SAPATOS NI SION MAKINIS NA, MATIBAY PA (1)

Mayor Marcy Teodoro

(Mac Cabreros)

Pasko na naman, sinta. Gusto mo magpabongga? O, gusto mo bongga ang regalo mo sa iyong manito/manita?

Magtungo lamang sa Lungsod ng Marikina, paanyaya ng alkalde nitong si Mayor Marcelino “Marcy” Teodoro.

“Dito sa Marikina, makapili at makabili ka ng mura ngunit de kalidad na sapatos,” ayon kay  Mayor Teodoro kasabay ng pagyayabang na ang mga sapatos na gawa sa kanyang lungsod ay makikinis at matitibay.

Kamakailan lamang ay pinamunuan ni Teodoro, kasama ang mga opisyal ng Philippine Footwear Federation Inc. sa pamumuno ni Antonio Andres, may-ari ng Gibson Shoes at Marikina Trade Fair Cooperative, ang Sapatos Festival kung saan alok sa Shoe Bazaar ang iba’t ibang produkto mula leather shoes, bags at iba pa.

“Matitibay at world class ang quality ng mga sapatos na gawa ng magagaling nating sapatero,” bigkas pa Mayor Teodoro.

“Pagsasapatos, ito ang industriya kung saan naging tanyag ang Marikina. Sa pagkakagawa ng unang pares ng sapatos, bahagi na ito ng aming kasaysayan,” dugtong Teodoro.

Binisita rin ni Mayor Marcy ang 48 na shoe manufacturers na nakibahagi sa Festival kabilang ang 71-anyos na si Rolando “Tatay Oly” Santos na gumawa ng pares ng sapatos na isinuot ni Pangulong Rodrigo Duterte noong nakaraang State of the Nation Address (SONA).

Bukod sa Shoe Bazaar na matatagpuan ang Shoe Bazaar sa Marikina Freedom Park, makakabili na rin ang ating kababayan ng sapatos at iba pang produkto ng Marikina sa mga mall. Mayroon na ring outlet ng Marikina Shoe Trade Fair Cooperative sa Pasalubong Center sa Davao City na binuksan noong Agosto 23.

Taun-taon isinasagawa ang Sapatos Festival upang maitampok ang angking talino at talento sa pagdisenyo at paglikha o paggawa ng magaganda at de kalidad na sapatos.

Nakilala ang Marikina bilang Shoe Capital of the Philippines at tangan ngayon ang World Record kung saan makikita ang pinakamalaking sapatos. Mayroon itong sukat na 17 talampakan ang haba at 8 talampakan ang lapad kung saan katumbas ng 30 normal feet ang magsusuot. Abot sa dalawang milyong piso ang ginastos at ginawa ito sa loob ng 77 araw. Sinertipikahan ito ng Guinness Book of World Records noong 2002. (Nakilala rin ang Pilipinas sa pamamagitan ni dating Unang Ginang Imelda Romualdez Marcos dahil sa dami ntiong koleksyon ng sapatos).

“Siguradong matitibay ang mga sapatos na gawa sa Marikina,” wika pa Mayor Marcy.

Aniya, sertipikado ng Technical Education and Skills Development Authority (TESDA) na NC II ang mga taga-disenyo at tagagagawa ng sapatos.

“Hindi lamang matibay kundi stylistic o makabago ang disensyo na

puwedeng maipagmalaki sa international market ang gawang Marikina,” pahayag Mayor Teodoro.

Ipinabatid ni Mr. Antonio Andres, pangulo ng Philippine Footwear Federation Inc, base sa resulta ng isinagawa nilang elastic test ng kanilang sapatos kumpara galing sa ibang bansa, mas tumatagal ng mahigit isang taon ang kanilang gawang sapatos.

Ngunit, tulad ng ibang industriya, dumaan din sa malamlam na panahon ang shoe industry sa Marikina. Bumagsak ito matapos ang EDSA revolution na lalong pinatamlay o lumubog nang rumagasa ang bagyong Ondoy kung saan maraming pagawaan ang nasira sa baha na may kasamang putik. (May kasunod)

Related posts

Leave a Comment