RALI VS CPP-NPA-NDF

BOMBAHAN NA FINAL

KAKAIBA ang nangyari ngayong taon sa nakaraang mga taon ng anibersaryo ng Communist Party  of the Philippines-New Peoples Army-National Democratic Front of the Philippines (CPP-NPA-NDF).

Nitong nakaraang Huwebes (Dec. 26) ay nagkaroon ng nationwide protest ang iba’t ibang grupo laban sa CPP- NPA-NDF.

Ang ipinoprotesta ng iba’t ibang grupo ay hindi magandang karanasan ng kanilang mga anak, kapatid at kamag-anak  sa kamay ng CPP-NPA-NDF.

Sabi nga ng mga magulang na nakausap ng silipero ng ‘BOMBAHAN NA’, ang kanilang mga anak na nadoktrinahan ng CPP-NPA-NDF habang nag-aaral sa universities at colleges sa iba’t ibang lugar, ay nagiging matigas ang ulo.

Bukod sa hindi na sumusunod sa kanilang mga magulang ang mga estudyante na nadoktrinahan ng CPP-NPA-NDF, ay nasisira na rin ang kanilang mga pag-aaral.

Nawawalan na rin ng pagmamahal ang mga ito sa kanilang mga magulang, kapatid at kamag-anak.

Sabi pa ng mga magulang, malaki ang ipinagbago ng ugali ng kanilang mga anak sa makaraang madoktrinahan ng  CPP-NPA-NDF.

Iba na rin ang kanilang pananalita, laging bukang-bibig nila ang paglaban sa gobyerno at sa mga awtoridad.

“Sir, sawa na po ang taumbayan sa mga pananalita ng CPP-NPA-NDF dahil wala naman silang napala sa grupong rebelde/terorista,” sabi pa ng silipero ng ‘BOMBAHAN NA’.

Natatandaan pa natin noong ng nakaraang mga taon, ang CPP-NPA-NDF pa ang nagsasagawa ng mga rali tuwing anibersaryo (Dec. 26) nila, pero ngayon taumbayan na mismo ang gumagawa nito laban sa kanila.

“Iisa lang po ang ibig sabihan niyan sir, unti-unti nang nawawala ang tiwala sa kanila (CPP-NPA-NDF)”, ayon pa sa isang silipero ng ‘BOMBAHAN NA’.

“Tuwing nalalapit po ang kanilang anibersaryo taon-taon ay ambush dito, ambush doon ang nangyayari, na kadalasang may nadadamay na mga sibil­yan, tama po ba yun?,” pagtatanong ng isang sumama sa rali.

Partikular na tinukoy ay ang naganap na ambush kamakailan sa Brgy. Libuton, Borongan City, Eastern Samar na ikinamatay ng isang pulis at ilang sibilyan.

Hindi matanggap ng mga taga-Eastern Samar ang ginawa sa kanilang mga kamag-anak na sibilyan na nadamay sa nasabing ambush.

Kaya nagbanta ang Estehanon na gaganti sila sa mga rebelde sa nasabing pang-ambush.

Sabi pa ng mga residente sa kanayunan, perwisyo sa kanilang kabuhayan ang CPP-NPA-NDF dahil hindi sila magkapagtanim nang maayos sa kanilang mga sakahan, dahil kung anong hingiin ng mga ito  at kapag hindi naibigay ay nagtatanim ng galit sa mga magsasaka na humahantong pa sa kamatayan.

“Hikayos nga po kami sa aming pagsasaka ay hinihingian pa kami ng mga rebelde at ‘pag hindi kami nagbigay ay papatayin nila kami,” banggit ng magsasaka. Sa ganang akin po, kung ano po ang tama ay ‘yun po ang sundin nyo.

Maligaya at ligtas na pagsalubong ng Bagong Taon!

oOo

Pasabugin ang katiwalian, isumbong sa ‘BOMBAHAN NA’ mag-email sa joel2amongo@yahoo.com//operarioj45@gmail.com. (BOMBAHAN NA! / JOEL AMONGO)

Please follow and like us:
Read More

DESISYON NG KORTE SA MAGUINDANAO MASSACRE

BOMBAHAN NA FINAL

MAKALIPAS ang 10 taon na paglilitis sa sala ng Quezon City Regional Trial Court (QCRTC) sa kasong Maguindanao Massacre, nadesisyunan na ito noong Disyembre 19.

Guilty ang hatol ng korte sa pangunahing mga suspek na sina Andal Ampatuan Sr. (pumanaw na); Andal Ampatuan, Jr.; Zaldy Ampatuan at iba pa.

Marami rin namang naabswelto sa mga kamag-anak ng Ampatuan na idinadawit sa maramihang pagpatay, at ilang mga awtoridad.

Malayo pa ang lalakbayin ng kasong ito dahil pwede pang umabot ng Court of Appeals at ang huli ay sa Korte Suprema.

Dito na papasok ang pahabaan ng pisi, kung baga tiyagaan ang kasong ito, matira ang matibay.

Maraming sakripisyo sa mga complainant ang ilalaan dito kabilang na ang pera at pagod.

Kung sa QCRTC pa lang ay inabot na ng 10 taon bago nadesisyunan ang kaso, paano pa kaya ang Court of Appeals at Korte Suprema?

Ibig sabihin, another 20 years? Wow!

Sa panahon na ‘yun, mga senior na ang pangunahing mga suspek o baka mga patay na sila.

Sir, ganyan po ba talaga katagal ang mga kaso sa atin? Tanong ng isa sa mga silipero ng ‘BOMBAHAN NA’.

Marami pong dahilan ang naririnig natin kung bakit daw matagal ang mga kaso sa Pinas.

Kabilang na rito ang kakulangan ng empleyado sa mga korte, kulang sa pondo, kulang ng mga hukom at inaabutan na rin ng retirement ng judge. ‘Yan ang ilan sa nagiging sanhi ng delay.

Lalo na ngayon na maraming nakulong sa kampanya ng gobyerno laban sa ilegal na droga.

Hay naku! Kaya, lamang ang may pera na nakakulong dahil lalo silang natatagalan bago madesisyunan at lumalaki ang pagkakataon na magkaroon ng korapsyon.

Mas mabilis na desisyon ng kaso sa korte, mas lumiliit ang tsansa na magkaroon ng lagayan.

Sana po sir, makita ‘yan ng ating mga mambabatas kasi kawawa naman po ang mga ordinaryong mamamayan na biktima ng karahasan ng may pera, banggit pa isang silipero ng ‘BOMBAHAN NA’.

Kaya nga po, napakahalaga na ang ating pipiliing mga senador at kongresista ay may malasakit sa tao dahil sila po ang gumagawa ng mga batas.

Sila po ang nakakaa­lam kung ano ang ikabubuti ng taumbayan. At sana po ay basbasan sila ng banal na espiritu ng Panginoon habang gu­magawa sila ng batas para maging patas ang gagawin nilang batas.

Maligayang Pasko at Manigong Bagong Taon po!

oOo

Pasabugin ang katiwalian, isumbong sa ‘BOMBAHAN NA’, mag-email joel2amongo@yahoo.com//operarioj45@gmail.com. (BOMBAHAN NA! / JOEL AMONGO)

Please follow and like us:
Read More

PANIBAGONG E-MAIL SA ‘BOMBAHAN NA’ SA PAUPAHAN

BOMBAHAN NA FINAL

MULI po na­ting bigyan ng espasyo ang e-mail sa ‘BOMBAHAN NA’ kaugnay sa isinulat natin hinggil sa paupahan.

Greetings Sir Joel!

Ako po ay nagse-search sa internet ng kasagutan tungkol sa isang bagay patungkol sa pagpapaupa/pangungupahan nang matagpuan ko ang inyong article sa nabanggit na subject ng e-mail na ito.

Nabasa ko po nang buo ang article pati na rin ‘yun mga batas na ukol dito.

May isa lamang po akong tanong tungkol sa “deposit at advance” payment. Iyon po bang “advance” from the term itself, ay nangangahulugan na mula sa aking pag-ukupa sa aking nirerentahang bahay, halimbawa po ay November 9, ibig sabihin po ba nito ay hindi ako kailangang magbayad para sa unang buwan ng aking pagtira dito, i.e. December 9, at sa halip ay sa January 9 ng kasunod na taon na? Tama po ba?

Thank you in “advance” po sa inyong magiging tugon at mabuhay po  kayo.

Zaldy

Maraming salamat po, Sir Zaldy, sa tiwala n’yo sa ‘BOMBAHAN NA’,

Linawin po nating mabuti na naaayon sa batas.

Wala po tayong ibang pinagbasehan sa tanong ni Sir Zaldy, kundi ang batas na Republic Act No. 9653 o Rent Control Act of 2009.

ADVANCE AND DE­POSITS:

Ito ay nakapaloob sa The Rent Control Act of 2009.  Ayon dito, ang (lessor) nagpapaupa ay hindi maaaring humingi mula sa nag-uupa ng mahigit sa isang (1) buwan advance rent at mahigit sa dalawang (2) buwang deposit.

Anumang naipon na interest ng deposit ay kailangan ibalik sa (te­nant) nag-uupa pagkatapos mapaso ang kanyang rental agreement.

Gayunman, ang halagang ito ay mawawala (forfeited) kung sakali ang nag-uupa ay hindi mabayaran ang kanyang utility bills tulad ng kuryente at tubig.

Maaari ring kunin ng nagpapaupa bilang kabayaran sa nasira ng nag-upa sa panahong nakatira siya sa paupahan.

GROUNDS/REASONS FOR EVICTION

(Pagpapaalis):

Bukod mula sa sub-leasing na walang pahintulot sa may-ari ng paupahan, iba pang rason para sa pagpapaalis sa nag-uupa:

Kung ang nag-uupa ay hindi nakabayad ng buwanang renta na umabot na ng tatlong (3) buwan.

Kung sakali ang nagpapaupa ay hindi tinanggap ang bayad sa upa, ang nag-uupa ay maaari niyang i-deposit ang kanyang bayad at maaari niyang pansamantalang ipagkatiwala (consignation) sa korte, o sa city treasurer, local barangay chairman o ideposito ang halaga sa landlord’s bank account sa loob ng isang buwan (1) matapos tumanggi ang nagpapaupa.

Ang nag-uupa ay magdedeposito ng buwanang renta sa loob ng sampung (10) pagkatapos ng kada buwan.

Kung ang may-ari/lessor o ang kanyang immediate family members ay may lehitimong pangangailangan para gamitin ang unit/paupahan ay may kinakailangang sundin.

Maglaan ng sapat na panahon sa nag-uupa, isang (1) buwan, kung ang upa ay buwanan ang paniningil o tatlong buwan, kung ang renta ay sinisingil ng quarterly at iba pa.

Kinakailangan ding ang nagpapaupa ay magbigay sa nag-uupa ng tatlong (3) buwan advance notice.

Ito ay para mabigyan ng sapat na panahon ang nag-uupa para sa kanilang paglilipatan.

Ang may-ari ay hindi rin pinapayagan ng pagpapaupa sa unit sa sinumang third party para sa loob ng isang (1) taon.

Kung ang paupahan naman ay kailangan nang sumunod sa ‘order of condemnation’ na isasagawa ng mga awtoridad at ang may-ari/lessor ay kailangang isaayos ang paupahan para sa kaligtasan. Mayroon ding mga kondisyones na dapat sundin:

Ang pinaalis ang siyang unang may kaparatan na bumalik matapos na maayos ang paupahan. Kung magtataas man ng buwanang upa ang may-ari,  kailangang resonable ito at naaayon lamang sa kanyang ginastos sa repair.

EXPIRATION OF THE LEASE/RENTAL CONTRACT.

Kung ang paupahan ay naibenta o kaya naisanla sa ibang may-ari, ang bagong may-ari ay hindi maaaring paalisin ang mga kasalukuyang nakatira.

Kinakailangan niyang sumunod sa provision sa itaas kaugnay sa pagpapaalis.

PENALTIES FOR VIOLATIONS:

Ang sinumang lalabag sa anumang provision ng batas ay papatawan ng hindi bababa ng P25,000 na hindi hihigit sa P50,000 o pagkakakulong na hindi bababa ng isang (1) buwan at isang (1) araw na hindi lalagpas ng anim (6) na buwan o parehas.

Para po kay Sir Zaldy, sa aking pagkakaintindi sa batas ay hindi maaaring galawin ang advance at deposit hangga’t hindi natatapos ang rental agreement.

Sa batas na ito ay protektado ang nagpapaupa at nag-uupa upang maiwasan ang hindi pagkakaunawaan.

oOo

Pasabugin ang katiwalian, isumbong sa ‘BOMBAHAN NA’, mag-e-mail sa joel2amongo@yahoo.com//operarioj45@gmail.com. (BOOMBAHAN NA! / JOEL AMONGO)

Please follow and like us:
Read More

‘PAG WALA ANG PUSA NAGLALARO ANG DAGA

BOMBAHAN NA FINAL

ITO ang nangyari sa naganap na kidnapping sa isang babaeng Chinese national sa Makati City na nakunan ng video noong Lunes ng gabi.

Parang pusa na nalusutan ng daga habang wala sila.

Kaya hayon, natangay ng kapwa Tsekwa si Manay, kawawa naman.

Nangyari ang pangingidnap bandang alas-9 ng gabi noong Lunes sa isang kalye sa Makati.

Kitang-kita at dinig na dinig sa video ang boses ng babae na nagsisigaw sa loob ng puting sasakyan na nag-viral sa social media.

Kung mayroong pulis na nakalat sa kalye sa lugar ay hindi sana nangyari ang kidnapping.

Ibig sabihin, natutulog sa pansitan ang Police Makati nang mga oras na ‘yun kaya sila nalusutan?

Alam na nilang dumagsa na ang mga Tsekwa sa Pinas at may mga ulat na sila sila mismo ay nagkikidnapan.

Sana alertado na sila nang hindi sila nalulusutan.

Nagpapatunay lamang po sa pangyayaring ito na ang mga Tsekwa ay nagkalat na sa Pinas.

Dito na sila nagkakalat ng lagim, mga biktima nila ang mismong mga kababayan nila.

Maraming mga tao ngayon ang nasa lansangan dahil Disyembre na kaya dapat maging mapagmatyag at alertado ang mga awtoridad.

Wala kayong karapatang magpakuya-kuyakoy.

Naglipana rin siyempre ang iba pang mga kriminal tulad ng holdaper, isnatser at iba pang masasamang loob.

Nariyan din na dapat n’yong bantayan ay ang vendors na atat na atat na namang bumalik sa bangketa.

Maraming masasamang loob ang mananamantala dahil alam nila na ang mga tao ngayon ay may mga pera.

Hindi lingid sa kaalaman ng mga pulis na tuwing sasapit ang ‘ber months’ ay dumarami ang mga tao sa Metro Manila.

Kaya nga pagdating ng holiday seasons ay hindi na sila pinapayagan na magbakasyon.

At alam din nila na kung kailan maraming tao ay saka sumasabay ang mga kriminal.

Payo naman po ng BOMBAHAN NA sa mamamayan na mag-ingat po kayo at maging mapagmasid sa kapiligiran.

‘Wag din po kayo magdadala ng mamahaling gamit tulad ng mga alahas sa tuwing lalabas kayo ng bahay para hindi kayo mabiktima ng mga masasamang loob.

Tiyakin n’yo rin po na naka-padlock ang inyong mga bahay bago po kayo umalis.

Ang kaligtasan po ninyo ay nakasalalay rin sa inyo.

Advance merry Christmas po sa ating lahat.

oOo

Pasabugin ang katiwalian, isumbong sa BOMBAHAN na, mag-email joel2amongo@yahoo.com//operarioj45@gmail.com (BOMBAHAN NA! / JOEL AMONGO)

Please follow and like us:
Read More

VENDORS SA QUEZON CITY NAGBABALIKAN NA NAMAN

BOMBAHAN NA FINAL

MISTULANG tiyangge na naman ang ibabaw ng flyover sa panulukan ng EDSA at Aurora Blvd. sa Cubao, Quezon City.

Bakit kamo? Nagbalikan na naman ang vendors sa area.

Ayon sa silipero ng BOMBAHAN NA, punong-puno na naman ng panindang mga damit at mga sapatos ang kuwadradong hugis ng flyover.

Hindi kaya napapansin ng Local Government Unit ng Quezon City ang mga vendor na ito?

Sa susunod na mga araw, lalo na ngayong buwan ng Disyembre, ay gagayahin na sila ng iba pang vendors.

Maganda na sana dahil kahit papaano lumuwag ang Metro Manila nang ipag-utos sa lahat ng LGUs ni Pangulong Duterte na linisin ang lahat ng sagabal sa kalye kasama na ang vendors.

Kaya lang, tulad ng sinasabi ng silipero ng BOMBAHAN NA, ningas-kugon lang ang ibang LGU.

Naalala ko tuloy ang sinabi ni Department Interior and Local Government (DILG) Undersecretary Ricojudge Echiverri na hindi nakikipagtulungan ang mayors at governors sa kampanya ng gobyerno laban sa ilegal na droga.

Tama si Usec. Echiverri dahil kung nakiisa ang LGUs sa kampanya ay hindi sana nahihirapan si Pangulong Duterte sa ‘war on drugs’.

Ganun din sa vendors, kung talagang hihigpitan nila ito ay hindi babalik ang mga iyan sa dati.

Ganun din naman, hindi mga dekalidad ang itinitinda sa kalye na mga damit, sapatos at gamit dahil mga peke ang mga ito.

Pawang mga ginaya lang sa mga kilalang brand.

Marami nang kumitang LGUs sa illegal drugs at vendors noong mga nakaraang administrasyon kaya sana tigilan na nila ang mga iyan.

Natatandaan ng BOMBAHAN NA, maraming LGUs sa Metro Manila na pagdating ng ‘ber months’ ay pinapayagan nilang gamitin ng vendors ang kani-kanilang mga bangketa at kalye.

Ang tanong tuloy ng mga silipero ng BOMBAHAN NA, saan napupunta ang mga ibinabayad ng bawat vendors? Na ang tawag nila ay ‘butaw’.

Naniniwala po ang BOMBAHAN NA kay Yorme Isko na inalok siya ng P5 milyon araw-araw, ‘wag lang paalisin ang mga vendor sa bangketa at kalye.

Naging palabigasan na nila ang mga vendor sa mahabang panahon.

Kaya ngayon, hindi na oobra yan kay Pangulong Duterte ‘yan.

Kaya sa LGUs na nagbulagbulagan, antayin n’yo na mapansin kayo ni Pangulong Duterte dahil hindi kayo sasantuhin.

Maging mapagmasid kayo  sa inyong mga paligid baka kayo’y napaiikot ng inyong mga tao.

Ang ire-report sa inyo ay puro maganda pero ang totoo kumikita na sila sa labas.

Ganun din po sa Metropolitan Manila Development Authority (MMDA), alam po natin na napapansin nila na nagbalikan na naman ang vendors sa flyover sa panulukan ng EDSA at Aurora Blvd.

‘Wag po kayo magbulag-bulagan, ‘pag bawal, bawal, ipatupad n’yo po nang tama ang batas.

oOo

Pasabugin ang katiwalian, isumbong sa BOMBAHAN NA, mag-e-mail joel2amongo@yahoo.com/operarioj45@gmail.com (BOMBAHAN NA / Joel Amongo)

Please follow and like us:
Read More

MAYNILAD AT MANILA WATER TAGILID SA 2020

BOMBAHAN NA FINAL

MUKHANG hindi magtatagal ang Maynilad at Manila Water bilang concessionaire ng Metropolitan Waterworks and Sewerage System (MWSS).

Bakit? Nagalit na si Pangulong Rodrigo Duterte sa dalawang kompanyang ito dahil sa halip na gumanda ang kanilang serbisyo sa mga Filipino ay puro pagkakakitaan ang kanilang ginagawa.

Hindi naresolba ng dalawang kompanyang ito ang problema sa kakapusan ng tubig.

Nitong nakaraang Oktubre 24, 2019 nakaranas  ng kakapusan ng tubig ang mga kosyumer sa Metro Manila na sinusuplayan ng tubig ng dalawang concessionaire na ito.

Nagalit ang Pangulong Duterte sa problema sa tubig na pinangangasiwaan ng Maynilad at Manila Water.

Dahil sa galit niya biglang naging normal ang supply ng tubig ng dalawang concessionaire sa kanilang mga kustomer.

Ang Maynilad Water Services Inc. ay pagmamay-ari ng kilalang negosyanteng si Manny Pangilinan, samantala ang Manila Water Company Inc. ay pagmamay-ari naman ng mga Ayala.

Kung ang BOMBAHAN NA ang tatanungin ay mas makabubuti na bawiin na lamang ang pangangasiwa nito mula sa Maynilad at Manila Water.

Sa ngayon, hindi makontrol ng gobyerno ang dalawang kompanyang ito kung anong gusto nilang gawin dahil sila ang nasusunod.

Tuwing may isasagawa silang pagsasaayos, ang kanilang ginastos ay binabawiin nila sa pamamagitan ng pagpataw sa mga kustomer sa  pagtataas ng singil sa tubig. Mahigit sa 6 mil­yong katao ang apektado nang hindi maayos na serbisyo ng dalawang concessionaire na ito.

Sa summer sa 2020 asahan pa ng mga konsyumer ng Maynilad at Manila Water ang mas malalang mararanasang kakapusan ng tubig.

Saan pupulutin ang lahi ni Juan ‘pag dumating ng panahon ng El Nino?

Kaya ngayon pa lang naisip na ni Pangulong Duterte na panahon para sipain ang dalawang concessionaire.

Nakita siguro ni Pangulong Duterte na hindi mareresolba ang problema ng tubig ng Maynilad at Manila Water.

Malamang sa 2020 ang dalawang kompanyang ito ay wala na sa negosyo ng tubig.

Labis na nagtataka ang taumbayan tuwing sasapit ang summer ay problemado ang bansa sa tubig.

Ang Pilipinas ay napakaraming source na pwedeng pagkunan ng supply ng tubig, pero bakit hindi ito masolusyunan?

Kaya nagdududa ang mga Pinoy na sobrang na sobrang pinagkakakitaan ng mga negos­yante ng tubig sa bansa.

Kung dati ay tubong lugaw lang, ngayon tubong tubig na ang mga negosyante.

oOo

Pasabugin ang katiwalian isumbong sa BOMBAHAN NA mag-e-mail sa joel2amongo@yahoo.com/operarioj45@gmail.com (BOMBAHAN NA! /  JOEL AMONGO)

Please follow and like us:
Read More

FIELD TRIP NAKATUTULONG BA SA MGA ESTUDYANTE?

BOMBAHAN NA FINAL

MASASABI nga bang educational ang isinasagawang field trip ng mga paaralan, pribado man ito o pampubliko?

May napupulot bang aral ang mga estudyante na sumasama rito?

May mga suhestiyong natanggap ang Bombahan Na mula sa silipero, na dapat itigil na ang field trip dahil wala naman daw napapala ang kanilang mga anak sa pagsama sa field trip kundi panganib lang.

Marami na kasing aksidente na nangyayari na kinasasangkutan ng mga field trip at may nagbuwis na rin ng buhay mula sa mga estudyante.

Sabi pa nga ng mga magulang, pinaganda lang ang tawag nila na ginawang “educational field trip” pero ang totoo ay wala namang natututunan ang kanilang mga anak.

Ang hindi pa maganda na ginagawa ng mga guro sa hindi nakakasama sa field trip na mga estudyante ay pinaparusahan nila.

Tulad ng pagpapagawa ng mga kung ano-anong project sa mga estudyante bilang kaparusahan sa hindi pagsama sa field trip.

Sinasabi rin ng mga guro na may plus 5 sa grade ng mga mag-aaral kapag sumama sa field trip.

Kung ano-anong pangungumbinsi ng mga guro sa kanilang mga estudyante para lang sumama rito.

Tulad na lang ang Bagumbong High School sa Brgy. 171, Zone 15, Caloocan City, ang mga estudyante na hindi sasama sa kanilang field trip sa darating Disyembre 2019 ay pagagawin ng thesis bilang kaparusahan.

Tama ba, DepEd Secretary Leonor Briones, ang ginagawang ‘yan ng mga guro?

Dahil hindi sasama sa field trip, parurusahan sa pamamagitan ng project?

Tapos papipirmahan pa sa kapirasong papel ang mga magulang na nagpapatunay na pumapayag na pasamahin ang kanilang mga anak sa field trip.

Para kung maaksidente ang sinasakyan ng mga estudyante ay lulusot kayo na pumayag naman ang mga magulang sa pagsama ng kanilang mga anak?

At hindi lang ‘yan, napakamahal pa ng kanilang singilan, P800 kada estudyante ang bayad sa fieldtrip.

“Sir, hindi po kaya pinagkakakitaan na ng mga guro ang field trip dahil sa laki ng singil nila bawat estudyante?”, tanong ng silipero ng Bombahan Na.

Hindi pa makalimutan ng Bombahan Na ang nangyaring aksidente ng bus na sinasakyan ng mga estudyante ng Bestlink School of Novaliches na nalaglag sa bangin sa Rizal at  maraming mga mag-aaral ang namatay.

Mga nasa kolehiyo na ‘yun, mas lalong delikado sa mga estudyante ng elementary at high school.

Halos hindi na mabilang ang mga namatay na estu­­dyante dahil lang sa aksidente sa field trip.

Kaya tuloy ang tanong ng nakararaming magulang, bakit hindi maipatigil ng DepEd ang field trip?Anong mayroon?

oOo

Pasabugin ang katiwalian mag-email sa joel2amongo@yahoo.com/operarioj45@gmail.com (BOMBAHAN NA! / JOEL AMONGO)

Please follow and like us:
Read More

SOBRANG POLITIKA NAKASASAMA

BOMBAHAN NA FINAL

SA halip na sumulong ang Pilipinas ay mabagal ang pag-angat ng bansa natin.

Tulad na lamang po ang kampanya ng gobyerno laban sa ilegal na droga.

Kesyo may mga nagsasabi na failure ang kampanyang ito ng gobyerno.

Sa tingin n’yo kundi si Pangulong Duterte ang naluklok sa Malakanyang ay nabawasan ang holdaper, hablutan ng cellphone, alahas sa jeep, masaker sa mga inosenting tao?

Na ang mga gumagawa ay lango sa ipinagbabawal na droga.

Hindi pa man siya nakauupo sa Palasyo ng Malakanyang ay marami na ang sumukong mga sangkot ng ilegal na droga.

Kitang-kita po natin sa tuwing umuuwi ang inyong lingkod ng hatinggabi mula sa pahayagan na dati kong pinagtatrabahuan ay harap-harapan nating nakikita na may nabibiktima ng hablutan ng cellphone at alahas.

Tuwing sasapit naman ang “ber months” kaliwa’t kanang holdapan ang nangyayari na ang biktima ay mga taxi driver at call center agents.

Sa ayaw at sa gusto n’yo, ngayon ay bihira na po kayong makarinig ng mga ganitong pangyaya-ri.

Ibig sabihin po nabawasan ang salot sa lipunan na mga lango sa ilegal na droga.

Hindi man totally nawala ang ilegal na droga sa bansa pero malaki ang nabawas nito.

Simple lang po wala na pong nadidiskubreng shabu laboratory hindi katulad ng dati na kaliwa’t kanang may nababalitaan tayong may niri-raid.

Sabi nga ni Sen. Bato Dela Rosa, hindi perpekto ang kampanya ng gobyerno laban sa ilegal na droga.

Ayon pa sa dating PNP chief, hindi biro ang ginagawa ng mga awtoridad sa paglaban sa mga sangkot sa ilegal na droga.

Pero nakatitiyak ang senador na malaki ang nagawa nila para mabawasan ang mga nasa likod nito.

Inihalimbawa pa ni Sen. Bato na maging ang mauunlad na bansa tulad ng Amerika, Columbia, Mexico at marami pang iba ay hindi perpekto ang kanilang kampanya laban sa ilegal na droga.

Naniniwala po ang BOMBAHAN NA sa sinasabi ni Sen. Bato dahil ang makagagawa lamang ng perpektong gawain ay ang Pangulong Diyos lamang po.

Mas makabubuti po kesa batikusin n’yo ang gobyerno sa paglaban sa salot na ilegal na droga ay tumulong na lang po kayo.

Para sa atin lahat po ito.

Mahirap labanan ang hindi matinong pag-iisip tulad ng mga lango sa shabu.

May suhestiyon lang po sa gobyerno ang BOMBAHAN NA unahin po ‘yung pinagmumulan ng ilegal na droga tulad ng mga financier, drug lord at protektor.

Pag binarahan n’yo po ang tubig ay wala nang dadaloy sa ibaba na ang sumasahod ay ang mga ordinaryong mamamayan.Sabi nga ni Sen. Bato, kung hindi makatutulong si Vice President Leni Robredo sa kampanya, tama lang na tinanggal siya ni Pangulong Duterte bilang anti-drugs czar.

Hindi maaaring walang mamatay ang giyera ng gobyerno laban sa ilegal na droga.

Hindi normal ang pag-iisip ng isang tao na bangag sa ilegal na droga.

Kailangan din sa mga paaralan ay palakasin ang kampanya laban sa ilegal para malaman nila ang masamang dulot nito sa tao.

Sa mga politiko naman, ‘wag n’yo politikahin ang isyu ng kampanya ng gobyerno sa ilegal na droga.

Tumulong na lang kayo kung paano ito malulutas nang parepareho tayong nakatutulog ng mahimbing.

oOo

Pasabugin ang katiwalian mag-email sa joel2amongo@yahoo.com/operarioj45@gmail.com (BOMBAHAN NA! / JOEL AMONGO)

Please follow and like us:
Read More

COLLEGE FREE TUITION ‘DI PARA SA LAHAT?

BOMBAHAN NA FINAL

HINDI lahat ng gustong mag-aral na lahi ni Juan ay nabibigyan ng free tuition sa govt universities at colleges.

Maraming magulang ang nagrereklamo na hindi nakapag-aaral ang kanilang mga anak partikular dito sa Metro Manila.

Bakit kamo?Akalain ba naman natin na kasama pala sa school requirements ng govt universities at colleges ay kailangan botante ang estudyante o dili kaya’y ang kanyang magulang sa siyudad o munisipalidad na kung saan ang eskuwelahan.

Siyempre walang pakinabang ang mayor ng siyudad o munisipalidad na nagpapatakbo ng local universities at colleges sa kanila.

Paano pala ‘yung mga bakwit na pamilya tulad halimbawa nang galing sa Mindanao? Ibig niyong sabihin hindi na sila makaka-enrol at makikinabang ng free tuition sa universities at colleges na pinatatakbo ng local government units?

Baliktarin kaya natin ang sitwasyon, kayo ang maging bakwit, sila ang nakapwesto at nagpapatakbo ng mga eskuwelahan ng LGUs at ‘di rin kayo bigyan ng free tuition. Ano kaya mararamdaman n’yo?

Dahilan daw kasi ng management ng mga eskuwelahan na prayoridad nila ay mga residente nilang mga botante.Tukuyin po natin ang universities at colleges na may ganitong klaseng patakaran na pinatatakbo ng LGUs ay ang Quezon City University (QCU dating QCPU) at University of Caloocan City (UCC).

Kahit na residente ka na ng kanilang mga siyudad subalit hindi ka naman botante wala ka pa rin pakinabang sa kanila.

Ano ‘yan hostage? Sa ayaw at sa gusto n’yo ay mapipilitan kayong ma­ging botante ng kanilang lugar para lang makinabang kayo ng free tuition.

Kawawang lahi ni Juan napaglalaruan ng mga politiko.Alam kaya ni Pangulong Duterte ang ganitong klaseng kalakaran ng universities at colleges?

Gusto pa man din niya na makapagtapos ng pag-aaral ang mga kapus palad na mga Pinoy.

Ang ganitong klaseng mga patakaran ay anti-poor at makasarili.

Obyus ang mga diskarte n’yo para lang makabawi kayo sa kanila ginawa n’yong school requirement ng inyong mga eskwelahan ang pagiging botante sa inyong siyudad o munisipalidad ang mga magulang ng mga estud­yante.

Sana mapansin ito ni Pangulong Duterte, ang ganitong klaseng mga patakaran sa govt universities at colleges.

At para mapatunayan ng lahi ni Juan na ang ‘edukasyon sa Pinas ay para sa lahat’.

Dahil sa ipinagmamalaki ng gobyerno na free tuition fee.

Marami din daw sa govt universities at colleges ang hindi nakatatanggap ng pondo mula sa free tuition program ng gobyerno.

Kaya isa sa dahilan ito na ‘di sila tumatanggap ng hindi botante sa kanilang lugar.

Hala sige,  Adios!

oOo

Pasabugin ang katiwalian isumbong sa Bombahan Na mag-email joel2amongo@yahoo.com//operarioj45@gmail.com. (BOMBAHAN NA! / JOEL AMONGO)

Please follow and like us:
Read More

‘PINAS SINAKOP NA NG MGA ALIEN?

BOMBAHAN NA FINAL

NAGMAMAKTOL ang labor groups sa bansang ‘Pinas dahil sa pagdagsa ng  mga Intsik (alien) na kaagaw nila sa trabaho.

Nagkalat daw ang Chinese nationals sa bansa na makikita sa iba’t ibang lugar sa Metro Manila at makikita sila sa mga gusali at hotel.

Hindi lang sa Metro Manila, maging sa Cebu City, Pampanga, Laguna, Batangas at iba pang lugar ay naglipana ang mga Tsekwa.

Ayon sa isang opisyal ng BIR, wala pang 100k ang legal na Chinese nationals na nasa ‘Pinas.

Ibig sabihin, sila lang ang pwedeng magtrabaho sa Inang Bayan ni Juan.

Pero ayon sa nakuhang detalye ng “Bombahan Na” halos abutin na ng 500K na Tsekwa ang nasa ‘Pinas ngayon.

“Sir, baka po sinakop na po tayo ng mga Intsik (alien) n’yan?,” tanong pa ng isang silipero ng Bombahan Na.

Hindi po makakapayag si President Duterte nyan.

Kaya nga po kaliwa’t kanan ang isinasagawang pagsalakay ng Bureau of Internal Revenue (BIR), Bureau of Immigration (BI) at iba pang ahensiya ng gobyerno na may kinalaman sa mga alien.

Kaya nga problemado ngayon ang gobyerno kung saan nila ikukulong ang kanilang nahuling mga intsekto….este mali, Intsik pala, sori po!

Naalala ko tuloy nang mag-umpisa ang anti-drug campaign ng  ni Pangulong Duterte na dumami ang huli ng mga pulis na sangkot sa ilegal na droga.

Sumakit ang ulo nila kung saan ikukulong ang mga peste… este mali na naman, mga adik pala.

Balik po tayo sa mga alien na mga singkit, madali naman pong malaman kung sila ay mga Tsekwa dahil bukod sa singkit sila ay mga sakang pa.

Wala rin silang alam na ibang salita kundi kanila lang lengguwahe.

Kaakibat ng kanilang pag­dagsa sa ‘Pinas ay ang ilegal na kanilang mga gawain.

Nariyan na ‘yung kidnapin nila ang kanilang kapwa at pabayarin ng ransom ang mga kamag-anak ng kanilang mga biktima.

Sila rin ang madalas na mahulihan ng bulto-bultong shabu.

Anak kayo ng mga tokwa’t baboy!

Pumasok na nga kayo sa bansa namin, nagkakalat pa kayo?!

At Hindi lang mga lalaki ang pumapasok sa ‘Pinas na Tsekwa, may bitbit din silang taga-aliw na kababaihan.

Ika nga sa salitang kalye, ‘mga kalapating babae ang lipad’.

Kumpletos rekados na sila sa Bayan ni Juan.

Kasi nga naman kumita na sila rito kailangan din naman nila maglibang ‘pag nalulumbay ang kanilang kalalakihan.

Ano kayo sinuswerte?

Kaya hamon tuloy ng mga silipero ng “Bombahan Na” ‘wag matutulog sa pansitan ang mga awtoridad natin para hindi tayo tuluyang masakop na ng mga alien.

Kaya gustong-gusto ng mga alien ang ‘Pinas dahil mahilig daw sa dayuhan ang mga Pinoy.

Sabi nga nila ‘Its more fun in the Philippines’.

Uror! Hindi masaya sa inyo ang lahi ni Juan dahil ina­agawan n’yo kami ng mga kabuhayan.

Obyus na kaya gusto ng mga dayuhan sa ‘Pinas dahil bukod sa maganda ang klima rito ay mayaman pa tayo sa natural resources.

Ala na silang hahanapin pa, mababait na ang mga Pinoy, maganda pa ang lugar at makatitipid pa sila.

Kasi mura ang gastusin dito tulad ng hotels, pagkain at beach resorts na naggagandahan.

Ito ang mga gustong-gusto ng mga dayuhan.

Kaya hamon sa tagapagbantay ng alien sa gobyerno ay maging mapagmatyag sila para hindi tayo nalulusutan nila.

Sa inyo po nakasalalay ang kaligtasan ng sambayanan.

oOo

Pasabugin ang katiwalian isumbong sa “Bombahan Na” mag-email joel2amongo@yahoo.com/operarioj45@gmail.com (BOMBAHAN NA! / JOEL AMONGO)

Please follow and like us:
Read More

3 POLICE MAJORS NASAMPOLAN KAY LT. GEN. GAMBOA

BOMBAHAN NA FINAL

HINDI pa man umiinit ang puwet ni Philippine National Police (PNP) Officer-In-Charge (OIC) Lt. General Archie Gamboa ay nakatikim na ng kanyang hagupit ang tatlong police majors.

Ang tatlong pulis na ito ay nangutong daw kaya naabala ang pagbili ng body-worn cameras na gagamitin sana sa anti-drug operations.

Tinutukoy po ni Sir Archie ay sina P/Maj. ­Emerson Sales, P/Maj. Rholly Caraggayan at PMaj. Angel Beros.

Ang tatlong itlog na ito ay kasama sa technical working group na ­hinihingian nila ng limang milyong piso (P5M) ang bidder na magsu-supply sana ng 300 ng body ­cameras na nagkakahalagang 334 milyong piso.

Taong 2018 ini-release ang pondo at nagkaroon ng bidding na walo ang sumali.

Habang nasa kalagitnaan ng post qualification sa bidding ay nabuking ang tatlong itlog na miyembro ng technical working group na nanghihingi ng limang milyong piso.

Pera na, naging bato pa?! Boundary na sana ang tatlong kulukoy na ito kung hindi nabulilyaso ang transaksyon.

Malas n’yo lang dahil nakatuon si Gen. Archie sa paglilinis sa hanay n’yo.

Hindi pa kayo nakuntento tinaasan na nga ang mga suweldo n’yo ni ­Pangulong Duterte suma-side line pa kayo sa ilegal?

Sinayang n’yo ang pagsusunog ninyo ng inyong mga kilay para lang makarating kayo sa mga ranggo na ‘yan.

Ngayon hindi lang kayo ang apektado pati ang mga pamilya n’yo lalo na ang inyong mga anak na nagsisipag-aral. Bully ang aabutin nila sa kanilang mga kaklase.

Anong sasabihin sa kanila? Mga pulis nga Daddy nila mga kurap naman.

‘Yan ang gusto n’yong mangyari sa mga anak ninyo? Kakahiya kayo!

“Baka naman po hindi lang tig-iisang pamilya ang mga ‘yan kaya ganyan po sila kakurap?”, tanong po ng isa sa nakausap nating empleyado ng gobyerno.

Hindi naman po ­lingid sa kaalaman ng mga empleyado ng gobyerno ang nakalagay sa batas ng Ombudsman at Civil Service Commission (CSC) na maging simple ang kanilang pamumuhay.

‘Di baleng yumaman ka kung galing naman sa mabuti, pero kung galing sa masama may problema ka.

Pwede po kayo isailalim sa lifestyle check at kung hindi magkatugma ang inyong yaman sa iyong sweldo… may kakaharapin po kayong kaso.

Iisa lang po ibig sabihin, ang yaman mo ay nanggaling sa masamang paraan.

Mas masarap pong mabuhay na yumaman na hindi galing sa masama at ang dahilan ay galing sa negosyong legal.

Pwede naman po tayong magnegosyo ng legal, kesa pumatol po tayo sa ilegal.

Malaking tulong po ng body cameras na ito sa police ­operations laban sa ilegal na droga.

Buhay po ng mga awtoridad ang nakasalalay riyan at makikita rin ang totoong pangyayari ng operasyon.

Hindi naman kaya nasanay sa ilegal na gawain ang tatlong itlog na ito?

Kasong administratibo ang kinakaharap ng tatlo matapos kasuhan.

Payo po natin sa iba pang mga pulis magbago na po kayo at baka kayo na ang maisunod pa ni sir Archie.

oOo

Pasabugin ang katiwalian isumbong sa BOMBAHAN NA mag-email joel2amongo@yahoo.com at operarioj45@gmail.com (BOMBAHAN NA! / Joel Amongo)

 

Please follow and like us:
Read More

NAGPAPA-UPA, UMUUPA HUMINGI NG PAYO SA BOMBAHAN NA

BOMBAHAN NA FINAL

NOONG nakaraang Oktubre 29, 2019, dakong alas-12:47 ng hapon dumating ang email sa atin mula kay Aries Esperanza.

Narito po ang laman ng kanyang email:

May tanong lang po ako about sa pagpapaupa, hingi na din po ako ng payo, nanay ko po kasi nagpapaupa ng bahay ung umuupa po sa amin hindi na po nakabayad ng dalawang buwan higit pa dun nahatak na po ung metro ng Meralco nila wala na po silang kuryente, tapos po kinaumagahan ginawa ng umuupa sa amin nilagyan ng tap ung metro ng Meralco para po magkakuryente sila, ilegal na po ginawa nila at mapapahamak pa ung metro ng Meralco ng paupahan ng nanay ko. Pinatanggal na din po ng nanay ko ung tap. Natatakot lang po ako kasi sa susunod panigurado baka maputulan naman ng tubig ung paupahan ng nanay ko. Ano po ba ang dapat gawin ng nanay ko? maraming salamat po.

Sagot:

Magandang araw po, Aries,

Mali po ang ginawa ng nag-uupa sa nanay mo na mag-tap siya sa linya ng kuryente ng Meralco, tama po kayo na ang mapapahamak ang inyong ina pag nalaman na ang nakatira sa inyo ay ilegal na nag-tap ng kuryente.

Kung sa nanay nyo po nakapangalan ang kuryente na nakakabit sa bahay nila sa kanya po ipapataw ang multa niyan pag nahuli ng inspector ng Meralco yan.

Mas makabubuti po na ipatawag n’yo sa barangay ang nag-uupa sa nanay niyo at dun n’yo pag-usapan ang problema na yan.

Para maiwasan po ang sigalot at para dun na rin ang magkasundo ang kagkabilang panig tungkol sa usapin na yan. Maraming Salamat po sa tiwala!

oOo

Nag-email din po si Princes Daisy Gula sa BOMBAHAN NA noong nakaraang Nobyembre 11, 2019, dakong alas-5: 18 ng umaga tungkol sa kanilang inuupahan.

Narito po ang bahagi ng nilalalam ng kanyang email:

Good morning po, gusto ko pong humingi ng advice kung ano po  ang dapat kung gawin. Kalilipat ko lang po dito sa inuupahan kong bahay, bali may isang buwan lang po ako dito. Ngayon po wala po kaming contract ng may-ari ng bahay. Bali ang dating nangupahan dito ay co-parent ko. Sa telephone lang kami nag-usap ng may-ari ng bahay. Nagkaayos kami ng may-ari ng bahay na ako na ang uupa sa paupahan nya pag kaalis ng co-parent ko. At ipinadala ko sa kanya ang down payment at advance through Palawan na 8,000 pesos na bawasan po ng transaction fee. Ngayon po, wala pa po ako isang linggo bigla po siya ay nag-text sa akin na hanggang katapusan na lang ng October kami dito, kasi daw babakbakin yong bahay nila dahil sa gagawa ng side walk. Eh ang laki pa po ng space sa harapan ng bahay na ito. Pati po yong katabing bahay pinaalis din po n’ya, tapos ngayon may naka­lagay na for rent. At tinaasan nya ng upa dating P4,500 ngayon mas mataas na kasi malapit sa palengke at terminal ng jeep. Eh kalilipat lang din po dito ang palengke at terminal ng jeep ilang buwan palang po. Ngayon po sabi sa akin ng may-ari ng bahay na dapat makaalis na kami ng katapusan ng October eh wala pa po akong isang linggo dito sa bahay n’ya. Ibabalik nalang daw niya yong P4,000 na deposit ko. Para magamit ko sa paghahanap ng malilipatan. Binalik Naman po n’ya yong P4,000. Ngayon po humingi ako ng extension hanggang Nov. 8, kaso bago po kami makaalis nagkaproblema sa lilipatan sana namin. Kaya ngayon po himingi uli ako ng extension sa may-ari. Na dito muna kami, babayaran ko naman ang upa hanggang makahanap ako uli ng malilipatan. Hindi po s’ya pumayag. Kasi may naka-usap na siyang uupa dito at gagawing bigasan sa halagang P10,000 pesos. Ano po ba ang dapat kung gawin? Bali po sa ngayon nagamit ko na po yong advance ko na P4000 wala na po akong deposit dito. Sa Dec 1 po uli ako mag-iisang buwan uli. Sana po matulungan n’yo po ako. Salamat po. PS. Attorney daw po ang may-ari ng bahay.

Yan po  ang sulat ni Daisy sa BOMBAHAN NA sa pamamagitan ng email.

Sagot:

Napansin po ng BOMBAHAN NA sa huling paragraph ng email ni Maam Daisy na may binanggit na ‘PS Attorney’ daw po ang may-ari ng paupahan na inuokupa niya.

Kung totoong abogado po ang may-ari ng paupahan na inuokupahan ni Maam Daisy dapat alam n’ya po ang Republic Act (RA) No. 9653 o mas kilala sa tawag na “Rent Control Act of 2009”.

Una po, dapat may kontrata siyang ibinibigay sa mga nag-uupa sa kanya.

Sa Section 2. ‘Declaration of Policy’ – hindi basta pwedeng magtaas ng upa ang may-ari ng paupahan upang protektahan ang mababang kita ng mga nag-uupa.

Ito pa sa Section 4. ‘Limit on Increase in Rent’ – sa loob ng isang taon mula na naging epektibo ang batas, walang pagtataas na dapat ipatupad sa mga residential unit na sakop nito.

Magtaas man ng buwanang renta ay hindi lalagpas ng 7% taunan hanggang nakaokupa pa ang dating nangungupahan.

Kung mababakante naman ang residential unit mula sa dating nag-uupa (lessee) ay maaari nang tumanggap ang nagpapaupa (lessor) ng panibagong mag-uupa.

Sa Section 5. ‘Coverage of this Act’ – sakop nito lahat ng residential units sa National Capital Region at iba pang highly urbanized city o mauunlad na siyudad sa buong bansa.

Tinutukoy po ang renta ay mula sa P1.00 hanggang P10,000 at lahat ng residential units sa iba pang lugar na may buwanang upa mula P1.00 hanggang P5,000 na walang nananatiling kontrata.

Sa section 6.’ Authority to Continue Rental Regulation’ – ang Housing and Urban Development Coordinating Council (HUDCC) kasama ng National Statistics Office, ang magtatakda kung nararapat ba ang pagtataas base sa inflation rate on rentals.

Base naman sa Section 7. ‘Rent and Requirement of Bank Deposit’ – ang renta ay kailangan bayaran ng mas maaga ng limang araw kada buwan o depende sa nakalagay sa kontrata.

Sa Section 9. ‘Grounds for Judicial Ejectment’ – Maaari lamang paalisin ang nangu­ngupahan kung sa loob ng tatlong buwan ay hindi na siya nakakabayad ng renta.

Hindi rin basta-basta pwedeng paalisin ang nangungupahan na hindi natatapos ang kanilang kontrata.

Kinakailangan ding magbigay ng nagpapaupa ng kaukulang formal notice sa nangungupahan sa loob ng tatlong buwan.

Ipinagbabawal din sa batas na ito ang gawing dahilan ng pagbebenta o pagsanla ng may-ari ng residential unit kaya niya pinaalis ang mga nangungupahan sa kanila.

Ang sinumang lumabag nito base sa Sec. 13.  Penalties, ay pagmumultahin ng hindi bababa ng twenty-five thousand pesos (P25,000.00) at hindi naman lalagpas ng fifty thousand pesos (P50,000.00) o pagkakulong ng  hindi bababa ng isang taon at isang araw at hindi lalagpas ng anim na buwan.

‘Wag po natin balewalain ang batas.

Dapat po sa mga barangay ay alam nila ang RA No. 9653 o “Rent Control Act of 2009”.

Simula po nang ilabas ng BOMBAHAN NA ang isyung ito ay marami na ang humingi ng advise sa atin.

Marami po kasing hindi nakakaalam sa batas na ito.

Mas nakakaalam po sa usa­ping ito ay ang mga tanggapan ng gobyerno na HUDCC at ang Housing and Land Use Regulatory Board (HLURB).

Pero kung mareresolba naman ang usapin sa paupahan sa barangay level pa lamang ay mas maganda.

Kaya dapat ang mga Lupon-Taga Pamayapa ng Barangay ay alam nila ang RA No. 9653 o “Rent Control Act of 2009”.

May hinihiling lang po ang BOMBAHAN NA sa mga humihingi ng advise at mga tanong, dapat po ilagay ang inyong mga pangalan at address.

Muli maraming salamat po sa inyong tiwala.

Pagpalain po tayo ng Poong May Kapal.

oOo

Pasubugin ang katiwalian isumbong sa BOMBAHAN NA mag-email joel2amongo@yahoo.com/operarioj45@gmail.com. (BOMBAHAN NA! / JOEL AMONGO)

Please follow and like us:
Read More

BATAS SA PAUPAHAN (RA No. 9653)

BOMBAHAN NA FINAL

SINADYA po natin muling talakayin ang batas sa paupahan o ang Republic Act (RA) No. 9653 o mas kilala sa tawag na “Rent Control Act of 2009”.

Marami pong natanggap na email ang BOMBAHAN NA mula sa mga suki nating mambabasa na nangungupahan at nagpapaupa.

Tulad ng ating sinabi kamakailan sa ating naunang labas kaugnay sa paupahan na may kanya-kanyang karapatan ang mga nangungupahan (lessee) at nagpapaupa (lessor/owner) ng bahay o apartment.

Isa-isahin po natin para sa kapakanan ng mil­yong Pinoy na walang sariling bahay at nangu­ngupahan.

Napansin po natin na maraming interesado sa ating tinalakay sa paupahan, nagpapatunay lamang po niyan na marami sa atin ang hindi alam ang batas na ito.

Kadalasan po nagkakaroon ng alitan ang umuupa at nagpapaupa dahil ang magkabilang panig ay hindi alam ang kani-kanilang mga karapatan.

Malinaw po sa RA No. 9653 na kailangang may kontrata sa pagitan ng nagpapaupa at umuupa.

At kailangan ang kontrata ay hindi lilihis sa batas na ito, para walang malabag sa probisyon nito.

Sa Section 2. “Declaration of Policy” – hindi basta pwedeng magtaas ng upa ang may-ari ng paupahan upang protektahan ang mababang kita ng mga umuupa.

Tinutukoy po sa batas na ito kung ang babayaran sa upa ay buwanan o iba pang paraan ng pagbabayad.

Sa Section 4. “Limit on Increase in Rent” – sa loob ng isang taon mula nang maging epektibo ang batas, walang pagtataas na dapat ipatupad sa mga resi­dential unit na sakop nito.

Magtaas man ng buwanang renta ay hindi lalagpas ng 7% taunan hanggang nakaokupa ang dating nangungupahan.

Kung mababakante naman ang residential unit mula sa dating nag-uupa (lessee) ay maaari nang tumanggap ang nagpapaupa (lessor) ng panibagong uupa.

Hindi pinahihintulutan ng batas na ito ang pagtataas ng renta sa mga boarding house, dormitories, rooms at bedspaces para sa mga estudyante ng mahigit o minsan sa bawat taon.

Sa Section 5. “Coverage of this Act” – sakop nito lahat ng residential units sa National Capital Region at iba pang highly urbanized city o mauunlad na siyudad sa buong bansa. Na ang renta ay mula P1,00 hanggang P10,000 at lahat ng residential units sa iba pang lugar na may buwanang upa mula P1.00 (piso) hanggang P5,000 na walang nananatiling kontrata.

Sa section 6. “Authority to Continue Rental Regulation” – ang Hou­sing and Urban Development Coordinating Council (HUDCC) kasama ng National Statistics Office ang magtatakda kung nararapat ba ang pagtataas base sa inflation rate on rentals.

Base naman sa Section 7. “Rent and Requirement of Bank Deposit” – ang renta ay kailangan bayaran nang mas maaga ng limang araw kada buwan o depende sa nakalagay sa kontrata.

Hindi rin pinapayagan ng batas ang nagpapaupa na humingi ng mahigit sa isang buwang advance sa renta, subalit pinahihintulutan siyang maningil ng mahigit sa dalawang buwan na deposit na ilalagay sa lease contract nito at makukuha ng umuupa kasama ng tubo nito sa bangko na pinaglagakan nito.

Subalit kung mayroong electric, telephone, water bills o iba pang nasira sa bahay/paupahan ang nasabing advance ay maiiwan sa nagpapaupa para pang-abono sa mga nasabing bayarin o nasira.

Sa Section 9. “Grounds for Judicial Ejectment” – Maari lamang paalisin ang nangu­ngupahan kung sa loob ng tatlong buwan ay hindi na siya nakababayad ng renta.

Hindi rin basta-basta pwedeng paalisin ang nangungupahan na hindi natatapos ang kanilang kontrata.

Kinakailangan ding magbigay ng nagpapaupa ng kaukulang formal notice sa nangungupahan sa loob ng tatlong buwan.

Maaari namang magpaalis ang nagpapaupa kung ang kanilang gusali ay isasaayos o ipagagawa dahil sa kalumaan na nito na maaaring pagmulan ng disgrasya.

Ipinagbabawal din sa batas na ito na gawing dahilan ang pagbebenta o pagsanla ng may-ari ng residential unit kaya niya paaalisin ang mga nangu­ngupahan sa kanila. (BOMBAHAN NA! / JOEL AMONGO)

Please follow and like us:
Read More

KOLORUM NA COURIER COMPANY DUMAMI

BOMBAHAN NA FINAL

NAGLIPANA ang mga kolorum o fly-by-night courier company sa Pilipinas.

At alam niyo ba kung sino ang mga may-ari nito? Mga Tsekwa na naman.

Ayon sa silipero ng BOMBAHAN NA, wala raw pakinabang ang gobyerno rito dahil mga wala raw binabayarang buwis ang mga ito.

Kaya naman ‘tubong lugaw’ ang negosyo ng mga Tsekwang ito sa ba­yan ni Juan.

Hindi na magtataka ang BOMBAHAN NA, na mga Chinese ang nasa likod nito dahil sa dami na nilang nakapasok sa Pilipinas.

Kahit saang gusali sa Metro Manila at kalapit na mga lalawigan ay makakakita kayo ng Chinese nationals.

Hindi maikakaila dahil kakaiba ang itsura nila, mga singkit at mahilig silang tumambay sa tapat ng mga gusali na kanilang tinutuluyan.

Balik po tayo sa mga kolorum na courier company.

Isa po sa mga itinuturong ilegal ay ang kilalang Alibaba.com

Para sa kaalaman ng mambabasa ng BOMBAHAN NA, ang Alibaba.com ay pag-aari ng Alibaba Group Holding Li­mited, isang Chinese multi-national conglomerate holding company specia­lizing sa e-commerce, retail, internet at technology.

Itinatag ang kompanyang ito noong Abril 4, 1999 sa Hangzhou, China.

Isa lang sa may-ari nito ay ang pinakama­yamang tao sa mundo na si Jack Ma.

Kamakailan ang ma­mang ito ay nasa Pilipinas at nagtungo pa sa Palasyo ng Malakanyang.

Ganun?

Kawawang local courier company sa Pilipinas, apektado ng negosyo ni Jack Ma.

Sana silipin ng gob­yerno partikular ng Bureau of Internal Re­venue (BIR), Department of Trade and Industry (DTI) at Securities and Exchange Commission (SEC) kung paano nilang matutulungan ang local mga courier company para hindi sila tuluyang magsara.

Sila po ang mga lehitimong nagbabayad ng buwis at tumutulong sa pamahalaan sa oras ng pangangailangan.

Sila rin po ang nagbibigay ng maraming trabaho sa mga Pinoy.

Sa ganang akin, dapat ay magkaroon ng matibay na regulasyon ang gobyerno ukol dito.

Kailangan ikonsidera nila ang kapakanan ng local courier company kesa malalaking kompanya na pagmamay-ari ng mga dayuhan dahil wala namang pakinabang ang gob­yerno sa kanila.

Dapat mag-level up na rin ang mga batas ng Pilipinas, kailangan makasabay tayo sa mabilis na pagbabago ng teknolohiya sa buong mundo.

Sa ayaw at sa gusto natin ay kailangan natin mag-adjust pati ang ating mga batas.

Halos lahat na ng klase ng pagbili at transaksyon ay idinadaan na sa Internet ngayon. Kung hindi kikilos ang ating mga mambabatas at mga nakaupo sa gobyerno ay lalong mapag-iiwanan ng ibang bansa ang Pilipinas.

Matatalino ang lahi ni Juan kaya lang may pagkatamad iyong iba.

Kailangan ngayon pa lang ay kumilos na tayo at baka paggising natin sa mga susunod na araw ay sinakop na tayo ng China.

Tulong-tulong po tayo para sa kaunlaran ng Inang Bayan.

oOo

Paglilinaw lang po dun sa kolum natin noong nakaraang Oktubre 31 patungkol kay Mayor David Navarro na pinatay sa Cebu City, hindi po PNP Region 5 yun, kundi PNP Region 7 ang tinutukoy po natin dun. Nagkamali lang po tayo ng pag-type ng numero.

oOo

Pasabugin ang katiwalian, isumbong sa BOMBAHAN NA mag-email joel2amongo@yahoo.com at operarioj45@gmail.com

Please follow and like us:
Read More

PAGPATAY KAY MAYOR NAVARRO MALA-PELIKULA

BOMBAHAN NA FINAL

HINDI akalain ng BOMBAHAN NA ang estilo ng pananambang sa pelikula ay ganun din sa tunay na buhay.

Bakit nasabi natin ‘yan?

Kung ang pagpatay kay Clarin, Misamis Occidental Mayor David Navarro kamakailan ay katulad ng nangyari sa reenactment ng PNP Region V ay parehong-pareho sa pelikula na kitang-kita ang kapalpakan ng mga pulis.

Ang nangyari, base sa reenactment, pinalagpas muna ng mga salarin ang unang convoy na escort ni Mayor Navarro bago hinarang ang kanyang sinasakyan na marked vehicle ng PNP kung saan kasama niya ang kanyang mga escort at kasunod ang isa pang sasakyan na may sakay ding mga police escort.

Tinutukan ng mga criminology… este mga kriminal pala ang dalawang sasakyan nang hindi pumapalag ang mga escort na pulis ni Mayor Navarro.

Kaya naman mala­yang nakuha at pinababa sa sasakyan ng mga armadong lalaki si Mayor Na­varro saka tinadtad ng bala sa mukha at iba’t ibang parte ng katawan.

Tameme ang mga pulis habang pinauulanan ng bala ng armalite ang alkalde na walang kalaban-laban.

Sabi nga ng kapatid ni Mayor Navarro, wala man lang siyang narinig na putok mula sa kanilang mga kasamang pulis.

Balik po tayo dun sa parang pelikulang nangyari, kadalasan po kasi ang mga pulis sa pelikula kung dumating ay tapos na ang banatan. Darating sila para ipunin na lang ang mga patay.

Saka maghahanap ng punerarya na kanilang kontak para kunin ang mga bangkay.

Ganun po ba sir? Ba­kit po, may komisyon po ba ang mga pulis sa mga patay na kanilang inire-refer sa mga punerarya? Tanong ng silipero ng BOMBAHAN NA.

Hindi naman po ako awtoridad o nag-aral pagdating sa pag-escort, halatang may milagrong nangyari sa pagpatay kay Mayor Navarro.

Natural pag-escort ang mga pulis ay alertado yan pero dito sa pangyayari ay mga kalmado lang sila. Anyare?

Sa pagkakaalam po ng BOMBAHAN NA, sa sandaling may humarang na sasakyan sa convoy ng escort sa kanilang dadaanan ay yuko agad sila at takpan ang kanilang binabantayan sabay paputok ng kanilang mga baril sa kalaban na humarang sa kanila.

Sabay suporta naman ng putok ng kani-kanilang mga baril din ang mga escort na nasa likod ng sasakyan ni Mayor Na­varro. Bakit wala, sabi pa ng mga utol ni Mayor na kasama niya sa sasakyan?

Isa pang malaking katanungan ay kung bakit nakalayo agad ang unang sasakyan ng escort din ni Mayor Navarro?

Planado po ba sir? Tanong pa ng isang silipero ng BOMBAHAN NA.

Inamin naman ni PNP Region 7 Director, Chief Supt. Val de Leon na mabilis ang pangyayari kaya walang nagawa ang kanyang mga tauhan kundi itaas na lang ang kanilang mga kamay.

Ibig sabihin, mas mabilis ang mga kriminal kesa sa mga awtoridad?

Parang inamin ni Gen. Val na totoo pala ang nangyayari sa pelikula na mabagal ang mga pulis pagdating sa mga ganyang pangyayari.

Hindi po kinakampihan ng BOMBAHAN NA si Mayor Navarro, ang sa atin lang po ay maging makatotohanan po tayo.

Paano po makakakuha ng tiwala ang mga pulis mula sa taumbayan kung ganyan ka-lousy ang pinaggagawa nila?

Hawak na ng maraming pulis si Mayor Navarro napatay pa ng mga kriminal?

Maging si Pangulong Duterte ay duda sa pagpatay kay Mayor Navarro.

Kaya ang National Bureau of Investigation (NBI) ay pasok sa imbestigasyon sa kaso.

Hala! Sige, abangan na lang po natin ang gagawing imbestigasyon ng NBI.

Pangarap po nating lahat na maibalik ang tiwala ng taumbayan sa mga pulis, sana po sa pamamagitan ng hihiranging bagong PNP chief ay magawa nya ito.

Mabuhay po ang Pambansang Pulisya!

oOo

Pasabugin ang katiwalian, isumbong sa BOMBAHAN NA mag-email joel2amongo@yahoo.com

Please follow and like us:
Read More

K-12 PROGRAM NAKABUTI NGA BA?

BOMBAHAN NA FINAL

MAY napala nga ba ang mga Pinoy sa pagpapatupad ng K-12 Prog­ram ng Department of Education (DepEd)?

Matigas ang sagot ng ibang mga magulang na nagpapaaral ….WALA..!!!!!!!!!!!!!!!!!!!!!!!!!!!!!

Isa-isahin po natin ang negatibong epekto ng K-12 Program sa mga bata. Una, ang mga nagtapos ng SENIOR HIGH SCHOOL ay hindi rin makapasok sa trabaho dahil ang tinatanggap ng mga kompanya ay at least 2nd year college.

Sinasabi ng mga kompanya na ang nagtapos ng SENIOR HIGH ay hindi maituturing na 2nd year college  dahil ang tinapos niya ay high school pa lang.

Pangalawa, wala rin natutunan ang nagtapos nito dahil wala namang kagamitan ang mga eskuwelahan na kanilang pinasukan. Karamihan din sa mga eskwelahan na nagtuturo ng senior high school ay pawang mga pribado,  magkaroon man sa pampubliko, ay sobra-sobra ang dami ng mga estudyante.

Pang-apat, lalong dumami ang hindi na tumutuloy sa kolehiyo dahil sa haba na ng taon ng kanilang ginugol sa pag-aaral ay tinatamad na silang magtapos ng college.

Panglima, ang mga nagtapos ng high school na may mga edad na ay nawalan na ng pag-asa na muli silang makapag-aaral sa kolehiyo at makapagtapos ng apat na taon na kurso o higit pa dahil nahihiya na silang muling bumalik sa high school.

Duda tuloy ng taumbayan, ang mga nasa likod ng pagpapatupad ng K-12 Program ay nakipagsabwatan lang sa mga may-ari ng mga pribadong eskuwelahan para kumita sila dahil halos lahat ng mayroong senior high school ay nasa private school.

Kung iimbestigahan ng Kongreso ang usapin sa K-12 Program ay laliman pa nila at tanungin nila ang mga magulang ng mga nagtapos ng senior high school kung nasaan na ang kanilang mga anak ngayon.

Hindi pa maganda riyan sinasabi nila na pagpasok mo sa senior high ay preparasyon yan para sa pagkuha mo ng kurso sa kolehiyo.

Kung halimbawa ang kinuha mo noong nasa senior high ka ay may kinalaman sa pagluluto na kurso at nang mag-eenrol ka na sa kolehiyo ay naisipan mong kumuha ng ibang kurso dahil nagbago ang isip  mo ay hindi ka na ba pwede mag-iba ng kurso?

Imbes na pagtuunan nila ng pansin ang karagdagang pondo para sa mga bagong class room, maraming guro at seminars sa kanila ay iba ang pumasok sa kanilang mga isipan.

Dahilan pa ng mga nag-isip ng K-12 ay para makasabay daw tayo sa iba’t ibang bansa sa mundo na may ganitong prog­rama ng kanilang edukasyon.

Kahit na sampung taon (10) lang ang igugol ng mga mag-aaral mula elementary hanggang high school kung sapat naman ang mga guro, libro, classrooms at mga seminar sa mga teacher siguradong hindi magpapahuli ang mga Pinoy sa katalinuhan sa ibang lahi.

Saan ngayon ang malaking pondo ng K-12 Program, nalusaw lang nang walang napala ang taumbayan.

Suggestion po ng BOMBAHAN NA sa Kongreso, magpa-survey po kayo sa mga magulang kung sang-ayon ba sila o hindi sa K-12 Program.

Ang BOMBAHAN NA na mismo ay tutol sa K-12 Prog­ram dahil alam kong walang mapapala ang mga Pinoy dito.

‘Wag puro pansarili, mag-isip naman po tayo para sa a­ting kapwa.

oOo

Pasabugin ang katiwalian magsumbong sa BOMBAHAN NA. mag-email joel2amongo@yahoo.com (BOMBAHAN NA! / JOEL AMONGO)

Please follow and like us:
Read More

PAALALA VS. HUMAN TRAFFICKING

BOMBAHAN NA FINAL

MARAMING beses nang nagpaalala si Bureau of Immigration (BI) Commssioner Jaime Morente na mag-ingat laban sa sindikato ng human trafficking na nag-o-operate sa bansa pero binabalewala pa rin ng mga Pinoy.

Nito lang Oktubre, taong ito, hindi bababa sa 21 katao ang naharang ng mga tauhan ng Immigration na nakatalaga sa iba’t ibang paliparan sa bansa na biktima ng human trafficking.

Sa report ni BI Port Operations Division Chief Grifton Medina, apat na hindi dokumentadong Overseas Filipino Workers (OFWs) ang tinanggap bilang Household Service Workers (HSW) sa bansang Dubai.

Kung hindi tayo nagkakamali, ito ang dating tinatawag na Domestic Helper (DH).

Siyembre, hindi sila dokumentado kaya hinarang sila ng mga tauhan ng Immigration sa Ninoy Aquino International Airport (NAIA).

Nangyari ang pagharang sa kanila noong nakaraang Oktubre 9, 2019 ng mga miyembro ng Bureau’s Travel Control and Enforcement Unit (TCEU) ng BI.

Tinangka ng apat na lumipad patungong Bangkok, Thailand at nagpanggap na mga turista. Pasaway!

Buti na lang alertado na, talentado pa ang mga tauhan ni sir Jaime M.

Hindi magkakatugma ang sinasabi ng mga biktima ng human trafficking patungkol sa mga dokumento nila kaya naman nahalata ng mga taga-TCEU na hindi silang totoong mga turista.

Plano raw ng handler ng apat na pagdating nila sa Bangkok ay muli silang paliliparin patungong United Arab Emirates (UAE) para sa final destination.

Kaya kayo napapahamak sa ibang bansa dahil pumapatol kayo sa ilegal na proseso, tapos pag nagkaproblema kayo sisihin niyo ang gobyerno? Galing noh!?

Hindi kayo natatakot na pagdating nyo sa ibang bansa walang kasiguruhan ang inyong pupuntahan?

Hindi hanapbuhay ang pupuntahan nyo run kundi hanap patay.

Tiyak na kapahamakan ang mapupuntahan nyo. Kaya maraming napapahamak sa mga Pinoy sa ibang bansa lalo na riyan sa Gitnang Silangan dahil ilegal ang pagpasok nyo.

Malalaman pa ba ng gobyerno at kamag-anak nyo kung gagawan kayo ng masama habang nasa bahay kayo ng Arabong walang puso sa mga kasambahay?

Kahit anong pagsisikap ng administrasyong Duterte na protektahan ang mga OFW, pero kung kayo naman ay hindi nag-iingat para sa sarili nyo hindi matitigil ang pang-aabuso sa inyo.

Madali namang makapag-abroad nang legal, bakit pa kayo pumapatol sa ilegal?

Bakit kailangan nyo pang magpapanggap na mga turista para lang makapag-abroad kayo?

Nitong nakaraang Oktubre 16 at 17, labing pito (17) katao na naman ang naharang ng mga taga-Immigration sa Mactan Airport.

Pasakay na sana papuntang Hong Kong at Macau ang mga Pinay na ito.

At pagdating nila run ay muli silang sasakay ng eroplano papunta sa kanilang final destination sa UAE at Qatar. Ang titigas talaga ng mga ulo nyo!

Sa Mactan airport na sana palulusutin ng sindikato ang kanilang mga kliyente pero nabisto sila ng BI.

Para lang kayong nagtatapon ng basura sa ibang bansa ah!

Sana makarma itong nambibiktima ng mga kababayan natin.

Ayon kay Ma. Asuncion Palma-Gil, BI-MCIA’s travel control and enforcement unit (TCEU) head, ang 17 pasahero ay offloaded na ng  limang iba’t ibang flights at ang 13 sa mga ito na-hire para magtrabaho sa Dubai, samantalang ang apat ay papuntang Qatar.

Hindi alam ng mga ito ang kanilang travel itinerary, malalaman lang nila pagdating nila sa HongKong at Macau at dun na sasabihin sa kanila ng kanilang handler (miyembro ng sindikato).

Sa ganyang diskarte pa lang, dapat matakot na kayo.

Kaya ‘wag kayong magagalit pag hinarang kayo ng mga taga-Immigration dahil inililigtas lang kayo sa tiyak na kapahamakan.

Pwede naman kayong mag-abroad nang legal, bakit kailangan nyo pang dumaan sa ilegal?

oOo

Pasabugin ang katiwalian, isumbong sa BOMBAHAN NA mag-email joel2amongo@yahoo.com/operarioj45@gmail.com (BOMBAHAN NA! / JOEL AMONGO)

Please follow and like us:
Read More

GOLDROCK NAGLABAS NG SERTIPIKASYON

BOMBAHAN NA FINAL

NAGLABAS na ng sertipikasyon ang Goldrock Construction & Deve­lopment Corporation na nagpapatunay na wala silang transaksyon sa bentahan ng Ford Ran­ger kay Herminio Tadeo, Jr.

Ang sertipkasyon na may petsang Oktubre 15, 2019 ay pinirmahan ni Anselmo Tuplano, kinatawan ng Goldrock Construction & Development Corp. na may tanggapan sa Caloocan City.

Tinutukoy sa sertipikasyon ang Ford Ranger DBL 2.2L pick-up na may serial number MNCDMFF20D-W2222, motor no. P4T1136293, Plate No. WIH-995.

Nakapaloob pa sa sertipikasyon ni Ginoong Anselmo na nagkaroon lamang siya ng transaksyon ng bentahan ng sasakyan (Ford Ranger) noong Agusto 28, 2014 sa Milestone Guaranty and Assu­rance Corporation.

Ang transaksyon ay nagkakahalaga ng P900,000 sa pamamagitan ng ‘deed of sale’ sa pagitan nila ni Norbeto Sauco, presidente ng Milestone Guaranty and Assurance Corporation.

Mula kay Ginoong Sauco ay naibenta naman ang Ford Ranger kay Rommel Gutierez sa halagang P400k na may orihinal ding mga dokumento.

Naibenta naman ito ni Gutierez kay Quizon sa halagang P550,000.00 sa pamamagitan ng ‘open deed of sale’.

Kalaunan ay napunta kay Tadeo na may ipinakikitang ‘deed of sale of motor vehicle’ daw nila ni Tuplano noong Pebrero 27, 2015.

Pano yan Col. Tadeo sir, naglabas na ng sertipikasyon si Mr. Tuplano ng Goldrock na wala raw kayong naganap na bilihan ng sasakyan?

Maging ang pirma na nakalagay sa pangalan niya sa ipinagawang deed of sale ay itinatanggi niya.

May paglalagyan itong sina Col. Tadeo at lawyer na nagnotaryo sa ginagamit niyang deed of sale ng Ford Ranger.

Col. Tadeo sir,  kahit anong tago mo lalabas at lalabas ang katotohanan na hindi mo totoong nabili ang Ford Ranger kay Tuplano.

Ayan na lumutang na si Mr. Tuplano at nagbigay na ng serpikasyon na wala kayong transaksyon na may kaugnayan sa sasakyan.

Kala mo hindi makahahanap ng kakampi ang kawawang apo ni Dolphy.

Kasunod niyan Col. Tadeo sir, ay patung-patong na kaso ang darating sayo.

Maghanda ka na dahil ang problemang ito ay nakarating na kay DILG Secretary Eduardo Año.

At antayin mo na rin ang imbestigasyon sayo ng Senado at dun ka magpaliwanag kung bakit napunta sayo ang Ford Ranger ni Quizon at Montero ni Jason Lee.

Ayon pa sa silipero ng BOMBAHAN NA, ang guma­gamit daw ng Ford Ranger na pag-aari ni Quizon ay anak ni Tadeo habang ang Montero naman ni Jason Lee ay siya mismo.

Dapat lang na maisalang itong si Col. Tadeo sa Senado nang magisa ito ng mga senador at para maituga kung paanong napunta sa kanya ang Ford Ranger ni Quizon.

Para malaman din ang katotohanan na si Jason Lee ay suspek sa nakumpiskang 400 kilos ng shabu sa Pampanga noong 2014.

Baka may kinalaman ito sa isyu ng ‘ninja cops’ na tinalakay kamakailan sa Senado.

Naiparating na ang isyung ito sa Senado, maaaring sa mga susunod na araw ay iimbitahan na si Col. Tadeo.

Payong kapatid ng BOMBAHAN NA sa ilang pulis, magbago na kayo, nilakihan na nga ang sweldo n’yo ni Pangulong Duterte hindi pa rin kayo tumitigil sa mga kalokohan nyo.

Ang panlalamang sa kap­wa ay panlalamang na rin sa Panginoon.

Mahalin po natin ang ating kapwa at mamahalin din po tayo ni Lord.

oOo

Pasabugin ang katiwalian, magsumbong sa BOMBAHAN NA, mag-email joel2amongo@yahoo.com.

Please follow and like us:
Read More

MGA MENSAHE PARA SA BOMBAHAN NA

BOMBAHAN NA FINAL

ALAS-10:38 ng umaga nitong nakaraang Oktubre 6 nang may mag-text sa BOMBAHAN NA.

Ang buod ng mensahe ay negatibo laban sa nagbitiw na PNP chief na si Gen. Albayalde at sa kanyang mga dating tauhan na tinaguriang mga “ninja cop”.

Tinanong din ng texter kung bakit wala akong isinusulat tungkol kay Albayalde.

Ang texter ay nagpatago sa alyas na Amigo ng Romblon.

Bilang tugon, nais ko munang humingi ng paumanhin sayo “Amigo” dahil ngayon ko lang nabigyang-pansin ang mensahe mo.

Sa tingin po ng BOMBAHAN NA, mas mabuti ang ginawa ni Albayalde na nag-resign kasi sa dami ng mga heneral na nagdiin sa kanya ay lalo pang nalulubog sa kahihiyan ang buong organisasyon ng PNP.

Hindi po biro na tatlong ka-mistah niya ang nagdiin sa kanya sa usapin ng ‘agaw-bato’ ng ninja cops sa Pampanga ilang taon na ang nakalipas.

Hintayin na lang po natin ang susunod na kabanata dahil may mga impormasyon ang BOMBAHAN NA na sasampahan ng kaso si Gen. Albayalde.

oOo

Pinaaalis ng landlord

Isang alyas Bernadette naman ang nagpadala ng email sa Bombahan na nitong Oktubre 2 at humi­hingi siya ng payo kaugnay ng kanyang inuupahang commercial space.

Nakasaad sa email ni Bernadette na noong Setyembre 10, taong ito ay binigyan sila ng palugit na sampung araw ng kanilang landlord para lisanin ang inuupahang commercial space.

Ani Bernadette, 13-taon na silang umuupa sa lugar at may kontrata na halos pabor sa nagpapaupa pero ngayong taon ay wala na umano silang pinirmahang kontrata.

“Pinaaalis kami para ilipat sa inuupahan namin yung isang nagnenegosyo na tinamaan ng widening at clearing operation dito sa lugar namin. Sa dami naming umuupa at kami ang halos pinakamatagal, kami pa ang pinaalis. Samantalang yung iba, hindi naman. Kung magsasampa po ba ako ng kaso sa may-ari, may laban po ba kami? Kasi ang laking perwisyo sa amin dahil naapektuhan ang aming hanapbuhay.” Bahagi ng email ni Bernadette.

oOo

Sinisingil ng interes

Isa pang tagasubaybay ng BOMBAHAN NA ang nagpadala ng email para idulog ang kanyang problema sa bahay na inuupahan niya mahigit tatlong taon na ngayon.

Ayon sa nagrereklamong si alyas John, isang OFW, na taga-Tabaco City sa Albay, naospital ang kanyang misis kaya hindi sila nakapagbayad ng isang buwang upa.

Nagulat si John nang padalhan siya ng mensahe ng kanilang landlord na nagsasabing kailangan nilang magbayad ng interes dahil sa pagka-delay ng kanilang bayad sa upa.

Ang banta pa raw ng landlord ay kung hindi nila tutubuan ang renta ay maghanap na sila ng ibang matitirhan ngayong Oktubre.

Isinumbong din ni alyas John na walang iniisyung official receipt ang may-ari ng paupahan tuwing magbabayad sila kundi tanging papel na sulat-kamay ang nilalaman.

Tanong pa niya, “Ano po ang maaaring hakbang namin kontra sa nagpapaupa kung ang kondisyon niya tulad ng nasulat ko ay hindi karapat-dapat para sa umuupa?”

oOo

Binabaha ang inuupahan

Tanong naman ni alyas “Shayne”, ano ang dapat gawin kung ang inuupahang bahay ay binabaha sa loob taliwas sa sinasabi ng nagpapaupa na maayos ang bahay?

Dahil umano sa pagpasok ng tubig sa kanilang tirahan ay may mga gamit nang nasira kina Shane. Tanong niya, “May karapatan po ba ka­ming umalis at ipasagot sa kanila ang gastos sa paglilipat ng mga gamit?”

Ayon pa kay Shane, makailang ulit na nilang ipinaalam sa kanilang landlord na malakas ang tubig na pumapasok partikular sa kusina tuwing bumubuhos ang ulan pero wala itong aksyon.

oOo

Salamat po sa inyong pagtangkilik sa BOMBAHAN NA, mangyaring hintayin na lamang ang aking tugon sa inyong email.

oOo

Pasabugin ang katiwalian, magsumbong sa BOMBAHAN NA, mag-email joel2amongo@yahoo.com o mag-text sa 0977-751-18-40. (BOMBAHAN NA! / JOEL AMONGO)

Please follow and like us:
Read More

MGA PAPELES NG SASAKYAN PINEKE NG OPISYAL NG PNP

BOMBAHAN NA FINAL

NAGREKLAMO ang apo ng namayapang comedy king na si Dolphy na tinangay ng isang opisyal ng Philippine National Police (PNP) ang kanyang sasakyan na binili na second hand.

Ang reklamo ni Roland Bill Quizon, anak ni Rolly Quizon, ay nag-ugat sa umano’y bigla na lang pagkuha o pag-agaw ng isang Herminio Tadeo Jr., umano’y police colonel, ang kanyang nabi­ling Ford Ranger mula sa isang Rommel Gutierrez.

Iisa-isahin ng ka-BOMBAHAN NA ang kuwento ng pagsasalin-salin ng pag-aari sa nasabing sasakyan na nabiling brand new ng Goldrock Construction and Development Corporation na naisalin naman sa Milestone Gua­ranty and Assurance Corporation sa pamamagitan ng presidente ng nasabing kumpanya na si Norberto Sauco.

Nabatid pa ng BOMBAHAN NA na nabili naman ni Rommel Gutierrez sa halagang P400,000 ang nasabing sasakyan na may kumpletong papeles mula kay Sauco bago naipasa kay Quizon na ang pinag­hawakan ay “open deed of sale.”

Matapos mabili ni Quizon ang nasabing sasakyan, bigla na lang lumutang si Tadeo at inangkin ang sasakyang nabili ng apo ng comedy king.

Mabuti na lang, lumutang ang unang may-ari ng sasakyan na si Alselmo Tuplano ng Goldrock Construction and Development Corporation na nagsabing siya ang orihinal na may-ari nang pinag-aawayang puting Ford Ranger model 2014.

Sinabi nitong si Tuplano na wala siyang na­ging transaksyon sa isang Herminio Tadeo Jr. Ang natatandaan niya umano ay kaagad niyang ibinenta ang sasakyan sa Milestone Guaranty & Assurance Corporation sa pamamagitan ng Presidente na si Norberto Sauco.

Subalit nang kunin ni Tadeo ang sasakyan mula kay Quizon ay may ipinakita itong deed of sale na pirmado ni Tadeo.

Aba, aba, aba dapat talagang tirahin ng BOMBAHAN NA itong si Tadeo na umano’y colonel dahil hindi magandang halimbawa ang kanyang ginagawang katarantaduhan sapagkat siya dapat ang magbigay proteksyon sa mamamayan at hindi siya ang dapat na mang-api.

Paano mo maipapaliwanag ngayon ang rek­lamo sa iyo Col. Tadeo?

Naikuwento pa ng nagrereklamo kung paano inagaw sa kaniya ang sasakyan na hindi rin naman tamang asal ng isang opisyal ng pulisya.

Nabatid na ilang armadong lalaki ang nagtungo sa opisina ng amo ni Quizon sa San Simon, Pampanga kung saan nagkataon na wala roon  ang apo ng pumanaw na comedian kaya’t pinabalik siya ng kanyang amo dahil may naghahanap na mga lalaki sa kanya.

Mabilis na bumalik sa Quizon subalit nagpasama sa kanya ang mga lalaki patungo sa talyer ng isang Ronald Lorenzo sa Barangay Sulipan, Apalit, Pampanga at pagdating sa lugar ay hinanap ng mga armadong lalaki ang sasakyang Mitsubishi Montero ng isang Jason Lee Barkin.

Dahil hindi nila alam ang itinatanong, sinagot nila ang mga armadong lalaki na hindi nila alam kaya’t tinangay ng mga ito ang Ford Ranger kasama si Quizon na nilagyan ng piring at iniwan sa sementeryo ng San Simon.

Inabandona naman ng mga armadong lalaki ang Ford Ranger sa San Simon na narekober ng mga tauhan ng Highway Patrol Group kaya’t dinala sa Camp Olivas na sinasabing kinuha naman ni Col. Tadeo matapos ipresinta ang isang ‘deed of sale’  na umano’y binili niya kay Tuplano ang Ford Ranger.

Dito nabuking si Tadeo na hindi totoo ang kanyang sinasabi dahil hindi naman siya umano kahit kailan nakatransaksyon o nakausap si Tadeo.

Naku, lagot na Col. Tadeo, nangangamoy rek­lamo laban sa iyo.

Naku pag nalaman yan ng dalawang magi­giting na mga senador na sina Sen. Ping  Lacson at Sen. Dick Gordon magigisa ka nila sa Senado.

Mga pakibusisi nyo rin po mga sir, kung sino po itong Jason Lee na nagmamay-ari ng Montero na kinuha din ni Col. Tadeo.

Ayon po sa silipero ng BOMBAHAN NA kasama raw itong si Jason Lee ng mga Chinese na nahulihan 400 kilos ng shabu noong 2014 sa Pampanga.

Sinasabi ring si Col. Tadeo ay financier ng talyer ni Lorenzo at madalas tambay doon sina PO1 Torqueza at PO1 Cabilde ng Apalit Pampanga Police Station.

Dapat matakot na si Col. Tadeo dahil kapag nagkaroon ng imbestigasyon at sumabit ang kanyang pangalan kasabay nang pagpapatunay ng kanyang mga kalokohan, tiyak na magsasama sila sa National Bilibid Prison ni Maj. Baloyo.

Tandaan dapat ng mga pulis, “lahat ng baho ay umaalingasaw.”

Abangan… may karugtong pa.

Dios mio mahabagin, Amen.

oOo

Pasabugin ang katiwalian magsumbong sa BOMBAHAN NA mag-email joel2amongo@yahoo.com (BOMBAHAN NA! / JOEL AMONGO)

Please follow and like us:
Read More

APO NI DOLPHY NAGSUMBONG SA BOMBAHAN NA

BOMBAHAN NA FINAL

NAPAIYAK ang apo ng yumaong komedyanteng si Dolphy habang ikinukwento sa Bombahan Na ang kalupitang dinanas umano niya mula sa isang mataas na opisyal ng Philippine National Police (PNP).

Na naman?!

Itago muna natin ang kanyang pangalan sa initials na ‘RBQ’, anak siya ni Rolly Quizon.

Kwento ni RBQ, taong 2014 nang mabili niya ang sirang Ford Ranger (Model 2014) na kulay puti sa halagang P550,000 mula sa isang namimili ng mga nabanggang sasakyan.

Mula sa Milestone Guaranty & Assurance Corporation (dating Eastern Assurance and Surety Corporation) na matatagpuan sa no. 2654 Saygan St., Malate, Manila ay naibenta ang sasakyan sa ibang tao.

Ang nasabing Ford Pick-up ay unang binili ng Goldrock Construction and Development na matatagpuan sa GCDC Building, #78 Conception St., Morning Breeze Subdivision, Caloocan City.

Nang mabangga ito ay nagtamo ng malaking sira sa harapan nito.

Dahil naka-insured ang sasakyan, binayaran ito ng Milestone Guaranty & Assurance Corporation kaya’t naiwan ang sasakyan sa kanila.

Binili naman ito ni Rommel Gutierez, residente ng Riverside, San Nicolas, Bulacan mula kay Norberto Sauco, presidente ng Milestone Guaranty & Assurance Corporation sa halagang P400,000,00.

Ang bilihan ay sa pamamagitan ng Deed of Sale na may petsang Hulyo 29, 2015.

At kalaunan ay nabili ni RBQ ang Ford Ranger mula kay Gutierez sa halagang P550,000.00 sa pamamagitan ng “Open Deed of Sale”.

Matapos mabayaran ni RBQ ang sasakyan ay nakuha niya ito sa opisina ng Goldrock Construction and Development.

Agad ipinagawa ni RBQ ang sasakyan sa isang nagngangalang Ronald Lorenzo ng Brgy. Sulipan, Apalit, Pampanga noong Oktubre 2014.

Noong Marso 23, 2015, tinawagan si RBQ ng among si Dave Dungo dahil may mga kalalakihan na naghahanap sa kanya. Agad namang tinungo ni RBQ ang lugar ng amo at doon ay nadatnan niya ang mahigit sa walong kalalakihan.

Ang pakay umano ng mga lalaki ay para hanapin ang Montero na pag-aari ng isang Jason Lee. Bagaman sinabi ni RBQ na wala siyang alam ay isinama siya ng mga lalaki matapos piringan ang kanyang mga mata.

Pagdating sa sementeryo ng San Simon ay ibinaba si RBQ at tuluyan nang tinangay ng kalalakihan ang kanyang sasakyan. Kalaunan ay inabandona ang Ford Ranger sa isang lugar sa San Simon kung saan ito narekober ng Highway Patrol Group ng Pampanga.

Ang sasakyan ay dinala sa Camp Olivas sa San Fernando, Pampanga pero kinuha ng isang nagpakilalang SSupt. Herminio Tadeo. Jr. dahil pag-aari umano niya ang Ford Ranger.

Si Tadeo ay may ipinakitang Deed of Sale na may petsang Feb 27, 2015, subalit nanotaryuhan noong March 24, 2015 at nabili niya raw ang Ford Rander kay Anselmo Tuplano ng Goldrock Construction & Development.

Kaduda-duda ang “deed of sale of motor vehicle” na ginagamit ni Tadeo dahil sinulat lang ng ballpen ang halaga ng sasakyan at pangalan nito.

Paanong nabili ni Tadeo ang sasakyan kay Tuplano samantalang nabayaran na ito ng insurance kay Tuplano at nasa pangangalaga na ng Milestone Guaranty & Assurance Corp.?

Itinanggi rin ni Tuplano na nagkaroon sila ng transaksyon o bentahan ng Ford Ranger ni Tadeo at hindi rin niya pirma ang ginagamit sa deed of sale nito.

Hindi pa nakuntento si Tadeo sa pag-angkin ng sasakyan ni RBQ, ipinakulong pa niya ito ng apat na taon sa kasong carnapping.

Sa susunod ay ibubulgar natin kung saan nakapuwesto itong si Tadeo at sino ang Jason Lee na nagmamay-ari ng Montero na hinahanap nila. Abangan…

oOo

Pasabugin ang katiwalian, mag-sumbong sa BOMBAHAN NA, mag-email joel2amongo@yahoo.com (BOMBAHAN NA! / JOEL AMONGO)

Please follow and like us:
Read More

MANGMANG O NAGMAMAANG-MAANGAN LANG?

BOMBAHAN NA FINAL

HINDI maintindihan ng BOMBAHAN NA, kung walang alam o sinasadyang hindi sundin ng mga tauhan ng Marikina Police Headquarters ang Executive Order No. 02 o mas kilala sa tawag na Freedom of Information (FOI).

Ang EO No. 02 ay nilagdaan ni Pangulong Rodrigo Roa Duterte noong Hulyo 23, 2016.

Isa-isahin po nating ipaliwanag sa mga pulis sa Marikina City para maintindihan nila.

Basahin n’yo ito Madamme Ofelia Cruz, secretary ni Marikina City Chief of Police SSupt. Restituto Arcangel; PSInsp. Mauro Gerero at imbestigador na si Ventura para malinawan n’yo ang nilalaman ng FOI EO No. 02.

“The FOI Executive Order provides for full public disclosure of all government records involving public interest, and upholds the constitutional right of people to information on matters of public concern.”

Ang FOI ay binibigyan ng buong laya ang publiko sa lahat ng ahensiya ng gobyerno na makakuha ng mga dokumento na may kinalaman sa public interest.

“Every Filipino shall have access to information, official records, public records and to documents and papers pertaining to official acts, transactions or decisions, as well as to government research data used as basis for policy development”.

Bawat lahi ni Juan ay binibigyan ng karapatan na magkaroon ng access para sa impormasyon. Official records, public records at maraming iba pa.

Sa E.O. 2 Sec. 3: The Order defines “information” to include any:records, documents, papers, reports, letters, contracts, minutes and transcripts of official meetings, maps, books, photographs, data, research materials, films, sound and video recording, magnetic or other tapes, electronic data, computer stored data, any other like or similar data or materials recorded, stored or archived in whatever format, whether offline or online, which are made, received, or kept in or under the control and custody of any government office pursuant to law, executive order, and rules and regulations or in connection with the performance or transaction of official business by any government office.

Mas malinaw pa sa sikat ng araw ‘yan, kung ano ang nakapaloob sa FOI E.O. 2 na pinirmahan ng Presidente ng Pilipinas.

Ngayon ano ‘yang pinapipirmahan n’yo sa tao na form na gusto lang tingnan ang police blotter, pahihirapan nyo pa?

Mga mangmang ba kayo o nagmamaang-maangan lang kayo?

O baka may pinagtatakpan kayo?

Ipaliwanag n’yo ‘yan sa taumbayan, Sr. Supt. Arcangel kung bakit hindi nyo sinusunod ang FOI E.O. 2 na pinirmahan ni Presidente Duterte.

Dapat National Capital Region Police Office (NCRPO) Director Maj. General Guillermo Eleazar sir, i-seminar ang mga tauhan ng Marikina Police Headquarters sa nilalaman ng FOI kasi hindi nila alam.

Sumunod na sa proseso nila ang BOMBAHAN NA, nag-fill up na sa kanilang FOI Form natapos na’t lahat hindi pa rin ipinasilip sa atin ang police blotter.

Dinala pa kami ni Ventura sa opis ni SInsp. Gerero at nakipagtalo pa sa BOMBAHAN NA tungkol sa nilalaman ng FOI pero bandang huli ay inamin niyang hindi pa siya nagse-seminar tungkol dito.

Kahit grade 1 mga silipero ng BOMBAHAN NA, makakaintindi siya sa nilalaman ng FOI, pero itong mga Police Marikina ay hindi nila maintindihan.

Baka naman natutulog sa pansitan ang mga ito.

Dapat siguro gisingin ni Gen. Eleazar ang mga ito nang matauhan.

Nababalot na kayo sa kontrobersiya dahil sa pagkakabulgar ng ‘Ninja Cops’ ngayon dinadagdagan nyo pa ng isa pang kapalpakan.

Magbasa kayo tungkol sa mga batas nang hindi kayo napupulaan, kakahiya kayo!

Pagka ganitong nakakaharap nating mga pulis ay mabilis na humahaba ang balbas natin sa stress dahil nakikipagtalo pa, mali naman ang pinagsasabi.

Porke’t mga pulis sila pakiramdam nila lagi silang tama.

Mag-seminar nga kayo patungkol sa FOI para magmukhang may alam kayo.

Dokumento o kontrata nga patungkol sa proyekto pinapayagan na makakuha ang ordinaryong mamamayan ng kopya base sa FOI, police blotter lang ayaw nyong ipakita?

Ayan sir Resti, basahin n’yo rin ang nilalaman ng FOI E.O 2 para malaman n’yo.

May kasabihan tayo na mahirap gisingin, ang gising. Ganun siguro sila, nagmamaang-maangan lang kasi nga baka may makitang pinagtatakpan nila na ayaw maibulgar ng media.

Maging makatotohanan po tayo sa lahat ng panahon, Amen.

oOo

Pasabugin ang katiwalian magsumbong sa BOMBAHAN NA, mag-email joel2amongo@yahoo.com o kaya magtext sa 0977-751-40-74. (BOMBAHAN NA / Joel Amongo)

Please follow and like us:
Read More

PATAKARAN NG QCU TALIWAS SA GUSTO NI PRES. DIGONG?

BOMBAHAN NA FINAL

MEDYO lihis sa gusto ni Pangulong Rodrigo Duterte ang patakaran na pinaiiral ngayon sa Quezon City University (QCU) dating Quezon City Polytechnic University (QCPU).

Bakit kamo?

Sa kabila na pinaglaanan na ni Pangulong Duterte ng pondo ang universities at colleges na pag-aari ng gobyerno para libre nang makapag-aral ang lahat ng lahi Juan, may panibagong problema na naman.

Tungkol sa usapin ng bayaran.

Isa na rito ang QCU na dating QCPU na ang kanilang main ay nasa Brgy. San Bartolome at bran­ches nito sa San Francisco at Batasan, pawang matatagpuan sa Quezon City.

Noong Setyembre 13, 2019 may inilabas ang QCU sa kanilang Facebook page na nagsimula na silang tumanggap ng applications for admission noong nakaraang Setyembre 16 para sa 2nd Semester of SY 2019-2020.

Ito ay para sa mga returning student at transfe­rees ng unibersidad.

Ibig sabihin, kung ikaw ay dati nang estud­yante sa paaralan na natigil ka dahil sa kakulangan ng budget tapos ngayon gusto mo muling mag-aral dahil libre na ang tuition o natigil ka lang sa pag-aaral sa nasabing eskuwelahan, muli ka nilang isasailalim sa entrance exam.

At hindi lang ordinaryong eksaminasyon, may bayad at tumaas pa lalo.

Kung dati na may tuition pa sa QCPU ay P100 hanggang P200 lang ang bayad sa entrance exam, ngayon na libre na ang tuition itinaas pa nila ito sa P500.

“Sir, wala pong pakialam sa mahihirap yang mga namumuno riyan sa QCU, gusto po nila sila ang masusunod hindi ang kagustuhan ni Pangulong Duterte,” pahayag ng silipero ng BOMBAHAN NA.

Tama nga naman ang sinabi ng silipero ng BOMBAHAN NA, Si Pangulong Duterte gusto niya lahat ng mga Filipino ay makapag-aral sa pamamagitan ng pagbibigay ng pondo sa mga unibersidad at kolehiyo ng gobyerno.

Tapos ang unibersidad at kolehiyo na pinatatakbo ng mga lokal na pamahalaan ay kung anu-ano pang ipinatutupad para lang makapagbayad ang kanilang mga estudyante.

At ang kanilang pinahihirapan pa ay ang transferees at returnees.

Alam nyo ba kung ano ang pinagdaanan kaya natigil ng pag-aaral ang isang returnee?

Alam nyo rin ba kung bakit may transferee o lumipat sa inyong unibersidad?

Kung tunay na may malasakit kayo sa kapwa, hindi nyo na pahihirapan ang gustong mag-aral.

Ika nga ay ang edukasyon ay para sa lahat.

Malay nyo ang transferee na pinahihirapan nyo ay ga­ling sa magulong lugar tulad sa Mindanao at yung returnee ay nagkaroon ng problema sa budget ang kanilang pamilya.

Hindi nyo ba naisip ang mga yan?

Paalala lang po sa mga chief executive o mayor na may nasasakupang unibersidad at kolehiyo, hindi nyo pag-aaari ang mga paaralan na yan.

At lalong walang utang na loob sa inyo ang taumbayan, kayo ang may utang na loob dahil kung hindi kayo binoto wala kayo ngayon sa kinalalagyan nyo.

Baliktad ang ginagawa nyo, gusto nyo taumbayan ang magkaroon ng utang na loob sa inyo.

Iba na ang panahon ngayon sa dati, hindi na uubra ang bulok na sistema.

Ngayon pag mali kayo, mali talaga. Dati nagagawa nyo pa kahit na mali ay ginagawa nyong tama.

Natatandaan pa natin na kahit na nagpahayag na si Pangulong Duterte na libre na ang tuition sa mga unibersidad at kolehiyo ng gobyerno, ang QCPU ay hindi agad nagpatupad nito.

May masama ring patakaran sa mga eskuwelahan na pinatatakbo ng local government unit. Pag hindi rehistrado o botante ang mga magulang sa kanilang lokalidad ay hindi nila tatanggapin ang anak ng mga ito.

Gusto talaga paikutin ng mga LGU na ito sa kanilang palad ang mga residente sa kanilang nasasakupan.

Kawawang Juan Dela Cruz, sana lang lahat ng Mayor tulad ni Isko.

Hayahay sana ang buhay ng lahi ni Juan. Adios!

Hindi po natin personal na kakilala si Mayor Isko pero nakikita po natin na may katotohanan ang kanyang mga ginagawa at sinasabi.

Ang pagmamahal sa kap­wa ay pagmamahal na rin sa Panginoon.

oOo

Pasabugin ang katiwalian. Magsumbong sa BOMBAHAN NA, mag-email joel2amongo@yahoo.com o magtext sa cel#0977-751-18-40. (BOMBAHAN NA! / JOEL AMONGO)

Please follow and like us:
Read More

DAPAT MATULDUKAN NA ANG HAZING

BOMBAHAN NA FINAL

PAULIT-ULIT na lang ang nangyayaring pagpatay sa mga estudyante sa pamamagitan ng hazing.

Bakit hanggang ngayon ay hindi ito natutuldukan?

Panahon na para pabigatin ang parusa nito ng ating mga mambabatas.

Tulad kay Philippine Military Academy (PMA) cadet 4th class Darwin Dormitorio, lumalabas pala sa imbestigasyon ng Baguio City Police Office na nawalang combat boots lang ang dahilan kaya pinagmalupitan siya ng kapwa kadete.

Ibig sabihin, pinersonal siya ng kanyang mga kasamahan na idinaan sa pamamagitan ng hazing.

Kay Sanupao daw ang combat boots na nawala, siya ay upper class ni Dormitorio, ito ay ayon kay Police Col. Allen Rae Co ng Baguio City Police Office.

Sa ganun kaliit na bagay ay pinalaki nila at pinatay nila ang kawawang si Dormitorio?

Ganun ba kababaw at kakitid ang utak ng ating mga PMAyer?

Batu-bato sa langit ang tamaan, ‘wag po magagalit.

Mataas ang pagtingin ng taumbayan sa mga nagtapos sa PMA, pero kung paulit-ulit na nangyaya-ring may mamamatay na plebo. Dapat pa ba kayong hangaan?

Isa sa mga adhikain ng “Philippine Military Academy (PMA) ay “molding leaders of  our nation”.

Paano ka magiging mabuting pinuno ng bansa kung may poot sa iyong dibdib?

Estudyante ka pa lang ay may pinatay ka na.

Ang tao, kung ano nakasanayan niya ay paulit-ulit niya na itong gagawin kahit saan pa man siya mapunta.

Kung ang BOMBAHAN NA ang tatanungin, siguro panahon na para gumawa ng ‘special law’ para lang sa mga biktima ng hazing.

Hindi lang basta tulad ng mga ordinaryong kaso na isinasampa sa korte, mas pabigatin ang para sa mga suspek sa pagpatay at pagmaltrato sa kanilang kapwa estudyante sa pamamagitan ng hazing.

Ang ganitong klase kasing pagpapahirap ay pang-aabuso sa kanyang kasamahan na kapareho niyang estudyante.

Ang nangyayari tuloy pag naging upper class na ang pinahirapan gaganti rin siya sa magiging lower class niya.

Matagal nang nangyayari ang kalakarang ito sa PMA maging ang mga aktibo at retired generals ngayon ay naranasan din ito.

Masuwerte sila dahil nakaligtas sila, papaano kung ang nangyari kay Dormitorio ay nangyari rin sa kanila natural ‘di nila narating ang kanilang kinalalagyan ngayon.

May maasahan kaya ang taumbayan sa dating mga PMAyer na mga senador ngayon na maghain ng panukalang batas na magpaparusa nang mas mabigat laban sa mga gumagawa ng hazing na ikinamamatay ng biktima?

Ang hindi pa maganda riyan, ang mga nag-aaral sa PMA ay iskolar ng bayan tapos ganyan pa ang ginagawa nila sa kanilang kapwa estudyante.

Katatapos lang may namatay sa hazing sa Philippine National Police Academy (PNPA) sa Silang, Cavite kamakailan tapos ngayon nalipat naman sa PMA.

Hindi na natutuldukan, paulit-ulit na lang nangyayari kaya panahon na siguro para gumawa ng ‘special law’ ang mga mambabatas natin patungkol dito.

Hindi lang ang biktima ang nasisira ang kinabukasan, maging ang mga suspek dahil naparurusahan sila.

Kung hindi man gumawa ng ‘special law’ ay amyendahan ang batas na umiiral ngayon, mas pabigatin pa ang parusa.

Wala po tayong karapatan na kumitil ng buhay ng ating kapwa, kundi ang Panginoon lamang po. Amen.

oOo

Pasabugin ang katiwalian, magsumbong sa BOMBAHAN NA, mag-email joel2amongo@yahoo.com o mag-text sa cel# 0977-751-1840 (BOMBAHAN NA! / JOEL AMONGO)

Please follow and like us:
Read More