ARAW NG PAGHUHUKOM

JAILED-11

Kulong o laya sa persons deprived of liberty

(Ni FRED SALCEDO)

KARAMIHAN ang pagkakaintindi sa ‘Araw ng Paghuhukom’ ay ang katapusan ng mundo na dahil sa sobra ­sobrang kasalanan at paglabag ng mga tao sa mga panuntunan ng Diyos ay napilitan ang huli na gunawin ang mundo.

O kaya naman ay ikinokonekta ito sa ‘The Big One’ kung saan inaasahan na magkakaroon ng napakalakas na lindol kasabay ng pagguho ng mga gusali, pagkakaroon ng malaking sunod na susundan ng pagdaluhong ng malalaking alon at pagkabitak ng mga lupa at saka lalamunin ang lahat ng tao at bagay na nasa sanlibutan.

Pero ang ‘National Judgement Day’ o ‘Araw ng Paghuhukom’ ay isang programa ng pamahalaan kung saan na kaya naman isagawa ng mga hukom sa bansa ang mabilisang pagdinig sa mga kaso o ipakita ang “speedy justice” ay posible kahit pa ang nasasakdal ay mahirap.

Isa rin itong paraan upang mapaluwag ang ating mga kulungan na nasa ilalim ng pangangalaga ng Bureau of Jail Management and ­Penology (BJMP).

Sa National Capital Region pa lang, sa dami ng krimen lalo na ang kaso ng droga, punumpuno na ng persons deprived of liberty (PDL) o mga preso ang mga kulungan kaya nga nagsisiksikan na at maging ang records section ng mga korte ay nabubulunan na sa dami ng mga kasong nakasampa.

Kaya nga sa dami ng mga kasong nakasampa sa korte at sa dami ng mga PDL na nasa likod ng rehas na bakal ay karamihan ng mga preso kung matulog ay hindi na nakahiga sa kanya kanyang double deck subalit may natutulog na rin sa sahig at naglalagay ng mga duyan upang may lugar na matutulugan.

Kaya naman, dahil sa hindi magandang kondisyon sa mga kulungan, marami sa mga preso ang nagkakaroon ng sakit na nagiging sanhi upang makahawa at maging sanhi ng maagang paglisan sa mundo.

Noon, sa tagal bago mabigyang hatol ang isang akusado, nagkakaroon na ng hindi magandang iniisip ang kanyang mga minamahal na umaasa sa kanya upang mabuhay. Dahil sa pangyayari ay hindi na nagkakaroon ng tiwala sa hustisya ang mga ito na nagiging dahilan upang makiisa sa mga rebelde.

Dahil sa pagkakaroon ng judgement day, malaking tulong sa mga opisyales at tauhan ng BJMP ang pagkakaroon ng bawas sa kanilang mga inaalagaan at binabantayang preso. Sa hatol kasi ng hukom, pwedeng mapalaya o makulong ang preso na magkagayunman ay parehong bawas sa kanila ng bilang ng mga PDL.

Kapag pinalaya, bawas sa bilang at kapag hinatulan ay gayundin sapagkat malilipat na ang kustodiya ng preso sa National Bilibid Prison (NBP).

Kaya para sa mga preso at taga BJMP, dapat ‘Araw-araw ay Araw ng Paghuhukom’ nang sa gayon ay araw-araw lalo na yung mga napagbintangan lang, ay makalaya na at makapiling ang kanilang mga pamilya.

Noong nakaraang Biyernes, nag-ikot si Jail Chief Superintendent Ignaico Panti, hepe ng BJMP National Capital Region upang alamin ang kondisyon ng mga preso na nakasalang sa “National Judgement Day”.

Maynila ang may pinakamalaking populasyon ng mga PDL at pumangalawa lang rito ang Quezon City Jail Male Dorm kung saan umabot ang bilang sa  3,659 PDL at pangalawa rin ang Quezon City Jail Female Dorm sa may pinakamaraming bilang ng mga babaeng preso na umaabot sa mahigit 1,200.

Sa ginawang paghuhukom sa Quezon City Hall of Justice sa ilalim ng 37 korte, umabot sa 365 PDL na lalaki  mula sa QCJ Male Dorm at QC Annex Bicutan Jail ang nasalang habang 83 PDL na babae ang masuwerteng naibilang. Naihabol din ang 43 menor de edad na nakapiit sa Molave Detention.

Sinabi ni J/Superintendent Severino Khita, warden ng Quezon City Jail Male Dorm, isang linggo ang ginawa nilang preparasyon para maasistehan ang mga PDL na isinalang sa programang pinagtulungan ng Department of Justice at BJMP.

Ayon kay Khita, sa kanyang nasasakupan, 51 PDL ang nakalaya, 29 naman ang ang nahatulan ng korte at nakatakdang ilipat sa NBP. Sa QC Annex Bicutan Jail, may 33 PDL ang napalaya at 12 naman ang nahatulan ng pagkakabilanggo sa NBP habang 21 PDL ang ibabalik sa piitan upang manatili subalit palalayain din makalipas ang ilang buwan.

Sinabi naman ni BJMP-NCR director CSupt Panti, bagaman matiltil ang preparasyon na ginawa ng kanyang mga warden at lahat ng mga opisyales at tauhan, kinikilala niya ang mga nagawa ng mga ito sapagkat maiibsan at ­magluluwag ang mga ­kulungan na malaking kaluwagan din sa kanila.

Sa ngayon, malaki pa rin ang problema ng BJMP sa pagsisiksikan ng mga preso sa kulungan dahil talaga namang napakami na ng mga nakakulong lalo na mula nang sumiklab ang war on drug ng administrasyong Duterte.

Kaya hiling ng mga preso, sana ay araw-araw na ang Judgement Day upang sa gayon ay araw-araw ding may lalaya o kaya naman ay malilipat sa NBP.

Please follow and like us:
Read More

DATING BJMP EMPLOYEE HULI SA DROGA, PEKENG PERA 

(NI ANNIE PINEDA)

ARESTADO ang dating kawani ng Bureau of Jail Management and Penology (BJMP)- Bicol sa ginawang buy bust operation at nakuhanan ng mga pekeng pera, sa probinsya ng Legazpi.

Kinilala ang nadakip na si ex-JO1 Reynante Dayto, 45, at residente ng Barangay Pigcale, Legazpi City.

Ayon sa Legazpi City-PNP, nasa Rank No. 10 sa drug watch-listed personalities si Dayto nang magpositibo ito sa iligal na droga dahilan pagkakatanggal sa serbisyo taon 2015.

Ikinasa ang operasyon laban sa suspek at nakuha mula sa kanya ang isang pakete na pinaniniwalaan naglalaman ng iligal na droga, buy-bust money, at mga pekeng pera.

Sinampahan na ng kasong paglabag sa Comprehensive Dangerous Drugs Act of 2002 at Illegal Possession of False Treasury or Bank Notes and Other Instruments of Credit si Dayto.

 

Please follow and like us:
Read More

CELLPHONE IPINASOK SA ARI PARA IPUSLIT SA PIITAN

(NI GUILLERMO OCTAVIO)

HINARANG ang isang 39-anyos na bebot nang tangkaing magpuslit ng mobile phone sa Navotas City Jail para sa kanyang asawang nakakulong dahil sa pagkakasangkot sa droga, sa pamamagitan ng pagpapasok nito sa kanyang ari.

Kinilala ang dinakip na si Cherrielyn Tambio, ng Champaca St., Brgy. San Roque na dumalaw sa kanyang asawang si Joey Tambio na nahaharap sa kasong paglabag sa Section 11 ng R.A. 9165 o Comprehensive Dangerous Drugs Act of 2002.

Napag-alamang regular na bumibisita si Tambio sa kanyang asawa at alam nito ang mga patakarang ipinatutupad ng Bureau of Jail Management and Penology (BJMP) ukol sa pagpapasok ng iligal na kontrabando kabilang ang mobile phone.

Nang huling dumalaw si Tambio sa kanyang asawa, nakapuna si JO1 Gennylyn Pinaching nang kakaibang tambok sa bandang ari ng dinakip kaya’t pinaghubad ito at nabuking ang nakapasak na cell phone sa ari nito.

Gayunpaman, paglabag lamang sa mga patakaran ng BJMP ang maaaring ikaso kay Tambio dahil hindi pa nakapagpapasa ang Konseho ng lungsod ng anumang ordinansang magpapataw ng mabigat na parusa sa sinumang magpapasok ng kontrabando sa nasabing piitan.

Please follow and like us:
Read More

LADY TEACHER HULI SA DRUGS 

arrested12

(NI KIKO CUETO)

ILOILO CITY– Huli sa isinagawang buy-bust operation sa Barangay Santa Cruz, Arevalo ang isang guro.

Ang guro ay nakilalang si Jonaseth Aguirre, 45-anyos, Teacher I ng A. Mirasol Memorial Elementary School sa Q. Abeto Mandurriao, Iloilo City at residente ng Sta.Cruz, Arevalo, IloIlo City.

Naaresto ang suspek ng mga pulis nang mabilhan siya ng isang sachet ng hinihinalang shabu na may halagang P5,000.

Nakuha rin sa kanya ang 10 sachet pa ng umano’y shabu.

Ayon naman sa guro, planted ang mga nakumpiskang droga, bagay na itinanggi ng mga operatiba. Nagulat na lamang umano siya nang biglang pumasok ang mga operatiba sa kanyang bahay at hinalughog ang mga kagamitan niya.

Pero ayon sa pulis, nadakip noong Marso ang live-in partner ng guro na itinuturing na isang drug personality.

Aminado rin ang guro na palagi niyang binibisita ang live-in partner sa Bureau of Jail Management and Penology (BJMP).

Nakatakdang sampahan ng kasong paglabag sa section 10 at 11 ng Republic Act 9165 o Comprehensive Dangerous Drugs Act ang guro.

 

Please follow and like us:
Read More

SHABU PASALUBONG SA PRESONG MISTER, BUKING

arrestwomen12

(NI CYRIL QUILO)

NAHULI ang isang misis na may pasalubong na shabu sa dadalawing preso na mister sa kulungan, Huwebes ng alas 3:30 hapon sa BJMP Tanauan,Batangas.

Ayon sa report ni Jail Officer 1 Donnalyn Castillo, BJMP Tanauan, Batangas, nakapkapan niya ang misis ng isang bilanggo na si Marilyn Guce, 37, na may dalang droga na nakatago sa kanyang bag. Isiniksik umano nito sa kanyang ID ang ilang gramo ng shabu.

Dinadalaw ni Guce ang kanyang live in partner na si Norberto Ebres na nakapiit sa BJMP dahil sa kasong droga rin.
Nahaharap sa kasong paglabag sa RA 9165 o Comprensive Dangerous Drugs Act of 2002 ang suspek.

Please follow and like us:
Read More

DROGA MALAYANG NAKAPAPASOK SA BJMP JAILS

BJMP JAIL

(Ni NELSON S. BADILLA / Ikalawa at huling bahagi)

ILANG araw pagkaupo ni Chief Superintendent Allan Iral bilang Officer-in-Charge (OIC) noong Marso 27, nagpakawala siya ng ‘bomba’ sa ipinatawag niyang press conference.

Ang bombang pinasabog ni Iral ay pinaniniwalaang nakatago lamang noong panahon ng nagretirong hepe ng BJMP na si Deogracias Tapayan.

40 BJMP ‘personnel’ sangkot sa iligal na droga

Ani Iral, mayroong 40 BJMP “personnel” ang nasa drug watchlist ng pamunuan ng BJMP.

Iniimbestigahan na ang 40 na opisyal, wika ng hepe.

Kaso, hindi niya inilabas ang mga pangalan ng 40 upang hindi mabulabog ang imbestigasyong isinasagawa laban sa kanila.

Ayon kay Chief Insp. Xavier Solda, tagapagsalita ng BJMP, galing sa “intelligence report” ang nasabing pagkakasangkot ng 40 opisyal ng BJMP sa iligal na droga.

Ani Solda, katuwang ng BJMP ang Philippine Drugs Enforcement Agency (PDEA) at Philippine National Police (PNP) sa pagsasagawa ng imbestigasyon upang malaman kung totoo o hindi ang intelligence report tungkol sa 40.

Tiniyak din niya na sasampahan ng kaukulang kaso ang sinomang opisyal ng BJMP na mapatutunayan sa imbestigasyon na sangkot sa iligal na droga.

Sa kasalukuyan, patuloy na sinusubaybayan ng pamunuan ng BJMP ang 40 at naghahanap ng malakas, matibay at sapat na ebidensyang magdidiin sa kanilang pagkakasangkot sa iligal na droga.

Malayang nakapapasok ang iligal na droga

Inihayag ni Iral sa press conference, hinahayaan ng jail officers ang pagpasok ng mga dalaw na may dalang iligal na droga sa loob ng kulungan dahil mayroong “basbas” mula sa “isang tao.”

“Nagbubulag-bulagan sila sa nagaganap na iligal na gawain sa loob ng bilangguan. Hindi sinisiyasat nang wasto ang mga dumadalaw, sapagkat mayroong basbas mula sa isang personnel,” tugon ni Iral.

Hindi nagpalawig si Iral.

Kung susuriin at uunawaing mabuti ang pahayag ng OIC ng BJMP, nangangahulugang malayang nakapapasok ang iligal na droga sa mga kulungan ng BJMP.

Hindi lang matukoy nang eksakto kung ilang bilangguan ang mayroong ganitong kalakaran at saan-saang bahagi ng bansa, sapagkat ayaw ilabas nina Iral at Solda ang detalye hinggil sa iligal na droga na kinasasangkutan ng 40 opisyal dulot ng nagaganap na imbestigasyon laban sa kanila.

May basbas ang warden?

Ang hepe sa bawat kulungan ng BJMP na mayroong kapangyarihang mag-utos sa mga bantay sa kulungan ay walang iba kundi ang jail warden.

Malaki ang pananagutan ng warden kapag mayroong nagaganap na pagkakamali, gulo o rambol ng mga bilanggo, pagtakas ng preso at iba pang kaganapan sa loob ng kulungan.

Ang warden din ang nagtitiyak na nakakakain nang maayos ang mga bilanggo sa bawat araw, nakaliligo, nag-aasikaso kapag nagkakasakit ang mga bilanggo at iba pang bagay na makabubuti sa kalagayan ng mga bilanggo habang pabalik-balik sila sa korte upang patunayan ng kanilang mga abogado na wala silang nagawang paglabag sa batas.

Maging ang kalagayan at kagalingan ng jail officers ay sagot at pananagutan ng warden.

Kapag nagkamali at pumalpak ang warden ay maaari siyang tanggalin ng hepe ng BJMP.

Pwede ring sibakin ang warden kapag hindi kursunada o ikinaiinis ng hepe ng BJMP dahil hindi tumatalima ang warden sa kagustuhan at kapritso ng hepe ng BJMP.

Kaya, napakahalaga, estratehiko at makapangyarihan ang papel ng warden sa isang kulungan ng BJMP at maging sa buong termino ng hepe ng BJMP.

Please follow and like us:
Read More

PANG-10, NAITALANG NAMATAY NA PRESO SA CAVITE

arrest

(NI SIGFRED ADSUARA)

 

MULI na namang nadagdagan ang bilang na namamatay ng preso nang may mamatay loob ng Bureau of Jail  Management and Penology (BJMP) sa Silang, Cavite  matapos mahirapang huminga.

 

Ayon  sa ulat ni SPO1 Glen Soriano ng Silang Municipal Police Station, dakong ala-1:00 kamakalawa ng madaling araw nang nakaramdam ng hirap sa paghinga si Jerry Rolloque, binata,  habang nakakulong sa Custodial Facility sa loob ng Bureau  of Jail Management and Penology (BJMP)  sa Brgy Narra 1, Silang, Cavite kaya isinugod sa CARSIGMA Hospital  sa Silang, Cavite subalit dakong ala-1:16 ng madaling araw nang ideklara itong patay.

 

Inaresto at ikinulong si Rolloque dahil sa kasong paglabag sa Art 13, 14 at 15 ng RA 9165.

 

Nito lamang Huwebes, namatay  habang nakakulong sa Dasmarinas Custodial Center si Frederick Loveres, 38, ng South 1, San Marino, Brgy. Salawag, Dasmariñas City, Cavite matapos ding nakaramdam ng hirap sa paghinga.

Si Rolloque ang pag-10 sa naitalang namatay ng preso mula Enero kung saan apat dito ay mula sa Dasmarinas City Jail, apat din sa Bacoor City  Jail  at isa sa Imus City Jail.

Please follow and like us:
Read More

SHABU SESSION SA SELDA

shabu

(NI JG TUMBADO)

TATLONG preso ang naaktuhang bumabatak ng ilegal na drogang shabu sa loob mismo ng bilangguan sa Lipa City Jail.

Nangyari ito habang nagsasagawa ng inspeksyon ang mga tauhan ng bilangguan matapos makatanggap ng ulat  na may drug session na nangyayari sa loob ng male dormitory.

Nang madatnan ay nakuhanan ang tatlong inmate ng iba’t ibang drug paraphernalia. Ang tatlo ay nakakulong dahil din sa kasong may kinalaman sa ilegal na droga.

Dahil dito muling mahaharap ang mga preso sa panibagong kasong paglabag sa Republic Act 9165 o Comprehensive Dangerous Drugs Act of 2002.

Iimbestigahan naman ng Bureau of Jail Management and Penology (BJMP) kung paanong nailusot sa loob ng kulungan ang ilegal na droga.

Please follow and like us:
Read More