BACKYARD OLYMPICS

teofilo yldefonso

Pagiging  kampeon dapat bang ikatuwa?

(Ni Mac Cabreros)

SA kasalukuyan ay ma­rami ang walang pagsidlan ng tuwa ang mga Fi­lipino dahil sa pagkakampeon ng bayan na­ting Pilipinas sa katatapos na Southeast Asian Games (SEAG).

Hindi na mahalaga kung ilan ang ginto, pilak at tanso na nakuha ng ating mga manlalaro, basta tayo ang nagkampeon sa basketball, dahil doon naman baliw na baliw ang mga Pinoy.

Iba ang SEAG sa Asian Games kung saan buong Asya ay kasali at ginagawa lamang tayong basahan ng mga bansang gaya ng Tsina at South Korea at mga kapitbahay natin sa Timog Silangang Asya.

Lalong iba sa Summer Olympics na ginaganap tuwing apat na taon, kung saan halos buong daigdig ay kasali.

Laban ka sa drama?

Simula noong unang Summer Olympics na idinaos noong 1896, 31st  Summer Olympics na sana ang naidaos,  pinakahuli noong 2016 sa Rio de Janeiro, Brazil . Idaraos ang susunod na Olympiada sa 2020 sa Tokyo, Japan. Di na mabilang na sapatos ang napudpod at katakot-takot ang medalya ang napanalunan  dito, at katakot-takot na drama ang naganap.

31st  sana dahil dapat idaraos ang VI Olympic Games sa Germany noong 1916 pero kinansela dahil sa World War I.

Nanood pa si Hitler noong 1936 Olympic Games nang sa wakas ay makarating sa Berlin ang Olympiada.

Ilang taon pa sumabog na ang World War II  nang salakayin ng kawan ni Hitler ang Poland noong 1939.

Kinansela naman XII Olympic Games na idaraos sana sa Tokyo, Japan na kaalyado ni Hitler dahil patuloy pa ang World War II.

Taong 1944 sa kaaway ni Hitler sa United Kingdom sana gaganapin ang XIII Olympics, pero di natuloy dahil hindi pa tapos ang WWII.

Nang bumalik sa Germany ang Olympics, sa Munich noong 1972 hinostage at pinatay ng Palestinian terrorist group Black September ang 11 Israeli Olympic team members kasama ang isang pulis na German.

Pinakahuli, nitong hu­ling XXXI Olympic Games sa Brazil, pinalayas umano ng isang kasapi ng Brazilian synchronized swimming team ang kanyang ka-partner sa kanilang silid para makipag-sex sa kababayan din nilang mananagwan (canoeist).

Olympic Games 1916Backyard Olympics

Naiiba talaga ang drama sa Olympics at maging sa mga lugar na pinagdausan at dapat pagdarausan nito.

Masasabing ang SEAG ay walang binatbat, at ayon sa aking kaibigang si Manong Chito, kumpara sa Olympiada ay pwedeng ituring na “backyard Olympics,” parang Ligang Inter-Tsinelas tuwing bakasyon ng summer, kung saan maraming bagong tuli ang naglalaro, ang ikinumpara mo sa NBA.

Bakit?  Dahil sa 120-taong kasaysayan ng nasabing Olympiada, nakaka-10 medalya pa lang ang Pilipinas:  tatlong pilak at pitong tanso.   At iisang Pilipino pa lamang ang nakakadalawang medalyang tanso at ito ay si Teofilo Yldefonso na ang laro ay swimming.

Samakatuwid, tunay ngang pwedeng ituring na “backyard Olympics” ang SEAG dahil kung sa SEAG ay nagkakampeon tayo, sa Olympiada ay halatang nangungulelat tayo.

Ang SEAG ngayong taon ang ikalawang pagkakataong ang Pilipinas ang naging kampeon sa nasabing timpalak na idinaraos tuwing dalawang taon at sinimulan noong 1977.

Ang mga sumusunod ay mga katanungang ukol sa nagdaang SEA Games.  Sa mga tanong na walang tiyak na sagot, o hindi n’yo gusto ang sagot,  bahala na kayong humusga

1) Ilang beses nang naging host ng SEA Games ang Pilipinas?

* Apat. 1981, 1991, 2005 at 2019

2) Ilang beses nang nagkampeon ang Pilipinas?

* Dalawa. 2005 at 2019

3) Saan idinaos ang SEA Games noong huli tayong magkampeon?

* Dito rin sa Pilipinas.

4) Masasabi bang maganda lang ang ipinapakita ng ating mga atleta kapag nasa sarili tayong bakuran?

* Pwede.

5) Bakit kaya?

* Siguro dahil sa suporta ng mga kababayan.

6) Pwede kayang nanggigil ang mga atleta sa sari-sa­ring kahihiyang nangyari bago at habang ihino-host natin ang palaro kaya nagbigay sila ng record-breaking performance?

* Pwede.

7) Samakatuwid, hindi pala dapat imbestigahan at pwede pang ituring na bayani si Speaker Alan Peter Cayetano at simbulo ng kadakilaan ang kanyang P50 milyong kaldero?

* Totoo nga ang sinabi ng DOH na dapat madagdagan ang mga psychologist at psychiatrist sa bansa dahil dumarami na nga ang baliw sa Pilipinas.

Related posts

Leave a Comment