SOBRANG TINDI NAMAN NI SPEAKER CAYETANO

BAKBAKAN NATIN

NAGDESISYON si Speaker Alan Peter Cayetano na mamahagi ng P150,000 Christmas bonus sa bawat regular na kawani ng Kamara de Representantes.

Ganyan kalaking ­halaga ang ibinigay ni Cayetano sa mga kawani ng Kamara upang tiyaking mas mataas ang Christmas bonus na kanyang ipinamigay kumpara noong si Gloria Macapagal-Arroyo ang pinuno ng mababang kapulungan ng Kongreso.

Umabot sa P110,000 ang ipinamahagi noon ni Arroyo.

Siyempre, tuwang-tuwa ang mga empleyado ng mababang kapulungan noong panahon ni Arroyo.

Masayang-masaya rin sila ngayong panahon ni Cayetano.

Kaso, maraming ­nagreklamo, sapagkat ang totoong natanggap nila ay P112,000. May bawas na P38,000 bilang withholding tax. Kahit binawasan ng buwis, napakalaking bonus pa rin ang P112,000.

Kung sisipatin at uunawaing mabuti, napakasama ng ginawa ni ­Cayetano sapagkat nagbigay siya ng mahigit sandaang libong pera sa mga kawani samantalang napakapalpak ng Kamara sa ilalim ng kanyang liderato.

Apat na panukalang batas lang ang naipasa ng Kamara ni Cayetano.

Ito ay ang mga panukalang batas sa pagpapaliban ng eleksyon ng barangay at Sangguniang Kabataan, pagbibigay legalidad sa Malasakit Center ni Senador Christopher Lawrence “Bong” Go, Standardization Law of  2019 at ang General Appropriations Act for 2020.

Sa apat, dalawa ang inaprubahan ni Pangulong Rodrigo Duterte. Ito ay ang tungkol sa pagpapaliban ng halalan at Malasakit Center.

Tinatapos pa ng Senado ang Standardization Law at ang GAA 2020 naman ay binubusisi at pinag-aaralan pa ni Duterte bago lagdaan upang malaman kung mayroong badyet na pagkukunan ng karagdagang perang maipapasok sa bank accounts ng mga senador at kongresista o wala.

Napakalinaw ng kapalpakan ng Kamara sa liderato ni Cayetano, ngunit hindi siya nahiya sa mamamayang Filipino na bigyan ng P150,000 ang mga regular na kawani ng mababang kapulungan.

Gusto bang ipamukha ni Cayetano na siya ang ‘pinakamagaling’ na speaker dahil namigay siya ng P150,000 kaya dapat lang siyang manatiling speaker hanggang Hunyo 30, 2022?!

Kung gayon, sobra namang tindi ni Ginoong Alan Peter Cayetano sa pagpapapogi gamit ang pera ng pamahalaan.

Pokaragat na ‘yan!

Ang isa pang nakasusuka sa ginawa ni ­Cayetano ay ipinakalat niya sa media ang balitang napakataas ng inangat niya sa sarbey ng Pulse Asia mula Disyembre 3 hanggang 8 kumpara sa sarbey noong Setyembre dahil sa napakagandang ginawa ng Kamara.

Idiniin pa sa balita na dinaig ni Cayetano sa laki ng kanyang puntos, sina Pangulong Duterte, Bise Presidente Ma. Leonora Robredo at Senate President Vicente Sotto III.

Ang mataas na marka ni Cayetano sa sarbey ay resulta ng pagiging numero uno ng Team Pilipinas sa katatapos na South East Asian Games.

Sa madaling salita, ang pagiging kampeon ng mga manlalarong Filipino ang nagbigay ng mataas na marka kay Cayetano sa sarbey na ginawa habang nagaganap ang SEA Games.

Hindi ang nagawa ng Kamara mula Hulyo hanggang Disyembre 2.

Kung Kamara ang paksa sa sarbey, sinong tao ang matutuwa sa apat na panukalang batas na ipinasa ng Kamara samantalang ang lahat ng ito ay walang kinalaman sa pagtaas ng sahod ng mga manggagawa, guro at mamamahayag?

Walang panukalang batas para sa interes at kagalingan ng mga magsasaka at mangingisda.

Ang mayroon ay panukalang batas na naglalaan ng P500,000,000 pondo para sa proyekto ng bawat isang kongresista sa kani-kanilang distrito, kabilang diyan ang distrito ng mag-asawang Speaker Alan Peter Cayetano at Rep. Ma. Laarni Cayetano sa Lungsod ng Taguig at Munisipalidad ng Pateros.

Ngayon, sabihin n’yo kung tama o maling ­sabihing sobrang tindi ni Cayetano.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

GISAHIN SINA SY JR. AT COYIUTO JR. SA KONGRESO HINGGIL SA NGCP

BAKBAKAN NATIN

NGAYONG mayroon tayong matapang at may ‘bayag’ na pangulo ng bansa laban sa mga oligarko mula nang mawala sa Malakanyang si Ferdinand Marcos Sr. noong Pebrero 1986, nararapat lamang na busisiin at imbestigahan nang husto ng mga kasapi ng dalawang kapulungan ng Kongreso ang kontrobersiya tungkol sa pagiging kasosyo ng kumpanya o consortium na mayroong kontrol sa National Grid Corporation of the Philippines (NGCP) ang mismong pamahalaan ng People’s Republic of China.

Magandang pagkakataon itong hindi dapat palampasin ng mga senador at kongresista kumpara sa panahon nina Corazon Aquino, Fidel Ramos, Joseph Estrada, Gloria Macapagal – Arroyo at Benigno Simeon Cojuangco Aquino III, na pare-parehong sagad-saring kumampi sa mga oligarko.

Sa panahon ni Arroyo napasok ng Oro Grid Resources Corporation (MOGRC) na pag-aari ni Henry Sy Jr. at ng Calaca High Power Corp. (CHPC) na pag-aari naman ni Robert Coyiuto Jr., ang NGCP.

Nasa kabuuang 60 porsiyento ang kontrol nina Sy Jr. at Coyiuto Jr. sa NGCP, samantalang ang natitirang 40% ay pag-aari naman ng State Grid Corporation of China (SGCC).

Ang may-ari ng SGCC ay ang estado ng China.

Sa esensya, ang ibig sabihin nito ay pag-aari ng iilang opisyal ng Chinese Communist Party (CCP) ang SGCC, sapagkat ang pamahalaan ng China ay kontrolado at pinamahalaan ng isang pangkat ng mga kadre ng CCP, na pinamumunuan ngayon ni Pangulong Xi Jinping.

Samakatuwid, ang 40 porsiyentong pag-aari ng pamahalaan ng China ay pag-aari rin ng isang pangkat ng mga pinuno ng partido komunista ng China.

Sa kolum ko noong Disyembre 1, nabanggit kong ang kumpanya o consortium ng MOGRC ni Sy Jr., CHPC ni Coyiuto Jr. at SGCC ay mayroong 25-taong concession contract at 50-taong haba ng kontrata sa prangkisa upang patakbuhin at pamahalaan ang sistemang elektrisidad sa Pilipinas batay sa Republic Act No. 9511.

Ipinasa ang R.A. 9511 ng Kongreso noong 2009 at nilagdaan ni Pangulong Macapagal-Arroyo.

Siyempre, mula noon ay kumikita na bilyun-bilyon kada taon ang NGCP mula sa -kuryenteng isinusuplay nito sa mga kumpanyang distribyutor ng elektrisidad sa bawat bahay tulad ng Manila Electric Company (Meralco) sa Metro Manila.

Kaya mula noon ay bilyun-bilyon din kada taon ang kinikita nina Sy Jr. at Coyiuto Jr. mula sa elektrisidad.

Bilyun-bilyon din ang ipinapadalang tubo ng SGCC sa pamahalaan ng China. At tatagal pa ito ng napakahabang mga taon.

Nakakaalarma ang direktang pagpasok ng kumpanyang pag-aari ng pamahalaan ng China sa negosyo ng elektrisidad sa Pilipinas, lalo pa’t ang pamahalaang ito na kontrolado ng pangkat ng mga pinuno ng CCP ay matagal nang gigil na gigil na sakupin at angkinin ang substansiyal na bahagi ng bansa.

Naniniwala akong hindi maaaring hanggang pagsisiwalat at ‘muling pagbuhay’ ni Senador Ana Theresia “Risa” Hontiveros sa 40% kontrol ng China sa NGCC lamang umabot ang napakakontrobersiyal na isyung ito.

Kailangan at obligadong gisahin ng dalawang kapulungan ng Kongreso sina Henry Sy Jr. at Robert Coyiuto Jr. hinggil sa pagiging kasosyo nila ang SGCC sa NGCP.

Kailangang komprontahin din ng mga mambabatas ang mga Intsik na sina Zhu Guangcha, chairperson ng NGCP; Wen Bo, chief technical officer; at Liu Zhaoquiang, assistant chief technical officer for operations and maintenance ng NGCP.

Malalaman natin kung mayroong mga ‘bayag’ ang mga senador at kongresista na imbestigahan, komprontahin at gisahin nila ang mga bilyonaryong sina Sy Jr. at Coyiuto Jr. at ganoon din ang mga komunistang itinalaga ng pamahalaang China sa SGCC upang patakbuhin at pamahalaan ang NGCP.

Tingnan natin kung kayang supalpalin ng mga senador at kongresista ang mga binanggit kong tao tulad nang ginagawa nila sa mga opisyal ng pamahalaan tuwing magkakaroon ng imbestigasyon sa Senado at Kamara de Representantes sa mga anomalya at iskam na nagaganap sa iba’t ibang ahensiya ng pamahalaan.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa 0998 – 565 – 0271 (BAKBAKAN NATIN / Nelson Badilla)

Please follow and like us:
Read More

MAYROON NA NAMANG PUGAD NG ECSTACY SA MAKATI

BAKBAKAN NATIN

HINDI bawal ang entertainment business sa Lungsod ng Makati, sapagkat kung bawal ay matagal nang patay ang Bistro RJ ni Presidential Adviser on Economic Affairs Ramon Jacinto.

Ang totoo, isa sa nagbibigay-liwanag at kasiyahan tuwing gabi sa Makati ang entertainment industry.

Ang masama rito ay mayroong mga establisimiyentong umaabot sa ilegal na droga ang nakapapasok sa kanila tulad ng isang club na dating nahulihan ng mga ope­ratiba ng National Capital Region Police Office (NCRPO), sa pangunguna ng dating hepe nito na si Major General Guillermo Lorenzo Eleazar, ng ilegal na droga mula sa mga nagtatrabaho sa nasabing establisimiyento at mga kustomer nila.

Walang nagawa ang mga may-ari at nagpapatakbo ng nasabing ‘bahay-aliwan’ kahit napakalakas nila sa administrasyong Binay.

Mula noon, wala nang napabalitang bahay-aliwan na mayroong ilegal na droga, kabilang na ang ecstacy.

Ngayon na lang ulit nagkaroon ng masamang balita ang Lungsod ng Makati hinggil sa ecstasy.

Isa ang ‘Bakakan Natin!’ sa mga nakakuha ng impormasyon hinggil sa isang establisimiyentong ‘pugad’ ng ecstacy.

Salamat sa tiwalang ibinigay sa Diaryo Bomba, partikular na sa ‘Bakbakan Natin!’

Gabi-gabing nagaganap ang abot-langit na kasiyahan sa isang establisimiyento sa Makati.

Ang kasiyahan ay resulta ng ecstacy na ginagamit ng karamihan ng mga nagpupunta gabi-gabi sa nasabing establisimiyento o hostel. Dito na rin umano nagkakabilihan ng ecstacy.

Hindi talo ang mga nakabibili sapagkat high-grade ang ecstasy na “liquid form” pa. Kapag liquid daw, tiyak napakalakas ng tama.

Isang abogado na da­ting konektado sa Office of the Ombudsman ang mayroong opisina sa gusali o hostel na mayroong bahay-aliwan na sinasabing pugad ng ecstacy.

Napakatindi ng kawalanghiyaan ng nasabing hostel sa Poblacion Makati, sapagkat bukod sa talamak na bentahan ng mataas na klase ng ecstasy, mayroon pang prostitusyon.

Ngunit patuloy na namamayagpag hanggang ngayon kahit mahigpit si Mayor Binay laban sa ilegal na droga at prostitusyon.

Isa ba ang hostel sa “untouchable” sa admi­nistrasyong Binay o walang impormasyong nakararating kay Mayor Binay kaya hindi ginagalaw ang nasabing hostel ng pulisya ng Makati na matagal nang pinamumunuan ni Col. Roger Simon.

Bukod sa ilegal na droga at prostitusyon, nagagamit din ang gusali o ang hostel ng negos­yanteng Intsik na pasok sa industriya ng Philippine Offshore Gaming Operator (POGO) na tahasang ipinagbawal na ni Binay.

Napakarami nang bawal na patuloy na ginagawa sa nasabing hostel sa Brgy. Poblacion.

Tingnan natin sa susunod na mga araw kung aaksiyon ang Philippine Drug Enforcement Agency (PDEA), NCRPO at administrayon ni Abby Binay.

Abangan!

oOo

Alam ko na kayong mga mambabasa ay higit na maraming nalalaman kaysa inyong lingkod. Kaya tumawag o mag-text na sa 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

‘PAMILYA VILLAR KONTROLADO ANG 63 ‘WATER DISTRICTS’ SA BANSA

BAKBAKAN NATIN

MAGLINAW muna tayo, hindi pinababagsak ni Pangulong Rodrigo Duterte kundi iwinawasto lamang niya ang pagiging ganid sa tubo ng dalawang oligarko (Manila Water Company Inc. at Maynilad Water Services Inc.) sa negosyong distribyusyon ng tubig sa Metro Manila at mga karatig na lalawigan.

Ang pangulo na totoo at tanging nagpabagsak sa oligarkong pamilya Lopez ay ang namayapang Pangulong Ferdinand E. Marcos.

Naganap ito noong 1973 nang magpasya si Marcos na kunin ng pamahalaan ang Manila Electric Company (Meralco) mula sa pag-aari, kontrol at pamamahala ng pamilya Lopez.

Hindi nagdalawang-isip si Marcos na pabagsakin ang pamilya Lopez kahit naging pangalawang pangulo niya si Fernando Lopez mula 1965 hanggang 1972.

Si Lopez ay nakababata at tanging kapatid ni Eugenio Lopez Sr., ang namayapang ‘boss’ sa mga negosyo ng pamilya Lopez.

Mula nang mawala si Marcos sa kapangyarihan ng estado noong 1986, lahat ng pangulo ng bansa mula kay Corazon Aquino hanggang sa anak nitong si Benigno Simeon Cojuangco Aquino III ay naging kaibigan, kadikit at makapangyarihang taga­suporta ng pamilya Lopez.

Ngayong si Rodrigo Duterte na ang pangulo ng Republika ng Pilipinas muling nakatapat ang pamilya Lopez ng matapang na pangulo.

Kaya delikado ang ABS-CBN Corporation dahil hinaharang ni Duterte ang pagpasa ng prangkisa nito.

Ang ABS-CBN ay isa sa tatlong kumpanya sa media na ginamit ng pamilya Lopez noon laban kay Marcos.

Ang dalawa pa ay ang The Manila Times at Manila Chronicle.

Hindi na pag-aari ng mga Lopez ang The Manila Times, samantalang matagal na ring nagsara ang Manila Chronicle.

Ang pagtanggi ni Duterte na bayaran ang sinisingil na P7.39 bilyon ng Manila Water at P3.4 bilyon ng Maynilad sa pamahalaan, alinsunod sa utos ng Permanent Court of Arbitration (PCA) sa Singapore at pagbabago ng kontrata ng dalawang kumpanya sa Metropolitan Waterworks and Sewe­rage System (MWSS), ay pagtutuwid lamang sa mga kontra-mamamayang pagnenegosyo ng Manila Water at Maynilad.

Ang Manila Water ay kontrolado ng pamilya Ayala at mga kasosyo nilang mga dayuhang negosyante.

Ang Maynilad naman ay hawak at kontrolado ni Antoni Salim (negos­yanteng Indonesian) sa pamamagitan ng Metro Pacific Investment Corporations at pamilya Consunji sa pamamagitan naman ng DMCI Holdings Inc.

Hindi babagsak ang mga oligarko sa bansa, sapagkat wala ito sa ad­yenda ni Duterte.

Katunayan, isang pamilya na masasabing oligarko ang katayuan sa buhay ay patuloy na namamayagpag sa iba’t ibang klaseng negosyo, kabilang na ang distribusyon ng tubig.

Ang tinutukoy ko ay ang pamilya Villar na siyang may-ari at kontrol ng Prime Water Infrastructure Corporation.

Ang pamilya Villar ay kaibigan at kakampi ni Duterte. Ang Prime Water ay siyang mayroong hawak ngayon ng distribusyon ng tubig sa mga lalawigan.

Ayon kay Senador Richard Gordon, mula sa 76 water districts sa bansa ay 63 ang hawak at kontrolado na ng Prime Water.

Resulta ito ng desisyon ng Local Water Utilities Administration (LWUA) na ikasa ang “public-private partnership” sa distribusyon ng tunig sa mga lalawigan.

Ang LWUA ang siyang ahensiya ng pamahalaan na nangangasiwa sa mga water district. Pinamumunuan ni Jeci Lapus ang LWUA.

Si Lapus ay kamag-anak ng pamilya ni dating Pangulong Benigno Cojuangco Aquino.

Bukod sa negosyong tubig ng pamilya Villar, masyadong malaki at laganap na ang negosyong subdibisyon at pabahay ng pamilya Villar.

Ang kumpanyang naghahatid ng tubig sa mga subdibisyon ng pamilya Villar ay ang Prime Water na, uulitin ko, pag-aari ng pamilya Villar.

Bukod kina Senadora Cynthia Villar at Las Piñas Rep. Camille Villar, dalawang Villar pa ang bahagi ng administrasyong Duterte.

Ito ay ang mag-asawang Public Works and Highways Secretary Mark Villar at Justice Undersecretary Emmeline Aglipay Villar.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

INTSIK ANG OPISYALES NG NGCP

BAKBAKAN NATIN

KUNG titingnan ang hatian ng mga nagmamay-ari ng National Grid Corporation of the Philippines (NGCP), kapansin-pansing dalawang kumpanyang pag-aari ng malalaking negosyanteng Filipino ang mayroong kontrol sa NGCP.

Batay sa rekord, ang nasabing dalawang kum­panya ay ang Monte Oro Grid Resources Corporation (MOGRC) at ang Calaca High Power Corp. (CHPC).

Pag-aari ni Henry Sy, Jr. ang MOGRC, samantalang pag-aari naman ni Robert Coyiuto, Jr. ang CHPC kung saan 60 porsiyento ang pinagsamang sapi nila sa NGCP.

Kaya, sila ang may kontrol ng NGCP.

Ang natitirang 40 porsiyento ay pag-aari ng dayuhang State Grid Corporation of China (SGCC), na pag-aari ng pamahalaan ng People’s Republic of China.

Kaya, ang malaking porsiyento ng NGCP ay pag-aari ng pamahalaan ng China, hindi lang ng mga pribadong negosyanteng Intsik.

Ipinagpipilitan ng pamunuan ng NGCP na walang kontrol ang China sa NGCP dahil pawang “adviser” lang ang papel ng SGCC o pamahalaan ng China sa NGCP.

Ang NGCP ay pribadong kumpanya na mayroong kontrol sa transmisyon ng elektrisidad sa Pilipinas. Hindi puwedeng isipin na ang kum­panyang Manila Electric Company (Meralco) ay kasing laki ng NGCP dahil ang negos­yo ng Me­ralco ay distribyusyon ng elektrisidad sa mga residente at negos­yante.

Nadiskubre ni Senadora Risa Hontiveros na tatlo sa pangunahing opisyal ng NGCP ay ang mga Chinese na sina Zhu Guangcha, chairperson ng NGCP; Wen Bo, chief technical officer; at Liu Zhaoquiang, assistant chief technical officer for operations and maintenance.

Kapansin-pansin na pawang may bigat o estratehiko ang posisyon ng tatlong Intsik.

Mas malinaw pa sa sikat ng araw na ang posisyong hawak ng tatlong dayuhan ay liderato at teknikal na aspeto ng negosyo ng NGCP.

Hindi lang basta tagapayo.

At tama ang hinala ni Hontiveros na “The chairman is Chinese, almost all of the contractors are Chinese, the systems software is made in China and the training is done in China” kaya kontrolado ng mga ito ang NGCP.

Pawang mga kagamitang galing sa China ang ginagamit sa pagpapatayo ng mga imprastraktura ng transmisyon ng elektrisidad na disenyong China ang teknolohiyang ginamit sa NCGP.

Kontrolado ng NGCP ang transmisyon ng elektrisidad sa Pilipinas kung saan mayroon pa itong 15 taong natitira sa 25-taong kontrata sa pamahalaan.

Kung 40 porsiyento ang pag-aari ng pamahalaan ng China sa NGCP, ibig sabihin ganyan din kalaki ang kita ng pamahalaan ng China kada taon.

Halimbawa, noong 2018 ay umabot sa P180 bilyon ang kabuuang kinita ng NGCP kaya tumataginting na P72 bilyon ang kinita ng SGCC o ng pamahalaan ng China noong 2018, samantalang ang MOGRC at CHPC ay P108 bilyon.

At dahil parehong tig-30 porsiyento ang pag-aaring sapi ng kumpanyang MOGRC at CHPC tig-P54 bilyon ang kinita ng bawat isa sa kanila.

O di ba higit na mas malaki ang kita ng China kaysa kina Henry Sy Jr. o kay Robert Coyiuto Jr.?

Alam ko na kayong mga mambabasa ay higit na maraming nalalaman kaysa inyong lingkod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

ELEAZAR: ‘TULOY ANG LABAN SA DROGA AT NARCO COPS’

BAKBAKAN NATIN

MATUNOG na matunog sa media ang pangalan ni Lieutenant General Guillermo Eleazar na susunod na hepe ng Philippine National Police (PNP) makaraang magbitiw sa posisyon si General Oscar Albayalde.

Ang pagiging malinis ni Eleazar, simula nang maging pulis siya noong 1988 dahil hindi nasangkot sa kahit anong kaso o reklamo, ay tugmang-tugma sa gusto ni Pangulong Rodrigo Duterte sa sino mang itatalaga niya sa pinakamataas ng posisyon sa PNP.

Gusto rin ni Duterte na ang susunod na PNP chief ay hindi matatakot na ipagpatuloy ang agresibong kampanya ng administrasyon laban sa ilegal na droga.

Nang igawad kay Eleazar ang ikatlong estrelya sa kanyang balikat upang maging lieutenant general na ang ranggo niya, idiniin ng ikaapat na pinakamataas na opisyal ng PNP na tuloy ang laban sa ilegal na droga.

“Having seen the success of the President’s war against illegal drugs, I, in my personal and current official capacity shall intensify my efforts to win as many battles in this bloody war,” pahayag ni Eleazar.

Idiniin at tiniyak din ni Eleazar na puntirya rin niya ang “narco-cops” o ang mga pulis na kumikita ng malaking halaga dahil sa pagkakasangkot sa ilegal na droga.

PDEA NAGPALIWANAG SA BIRADA NG BAKBAKAN NATIN

NOONG Nobyembre 24, binatikos ng Bakbakan Natin! ang Philippine Drug Enforcement Agency (PDEA) dahil sa kapalpakan ng nasabing ahensiya sa trabaho nitong habulin ang high-value-targets (HVTs) drug dealers.

Sa kolum na ito na may pamagat na “PALPAK ANG PDEA SA HVT DRUG DEALERS,” totoong nabatikos ang PDEA sa pagiging palpak nito.

Ganito ang eksaktong banggit ko: “May listahan ang PDEA ng high-value-target.

“Ngunit hanggang ngayon ay walang nahuhuling high-value-target drug dealers ang PDEA.

“Ibig sabihin, palpak ang PDEA sa pamumuno ni Aquino.”

Ang tinutukoy ni Aquino ay si Aaron Aquino na director general ng PDEA.

Noong Nobyembre 25, nagpadala ng liham ang PDEA na nilagdaan ni Assistant Secretary Gregorio R. Pimentel, office-in-charge ng PDEA, sa tanggapan ng Diaryo Bomba.

Natanggap at nakuha ko ang liham nitong Disyembre 12.

Narito ang mahalagang bahagi ng paliwanag ni Pimentel: “Nais po naming ilahad ang PDEA, bilang pangunahing institusyon sa bansa na nagpapatupad ng Republic Act 9165, o The Comprehensive Dangerous Drugs Act of 2002, ay nanalig  na ginagawa namin sa abot ng aming makakaya upang pigilan ang suplay, mailayo ang mamamayan at maibsan ang mga kapahamakang dulot ng ilegal na droga.

Kabilang sa aming sinumpaang tungkulin ang pagdakip ng HVTs o mga taong may ginagampang papel sa kalakalan ng droga sa bansa. Batay sa talaan ng PDEA mula Hulyo 1, 2016 hanggang Oktubre 31, 2019, 148,037 anti-drug operations ang naisagawa kung saan 215,569 ang naarestong personalidad na sangkot sa droga. Sa bilang na ito, 8,092 dito ay tinaguriang HVTs. Ito ay kinabibilangan ng mga sumusunod:

  1. 296 mga taong nahalal sa puwesto;
  2. 82 alagad ng batas (uniformed personnel);
  3. 346 kawani ng pamahalaan;
  4. 220 dayuhan;
  5. 724 lider o miyembro ng drug groups;
  6. 57 miyembro ng armed groups;
  7. 10 artista at sikat na personalidad;
  8. 191 nasa wanted list;
  9. 2,257 nasa target list;
  10. 801 drug den maintainers; at
  11. 3,108 naaresto sa mga high-impact operation (HIOs)

Sana po sa pamamagitan nitong liham at datos na nabanggit, naihayag nang mabuti ang aming panig sa maling paratang na ito.”

ASec. Pimentel, napakalinaw po ang inyong pahayag.

Ang problema, sa mga nahuli ng PDEA mula Hulyo 1, 2016 ay hindi naman binabanggit sa media kung sinu-sino ang HVTs sa kanila.

Mayroon palang mga nasakoteng sangkot sa droga na nahalal sa puwesto.

Kahit kailan ay hindi binabanggit ng Public Information Office (PIO) ng PDEA ang mga pangalan ng mga nasakoteng opisyal ng pamahalaan.

Hindi rin nabanggit ang mga pangalan ng mga nahuling lider ng sindikato ng droga.

ASec. Pimentel, sana po bukas ang PDEA na magbigay ng datos o impormasyon tungkol sa mga nahuhuli ng PDEA na HVTs, mga nahalal na mga politiko, mga lider ng sindikato at iba pa.

Ang gusto po kasi ng PDEA – PIO, lalo na ni Director Derrick Carreon, pabor na pabor sa PDEA ang mga naisusulat sa pahayagan o online news companies.

Napipikon at nababanas si Carreon kapag hindi pabor na pabor sa PDEA ang ibinabalita sa media.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

P62–B KINITA NG MANILA WATER AT MAYNILAD

BAKBAKAN NATIN

NANALO ang Manila Water Company Inc. sa ipinaglaban nito kontra sa pamahalaan ng Pilipinas sa arbitration panel hinggil sa ikinalugi umano noong Hunyo 2015 hanggang Nobyembre 2019 ng nasabing kumpanyang pag-aari ng pamilya Ayala.

Ang Manila Water ay kumpanya ng Ayala Corporation na pag-aari ng pamilya Ayala.

Nagpasya ang Permanent Court of Arbitration (PCA) na bayaran ng pamahalaan ng Pilipinas ang Manila Water ng P7.4 bilyon.

Bababayaran din ng pamahalaan ang ibinayad ng Manila Water sa PCA nang ihabla nito ang pamahalaan ng Pilipinas at iba pang singilin.

Sa reklamo ng Manila water, umabot sa P7.4 ­bilyon ang kabuuang halaga na ikinalugi ng ­kumpanyang ito mula 2015 hanggang 2019 dahil hindi pumayag ang Metropolitan Waterworks and Sewerage System – Regulatory Office (MWSS – RO) na itaas ng Manila Water sa babayaran ng mga kustomer nito kada buwan simula dapat noong 2015.

Kaya tumutol ang MWSS – RO  dahil naniniwala itong hindi dapat isama ng Manila Water sa kahilingan nitong umento sa sinisingil nito sa kanilang mga kustomer, ang corporate income tax (CIT) na P2.77 per cubic meter.

Kaya ginaya ng Manila Water ang Maynilad nang ihabla ng kumpanya ng pamilya Ayala ang pamahalaan ng Pilipinas sa PCA sa Singapore.

Ang gustong mangyari ng Manila Water ay isama sa pagtaas ng buwanang singil nito sa kanilang mga kustomer, ang buwis na ibabayad sa Bureau of Internal Revenue (BIR) mula noong 2015.

Ang CIT ay uri ng buwis na ibinabayad ng isang kumpanya sa pamahalaan batay sa kinikita ng kumpanya sa negosyo nito.

Ang pagbabayad ng buwis ng mga kumpanya at negosyante ay tungkulin at obligasyon nila sa pamahalaan na itinakda at ipinag-utos ng batas.

Hindi dapat ipinapasa ng mga negosyante, tulad ng pamilya Ayala na siyang pangunahing ­may-ari ng Manila Water, ang pagbabayad ng buwis sa publiko o sa mga kustomer nito.

Kapag ipinasa kasi sa kustomer  bilang bahagi ng babayaran nila kada buwan ay malinaw na ang mga kustomer ng Manila Water ang nagbayad ng buwis ng kumpanyang ito sa BIR.

Ang argumento ng Manila Water sa PCA ay labag sa kontrata sa pagitan ng Manila Water at pamahalaan ang paghadlang sa umento ng buwanang ­singil ng naturang kumpanya sa mga parokyano nito.

Iginiit ng Manila Water na ang paglabag sa kontrata ay nagresulta sa malaking pagkalugi nito.

Ngunit sa rekord mismo ng Manila Water ay umabot sa P25 bilyon ang kinita ng kumpanyang ito mula 2015 hanggang 2018.

Kung kukuwentahin, pumalo sa P6.25 bilyon ang tubo ng pamilya Ayala sa kanilang Manila Water kada taon mula 2015 hanggang 2018.

Napakalaki nang itinaas sa tubong ito ng pamilya Ayala kung ikukumpara mula sa 2011 hanggang 2014 na umabot sa P22.4 bilyon (P5.6 bilyon bawat taon ang kita sa panahong ito).

Nalugi pa ba ang Manila Water ng pamilya Ayala samantalang napakalinaw ng tubo nilang P25 bilyon sa panahong tumanggi ang MWSS – RO na isama ang taripa.

Masama pa ba ang P25 ­bilyong tubo samantalang distribusyon ang negosyo ng Manila Water?

Bago makakuha ng magandang desisyon ang Manila Water Company Inc., nauna nang pinaboran ng PCA ang Maynilad Water Services Inc.

Pareho ang dahilan ng Maynilad sa Manila Water nang katigan ng PCA ang kumpanya ni Pangilinan.

Iginiit ng Maynilad sa PCA na nalugi ito ng P3.4 ­bilyon mula 2013 hanggang 2017 dahil hindi pumayag ang MWSS – RO na itaas ang buwanang singil ng Maynilad sa kanilang mga kustomer.

Sa rekord ng Maynilad, umabot sa P36.7 bilyon ang kabuuang kinita ng Maynilad mula 2013 hanggang 2017.

Lugi pa ba ang Maynilad kung P36.7 bilyon ang kinita nito noong mga taon na iginiit nito sa PCA na sila ay nalugi?

Ang Maynilad ay kontrolado ng Metro Pacific Investments Corporation samantalang ang DMCI Holdings Inc. ay tinatayang 27 porsiyento ang pag-aari sa nasabing kumpanya.

Ang namamahala ng Metro Pacific Investments dito sa Pilipinas ay si Manny ­Pangilinan.

oOo

Alam ko na kayong mga mambabasa ay higit na maraming nalalaman kaysa inyong lingkod. Kaya tumawag o ­mag-text na sa: 0998 – 565 – 0271. (BAKBAKAN NATIN! / Nelson Badilla)

Please follow and like us:
Read More

HUMANGA ANG MGA DAYUHANG DELEGADO SA SEAG HOSTING

BAKBAKAN NATIN

LAHAT naman ng lahi ay may puso at malasakit sa kapwa.

Naiiba lang sa lahat ang puso at pagmamalasakit ng mga Filipino.

At ang kakaiba sa mga Filipino ay ipikikita ng Pilipinas sa pagho-host nito ng Ika-30 taong South East Asian Games (SEA Games) simula noong Nob­yembre 30.

Sa hosting ng admi­nistrasyong Duterte sa Ika-30 taon ng SEA Games ay walang dudang pinahanga nito ang mga dayuhang delagado sa nasabing palaro.

Syempre, napakarami ring Filipino ang pinahanga sa paghahandang ginawa ng Philippine Sea Games Organizing Committee (PHISGOC).

Bago magsimula noong Nobyembre 30, kaliwa’t kanan ang pambabatikos ng mga kritiko ng administrasyong Duterte at ni Speaker Alan Peter Cayetano, PHISGOC chairman, dahil ilang aberya at biyun-bilyong ginastos sa SEA Games.

Ngunit, ngayon ay walang tigil ang papuri ng lahat ng kalahok sa SEA Games, partikular na ng mga malalarong dayuhan at delegado, sa nakikita at nararanasan nila sa palahok sa SEA Games na rito ginanap sa Pilipinas.

Testigo sila sa kakaibang lambot ng puso at pagmamalasakit ng mga Filipino.

Tampok diyan ang ipinamalas ng kababayan nating si surfer Roger Casugay matapos nitong iligtas ang kalabang Indonesian surfer na si Arip Nhuridayat.

Naputol ang tali ng surf board ni Nhuridayat, dahilan upang humampas sa kanya ang  napakalakas na alon sa Monaliza Point sa La Union.

Sa oras na iyon ay kaunting galaw na lang ni Casugay ay nakuha na niya ang gintong medalya na siya namang gustong makuha ng sinumang manlalaro sa SEA Games.

Ngunit, iba ang ginawa ni Casugay – binalikan niya si Nhuridayat at iniligtas hanggang madala ng nasabing Filipino surfer ang Indonesian surfer sa pampang.

Napakalaki ng pasasa­lamat na ipinarating ng Indonesian Sports officials at mga manlalaro nila kay Roger Casugay.

Kahanga-hanga si Roger Casugay, sapagkat pinatunayan niyang puso at awa sa kapwa ang dapat mangibabaw at hindi kasibaan sa medalyang ginto.

Iyan ang totoong gintong medalya!

Ang isa pang kahanga-hanga sa mga Filipino sa SEA Games ay ang madalas na pagtsi-cheer sa mga manlalaro ng Timor Leste upang makasungkit ang mga ito ng medalya.

Kaya, walang tigil din sa pasasalamat ng mga manlalaro ng Timor Leste sa mga Filipino.

Sa huling talaan ng mga medalya, nangu­nguna pa rin ang Team Pilipinas sa pagkamit ng medalya, lalo na ng gintong medalya.

Nakahabol na rin ang Timor Leste na nakapagtala na ng medalyang tanso.

Patok na patok rin ang balitang sunud-sunod ang papuring ibinabato sa naggagandahang sports fa­cilities na ipinatayo ng administrasyong Duterte para sa Ika-30 taon SEA Games, lalo na ang world-class sports stadium at aquatic center sa New Clark City sa Tarlac.

Pinuri rin ni Thailand lawn bowl coach Daniel John Simmons ang pasilidad sa Clark Freeport, isa sa venues ng lawn bowl competition.

Ayon kay Simmons, nakakabilib ang ginawa ng Pilipinas na isang world-class sports faci­lity sa loob lamang ng 40 araw.

Sinabi naman ng Malaysian official na si Abdul Kader, director general ng International Sepaktakraw Federation, na nakakamangha ang Sepak Takraw venue sa Subic gymnasium at tinawag niya itong pinakamagandang Sepak Takraw venue sa kasaysayan ng SEA Games.

Maging ang Olympic gold medalist swimmer na si Joseph Schooling ay napahanga sa kanyang naging karanasan sa SEA Games.

Pati na ang SEAG first ti­mer event na e-sports ay umani rin ng papuri.

Ang venue lamang sa San Juan ay balot ng iba’t-ibang ilaw, smoke machine at hiyawan ng mga manonood.

Sabi ni Benjamin Assarasakorn ng Thailand E-Sports Federation, ang “landmark hosting” ay dapat tularan ng ibang bansa sa Asya ang pagpapahalaga ng Pilipinas sa sports.

Kaya, hindi nakapagtataka ang komentaryo ni Olympic Council of Asia (OCA) Vice President Wei Jizhong na handang-handa ang Pilipiinas para sa mas malaking sports event dahil sa magandang pagho-host nito ng Ika-30 taong SEA Games.

Ayos! Mabuhay ang Pilipinas!

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

TEAM PILIPINAS PATULOY NA HUMAHAKOT NG MEDALYA SA SEA GAMES

BAKBAKAN NATIN

MABUHAY ang mga atletang Filipino!

Palakpakan natin ang Team Pilipinas sa ipinakikita nitong husay sa iba’t ibang laro sa ika-30 taon ng South East Asian Games (SEA Games).

Malinaw na walang kapaguran at walang tigil ang pagkakamit ng mga manlalaro ng mga medalya, lalo na ng ginto.

Kung susumahin sa pinakahuling bilang ay mahigit na 100 ang medalyang nakuha ng mga atletang Fiipino.

Nasa 50 ang ­medalyang ginto ang nakuha ng bansa.

Unang araw pa nga lang ng palaro, naungusan na ng Pilipinas ang kabuuang 24 medalyang ginto na nakuha natin sa 2017 SEA Games na ginanap sa Malaysia.

Resulta ito ng pagpupursigi ng mga ­organizer at sports officials sa ­ating mga atleta na muling makuha ang overall champion title sa SEAG na naibulsa ng Pinas sa 2005 SEA games na inilunsad din noon sa ating bansa.

Umabot sa 112 gintong medalya ang nakuha ng Pilipinas noong 2005 SEAG at maaari itong higitan sa nagaganap na 30th SEA Games.

Tingnan ninyong mabuti, unang araw  pa lamang ng SEA Games ay nalagpasan na ng Team Pilipinas ang 24 na gintong medalya na nakuha ng mga atletang Filipino noong 2017 SEA Games sa  Malaysia.

Pihadong patuloy pang nadadagdagan ang mga gintong medalya ng Pilipinas lalo na sa 14 gold medals na napanalunan sa arnis, 10 gold ­medals sa dance sports, 2 sa wushu, 2 sa gymnastics at iba pang gintong medalya na nakopo sa iba pang sports events.

At sa ikatlong araw, nakapagtala na ang Pilipinas ng 47 na gintong medalya bukod pa sa silver at bronze medals na nasungkit ng ating mga manlalaro sa iba’t ibang sports events.

Hindi na kasi nakabawi ang Pilipinas sa performance nito sa SEAG dahil noong 2017, 41 gold medals lamang ang naipanalo, 38 gold ­medals noong 2009, 36 gold ­medals noong 2011, tig-29 gold medals noong 2013 at 2015, at 24 gold medals lamang noong 2017.

Tayo ay umaasa na mababaliktad ang performance natin sa SEA Games dahil inspirado at ganadung-ganado ngayon ang ating mga manlalaro dahil sa napakalakas na suporta na ipinapakita sa kanila ng pamahalaan.

Ang magandang nagaganap sa Ika-30 taon ng  SEA Games ay kapansin-pansing ngayon lang nangyari sa ­administrasyon ni Pangulong Rodrigo Duterte sa tulong ni PHISGOC president at House Speaker Alan Peter ­Cayetano na nanguna sa pagpapagawa ng olympic standards sports venues tulad ng sports stadium at aquatic center sa New Clark City sa Tarlac.

Inihayag mismo ng mga atleta na inspirado silang makipaglaban sa kani-kanilang sports dahil sa napakalakas na suporta sa kanila ni Duterte, sa partikular, at ng mamamayang Filipino, sa pangkalahatan.

Ganado rin ang mga atletang Filipino dahil dumarayo ang mga  kababayan natin sa iba’t bang sports venues upang manood at magpakita ng suporta sa mga manlalarong Filipino.

Nagalak nang husto ang mga manlalaro sa napakagandang seremonya ng pagbubukas ng ika-30 taon ng SEA Games sa Philippine Arena noong Nobyembre 30 na sinalubong ng nakabibinging hiyawan at palakpakan ng mga manonood nang pumarada na sa entablado ang mga atletang Filipino.

Kaya naman, maging ang OCA o Olympic Committee of Asia ay napabilib sa hosting ng bansa sa SEA Games.

Kaya hinikayat ni OCA Vice President Jizhong Wei ang Pilipinas na mag-bid para sa 2030 Asian Games.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tawag o mag-text na sa: 0998 – 565 – 0271. (BAKBAKAN NATIN / Nelson Badilla)

Please follow and like us:
Read More

NAKABABAHALA ANG ‘CHINESE IMPERIALISM’

BAKBAKAN NATIN

MANIWALA kayo o hindi, umiiral ang “Chinese imperialism” sa Pilipinas.

Noong 2009, nagkaroon tayo ng Republic Act No. 9511 na ang nilalaman ay 25-taong concession contract at 50-taong prangkisa upang patakbuhin ng isang kumpanya ang National Grid Corporation of the Philippines (NGCP).

Ang R.A. 9511 ay tungkol sa sistema ng elek­trisidad sa Pilipinas.

Sa batas na ito, nagkaroon ng 40 porsiyentong direktang pag-aari ang pamahalaan ng China, sa pamamagitan ng State Grid Corporation of China (SGCC).

Lilinawin ko po na ang pagpasok sa NGCP ng SGCC ay hindi pagpasok ng isang pangkat ng mga negosyanteng Intsik, kundi mismong pamahalaan ng China, sapagkat pag-aari at kontrolado nito ang SGCC.

Sa termino ni Pangulong Rodrigo Duterte ay muling nakapasok ang isang kumpanya ng pamahalaan ng China dahil kasosyo ito ng Dito Telecommunity (dating Min­danao Islamic Telephone Company Inc. o Mislatel).

Ang Dito ay ang ikatlong telecommunications company na nagsisimulang ilatag ang punda­syon nito sa buong bansa upang tapatan at talunin ang Globe Telecoms ng pamilya Ayala at Smart

Communications na pinamamahalaan ni Manny Pangilinan sa ngalan ng Salim Group of Companies ng Indonesia.

Pag-aari at kontrolado ang Dito ni Dennis Uy, sa pamamagitan ng pag-aari niyang Udena Corporation at Chelsea Logistics Corporation.

Isa pa sa may-ari ng Dito ay ang China Telecommunications Corporation na pag-aari ng pamahalaan ng China.

Ang online gambling ng mga sugapa sa sugal sa China ay multibilyong industriya ngayon sa Pilipinas na tinawag na Philippine Offshore Gaming Operators (POGO).

Marami na ring Intsik na nagbilihan ng malalawak na lupain sa Pilipinas.

Maging sa ilegal na negosyo tulad ng prostitusyon ay nakalusot na rin sa bansa.

Pawang babaeng Instik at parokyanong Intsik ang pasok sa prostitusyong ito.

Kahit sa industriya ng konstruksyon ay mayroon na ring mga manggagawang Intsik.

Nagaganap ang lahat ng ito habang agresibong inaangkin ng pamahalaan ng China ang West Philippine Sea (WPS).

Kahit unti-unting nakapagtatayo ng mga pasilidad ang China sa sakop ng WPS ay hindi natatakot ang pamahalaan ng bansang ito na agresibong ilar­ga ang engrandeng plano nito laban sa mga Filipino.

Kitang-kitang ipinagtatabuyan ng mga sundalong Intsik ang mga ma­ngingisdang Filipino na mangisda sa mga karagatang hindi maitatangging bahagi ng WPS, ngunit hindi ipinagtatanggol ni Pangulong Duterte.

Malinaw na malinaw ang ginagawang hakbang ng pamahalaan ng China kung paanong itinatanim at pinalalakas ang imper­yalismong China sa Pilipinas.

Pinapasok at namumuhunan ang pamahalaan ng China sa mga estratehikong industriya sa bansa.

Unti-unting makokontrol at masasakal sa leeg ang Pilipinas dahil sa itinayo nitong mga negos­yo sa sinasabi kong estratehikong industriya sa Pilipinas tulad ng elektrisidad at telekomunikasyon.

Kakaiba sa Amerika ang pagpapakalat ng China ng kanyang imperya­lismo.

Hindi ipinakakalat ng pamahalaan ng China ang imperyalismo nito, sa pamamagitan ng pa­ngungumbinsi sa mga Filipino hinggil sa konsepto ng pangmatagalang digmaang  bayan upang maitayo ang pamahalaan ng mga manggagawa at magsasaka sa Pilipinas tulad ng ginawa ng Chinese Communist Party (CCP).

Hindi nito kinukumbinsi ang mga Filipino na higit na mainam ang lipunang sosyalismo kaysa lipunang kapitalismo.

Nakaaalarma nang husto ang ginagawang pagpapakalat ng Chinese imperialism sa bansa.

Kailangang imbestigahan ito ng Kongreso bago maging solido ang imperyalismo ng China sa Pilipinas.

Kailangang magkaroon ng malalimang imbestigasyon hinggil sa lumalakas na pagkakapuwesto ng Chinese imperialism sa bansa upang maipamukha kay Pangulong Duterte ang sobrang kaluwagan niya sa China.

oOo

Alam ko na kayong mga mambabasa ay higit na maraming nalalaman kaysa inyong lingod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

40% NG NGCP PAG-AARI NG CHINA

BAKBAKAN NATIN

HINDI na maganda ang pagpasok o pamumuhunan ng People’s Republic of China sa Pilipinas, ­sapagkat maging ang kumpanyang namamahala sa sistema ng ­kuryente ng bansa ay napasok na rin ng China.

Ayon sa rekord ng National Grid Corporation of the Philippines (NGCP), ang State Grid Corporation of China (SGCC) ay 40 porsiyento ang pag-aari sa NGCP.

Ang Monte Oro Grid Resources Corporation (MOGRC) na pag-aari ni Henry Sy Jr. at ang Calaca High Power Corp. (CHPC) na pag-aari naman ni Robert Coyiuto Jr. ay 60 porsiyento ang pinagsamang sapi sa NGCP.

Ang nasabing consortium ay mayroong 25-taong concession contract at 50-taong prangkisa upang patakbuhin at pamahalaan ang power transmission system ng Pilipinas alinsunod sa Republic Act No. 9511.

Substansiyal na puhunan ang 40 porsiyento para sa isang negosyo.

Labing-isang porsiyento na lang, China na ang siyang pangunahing may-ari ng NGCP.

Nakababahala ang isyung ito.

Ibig sabihin kasi ng pagkakaroon 40% na sapi ng pamahalaan mismo ng China sa NGCP ay puwedeng maging batayan ng ‘paninikil’, ‘pananakal’ at ‘pananakot’ ng China sa Pilipinas, sapagkat kuryente ang pinatatakbo at pinamamahalaan ng NGCP.

Totoong hindi nilabag ang Saligang Batas sa nasabing kasunduan, sapagkat 40 porsiyento lang naman ang pinapayagan ng Saligang Batas na ­maging pinakamalaking pag-aari ng dayuhang kumpanya sa kumpanya sa bansa.

Ngunit hindi ‘yan ang punto rito.

Ang punto ay electric transmission system ang isyu rito.

Ang pagtatayo nga ng ilang negosyenteng Intsik ng prostitution den sa ilang bahagi ng bansa ay hindi na maganda, ito pa kayang 40% sa NGCP?

Iba pang bagay ang pagtatayo ng industriyang Philippine Offshore ­Gaming Operator (POGO) na kontrolado ng mga ­negosyanteng Intsik.

Hindi haka-haka o pagpapakalat ng pekeng balita na maaaring may masamang gawin ang China sa Pilipinas.

Tandaan natin na agresibo ang China sa pag-angkin nito sa West ­Philippine Sea (WPS).

Lahat ginagawa ng China upang masolo ang WPS.

Ngayon ngang panahon ay nakapagtatayo ng military facilities ang China sa maraming bahagi ng WPS.

Tapos, lahat ginagawa ng China upang hindi makapangisda ang mga mangingisdang Filipino sa karagatang bahagi ng WPS.

Walang magawa ang administrasyong Duterte laban sa China.

Hindi man lang nito ipagtanggol ang mga mangingisdang Filipino laban sa pambubusabos ng China.

Kaya posibleng mayroong gawin ang China sa Pilipinas, ngayong 40 porsiyento ng NGCP ay pag-aari ng kumpanyang pag-aari ng pamahalaan ng China.

Maaaring gawin ng China ang lahat ng diskarte upang  maging ‘sakal sa leeg’ nito ang Pilipinas.

Sabi nga ni Melvin Matibag, pangulo ng state-owned National Transmission Co. (NTC), sa Senado na mayroong kapasidad ang China na kontrolin at sa mas masahol ay ipatigil ang ­power transmission system ng bansa.

Kaya dapat imbestigahan nang mabuti ng Senado ang 40 porsiyentong pag-aari ng China sa NGCP.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tawag o mag-text na sa: 0998 – 565 – 0271. (BAKBAKAN NATIN / Nelson Badilla)

Please follow and like us:
Read More

PATUNAYAN NI MAGALONG NA MALINIS ANG PULIS-BAGUIO

BAKBAKAN NATIN

POKUS na uli si Mayor Benjamin Magalong sa Lungsod ng Baguio matapos ang kanyang natatanging papel sa imbestigasyon ng Senate Blue Ribbon Committee hinggil sa pagkakasangkot ng ilang pulis sa ilegal na droga, partikular sa panahon ng pagiging direktor noon ni Gene­ral Oscar Albayalde sa Pampanga noong 2013.

Kahit bagitong alkalde, maraming plano si Magalong sa Baguio upang maresolba ang problema sa napakatin­ding trapik, basura at mga punong ipinapuputol ng mga negosyante.

Pero ang mabigat na kagyat na hamon kay Magalong ay ang katiyakang walang pulis na sangkot sa ilegal na droga at sugal.

Kahit malayo ang Baguio, may problema rin ang lungsod na ito sa ile­gal na droga at sugal.

Siyempre, dapat kumikilos ang puwersa ng Philippine National Police (PNP) na nakatalaga sa Baguio laban sa ilegalidad na ito.

Ngunit hindi maiiwasan bilang alkalde na maglalabas din siya ng direktiba sa PNP ng lungsod hinggil sa kaayusan at katahimikan ng lungsod, lalo pa’t dinarayo ng ma­raming turista ang Baguio.

Inaasahan ding maghihigpit si Magalong sa lokal na pulisya upang matiyak na walang sangkot sa kanila sa katiwalian.

Kahit saang lugar sa bansa, kabilang na ang Baguio City,  sa ilegal na droga at ilegal na sugal madalas masangkot ang mga pulis, lalo na iyong mga takam na takam sa pera.

Sa tingin ko na ay kailangang tiyakin at patunayan ni Mayor Magalong na walang kahit isang pulis ng lungsod ang dapat masangkot sa katiwaliang ito.

Kailangan niyang tiyaking malinis ang pulis sa Baguio, sapagkat dahil sa operasyong “agaw-bato” (pagbabawas ng malaking halaga ng shabu sa nakumpiskang shabu mula sa drug lord) na ginawa ng sinasabing “13 ninja cops” kaya nalaglag si Albayalde sa kanyang pagiging PNP chief.

Dapat ding tiyakin ni Mayor Magalong na wala sa mga pulis ni Col. Allan Rae Co na patong o tumatanggap ng lingguhang tara mula sa mga gambling lord sa Baguio upang bigyan ng proteksyon ang ilegal na pasu­galan na naglipana sa Baguio.

Sa totoo lang, kung mayroong lingguhang tara ang mga pulis mula sa gambling lords, siguradong tiba-tiba sa “protection money” na natatanggap ang mga pulis mula sa mga gambling lord.

Sa Baguio po ay talamak ang drop ball at color games.

Nangunguna sina alyas “Patrick,” alyas “Tuy-oy,” alyas “Buda,” alyas “Jimmy,” alyas “Edna,” alyas “Bobby” at alyas “Jasmin”.

Ayon sa source, ang pa-drop ball ni Patrick ay matatagpuan sa Brgy. Legarda at Brgy. Bokaokan na mistulang “mini-casino”.

Permanente o puwesto pijo ang mini-casino ni alyas Patrick, ayon sa source.

Pokaragat na ‘yan!

Ang drop ball ni alyas Tuy-oy ay makikita sa Dangwa/Mallcom Plaza.

Iyong ilegal na pasu­galan ni alyas Buda ay lantaran sa Slaughter.

Sa Magsaysay nakapuwesto ang pa-drop ball ni alyas Jimmy.

Hindi rin pahuhuli ang ilegal na pasugalan nina alyas Edna, alyas Bobby at alyas Jasmin.

Ang puwesto ni alyas Edna ay sa likuran ng Andoks.

Sa Hill-Top at Magsasay nakapuwesto ang pa-drop ball nina alyas Bobby at alyas Jasmin.

Ibinunyag din ng source na sa Salughter din makikita ang pasugalan ni alyas “Marilyn”.

Si alyas “Josie” ay mayroong puwesto rin sa Magsaysay.

Ang matindi sa ile­gal na pasugalan ay ang Baguio na pinapabayaan lang ni Col. Co, gayong lantarang tumataya ang mga minor de edad dito.

Tambayan din ng mga adik ang karamihan sa mga pasugalang ito.

Madalas ding nagaganap sa mini-casino ni alyas Patrick ang bilihan ng shabu.

Ang bagong impormasyong nakarating sa akin ay protektado ang lahat ng ilegal na pasugalan sa Baguio City ng mga korap na pulis.

Kapag binibigyan ng proteksyon ng mga korap na pulis ang mga taong ilegal ang negosyo ay pihadong hindi mawawala ang sugal sa Baguio.

Sino man ang mga korap na tauhan ni Col. Co ay siguradong nakahihiya sa PNP ang mga ito.

Ang masama, bahagi ng perang ibinubuhay ng mga korap na pulis na ito sa kanilang mga pamilya ay galing sa “protection money” na ibinibigay kada linggo ng mga gambling lord sa kanila.

Dapat kumilos si Mayor Benjamin Magalong laban sa talamak na ilegal na pasugalan sa nasabing lungsod.

Utusan ni Magalong si Col. Co na ipatigil ang lahat ng ile­gal na pasugalan sa lahat ng kalsada at sulok ng Baguio City.

oOo

Alam ko na kayong mga mambabasa ay higit na maraming nalalaman kaysa inyong lingod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

WALA PANG NAKUKULONG NA MGA KORAP SA DOH AT PHILHEALTH

BAKBAKAN NATIN

TAUN-TAON nababalita sa media ang talamak na katiwalian at korapsyon sa Department of Health (DOH) at Philippine Health Insurance Corporation (PhilHealth).

At bilyun-bilyong halaga ang perang nasayang sa katiwalian at korapsyon na napunta sa mga korap na opisyal sa DOH at PhilHealth.

Ngunit, pagkatapos maging mainit na paksa sa media ay wala nang nabalitang kinasuhan at nakulong na mga korap sa DOH at PhilHealth.

Noong iniimbestigahan sa Senado ang iba’t ibang uri ng katiwalian at korapsyon sa DOH at PhilHealth ay kitang-kita at malinaw na malinaw na malaganap ang katiwalian at korapsyon.

Isa riyan ang pagbili ng mga gamot na ipinamamahagi sa bawat barangay, ngunit natatambak lang taun-taon sa mga bodega ng DOH.

Ang pananatili ng mga gamot sa mga bodega taun-taon na pumapalo hanggang P18 bilyon  ang halaga sa loob ng isang taon ay siguradong mayroong mga opisyal ng DOH ang kumikita.

Kumikita sila sa komisyong nakukuha mula sa bilyun-bilyong halaga ng mga gamot na binili mula sa mga malalaking kumpanyang nagmamanupaktura ng mga gamot.

Ilang mga opisyal naman sa PhilHealth ay kumikita sa mga babayaran nitong claims sa mga ospital o pasyente.

Kumikita rin ang korap sa PhilHealth sa inilulunsad nilang mga proyekto.

Hindi birong halaga ang bilyun-bilyong perang hawak ng DOH at PhilHealth na nakalaan sa mga nagkakasakit at naoospital na Filipino.

Lahat ng mahihirap na mga Filipino ay walang hiwalay na badyet para sa gamot at pagpapaospital, sapagkat napakaliit lamang ng kanilang kinikita araw-araw.

Kaya, kawawa ang mahihirap na Filipino kapag nagkasakit pa sila, sapagkat magagamit nila ang kakarampot nilang kita para sa gamot at sa mas masahol ay sa ospital kapag naospital sila.

Alam naman natin na hindi libre ang pagpapaospital sa mga pampublikong pagamutan.

May bayad na P400 kada araw sa kuwartong ginagamit ng pasyente, may bayad ang gamot, may bayad din ang doktor at iba pa.

Kaya, magastos pa rin.

Malaking bagay ang pondong galing sa DOH at PhilHealth bilang suportang pinansiyal sa kanilang pagkakaospital.

Maliit lang ang suportang pinansiyal na ito kung ikukumpara sa laki ng babayaran sa ospital, ngunit malaking bagay na sa mahihirap upang ipam­bawas sa babayaran sa ospital.

Kaya, nakadidismaya kung walang nakukulong na mga korap na opisyal at kawani sa DOH at PhilHealth habang patuloy na nagaganap ang walang tigil na katiwalian at korapsyon sa dalawang ahensya.

Pagkatapos, biglang maglulunsad na naman ng imbestigasyon ang Senado upang malaman kung bakit nagkaroon uli ng korapsyon sa DOH at PhilHealth.

Isa-isa namang tatanungin at kokomprontahin ng mga senador ang mga opisyal ng DOH at PhilHealth upang malaman ang kanilang pahayag sa ‘panibagong’ katiwalian at korapsyon sa dalawang ahensiya.

Pagkatapos nito, wala namang kakasuhan sa mga korap na opisyal sa DOH at PhilHealth.

Kaya, walang nakukulong sa kanila.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

PALPAK ANG PDEA SA HVT DRUG DEALERS

BAKBAKAN NATIN

MATAGAL-TAGAL na ring pinamumunuan ni Aaron Aquino ang Philippine Drug Enforcement Agency (PDEA), ngunit mula noong maging hepe siya ng ahensiyang ito hanggang ngayon ay wala pang kahanga-hangang nagawa ang nasabing opisyal.

Si Aquino ay nagretiro bilang direktor ng Philippine National Police (PNP) sa Gitnang Luzon bago itinalaga ni Pangulong Rodrigo Duterte sa PDEA.

Napakahalaga ng papel ng PDEA sa kampanya laban sa ­ilegal na droga ng pamahalaan, sapagkat ito ang ­pangunahing ahensiya ng pamahalaan laban dito alinsunod sa itinakda at ipinag-utos ng batas.

Partikular na tudla nito ang high-value-target drug dealers.

May listahan ang PDEA ng mga high-­value-target.

Ngunit, hanggang ngayon ay wala silang nahuhuli.

Ibig sabihin, palpak ang PDEA sa pamumuno ni Aquino.

Ang mga high-­value-target na ito ay “napakalaki” ng papel sa ­patuloy na pagkalat ng ilegal na droga sa iba’t ibang bahagi ng bansa, ngunit hindi pa rin nahuhuli o napapatay.

Ano kaya ang dahilan?

Mayroon kayang kasabwat o kumikitang opisyal sa PDEA mula sa mga high-value-target na ito?

Sa mga nakalipas na buwan, ilang ulit na inihayag ni Aquino sa media na mayroong mga opisyal ng pamahalaan na sangkot sa ilegal na droga.

Iba-iba ang kanilang puwesto sa pamahalaan – mayroong gobernador, bise-gobernador, alkalde, bise-alkalde at ­kongresista at mayroon ding ­opisyal sa mga pamahalaang barangay.

Ngunit, hanggang ngayon ay wala pang nadadakip ang PDEA sa mga nasabing opisyal ng pamahalaang lokal.

Minsan, ibinalandra ni Aquino sa Senado na may problema sa PNP, kaya kahit mahigit tatlong taon na ang walang humpay na kampanya laban sa ilegal na droga ng administrasyong Duterte ay nananatiling talamak pa rin ito sa iba’t ibang panig sa bansa.

Eksaktong tinukoy ni Aquino na “ninja cops” ang hadlang sa kampanya ng pamahalaan laban sa ilegal na droga.

Lumabas sa imbestigasyon ng Senado na mayroong ninja cops kung saan naiugnay si dating PNP Chief Oscar Albayalde.

Ngunit, hindi ang labing tatlong tauhan ni Albayalde noon sa Pampanga ang nag-iisang balakid kung bakit talamak pa rin ang droga.

Mayroon ding kasalanan ang PDEA.

Malaki ang pagkukulang ni Aaron Aquino rito.

Dapat, imbestigahan ng dalawang kapulungan ng ­Kongreso ang PDEA sa mga kapalpakan nito.

Alamin nila kung bakit walang nahuhuling ‘malaking isda’ ang PDEA.

Ito’y dahil ba sa ninja cops o baka naman mayroong pangkat sa PDEA na humaharang sa operasyon nila upang pagkakitaan na lang ang ilegal na droga?

oOo

Alam ko na kayong mga mambabasa ay higit na maraming nalalaman kaysa inyong lingkod. Kaya, tawag o mag-text na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

NAPAKABAGAL PA RIN ANG INTERNET

BAKBAKAN NATIN

NAKAKABUWISIT na ang kabagalan ng internet sa ating bansa hanggang sa kasalukuyan.

Sa nakalipas na taon, binatikos at binalaan ni Pangulong Rodrigo Duterte ang Philippine Long Distance Telephone/Smart Telecommunications dahil sa napakabagal na serbisyo ng dalawang kumpanyang ito.

Idiniin pa ni Duterte na kapag hindi bumilis ang internet ng PLDT/Smart, papayagan niya ang “third telco”.

Sa pagkakaroon ng ikatlong kumpanya, mawawala ang tinatawag na “duopoly” (kontrolado ng dalawang kumpanya ang merkado) ng PLDT/Smart.

Ang ikatlong kumpanya ngayon ay ang Mislatel Communications na Dito Telecommunity Corporation na ngayon.

Si Dennis Uy ang may kontrol sa Dito.

Kasosyo niya ang isang Chinese company na pag-aari ng pamahalaang People’s Republic of China.

Kamakailan, pinaalalahanan at binalaan ni Senadora Grace Poe ang Department of Information and Communications Technology (DICT) hinggil sa prangkisa ng Dito.

Idiniin ni Poe na dapat ipatupad ng kumpanyang Dito ang nakasaad sa prangkisa ng pagiging ikatlong telco nito.

Idiniin ni Poe na may parusang nakatutok sa Dito kapag pumalpak ito na magkaroon ang 37 porsiyentong populasyon ng bansa ng internet na ang bilis ay 27 megabits per second (mbps) sa unang taon ng operasyon ng Dito na magtatapos sa Hulyo 8, 2020.

Sana, pinaalalahanan din ng senadora si DICT Secretary Gregorio Honasan tungkol sa labis na kabagalan ng internet ng PLDT/Smart, sapagkat ipinangako rin naman ng beteranong kumpanyang ito na paghuhusayin nito ang bilis ng kanilang internet.

Sana binatikos at diretsong pinaalalahanan ni Poe ang pamunuan ng PLDT/Smart sa kapalpakan ng serbisyo nito.

Hanggang ngayon napakabagal ng internet, kabilang ang internet connection ko sa PLDT.

Bukod sa mabagal, madalas pang maputol ang internet connection ko (noong Setyembre at ngayong Nobyembre), samantalang regular akong nagbabayad.

Siyempre, apektado ang trabaho ko dahil nakakonekta sa internet ang pagpapasa ko ng kolum ko sa Diaryo Bomba at Saksi Ngayon, editoryal at special report ko para sa Diaryo Bomba.

Ang mabilis lang sa PLDT ay maningil kada buwan.

Walang problema rito kung nagpakahusay ang PLDT sa paniningil, sapagkat ganito man mag-isip ang mga kapitalista.

Ang nakababanas ay palpak ang serbisyo ng PLDT.

Siguradung-sigurado ako na hindi lang ako ang nakararanas ng palpak na serbisyo ng PLDT.

oOo

Alam ko na kayong mga mambabasa ay higit na maraming nalalaman kaysa inyong lingod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

WALANG NAHULING HIGH VALUE TARGET ANG NCRPO

BAKBAKAN NATIN

KAMAKALAWA, nabasa ko sa online edition ng Diaryo Bomba na 2,531 tao na pawang sangkot sa ilegal na droga ang nasakote ng iba’t ibang distrito ng National Capital Region Police Office (NCRPO) simula nang maging direktor ng yunit na ito si Brig. Gen. Debold Sinas noong Oktubre 12.

Ayon sa ulat, 665 sa 2,531 ay tulak, samantalang 1,866 ang adik o ¬gumagamit ng ipinagbabawal na gamot.

Walang high value target na nahuli kahit isa mula Oktubre 12 hanggang Nobyembre 17.

Ang high value-target ay ‘malaking isda’ sa mundo ng ilegal na droga.

Ang nasakoteng 665 ay pawang “street pusher” lang na tinatawag.

Napakahalagang isyu ang high value target sa ipinagmamalaki ni Sinas na nasakoteng 2,531 tulak at gumagamit ng ilegal na droga mula nang italaga siyang direktor sa NCRPO, sapagkat inihayag niya sa kanyang pag-upo na ‘babaguhin’ ang diskarte sa operasyon laban sa ilegal na droga sa Metro Manila.

Idiniin niya noon na maglalabas siya ng direktiba na ang bibigyang diin sa NCRPO ay ang paghuli sa mga high value target kaysa magtuon ang limang distrito sa mga maliliit na drug pusher at adik.

Sa unang tingin, may punto si Sinas.

Ang problema, palpak ang NCRPO na ngayon ay mahigit isang buwan na sa ilalim ng liderato ni Sinas sa paghuli sa mga pinuno at kasapi ng sindikatong magbabagsak ng shabu, cocaine, marijuana at iba pa sa iba’t ibang panig ng Metro Manila.

Mula Oktubre 12 hanggang Nobyembre 17, umabot sa 6.686 kilo ng shabu (methamphetamine hydrochloride) na nagkakahalaga ng P45,467,316.00 ang nakumpiska ng NCRPO.

Umabot naman sa 18,098.51 gramo ng marijuana, na ang halaga ay P2,171,821.68, ang nakumpiska at 14.11 gramo ng cocaine, na P74,783.00 ang halaga, ang nakuha ng NCRPO.

Mahigit P47 milyong halaga ng ilegal na droga ngunit hindi natunton at nahuli ng NCRPO ang high value target na siyang pinanggalingan ng nasabing multimilyong halaga ng ilegal na droga.

Tiyak pagkatapos ng Nobyembre 17 hanggang sa mga oras na ito ay patuloy na bumabagsak ang shabu, marijuana at cocaine sa maraming lugar sa ¬Metro Manila.

Ito’y dahil hindi nahuhuli ang mga pinuno at kasapi ng drug syndicate na kumikilos sa Metro Manila.

Itinalaga ni Sinas si Col. Remus Medina bilang hepe ng intelligence unit ng NCRPO.

Si Medina ay ‘bata’ ni Sinas sa Central Visayas.

Palagay ko, mahusay ang Medina na ito ‘¬pagdating sa paniniktik at pagkalap ng impormasyon laban sa mga kaaway ng pamahalaan at mamamayan, kaya binitbit ni Sinas si Medina.

Malaman natin sa susunod kung totoong ¬magaling si Col. Medina.

Nang maupong intel chief si Col. Medina sa NCRPO ay biglang pumutok ang kanyang pangalan sa social media dahil sa isang lumang litrato.

Sa naturang litrato, kasama ni Col. Medina si Herbert Colangco sa loob ng New Bilibid Prison (NBP).

Si Medina, isa pang colonel at isang kongresista mulang Mindanao ay kasamang nagpa-picture kay Colangco sa loob ng NBP.

Ang okasyon ay kaarawan ni Colangco.

Si Colangco ay isa sa mga bilanggo sa NBP na palaging nababalita sa media na isa sa mga sangkot sa malawakang operasyon ng ilegal na droga sa NBP.

Sa katatapos na imbestigasyon ng Senate Blue Ribbon Committee, napatunayang patuloy pa rin ang transaksyon ng ¬ilegal na droga sa NBP kung saan umabot na ito sa NBP Hospital.

oOo

Alam ko na kayong mga mambabasa ay higit na maraming nalalaman kaysa inyong lingod.

Kaya tawag o magtext na sa: 0998 – 565 – 0271. (BAKBAKAN NATIN / Nelson Badilla)

Please follow and like us:
Read More

WALA NAMANG PANUKALANG BATAS LABAN SA ‘NINJA COPS’

BAKBAKAN NATIN

NATUMBOK ng Senate Blue Ribbon Committee na mayroong “ninja cops” sa Philippine National Police (PNP) noong 2013.

Labing tatlo silang lahat na pinamunuan ni Major Rodney Baloyo IV ang pagpasok sa bahay ng drug lord na si Johnson Lee sa isang subdibisyon sa Mexi­co, Pampanga kung saan 200 kilo ng shabu (me­thamphetamine hydrochloride) ang nasamsam noong Nobyembre 2013.

Sa 200, tinatayang 38 kilo lamang ang idineklara ng pangkat ni Baloyo.

Ang mahigit 160 kilo ng shabu o “bato” ay mahigit P680 milyon ang halaga.

Nakaladkad ang pa­nga­lan ni General Oscar Albayalde sa operasyong “agaw-bato,” sapagkat siya ang provincial director ng PNP sa Pampanga nang maganap ang operasyon ng pangkat ni Baloyo.

Nadiskubre sa imbestigasyon ng Senado na hindi tinanggal sa PNP ang 13 ninja cops.

Inilipat lang sila sa iba’t yunit sa Rehiyong Calabarzon (Cavite, Laguna, Batangas, Rizal at Quezon).

Naging direktor ng National Capital Region Police Office (NCRPO) si Albayalde nang dahil kay dating PNP Chief General Ronald dela Rosa.

Habang hepe ng NCRPO, lumabas din sa imbestigasyon ng Senado na tinawagan at kinumusta ni Albayalde ang direktor ng Central Luzon na si Brig. Gen. Aaron Aquino tungkol sa “dismissal order” ng 13 ninja cops na pawang bataan ni Albayalde.

Ayon sa Senate Blue Ribbon Committee, matibay, malakas at sapat ang ebidensiya laban kay Albayalde.

Kaya, dapat lamang na kasuhan ito.

Ilang kasong kriminal ang isinampa laban kay Albayalde sa Department of Justice  (DOJ) batay sa mga naglabasang ebidensiya sa imbestigasyon ng Senate Blue Ribbon Committee.

Ang imbestigasyon ng Senado o kahit ng Kamara de Representantes ay “in aid of legislation.”

Alam na alam ‘yan nina Senador Richard Gordon, Panfilo Lacson, Vicente Sotto III at Franklin Drilon.

Ngunit, bakit walang napabalita sa media na may inihaing panukalang batas sinoman sa miyembro ng Senate Blue Ribbon Committee, lalo na si Gordon na chairman nito, upang mawala na ang ninja cops sa PNP?

Kailangang maghain ng panukalang batas sinoman sa mga senador, sapagkat ang Senado ay tagapagbalangkas ng mga batas.

Hindi ito hukuman na isinasalang sa isang pag­lilitis ang mga opisyal ng pamahalaan, opisyal ng pribadong kumpanya o sinoman, tapos huhusgahang nakagawa ng krimen tulad ng ginawa kay Albayalde.

Ang imbestigasyon ng kahit anong komite ng Senado ay tulong sa pagbalangkas ng panukalang batas.

Kaya, dapat lang maghain ng panukalang batas ang sinomang kasapi ng Blue Ribbon Committee hinggil sa ninja cops.

oOo

Alam ko na kayong mga mambabasa ay higit na maraming nalalaman kaysa inyong lingkod. Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

‘HULIDAP’ NAMAN SA DROGA SA MAYNILA

BAKBAKAN NATIN

APAT na miyembro ng Manila Police District (MPD) ang nahuli ­kamakailan sa isang entrapment operation ng Internal ­Monitoring Enforcement Group (IMEG) ng ­Philippine National Police (PNP) kaugnay sa reklamong “hulidap”.

Ang ibig sabihin ng hulidap ay hinoholdap o hinihingian ng mga kriminal na pulis ang suspek nila sa ilegal na droga ng ­kalahating milyon ­hanggang isang milyon, depende sa hitsura ng suspek.

Sa pinakabagong kaso ng hulidap, ang ­unang hiningi ng apat na pulis na ito na nakadestino sa Baseco Compound, Maynila, sa asawa ng suspek ay P500,000 kapalit ang paglaya ng suspek sa ilegal na droga.

Siyempre, hindi ­kayang ibigay ng pamilya ng suspek ang P500,000 sapagkat mahirap ang pamilyang ito.

Nagsumbong ang asawa ng suspek sa IMEG na nakabase sa Camp Crame.

Ang naging diskarte ay kausapin ng asawa ng suspek ang mga pulis upang hilinging ibaba sa P200,000.

Matapos ang walang patid na pakikipag-usap, pumayag ang mga pulis ng Baseco Compound sa P200,000.

Huling-huli sa akto ng operatiba ng IMEG ang apat na pulis.

Hindi na bago ang hulidap sa PNP. Marami nang naganap na hulidap noon pa man.

Tapos, pumasok ang operasyong “agaw-bato”. Sa agaw-bato, ninanakaw ng mga pulis ang napakalaking bulto ng shabu na nakumpiska nila sa drug lord o drug runner.

Mula rito, kikita ang mga kriminal na pulis ng milyon-milyong halaga.

Ang nakadidismaya nang todo-todo sa pagpasok ng mga pulis sa ilegal na droga ay hindi tuluyang nalinis noong ang hepe ng PNP ay si Ronald “Bato” dela Rosa at ­maging sa panahon ni General Oscar Albayalde.

Sa panahon ni Dela Rosa, talagang madugo ang kampanya laban sa droga. Maraming namamatay.

Nagpatuloy ang kampanya sa panahon ni Albayalde, ngunit hindi na gaanong madugo. Ang tinutukan ni Albayalde ay “internal cleansing” ng PNP.

Ngunit lumabas sa imbestigasyon ng ­Senate Blue Ribbon ­Committee ay hindi isinama sa ­internal cleansing ang ­labingtatlong pulis ng Pampanga na sangkot sa agaw-bato sa Mexico Pampanga noong ­Nobyembre 2013.

‘Yun pala, ­provincial director ng pulisya ng Pampanga si ­Albayalde nang maganap ang ­pagnanakaw ng tinatayang 160 kilong shabu na ang halaga ay P640 milyon.

Hanggang ngayong taon ay nakapuwesto pa ang sinasabing 13 ‘ninja cops’ sa iba’t ibang lalawigan sa Rehiyong Calabarzon (Cavite, ­Laguna, Batangas, Rizal at ­Quezon).

Natanggal lang ang apat sa labingtatlo nitong Oktubre nang madiskubreng kasama sila sa kuwestyonableng drug ­operation sa Antipolo City noong Mayo.

Sa hulidap na naganap sa Baseco Compound, pinatutunayan lamang na nagaganap pa rin ang bentahan ng ilegal na droga kahit minsang nang ipag-utos ni Manila Mayor Francisco “Isko Moreno” Domagoso ang pagsugpo rito.

Pinatutunayan din na hindi tumitigil ang ilang pulis sa kriminal na gawaing hulidap.

Kaya hindi matapos-tapos ang paglilinis sa PNP.

Napakalaking hamon sa susunod na Chief PNP ang gawain, tungkulin at obligasyong ito.

Ngunit kung ako naman si Pangulong Rodrigo Duterte, italaga niya ang tapat, totoo at mapagpasya kung umaksiyon sa paglilinis sa nawasak na ­kredebilidad at imahe ng PNP.

oOo

Alam ko na kayong mga mambabasa ay higit na maraming nalalaman kaysa inyong lingod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

WALANG KORAPSYON SA BATANES?

BAKBAKAN NATIN

MINSAN nang napabalita na mayroong tindahan sa Batanes na walang bantay.

Ang ginagawa ng mga bumibili ay iniiwan ang bayad, hindi kinukuha ng mga tao ang anumang produkto nang walang iniiwang pera.

Kung may sukli, kinukuha nila ang tamang sukli.

Pero hindi ninanakaw ang kaunting kita ng maliit na negosyante.

Tinawag na “honesty store” ang tindahan nang ibalita ito sa media.

Bihirang mapabalita ang Batanes sa media na mayroong naganap na krimen, operasyon laban sa droga, binaril-patay na tulak o adik mula sa mahirap na pamilya, in-ambush na politiko at iba pa.

Paminsan-minsan, nababalita sa media ang tahimik at napakagagandang mga tanawin sa Batanes.

Sa larangan ng katiwalian at korapsyon, si dating Budget Secretary Florencio “Butch” Abad ng Batanes pa lang ang nabalitaan kong sinampahan ng kasong “technical malversation, usurpation of ­legislative powers, and graft and corruption” sa Office of the Ombudsman dahil sa korapsyong naganap sa P72 bilyong Disbursement Allocation Program (DAP) noong termino ni dating Pangulong Benigno Simeon Cojuangco Aquino III.

Kinasuhan din si Abad ng katiwalian at korapsyon tungkol sa ­kuwestyonableng P3.5 ­bilyong halaga ng Dengvaxia ng Sanofi Pasteur Inc. na ang lokal na distribyutor ay ang Zuellig Pharma Corporation.

Si Abad ay beteranong politiko.

Matagal siyang ­naging nagsosolong kinatawan ng Batanes sa Kamara de ­Representantes.

Siya ay unang ­nakilala bilang aktibista.

Nanilbihan din siya sa administrasyon ni Corazon Aquino bilang kalihim ng Department of Agrarian Reform (DAR).

Bukod sa mga kasong kinaharap ni Abad, wala pang pumuputok na balitang mga opisyal ng pamahalaang lokal o kongresista ng Batanes ang nasangkot sa katiwalian at korapsyon.

Kahit ang mga opisyal ng Philippine National Police (PNP), Armed Forces of the Philippines (AFP) at Bureau of Customs (BOC) sa nasabing lalawigan ay hindi pa nakakaladkad sa anumang diskarte ng katiwalian at korapsyon – lalo na pandarambong ng pera ng pamahalaan.

Ngunit may ­nakarating na impormasyon sa akin na madalas magpunta sa ­Batanes ang mga dayuhan, lalo na ang mga Intsik nitong mga nakalipas na taon.

Mayroong kinalolokohang mga negosyo ang mga Intsik sa Batanes kung saan kumikita sila ng malaking pera.

Isa rito ay tungkol sa “gintong ahas” (golden snake).

Ang mga Intsik ay masasabing “ilegal,” sapagkat wala silang kaukulan at kinakailangang mga dokumento sa kanilang kanilang pagpasok sa bansa hanggang sa pagpunta sa Batanes.

Wala rin silang kaukulan at kinakailangang mga dokumento sa ­pagnenegosyo sa Batanes, kasama ang tungkol sa gintong ahas.

Sa kabila nito, walang humuhuli sa mga Intsik at iba pang dayuhan mula sa Ninoy Aquino International Airport (NAIA) hanggang sa Batanes.

Pokaragat na ‘yan!

Ibig sabihin, labis-labis ang kalayaang natitikman ng mga ilegal na dayuhang Intsik.

Ang ilegal na pagpasok, pamamalagi at pagnenegosyo ng mga dayuhan saan mang sulok ng bansa, kabilang na ang Batanes, ay tahasang paglabag sa maraming batas.

Kaso nagaganap ito sa matagal nang panahon nang walang nasasakote o nahaharang na mga dayuhan, lalo na mga Intsik.

Katunayan, ang ilegal na pagpasok ng mga dayuhan ay isa sa mga problema ng bansa.

Ngunit hindi naaaksyonan sapagkat maraming korap mula NAIA hanggang Batanes.

Napag-uusapan din lang natin ang NAIA, dalawang yunit dito  ang pinapasukan ng mga dayuhan.

Ang isa ay ang Office of Transportation Security (OTS) o X – Ray Division na dinaraanan ng mga Hapon na may dala-dalang ginto na hindi rehistrado sa Bureau of Internal Revenue (BIR).

Kaya nailalabas ng bansa ang ginto ng mga negosyanteng Hapon nang hindi nagbabayad ng buwis sa BIR.

Pokaragat na ‘yan!

Sabi ng aking mapagkakatiwalaang source, matagal nang nagaganap ito.

Aabot sa P50,000 pataas ang inaabot sa mga tao sa OTS para walang sita-sita at tanong-tanong sa inaalalayan niyang mga Hapon.

Nakabubuwisit na kayo!

Ang isa pa na mas matindi ay ang “Visa Upon Entry” ng NAIA– Bureau of Immigration (NAIA– BI).

Mahina na ang P50,000 bawat dayuhan dito upang makapasok ng bansa kahit hindi kumpleto ang dokumentong dala.

Ang pinakahuling nadiskubreng nakalusot sa NAIA na mga dayuhang ilegal ay ang 512 dayuhan na nahuli ng ­puwersa ng National Capital Police ­Office (NCRPO) nitong ­Oktubre sa Lungsod ng ­Parañaque sa pamumuno ng dating NCRPO ­Director, ­Major ­General ­Guillermo Lorenzo ­Eleazar.

Ayon kay Eleazar, walang “working permit” ang 512 dayuhan na Intsik ang pinamarami sa kanila.

Ang 512 ay nagtatrabaho sa isang kumpanyang ilegal ang negosyo.

Ang pahayag ng BI sa anomalya, hindi kaya ng BI na matyagan ang lahat ng dayuhang pumapasok sa bansa.

Kaya hindi alam ng mga ‘matitikas’ na opisyal ng BI kung bakit nagtatrabaho nang walang working permit ang mga taong dumayo sa Pilipinas.

Pokaragat na ‘yan!

oOo

Alam ko na kayong mga mambabasa ay higit na maraming nalalaman kaysa inyong lingod.

Kaya, tawag o magtext na sa: 0998 – 565 – 0271. (BAKBAKAN NATIN / Nelson Badilla)

 

Please follow and like us:
Read More

P500-M BAWAT KONGRESISTA

BAKBAKAN NATIN

TAMPOK na balita ngayon ang pagbabago ng mukha ng kampanya laban sa ilegal na droga dahil tinanggap ni Bise-Presidente Ma. Leonora “Leni” Robredo ang alok ni Pangulong Rodrigo Duterte na maging co-chairman ng Inter-agency Committee Against Drugs (ICAD) at ang pinakaaabangang susunod na hepe ng Philippine National Police (PNP).

Mistulang mga ba­gong lutong pandesal ang dalawang isyu na ‘yan pero hindi mainit at matunog ang inamin sa media kamakailan ni Speaker Alan Peter Cayetano na ang totoong ipinasok at inilaang pera ng pamahalaan sa bawat kongresista ng bawat distrito sa bansa ay P500 milyon para sa 2020 badyet ng pambansang pamahalaan.

Ang limangdaang mil­yong badyet ng bawat kongresista sa bawat distrito ng bansa ay pasok sa ipinasa ng Kamara de Representantes na hini­hinging P4.1 trilyong badyet ng administrasyong Duterte para sa 2020.

Sisimulan nang busisiin at talakayin ng bawat komite ng Senado ang P4.1 trilyon.

Masyadong malaki ang P500 milyon.

Napakalayo nito sa P100 milyong sinabi ni Rep. Joey Salceda ilang buwan na ang nakalilipas.

Hindi lang malinaw kung maging ang mga kinatawan ng party-list ay mayroon ding P500 milyon tulad nina Rep. Michael Romero at Rep. Enrico Pineda ng 1-PACMAN; Rep. Conrado Estrella III ng ABONO; Rep. Eufemia Cullamat, Rep. Ferdinand Gaite at Rep. Carlos Izagani Zarate ng BAYAN MUNA; Rep. Arlene Brosas ng GAB­RIELA; Rep. Sarah Jane Elago ng KABATAAN; Rep. Eduardo Villanueva at Rep. Domingo Rivera ng CIBAC (Citizens Battle Against Corruption).

Ang mga binanggit kong mambabatas ay mga kinatawan ng mga mahihirap, pinabayaan at pinagsasamantalahang sektor ng ating lipunan.

Sabi ni Cayetano, ang P500 milyong pondo ng bawat kinatawan ng distrito ay kabuuan ng mga proyektong isasagawa ng Department of Public Works and Highways (DPWH), Department of Education (DepEd) at Department of Agriculture (DA) na nakatuon sa “build, build, build projects” ng bawat distrito.

Si Speaker Cayetano ay kinatawan ng Taguig at Pateros (unang distrito) sa mababang kapulungan ng Kongreso mula 2019 hanggang 2022.

Ang kanyang asawa na si Rep. Ma. Laarni “Lani” Cayetano ay kinatawan naman ng ikalawang distrito ng Taguig.

Kaya aabot sa isang bilyon ang mapupunta sa Lungsod ng Taguig at bayan ng Pateros.

Ano-ano kaya ang mga proyektong ito?

Sana umunlad nang tuluyan ang Taguig at Pateros sa loob ng isang taon, sapagkat ang isang bilyon ay nakalaan lamang sa loob ng isang taon.

Sana ang bawat limangdaang milyon ng bawat kongresista ay mapunta sa mga proyekto nila at hindi maging ka­ragdagang yaman.

Sabi ni Cayetano, hindi “lump sum” ang P500 milyon kaya tiniyak niyang walang korapsyon.

Ang ibig sabihin ng lump sum ay hindi detalyado at hindi tukoy ang bawat programa at proyekto na paglalaanan ng pera.

Kaya madaling manakaw ang pera dahil mistulang Pacific Ocean ang hitsura nito.

Ngunit hindi naman ibig sabihin na literal nang walang magaganap na korapsyon sa mga proyekto kapag lump sum ang diskarte sa paglalatag ng pondo.

Ang sistema ng korapsyon na alam ng nakararami ay ang pondong nakalaan sa proyektong kalsada o tulay, halimbawa, ay nakapila ang komis­yon ng mga opisyal na aabutan ng kontraktor ng proyekto.

Ang totoo, hindi lang naman sa lump sum nagkakaroon ng korapsyon sa bilyun-bilyong pera ng pamahalaan.

Kahit sa mga detalyadong programa at proyekto patungkol sa “hard projects” at soft projects” ay nagaganap pa rin ang katiwalian at korapsyon hanggang sa antas ng barangay.

Syempre, todo-todong itatanggi ito ng mga kongresista.

Kung si Senador Panfilo “Ping” Lacson ang tatanungin, sigurado siyang mayroong P20 bilyong ‘nakaparadang’ pera sa P4.1 trilyon.

Umabot sa P10 bilyon ang nakapila para sa DPWH, tugon ni Lacson.

Mayroon ding nakaparada para sa Department of the Interior and Local Government (DILG), patuloy ng senador.

Ang ibig sabihin ng nakaparadang pondo ay sa simula nakalaan sa isang distrito o kagawaran ang pondo, ngunit ililipat sa ibang distrito o kagawaran.

Ang isa pang kaduda-duda sa ipinasa nina Speaker Caye­tano ay mayroong mga inilaang badyet na lump sum, diin ni Lacson.

Labag ito sa desisyon ng Korte Suprema noong 2013.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

MATULA: ‘NANALO ANG MGA UNYONISTA NG HYATT TAXI’

BAKBAKAN NATIN

TOTOONG malupit ang ating lipunan sa uring manggagawa, sapagkat ito’y lipunan ng mga kapitalista.

Ngunit, hindi lahat ng laban ng mga manggagawa ay idinadaan at naipapanalo sa kilos-protesta at armadong pakikibaka.

Mayroon pagkakataon na sa korte natatalo ang paninikil at pananamantala ng mga kapitalista laban sa mga manggagawa.

Isang halimbawa ay ang kaso nina Rico Garcia, Pablo de Guzman at Antonio Piel, pawang mga taxi driver ng Hyatt Taxi Group of Companies.

Sila rin ay mga opisyal ng unyon ng Hyatt Taxi Services Inc.

Ang unyon ang kanilang sandata bilang mga empleyado ng naturang kompanya.

At hindi ilegal ang pagtatayo ng unyon, sapagkat itinakda at ipinag-utos ito ng batas-paggawa ng Pilipinas.

Ilang araw ang nakalipas, natalo ang kasong “estafa” na isinampa laban sa kanila sa Las Piñas Regional Trial Court.

Batay sa rekord ng Las Piñas – RTC, isinampa ang kasong estafa laban kina Garcia, De Guzman at Piel noong Pebrero 10, 2011 dahil ayon sa Hyatt Taxi Group of Companies – Radio Network Group (HTGC – RNG), silang tatlo ay “conspiring and confederating together and all of them mutually helping and aiding one another” upang  mawala ang pera ng mga taxi driver na P177,276.25 ang kabuuang halaga noong 2006 at bago pa man ng taong ito at pagkatapos ng taong ito.

Pinawalang sala ni Judge Rainelda Estacio – Montesa ang mga akusado.

Sabi ni Estacio – Montesa, hindi napatunayan ng prosekusyon na walang dudang nagawa nina Garcia at Piel ang krimen na estafa.

Hindi nasama sa desisyon si De Guzman, sapagkat namatay na ito bago natapos ang walong taong paglilitis ng kaso laban sa kanilang mga unyonista.

Ikinatuwa ng kanilang abogadong si Atty. Jose Sonny Matula, ang pa­ngulo ng Federation of Free Workers (FFW) at pinuno ng Nagkaisa labor coalition, ang panalo sa korte dahil nagapi nila ang inimbentong krimen laban kina Garcia, De Guzman at Piel.

Ang unyon ng H­yatt Taxi Services Inc. ay kasapi ng FFW.

Nagpugay rin si Matula sa pagkapanalo ng kasong “arson” na isinampa ng pamunuan ng Hyatt Taxi Group of Companies laban kay Wilfredo Cerillo, taxi driver at opisyal din ng unyon.

Nakasaad sa rekord ng kor­te, noong Setyembre 5, 2007 pa kinasuhan ng arson si Cerillo.

Ibinasura rin ni Judge Estacio – Montesa ang nasabing kaso, sapagkat hindi napatunayan ng mga abogado ng H­yatt Taxi Group of Companies ang kasong kriminal na isinampa nito laban kay Cerillo.

Sabi ni Matula, ang mga kasong inihain kina Garcia, De Guzman, Piel at Cerillo ng pamunuan ng Hyatt Taxi Group of Companies ay panahong binubuo ng mga taxi driver na ito ang kanilang unyon.

Samakatuwid, ang punto ni Matula ay isinampa ang mga kasong kriminal sa mga unyonista upang palabasin at ipamukha na mga kriminal ang mga pinuno ng unyon.

Nang manalo sina Matula, idiniin ng beteranong lider-manggagawang ito na “Our court is still our reliable vanguard to defend our workers from harassment, intimidations or any form of reprisal while they are organizing unions.”

“Natanggal ang malaking pabigat sa aming balikat,” tugon pa ni Matula.

Nakikiisa ako at nagpupu­gay sa tagumpay na ito ng mga manggagawa – ng mga taxi driver ng Hyatt.

Ang totoo, hindi na bago ang sinapit nina Garcia, De Guzman, Piel at Cerillo, sapagkat “normal” na ginagawa ng mga kapitalista ang pagsasampa ng samu’t saring kasong kriminal upang gapiin ang pagbubuo ng mga manggagawa ng unyon – unyon pa lamang ‘yan at hindi pa pagdurog sa lipunang kapitalista at pagtatayo ng lipunang sosyalista.

Ngunit, huwag kaliligtaang ang pagsampa ng mga kasong kriminal laban sa mga manggagawa ay isang paraan lamang ng mga kapitalista upang sikilin at kontrolin ang mga manggagawa.

Ang mainam kay Judge Estacio – Montesa ay hindi siya nagpakumbinsi sa mga argumento ng mga abogado ng H­yatt Taxi Group of Companies.

Ayon kay Matula, “pag-iisipan” ng FFW at ng mga unyonista ng Hyatt kung babalikan at kakasuhan nila ang pamunuan ng Hyatt Taxi Group of Companies upang panagutin sa mga inimbentong kaso laban kina Garcia, De Guzman, Piel at Cerillo.

Alam kong marami pang isyu at suliranin ang mga manggagawa.

Bukas po ang Bakbakin Natin! sa inyo at maging sa mga kapitalista upang talaka­yin ang inyong mga suliranin.

oOo

Alam ko na kayong mga mambabasa ay higit na maraming nalalaman kaysa inyong lingkod, kaya tawag o magtext na sa: 0998-565-0271. (BAKBAKAN NATIN / NELSON BADILLA)

Please follow and like us:
Read More

IWASAN ANG MGA PRODUKTONG MAY ASF

BAKBAKAN NATIN

MALIBAN sa pagiging ­journalist, isa rin ako sa maraming Filipino na mahilig kumain ng longganisa at hotdog.

Katunayan, ­longganisa o hotdog ang madalas na agahan ng aking pamilya, bukod sa itlog.

Kaya, malaking bagay sa pangkaraniwang tao na tulad ko na malaman kung ang ­binibili naming longganisa, hotdog, karne ng baboy o anomang produktong ­galing sa baboy ay ligtas pa rin o hindi ngayong panahong mistulang bagyong umiikot ang ASF sa iba’t ibang panig ng bansa.

Kahit sabihin pang hindi nagkakasakit o sa mas masahol ay hindi naman nakamamatay ang kumain ng baboy na mayroong ASF, napakaimportante pa ring alam ng mamimili na walang ASF ang bibilhin niyang longganisa, hotdog o baboy.

Kaya, natuwa ako nang aminin ng Department of Agriculture (DA) at Bureau of Animal Industry (BAI) nitong ­Nobyembre 4 na ang produktong longganisa at hotdog ng Mekeni Food Corporation ay mayroong ASF.

Kung mayroon pang ibang kumpanya bukod sa Mekeni, sikat man o hindi, ay napakahalagang ihayag ng mga opisyal ng DA at BAI upang malaman ng publiko ang katotohanan.

Ang ASF ay sakit ng baboy na kumakalat at unti-unting sumisira sa industriya ng baboy sa bansa ngayon.

Inihayag ni Ronnie Domingo, BAI Officer-In-Charge, sa press conference na ang sampol ng skinless longganisa at Picnic Hotdog na ipinadala ng Mekeni sa BAI nitong Oktubre para alamin kung ligtas kainin o hindi ay nagpositibo sa ASF.

Napakainam ang ginawang pagkumpirma ng DA at BAI sa resulta ng pagsisiyasat nito sa mga produkto ng Mekeni.

Hindi tulad noong una na halatang itinatago ng dalawang opisyal ng DA ang resulta ng pagsisiyasat ng BAI sa mga produkto ng Mekeni.

Kahit na kinukulit ng ilang journalist kung anong kilala at malaking kumpanya ang nagpositibo ang produkto sa ASF.

Ang sagot ba naman ay “for further testing.”

Pokaragat na ‘yan!

Tuloy, napagdiskitahan ng publiko ang media na siyang nagtatago ng katotohanan hinggil sa resulta ng ASF testing ng DA at BAI.

Hindi po itinago ng media ang testing ng DA at BAI sa mga produkto ng malalaking kumpanya tulad ng Mekeni Food Corporation na nakabase sa Pampanga.

Ilang opisyal po ng DA at BAI ang sadyang naglihim sa media.

Dapat nga ay tanggalin ni DA Secretary William Dar ang mga pilyong opisyal!

Ayon kay Domingo, ipinatanggal na ng Mekeni ang kanilang mga produktong longganisa at hotdog na nasa mga pamilihang bayan.

Sana nga lahat!

Ang mahirap ay kung mayroon pang ibinebentang longganisa at Picnic Hotdog ng Mekeni sa mga palengke.

Gayunpaman, mainam nang iwasan ng publiko ang mga produktong longganisa at hotdog ng Mekeni hangga’t walang kasiguraduhang ligtas ang kanilang mga produkto, batay sa magiging desisyon ng DA at BAI.

Ang pag-iwas ng mga mamimili ang siyang  pinakamahusay na dapat gawin ng bawat isa sa atin, lalo pa’t inamin ni Domingo na ang DA at ang Department of Health (DOH) “is organizing a composite team to do further investigations related to this issue.”

Sa panahong laganap ang ASF kung saan napakarami nang baboy ang namamatay o ipinapapatay upang matiyak lamang na hindi kumalat sa ­maraming panig ng bansa ang ASF sa mga babuyan, kailangan ang lubos na pag-iingat nating lahat.

Uulitin ko po, kahit sabihing hindi nakahahawa sa tao o nakamamatay ang ASF, higit na mainam ang kalusugan ng tao kaysa magpatuloy ang negosyo ng mga kumpanyang baboy ang produktong inaalok.

Alam ko na kayong mga mambabasa ay higit na maraming nalalaman kaysa inyong lingkod.

Kaya, tawag o magtext na sa: 0998–565–0271. (BAKBAKAN NATIN / Nelson Badilla)

Please follow and like us:
Read More

HAMON SA MANILA WATER AT MAYNILAD

BAKBAKAN NATIN

IKALAWANG beses na ngayong taon na may problema sa tubig sa Metro Manila.

Kaso, ang nagaganap ngayong buwan ay mas masahol kaysa sa naunang problema, sapagkat Manila Water Company, Inc. at Maynilad Water Services, Inc. na ang sangkot dito.

Ibig sabihin, higit na maraming negosyante at residente ang apektado ng kakapusan ng suplay ng tubig.

Hindi tulad noong Pebrero hanggang Abril, mga kustomer lang ng Manila Water ang may problema sa tubig, kabilang na kami.

Sabi ng pamunuan ng Manila Water at Maynilad Water Services, Inc., ang problema sa tubig sa Metro Manila ay resulta ng limitadong pinagkukunan nila ng tubig.

Anila, hanggang nga­yon ay Angat Dam lang ang pinagkukunan nila ng tubig na kesyo kaunti lang ang naiipon dahil bihira namang umulan.

Ginagawa naman daw ng dalawang water concessionare ang lahat ng paraan upang matugunan ang pangangailangan ng milyun-milyon nilang kliyente.

Kaso, ang iwinawasiwas nilang dahilan ay hindi pa rin kaya ng dalawang kumpanya ang dami ng kailangang tubig ng mga negosyante at residente sa Metro Manila.

Kaya, ang solusyon ng dalawa ay magbawas ng distribyusyon ng tubig sa kanilang milyun-milyong kliyente.

Naniniwala ang pamunuan ng Manila Water at Maynilad na matagal pang magiging stable ang distribusyon ng tubig sa lahat ng kanilang kliyente sa Metro Manila.

Ang masama rito ay tumaas ang singil nila nitong nakalipas na buwan.

At nagpaplano pang sundan ito ng panibagong karagdagang singil matapos ilabas ng Korte Suprema ang pinal nitong desisyon hinggil sa paglabag sa Republic Act No. 9275 o Philippine Clean Water Act of 2004.

Sa desisyong inilabas nitong Oktubre, kinatigan ng Korte Suprema ang desisyon ng Court of Appeals (CA) na nag-uutos sa Manila Water at Maynilad na magbayad ng P921.5 milyon bawat isa dahil sa paglabag nila sa R.A. 9275.

Dahil sa nagbabad­yang tumaas uli ang sini­singil ng dalawang kum­panya sa kanilang mga kliyente, walang dudang karagdagang pahirap na naman ito sa kanilang mga kustomer.

Ang karagdagang singil ay pagpapakita ng sobrang kalupitan ng dalawang water concessionaire sa kanilang mga kustomer, sapagkat lumi­litaw na ipinapasa nila ang parusa ng Korte Suprema.

Kaya, ang magdurusa at mababawasan ng pera ay hindi ang Manila Water at Maynilad, kundi ang milyun-milyon nilang kustomer.

Habang nakarara­ting sa mamamayan ang masamang balitang ito, mahina naman ang tubig na dumarating sa kanilang bahay.

Hindi nagustuhan ni Pangulong Rodrigo Duterte ang panibagong masamang balitang ito tungkol sa tubig.

Kaya, tahasang binalaan ni Duterte ang pamunuan ng dalawang kumpanya na posibleng tapusin ang kontrata ng pamahalaan sa kanila kapag patuloy silang pumalpak.

Nagsimula ang operasyon ng Manila Water at Maynilad noong 1997 bilang solusyon sa “water crisis” noong panahon ni Fidel Ramos.

Mula noon hanggang ngayon, napakalaki na ang kinita ng dalawang higanteng kumpanya.

Kaya, ang babala ni Duterte ay malaking hamon sa kanila upang tapusin ang problema sa distribusyon ng tubig.

Kaya, huwag nilang gamiting palusot sa kanilang palpak na serbisyo ang limitadong tubig ng Angat Dam. (BAKBAKAN NATIN / NELSON BADILLA)

Please follow and like us:
Read More

MALAYANG MAGNEGOSYO ANG MGA INTSIK SA BATANES

BAKBAKAN NATIN

HINDI ako tutol sa patakaran ni Pangulong Rodrigo Duterte na maging kaibigan ng bansa ang People’s Republic of China na kaiba kay da­ting Pangulong Benigno Simeon Cojuangco Aquino III.

Kaso, sumobra ang luwag ng administrasyon ni Duterte sa mga Intsik.

Kahit sa prostitusyon, kidnapping at pagtatrabaho sa online gambling na ikinategoryang Philippine Offshore Gaming Operators (POGO) ay pasok sa ating bansa.

Ang ganitong mga negosyo o pinagkakakitaan ay bawal sa China na tapat at seryosong ipinatutupad ng kanilang pamahalaan.

Ngunit, malayang nakapapasok ang mga Intsik sa ating bansa at ginagawa ang kahit anong gusto nilang gawin kahit mali at ilegal, sapagkat kumbinsido silang pasok at puwede sa Pilipinas kahit bawal at ilegal.

Inilabas ng Bakbakan Natin! nitong Oktubre 25 na ang mga dayuhang dumadaan sa Ninoy Aquino International Airport (NAIA) ay nagbabayad ng ‘padulas’ na P50,000 kada dayuhan sa “immigration visa upon entry” upang makapasok sa ating bansa.

Kaya, maraming mga dayuhan, lalo na mga Intsik, sa ating bansa na “turista” ang kategorya kahit sa ilegal na negosyo nagtatrabaho sa bansa, sapagkat P50,000.00 ang nagpasya.

Nakapasa at nakapasok sila kahit mahigpit ang pagbabantay ng Bureau of Immigration (BI).

Ang pagpasok ng mga dayuhan, lalo na ng mga Intsik sa ngalan ng “libu-libong salapi” ay hindi bagong isyu ng katiwalian sa NAIA.

Isang bukas na kuwento ang nasabing katiwalian.

Kaya, hindi matapus-tapos ang problema ng bansa tungkol sa “illegal alien” hanggang kasalukuyan.

Noong Abril ng taong kasalukuyan, isiniwalat din ng Bakbakan Natin! ang paghahatag ng escort ng mga Japanese sa korap na mga tauhan sa Office of Transportation Security (OTS) o X – Ray Division sa NAIA.

Ang pinakamababang inaabot daw ng escort ng Japanese sa mga korap na tao sa OTS/X – Ray Division ay P50,000.00 upang makalusot ang dala-dala nitong ginto.

Sa madaling salita, may kanya-kanyang porma ng korapsyon ang iba’t ibang tanggapan sa NAIA.

Pokaragat na ‘yan!

May nagparating uli sa akin tungkol sa pagpasok ng mga dayuhan sa bansa, lalo na ng mga Intsik.

Ang banggit ng impormante, iyong inilabas kong korapsyon sa NAIA – BI rito sa Bakbakan Natin! ay maliit lang daw na halaga kung kukuwentahin.

Higit na malaking korapsyon ang matagal nang nagaganap sa Batanes.

Ayon sa impormante na sobrang mahal ang Pilipinas, regular na dinadayo ng mga Intsik ang Batanes, sapagkat malaki ang kinikita nila sa kanilang pagnenegosyo.

Isa sa mga pinagkakakitaan ng mga Intsik ay ang “gintong ahas” (golden snake).

Walang legal na dokumento ang mga negosyanteng Intsik, ngunit walang sumisita at nagbabawal sa kanila sa Batanes.

Syempre, ang dahilan ay mayroong “regular na kumikita” mula sa mga negosyanteng Intsik at iba pang dayuhan.

Uulitin ko po, regular na kumikita sa ilegal na pagnenegosyo ng mga dayuhan sa Batanes.

Tiniyak ng butihing impormante, kumikita ang mga politiko, ilang pulis­yang nakadestino sa Batanes at maging ilang mga taga-Bureau of Customs (BoC) na nakasasakop sa Batanes.

Aniya, hindi ito naisisiwalat sa media sapagkat napakalayo ng Batanes sa kabihasnan.

Totoo naman.

Sabi pa niya, maganda sa Batanes. Tahimik.

Ngunit, ang matindi sa lahat ay maraming kumikita sa Batanes.

Pokaragat na ‘yan!

Wala namang masama kung pupunta sa iba’t ibang panig ng bansa ang iba’t ibang klaseng dayuhan, sapagkat hindi maipagkakailang napakaganda ng Pilipinas.

Masarap magnegosyo rito.

At lalong masarap manirahan dito sa ating bansa, kahit maraming kademonyohang nangyayari araw-araw.

Ngunit, hindi dapat payagan ng pamahalaan na manatili ang korapsyon at ilegalidad sa pagpasok ng mga dayuhan tulad nang matagal nang nagaganap sa Batanes.

Ngayon, maaari kayong tumawag o magtext sa 0998 – 565 – 0271 kung mayroon kayong nalalaman tungkol sa ile­gal na mga ginagawa ng mga dayuhan saanmang panig ng bansa.

Alam ko na kayong mga mambabasa ay higit na maraming nalalaman kaysa inyong lingod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More