada eleksyon, ang mga politikong nasa mababang puwesto, ang hangad ng mga iyan ay magkaroon ng mas mataas na posisyon sa pamahalaan, at isa na riyan si Mayor Isko, na mula sa pagiging vice mayor ay tumakbo siyang senador, hindi nga lang pinalad nang matalo siya noong 2016 senatorial election, kaya’t kasinungalingan ang sinabi ni Mayor Isko na wala siyang ambisyon sa mas mataas na posisyon, ang maging presidente balang araw. (CHRISTIAN’S BOMB / CHRISTIAN HERNANDEZ)

Please follow and like us:
Read More

HINDI DAPAT IKUMPARA SI MAYOR ISKO MORENO KAY PRES. DUTERTE

CHRISTIAN BOMB

HUMANGA ang publiko sa ipinakitang reporma ni Mayor Isko Moreno, lalo na ang pagpapaalis niya sa mga illegal vendor sa mga pangunahing kalsada ng Maynila.

Dahil pinag-uusapan ngayon ng publiko ang political will ni Mayor Moreno, ay nagpakalat sa social media, partikular sa Facebook ang mga propagandista ng gobyerno na ikinukumpara si Mayor Moreno kay Pangulong Rodrigo Duterte.

Mali na ikumpara si Mayor Moreno kay Pangulong Duterte dahil magkaiba sila ng pananaw sa iba’t ibang isyu.

Inalis ni Mayor Moreno ang mga illegal vendor sa mga kalsada dahil nakaaabala sila sa mga motorista, pero base sa mga lumalabas na larawan sa social media, sa Davao City na siyang lugar ni Pangulong Duterte ay may mga nagtitinda sa mga kalsada.

Kilalang human rights violator si Pangulong Duterte dahil sa madugong drug war nito at patunay na iniimbestigahan na ng International Criminal Court (ICC) ang extrajudicial killings o EJK sa Pilipinas, samantalang sa panig ni Mayor Moreno ay nagpakita agad ito ng pagpapahalaga sa karapatang-pantao nang sabihing suportado niya ang war on drugs, basta’t walang magaganap na paglabag sa human rights ng mga taga-Maynila.

Buong tapang din na sinabi ni Mayor Moreno na kanyang ipahuhuli, kakasuhan, iba-ban at ipade-deport ang mga Chinese na mambabalahura at mang-aabuso sa Maynila, na kabaligtaran naman kay Pangulong Duterte na nagpapakita ng takot sa China kahit hina-harass at binu-bully ng Chinese Coast Guard (CCG), Chinese militia at mga mangingisdang Chinese ang mga mangingisdang Pilipino sa karagatang sakop ng Pilipinas.

Nagpalabas na rin ng kautusan si Mayor Moreno na tanggalin ang lahat ng mga pangalan ng politiko sa mga eskuwelahan, tulay, kalsada at iba pang imprastraktura na nasa Maynila, pero si Pangulong Duterte ay walang ipinag-utos na ganito.

Iyang mga isyung iyan ay pagpapatunay na hindi magkatulad sina Mayor Moreno at Pangulong Duterte kaya’t mali na ikumpara ng mga propagandista ng gobyerno na iisa ang uri ng kanilang pamamalakad sa posisyon.

Kapag nagpatuloy ang magagandang ginagawa ni Mayor Moreno sa Maynila at dahil magkaiba naman ang istilo ng pamamahala niya sa local government at pamamahala ni Pangulong Duterte sa national government ay baka ito pa ang maging dahilan upang hilingin ng taumbayan sa Manila mayor na tumakbong Presidente at banggain ang sinomang mamanukin ng administrasyong Duterte sa 2022 Presidential election. (CHRISTIAN’S BOMB / Christian Hernandez)

Please follow and like us:
Read More

BOTO NG MGA KONGRESISTA ANG MAGLULUKLOK SA SPEAKER, HINDI SALITA NI DUTERTE

CHRISTIAN BOMB

KAHIT si Taguig City-Pateros Rep. Alan Cayetano ang pinili ni Pangulong Rodrigo Duterte na unang maging Speaker ng Kongreso, na papalitan ni Marinduque Rep. Allan Lord Velasco makalipas ang isa at kalahating taon, base sa napagkasunduan nilang term sharing, ay hindi pa rin siya nakatitiyak na siya nga ang magiging lider ng House of Representatives sa 18th Congress.

Ang dahilan, sa Hulyo 22, 2019 pa magkakaroon ng botohan sa pagpili ng mamumuno sa Kongreso.

Bagamat si Cayetano ang inendorso ni Pangulong Duterte ay hindi ibig sabihin nito ay wala nang magaganap na botohan sa pagpili ng Speaker sa Hulyo 22. Nasa batas kasi, ang pagpili sa mamumuno sa Kongreso ay idinadaan sa botohan ng mga miyembro ng House of Representatives.

Ika nga, huwag munang magsaya si Cayetano na siya na nga ang unang magiging Speaker sa napagkasunduan nilang term-sharing ni Velasco, lalo’t hindi pa nagpapahayag nang pagsang-ayon dito ang magkapatid na mga anak ni Pangulong Duterte na sina Davao City 1st District Rep. Paolo Duterte at Mayor Sara Duterte-Carpio, na ang gustong maging Speaker ay ang kapwa nila Davaeño na si Davao City 3rd District Rep. Isidro Ungab.

Dapat tandaan ni Cayetano na si Mayor Sara ang gumalaw nuon para mapatalsik sa pagiging Speaker si Davao del Norte Rep. Pantaleon Alvarez, at ang pinili ng Presidential daughter na pumalit dito ay si dating Speaker, ex-Pres. Gloria Macapagal-Arroyo.

Walang alam si Pangulong Duterte sa ginawang ito noon ni Mayor Sara, na ang pagpapalit sa liderato ng Kamara ay itinaon pa sa 2018 SONA (State of the Nation Address) ng Presidente.

Bukod diyan, ang mga taga-PDP-Laban na may pinakamaraming miyembro sa House of Representatives ay si Velasco ang nais na maging Speaker dahil ito ang kapartido ni Pangulong Duterte, at hindi nila kapartido si Cayetano na mula sa Nacionalista Party (NP).

Idagdag pa sa isyung iyan na unconstitutional ang pagpili ni Pangulong Duterte kay Cayetano na maunang ma­ging Speaker dahil nakasaad sa Saligang Batas na hindi puwedeng manduhan ng Presidente ang mga mambabatas, at tanging mga miyembro lang ng Kongreso ang puwedeng mamili ng nais nilang maging Speaker of the House.

Masalimuot pa ang isyung speakership, at hindi pa nakatitiyak si Cayetano na siya na nga ang mauunang maging Speaker, dahil sa oras na may mag-nominate kina Ungab, Velasco at maging kay Leyte Rep. Martin Romualdez sa Hulyo 22 para sa labanan sa pagka-Speaker, mas lamang ang talo ni Cayetano kaysa panalo, dahil kakaunti lang ang bilang ng mga kapartido niya sa NP sa Kongreso.

Siya nga ang napili ni Pangulong Duterte na unang maging Speaker, pero ang boto ng mga kongresista ang magluluklok kung sino ang nais nilang mamuno sa Kongreso, at hindi ang salita ng Presidente.  (CHRISTIAN’S BOMB / CHRISTIAN HERNANDEZ)

Please follow and like us:
Read More

EJK UMINIT NA NAMAN SA UN SA PAGKAMATAY NI MYKA SA DUTERTE DRUG WAR

CHRISTIAN BOMB

UMINIT na naman ang isyung extrajudicial killings (EJK) sa Pilipinas dahil may isang bata na naman ang napatay sa drug war ng gobyerno ni Pangulong Rodrigo Duterte.

Tinukoy ng Human Rights Watch (HRW) ang batang pinakahuling biktima na si Myka Ulpina, 3-taong gulang na nasawi matapos mabaril sa kasagsagan ng police operation sa Rodriguez, Rizal.

Target ng operasyon ng pulisya ang ama ni Myka na si Renato, na napatay rin sa anti-drug operation ng mga awtoridad.

Ang pahayag ng pulisya, ginawang human shield daw ni Renato ang anak habang binabaril ang mga awtoridad at dahil sa palitan ng putok, kaya nadamay raw at napatay ang bata.

Hindi pinaniwalaan ng HRW ang palusot ng pulisya dahil marami na umanong pagkakataon na nagtatanim ng ebidensya gaya ng armas at iligal na droga ang mga pulis para mapangatwiranan ang pagpatay.

Dahil sa pinakabagong karahasang ito na ikinamatay ng bata, ay mahigit 24 na mga bansa ang pormal nang nanawagan sa United Nations (UN) na imbestigahan ang bloody drug war ng gobyernong Duterte.

Batay sa inihaing draft resolution ng Iceland na sinuportahan ng halos lahat ng bansa sa Europe, nanawagan din sila sa gobyerno ng Pilipinas na pigilan ang mga nangyayaring EJK sa bansa.

Ito ang kauna-unahang resolusyon na humihiling sa UN-Human Rights Council na tutukan ang nabanggit na usapin.

Sana, magpursige na ang UN-Human Rights Council na imbestigahan na ang mga patayang nagaganap sa Pilipinas.

Hindi na kasi biro sa dami ang napapatay sa drug war, na ayon sa data ng Philippine National Police (PNP) ay nasa 5,000 na ang nasawi sa paglaban nila kontra-droga, pero sa data naman ng HRW ay mahigit 27,000 na raw ang napapatay, at sa bilang na iyan, kasama na ang 3-taong gulang na si Myka.

Panahon na talagang tutukan ng UNHuman Rights Council ang isyung ito at bigyan ng babala ng anomang sanction ang gobyernong Duterte upang matigil na ang EJK at hindi na madagdagan ang mga biktima ng pagpatay, na nagdudulot pati ang mga walang muwang na tulad ni Myka ay napatay sa bloody drug war ni Pangulong Duterte.  (CHRISTIAN’S BOMB / CHRISTIAN HERNANDEZ)

Please follow and like us:
Read More

MAS MATIMBANG KAY EX-SEN. NENE PIMENTEL ANG MGA CHINESE KAYSA MGA PILIPINO 

CHRISTIAN BOMB

MARAMI ang nabigla, lalo na ang mga umiidolo kay dating Sen. Aquilino “Nene” Pimentel, Jr., sa kanyang sinabing wala raw masama sa ginagawang pangingisda ng mga Chinese sa karagatang sakop ng Pilipinas.

Ika nga, nagbago na ang pananaw ng dating makabayan sa isyu ng West Philippine Sea (WPS).

Isa siya sa mga kagalang-galang na dating senador ng ating bayan, pero ngayon, iba na ang pagkakakilala sa kanya ng taumbayan.

Marami ang nakaka­kilala kay ex-Sen. Pimentel, na isang matalino, maprinsipyo, at matapang na senador noon, lalo na noong pa­­nahon ng gobyernong da­ting presidente Ferdinand Marcos, Jr. Nagpakita rin siya ng tapang sa impeachment laban kay dating Pa­ngulong Joseph Estrada.

Ang kanyang mga Senate Bill na naging batas ay tunay na kahanga-hanga. Pero, noon yun. Nagbago na siya ngayon. Nagsimula ang pagbabago ng kanyang prinsipyo si ex-Sen. Pimentel noong suportahan niya at gawing standard bearer pa ng partido niyang PDP-Laban si dating Davao City Mayor Rodrigo Roa Duterte na kilalang human rights violator, na nang ma­ging presidente, lalong lumala ang human rights violations sa bansa.

Ngayong kaalyado na niya ang presidente, naging malinaw na sa taumbayan na ang prinsipyong pinanghawakan niya noon ay binitawan na niya ngayon. Tunay na isa na siya sa mga nagpapakatuta sa pangulo, at kontra na siya sa interes ng bayan at mamamayang Pilipino.

Nakalulungkot isipin na kung kailan pa tumanda ang kagagalang-galang na politikong gaya ni ex-Sen. Pimentel ay saka pa isinuko ang mga prinsipyong kapuri-puri para lamang suportahan ang isang pinunong hayagan ang pagpapaka-tuta sa China.

Kunsabagay, walang per­manente sa mundo ng politika. Ang pagiging magkaibigan at magkaaway sa politika ay hindi rin permanente. Ang tanging permanente lang ay ang kanilang pansariling interes.

Isipin n’yo, sinisira na ang corals, inaagawan ng hanapbuhay ang mangi­ngisdang Pilipino, binabangga pa kanilang bangka ng mga Chinese militia na naghahari-harian sa dagat ng Pilipinas, pero para kay ex-Sen. Pimentel, “nothing wrong” daw ito.

Dahil diyan, lumalabas na mas matimbang pa ngayon sa dating makaba­yang ex-Sen. Pimentel ang mga Chinese, kaysa mga Pilipino. (CHRISTIAN’S BOMB /  Christian Hernadez)

Please follow and like us:
Read More

PARA PAGTAKPAN ANG PANG-AABUSO NG CHINA, GIYERA PANAKOT NI DUTERTE SA PILIPINO

CHRISTIAN BOMB

HINDI katanggap-tanggap sa mga Pilipino ang sinabi ni Pangulong Rodrigo Duterte na kaibigan daw ng Pilipinas ang China kaya pinayagan niyang makapa­ngisda ang mga Chinese sa West Philippine Sea (WPS).

Kung totoo kasing kaibigan ng Pilipinas ang China ay bakit binangga ng Chinese militia vessel ang bangkang pangisda ng mga Pilipino? At Habang lumulubog ang bangkang gawa sa kahoy, tumalilis ang mga Chinese at inabandona ang mga binangga.

Mabuti na lang at naka-rescue agad ang mga mangingisdang Vietna­mese.

Sa isyung ito, ma­linaw na nilabag ng mga Chinese ang pandaigdigang batas ng karagatan ng pagsaklolo. Nasa malaking panganib ang mga Pilipinong nalulunod sa dagat pero imbes saklolohan, ay iniwan.

Sa buong mundo, may tinatalimang batas ang lahat ng pumapalaot: dapat saklolohan ang “man overboard,” sinoman siya, saan mang bansa siya nagmula. Malinaw nilabag ito ng mga Chinese.

Hindi lang ang insidenteng iyan ang naranasan ng mga mangingisdang Pinoy, dahil nuong nakaraang taon ay mismong China Coast Guard (CCG) ang gumawa ng harassment sa kanila sa karagatang sakop ng Pilipinas.

Patuloy ang reklamo ng mga mangingisdang Pinoy laban sa China Coast Guard, Chinese militia at maging sa mga mangingisdang Chinese, at ang hiling nga nila ay huwag nang payagang makapasok ang mga ito sa teritoryo ng Pilipinas, pero bingi sa karaingang ito ang gobyerno ni Pres. Duterte, at sa halip, pinayagan pa ngang makapangisda sa karagatan ng Pilipinas ang mga Chinese.

Ang paulit-ulit na sinasabi ni Pangulong Duterte, magkaibigan daw ang Pilipinas at China.

Kung totoong kaibigan talaga ang turing ng China sa Pilipinas ay dapat sila na mismo ang magpatunay na malayang makapangingisda ang lahat ng Pinoy sa WPS.

Pero hindi, at tila inangkin na ng China na kanilang teritoryo ang WPS, samantalang ang gobyernong Duterte naman ay pinagtatakpan ang pang-aabuso ng mga Chinese sa mga Pinoy sa dagat ng Pilipinas.

Nakalulungkot isipin na sa kabila na Pilipinas ang may eks­klusibong karapatang mangisda sa Recto Bank, na sakop ng ating Exclusive Economic Zone – isang kasunduan na inilatag sa United Nations Convention on the Law of the Sea (UNCLOS) at pinagtibay ito ng korte sa The Hague, ay ang mga mangi­ngisdang Pinoy pa ang naagrabiyado, binu-bully at ginagawan ng karahasan ng mga Chinese sa dagat ng Pilipinas.

Para mapagtakpan ang pang-aabuso ng China, ang panakot ni Pres. Duterte kapag natatanong sa harassment at pambu-bully ng mga Chinese sa mga Pilipino sa WPS ay baka giyerahin at i-nuclear war daw ng China ang Pilipinas kapag pumalag ang kanyang gob­yerno laban sa China. (CHRISTIAN’S BOMB / CHRISTIAN HERNANDEZ)

Please follow and like us:
Read More

LALONG MAGSISIGA-SIGAAN AT IBU-BULLY NG MGA CHINESE ANG MGA PILIPINO SA WPS

CHRISTIAN BOMB

MAGING si Cons­­titu­tionalist Christian Monsod ay nagpahayag na rin na wala raw “K” o karapatan si Pangulong Rodrigo Duterte na makipagkasundo kay Chinese Pres. Xi Jinping para makapangisda sa West Philippine Sea (WPS) ang mga Chinese.

Para kay Monsod, mali ang ginawang ito ni Pangulong Duterte dahil ang mga Pilipino lang daw ang dapat makinabang sa mga lamang-dagat ng Pilipinas.

Ganyan din ang sinabi nina Associate Justice Antonio Carpio at Director Jay Batongbakal ng University of the Philippines Institute for Maritime Affairs and Law of the Sea at iba pang eksperto sa batas, na labag sa Konstitusyon ang pakikipagkasundong ito ni Pangulong Duterte sa China, dahil ang yamang-dagat ng Pilipinas ay para lamang sa mga Pilipino.

Bilang Pangulo, na umaakto ring Comman­der-in-Chief ay may responsibilidad na utusan ang Armed Forces of the Philippines (AFP) na protektahan ang mga Pilipino at mga teritoryo ng Pilipinas, at kabilang dito ang Reed Bank, kung saan dito naganap  ang pagbangga at pagpapalubog ng Chinese militia vessel sa bangkang pangisda ng mga Pilipino.

Ang pagpayag ni Pangulong Duterte na makapangisda sa karagatan ng Pilipinas ang mga Chinese ay mistulang isinuko na nito ang karapatan ng mga Pilipino sa teritoryo ng Pilipinas sa China, at ito ay malinaw na paglabag sa Saligang-Batas dahil hindi ito puwedeng gawin ng Presidente nang walang pahintulot ang mamamayan.

Dahil sa mga isyung ito, may kaakibat na kaparusahan ang ginawa ng Presidente at ito ay ang impeachment.

Ang problema nga lang, sa kabila na labag na sa batas ang ginawang ito ni Pangulong Duterte ay kakaunti lang sa mga mambabatas ang nagsasabing impeachable nga ang pinasok na kasunduan ng Presidente sa gobyerno ng China, sa kadahilan na mayorya sa mga senador at kongresista ay kaalyado ng Pangulo.

Ang pagsang-ayon nina Senate President Vicente “Tito” Sotto at House Majority Floorleader Fredenil Castro sa pinasok na kasunduan ni Pangulong Duterte sa China ay indikasyong walang patutunguhan ang anomang impeachment case na isasampa sa Presidente tungkol sa isyung ito.

Sablay ang ginawang ito ni Pangulong Duterte kasi ang pagpapahintulot niyang makapangisda ang mga Chinese sa WPS ang lalong nagpalakas sa loob ng mga mangingisdang Tsekwa para magsiga-sigaan at i-bully ang mga mangingisdang Pinoy sa mismong dagat ng Pilipinas. (CHRISTIAN’S BOMB /  CHRISTIAN HERNANDEZ)

Please follow and like us:
Read More

PAG-BAN NG PROVINCIAL BUS SA EDSA, ANTI-POOR

CHRISTIAN BOMB

KUMPIYANSA si Brig. Gen. Ro­berto Fajardo ng Philippine National Police-Highway Patrol Group (PNP-HPG) na kaya nilang gawin sa EDSA ang ipinangako ng Pangulong Rodrigo Duterte na biyahe mula Cubao hanggang Makati sa loob ng limang minuto.

Inilatag ng PNP-HPG ang ilang plano para maibsan ang bigat ng trapiko sa EDSA, at kabilang sa plano nilang gawin, isara ang mga bus terminal, paglilipat ng mga city bus barriers at motorcycle lane sa EDSA.

Bago ang pahayag na iyan ni Gen. Fajardo, ay naunang sinabi ng Land Transportation Franchising and Regulatory Board (LTFRB) ang planong tanggalin ang EDSA bilang dadaanan ng mga bus patungong probinsya o bilang isang franchise route ng mga provincial bus.

Sa ilalim ng panukala ng LTFRB sa Metropolitan Manila Development Authority (MMDA), ang mga bus na mula sa hilaga ay maglalakbay lamang hanggang sa isang terminal ng Valenzuela habang ang mga bus mula sa timog ay bibiyahe lamang hanggang sa isang terminal sa Santa Rosa, Laguna.

Bukod sa statement na iyan ng PNP-HPG at LTFRB, ay inihayag naman ng MMDA na handa na sila sa pagpapatupad sa provincial bus ban sa EDSA.

Nakalulungkot isipin, na ang napagdi­diskitahan ng mga alipores ni Pangulong Rodrigo Duterte sa matinding trapik sa EDSA ay ang mahihirap na bus lang ang sinasakyan para makara­ting sa kanilang patutu­nguhan.

Ang polisiyang ito ng gobyernong Duterte ay panibagong dagok sa mahihirap, dahil bukod sa pahirap ito sa mananakay ay doble gastos pa.

Sa ngayon ay may nakabimbin pang protesta si Albay Rep. Joey Salceda at ang mga militanteng kongresista sa Supreme Court (SC) para pigilan ang polisiyang ito ng gobyernong Duterte, at sana magpalabas na ng TRO (temporary restraining order) dito ang SC alang-alang sa kapakanan ng mahihirap na mananakay ng mga provincial bus, dahil malinaw, ang diskarteng ito ng PNP-HPG, LTFRB at MMDA ay anti-poor.  (CHRISTIAN’S BOMB / CHRISTIAN HERNANDEZ)

Please follow and like us:
Read More

ANG BATAS AY BATAS KAYA’T DAPAT NANG IBASURA ANG NOMINASYON NI CARDEMA SA DUTERTE YOUTH PARTYLIST

CHRISTIAN BOMB

HINDI kwalipikado para ma­ging kinatawan ng youth sector o kahit mga propesyonal si dating National Youth Commissioner (NYC) Chairman Ronald Cardema.

Sa en banc hearing ng Comelec, tinanong ni Commissioner Rowena Guanzon si Atty. Rani Angeli Supnet, abogado ni Cardema kung kuwalipikado ang kanyang kliyente bilang nominee ng Duterte Youth Party­list, na tinugon nito na hindi dahil 34-anyos na si Cardema.

Nang tanungin din ni Guanzon si Supnet kung college graduate si Car­dema para kumatawan naman sa mga propesyonal, hindi ang naging tugon ng abogado, na ibig sabihin hindi rin ito puwedeng maging representante ng mga propesyonal sa Kongreso.

Dahil hindi kuwalipikado si Cardema na maging youth representative at professional representative ay wala nang saysay ang hirit nito na maging representante ng Duterte Youth partylist sa Kongreso.

Sa una pa lang ay gusto nang baluktutin ni Cardema ang batas patungkol sa partylist, at kabilang dito sa isyu nga ng edad, dahil ang dapat na edad na pang-represen­tante ng youth partylist ay 30-anyos pababa, at siya (Cardema) ay edad 34 na, bukod pa sa May 12, 2019 siya nag-file ng substitution sa kanyang misis na 1st nominee ng kanilang partylist, na dapat ay ginawa niya ito nuong last filing ng substituion nuong Nob. 29, 2018.

Nang matantiya ni Cardema na hindi siya uubrang maging youth representative, ang palusot nito ay mga young professionals naman daw ang kanyang ire-represent sa Kongreso, dahil kabilang daw ito sa adbokasiya ng kanilang partylist na Duterte Youth.

Sa panibagong palusot na ito ni Cardema ay pagpapakita na nais nitong walanghiyain ang batas sa partylist, dahil malinaw ang pangalan ng kanilang partylist ay Duterte Youth at hindi Duterte Youth and Young Professionals.

Dapat manindigan sa isyung ito ang Comelec at ipaglaban nila ang batas dahil ang batas ay batas at hindi ito puwedeng baluktutin ni Cardema kahit siya ay kilalang tagasuporta ni Pangulong Rodrigo Duterte.

Sa mga isyung iyan, wala na talagang dahilan para ipagpatuloy pa ang apela ni Cardema na maging congressman siya ng Duterte Youth, kaya’t dapat tanggalin na ang kanyang pangalan sa mga nominado ng kanilang partylist. (CHRISTIAN’S BOMB / CHRISTIAN HERNANDEZ)

Please follow and like us:
Read More

MANGINGISDANG PINOY, INIWAN NG MGA CHINESE SA LAOT, INIWAN SA ERE NG PHILIPPINE GOV’T

CHRISTIAN BOMB

NAIS ng Pamalakaya, asosasyon ng mga mangingisda sa bansa na sabihin ni Agriculture Sec. Manny Piñol kung ano ang sinabi nito sa 22 mangingisda dahil nagtataka ang publiko kung bakit nag-iba sila ng tono sa nauna nilang pahayag.

Nuong una kasi ay matigas ang paninindigan ng 22 mangingisda, sa pamumuno ni boat captain Junel Insigne na binangga ng Chinese vessel ang kinalululanan nilang bangka na naging sanhi upang lumubog ito na muntik na nilang ikamatay kung hindi agad sila na-rescue ng mga mangingisdang Vietnamese.

Ang nais pa nga ng mga mangingisda ay mabigyan ng katarungan ang sinapit nilang karahasan na ginawa ng mga Chinese sa mismong karagatan ng Pilipinas.

Pero ang lahat ng nauna nilang paninindigan ay nawala, matapos na sila ay pulungin ni Sec. Piñol, na matapos ang closed door meeting, iba na ang kanilang sinasabi, na hindi nila tiyak kung binangga nga o aksidente lang ang pagkakabangga sa kanila ng Chinese vessel.

Marami ang nagdududa, na diniktahan ni Sec. Piñol ang mga ¬mangingisda na baguhin ang nauna nilang statement dahil kung susuriin ang mga pangyayari sa lugar na pinagdausan ng pulong ay tila may bahid pananakot na ito nang dumating ang mga pulis na naka-full battle gear at pinalibutan ang bahay ng may-ari ng bangka na binangga ng Chinese vessel.

Bukod diyan, nang matapos na ang pulong, nang humarap sa media at magpakuha ng litrato ay kapuna-puna ang kalungkutan sa mukha ng mga ¬mangingisda, lalo na nang mag-sorry pa sa Presidente si boat captain Junel Insigne.

Bagamat itinanggi ni Sec. Piñol na diniktahan niya ang mga ¬mangingisda, ay hindi naniniwala ang taumbayan na walang naganap na pandidikta sa isyu,  dahil ang amo niya na si Pangulong Rodrigo Duterte ay kilalang pro-China, at patunay riyan ang binitiwang salita ng Presidente na banggaan lang daw ito ng dalawang barko na hindi na raw dapat pang humantong sa giyera.

Nakalulungkot isipin, na imbes ipagtanggol ng ¬gobyerno ng Pilipinas ang mga mangingisdang Pilipino ay sila pang mga taong-gobyerno ang nagsasagawa ng cover-up sa isyung ito upang pagtakpan ang karahasang ginawa ng mga Chinese sa mga mangingisdang Pinoy, na ang karahasan ay ginawa pa mismo sa West Philippine Sea (WPS).

Para sa Pamalakaya, nakagagalit ang ginawa ng Duterte government, dahil iniwan na nga ng mga Chinese sa laot ang mga ¬mangingisdang Pinoy matapos na banggain at palubugin ang kanilang fishing boat, ay iniwan pa sila sa ere ng gobyernong Pilipinas sa isyung ito. (CHRISTIAN’S BOMB)

Please follow and like us:
Read More

GALIT NI DUTERTE ANG DAHILAN KAYA ISINANTABI NG KONGRESO ANG PRANGKISA NG ABS-CBN

CHRISTIAN BOMB

NANGANGANIB mawala sa him­pa­pawid ang ABS-CBN matapos isan­­tabi ng Kongreso sa 17th Congress ang House Bill 4349 o franchise renewal ng giant network para sa susunod na 20 taon.

Dahil dito, kailangan magpasa ng panibagong panukala upang matalakay ito sa pagbubukas ng 18th Congress sa Hulyo 22, 2019.

Hanggang March 20, 2020 o siyam na buwan mula ngayon, expired na ang license to broadcast ng ABS-CBN.

Sa lumabas na ulat, isinumite ang panukalang nagpapalawig sa prangkisa ng broadcasting company noong Nobyembre 2016, pero nabinbin sa Committee on Legislative Franchise hanggang tuluyan isarado ang 17th Congress nitong Hunyo 11.

Hindi maitatanggi sa isyung ito, na ang pagsantabi ng mga kongresista sa hirit na prangkisa ng ABS-CBN ay may kinalaman sa galit ni Pangulong Duterte sa TV network, dahil ayon sa Pangulo ay hindi raw inilabas sa telebisyon ang kanyang political ads nuong 2016 Presidential election.

Ilang beses na ka­sing sinabi ni Pres. Duterte na hindi siya sang-ayon na pagkalooban uli o i-renew ang prangkisa ng ABS-CBN.

Nakalulungkot isipin na nagkaroon ng Presidente ang bansa na mapaghiganti.

Tapos na ang 2016 Presidential election, at si Pres. Duterte naman ang nanalo, pero kahit siya na ang Presidente ay nakatanim pa rin sa kanyang isipan ang hindi paglabas ng ABS-CBN sa kanyang political ad.

Hindi naman nagbibigay ng pahayag ang ABS-CBN kung bakit hindi nila inilabas ang political ad ni Pres. Duterte nuon, pero ang nakatitiyak ay may dahilan ang TV network kung bakit hindi nila ito inilabas nuon.

Ngayon, para umusad sa 18 Congress ang renewal ng prankisa ng ABS-CBN ay kailangan aregluhin ng TV network ang Presidente ng Pilipinas, pero kung magmamatigas si Pangulong Duterte, marahil talagang mawawala na sa ere at sa telebisyon ang mga prog­rama ng ABS-CBN, at siyempre kapag nangyari ito, ang apektado rito ay ang nasa 3,000 manggagawa, empleyado at ta­lents ng TV network na ito. (CHRISTIAN’S BOMB / CHRISTIAN HERNANDEZ)

Please follow and like us:
Read More

NAKAIINSULTO SA TALINO NG PINOY ANG PALUSOT NG CHINA

CHRISTIAN BOMB

DEPENSA ng China, kukuyugin daw ng may pito hanggang walong bangka na kinalululanan ng mga mangingisdang Pi­li­pino ang kanilang Chinese vessel at para daw makaiwas ay agad itong umalis at dito na raw aksidenteng nabangga ang isang bangka ng mga mangingisdang Pi­noy.

Sa tema ng statement na ito ng China ay tila gusto nilang palabasin na mga mangingisdang Pinoy pa ang may kasalanan sa pagkabangga ng Chinese vessel sa bangka nila na muntik nang ikinamatay sa lunod ng mga mangingisdang Pilipino.

Mahirap paniwalaan ang pahayag na ito ng China dahil wala namang record na nang-aabuso sa mga mangingisdang Chinese ang mga mangi­ngisdang Pilipino, at ang nasa record ay ang ilang beses na pambu-bully at harassment na ginagawa ng China sa mga ma­ngingisdang Pinoy sa West Philippine Sea (WPS).

Ang mga mangingisdang Chinese, kapag pumasok sa karagatang sakop ng Pilipinas para mangisda ay may back-up na Chinese Coast Guard (CCG), samantalang hindi naman inaalalayan ng Philippine Coast Guard (PCG) ang mga mangingisdang Pinoy sa WPS, kaya’t malaking kasinungalingan ang nais palabasin ng China na mga Pinoy pa ang nagpasimula ng gulo sa naganap na insidente.

Kadalasang idinadaing ng mga mangingisdang Pinoy ay nakatitikim sila ng pambobomba ng tubig, pinapuputukan ng baril at pinaliliparan ng eroplano ng China kapag sila ay nasa WPS para mangisda.

Sabi nga nuon ng mangingisdang si Mang Delfin na wala na raw silang kinikita sa pangi­ngisda dahil sa harassment na ginagawa sa kanila ng China. Ayon naman sa mangingisdang si Mang Rommel, para na raw silang mga “magnanakaw” sa karagatan ng Pilipinas, at sabi naman ng isa pang mangingisda na si Mang Ernie, inaakyat daw ng mga Chinese Coast Guard ang kanilang mga bangka at naghalungkat kung mayroon na silang huling isda.

Sa mga isyung iyan, makikita na ang nagmamalabis at nananakot sa karagatan ng Pilipinas ay mga Chinese at hindi mga Pinoy.

Sa pinakahuling insidente, nang banggain at palubugin ng Chinese vessel ang bangka ng mga Pinoy, Vietnamese fishermen pa ang nag-rescue sa mga mangingisdang Pilipino, na ibig sabihin, kung may iba pang bangka ng mga Pilipino sa pinangyarihan ng insidente, hindi sana mga mangingisdang Vietnamese ang nag-rescue, kundi dapat ay mismong mga Pilipinong mangingisda.

Ang palusot ng China sa isyung ito ay indikasyon na walang plano ang Chinese government na papanagutin ang mga sangkot na Chinese sa pagbangga at pagpapalubog sa bangka ng mga mangingisdang Pinoy.

Dahil diyan, hindi na dapat pang hintayin at umasa ang Philippine government na parurusahan ng Chinese government ang mga sangkot sa insidenteng ito at dahil sa karagatang sakop ng Pilipinas naman ito naganap, dapat ay gobyernong Duterte na ang magsampa ng kaso sa mga Chinese na sangkot sa pagbangga at pagpapalubog sa ating bangka, na muntik nang ikinalunod ng mga mangingisdang Pinoy.

Dapat umaksyon na ang Philippine government dahil sa totoo lang, nakaiinsulto sa katalinuhan ng mga Pinoy ang palusot ng China. (CHRISTIAN’S BOMB / CHRISTIAN HERNANDEZ)

Please follow and like us:
Read More

PHILHEALTH MAY DIALYSIS SCAM NA, MAY PNEUMONIA SCAM PA

CHRISTIAN BOMB

MATAPOS aminin ni Sec. Francisco Duque III ng Department of Health (DOH) na matagal nang nangyayari ang mga pekeng claims sa PhilHealth, ay isiniwalat naman ni incoming Anak Kalusugan Partylist Rep. Mike Defensor na bukod sa dialysis scam ay mayroon pang nangyayaring pneumonia scam.

Ayon kay Defensor, aabot sa P10 Billion ang ibinayad ng PhilHealth sa ospital at iba pang health care providers kahit wala namang naitalang ­epidemya ng pneumonia nitong nakaraang taon.

Paliwanag ni Defensor, walang kailangang dokumento sa ospital o health care provider para sa P15,000 na basic case rate para sa pneumonia.

Dahil dito, ipinangako ni Defensor na sa pagbubukas ng 1st regular session ng 18th Congress sa July 1 ay isusulong niya na maimbestigahan din ang pneumonia scam.

Dapat lang talagang magkaroon ng masusing imbestigasyon dito, lalu’t inamin ni Sec. Duque na matagal nang may mga nagaganap na anomalya sa PhilHealth.

Ibig sabihin, matagal na palang napasok ng mafia ang PhilHealth. Matagal nang ginagatasan ng sindikato ang mga miyembro ng PhilHealth.

Sana, hindi lang magtapos sa imbestigasyon o House inquiry ang tungkol sa isyung ito, kundi dapat hubaran ng maskara ang lahat ng sangkot sa anomalyang ito at pagkaraan ay papanagutin sa pamamagitan ng pagsasampa ng kaso upang sila ay makulong.

Hindi kasi katanggap-tanggap sa mga miyembro ng PhilHealth na puwersahan silang kinakaltasan at naghuhulog ng buwanang butaw, tapos ang pinagkakatiwalaan nilang PhilHealth na kanilang lalapitan sakaling magkaroon sila at ang kanilang mga pamilya ng sakit, ay tadtad pala ng corruption.

Sa parte ni Sec. Duque, kung may delicadeza siya sa kanyang sarili, dapat ay magbitiw na siya sa kanyang posisyon.

Sa bibig na rin kasi niya nanggaling, na matagal nang may sindikato sa PhilHealth, at hindi lang isa, kundi dalawa ang scam na nagaganap dito. May dialysis scam na, may pneumonia scam pa. (CHRISTIAN’S BOMB)

Please follow and like us:
Read More

DAPAT IPAHULI NI DUTERTE ANG MGA NASA LIKOD NG BENTAHAN NG CHINESE FLAGS SA LUNETA

CHRISTIAN BOMB

ISA sa naging mainit na isyu ngayong Araw ng Kalayaan ay ang tungkol sa pagbebenta ng mga vendor ng Chinese flags sa Luneta o Rizal Park sa Maynila.

Nag-viral ito sa social media, na itinaon pa ang bentahan ng Chinese flags apat na araw bago ipagdiwang ng Pilipinas ang ika-121 Araw ng Kalayaan.

Umani ito ng batikos sa netizens, na ayon sa kanila ay malinaw na pagyurak sa pagiging makabayan ng mga Pilipino.

Ang hindi kagandahan, imbes na ito ay batikusin ng gobyernong Duterte ay nag-post pa sa social media si Sec. Teddyboy Locsin ng Department of Foreign Affairs (DFA) na wala raw masama sa pagbebenta ng Chinese flags, dahil kapag Philippines-Ame­rican Friendship Day daw ay may nagbebenta rin naman ng mga United States (US) flag.

Kung walang pananakop na ginagawa ang China sa mga isla at karagatang sakop ng Pilipinas ay maaaring wala ngang masama.

Kung hindi nagpapakita ng pagpapakatuta si Pangulong Duterte sa China ay wala ngang masamang may magbenta ng Chinese flags bilang pagkilala na rin sa tinatawag na Philippines-China Friendship Day.

Pero kitang-kita ang pananakop ng China sa mga isla at karagatang pag-aari ng Pilipinas, at pati ang mga mangingisdang Pilipino ay pinagbabawalang mangisda na sa West Philippines Sea.

Ang China ay isang bagong umuusbong na makapangyarihang bansang nakikipagkumpe­tensya sa puwesto ng US bilang pinakamakapangyarihan sa mundo. Nakikipagkumpentensya ito sa dami ng neo-kolonya, base at instalasyong military, kita mula sa digmaan, at paghawak sa ekonomiya at pulitika ng ibang bayan.

Sa harap ng pag-okupa ng China sa teritoryo ng Pilipinas, pagtatayo ng mga base militar nito at pandarahas sa mga Pilipinong ma­ngingisda, ang masaklap ay walang ginagawang aksyon ang administras­yon ni Duterte sa matinding pambubusabos ng China sa soberanya ng ating bansa.

Dapat magpakita si Pangulong Duterte na siya ay isang Presidenteng makabayan, dahil sa totoo lang, malaking insulto sa Pilipinas at sa mga Pilipino na apat na araw bago ipagdiwang ang Independence Day ay may mga nagbebenta ng Chinese flags sa Luneta Park.

Ngayong Araw ng Kalayaan, sana ipakita naman ni Pangulong Duterte ang kanyang pagi­ging maka-Pilipino. Dapat gumawa ng aksyon ang kanyang gobyerno para madakip ang mga nasa likod ng pagbebenta ng Chinese flags, dahil ayon sa mga vendor na nagbebenta nito ay may mga kalalakihan daw na nagbigay sa kanila ng mga watawat ng China para ibenta mismo sa Rizal Park. (CHRISTINA’S BOMB / CHRISTIAN HERNANDEZ)

Please follow and like us:
Read More

TAMA SI SEN. LACSON, MALI SI PRES. DUTERTE

CHRISTIAN BOMB

KUNG para kay Pangulong Duterte ay tama lang na gamitin ang pondo ng Marawi Rehab Fund sa ibang bagay, para naman kay Sen. Panfilo Lacson ay mali ito.

Pinagsabihan kasi ni Pangulong Duterte ang Commission on Audit (COA) na huwag gipitin si Task Force Marawi Head Secretary Eduardo del Rosario kaugnay sa P5 milyong pondo na ginamit sa Hajj pilgrimage ng mga taga-Marawi sa Saudi Arabia.

At ang babalang ito ay ginawa pa ng Pangulo sa selebrasyon ng Eid’l Fitr sa Davao City nuong Huwebes ng gabi kung saan kinuwestiyon ng COA ang pondo ng Task Force Marawi na ginamit sa pilgrimage sa halip na para sa pagpapatayo ng mga bahay ng mga biktima ng giyera.

Ang sabi pa nga ng Presidente, mas mahalaga raw ang pilgrimage kaysa mansyon.

Para kay Sen. Lacson, isyu ng technical malversation ang paggamit sa P5-M pondo para sa Marawi rehabilitation para gastusan ang pilgrimage ng ilang residente ng Marawi sa Mecca, Saudi Arabia.

Reaksyon ito ni Sen. Lacson sa ginawang pagdepensa ni Pangulong Rodrigo Duterte tungkol sa paggamit sa pondo ng Marawi sa pilgrimage na pinuna ng COA.

Ayon kay Lacson, ang paggamit sa pondo para sa rehabilitasyon ng Marawi ay hindi usapin ng kung ano ang mahalaga sa pagitan ng relihiyon at bahay.

Ito aniya ay technical malversation o paggamit sa pondo na hindi sa tunay na pinaglaanan nito.

Sa isyung ito, maling-mali si Pangulong Duterte sa kanyang sinabi na ginigipit daw ng COA si Sec. Del Rosario, dahil ang ginagawa lang naman ng COA ay sundin kung ano ang mandato nila na nakasaad sa Kons­titusyon, at ito ay ang suriin kung nagagamit sa wasto ng mga opisyal ng gobyerno ang pondo ng bayan na nasa kanilang mga tanggapan.

Ika nga, tama si Sen. Ping at mali si Pres. Duterte sa isyung ito. (CHRISTIAN’S BOMB/CHRISTIAN HERNANDEZ)

Please follow and like us:
Read More

KAPRITSO NI CARDEMA NA MATAWAG NA CONGRESSMAN, IBASURA!

CHRISTIAN BOMB

INAPRUBAHAN ng Commission on Elections (Comelec) ang pagsumite ni dating National Youth Commission (NYC) Chairman Ronald Cardema ng request of substitution of nominee noong hapon ng ika-12 ng Mayo upang maging kinatawan ng Duterte Youth partylist sa Kongreso.

Ito ay magbibigay daan upang tuluyang makaupo si Cardema sa Kongreso.

Ang desisyon na ito ng Comelec ay isang insulto at pambabastos sa ating demokratikong proseso at institusyon. Nakasaad kasi sa Partylist System Act na ang kinatawan ng sektor ng kabataan ay dapat 25 taong gulang na at hindi hihigit sa 30 taong gulang sa araw ng eleksyon, pero noong nagsumite si ­Cardema ng request of substitution of nominee noong Mayo 12 ay lampas na siya sa nakatakdang edad bilang representante ng sektor ng kabataan.

Bagamat nilinaw ni Comelec Commissioner Rowena Guanzon na ­hindi pa approve ang  substitution ni Cardema, kundi ‘yung application lang ang tinanggap, ay makikita naman na umaasta na siya bilang kinatawan ng Kongreso, at patunay diyan ang pagdalo niya sa mga pagpupulong ng mga nanalong kongresista ng mga partylist group.

Ibig sabihin, kung hindi sana tinanggap ng Comelec ang application ni Cardema para sa ­substitution ay hindi na sana ito nag-aastang ­kongresista.

Sa totoong lang, maraming anomalyang kinasangkutan ang Duterte Youth partylist. Kamakailan lamang ay kumalat ang mga litrato na nagpapakita ng mga gastos sa ­ilang online ads para sa Duterte Youth. Kasabay pa nito ang paglabas ng utos ng Commission on Audit (COA) na dapat ibalik ng mga opisyal at empleyado ng National Youth ­Commission (NYC) ang mga monetized leave ­credits at travel expenses na ­natuklasang puno ng katiwalian.

Bukod diyan, ibinasura na rin pala dati ng Comelec ang aplikasyon ng Duterte Youth Partylist dahil hindi ito ­nakapagsumite ng mga dokumento sa itinakdang panahon o oras ng Comelec, pero dahil malakas si ­Cardema kay ­Presidente Duterte, ­inaprubahan din ng Comelec ang  aplikasyon nito para makalahok sa halalan.

Maraming ginawang paglabag, kaya’t malinaw na ang Duterte Youth partylist at si Ronald Cardema ay magiging huwad na representante ng sektor ng kabataan at nariyan lamang upang suportahan si Pangulong Duterte at hindi para gumawa ng mga batas para sa kapakanan ng mga kabataan.

Sa ngayon ay patuloy pa rin ang pagdinig ng Comelec en banc sa petisyon ng mga kumukuwestyon sa ­pagiging substitute ni Cardema, at sana lang magdesisyon nang tama ang Comelec, dahil kung ­papaboran nila ito (Cardema) ay lalabas na binabalahura na mismo ng Comelec ang batas, para lang mapagbigyan ang ­kapritso ng “bata” ni Pangulong Duterte na congressman. (CHRISTIAN’S BOMB)

Please follow and like us:
Read More

PANGAKONG DAGDAG SUWELDO NI PRES. DUTERTE SA MGA GURO DAPAT TUPARIN NA

CHRISTIAN BOMB

PASUKAN na naman ng klase at dahil diyan, nabuhay na naman ang panagawan ng mga guro na dagdag suweldo.

Ang panawagan ng mga titser ng bayan ay agad tinugunan ni Presidential spokesman Salvador Panelo na inaasikaso na raw ni Pangulong Rodrigo Duterte ang hirit na dagdag-sweldo ng mga pampublikong guro sa bansa.

Ayon kay Panelo, inatasan na ni Pangulong Duterte ang mga economic manager para maghanap ng pondo para sa hirit na salary hike ng mga guro.

Ang tanong, kailan?

Nakukulangan ang isang grupo ng mga guro sa statement na ito ng Malacañang, dahil ayon kay Alliance of Concerned Teachers (ACT) Partylist Rep. France Castro ay dapat daw magbigay ng kongkretong araw o time frame si Pangulong Duterte kung kailan maipatutupad ang dagdag sahod sa mga guro.

Para kay Rep. Castro, dapat ay magkaroon na ng katuparan sa lalong madaling panahon ang dagdag-suweldo sa mga guro dahil ito naman ang ipinangako ni Pangulong Duterte noong 2016 Presidential election, na hindi lang mga pulis at sundalo ang dadagdagan niya ng suweldo, kundi pati ang mga titser ng bayan.

Taong 2016, sa panahon ng Presidential campaign ay kabilang ang mga guro sa pinangakuan ng noo’y Presidential candidate na si Rodrigo Duterte na tataasan daw niya ng suweldo, pero ang nangyari, ang pangako sa mga guro ay napako at ang natupad ay ang dobleng suweldo sa mga pulis at sundalo.

Sa unang araw ng bagong taon ng 2018 ay nilagdaan agad ni Pangulong Duterte ang Joint Resolution No. 1 na dobladong suweldo sa mga pulis at sundalo at ang para sa mga guro ay nakalimutan.

Malaki ang ibinigay na umento. Ang P14,834 na buwanang sahod ng AFP private at Police Officer 1 ng PNP ay nadoble sa P29,668, at ang mga sumunod na ranggo ay nadoble na rin ang mga suweldo. Ang mga pinuno ng AFP at PNP na dating sumusuweldo ng P67,500 kada buwan ay kumumbra na ng suweldong P121,143 noong 2018, at P149,785 na ngayong sa 2019.

Kung malaki ang nadagdag sa suweldo ng mga pulis at sundalo, sa mga guro ay wala pa, dahil hanggang ngayon, ang entry-level ng Teacher 1 ay kumikita lang ng P20,179 kada buwan.

Panahon na para dagdagan ang suweldo ng mga guro, dahil sila ay tulad din ng mga pulis at sundalo na naglilingkod sa bayan at mamamayan. (CHRISTIAN’S BOMB / CHRISTIAN HERNANDEZ)

Please follow and like us:
Read More

PARA SA MALINIS NA HALALAN, SMARTMATIC I-OUT NA SA 2022 ELECTIONS

CHRISTIAN BOMB

TAPOS na ang eleksyon at naiproklama na ang lahat ng mga nanalo sa halalan, pero ang isyung dayaan na kinasasangkutan ng Commission on Election (Comelec) at Smartmatic ay hindi pa rin natatapos.

May mga kandidato sa lokal, may mga kandidato sa nasyonal at maging sa mga partylist ang nagsasabing sila ay nadaya kaya natalo sila sa eleksyon.

Dahil laging damay ang Smartmatic sa sinasabing dayaan sa halalan, ay sinabihan ni Pangulong Rodrigo Duterte ang Comelec na tanggalin na ang Smartmatic at huma­nap ng kapalit na magiging ka-tandem ng Comelec sa pangangasiwa ng compu­terized election sa halalan sa taong 2022.

Sa totoo lang, nawalan na ng kredibilidad ang Smartmatic, pati ang Comelec dahil sa bawat eleksyon na pinangangasiwaan nila sa bansa ay la­ging naiisyuhan na kasabwat sila sa pandaraya.

Ang isa sa malaking isyu riyan, na hanggang ngayon ay nasa PET (Pre­si­dential Electoral Tribunal) pa ang kaso, ay ang isinampang kasong pandaraya ni dating Sen. Bongbong Marcos kay Vice President Leni Robredo sa naganap na halalan nuong 2016.

Kung si Marcos ang tatanungin, para sa kanya ay nakipagsabwatan umano ang kampo ni Robredo sa Comelec, gayundin sa Smartmatic.

May ipinakita pa nga si Marcos na ilang ballot images na nagpapakita ng kuwestyunableng pagkaka­bilang ng boto pabor kay Robredo gayong malinaw na hindi naman para sa kanya ang mga botong ito.

Ginawa umano ang nasabing pandaraya nang lumikha ang Comelec ng mga regional hubs kung saan isinasailalim daw sa re-programming ang mga nasirang SD card noong araw ng halalan.

Dahil nga sira na ang kredibilidad ng Smartma­tic, at pati ang Comelec ay nadadamay ay dapat lang na huwag nang gamitin ang serbisyo ng Smartmatic sa 2022 Presidential, national at local elections.

Ika nga, para sa malinis na halalan, dapat out na ang Smartmatic sa 2022 elections. (CHRISTIAN’S BOMB / CHRISTIAN HERNANDEZ)

Please follow and like us:
Read More

PEDERALISMO, PAGDEBATEHANG MAIGI PARA WALANG SISIHAN SA BANDANG-HULI

CHRISTIAN BOMB

DAHIL nanalo sa pagkasenador ang lahat ng kandidato ni Pangulong Rodrigo Duterte, malaki na ang tsansa na magkaroon ng katuparan ang nais ng Presidente, at ito ay ang Federal government.

Para kay Pres. Duterte, ang Pederalismo ang mag-aahon sa kahirapan ng bansa.

Pero sa kabilang banda, may babala ang IBON Foundation na maaari umanong lalo lang maghirap ang mahihirap dahil sa isinusulong na ­pederalismo.

Sa tingin ng IBON Foundation, magkukumpetensiya ang mga estado o rehiyon para makaakit ng mga negosyo kapag natuloy ang pederalismo.

Maaari anilang maging resulta nito ang lalong mababang suweldo ng mga manggagawa habang mas maraming ganansiya ang mga negosyante.

Sa ilalim ng Pederalismo, ayon sa IBON foundation ay gagawing batayan ng mga rehiyon para hikayatin ang mga kompanya na mag-locate sa kanila.

Ayon pa sa IBON foundation, tinatanggal ng panukalang amyenda ang mga proteksyon sa maliliit na sektor at pagtataguyod sa mga pambansang industriya.

Bukod diyan, nakapaloob din sa panukalang baguhin o kung hindi man ay tanggalin ang ilang ­probisyon sa ekonomiya at social justice and ­human rights, kasama na ang pag-alis sa limit sa mga dayuhan sa investments at pagmamay-ari ng lupa.

Kinontra naman ito ng mga kaalyado ni Pres. Duterte sa Kongreso, na ayon sa kanila, ang pederalismo ang susi para mas matutukan ang pagpapaunlad sa mga probinsiya. Maiiwan daw kasi sa mga probinsiya o rehiyon ang karamihan ng pondo at maliit na porsiyento lang ang kailangang ibigay sa Maynila, ang capital ng Pilipinas.

Napakaraming ­argumento, pabor at kontra sa Pederalismo, at dahil diyan ay kailangan pa talagang pagdebatehan ito nang maigi upang walang sisihan sa bandang huli. (CHRISTIAN’S BOMB)

Please follow and like us:
Read More

KUNG WALANG RESPETO SI DUTERTE SA KABABAIHAN, IRESPETO NAMAN NIYA ANG OFFICE OF THE PRESIDENT

CHRISTIAN BOMB

SA graduation ng Philippine Military Academy (PMA) ay nagbiro na naman si Pa­ngulong Rodrigo Duterte ng tungkol sa rape.

Na ang mga kadete raw na masasangkot sa panggagahasa ay bibigyan niya ng pardon.

Kung may mga natatawa sa rape joke ni Pa­ngulong Duterte, ay mayroong hindi mga natatawa at kabilang diyan si Vice Pres. Leni Robredo.

Pinasaringan ni VP Leni ang depensa ng mga miyembro ng gabinete ni Pres. Duterte na freedom of speech lang daw ng Pangulo ang mga rape joke nito.

Ang sabi ni Vice Pres. Robredo, ang freedom of speech ay pala­ging may limitasyon. Hindi daw dapat ito ginagamit para mambastos ng sinoman, hindi dapat ito ginagamit para i-disres­pect ang bawat Pilipino, lalo na ang kababaihan.

Ayon naman sa Gabriela, “bastos,” “macho-pasista” at “misogynist” ang pabirong pahayag ni Pres. Duterte.

Napakaraming beses nang nagbiro si Pres. Duterte tungkol sa panggagahasa.

Pero ang masaklap, imbes punahin ito ng kanyang mga tagasuporta ay nagtatawanan pa.

Dahil diyan ay maaaring inaakala ni Pres. Duterte na puwedeng gawing joke ang rape dahil may mga tumatawa.

Bilang Presidente ay hindi niya dapat ginagawang biro ang panggagahasa, dahil ang anomang salita na lumabas sa kanyang bibig ay kaakibat ito ng tanggapan ng Pangulo ng Pilipinas.

Ibig sabihin, ang anomang statement niya ay nababalita ito sa mundo at ang rape joke niya ay hindi katanggap-tanggap dahil lumalabas na bastos ang Pangulo ng Pilipinas.

Kung walang respeto si Pangulong Duterte sa kababaihan sa walang katapusang rape joke niya, dapat irespeto naman niya ang Office of the President.  (CHRISTIAN’S BOMB / CHRISTIAN HERNANDEZ)

Please follow and like us:
Read More

KAPAG BUMALIK ANG CORRUPTION AT HAZING SA ROTC, SI PRES. DUTERTE ANG SISIHIN

CHRISTIAN BOMB

TINOTOO ni Pres. Rodrigo Duterte ang pagbuhay sa Reserve Officers Training Corps (ROTC). Isang batas ang kanyang inendorso sa pagbuhay sa ibinasura nang ROTC noong 2001.

Isasailalim sa ROTC ang mga estudyanteng nasa Grade 11 at 12.

Ang ROTC ay isang matagal nang programa ng gobyerno na layong ihanda ang mga kabataan sa serbisyong pang-militar at upang maging bahagi sila ng Reserved Force ng Armed Forces of the Phi­lippines (AFP).

Ang reserbang pwersang ito ay inaasahang siyang pupuno sa pangangailangan ng kasundaluhan sakaling sumiklab ang digmaan o sakuna.

Inalis dati sa kurikulum ang ROTC makaraang patayin ng mga ROTC officers si Mark Wilson Chua na nagsiwalat ng corruption sa UST Corps of Cadet. Ang pagpatay sa kanya ay naging sanhi para hindi na gawing mandatory ang ROTC, at dito na isinabatas ang National Service Training (NSTP).

Sa ilalim ng NSTP, ang ROTC ay isa sa mga kursong pagpipilian, at ang iba pang kurso sa programang nakapaloob dito ay ang Civil Welfare Training Service (CWTS) at Literacy Training Service (LTS).

Ang NSTP ay naging mandatory sa lahat ng mga mag-aaral sa kolehiyo, batay sa NSTP Law of 2001.

Sa ngayon ay balik na ang ROTC.

Tiniyak naman ni Pres. Duterte na ang ROTC ngayon ay kakaiba raw sa dating ROTC noon na batbat ng corruption. Ngayon daw ang bagong ROTC ay hindi mamamantsahan ng corruption, walang hazing at sexual harassment.

Nangako rin ang Armed Forces of the Phi­lippines (AFP) na magkakaroon ng paghihigpit para maiwasan ang hindi magandang pangyayari sa ROTC.

Ang tanong: Paano nakasisiguro si Pangulong Duterte na walang mangyayaring corruption, ha­zing at pang-aabuso rito?

Sana nga, totoong walang corruption, hazing at pang-aabuso, dahil kapag naulit ang mga hindi magagandang pangyayari nuon sa mga kadete ng ROTC, na nagresulta upang may magbuwis pa ng buhay rito, ay walang ibang dapat sisihin diyan kundi mismo si Presidente Duterte, dahil hindi na nga puwersahan dati ang ROTC, ngayon ay puwersahan na niyang pinag-a-ROTC ang mga estudyante. (CHRISTIAN’S BOMB/ CHRISTIAN HERNANDEZ)

Please follow and like us:
Read More

DAYAAN SA HALALANG 2019, PAGHAHANDA SA HALALANG 2022

CHRISTIAN BOMB

KUNG dumi, daya at dahas, ang eleksyong 2019 ang isa sa pinakamarumi sa huling kasaysayan ng hal-alan.

Maikukumpara ito sa 2004 at 1986, mga eleksyong pampresidente na may naganap na dayaan.

Bakit naging napakarumi ng halalang ito? Hindi iyan masasagot sa pagsusuri sa umano’y kamalayan at pagboto ng masa, kundi sa galaw ng mga nasa kapangyarihan.

Marami na ang naglitanya ng mga dahilan kung bakit hindi kapani-paniwala, bagkus kaduda-duda at maanomalya, ang resulta ng eleksyong 2019, lalo na sa Senado at party-list, at iyan ay dahil sa higit pi-tong oras natigil ang pagbilang ng boto.

Kung susuriin ang kinalabasan ng eleksyon, nais palabasin ng gobyerno na napakapopular ni Pangulong Rodrigo Duterte, na mas popular pa siya ngayon kaysa noong nagdaang Presidential election.

Ang mga nasa line-up kasi ni Pres. Duterte nuong 2016 Presidential election sa pagkasenador ay talo lahat. Walang nanalo, pero ngayon, panalo lahat ang mga manok niya.

Sa pagkapanalo ng mga kandidato ni Pres. Duterte ay gusto nilang palabasin na marami ang sumusu-porta sa mga patakaran ng gobyerno niya, tulad ng patayan at paglabag sa karapatang pantao, pagpapakatuta sa China, pahirap na buwis at palpak na serbisyo, walang humpay na pag-insulto at pag-atake sa mga kritiko, sa simbahan at iba pa. Gustong palabasing nakakuha ang rehimen ng bagong mandato na ituloy ang mga patakarang ito at gawin ang mas dramatiko: Charter Change, pederalismo, death penalty at iba pa.

Kasama sa taktikang ito ang pagpapalaganap sa social media, na gustong palabasin ng Comelec at Smartmatic na malinis ang halalan at hawak ng kampo ni Duterte ang nakararami, lalo na ang masa.

Ika nga, mahalagang makontrol nila ang Senado, lalong makontrol ang Kongreso, at mapahina ang mga kritiko. Mahalaga sa kanila ang halalang 2019 bilang paghahanda sa magiging halalang 2022.

Hindi kasi makapapayag si Pres. Duterte na matalo sila o ang manok niya sa 2022 Presidential election, dahil alam niya at ng kanyang mga alipores, na kapag natalo sila, magbabayad sila sa mga nagawa nilang pagkakasala sa bayan at mamamayan, lalo na sa mga isyung extra-jucial killings o EJK, paglabag sa mga karapatang pantao, corruption at pagtataksil sa bayan dahil sa pananahimik nila sa panghihimasok ng China sa soberanya ng Pilipinas. (CHRISTIAN’S BOMB)

Please follow and like us:
Read More