CRACKDOWN SA MGA KALIWANG GRUPO WALANG KATOTOHANAN!

AKTIBISTA-2

(Ni NELSON S. BADILLA / Ikaapat at huling bahagi)

MALIBAN sa paratang na “gestapo-like,” inakusahan din ng mga aktibistang kabilang sa kaliwa na may crackdown ang administrasyon ni Pangulong Rodrigo Roa Duterte laban sa kanilang hanay.

Ang tinutukoy  ng PeryodikoFilipino writer na ito na mga aktibistang bahagi ng kaliwa ay ang Kilusang Mayo Uno (KMU), Bagong Alyansang Makabayan (Bayan), Gabriela, Bayan Muna,  Kalipunan ng Damayang Mahihirap (Kadamay) at iba pang mga kasamahan nila.

May iba pang bahagi ng kaliwa tulad ng Partido ng Manggagawa (PM), Bukluran ng Manggagawang Pilipino (BMP), Sanlakas at iba pa.

Ayon sa mga pinuno ng mga organisasyong ito, wala namang hinuhuli ang Armed Forces of the Philippines (AFP) at Philippine National Police (PNP) sa kanilang hanay.

Iwinasiwas ng kaliwa na ang naganap na operasyon ng pinagsanib na puwersa ng AFP at PNP sa Bacolod City noong Oktubre 31 at Maynila noong Nobyembre 5 ay bahagi ng crackdown ng administrasyong Duterte laban sa kanilang hanay.

Ang crackdown ay sagot daw sa pagpapatigil ni Pangulong Rodrigo Duterte sa patuloy na armadong pakikibaka ng pambansa demokratikong puwersa.

Idinikit ng puwersa ng mga kaliwang aktibista na bahagi ng pambansa demokratikong puwersa ang binabanggit na crackdown makaraang biglang iatras ni Duterte ang usapang pangkapayapaan ng kanyang administrasyon sa National Democratic Front of the Philippines (NDFP).

Ang Communist Party of the Philippines (CPP) ang namumuno sa NDFP.

Ang CPP rin ang namumuno sa pambansa demokratikong pakikibaka simula noong Disyembre 1968.

Kapag sinabing crackdown, ibig sabihin “sinisira” o “winawasak” ang isang organisasyon o kilusan.

Ang salitang ito ay aktibo na nangangahulugang patuloy na nagaganap.

Kaya, hindi tumitigil sa iisang teritoryo ang pagsira o pagwasak sa organisasyong itinuturing na kaaway ng pamahalaan.

Ayon sa AFP at PNP, walang isinasagawang crackdown ang estado laban sa kanilang puwersa.

Ang naganap na panghuhuli sa mga kasapi ng KMU, Gabriela, Bayan Muna at iba ay batay sa impormasyong may itinatago silang mga armas at bala sa tanggapan ng nasabing mga organisasyon.

Labag sa Penal Code of the Philippines ang paghawak at pagtatago ng mga baril at bala nang walang kaukulang papeles.

Tiniyak din ng AFP at PNP na walang ipinag-uutos ang kanilang Commander-in-Chief na si Pangulong Rodrigo Duterte na sirain at wasakin ang mga organisasyong nakaugnay sa CPP.

Kahit walang pahayag ng pagtanggi ang AFP at PNP, napakalabong ikahon o isalawarang mayroong naganap na crackdown laban sa mga organisasyong matagal nang iniuugnay sa CPP, sapagkat napakaunting bilang lamang ng mga kaliwang organisasyon ang dinakip at ikinulong ng pinagsanib na puwersa ng AFP at PNP.

At ang operasyong ito ay hindi ilegal o labag sa batas, sapagkat mayroong search warrants ang mga awtoridad.

Ang search warrants na tiniyak ni Punong Mahistrado Diosdado Peralta na legal at nakabatay sa resolusyon ng Korte Suprema ay galing sa Quezon City Regional Trial Court.

Ang operasyon ay idinaan sa sistemang legal.

Wala kinidnap o pinapatay ang AFP at PNP kahit isa sa kanila.

Kaya, ang punto ng AFP, PNP at Korte Suprema nang pumutok sa media ang operasyon sa Bacolod City at Maynila ay dapat daanin din sa legal na proseso ng mga kaliwang aktibista ang naganap na dalawang operasyon.

Ang pagpapalaki sa media ng operasyon ng AFP at PNP sa kahit kaninong kaliwang aktibista, sa pamamagitan ng pagbabanggit ng mga salitang hindi naman naganap, ay hindi nakakatulong sa kaliwa o sa hanay ng CPP.

Sa halip, lalong inilalayo ng mga kaliwang aktibista ang kanilang sarili mula sa mamamayang Filipino.

At ibinabaon ang kanilang mga sarili sa gilid ng bangin ng kasaysayan hanggang sa kalaunan ay malaglag nang kusa, sapagkat isinuka sila ng mamamayang Filipino.

Please follow and like us:
Read More

TANIM ANG MGA EBIDENSIYA?

AKTIBISTA

(Ni Nelson S. Badilla / Ikatlong bahagi)

MARAMING orga­ni­sasyong kabilang sa kaliwang puwersa ang bumatikos at kumondena sa ginawang pag­lusob at pagdakip ng mga awtoridad sa mga aktibista sa Bacolod City noong Oktubre 31.

Ang maanghang magsalita at matulis ang dila sa kanila ay si Bayan Muna Representative Carlos Isagani Zarate na nagsabing: “Bayan Muna strongly condemns the dastardly Gestapo-like raid… simultaneously conducted by state forces against the offices of Bayan Muna, Gabriela and NFSW in Bacolod, Negros Occidental.”

Ang punto ni Zarate ay panggigipit na matatawag ang operasyon ng pinagsanib na puwersa ng Armed Forces of the Philippines (AFP) at Phi­lippine National Police (PNP) dahil inilunsad ito “a night before a long weekend so as to ensure that the courts are closed tomorrow so that the planted pieces evidence and subsequent trumped-up charges filed cannot immediately be challenged.”

Nang banggitin ni Zarate ang salitang Gestapo, ito ay pumapatungkol sa “Geheime Staatspolizei” na Gestapo ang maiksing pangalan.

Ang Gestapo ay ang sikretong organinsasyon ng pulisya sa Prussia. Itinatag ito ni Hermann Göring noong 1933.

Sa kalaunan ay hindi lang sa Prussia ito kumilos at umatake, kundi sa lahat ng bansang sakop at kontrolado ng Germany na nasa kontrol at paghahari ng Nazi (National Socialist) na ang pinuno ay ang diktador na si Adolf Hitler.

Malupit ang Gestapo dahil mabagsik, nakakatakot bukod sa  nakamamatay ang sikretong operasyon nito laban sa mga kalaban ni Hitler, sa partikular, at sa Nazi, sa pangkalahatan.

Sa ganitong pagsasalarawan, malayo sa estilo ng Gestapo ang operasyon ng pinagsamang puwersa ng AFP at PNP sa mga opisina ng Kilusang Mayo Uno (KMU), Ba­yan Muna, Gabriela, Negros Federation of Sugar Workers (NFSW) sa Bacolod City.

Wala namang sinaktan, ginulpi at pinatay sa mga suspek nang pagtatago ng mga baril at bala.

Ngunit, ayon sa mga abogadong nakausap ng Peryo­dikoFilipino writer na ito, maaaring kuwestyonin sa korte  ang ginawa ng mga tauhan ng AFP at PNP.

Ipinagtanggol ng bagong punong mahistrado na si Diosdado Peralta ang hukom na nagpalabas ng search warrant.

Ani Peralta, walang ilegal sa pag-isyu ng search warrants ni Quezon City Regional Trial Court Executive Judge Cecilyn Villavert  sapagkat sinunod ng hukom ang lahat ng alintuntunin ng hudikatura bago maglabas ng search warrants.

Tinukoy pa ni Peralta ang ang paglalabas ni Villarbert at kahit ng executive judge ng Manila RTC ng search warrants bagaman sa labas ng kanilang nasasakupang lungsod ay alinsunod pa rin sa legal na batayan na ipinag-utos ng Circular AM No. 03-8-02-SC.

Sabi ng KMU, Bayan Muna at Gabriela, itinanim lang ng AFP at PNP ang nakuhang mga baril at bala sa kanilang mga tanggapan.

Ngunit, wala silang naipakita sa media na nakakukumbinsing ebidensya na ‘magsasalya’ at ‘magbabasura’ sa operasyon ng militar at pulisya laban sa kanila.

Sinegundahan ng KAPARATAN ang pahayag ng KMU, Bayan Muna at Gabriela kahit wala ang mga opisyal at miyembro nito sa aktuwal na operasyon ng AFP at PNP sa Bacolod City.

Ang KARAPATAN ay isang leftist-human rights organization na kakampi ng KMU, Bayan Muna at Gabriela sa pakikibaka upang makamit ang pambansa demokratikong lipunan sa bansa.

Sabi ng Officer-In-Charge ng PNP na si Lieute­nant General Archie Francisco Gamboa, patunayan ng KMU, Bayan Muna, Gabriela at NFSW sa korte ang kanilang akusasyong “itinanim” ang mga ebidensiya.

Ani Gamboa, palagi namang sinasabi ng mga kaliwa na itinanim ang mga ebidensiya tuwing mayroong operasyon laban sa kanila. (Itutuloy)

Please follow and like us:
Read More

OPERASYON LABAN SA KALIWA, LEGAL

PNP-KALIWA

Paniwala ng Philippine National Police

(Ni Nelson S. Badilla / Unang labas)

NAGLUNSAD ng operasyon ang Armed Forces of the Philippines (AFP) at Philippine National Police (PNP) nitong Oktubre 31 at Nobyembre 5 sa mga tanggapan ng mga organisasyong kabilang sa mga kaliwang aktibista, partikular sa mga kasama sa pambansa demokratikong puwersa.

Ang pambansa demokratikong puwersa ay isang pangkat sa kilusang kaliwa.

Ang iba ay sosyalista at progresibong puwersa.

Animnapu at dalawa (62) ang nadakip sa operasyong isinagawa ng AFP at PNP noong Oktubre 31 sa opisina ng Kilusang Mayo Uno (KMU), Gabriela at Negros Federation of Sugar Workers (NFSW) sa Bacolod City at Escalante City.

Anim sa 62 aktibista ay menor de edad.

Ipinasa na sa sila sa Department of Social Welfare and Development (DSWD) alin­sunod sa itinakda at ipinag-utos ng batas.

Tatlong aktibista naman ang nahuli noong Nobyembre 5 sa Tondo Manila.

Sila ay kabilang sa Bagong Alyansang Makabayan (Bayan), Kalipunan ng Damayang Mahihirap (Ka­damay) at Manila Workers Unity (MWU).

Sabi ni Capt. Cenon Pancito III, hepe ng public affairs office (PIO) ng Philippine Army’s 3rd Infantry Division, sa media na legal ang operasyon sa mga tanggapan ng KMU, NFSW at Gabriela na nauwi sa pagkahuli ng 62 aktibista, kabilang ang anim na menor de edad, sapagkat mayroon silang hawak na “search warrants.”

Ang mga warrant ay inis­yu ni Quezon City Regional Trial Court Executive Judge Cecilyn Villavert.

Idiniin ni Pancito na kumuha sila ng search warrant matapos “mapatunayan” ang impormasyong ipinarating sa kanila na mayroong nakatagong mga baril at bomba sa tanggapan ng KMU, NFSW at Gabriela.

Mayroon ding search warrant ang operasyon ng PNP sa Tondo Manila noong Nobyembre 5, ayon naman sa Manila Police District (MPD)

Ang naglabas ng search warrant sa operasyong ito ng MPD ay si Judge Villavert, ang hukom na nag-isyu ng search warrant para sa operasyon ng AFP at PNP sa Bacolod.

Tiniyak ni P/Gen. Bernard Banac, tagapagsalita ng PNP na ang “series of arrests of activist leaders and members shows the rule of law and criminal justice system at work.”

“The PNP performs its mandate to enforce the law following established procedures with utmost respect for human rights,” pahayag pa ni Banac.

Sabi naman ni P/Maj. Titoy Jay Cuden, hepe ng public affairs office (PIO) ng National Capital Region Police Office (NCRPO),  na “walang” operasyong labag sa batas ang anumang yunit ang NCRPO laban sa mga kaliwang orga­nisasyon at ng kanilang mga pinuno.

Nilinaw ni Supreme Court Chief Justice Diosdado Peralta na batay sa impormasyong nakarating sa Korte Suprema, sinunod ni Judge Villavert ang lahat ng alintuntunin sa paglalabas niya ng search warrants laban sa mga kaliwang aktibista sa Bacolod at Manila.

Batay sa Circular AM No. 03-8-02-SC ng Korte Sup­rema ang paglalabas ni Judge Villavert ng search warrants.

Ayon sa naturang dokumento, pinahihintulutan ng mataas na korte ang “executive judges” ng RTC ng Que­zon City at Manila na mag-isyu ng search warrant labas sa dalawang lungsod.

Ipinaliwanag ni Peralta sa mga mamahayag noong Nob­yembre 8 na si Judge Villavert “[has] conducted hearings to determine the existence of probable cause, conducted the required searching questions, extensive questions and when she was satisfied on the exis­tence of probable cause she issued a search warrant.”

“When the search warrant was served, she required the certain policemen or military men to report to the court within 10 days from receipt and she followed,” patuloy ni Peralta na pumalit kay Chief Justice Lucas Bersamin matapos magretiro ito noong Oktubre 18.                      (Itutuloy)

Please follow and like us:
Read More