MILITARY TAKE-OVER SA MAYNILA AT MANILA WATER DAPAT SUPORTAHAN

CHRISTIAN BOMB

NAGBANTA ng military take-over si Pangulong Rodrigo Duterte upang patakbuhin ang Maynilad at Manila Water kung hindi raw niya magugustuhan ang paliwanag ng mga Ayala at ni Manny V. Pangilinan na may kaugnayan sa ipinasok na kontrata ng dalawang water firms sa gobyerno.

Hindi lang military take-over sa Maynilad at Manila Water ang banta ng Pangulo, kundi ipapa-warrantless arrest daw niya ang mga Ayala at si Pangilinan.

Dapat nga yata ay huwag lang banta, kundi totohanin na ni Pres. Duterte ang military take-over sa dalawang water firms at pagpapaaresto sa mga abusadong negosyanteng ito.

Nang kanselahin na kasi ng Manila Water Sewerage System (MWSS) ang extension ng kanilang kontrata ng hanggang 2037 sa dalawang water firms na ito, at ang paiiralin na lang ay ang original na kontrata na hanggang taong 2022 na lang magseserbisyo ng tubig sa Metro Manila, Cavite at Rizal ang Maynilad at Manila Water, ay nagbanta ang mga representante ng mga Ayala at ni Manny Pangilinan na ang kanselasyon ng kontrata ay posibleng maging sanhi ng pagtaas nila ng singil sa tubig.

Isipin n’yo, ang tagal na hinuthutan ng mga Ayala at ni Pangilinan ang publiko dahil ang corporate income tax na dapat binabayaran nila sa gobyerno ay sa konsyumer nila ipinapasa, tapos may lakas pa sila ng loob na magbanta ng taas singil sa tubig.

Malas lang nila dahil nang mabisto kanilang kawalanghiyaan ay sa panahon ni Pres. Duterte, kaya’t dapat suportahan ng taumbayan ang Presidente sakaling ipa-take-over na sa military ang Maynilad at Manila Water at ipakulong din ang mga Ayala at si Pangilinan para maturuan ng leksyon ang mga tulad nilang mapagsamantalang negosyante sa bansa.

oOo

TIMBRE: Paging NCRPO Director, Brig. Gen. Debold Sinas, sa Pasig City daw ay may pa-lotteng si alyas “Laarni:.. hindi pa rin daw tumigil ang video karera operations ni “Madam” sa Parañaque City. (CHRISTIAN’S BOMB / CHRISTIAN HERNANDEZ)

Please follow and like us:
Read More

BIGAS

yourservice

ANG ating Kongreso ay binuo sa ilalim ng ating saligang batas upang magsuri, pag-aralan at sumulat ng mga batas na makatutulong sa pagsulong ng ating mga adhikain sa bayan. Kabilang dito ang seguridad sa ating soberanya at kasarinlan, seguridad sa ating kaligtasan, seguridad sa kalusugan, at seguridad sa pananatili ng ating uri ng pamumuhay.

Isama na rin natin ang isa sa mga pinakaimportanteng aspeto ng pamumuhay natin bilang Filipino, ang seguridad sa pagkain, lalong-lalo na sa pananim at suplay ng bigas. Kalakip sa aspetong ito ang pananatili ng isang resonableng pamilihan sa bigas mula sa magsasaka hanggang sa merkado.

Ngunit nakatatakot na ang mga nangyayari ngayon sa ating mga kababayang magsasaka. Kabi-kabila ang balitang hirap na hirap na sila dahil sa epekto ng isang batas na inilabas ng ating Kongreso, ito ang tinatawag nating Rice Tarification Law na naglayong payagan ang pagpasok o pag-angkat ng mga murang bigas mula sa ating mga kapitbahay na bansa. Ano ang naging epekto nito? Ang naging epekto ng batas na ito ay ang pagbaha ng napakaraming bigas na inangkat mula sa ibang bansa at sa murang halaga. Natural, mas bibilhin o tatangkilikin ng mamimili ang murang bigas na ito kesa bumili ng bigas na lokal. Lalong lalo na ngayon sa hirap ng buhay at sa mahinang kapangyarihan ng piso, natural lamang na mas bebenta ang mga inangkat na bigas at mas malaking kita ito sa mga negosyanteng umangkat.

Sino ngayon ang talo? Sino ngayon ang napinsala dahil dito? Tayo ba? Hindi naman dahil bilang mamimili, tila mas pabor sa atin na may mas mura tayong bibilhin na bigas. Ang tunay na naagrabyado rito ay ang ating mga magsasaka. Dahil sa kaganapang ito, dahil sa isang batas na naglayong ibsan ang taas ng presyo ng bigas, bumaba naman nang sobra ang presyo ng lokal na bigas para maaari itong makipagkumpitensya sa inangkat na uri ng bigas. Ang resulta, lugi ang ating mga magsasaka dahil hirap nilang bawiin ang puhunan nilang ginamit sa pagtanim at pag-ani ng bigas.

Ang solusyon naman ng pamahalaan, magpautang ng labin-limang libong piso kada magsasaka. Sapat na ba ito? Natural hindi, lalo pa nga nitong pinahihirapan ang mga magsasaka dahil ito ay utang at hindi subsidiya. Panandaliang lunas lamang ito para lang may masabi na may ginagawa ang pamahalaan natin para tugunan ang problema ng mga magsasaka.

Sa aking munting palagay, hindi puhunan o kakulangan ng puhunan ang problema, kung maaari lamang ay balikan ng ating mga mambabatas, sa tulong ng mga numumuno sa Kagawaran ng Pagsasaka, ang batas na pasimuno sa kaganapang ito. Totoo na siguro maganda ang hangarin ng nagsulong ng batas nito sa Kongreso, ngunit hindi natin pwede ipikit ang ating mga mata sa hirap at hinagpis na tinatamo ngayon, oo ngayon, ng ating mga kababayang magsasaka. Ang suliraning ito ay umaapekto sa isang aspetong napakalapit sa ating mga puso bilang mga Filipino — ang industriya ng ating pagsasaka at ang kinabukasan ng pamumuhay ng ating mga magsasaka. Hahayaan na lamang ba nating mamatay ang lokal na pagsasaka natin at ang pagtanim at pag-ani ng lokal na bigas at umasa na lamang sa pag-angkat ng bigas mula sa ibang bansa? Tuluyan na lamang ba nating papatayin at kalilimutan ang pamumuhay at industriyang agraryo at tayuan na lamang natin ang ating mga lupaing sakahan ng mga mall? Kayo na ang humusga. (@YOURSERVICE / ATTY. DAVID AQUINO)

Please follow and like us:
Read More

MAHALAGA ANG KASAMA

PINOY ABROAD

SA araw na ito ay tatalakayin natin ang tungkol sa pagpili ng mga nakakasama. Sa pagpili ng makakasama kaugnay sa mithiin mo sa buhay. Paano tayo magtatagumpay sa larangan ng pampamilya, pangkabuhayan o sa ating propesyon?

Malaking bahagi  sa ating tagumpay ang mga taong nakakahalubilo natin. Tagumpay sa ating ispiritual, pinansyal o propesyon ay malaking impluwensya ang ating madalas na nakakasama. Halimbawa, kung lagi nating kasama sa araw-araw ay  iresponsableng magulang na maraming bisyo, sooner or later magiging katulad na rin tayo nila. Sabi nga, “Birds of the same feather flock together,” gayundin ang kasabihan, “Tell me who your friends are and I’ll tell you who you are.”

Tandaan natin, na hindi tayo  makararating  kung saan natin gustong pumunta  sa ating  sarili. Kakailanganin natin ng tulong ng iba para gabayan tayo. Anoman ang nais nating makamit o marating sa buhay kailangan may mga nakasasama tayo na magagaling sa ganung propesyon o mga taong matagumpay sa buhay at pamumuhay.

Paalala pa rin, kahit sa ating mga sinasamahan na tayo ang pinakamahina o pinakamaliit na tao sa grupo at sila ay magagaling, hindi ito magiging sagabal sa atin para tayo ay maging matagumpay. Bagkus, sila ang magiging inspirasyon natin at nahahawa tayo sa kanilang mga style  o gawi bilang isang matagumpay.

Gayundin naman, kung sa panahon na tayo ay dumadalo sa isang seminar o pag-aaral kahit tayo ang pinakamahina sa grupo o sa klase, sila’y nagiging challenge sa atin para tayo makapagpunyagi o magsumikap. Wala na ring kwenta kung tayo ang pinakamagaling o top on the group, ibig sabihin lang na hanggang doon na lang tayo. Kaya ang payo nga, kahit tayo ang pinaka-least sa grupo mas mabuti doon sumama at doon tayo masasanay at magiging magaling katulad nilang mahuhusay o magagaling na.

Mahalagang makihalubilo o makisama sa mga matagumpay at mabubuting tao upang tayo’y maging matagumpay rin. May kasabihan ang mga Afrikano,”If you want go fast go, alone, if you want go far go, together.”

Lastly, sarili natin ang magiging sagabal sa ating pag-unlad. Kaya  kailangan ng ating sarili ang aksyon mismo natin, mentor at makakasama nating mga achiver. Wika nga ng author and educator na si James Thom, “Probably the most honest self-made man ever was the one we heard say: ‘I got to the top the hard way—fighting my own laziness and ignorance every step of the way,’” (PINOY ABROAD / GUILLER VALENCIA)

Please follow and like us:
Read More

ELEAZAR: ‘TULOY ANG LABAN SA DROGA AT NARCO COPS’

BAKBAKAN NATIN

MATUNOG na matunog sa media ang pangalan ni Lieutenant General Guillermo Eleazar na susunod na hepe ng Philippine National Police (PNP) makaraang magbitiw sa posisyon si General Oscar Albayalde.

Ang pagiging malinis ni Eleazar, simula nang maging pulis siya noong 1988 dahil hindi nasangkot sa kahit anong kaso o reklamo, ay tugmang-tugma sa gusto ni Pangulong Rodrigo Duterte sa sino mang itatalaga niya sa pinakamataas ng posisyon sa PNP.

Gusto rin ni Duterte na ang susunod na PNP chief ay hindi matatakot na ipagpatuloy ang agresibong kampanya ng administrasyon laban sa ilegal na droga.

Nang igawad kay Eleazar ang ikatlong estrelya sa kanyang balikat upang maging lieutenant general na ang ranggo niya, idiniin ng ikaapat na pinakamataas na opisyal ng PNP na tuloy ang laban sa ilegal na droga.

“Having seen the success of the President’s war against illegal drugs, I, in my personal and current official capacity shall intensify my efforts to win as many battles in this bloody war,” pahayag ni Eleazar.

Idiniin at tiniyak din ni Eleazar na puntirya rin niya ang “narco-cops” o ang mga pulis na kumikita ng malaking halaga dahil sa pagkakasangkot sa ilegal na droga.

PDEA NAGPALIWANAG SA BIRADA NG BAKBAKAN NATIN

NOONG Nobyembre 24, binatikos ng Bakbakan Natin! ang Philippine Drug Enforcement Agency (PDEA) dahil sa kapalpakan ng nasabing ahensiya sa trabaho nitong habulin ang high-value-targets (HVTs) drug dealers.

Sa kolum na ito na may pamagat na “PALPAK ANG PDEA SA HVT DRUG DEALERS,” totoong nabatikos ang PDEA sa pagiging palpak nito.

Ganito ang eksaktong banggit ko: “May listahan ang PDEA ng high-value-target.

“Ngunit hanggang ngayon ay walang nahuhuling high-value-target drug dealers ang PDEA.

“Ibig sabihin, palpak ang PDEA sa pamumuno ni Aquino.”

Ang tinutukoy ni Aquino ay si Aaron Aquino na director general ng PDEA.

Noong Nobyembre 25, nagpadala ng liham ang PDEA na nilagdaan ni Assistant Secretary Gregorio R. Pimentel, office-in-charge ng PDEA, sa tanggapan ng Diaryo Bomba.

Natanggap at nakuha ko ang liham nitong Disyembre 12.

Narito ang mahalagang bahagi ng paliwanag ni Pimentel: “Nais po naming ilahad ang PDEA, bilang pangunahing institusyon sa bansa na nagpapatupad ng Republic Act 9165, o The Comprehensive Dangerous Drugs Act of 2002, ay nanalig  na ginagawa namin sa abot ng aming makakaya upang pigilan ang suplay, mailayo ang mamamayan at maibsan ang mga kapahamakang dulot ng ilegal na droga.

Kabilang sa aming sinumpaang tungkulin ang pagdakip ng HVTs o mga taong may ginagampang papel sa kalakalan ng droga sa bansa. Batay sa talaan ng PDEA mula Hulyo 1, 2016 hanggang Oktubre 31, 2019, 148,037 anti-drug operations ang naisagawa kung saan 215,569 ang naarestong personalidad na sangkot sa droga. Sa bilang na ito, 8,092 dito ay tinaguriang HVTs. Ito ay kinabibilangan ng mga sumusunod:

  1. 296 mga taong nahalal sa puwesto;
  2. 82 alagad ng batas (uniformed personnel);
  3. 346 kawani ng pamahalaan;
  4. 220 dayuhan;
  5. 724 lider o miyembro ng drug groups;
  6. 57 miyembro ng armed groups;
  7. 10 artista at sikat na personalidad;
  8. 191 nasa wanted list;
  9. 2,257 nasa target list;
  10. 801 drug den maintainers; at
  11. 3,108 naaresto sa mga high-impact operation (HIOs)

Sana po sa pamamagitan nitong liham at datos na nabanggit, naihayag nang mabuti ang aming panig sa maling paratang na ito.”

ASec. Pimentel, napakalinaw po ang inyong pahayag.

Ang problema, sa mga nahuli ng PDEA mula Hulyo 1, 2016 ay hindi naman binabanggit sa media kung sinu-sino ang HVTs sa kanila.

Mayroon palang mga nasakoteng sangkot sa droga na nahalal sa puwesto.

Kahit kailan ay hindi binabanggit ng Public Information Office (PIO) ng PDEA ang mga pangalan ng mga nasakoteng opisyal ng pamahalaan.

Hindi rin nabanggit ang mga pangalan ng mga nahuling lider ng sindikato ng droga.

ASec. Pimentel, sana po bukas ang PDEA na magbigay ng datos o impormasyon tungkol sa mga nahuhuli ng PDEA na HVTs, mga nahalal na mga politiko, mga lider ng sindikato at iba pa.

Ang gusto po kasi ng PDEA – PIO, lalo na ni Director Derrick Carreon, pabor na pabor sa PDEA ang mga naisusulat sa pahayagan o online news companies.

Napipikon at nababanas si Carreon kapag hindi pabor na pabor sa PDEA ang ibinabalita sa media.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

JD AT MAGNUM 357 NG DPWH

PASABOG

WALANG kakupas-kupas itong magkasanggang dikit na sina JD at Magnum 357 sa cash division ng Department of Public works and Highways (DPWH) dahil may ipinagmamalaking bosabos na nagproprotekta sa kanilang modus.

Tila manhid at walang pakiramdam itong dalawang kupal kahit pa ipagwagay-way at ipagsigawan ang kanilang mga pangalan sa loob ng opisina, no effect sa kanila, dahil bukod sa talk of the town ang mga ito, still taas noo pa itong mga walang modong kawani.

Nakararating sa inyong lingkod na medyo nag-laylo sa unang arangkada ng PASABOG, meaning huminto panandalian sa kanilang panghihingi sa mga kontraktor ngunit makalipas ang isang linggo ay back to normal ang kanilang operasyong hingi isang libong piso sa mga kontraktor.

Siguro tama ang umaalingaw-ngaw na impo na tila natutulog nang mahimbing sa pansitan ang kanilang boss, sabagay ok ‘yan dahil busog si boss sa kanyang kinalalagyan na canteen. Ok ka lang manager?

Ngunit ang siste, itong dalawa niyang tauhan, nasanay sa hingi rito hingi roon, kapag walang gaybi, tigil ang trabaho, pero kapag mayroong gaybi, parang 120 kilometer per hour, kaya bilis gawa. Sabi nga Intsek!

Itong kanilang boss, walang paki sa dalawa, kung baga “Mined your own business” dahil bakit kamo? Ha, ha, mayroon din siyang pinagkakaabalahang ilegal na sugal, OMG Secretary Villar.

Bakit po mahal na kalihim, wala na ba kayong makuhang empleyado na mayroong paninindigan o nagpapahalaga sa kanyang trabaho? (PASABOG / FROILAN MORALLOS)

Please follow and like us:
Read More

MERI ANG XMAS NG MGA PINOY

KAAA BOOM

TALAKAYIN po muna natin ang isyu sa diwa ng Pasko sa Pilipinas.

Ang nag-iisang bansa na napakahaba ng Pasko.

Sa bansa ng lahi ni Juan, simula pa lang ng ‘ber month’ na Setyembre ay simula na rin ang Pasko.

Maririnig na sa mga mall ang kantang pamas­ko ni Jose Mari Chan, samantala ang ibang Pinoy ay nagsimula na ring maglagay ng dekorasyon na may kaugnayan sa Pasko.

May mga empleyado na rin na maagang nakatatanggap ng kanilang 13th month.

‘Yung iba buwan pa lang ng Hunyo ay natatanggap na nila ang kalahati ng kanilang 13th month at ang kabuuan ay muli nilang natatanggap pagdating ng Nobyembre.

Kaya ang ‘ber months’ na Sept., Oct., Nov. at Dec. ay itinuturing ng mga Pinoy na pinakamasayang panahon sa atin.

Sa holiday seasons na ito ay nagtitipon-tipon ang mga magkakamag-anak at magkaklase sa mga re­union na isinasagawa.

Ito rin ang panahon na itinuturing ng mga Pinoy na panahon ng pagbibigayan ng mga regalo.

Sabi tuloy ng mga bata, sana araw-araw ay Pasko para lagi silang nakatatanggap ng mga regalo galing sa kanilang mga ninong, ninang at mga kamag-anak.

Pagpasok naman ng Dec. 16 ay simula na ng Simbang Gabi o pagpupugay sa Panginoon na magkakasama ang mga pamilya.

Kaya nga ang mga Pinoy na naninirahan na sa ibang bansa, ito ang hinahanap-hinap nila, ang Pasko sa Pinas.

Kaya nga kahit nasa ibang bansa na sila ay nagsi-celabrate pa rin sila ng Pasko.

Sana ‘wag po natin kalimutan ang mga lugar na tulad ng Northern Samar na binayo ng Bagyong Tisoy.

Sa lugar na ito ang mga residente ay magpa-Paskong tuyo.

Naniniwala po ang BOMBAHAN NA na ang mga Pinoy ay may pusong mamon at maawain, ‘wag po natin sila kalimutan kung ano po ang kaya na­ting ibigay sa kanila.

Sa panahon ngayon, kailangan po natin magtulong-tulong nang sa gayun ay makabangon agad sila sa kanilang inabot na pinsala mula kay Tisoy.

Wala po tayong magagawa kundi tanggapin na daanan tayo ng mahigit sa 20 bagyo taun-taon.

Magtulungan na lang po tayo para maibsan ang dulot ng mga bagyong  ito.

God Bless Us!

oOo

Pasabugin ang katiwalian, isumbong sa BOMBAHAN NA. mag-email joel2amongo@yahoo.com//operarioj45@gmail.com. (KAAA…BOOM!!! / JOEL GOROSPE)

Please follow and like us:
Read More

P62–B KINITA NG MANILA WATER AT MAYNILAD

BAKBAKAN NATIN

NANALO ang Manila Water Company Inc. sa ipinaglaban nito kontra sa pamahalaan ng Pilipinas sa arbitration panel hinggil sa ikinalugi umano noong Hunyo 2015 hanggang Nobyembre 2019 ng nasabing kumpanyang pag-aari ng pamilya Ayala.

Ang Manila Water ay kumpanya ng Ayala Corporation na pag-aari ng pamilya Ayala.

Nagpasya ang Permanent Court of Arbitration (PCA) na bayaran ng pamahalaan ng Pilipinas ang Manila Water ng P7.4 bilyon.

Bababayaran din ng pamahalaan ang ibinayad ng Manila Water sa PCA nang ihabla nito ang pamahalaan ng Pilipinas at iba pang singilin.

Sa reklamo ng Manila water, umabot sa P7.4 ­bilyon ang kabuuang halaga na ikinalugi ng ­kumpanyang ito mula 2015 hanggang 2019 dahil hindi pumayag ang Metropolitan Waterworks and Sewerage System – Regulatory Office (MWSS – RO) na itaas ng Manila Water sa babayaran ng mga kustomer nito kada buwan simula dapat noong 2015.

Kaya tumutol ang MWSS – RO  dahil naniniwala itong hindi dapat isama ng Manila Water sa kahilingan nitong umento sa sinisingil nito sa kanilang mga kustomer, ang corporate income tax (CIT) na P2.77 per cubic meter.

Kaya ginaya ng Manila Water ang Maynilad nang ihabla ng kumpanya ng pamilya Ayala ang pamahalaan ng Pilipinas sa PCA sa Singapore.

Ang gustong mangyari ng Manila Water ay isama sa pagtaas ng buwanang singil nito sa kanilang mga kustomer, ang buwis na ibabayad sa Bureau of Internal Revenue (BIR) mula noong 2015.

Ang CIT ay uri ng buwis na ibinabayad ng isang kumpanya sa pamahalaan batay sa kinikita ng kumpanya sa negosyo nito.

Ang pagbabayad ng buwis ng mga kumpanya at negosyante ay tungkulin at obligasyon nila sa pamahalaan na itinakda at ipinag-utos ng batas.

Hindi dapat ipinapasa ng mga negosyante, tulad ng pamilya Ayala na siyang pangunahing ­may-ari ng Manila Water, ang pagbabayad ng buwis sa publiko o sa mga kustomer nito.

Kapag ipinasa kasi sa kustomer  bilang bahagi ng babayaran nila kada buwan ay malinaw na ang mga kustomer ng Manila Water ang nagbayad ng buwis ng kumpanyang ito sa BIR.

Ang argumento ng Manila Water sa PCA ay labag sa kontrata sa pagitan ng Manila Water at pamahalaan ang paghadlang sa umento ng buwanang ­singil ng naturang kumpanya sa mga parokyano nito.

Iginiit ng Manila Water na ang paglabag sa kontrata ay nagresulta sa malaking pagkalugi nito.

Ngunit sa rekord mismo ng Manila Water ay umabot sa P25 bilyon ang kinita ng kumpanyang ito mula 2015 hanggang 2018.

Kung kukuwentahin, pumalo sa P6.25 bilyon ang tubo ng pamilya Ayala sa kanilang Manila Water kada taon mula 2015 hanggang 2018.

Napakalaki nang itinaas sa tubong ito ng pamilya Ayala kung ikukumpara mula sa 2011 hanggang 2014 na umabot sa P22.4 bilyon (P5.6 bilyon bawat taon ang kita sa panahong ito).

Nalugi pa ba ang Manila Water ng pamilya Ayala samantalang napakalinaw ng tubo nilang P25 bilyon sa panahong tumanggi ang MWSS – RO na isama ang taripa.

Masama pa ba ang P25 ­bilyong tubo samantalang distribusyon ang negosyo ng Manila Water?

Bago makakuha ng magandang desisyon ang Manila Water Company Inc., nauna nang pinaboran ng PCA ang Maynilad Water Services Inc.

Pareho ang dahilan ng Maynilad sa Manila Water nang katigan ng PCA ang kumpanya ni Pangilinan.

Iginiit ng Maynilad sa PCA na nalugi ito ng P3.4 ­bilyon mula 2013 hanggang 2017 dahil hindi pumayag ang MWSS – RO na itaas ang buwanang singil ng Maynilad sa kanilang mga kustomer.

Sa rekord ng Maynilad, umabot sa P36.7 bilyon ang kabuuang kinita ng Maynilad mula 2013 hanggang 2017.

Lugi pa ba ang Maynilad kung P36.7 bilyon ang kinita nito noong mga taon na iginiit nito sa PCA na sila ay nalugi?

Ang Maynilad ay kontrolado ng Metro Pacific Investments Corporation samantalang ang DMCI Holdings Inc. ay tinatayang 27 porsiyento ang pag-aari sa nasabing kumpanya.

Ang namamahala ng Metro Pacific Investments dito sa Pilipinas ay si Manny ­Pangilinan.

oOo

Alam ko na kayong mga mambabasa ay higit na maraming nalalaman kaysa inyong lingkod. Kaya tumawag o ­mag-text na sa: 0998 – 565 – 0271. (BAKBAKAN NATIN! / Nelson Badilla)

Please follow and like us:
Read More

KUNG MAY DELICADEZA SI USEC. VILLAR DAPAT MAG-RESIGN NA SIYA SA DOJ

CHRISTIAN BOMB

NABISTO na si Justice Usec. Emmeline Aglipay-Villar, misis ni Department of Public Works and Highways (DPWH) Mark Villar ang isa sa nag-review sa water concession contract ng mga nakaraang administrasyong Ramos at Arroyo sa Manila Water at Maynilad.

Ang gobyerno ni dating Pangulong Fidel V. Ramos ang unang pumasok sa kasunduan na ang kontrata sa pamamahala ng Manila Water at Maynilad sa Metro Manila, Cavite at Rizal ay mapapaso sa taong 2022 at sa panahon ng dating gobyerno ni ex-Pres. Gloria Macapagal-Arroyo ay in-extend ang kontrata ng hanggang taong 2037.

Sa pinasok na kontrata ng gobyernong FVR sa Manila Water at Maynilad ay talo ang pamahalaan at taumbayan dahil isa sa nakasaad sa kasunduan, kapag nalugi ang mga kumpanya, ang lugi nila ay sa gobyerno babawiin.

Iyan ang ikinagalit ni Pres. Rodrigo Duterte lalo’t natalo sa Permanent Court of Arbitration sa Singapore ang Pilipinas, na ang utos sa Philippine government ay bayaran ng pinagsamang mahigit P10 bilyon ang Manila Water at Maynilad dahil nalugi raw ang mga kumpanya nang tumanggi ang ­dating administrasyon ni ex-Pres. Benigno Aquino III na magtaas ang mga ito ng singil sa tubig.

Minura at pinagbantaan ni Pres. Duterte na sasampalin, kakasuhan, ipakukulong ang mga Ayala ng Manila Water at si Manny V. Pangilinan ng Maynilad, at pagkaraan niyan ay kinansela na ng MWSS ang kontratang hanggang 2037, na ibig sabihin, hanggang taong 2022 na lang ang pamamahala ng Manila Water at Maynilad sa serbisyo ng tubig sa Metro Manila, Cavite at Rizal dahil may iba nang kumpanyang papalit sa kanila.

Ang pagkansela ba ng MWSS sa kontratang ito ay ibinase sa review ng DOJ, na ang isa sa ­reviewer ay si Usec. Villar, na ang pamilya ay nagmamay-ari naman ng Prime Water ?

Malinaw na may conflict of interest diyan, kaya’t kung may natitira pang delicadeza si Usec. Villar sa kanyang sarili, dapat mag-resign na siya sa puwesto. (CHRISTIAN’S BOMB / Christian Hernandez)

Please follow and like us:
Read More

‘PAG WALA ANG PUSA NAGLALARO ANG DAGA

BOMBAHAN NA FINAL

ITO ang nangyari sa naganap na kidnapping sa isang babaeng Chinese national sa Makati City na nakunan ng video noong Lunes ng gabi.

Parang pusa na nalusutan ng daga habang wala sila.

Kaya hayon, natangay ng kapwa Tsekwa si Manay, kawawa naman.

Nangyari ang pangingidnap bandang alas-9 ng gabi noong Lunes sa isang kalye sa Makati.

Kitang-kita at dinig na dinig sa video ang boses ng babae na nagsisigaw sa loob ng puting sasakyan na nag-viral sa social media.

Kung mayroong pulis na nakalat sa kalye sa lugar ay hindi sana nangyari ang kidnapping.

Ibig sabihin, natutulog sa pansitan ang Police Makati nang mga oras na ‘yun kaya sila nalusutan?

Alam na nilang dumagsa na ang mga Tsekwa sa Pinas at may mga ulat na sila sila mismo ay nagkikidnapan.

Sana alertado na sila nang hindi sila nalulusutan.

Nagpapatunay lamang po sa pangyayaring ito na ang mga Tsekwa ay nagkalat na sa Pinas.

Dito na sila nagkakalat ng lagim, mga biktima nila ang mismong mga kababayan nila.

Maraming mga tao ngayon ang nasa lansangan dahil Disyembre na kaya dapat maging mapagmatyag at alertado ang mga awtoridad.

Wala kayong karapatang magpakuya-kuyakoy.

Naglipana rin siyempre ang iba pang mga kriminal tulad ng holdaper, isnatser at iba pang masasamang loob.

Nariyan din na dapat n’yong bantayan ay ang vendors na atat na atat na namang bumalik sa bangketa.

Maraming masasamang loob ang mananamantala dahil alam nila na ang mga tao ngayon ay may mga pera.

Hindi lingid sa kaalaman ng mga pulis na tuwing sasapit ang ‘ber months’ ay dumarami ang mga tao sa Metro Manila.

Kaya nga pagdating ng holiday seasons ay hindi na sila pinapayagan na magbakasyon.

At alam din nila na kung kailan maraming tao ay saka sumasabay ang mga kriminal.

Payo naman po ng BOMBAHAN NA sa mamamayan na mag-ingat po kayo at maging mapagmasid sa kapiligiran.

‘Wag din po kayo magdadala ng mamahaling gamit tulad ng mga alahas sa tuwing lalabas kayo ng bahay para hindi kayo mabiktima ng mga masasamang loob.

Tiyakin n’yo rin po na naka-padlock ang inyong mga bahay bago po kayo umalis.

Ang kaligtasan po ninyo ay nakasalalay rin sa inyo.

Advance merry Christmas po sa ating lahat.

oOo

Pasabugin ang katiwalian, isumbong sa BOMBAHAN na, mag-email joel2amongo@yahoo.com//operarioj45@gmail.com (BOMBAHAN NA! / JOEL AMONGO)

Please follow and like us:
Read More

ASTIG MO TATAY DIGONG

NIPIS

KUNG noon ay marami na ang pumanig at naniwala sa katatagan ni Presidente Rodrigo Roa Duterte, ngayon mas lalong maraming pumanig sa kanya sa tatag sa paninindigan at at higit sa lahat ay sa paging tapat sa Pilipinas.

Marami ang nag-aakusa sa Pangulong Duterte na panig na panig ito sa China kung kaya’t hindi niya magalaw ang bahagi ng Pilipinas, ang Scarborough Shoal, lalo na nang magkaroon ng sigalot sa pagitan ng Chinese at Filipino fishermen nang mabangga ang sasakyan ng mga mangingisdang Pinoy ng barko ng Chinese fishermen.

Higit na bumatikos kay Pangulong Digong ang mga oposisyon o tinatawag na dilawan na ayon sa pagkakaintindi ng marami ay dahilan umano nang paglubog ng ekonomiya ng ating bansa.

Mukhang tama naman ang akusasyon dahil tila sa mga kumpanya ring nasa pag-aari ng mga kaibigan ng mga dilawan napunta ang mga kontratang pangserbisyo ng gobyerno na sa halip na magpaangat ng kalagayan ng mga mamamayan ay mas lalong nagpahirap dahil sa pangit na ibinibigay ng mga ito.

Sabi nga ng isa sa mga anak ko na maka-Duterte noon pa mang bago maghalalan, “Ma, sabi ko sa’yo astig ang Tatay Digong. Akalain mo, pawang urong ang sungay ng mga kumpanya ng tubig sa kanya.”

Batid kasi ng anak ko na hindi naman si Pangulong Rodrigo Duterte ang ibinoto ko noong 2016 elections kung hindi ang pumanaw na si dating Senadora Miriam Defensor Santiago.

Pero sa pag-upo ng pangulo bilang ulo ng bansa, wala tayong magagawa kundi tanggapin ang katotohanan na siya ang ibinoto at ginusto ng 16 na milyong Pilipino  na hindi matanggap ng halos 6 na milyong bumoto sa katunggali nito.

Subalit bago matapos ang termino ni Pangulong Digong, unti-unting nakukuha nito ang suporta ng mga politiko, totoong politiko na nagmamahal sa Pilipinas at kanyang mga kababayan, hindi politikong trapo.

Malaking bagay para sa mga mamamayan na nagkaroon ng takot kay Pangulong Duterte ang mga puno ng Manila Water at Maynila Water kung kaya’t umatras ang mga ito sa kanilang mga nais mangyari – ang maging sunud-sunuran ang mga tao sa kanilang gusto at patakaran.

Saan ka nga ba naman nakakita ng negosyong kapag kumita ang kumpanya ay sila lang ang masaya at kawawa ang kanilang mga kliyente habang kapag nalugi sila ay kinukuha nila ang bayad sa bulsa ng mga mamamayang kumukonsumo ng tubig.

Ibang klase ang concessionaires ng Metropolitan Waterworks and Sewerage System dahil ang kanilang buwis ay sa mga mamamayan din nila sinisingil. Saan ka pa? Aba’y todo-todo ang ginagawa nilang paggisa sa sariling mantika sa mga Pinoy.

Maganda ang ginawa ng pangulo na galit sa Manila Water at Maynila Water dahil sinabi ng mga pinuno ng mga ito na hind na nila sisingilin ang utang ng gobyerno sa kanila bukod pa sa sila na rin ang magbabayad ng buwis ng kanilang kumpanya at maging iba pang bayarin at higit sa lahat iasasaayos na nila ang mga dapat ayusin tulad ng pag-set up ng  wastewater treatment facilities.

Galing! Elib na ang marami kay Tatay Digong. Sana, matapos ang tubig,  isunod naman ni Pangulong Rodrigo Duterte ang mga kumpanya ng kuryente tulad ng Manila Electric Company at iba pa at kumpanya ng langis tulad ng Big 3 – Shell, Petron at Caltex.

Siguro naman, kapag maayos na ang tubig, kuryente at gasolina ay puwedeng magtuloy tuloy na ang pag-ahon ng bansa mula sa paghihirap.

Dalangin ng marami ay sumagi sana sa isip ni Pangulong Duterte na hindi lang mga kumpanya ng tubig ang nagsasamantala subalit maging ang mga kumpanya ng enerhiya. Gayunman, maganda na rin ang nangyayari dahil nadaragdagan ang mga humahanga at naniniwala kay Pangulong Duterte at sa adhikain nito na mapaunlad ang bansa sa pamamagitan nang pagpapaangat ng ekonomiya. (NIPIS / LEA BOTONES)

Please follow and like us:
Read More

WAR ON SA DRUG CARTELS LABAN NI ELEAZAR

KAAA BOOM

MULING iniha­yag ni P/Lt. General Guiller­mo Lorenzo Eleazar na nakatutok pa rin siya para labanan ang drug cartels sa bansa.

Ito ang inihayag ng heneral sa kanyang talumpati nang bigyan siya ng isang star kaya naman sa ngayon ay 3 estrella na ang nasa balikat nito.

Sa pahayag ni Eleazar “I personally declared war against the bigtime drug lords and cartels when I joined hands with BuCor Director General Gerald Bantag in demolishing the kubols in the Bilibid a few months back”.

Matatandaan na sina Eleazar at Bureau of Corrections (BuCor) director, Gen. Gerald Bantag ang naglakas loob na gibain ang “business rooms” sa loob ng New Bilibid Pri­son (NBP).

Kasi nakaabot sa kaa­laman ng dalawang opisyal na kahit nasa loob ng NBP ang convicted drug lords  ay patuloy ang mga ito  sa kanilang operasyon kung saan ang pronta ng kanilang bentahan at nagiging stock room ng ile­gal na droga ay ang mga kubol na itinayo sa nasabing kulungan. Ganun?

Nakakikilos pa rin sa kanilang negosyo ang mga drug lord sa loob dahil sa pakikipagsabwatan ng i­lang jailguards. Siyempre malaking halaga ang kapalit ng sabwatan ng drug lords at jail guards pero walang pakialam sina Elea­zar at Bantag kung sino pa man ang kanilang nasagasaan sa pag-demolish nila ng mga kubol sa NBP dahil dito  nangyayari ang lahat o karamihan sa mga transaksyon sa droga.

Dahil dito, hindi ako magtataka na marami ang galit kina Eleazar at Bantag sa kanilang ginawa at tiyak pinag-iinitan na ang dalawa ng drug cartels.

Ang siste pa, nalaman ni Eleazar na ang pagkakasangkot ng convicted drug lords sa pagkakalat ng ilegal na droga sa bansa ay  kompirmado makaraang mapatunayan sa iba’t ibang drug ope­rations sa kanyang superbisyon, simula nang ma­ging District Director siya ng Quezon City Police District (QCPD)

Noong nasa QCPD pa ang heneral, kaliwa’t kanan ang ginawa niyang panghuhuli na mga bigtime drug pusher bilang bahagi ng kanyang seryosong pagsugpo sa ilegal na droga na numero unong kautusan ng aking Lolo Digong.

Dahil dito, inilipat o na-promote ang opisyal sa CALABARZON (Cavite, Laguna, Batangas, Rizal, Quezon) bilang Regional Director at  halos dalawang buwan lamang ang kanyang itingal sa nasabing rehiyon ay malaki ang ginawang kampanya ni Eleazar para mapilayan ang mga drug lord sa naturang mga probinsya.

Hayun, nakita uli ng palasyo ang sinseridad ni Elea­zar kaya agad siyang inalis (promoted uli) sa PRO 4A. Ginawa siyang Regional Director ng National Capital  Regional Police Office (NCRPO) at iginawad sa kanya ang isa pang estrella.

Sa NCRPO ay naging mas lalo pang seryoso ang heneral sa kampanya sa ilegal na droga kaya hinirang ang NCRPO bilang best region.

Labis naman na nagpasalamat si Eleazar kay Pangulong Rodrigo ‘Roa’ Duterte ganoon din kay dating PNP chief at ngayon Senator Ronald ‘Bato’ Dela Rosa sa ibinigay na tiwala sa kanya dahilan upang lalo pang pagbutihin ng heneral ang serbisyo niya sa pambasang pulisya.

Ngayon ang tanong, sino pa nga ba ang may karapatan at may napatunayan na mayroon iniambag para tapusin ang ilegal na droga sa bansa sa tatlong heneral na sinasabing nasa shortlist ni Lolo Digong ko? Kayo na po ang humusga! KABOOM. (KAAA…BOOM!!! / JOEL GOROSPE)

Please follow and like us:
Read More

PAMILIHANG TUBIG

yourservice

NAGALIT kama­kailan ang si Pangulong Rodrigo Duterte nang mabalitaan niya na pinagbabayad ang pamahalaan ng mahigit pitong bil­yong piso sa Maynilad at Manila Water. Ang kautusang ito, ayon sa balitang kumakalat ngayon sa mga diyaryo, social media at sa telebisyon, ay dulot nang paghain ng mga kaso ng Manila Water at Maynilad dahil sila raw ay nalugi nang hindi sila pinahintulutan ng pamahalaan na itaas ang kanilang singil sa tubig. Nangyari ito noong termino pa ng nakaraang administrasyon.

Dahil daw sa pagka­lugi at hindi pagpayag na itaas ang singil, dumulog ang mga ito sa arbitration court at sila’y nanalo. Ito na nga, kung susumahin ay mahigit sa pitong bil­yon ang kailangan daw ibayad ng ating pamahalaan sa kanila. Kung titignan mo ang halaga, parang budget na ng isang kagawaran o proyekto ng pamahalaan.

Hindi ako magugulat kung nagalit ang Pangulo lalo na sa kanyang paha­yag tungkol sa concessionaire agreement  na tagilid daw o dehado ang pamahalaan. Ayon sa Pangulo, na iniulat ng mga pahayagan at ng mga network sa television, nakasaad daw sa mga kontrata ng pamahalaan na ginagarantiya ang kikitain ng mga service providers na ito at kung makikialam daw ang pamahalaan ay maaaring idulog ang isyu o usapin sa isang international arbitral court. Ito na nga ang nangyari kaya may malaking problema tayo ngayon.

Ayon pa rin sa mga pahayag ng Pangulo sa telebisyon, hindi rin tumupad ang service providers tulad ng pagpapagawa ng sewage treatment facilities. Ngayon, dahil dito, inatasan ng Pangulo ang Department of Finance at ang Office of the Solicitor General na gumawa ng bagong kontrata na hindi dehado ang pamahalaan.

Sa aking munting palagay, hindi nakagugulat na makita nating galit ang Pangulo tungkol sa nangyayaring ito. Hindi biro ang mahigit sa pitong bilyon. Pera ng kabang bayan ang gagamitin kung babayaran man natin ito, ayon sa kautusan ng international arbitral court. Pera ng bayan, pera natin. Sa panahong sunud-sunod na ang mga suliraning hinaharap ng ating bansa, kasama na rito ang korapsyon, droga, trapik, mga kalamidad, epidemya, kabagalan ng pag-ikot ng hustisya, daragdag pa ito. Isama na rin natin ang kakulangan ng pera para salubungin ang mga suliraning ito.  Kinakapos na tayo sa pondo, kinakapos na rin sa pasensya ang mga tao.

Alam naman ng karamihan na mayroon tayong problema sa tubig ngayon, nakikita natin sa balita ang haba ng pila, ang sakri­pisyo at ang paghihirap ng ating mga kababayan sa pila at pag-igib ng tubig. Araw-araw itong nararanasan at tila walang lunas na darating. Tapos heto pa, kailangan pa pala tayong magbayad dahil hindi pinahintulutan ng pamahalaan noon na itaas nila ang singil sa tubig.

Ngunit naniniwala ako na may solusyon ang problemang ito, lahat naman ay may solus­yon. Kinakailangan lamang nating maging mahinahon muna, tapos irebisa natin ang mga batas na sumasakop sa usa­ping ito at bigyang lunas ito sa lalong madaling panahon. Tila madali sa salita, alam ko. Ngunit  mas maiging pagtuunan na natin ng solusyon kaysa naman tayo ay mananatiling galit at walang ginagawa. Maraming matatalinong tao sa pamahalaan na maaaring magsama at pagtuunan ng pansin at mag-isip ng solusyon. (@YOURSERVICE / ATTY. DAVID AQUINO)

Please follow and like us:
Read More

AYALA AT PANGILINAN, ATRAS SA TAPANG AT MALASAKIT NI PRES. DUTERTE

CHRISTIAN BOMB

HINDI na sisi­ngilin ng Manila Water at Maynilad sa gobyerno ang napanalunan nilang kaso sa Permanent Court of Arbitration PCA) sa Singapore na may kaugnayan daw sa pagkalugi ng kanilang negosyong tubig sa bansa.

Base sa desisyon ng PCA, pinagbabayad ang gobyerno ng Pilipinas ng P7.4 billion sa Manila Water ng mga Ayala at P3.4 billion sa Maynilad ni Manny Pangilinan.

Nag-ugat ang kaso nang tutulan ng gob­yerno ni dating Pangulong Benigno Aquino III ang hirit na dagdag-singil sa tubig ng Manila Water at Maynila, at ang ginawang basehan ng mga Ayala at ni Pangilinan ang kasunduan nuong 1997 sa gob­yerno ni dating Pangulong Fidel V. Ramos, na kapag tinutulan ang kanilang taas-singil sa tubig at sila ay nalugi, ang gobyerno ng Pilipinas ang dapat managot.

Minalas nga lang ang mga Ayala at si Pangilinan, dahil sa panahon ng gobyerno ni Pangulong Duterte inilabas ang desisyon na sila ay nanalo, at dahil dito, nagalit ang Pangulo at binantaang sila ay sasampalin at sasampahan ng kasong economic sabotage.

Sa takot sa banta ng Presidente, sinabi ng mga representante ng Manila Water at Maynilad na hindi na nila sisingilin ang gobyerno sa kanilang napa­nalunan sa kaso.

At hindi lang iyan, may bonus pa ang taumbayan, dahil nangako din ang Manila Water at Maynilad, na hindi  na rin nila ipapatupad ang dagdag-singil sa tubig sa Enero 2020.

Dapat saluduhan ng taumbayan si Pangulong Duterte dahil ipinakita niya ang tapang laban sa mga abusadong negosyante at malasakit sa mamamayan sa isyung ito.

oOo

TIMBRE: Paging NCRPO Director, Brig. Gen. Debold Sinas, isang alyas “Cruto” raw ang may pa-video karera sa Las Pinas City. Tuloy pa rin daw ang pasakla ni alyas “Amang” sa Quezon City…Isang alyas “Joy” daw ang may pa-lotteng sa Paranaque City. (CHRISTIAN’S BOMB / CHRISTIAN HERNANDEZ)

Please follow and like us:
Read More

HUMANGA ANG MGA DAYUHANG DELEGADO SA SEAG HOSTING

BAKBAKAN NATIN

LAHAT naman ng lahi ay may puso at malasakit sa kapwa.

Naiiba lang sa lahat ang puso at pagmamalasakit ng mga Filipino.

At ang kakaiba sa mga Filipino ay ipikikita ng Pilipinas sa pagho-host nito ng Ika-30 taong South East Asian Games (SEA Games) simula noong Nob­yembre 30.

Sa hosting ng admi­nistrasyong Duterte sa Ika-30 taon ng SEA Games ay walang dudang pinahanga nito ang mga dayuhang delagado sa nasabing palaro.

Syempre, napakarami ring Filipino ang pinahanga sa paghahandang ginawa ng Philippine Sea Games Organizing Committee (PHISGOC).

Bago magsimula noong Nobyembre 30, kaliwa’t kanan ang pambabatikos ng mga kritiko ng administrasyong Duterte at ni Speaker Alan Peter Cayetano, PHISGOC chairman, dahil ilang aberya at biyun-bilyong ginastos sa SEA Games.

Ngunit, ngayon ay walang tigil ang papuri ng lahat ng kalahok sa SEA Games, partikular na ng mga malalarong dayuhan at delegado, sa nakikita at nararanasan nila sa palahok sa SEA Games na rito ginanap sa Pilipinas.

Testigo sila sa kakaibang lambot ng puso at pagmamalasakit ng mga Filipino.

Tampok diyan ang ipinamalas ng kababayan nating si surfer Roger Casugay matapos nitong iligtas ang kalabang Indonesian surfer na si Arip Nhuridayat.

Naputol ang tali ng surf board ni Nhuridayat, dahilan upang humampas sa kanya ang  napakalakas na alon sa Monaliza Point sa La Union.

Sa oras na iyon ay kaunting galaw na lang ni Casugay ay nakuha na niya ang gintong medalya na siya namang gustong makuha ng sinumang manlalaro sa SEA Games.

Ngunit, iba ang ginawa ni Casugay – binalikan niya si Nhuridayat at iniligtas hanggang madala ng nasabing Filipino surfer ang Indonesian surfer sa pampang.

Napakalaki ng pasasa­lamat na ipinarating ng Indonesian Sports officials at mga manlalaro nila kay Roger Casugay.

Kahanga-hanga si Roger Casugay, sapagkat pinatunayan niyang puso at awa sa kapwa ang dapat mangibabaw at hindi kasibaan sa medalyang ginto.

Iyan ang totoong gintong medalya!

Ang isa pang kahanga-hanga sa mga Filipino sa SEA Games ay ang madalas na pagtsi-cheer sa mga manlalaro ng Timor Leste upang makasungkit ang mga ito ng medalya.

Kaya, walang tigil din sa pasasalamat ng mga manlalaro ng Timor Leste sa mga Filipino.

Sa huling talaan ng mga medalya, nangu­nguna pa rin ang Team Pilipinas sa pagkamit ng medalya, lalo na ng gintong medalya.

Nakahabol na rin ang Timor Leste na nakapagtala na ng medalyang tanso.

Patok na patok rin ang balitang sunud-sunod ang papuring ibinabato sa naggagandahang sports fa­cilities na ipinatayo ng administrasyong Duterte para sa Ika-30 taon SEA Games, lalo na ang world-class sports stadium at aquatic center sa New Clark City sa Tarlac.

Pinuri rin ni Thailand lawn bowl coach Daniel John Simmons ang pasilidad sa Clark Freeport, isa sa venues ng lawn bowl competition.

Ayon kay Simmons, nakakabilib ang ginawa ng Pilipinas na isang world-class sports faci­lity sa loob lamang ng 40 araw.

Sinabi naman ng Malaysian official na si Abdul Kader, director general ng International Sepaktakraw Federation, na nakakamangha ang Sepak Takraw venue sa Subic gymnasium at tinawag niya itong pinakamagandang Sepak Takraw venue sa kasaysayan ng SEA Games.

Maging ang Olympic gold medalist swimmer na si Joseph Schooling ay napahanga sa kanyang naging karanasan sa SEA Games.

Pati na ang SEAG first ti­mer event na e-sports ay umani rin ng papuri.

Ang venue lamang sa San Juan ay balot ng iba’t-ibang ilaw, smoke machine at hiyawan ng mga manonood.

Sabi ni Benjamin Assarasakorn ng Thailand E-Sports Federation, ang “landmark hosting” ay dapat tularan ng ibang bansa sa Asya ang pagpapahalaga ng Pilipinas sa sports.

Kaya, hindi nakapagtataka ang komentaryo ni Olympic Council of Asia (OCA) Vice President Wei Jizhong na handang-handa ang Pilipiinas para sa mas malaking sports event dahil sa magandang pagho-host nito ng Ika-30 taong SEA Games.

Ayos! Mabuhay ang Pilipinas!

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya, tawag o magtext na sa: 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More

LALONG BUMILIB KAY TATAY DIGONG

NIPIS

DAHIL sa gina­wang pag-atake ni Pangulong Rodrigo Duterte sa concessionaires ng Metropolitan Waterworks and Sewerage System (MWSS) mas lalong maraming mamamayan ang bumilib at naniniwalang walang pansari­ling agenda ang pangulo sa kanyang pagtakbo sa pinakamataas na puwesto.

Siyempre, hindi mani­niwala ang oposis­yon at palalabasin ng mga ito na gumaganti lang si Presidente Duterte sa mga kumpanyang kumalinga sa mga nakalaban niya sa politika. Hindi paniniwalaan ng mga ito ang pagi­ging totoong makabayan ng presidente.

Pero totoo namang ang mga kumpanya ng tubig na nagsusupply sa Metro Manila ay sobra na ang kasuwapangan sa kita.

Saan ka nakakita na kapag lugi sila ay consumers ang bumabalikat at idinadagdag sa bayarin ng mamamayan pero kapag kapag kumita sila ng limpak-limpak na salapi ay sila-sila lang maya­yamang may-ari ng kum­panya ang nagsasaya at nakikinabang.

Totoo nga ang binitiwang salita ng pangulo na economic sabotage ang ginagawa ng kumpanya ng tubig at kapag hindi tumigil ang mga ito sa ginagawa nilang pananabotahe ay mapipilitan si Presidente Duterte na sampahan sila ng kaso nang sa gayon ay sila naman ang lumasap ng hirap na pinagdaraanan ng mga mamamayan.

Marami sa ating mga kababayang mahihirap na magkaroon lang tubig kahit walang pambili ay gumagawa ng paraan kahit pa magnakaw. Nga­yon, ang mga propesyunal na magnanakaw naman ang dapat na lumasap ng parusa.

Kapag hindi tinantanan ng water companies ang panloloko sa mga mamamayan, tiniyak ni Pangulong Digong na may kalalagyan sila. Dapat malasap nila ang mabuhay sa kulungan.

At lalong nakakabilib ang pangulo ng tahasang sitahin niya si Senador Franklin Drilon sa pagbabanta sa presidente na hindi dapat makialam sa kasuhan kaugnay sa isinampa ng Manila Waters sa Singapore International Tribunal.

Diretsong tinanong ni Presidente Duterte si Drilon kung kasama siya sa mga senador na gumawa ng naduda-dudang kontrata na sobrang kinawawa ang mga mamamayan dahil sobra-sobra ang panlalamang ng mga kumpanya ng tubig.

Weew! Pinagpawisan ako sa binitwang salita ni Pangulong Duterte nang sabihin niyang handa siyang bumaba sa puwesto at hindi siya natatakot na mawala sa puwesto basta lumabas lang ang katotohanan kaugnay sa panloloko sa mga mamamayan ng mga kumpanya ng tubig.

At mas lalo akong pinagpawisan nang sabihin ni Pangulong Digong na handa nga siyang bu­maba o bumagsak sa kanyang puwesto pero sisiguruhin niya na kasama niya sa pagbagsak si Senador Drilon. Hihilahin daw niya ito o isasabay sa pagbagsak.

Naku pangulo, hayaan nyo na silang bumagsak o maunang bumagsak dahil baka mapisak ka kapag nabagsakan. Kung mauna siya, at saka ka bumagsak, malambot ang lalandingan mo. Ha ha ha.

Marami ang sumuporta sa ginawang pag-atake ni Pangulong Duterte sa water companies na bil­yon-bilyon ang kinikita subalit hindi naman nagbaba­yad ng corporate tax at kapag hindi nakuha ang kanilang gusto ay dumudulog sa korte ng ibang bansa upang huthutan pa ang pamahalaan.

Saan ka pa? Aba’y dapat magising na ang marami sa mga Pinoy na nabubulag sa pagsuporta at pagsamba sa mga taga oposisyon na walang ginagawa kung hindi wasakin ang sariling bansa.

Kapag tuloy-tuloy ang ginagawang pagkalaban ng pa­ngulo sa mga mapagsamantalang negosyante at kumpanya, tiyak na mas marami pa ang susuporta, maniniwala at hahanga sa kanya.

Kaya naman, tuloy-tuloy lang Tatay Digong ang iyong nasimulan. (NIPIS / LEA BOTONES)

Please follow and like us:
Read More

PAG-USAD NG KASO SA ICC, BAD NEWS KAY DUTERTE

CHRISTIAN BOMB

KINUMPIRMA ng International Criminal Court (ICC) na sa susunod na taon ay dedesisyunan na nila kung dapat o hindi sampahan ng kasong crimes against humani­ty si Pangulong Rodrigo Duterte.

Ang kasong ito ay isinampa sa ICC ng mga da­ting miyembro umano ng DDS o Davao City Death Squad at pamilya ng mga biktima ng EJK o extrajudicial killings na mga sangkot sa ilegal na droga sa bansa.

Sakaling aprubahan ng ICC ang pagsasampa ng kaso ay agad magpapalabas ng warrant of arrest ang international court upang sakaling mahuli ay umpisahan na ang paglilitis kay Presidente Duterte at sa iba pang mga sangkot sa kasong crimes against humanity.

Kapag may warrant of arrest na laban kay Pres. Duterte ay malaking problema iyan sa Pilipinas dahil hindi na makapupunta sa ibang bansa ang pangulo para dumalo sa mga pandaigdigang pagpupulong ng mga lider ng mga bansa na may kinalaman sa ekonomiya, dahil maaari na siyang dakpin sa kanyang lugar na pupuntahan.

Sa Pilipinas ay malabong may mangahas na miyembro ng Philippine National Police (PNP) at National Bureau of Investigation (NBI) na hulihin ang Presidente, maliban na lamang kung may mga magpapakabayani na ares­tuhin siya at dalhin sa ICC sa Hague, The Netherlands.

Masamang balita ito para sa gobyerno ng Pilipinas, lalo na kay Pres. Duterte at sa mga kasama nitong nakasuhan sa ICC, pero para sa mga kamag-anak ng mga biktima ng EJK sa bansa ay good news ito dahil indikasyon na posibleng mabigyan na ng hustisya ang pagkamatay ng kanilang mga mahal sa buhay.

oOo

TIMBRE: Paging SPD Director, Brig. Gen. Nolasco Bathan, sa Makati City ay isang alyas “Bob” daw ang nagpapasakla sa Muntinlupa City, may pasakla rin daw ang isang alyas “Walter”. Sa Parañaque City ay isang alyas “Madam” daw ang may pa-video karera. Paki-aksyunan naman! (CHRISTIAN’S BOMB / CHRISTIAN HERNANDEZ)

Please follow and like us:
Read More

JONES BRIDGE

yourservice

KAMAKAILAN ay ibinida muli ng pamahalaang Maynila ang bagong Jones Bridge sa publiko. Maraming namangha, maraming pumuri at marami ang dumalo sa okasyong ito. Nakatutuwang isipin na muli nang bumabangon ang lungsod ng Maynila mula sa tagal nang pagpapabaya rito ng mga nakaraang naging alkalde.

Ngunit hindi lang ang pagbabago ng Jones Bridge ang kailangan natin pagtuunan ng pansin ngayon, datapwa’t maganda ang mga pinagagawa ng bagong alkalde sa mga istraktura ng mga lokal na pamahalaan ngayon, kundi  ang pagtingin at pagtanaw natin sa ating lokal na kasaysayan. Mula nang maumpisahan ang rehabilitasyon ng makasaysa­yang tulay na ito ay bumaha ang mga impormasyon tungkol sa  kasaysayan. Mababasa natin mula sa social media kung paano nasimulan at itinayo ang tulay na ito sa pagpasok ng siglo noon at naging saksi ito sa kasaysayan ng bansa tulad ng Pangalawang Digmaang Pandaigdig kung saan binomba ng mga Hapon ang tulay upang maantala ang pagpasok ng mga Amerikano noon sa lungsod.

Ang nakatutuwa, para sa akin, ay ang pagusbong muli ng interest ng ating mga kababayan sa kasaysayan, na dulot ng pagpapagawa o pagkukumpuni ng Jones Bridge. Kinakailangan nating lumingon sa mas mahalagang nangyayari dulot nito, ang panunumbalik ng ating pagmamahal sa ating kasaysayan. At mapalad tayo na nagkaroon tayo ng isang bagong alkalde na may tunay na pagmamahal sa kasaysayan lalong lalo na ito’y mga kaganapang nangyari sa lungsod ng Maynila. Alam naman natin na isa ang Lungsod ng Maynila sa may pinakamayamang kasaysayan sa bansa.

Sa aking munting palagay, maganda na ang naumpisahan ng bagong alkalde ng Maynila. Higit sa pagkukumpuni ng mga istrakturang pampubliko ng lungsod ay naipakikita natin ang ating pagmamahal ng ating kasaysayan, pagmamahal sa ating nakaraan. Idagdag na natin dito ang popular na kasabihang ang sino mang hindi marunong lumingon sa pinanggalingan ay hindi makararating sa paroroonan. Ang pagmamahal sa ating kasaysayan ay hindi lang isang panandaliang interest kundi isang kata­ngian ng tunay na Filipino, ito ay isang yamang hindi mailaalis o makukuha sa atin ninuman. Mapalad tayo na mayroon tayong maituturing na mayamang  kasaysayan mula pa noong bago tayo sakupin sa mahabang pananakop ng mga Kastila, ang pagdating ng mga Amerikano, ang panandaliang pamumuno ng mga Hapon sa panahon ng Ikalawang Digmaang Pandaigdig, sa ating pagkakaroon ng pagkasarinlan hanggang sa kasalukuyan. Mula sa ating kasaysayan, nagkaroon tayo ng mga bayani, mga indibidwal na inuna ang kapakanan ng ating Inang Bayan bago ang sarili at nagsisilbing aral at inspirasyon sa mga susunod na henerasyong Filipino.

Ito, para sa akin, ang tunay na handog ng pagbabago at pagkukumpuni ng Jones Bridge. Isipin n’yo na lamang na lumalakad kayo o tumatawid sa mga dinaanan ng ating mga ninuno, ng ating mga nagsakripisyong sundalo noong digmaan, ng ating mga bayani. Hindi lamang sa Jones Bridge kundi ang mga makasaysayang pasil­yo, gusali, kalye, tulay ng Maynila, at ng iba pang makasaysayang lalawigan ng Pilipinas katulad ng Bulacan, Pampanga, Tarlac, Ilocos, Laguna, Cavite, Cebu, Davao, sa buong Luzon, Visayas at Mindanao, masusundan natin ang mga yapak ng ating mga naunang bayani ng bayan. (@YOURSERVICE / ATTY. DAVID AQUINO)

Please follow and like us:
Read More

MAGPASALAMAT

PINOY ABROAD

“IN everything, give thanks: for this is the will of God in Christ Jesus concerning you.” 1 Thessalonians 5:18 (KJV)

 

ANG ating paksa sa araw na ito ay tungkol sa pasasalamat.

Gaano ka kadalas nagpapasalamat? Sa magulang, sa kaibigan, katrabaho o kasama sa bahay?

Hindi ba’t masarap sa pakiramdam na ipadama sa kanila ang iyong appreciation sa kahit mumunting bagay na nagawa nila para sa iyo?

Isa sa mga hinahangaan ko si Apostol Pablo dahil sa kanyang pahayag at pangaral na “Magpasalamat sa lahat ng bagay”. Alam natin na si Apostol Pablo ay isang edukado at mataas ang tungkulin sa gobyerno ng Romano at namumuhay nang marangya at ginagalang bago niya nakatagpo ang Panginoon JesuCristo sa daan ng Damasco.

Mula noon ay naging tagasunod siya at ­masugid na tagapangaral ng ­Mabuting Balita ng Panginoon Jesus. Nawala sa kanya ang karangalan at kasaganaan dahil sa pangangaral ng Mabuting Balita. At kung dati siya’y tagausig ng mga ­mananampalataya kay Kristo, nangyaring siya naman ang inuusig ng mga Romano.

Bukod pa roon ay dumanas siya ng iba’t ibang pagsubok at kahirapan tulad ng paglubog ng sinasakyan niyang barko, nakagat ng ulupong, hinagupit ng mga sundalong Romano at ibinilanggo. Sa kabila ng kanyang mga naranasan, ipinangaral pa rin niya na, “In everything gives thanks.”

Ganito rin ang naging saloobin ni Haring David na laging nagpapasalamat sa dakilang Diyos. Sa Psalms 35:18 isinasaad na ”I will give thee thanks in the great congregation: I will praise thee among much people.”

Si Haring Hezekiah ay nag-appoint ng mga saserdote at levita para maghandog ng peace offerings, to minister and to give thanks, and to praise in the gates of the tents of the Lord. (2 Chronicles 31:2)

How about us? Naging gawi na ba nating magpasalamat sa tuwi-tuwina?

Siguro sa panahon lang kung tayo’y may tinatanggap na biyaya.

Walang mawawala kung susubukan natin at pakikinggan si Apostol ­Pablo. Anomang kalagayan o sitwasyon ay magpasalamat tayo.

“In everything give thanks…” and “Rejoice in the Lord, ye righteous; and give thanks at the remembrance of his holiness.” Psalms 97:12 (KJV) (givalencia777@gmail.com) (PINOY ABROAD / GUILLER VALENCIA)

Please follow and like us:
Read More

ANO ANG GAGAWIN SA KULELAT NA MGA ESTUDYANTE?

BAKBAKAN NATIN

SA kauna-unahang pagkakataon, sumalang ang Pilipinas sa Programme for International Student Assessment (PISA) noong 2018 upang malaman ang kalagayan ng mga mag-aaral na labing-limang taong gulang sa larangan ng matematika, agham at pagbabasa nang nauunawaan ang binasa.

Ayon kay Education Secretary Leonor Magtolis Briones, isinali at isinalang ng Department of Education (DepEd) ang Pilipinas sa pagtatasa ng PISA upang malaman ang eksaktong kalagayan ng mga mag-aaral na Filipino sa high school sa larangan ng matematika, agham at kung nauunawaan ang binabasa nila.

Batay sa maraming pag-aaral, ang matematika, agham at pag-unawa sa binabasa ay mahalaga ngayong panahon sa iba’t ibang larangang ginagalawan ng tao sa daigdig.

Sa pagtalakay ng isyung pokus tayo sa pagbabasa nang nauunawaan o naiintindihan ang binasa (reading comprehension), bagsak tayo sa pagtatasa ng PISA.

Nasa dulo ang Pilipinas sa 79 bansang lumahok sa pagtatasa. Totoong nakababahala ang resulta.

Ang dapat gawin sa suliraning ito ayon kay Senadora Cynthia Villar ay: “‘Yung mga maliliit [na paaralan ay] baka i-disband natin ‘yun.”

“’Yung magagaling na [mga] estudyante, ang school nila dapat may national exams tapos na-me-measure mo, and then ‘yung magagaling na estudyante, bigyan natin ng reward,” patuloy ni Villar nang tanungin siya ng mga journalist tungkol sa nasabing suliranin.

Para sa akin, mali ang ideya ni Villar. Dapat itanim ni Villar sa kanyang kokote na ang edukasyon ay hindi dapat kumpetisyon.

Ang pagkatuto ng mga estudyante ay hindi dapat daanin sa kumpitensiya.

Ang napakababang iskor ng Pilipinas sa pagtatasa ng PISA ay dapat ituring na isang hamon sa DepEd, lalo na sa mga guro mula kindergarten, elementarya hanggang high school.

Ang mga guro ang nakakaalam kung ano ang dapat gawin sa kahinaan ng mga estudyanteng Filipino.

Kabisado ng mga guro ang pasikut-sikot sa edukasyon. Kaya lang, hindi nakapagpapasya ang mga guro nang walang basbas ang pinakamataas na opisyal ng DepEd.

Masakit sa ulo kapag ang mag-aaral ay nakarating ng kolehiyo, pero mahina o palpak sa pagbabasa lalo na kung hindi naiintindihan ang binabasa.

Bilang propesor mula 2007, naranasan ko ‘yan sa matagal na panahon.

Napakaraming mag-aaral na mahina sa pagbabasa at mahina sa pag-unawa sa kanilang binabasa.

Ang banggit lang sa akin ng mga kapwa ko propesor noon ay: “Labis-labis na pag-unawa ang dapat ipakita at gawin ng bawat propesor sa mga mag-aaral na mahinang bumasa at mag-aaral na hindi kayang unawain kaagad ang kanilang binabasa”.

Kaya hindi basta-basta ibinabagsak ang mga ­estudyante.

Taon-taon ganyan ang payo sa akin ng kapwa ko propesor.

Sa aking pagsasaliksik at pag-aaral, natumbok ko ang rason kung bakit may mga mag-aaral na nakararating hanggang kolehiyo bagama’t mahina magbasa at marunong magbasa, ngunit hindi nauunawaan ang kanilang binabasa.

Sa Grade 1, kahit mahinang magbasa ay ipinapasa ng mga guro para maging Grade 2.

Dapat tutukan nang husto ng mga guro ang mga mag-aaral sa pagbabasa hanggang matutong magbasa at maunawaan ang kanilang binabasa.

Kung hindi matuto ang mga mag-aaral, dapat hindi sila ipasa at panatilihin sa Grade 1  imbes na iakyat sa Grade 2.

Sa ganitong paraan, maging ang mga magulang ay tutulong sa guro upang matutong magbasa ang kanilang mga anak hanggang maunawaan ng mga bata ang kanilang binabasa.

Kaso, hindi ganyan ang praktis. Kahit mahina magbasa ang mga mag-aaral sa Grade 1, nakapapasa sila at naka-aakyat sa Grade 2, sa Grade 3 kahit napakahina sa “reading comprehension”.

Hindi puwedeng ibagsak ng mga guro ang mga mag-aaral, sapagkat magiging mababa ang marka nila sa ebalwasyon ng prinsipal.

At ang prinsipal ay hindi rin papayag na mababa ang marka ng kanyang mga guro sapagkat posibleng matanggal siya sa kanyang posisyon.

Kaya ang resulta ay ipapasa ng mga guro ang mga mag-aaral kahit mahina sa pagbabasa at hindi naiintindihan ang kanilang binabasa.

Dapat mabago ito. Dapat matanggal ang ganitong dekadenteng sistema.

Hindi dapat hayaang makaakyat sa Grade 2 ang mga mag-aaral hangga’t hindi marunong magbasa at hindi naiintindihan ang kanilang binabasa upang matutong magbasa at maintindihan nila ang kanilang binabasa.

Kailangang mabago ang sistemang basta-basta ipinapasa ang mga Grade 1, Grade 2 at iba pa sa asignaturang kinukuha ng mga mag-aaral sa elementarya.

Kung hindi mababago ito, siguradong taon-taon bagsak ang marka ng Pilipinas sa pagtatasang isasagawa ng PISA.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa: 0998 – 565 – 0271. (BAKBAKAN NA / NELSON BADILLA)

Please follow and like us:
Read More

PANAWAGAN NG MGA TAGA-BULACAN KAY DOMINGUEZ, HUWAG HARANGIN ANG NMIA PROJECT

CHRISTIAN BOMB

UMAPELA ang local government units (LGUs) sa Bulacan kay Department of Finance (DOF) Sec. Carlos Dominguez III na huwag nitong harangin ang $15-B New Manila International Airport project.

Ang panawagan ay nang maantala ang groundbreaking ng proyekto na nakatakda sana ngayong buwan dahil sa panibagong isyu umano na inilutang ng kalihim.

Dahil diyan, nagdududa tuloy ang LGUs sa Bulacan kung ano ang tunay na motibo ni Dominguez para harangin ang proyekto at modernisasyong ito sa lalawigan.

Ang pagharang ni Dominguez sa proyektong ito ay parang kinumpirma na rin ni Transportation Sec. Arthur Tugade nang sabihin na nakabinbin sa Department of Justice (DOJ) ang concession agreement dahil may ilang isyung nais linawin daw ang DOF, partikular na ang ‘wording at interpretation’ sa terms ng proyekto matapos makakuha ang San Miguel Corporation (SMC) ng notice to proceed noong Setyembre 18.

Sa parte ni Tugade, nais niyang matuloy na ang groundbreaking ceremony para lumuwag ang Ninoy Aquino International Airport (NAIA) at magkaroon ng solusyon sa patuloy na pagsikip ng paliparan.

Nitong nakarang taon, nagpahayag ng kaniyang ‘reservation’ si Dominguez sa proyekto at idinahilan nito ang New Clark City na may 55 kilometro ang layo sa pagtatayuan ng modernong paliparan.

Kamakailan naman ay napaulat na inilutang nito ang paglilinaw sa interpretasyon ng ‘material adverse government action’ (MAGA) at hangganan ng pananagutan ng gobyerno sa proyekto.

Ang MAGA ay sumasaklaw sa kompensasyon ng concessionaire sa pagkakataong magkaroon ng negatibong epekto sa proyekto ang aksiyon ng pamahalaan.

Samantala, inamin naman ni SMC President and Chief Operating Officer Ramon S. Ang na delayed  na ang groundbreaking ceremony at huli na sila sa schedule sa kontruksiyon ng NMIA dahil naka-hold pa ito.

Matatandaan, isinara ng DOTr ang Swiss Challenge matapos na walang ibang kompanya ang nagbigay ng alok upang itayo ang P735 bilyong bagong paliparan, maliban sa SMC kaya dito ipinagkaloob ang “Notice of Award” na nagpapahintulot na mamuhunan, magdisenyo, gumawa at magpatakbo sa NMIA.

Base sa disenyo ng NMIA na nauna nang inilabas sa media, ito ay may tatlong dobleng kapasidad kumpara sa NAIA. Lalatagan ito ng apat na runway na kayang lumipad at lumapag ang apat na eroplano nang magkakasabay, walong taxiways, tatlong passenger terminal na may kapasidad na mula 100 hanggang 200 milyon kada taon. Mayroon din itong kapasidad na makapagparada ng aabot sa 240 na eroplano bawat oras at ikakabit dito ang 8.4 kilometrong expressway na lalabas sa North Luzon Expressway (NLEX) sa bahagi ng Marilao, Bulacan.

Pambihira naman itong si Dominguez, kasi mala­king tulong ang pagbubukas ng itatayong international airport sa turismo, trabaho at kabuhayan ng Bulacan, tapos hinaharang pa proyektong ito. (CHRISTIAN’S BOMB / CHRISTIAN HERNANDEZ)

Please follow and like us:
Read More

VENDORS SA QUEZON CITY NAGBABALIKAN NA NAMAN

BOMBAHAN NA FINAL

MISTULANG tiyangge na naman ang ibabaw ng flyover sa panulukan ng EDSA at Aurora Blvd. sa Cubao, Quezon City.

Bakit kamo? Nagbalikan na naman ang vendors sa area.

Ayon sa silipero ng BOMBAHAN NA, punong-puno na naman ng panindang mga damit at mga sapatos ang kuwadradong hugis ng flyover.

Hindi kaya napapansin ng Local Government Unit ng Quezon City ang mga vendor na ito?

Sa susunod na mga araw, lalo na ngayong buwan ng Disyembre, ay gagayahin na sila ng iba pang vendors.

Maganda na sana dahil kahit papaano lumuwag ang Metro Manila nang ipag-utos sa lahat ng LGUs ni Pangulong Duterte na linisin ang lahat ng sagabal sa kalye kasama na ang vendors.

Kaya lang, tulad ng sinasabi ng silipero ng BOMBAHAN NA, ningas-kugon lang ang ibang LGU.

Naalala ko tuloy ang sinabi ni Department Interior and Local Government (DILG) Undersecretary Ricojudge Echiverri na hindi nakikipagtulungan ang mayors at governors sa kampanya ng gobyerno laban sa ilegal na droga.

Tama si Usec. Echiverri dahil kung nakiisa ang LGUs sa kampanya ay hindi sana nahihirapan si Pangulong Duterte sa ‘war on drugs’.

Ganun din sa vendors, kung talagang hihigpitan nila ito ay hindi babalik ang mga iyan sa dati.

Ganun din naman, hindi mga dekalidad ang itinitinda sa kalye na mga damit, sapatos at gamit dahil mga peke ang mga ito.

Pawang mga ginaya lang sa mga kilalang brand.

Marami nang kumitang LGUs sa illegal drugs at vendors noong mga nakaraang administrasyon kaya sana tigilan na nila ang mga iyan.

Natatandaan ng BOMBAHAN NA, maraming LGUs sa Metro Manila na pagdating ng ‘ber months’ ay pinapayagan nilang gamitin ng vendors ang kani-kanilang mga bangketa at kalye.

Ang tanong tuloy ng mga silipero ng BOMBAHAN NA, saan napupunta ang mga ibinabayad ng bawat vendors? Na ang tawag nila ay ‘butaw’.

Naniniwala po ang BOMBAHAN NA kay Yorme Isko na inalok siya ng P5 milyon araw-araw, ‘wag lang paalisin ang mga vendor sa bangketa at kalye.

Naging palabigasan na nila ang mga vendor sa mahabang panahon.

Kaya ngayon, hindi na oobra yan kay Pangulong Duterte ‘yan.

Kaya sa LGUs na nagbulagbulagan, antayin n’yo na mapansin kayo ni Pangulong Duterte dahil hindi kayo sasantuhin.

Maging mapagmasid kayo  sa inyong mga paligid baka kayo’y napaiikot ng inyong mga tao.

Ang ire-report sa inyo ay puro maganda pero ang totoo kumikita na sila sa labas.

Ganun din po sa Metropolitan Manila Development Authority (MMDA), alam po natin na napapansin nila na nagbalikan na naman ang vendors sa flyover sa panulukan ng EDSA at Aurora Blvd.

‘Wag po kayo magbulag-bulagan, ‘pag bawal, bawal, ipatupad n’yo po nang tama ang batas.

oOo

Pasabugin ang katiwalian, isumbong sa BOMBAHAN NA, mag-e-mail joel2amongo@yahoo.com/operarioj45@gmail.com (BOMBAHAN NA / Joel Amongo)

Please follow and like us:
Read More

BIKTIMA NG CREDIT CARD

yourservice

NABULABOG na ba kayo ng isang sulat o isang tawag na tinatakot kayong makulong dahil sa hindi pagbabayad ng utang sa credit card? Nakatanggap na ba kayo ng mahabang sulat kung saan ikinukwento kung paano kayo kakasuhan sa korte at binibigyan pa kayo ng sampol na reklamo?

Kung oo ang inyong sagot — isa kayo sa marami nating kababayang may parehong problema. Ang problema, hindi lamang kung paano babayaran ang inyong utang sa banko dahil sa paggamit ninyo ng credit card — kundi paano nyo haharapin ang makukulit at nananakot na mga kolektor ng mga banko.

Nag-uumpisa ang problema sa credit card bilang isang inosenteng pag-alok ng mga  naglalako nito. Kadalasan, pumupunta sila sa inyong opisina o di kaya’y nag-aalok ng credit card sa loob ng mall. Sasabihin na “waived” na ang membership fee at sandali lang ang pag-approve nito. Dahil sa kaaya-ayang mga pangako ng mga nag-aalok ng credit card, susubukan ninyong kumuha at pagkalipas ng ilang araw — matatanggap n’yo na ang card.

Masaya ang may credit card — dahil napahahaba n’ya ang inyong kakayahang bumili ng mga kagamitan o di kaya naman ay kumain sa mga kainang mamahalin. At dahil hinahayaan kayo ng banko na bayaran lamang ang “minimum amount”, hindi n’yonapapansin na unti-unti nang lumalaki ang inyong utang hanggang umabot sa panahong nagamit n’yo na ang “credit limit” at kinakailangan nang bayaran n’yo ang balanse upang magamit ulit ang credit card. Dito na nag-uumpisa ang problema — dahil kadalasan ay kinakapos tayo sa pera, hindi na natin nakakayanang bayaran buwan- buwan ang ating utang sa credit card. Dumarating ang panahon na lumalaktaw na tayo ng mga buwan na hindi na natin nababayaran. Pagkatapos nito, darating na ang mga “demand letter” at mga tawag sa telepono, text at email ng banko — naniningil ng utang. Yung iba, makikiusap, yung iba naman magtatago. Dito na mararanasan ang mga bastos na kolektor sa telepono o sa text — minsan bastos, kadalasan naman ay nananakot.

Sa aking munting palagay — may mga alituntunin ang ating Bangko Sentral tungkol sa pagkolekta ng utang sa credit card. Unang-una, hindi dapat nanggugulo ito lalo na sa lugar ng iyong trabaho. Pangalawa, hindi dapat ito nananakot at hindi nagbibigay ng maling impormasyon tungkol sa balanse. Kadalasan kasi, puro pananakot at panggugulo ang ginagawa ng ibang kolektor — hindi naman lahat — ngunit madalas ito ang nangyayari upang sila ay makakolekta dahil kumikita ang mga kolektor na ito sa komisyon base sa nakokolekta nilang utang. Ang aking munting payo — makipag-usap mismo sa banko tungkol sa pamamaraan ng inyong pagbabayad — tandaan, ito’y utann’yo naman talaga dahil sa paggamit n’yo ng credit card. Makiusap na baka maaaring ayusin ang istraktura ng inyong pagbabayad na nakabubuti sa inyo at sa banko.

Pero sa aking munting palagay, mas magandang maiwasan ang problemang ito kung magkakaroon tayo ng disiplina sa pagkuha at paggamit ng credit card. Sabi nga nila, isang malaking responsibilidad ang pagmamay-ari ng credit card. Hindi dapat ito ginagamit ng basta-basta at para lamang sa luho. Laging tandaan, ang pangunahing gamit ng isang credit card ay tulungan kayo sa mga gastusing biglaan at iwasang maging pabaya rito. (@YOUR SERVICE / ATTY. DAVID ROBERT AQUINO)

Please follow and like us:
Read More

4 CONTRACTOR LICENSE FOR HIRE SALOT SA BIDDING

PASABOG

GANID sa salapi ang may-ari ng apat na contractor license for hire na ito, na nag-o-operate o umiikot sa National Capital Region (NCR) at mga karatig na lugar sa hilagang Luzon at ­maging sa kanlurang bahagi ng Luzon.

Ganid in the sense na dahil hindi ito tumatanggap ng barya-barya mula sa lehitimong mga kontraktor na totoong namumuhunan para kumita sa legal na paraan para sa kanyang pamilya.

Hindi katulad nitong walang kaluluwa na panay hingi at hindi basta hingi, ito ay demand, at heto pa “take it or leave it policy” kapag hindi pinagbigyan sa kanilang asking price na “one is to one or one is to five hundred” ay manggugulo itong mga gonggong nang walang pakundangan.

Para ika nga suspense, with held muna nating ang mga pangalan ng apat na contractor license for hire para kung baga sa pagluluto ng manok na pinikpikan, ito ay ang Baguio recipe, na tinatawag nilang “Killing me softly” kanta ‘yan. Ngeek!

Mantakin mo, kumikita itong mga gonggong ng milyon-milyon na salapi nang walang kahirap-hirap, laway lang ang puhunan? Oh my God, forgive them for they do not know what the are doing.

Sana, sana lang hindi kayo balikan ni Mang “Karma” sige nandiyan siya sa inyong likod, kala mo lang ha. Dahil if God permits, sa kangkungan ka pupulutin. (PASABOG / Froilan Morallos)

Please follow and like us:
Read More

TEAM PILIPINAS PATULOY NA HUMAHAKOT NG MEDALYA SA SEA GAMES

BAKBAKAN NATIN

MABUHAY ang mga atletang Filipino!

Palakpakan natin ang Team Pilipinas sa ipinakikita nitong husay sa iba’t ibang laro sa ika-30 taon ng South East Asian Games (SEA Games).

Malinaw na walang kapaguran at walang tigil ang pagkakamit ng mga manlalaro ng mga medalya, lalo na ng ginto.

Kung susumahin sa pinakahuling bilang ay mahigit na 100 ang medalyang nakuha ng mga atletang Fiipino.

Nasa 50 ang ­medalyang ginto ang nakuha ng bansa.

Unang araw pa nga lang ng palaro, naungusan na ng Pilipinas ang kabuuang 24 medalyang ginto na nakuha natin sa 2017 SEA Games na ginanap sa Malaysia.

Resulta ito ng pagpupursigi ng mga ­organizer at sports officials sa ­ating mga atleta na muling makuha ang overall champion title sa SEAG na naibulsa ng Pinas sa 2005 SEA games na inilunsad din noon sa ating bansa.

Umabot sa 112 gintong medalya ang nakuha ng Pilipinas noong 2005 SEAG at maaari itong higitan sa nagaganap na 30th SEA Games.

Tingnan ninyong mabuti, unang araw  pa lamang ng SEA Games ay nalagpasan na ng Team Pilipinas ang 24 na gintong medalya na nakuha ng mga atletang Filipino noong 2017 SEA Games sa  Malaysia.

Pihadong patuloy pang nadadagdagan ang mga gintong medalya ng Pilipinas lalo na sa 14 gold medals na napanalunan sa arnis, 10 gold ­medals sa dance sports, 2 sa wushu, 2 sa gymnastics at iba pang gintong medalya na nakopo sa iba pang sports events.

At sa ikatlong araw, nakapagtala na ang Pilipinas ng 47 na gintong medalya bukod pa sa silver at bronze medals na nasungkit ng ating mga manlalaro sa iba’t ibang sports events.

Hindi na kasi nakabawi ang Pilipinas sa performance nito sa SEAG dahil noong 2017, 41 gold medals lamang ang naipanalo, 38 gold ­medals noong 2009, 36 gold ­medals noong 2011, tig-29 gold medals noong 2013 at 2015, at 24 gold medals lamang noong 2017.

Tayo ay umaasa na mababaliktad ang performance natin sa SEA Games dahil inspirado at ganadung-ganado ngayon ang ating mga manlalaro dahil sa napakalakas na suporta na ipinapakita sa kanila ng pamahalaan.

Ang magandang nagaganap sa Ika-30 taon ng  SEA Games ay kapansin-pansing ngayon lang nangyari sa ­administrasyon ni Pangulong Rodrigo Duterte sa tulong ni PHISGOC president at House Speaker Alan Peter ­Cayetano na nanguna sa pagpapagawa ng olympic standards sports venues tulad ng sports stadium at aquatic center sa New Clark City sa Tarlac.

Inihayag mismo ng mga atleta na inspirado silang makipaglaban sa kani-kanilang sports dahil sa napakalakas na suporta sa kanila ni Duterte, sa partikular, at ng mamamayang Filipino, sa pangkalahatan.

Ganado rin ang mga atletang Filipino dahil dumarayo ang mga  kababayan natin sa iba’t bang sports venues upang manood at magpakita ng suporta sa mga manlalarong Filipino.

Nagalak nang husto ang mga manlalaro sa napakagandang seremonya ng pagbubukas ng ika-30 taon ng SEA Games sa Philippine Arena noong Nobyembre 30 na sinalubong ng nakabibinging hiyawan at palakpakan ng mga manonood nang pumarada na sa entablado ang mga atletang Filipino.

Kaya naman, maging ang OCA o Olympic Committee of Asia ay napabilib sa hosting ng bansa sa SEA Games.

Kaya hinikayat ni OCA Vice President Jizhong Wei ang Pilipinas na mag-bid para sa 2030 Asian Games.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tawag o mag-text na sa: 0998 – 565 – 0271. (BAKBAKAN NATIN / Nelson Badilla)

Please follow and like us:
Read More