PARAK TIMBOG SA EXTORTION

(NI NILOU DEL CARMEN)

NAARESTO ng mga tauhan ng Integrity Monitoring and Enforcement Group (IMEG) ang isang pulis na umano’y nangotong sa isang babae sa Lipa City, Batangas, Biyernes ng gabi.

Kinilala ang suspek na si Senior Master Sergeant Darwin Ona, miyembro ng Mataas na kahoy, Batangas police station habang nakatakas naman ang umano’y kasabwat nito na miyembro ng Philippine Air Force.

Inaresto ang suspek sa Barangay Inusluban habang bininilang nito ang pera na iniabot ng biktimang babae sa loob mismo ng kanyang bahay.

Batay sa imbestigasyon, humingi ng tulong ang biktima kay Ona at sa isang tauhan ng Philippine Air Force (PAF) para mabawi ang mga titulo ng kanyang mga ari-arian na walang pahintulot na naisangla sa banko ng kanyang caretaker.

Ayon sa biktima, pangalawang araw pa lang silang nagkakilala ng suspek ay hiningan agad siya ng P40,000 ng pulis.

Naibenta rin ng biktima ang kanyang SUV pero nahuthot din ni Ona at ng Air Force ang naturang pera.

Tinakot pa umano ng dalawa ang biktima.

Desidido ang biktima na kasuhan ng extortion si Ona habang hinahanap na ng awtoridad ang tauhan ng PAF na sangkot din sa kasoo

Nakakulong ngayon sa detention facility ng IMEG sa Kampo Crame ang naturang pulis.

Please follow and like us:
Read More

SHABU PASALUBONG SA PRESONG MISTER, BUKING

arrestwomen12

(NI CYRIL QUILO)

NAHULI ang isang misis na may pasalubong na shabu sa dadalawing preso na mister sa kulungan, Huwebes ng alas 3:30 hapon sa BJMP Tanauan,Batangas.

Ayon sa report ni Jail Officer 1 Donnalyn Castillo, BJMP Tanauan, Batangas, nakapkapan niya ang misis ng isang bilanggo na si Marilyn Guce, 37, na may dalang droga na nakatago sa kanyang bag. Isiniksik umano nito sa kanyang ID ang ilang gramo ng shabu.

Dinadalaw ni Guce ang kanyang live in partner na si Norberto Ebres na nakapiit sa BJMP dahil sa kasong droga rin.
Nahaharap sa kasong paglabag sa RA 9165 o Comprensive Dangerous Drugs Act of 2002 ang suspek.

Please follow and like us:
Read More

8 SASAKYAN INARARO NG TRUCK; 13 SUGATAN

(NI NILOU DEL CARMEN)

LABINGTATLO ang sugatan matapos araruhin ng isang truck ang walong sasakyan sa national highway, Barangay Marawoy, Lipa City Lunes ng hapon.

Batay sa report ng Lipa City police, nawalan ng preno ang six wheeler truck na minamaneho ni Patrick Perillo at sinagasa ang dalawang pampasaherong jeep, isang kotse at limang tricycle, alas 2:30 ng hapon.

Ayon sa mga imbestigador, unang nabangga ng truck ang nakaparadang kotse sa gilid ng highway at kasunod na nasapol ang dalawang namamasaherong jeep na kapwa nasa unahan.

Dumiretso pa ang truck sa shoulder at natumbok naman ang limang nakapilang tricycle sa isang terminal.

Sa lakas ng pagkabangga tumagilid pa ang isang jeep na sinasakyan ng 13 nasaktan kabilang ang nagmamaneho na si Dennis Mantuano.

Isinugod ang mga nasaktan sa Metro Lipa Medical Center samantalang naaresto naman ng mga pulis ang nagmamaneho ng truck.

Please follow and like us:
Read More

COP KILLER PATAY SA ENCOUNTER

shoot

(NI CYRILL QUILO)

SA halip sumuko, pinili ng isang gun-for-hire suspect na makipagbarilan sa mga pulis na  maghahain ng search warrant, Martes ng madaling araw sa Batangas.

Patay si Aries Perez, alyas Randy Ferrer, nang makipagpalitan ng putok sa mga pulis-Balayan.

Sinasabing akusado si Perez sa pagpatay sa isang pulis-Balayan  sa Sitio Lipatan Brgy. Lucsuhin, Calatagan Batangas.

Ang suspect ay miyembro umano ng Rodriguez gun-for-hire group na nag-ooperate sa 1st District ng Batangas.

Pangunahing suspect din si Perez sa pagkamatay ni SPO1 Botavara ng Balayan MPS.

Ayon sa Calatagan Municipal Police Station, papalapit pa lang ang mga pulis upang ihain ang search warrant sa kanyang tahanan, nang bigla na lang itong nagpaputok l kaya’t nakipagbarilan na rin ang mga otoridad.

Dinala sa Calatagan Medicare Hospital ang suspek ngunit ideneklara itong dead on arrival ng doktor.

Narekober sa crime scene ang 1 cal.38 revolver, 1 magazine ng cal.45 pistol at loaded ng mga bala.

Please follow and like us:
Read More

3 NEGOSYANTE, 2 PA HULI SA ILIGAL NA ARMAS

batangas1

(NI CYRILL QUILO)

ARESTADO at kumpiskado ang mga baril ng tatlong negosyante sa San Jose, Batangas madaling-araw ng Lunes at dalawa katao ang arestado naman sa Talisay, Batangas.
Sa bisa ng search warrant ni Judge Cynthia Marino Ricablanca, ng Regional Trial Court, hinalughog ang bahay ng mga negosyanteng sina Mario Hernandez, 48, Sofrimo Cale,49, ng Brgy. Balagtasin at Marcelo Luna, 24, residente ng Brgy. Banay-banay, ng San Jose, Batangas.
Ang dalawa katao na nababaan din ng search warrant ni Hon.Judge Librado Chaver ng MCTC ng Talisay ay sina Julio Amores at Reymundo Balinado ng Brgy. Sampaloc,Talisay,Batangas.
Sa pangunguna ng San Jose Municipal Police Station Pol. Maj. Jopia, nakuha kay Hernandez ang 1 cal.45 pistol na loaded ng magazine ,1 cal.5.56 rifle,5 pcs. long magazine na may laman 139 pcs.ng cal.5.56 habang kay Cale naman ay kumpiskado ang 1 pc.cal.45 pistol,2 magazines at 22 pcs ammunition sa cal.45 at isa pang negosyanteng si Luna naman nakuhanan ng 1 pc. cal.38 revolver.
Samantalang sa pangunguna naman ni Pol.Capt. Aldrin Jay Baysa ng Talisay Municipal Police Station, kumpiskado ang armas ni Amores na X9 9mm na may magazine, 23 bala ng 9mm.,1magazine loaded ng 4 live ammos ng 9mm,2 boxes (100pcs live ammos ng 9mm),2 boxes(100 pcs) live ammos of cal.45 at kay Balinado naman 1 cal.22 rifle,1 magazine sa nasabing caliber, 6 pcs.live ammos sa cal.,1.
Ang lima ay nahaharap sa kasong paglabag sa Republic Act 10591 o Comprehensive firearms and ammunition Regulation Act.
Ito ay isang patunay  na seryoso ang Philippine National Police sa kampanya bilang proteksyon sa mamamayan at pagpapanatili ng peace and order sa lugar laban sa mga expired na lisensya ng armas.

Please follow and like us:
Read More

DRIVER INUTAS SA LOOB NG JEEP

crimeshooting12

(NI NILOU DEL CARMEN)

PATAY ang isang jeepney driver matapos pagbabarilin habang natutulog sa loob ng sasakyan sa Batangas City, Martes ng madaling araw.

Kinilala ang biktima na si Eduardo Oserin, 39, tubong Mulanay, Quezon at residente ng Barangay Paharang West, Batangas City.

Batay sa report ng Batangas City police station, nangyari ang krimen ala 1:30 ng umaga sa national highway sakop ng Barangay Balagtas.

Natutulog ang biktima sa loob ng nakaparadang pampasaherong jeep nang pagbabarilin ito ng hindi nakilalang salarin gamit ang isang kalibre .45 baril.

Agad ding tumakas ang suspek matapos ang krimen.

Isinugod naman sa ospital ang biktima subalit ideneklara na itong patay ng doktor.

Inaalam pa ng mga pulis kung sino ang salarin at kung ano ang motibo sa krimen.

 

 

Please follow and like us:
Read More

6 SAF TRAINEE NAKURYENTE SA KAMPO

saf21

(NI NILOU DEL CARMEN)

OSPITAL ang binagsakan ng anim na trainee ng PNP SAF Commando nang ang mga ito ay makuryente sa kanilang training camp sa Calatagan,  Batangas, nitong Sabado.

Ayon sa report ng Batangas Provicial police office, apat sa mga ito at nagtamo ng mga sugat sa iba’t bahagi ng katawan samantalang dalawa sa mga ito ang nagtamo ng mga minor injuries.

Ginagamot pa ang apat  sa Metro Balayan Balayan Medical Center na sina Patrolman John Gardoce,  John Efren Cachero,  Ian Mariano at Pat.  Nathaniel Danga.

Nasa Don Manuel Lopez Memorial Hospital naman sina Pat. Gary Tan at Michael Villaester.

Batay sa report, nagsasagawa ang mga biktima ng water pump sa SAF training camp sa Barangay Talibayog alas 5:30 ng hapon,  nang tumama ang hawak ng mga itong bakal na tubo sa linya ng kuryente.

Matatandaang isa ring kasamahan ng mga itong SAF trainee ang nasawi noong nakaraang linggo matapos na ito ay malunod sa dagat.

 

 

Please follow and like us:
Read More

2 BANGKAY INIWAN SA GILID NG KALSADA

crime100

(NI NILOU DEL CARMEN)

DALAWANG bangkay ng lalaki na hinihinalang biktima ng summary execution ang natagpuan sa gilid ng kalsada sa Talisay, Batangas, Huwebes ng madaling araw.

Ayon sa Talisay police, nadiskubre ng isang residente ang mga hindi pa nakikilalang biktima, alas 2:00 ng madaling araw sa Talisay-Tagaytay road, sakop ng Barangay Banga.

Parehong nakabalot sa packaging tape ang mga mukha at mga kamay ng dalawa at may mga tama ng bala ng hindi pa matiyak na kalibre ng baril.

Ayon pa sa pulisya, tinatayang nasa edad 30 hanggang 35 ang mga ito at nakasuot ng t-shirt at short pants.

Posible umanong sa ibang lugar pinatay ang dalawa at itinapon lamang doon ang mga katawan kung saan lagusan ang nasabing lugar ng mga nanggagaling sa Cavite at Laguna na dumadaan sa Tagaytay.

Patuloy pa ang imbestigayong isinasawa ng mga awtoridad at inaalam ang pagkakakilanlan sa mga ito.

 

 

 

Please follow and like us:
Read More

DRIVER TEPOK SA BUMULUSOK NA TRUCK

accident12

(NI NILOU DEL CARMEN)

DEAD on the spot ang isang truck driver nang mahulog sa malalim na kanal ang minamanehong trailer truck Maharlika highway, Barangay San Vicente, Sto Tomas, Batangas, Lunes ng madaling araw.

Naipit sa loob ng unahan ng truck ang biktimang si Fernando Inoncillo at wala nang buhay nang mahugot ng mga rescuer.

Batay sa report ng Sto. Tomas police, matulin na binabagtas ng south bound truck ang highway alas 3:20 ng umaga, nang makasabitan nito ang kasalubong na Grandia van na minamaneho ni Francisco Odilon.

Nawalan ng kontrol ang driver ng kargadong truck at nahulog ito sa malalim na kanal sa kanang gilid ng highway.
Matapos bumulusok, naglagablab pa ito at nasunog ang hulihang bahagi at ang mga goma.

Isinugod naman sa St. Cabrini Medical Center sa Sto Tomas ang driver at mga sakay ng nasalpok na van.

Please follow and like us:
Read More

PNP-SAF NALUNOD SA TRAINING

lunod1

(NI NILOU DEL CARMEN)

NASAWI ang isang miyembro ng Special Action Force (SAF) ng Philippine National Police matapos malunod sa dagat habang nagsasanay sa Calatagan, Batangas, Linggo ng umaga.

Kinilala ang biktima na si Patrolman Manny Jose Baldonado, miyembro ng SAF Commando.

Batay sa report ng Calatagan police, nagsasagawa ng practical exercise on diagnostic combat swim ang mga pulis sa SAF training branch annex, sa Barangay  Baha, nang mangyari ang insidente alas 9:10 ng umaga.

Nakita na lamang umano ang biktima na lumubog sa malalim na bahagi ng dagat at nalunod.

Matapos masagip,  agad binigyan ng first aid at isinugod ng mga personnel  ng FHO and PNPA medical team ang biktima sa Metro Balayan Medical Center subalit idineklara na itong dead on arrival ng doktor.

Please follow and like us:
Read More

ENGINEER, NIRATRAT SA KOTSE

batangas1

BATANGAS CITY – Nasawi habang nilalapatan ng lunas sa ospital ang isang engineer na pinagbabaril sa loob ng kanyang kotse sa Batangas City Linggo ng hapon.

Kinilala ng Batangas City police ang biktima na si Edwin Panaligan, residente ng Barangay Bolbok at project engineer ng  First Gen Clean Energy Corp. sa Batangas.

Base sa report ng Batangas City police, sakay ng kanyang kotseng Toyota Corolla ang biktima at nakaparada sa shoulder ng highway malapit sa sabungan sa Barangay Balagtas nang bigla na lamang paulanan ng bala ng mga hindi nakilalang suspek ang kotse nito alas 4:00 ng hapon.

Nagtamo ito ng mga tama ng bala sa iba’t ibang bahagi ng katawan.

Agad  ding  tumalilis ang mga hindi nakilalang suspek na naglakad palayo sa krimen matapos ang pamamaril.

Patuloy pa ang imbestigasyon sa kaso at inaalam pa ng mga awtoridad ang motibo sa krimen at kung sino ang mga salarin.

Please follow and like us:
Read More

SUICIDE NOTE SA TEXT

crime12

(NI CYRILL QUILLO)

WINAKASAN ng isang 20-anyos na factory worker ang kanyang buhay nang makita itong nakabigti sa loob ng banyo sa  Brgy. San Felipe, Padre Garcia Batangas.

Laking gulat ng lolo na si Jovito Quinto nang tumambad sa kanya ang wala nang buhay na si Justine Pastrana. May lubid ang leeg nito at nakatali sa bakal sa banyo.

Ayon kay lolo Jovito, madaling araw nang siya ay gagamit ng banyo, nakita nya ang kanyang apo na wala nang buhay at nakatali sa leeg ang isang lubid .

Nagbaka-sakaling mailigtas pa ang buhay ng apo kung kaya’t dinala agad ito sa Rosales Hospital ngunit idineklara ito ng doktor na dead on arrival na ang biktima.

Isang araw bago ang pangyayari, nag-iwan ito ng text message sa kanyang ina na “Ako’y lalagay na sa tahimik,bahala na kayo sa aking mga kapatid at sa tatay, palagi nyo silang aalagaan.”

Please follow and like us:
Read More

DRAINAGE SYSTEM NG BAGONG TULAY SA BATANGAS, BUMIGAY

tulay12

(NI KOI HIPOLITO)

NANAWAGAN ang mga residente ng Barangay Gulod Ibaba at Barangay Kumintang Ibaba Sitio Ferry sa Batangas City na agad aksiyunan ng kanilang lokal na pamahalaan ang pagkukumpuni sa mga nasirang bagong gawang mga drainage system ng “EBD Bridge of Progress” matapos  bumuhos ang napakalakas na ulan nitong araw ng Sabado.

Ang nasabing tulay ay pinondohan at umabot sa hindi umano bababa sa P338 million.

Ito rin umano ang pangatlong tulay sa nasabing bayan na proyekto nina Batangas City Mayor Beverley Dimacuha at Batangas 5th District Congressman Marvey Mariño.

Pangamba pa ng mga residente na malapit sa mga lugar na nabanggit ay kapag hindi agad naagapan at nagawan ng paraan ang mga bumigay at nawasak na drainage system ay posibleng bumaha at magtuloy ang tubig sa loob ng kanilang mga kabahayan.

 

 

Please follow and like us:
Read More

BABAENG 5-6 LENDER, 2 PA, PATAY SA PAMAMARIL SA BATANGAS

crime43

(NI NILOU DEL CARMEN)

TATLO  ang nasawi sa magkakasunod na insidente ng pamamaril sa lalawigan ng Batangas noong Martes.

Kabilang sa nasawi ang 39-anyos na si Teresita Ednaco, na pinagbabaril ng hindi nakilalang salarin habang kumakain sa Rhyponggi Tapsilogan sa Rizal Avenue, Barangay 3, Batangas City alas 5:20 ng hapon.

Inaalam pa ng  Batangas City police  kung may kinalaman sa pagpapautang ng 5-6 ng biktima ang motibo sa krimen.

Sa Lipa City, dead on the spot ang negosyanteng si Norman Lirag matapos barilin ng riding in tandem habang nakatayo sa likuran ng kanyang nakaparadang AUV sa Barangay Rizal alas 10:40 ng umaga.

Mabilis na nakatakas ang mga hindi nakilalang suspek na sumakay sa isang Mio motorcycle patungo sa direksyon ng Ibaan-Rosario road.

Nasawi naman ang hinihinalang gun-for-hire member na si Richard Agnes makaraang ito ay pagbabarilin habang naglalakad pauwi sa kanilang bahay sa Barangay Hukay sa bayan ng Calatagan alas 3:30 ng madaling araw.

Ayon sa pulisya, kilalang basagulero sa kanilang lugar ang biktima at anak ng sectoral leader  ng Habagat

group na sangkot sa iba’t ibang criminal activities sa lalawigan.

Narekober sa crime scene ang mga basyo ng kalibre .45 at M16 rifle na siyang ginamit umano sa pamamaril.

 

Please follow and like us:
Read More

COED GINAHASA, PINATAY SA LOOB NG BAHAY

crime

(NI NILOU DEL CARMEN)

MATAPOS gahasain,  brutal na pinaslang ng hindi pa matukoy na salarin ang isang 21-anyos na college student sa Lipa City,  Batangas.

Biyernes ng alas-3:00 ng hapon nang madiskubre ng isang kaanak ang bangkay ng biktimang si Fidex Therese Maranan,  estudyante ng De La Salle-Lipa,  na may takip na kumot at nakabulagta sa sahig ng kanyang kuwarto sa kanyang bahay sa Miracle Heights Subdivision,  Barangay Antipolo,  Lipa.

Ayon sa kaanak,  ilang araw na nilang hindi makontak ang biktima kaya pinuntahan na ito sa bahay.

Nag-iisang nakatira sa bahay ang dalaga matapos na parehong pumanaw na ang mga magulang.

Ayon kay Police Col.  Ramon Balauag,  hepe ng Lipa City police,  batay umano sa pagsusuri ng SOCO ay posibleng tatlong araw nang patay ang biktima.

May saksak ito sa leeg at may mga pasa sa katawan at ulo na tila pinalo ng matigas na bagay o iniuntog  sa sahig.

Wala namang palatandaan na pwersahang pinasok ang biktima kaya posible umano na kakilala nito ang suspek.

Patuloy pa ang imbestigasyon ng mga awtoridad sa pangyayari at inaalam kung sino ang huling nakasama ng biktima sa bahay.

Please follow and like us:
Read More

TSERMAN  NADAKMA, 1 PATAY, SA INDISCRIMINATE FIRING

GUN FIRE-3

(NI NILOU DEL CARMEN)

ISANG barangay chair ang naaresto samantalang isa ring lalaki ang napatay matapos magresponde ang mga pulis sa dalawang kaso ng indiscriminate firing sa Batangas nitong Martes.

Batay sa report ng Batangas Provincial Police Office, dakong alas-10:30 ng umaga nang maaresto si Barangay Captain Leodegario Roxas, 44, matapos na ito ay walang habas na magpaputok ng kanyang baril sa labas ng kanyang bahay sa Barangay Sampalocan, Balete, Batangas.

Narekober dito ang isang kalibre .45 baril.

Inihahanda na ang kasong paglabag sa RA 10591 at Omnibus Election code laban dito.

Sa Tanauan City, nadatnan naman ng mga pulis na hawak-hawak pa ng suspek na si Isagani Latuna ang maiksing baril na ginamit nito sa walang habas na pagpapaputok sa Barangay Bagbag dakong alas 10:00 ng gabi.

Subalit nang ipinapasuko ng mga pulis, pinutukan nito ng dalawang beses ang mga awtoridad  na napilitang gumanti.

Nagtamo ng dalawang tama ng bala sa katawan ang suspek at isinugod sa ospital subalit idineklarang dead on arrival.

Please follow and like us:
Read More

FOREIGNER KINALIWA NG MISIS, NAGBARIL

crime12

(NI NILOU DEL CARMEN)

GINAGAMOT ngayon sa isang ospital sa Batangas City ang isang dayuhan na nagtangkang magpakamatay sa   bayan ng Ibaan  matapos na malaman na kinaliwa siya ng kanyang misis.

Batay sa report ng Ibaan police station, nagbaril sa tiyan ang Cyprus national na si Antonis Tsiakkiros, sa loob ng kanilang bahay sa Barangay Munting Tubig dakong alas 9:30 ng umaga nitong Biyernes.

Ayon sa imbestigador, natuklasan umano ng biktima na may kalaguyo na isang  21-anyos na binata ang kanyang misis na si Adora Gonzales Tsiakkiros.

Sinita umano ng dayuhang mister ang kanyang misis at sa tindi ng sama ng loob ay pinaputok muna nito ng dalawang ulit sa lupa ang ginamit kalibre .38 revolver bago itinutok sa tiyan.

Agad itong isinugod sa Queen Mary Hospital at nilapatan ng pangunang lunas bago inilipat sa Batangas Medical Center para sa mabilisang operasyon.

 

 

 

 

Please follow and like us:
Read More

CAMPAIGN LEADER NG KANDIDATO, TINODAS SA KUBO

alitagtag

(NI NILOU DEL CARMEN)

NASAWI ang isang campaign leader ng kandidato sa pagka bise-alkalde sa Alitagtag, Batangas matapos pagbabarilin ng mga hindi nakilalang salarin sa nasabing bayan Huwebes ng gabi.

Kinilala ang biktima na si Rogelio Del Mundo, 74, residente ng Baranga Dominador East.

Ayon sa report ng Alitagtag police, nakahiga at nagpapahinga sa isang kubo ang biktima nang lapitan ito ng isa sa mga suspek at pagbabarilin dakong alas 9:10 ng gabi.

Mabilis na tumakas ang mga suspek matapos ang pamamaril at  sumakay sa isang motorsiklo.

Agad namang isinugod sa  Martin Marasigan District Hospital sa bayan ng  Cuenca ang biktima subalit nasawi rin ito habang ginagamot  dahil sa dalawang tama ng bala sa leeg.

Ang biktima ay campaign leader umano ng isang kumakandidato sa pagka-bise alkalde sa nasabing bayan.

Inaalam pa ng mga imbestigador kung sino ang mga suspek at kung may kinalaman sa pulitika ang pangyayari.

Please follow and like us:
Read More

CAFGU TIMBOG SA KARGADA

arrest500

(NI NILOU DEL CARMEN)

NAARESTO ang isang miyembro ng CAFGU matapos na ito ay magpagala- gala na may dalang baril sa Balete, Batangas, Martes ng madaling araw.

Kinilala ng Balete police ang suspek na si Randy Camacho, 36, at residente ng Barangay Banjo West, Tanauan City.

Batay sa report ni Police Captain  Rhyan Olave, hepe  ng Balete police, nakatanggap umano sila ng report hinggil sa isang kahina-hinalang lalaki na pagala-gala sa loob ng Jowivil Subdivision sa Barangay Makina dakong 1:00 ng madaling araw.

Nang respondehan, naaresto ang suspek habang sukbit sa beywang ang isang kalibre .45 baril.

Wala namang maipakitang kaukulang papeles ang suspek at wala rin itong permit to carry a firearm outside residence.

Nakakulong na ito ngayon sa Balete police station at sasampahan ng kasong illegal possession of fire arms at paglabag sa Comelec gun ban.

 

 

 

Please follow and like us:
Read More

NAWAWALANG BANGKAY NG MISTER, NAHANAP NG MISIS SA BUNDOK

batangas12

(NI NILOU DEL CARMEN)

NAREKOBER ng isang misis ang bangkay ng kanyang mister na umano ay miyembro ng New People’s Army nang matunton ang libingan sa isang hukay sa mabundok na bahagi ng San Juan,  Batangas nitong Linggo.

Sa pahayag ni Josephine Razo sa San Juan police station, may nakapagbigay umano sa kanya ng impormasyon na ang kanyang nawawalang mister na si Domingo Razo, 56,  ay nasugatan umano sa engkwentro sa pagitan ng militar at mga rebelde sa Sitio Kalabasahan, Barangay  Quipot noong April 29.

Dinala umano ng mga tumakas na rebelde ang sugatang asawa subalit nalagutan din ito ng hininga at inilibing sa Sityo Mambog sa katabing barangay ng Sampiro.

Agad nagsagawa ng search operation ang mga tauhan ng Army at San Juan PNP sa lugar Linggo ng umaga  hanggang sa matunton ang hukay na pinaglibingan sa biktima.

 

Please follow and like us:
Read More

8-ANYOS BATANG TINDERO INARARO NG TRUCK

mabini12

(NI NILOU DEL CARMEN)

NASA malubhang kalagayan ang isang batang nagtitinda ng balut matapos na ang waiting shed na pinagtitindahan nito ay araruhin ng Elf truck sa  Mabini, Batangas, Biyernes ng hapon.

Kinilala ng Mabini police ang biktima na si Lance Patrick Manalo, at residente ng Barangay Bagalanguit.

Batay sa report ng Mabini police, kasama ng kanyang nanay ang biktima at nakapuwesto ang mga ito sa waiting shed sa kahabaan ng Mabini Circumferential Road  nang salpukin ng truck dakong alas 5:50 ng hapon.

Nawalan umano ng kontrol ang driver ng truck na si Roilan Aday sa kurbadang bahagi ng kalsada.

Nagtamo ang bata ng mga grabeng pinsala sa katawan at agad isinugod sa Mabini General Hospital subalit kaagad ding inilipat sa Bauan Doctors General Hospital sa bayan ng Bauan para sa karagdagang medikasyon.

Naaresto naman ng mga pulis ang driver ng truck.

Please follow and like us:
Read More

DRIVER SINUWAG NG SARILING TRAK

crime

(NI NILOU DEL CARMEN)

NASAWI ang isang driver matapos maipit ng kanyang truck sa Barangay Poblacion, San Juan, Batangas, nitong Huwebes.

Kinilala ang nasawi na si Raymund Añora, 36, residente ng Barangay Concepcion, Batangas City.

Batay sa report ng San Juan police, nakatayo ang biktima sa unahan ng kanyang nakahintong truck na nakaparada sa paibabang bahagi ng kalsada.

Bigla na lamang umanong umarangkada ang kargadong trak at nasalpok ang biktima hanggang sa maipit ito sa kongkretong pader.

Agad isinugod ang biktima sa San Juan Doctor’s Hospital matapos  maialis sa pagkakaipit subalit idineklara na itong dead on arrival ng doktor dahil sa grabeng pinsala sa ulo at katawan.

Please follow and like us:
Read More

BDAY BOY NAG-CELEBRATE SA RESORT, NALUNOD

lunod12

(NI NILOU DEL CARMEN)

PADRE GARCIA, BATANGAS – Nasawi ang isang binatang nagdiriwang ng kaarawan matapos malunod sa resort na kanilang pinagdiriwangan sa Padre Garcia, Batangas, Linggo ng hapon.

Isinugod pa sa Rosales Hospital sa nasabing bayan ang biktimang si Lito Anceral, 28, subalit idineklara na itong dead on arrival ng mga doktor.

Batay sa report ng Padre Garcia police, kasama ng biktima ang kanyang mga pinsan at mga kaibigan at nag-iinuman sa kanyang birthday party sa  Amber Resort sa Brgy Quilo-Quilo North.

Subalit dakong alas 4:45 ng hapon nang mapansin ng mga kasama na nawawala ito.

Agad itong hinanap ng grupo at nagulat na lamang sila nang makita ang biktima na nasa ilalim ng tubig sa swimming pool.

Matapos bigyan ng first aid, agad itong itinakbo sa ospital subalit binawian din ng buhay.

Please follow and like us:
Read More

2 PATAY SA PAGSABOG SA BATANGAS

sabog12

(TEKSTO/PHOTO BY NILOU DEL CARMEN)

TINATAYANG dalawa katao ang nasawi sa isang malakas na pagsabog na naganap sa Sto. Tomas, Batangas pasado alas dose ng Lunes ng tanghali.

Sa inisyal na report ng Sto Tomas police, nangyari ang pagsabog sa isang bahay sa loob ng dulong bahagi ng Madison Garden Subdivision sa  Brgy. San Roque.

Sinasabing ang lugar ang pagawaan umano ng pampasabog sa illegal fishing. Kinukumpirma pa ito ng awtoridad.

Nagliparan sa kalsada ng subdivision ang mga nagkapira-pirasong mga damit at iba pang mga debris ng nawasak na istraktura na umabot din  sa ilang metro ang layo.

Ayon pa sa Sto Tomas police, kasama ring sumabog ang labi ng tinatayang dalawa katao.

Nasunog din ang mga damuhan sa palagid ng lote.

Ayon sa Sto. Tomas police, mga bahay na walang nakatira at mga bakanteng lote ang nakapalibot sa compound.

Naramdaman din ang pagyanig dulot ng pagsabog hanggang sa katabing lungsod ng Tanauan.

Please follow and like us:
Read More