PATAY KAY ‘URSULA’ PUMALO NA SA 41 

(NI JG TUMBADO)

UMABOT na sa 41 ang mga nasawi habang mayruon pang 12 ang nawawala dahil sa pananalasa ng bagyong Ursula sa bansa.

Ayon sa National Disaster Risk Reduction Management Council (NDRRMC), walo sa mga nawawala ay mula sa Region VI, habang tig-dalawa sa MIMAROPA at Region VIII.

Samantala, umabot na sa P1.074 bilyon ang halaga ng pinsala ng bagyo sa imprastruktura at agrikultura sa Luzon at Visayas.

Nasa kabuuang 399,242 pamilya o mahigit sa 1.6 milyon residente naman ang naapektuhan sa Region MIMAROPA, V, VI, VII, VIII at CARAGA.

Sa nasabing bilang, 24,378 pamilya o mahigit sa 97,000 indibidwal ang nananatili sa 529 evacuation centers habang ang iba ay nasa kani-kanilang kamag-anak muna nagkakanlong.

 

Please follow and like us:
Read More

5 PATAY SA TRAK NA UMARARO SA POSO

bukidnon map 12

(NI JG TUMBADO)

PATAY ang lima katao nang araruhin ng trak ang mga naliligo sa poso sa Sumilao, Bukidnon nitong Sabado.

Tinukoy ng Bukidnon Police ang ilan sa mga biktima na sina Teresa Jagonal, truck driver na si Erman Falcis, substitute driver nito at dalawang menor de edad.

Dakong ala-1:30 ng hapon ng Sabado nang maganap ang aksidente sa Sitio Langga, barangay San Vicente ng naturang barangay matapos mawalan umano ng kontrol si Falcis sa minamaneho nitong Isuzu aluminum wing van truck.

Sa pahayag ng nakaligtas pero sugatan na pahinante ng trak na si Reymart Galagala, patungo umano sila ng Maluko sa Manolo Fortich mula sa Malaybalay City nang madisgrasya.

Mabilis aniya ang takbo ng trak na may kargang fertilizer at biglang nawalan ng kontrol ang drayber kaya’t napunta sa kanang bahagi ng kalsada hanggang sa masalpok ang mga biktima na naliligo sa poso.

Tuluy-tuloy ding tumakbo ang trak hanggang sa mahulog sa bangin.

Patuloy nang sinisiyasat ng mga otoridad ang aksidente.

 

Please follow and like us:
Read More

LALAKI BINIGTI SA DUYAN

(NI NILOU DEL CARMEN)

BRUTAL na kamatayan ang sinapit ng isang 50-anyos na lalaki na matapos paghahampasin ng matigas na bagay sa ulo ay binigti pa ito gamit ang duyan sa Bay, Laguna.

Kinilala ng Bay police ang biktima na si Jose Malabanan, residente ng Barangay Sto. Domingo.

Batay sa report,  nadiskubre itong nakabitin gamit ang duyan sa labas ng kanyang bahay noong Sabado ng umaga.

Ayon pa sa pagsisiyasat, duguan ang ulo nito resulta ng mga sugat na mula sa pagkakapalo sa ulo.

Nanawagan ng malalimang imbestigasyon ang mga kaanak nito upang mahuli ang gumawa ng krimen sa biktima na napag-alamang solong  namumuhay sa kanyang bahay.

Patuloy pa ang imbestigasyon ng mga pulis sa pangyayari.

 

Please follow and like us:
Read More

4 INMATE SA MAYNILA NAKATAKAS

cell

(NI RENE CRISOSTOMO)

NAKAPUGA ang apat na inmate sa  Pritil Police Community Precinct (PCP) na sakop ng Manila Police District-Station 1, sa Tondo, Manila, nitong Disyembre 26.

Gayunman sa  impormasyon nakalap , Sabado ng hapon, isa pa lamang ang naaresto na kinilalang si  Christopher Saladaga na  may kasong paglabag sa Presidential Decree 1602 (Illegal Gambling) na binitbit sa paglalaro ng cara y cruz.

Nakalalaya pa ang tatlong nakapuga na pawang may kinakaharap na kasong paglabag sa Republic Act 9165 section 11 (possession of illegal drugs)  na sina Jose Johnson Nuevo; Exquiel Crisostomo at Richard Pineda .

Batay sa ulat ng pulisya,sa pagitan ng  8:30 ng  gabi hanggang 9:00 ng gabi nitong nakaraang  Disyembre 26, nang maisakatuparan ng mga inmate  ang pagtakas mula sa jail facility ng PCP.

Nadiskubre umano ito nang mainspeksiyon ang PCP commander na si P/Captain Monico Alliado na dakong  alas-12:30 ng madaling araw ,Dis. 27.

Agad nagsasagawa ng imbestigasyon ang MPD para sa kaukulang aksiyon at inihahanda rin ang posibleng mga kasong kakaharapin nang matutukoy ang mga nagpabaya sa tungkulin.

Hinala umano ng mga awtoridad na ang ‘boy’  o ‘ striker’ ng nasabing  PCP ang nagbigay umano ng lagareng bakal  na ginamit sa pagtakas ng mga suspek.

Hindi na umano lumulutang ang nasabing striker .

Sabado ng hapon nang tunguhin umano ng mga operatiba ng MPD ang isang lugar sa lalawigan ng Bataan at doon natagpuan ang puganteng si Saladaga na kusang sumurender sa mga pulis.

 

Please follow and like us:
Read More

LALAKI NAKURYENTE SA HEADPHONE, PATAY! 

(NI ANNIE PINEDA)

NAKABULAGTA at wala nang buhay nang matagpuan ang isang helper nang makuryente umano sa suot na headphone habang naglalaba, iniulat kaninang umaga sa Davao City.

Kinilala lamang ang biktima sa pangalan ‘Boyet’, ng Rosalina 3, Baliok, Talomo District, ng nasabing lungsod.

Batay sa report ng pulisya, dakong alas 8:45 ng umaga huling nakitang buhay ang biktima na naglalaba.

Kuwento ni Niko Arielle Amoguis, amo ng biktima, nagulat na lamang siya nang makitang nakabulagta si ‘Boyet’ habang suot ang headphone at wala ng buhay.

Kaagad naman dinala sa ospital ang biktima pero dineklara na rin itong patay ng umatending doktor dahil sa malakas na boltahe ng koryenteng pumasok sa katawan nito.

Sa pagsisiyasat ng pulisya, nadiskubre na grounded ang mga saksakan ng kuryente sa loob ng kabahayan.

Patuloy naman ang imbestigasyon ng mga awtoridad sa nasabing insidente.

 

Please follow and like us:
Read More

MISTER PATAY, MISIS SUGATAN SA BANGGA SA POSTE

accident12

(NI ANNE PINEDA)

PATAY ang isang mister habang sugatan ang misis nito makaraan bumangga ang kanilang sasakyan sa poste, iniulat kaninang umaga sa probinsya ng Nueva Vizcaya.

Kinilala ang biktimang si Lucio Tayaban, 62, habang sugatan ang kanyang asawa na si Dolores Tayaban, 58, kapwa residente ng Poblacion, La Trinidad, Benguet.

Batay sa report ng Bayombong Police Station, naganap ang insidente sa Maharlika Highway, Purok 2, Barangay Bonfal Proper, Bayombong, Nueva Vizcaya.

Lumabas sa imbestigasyon, minamaneho ni Lucio ang pulang Kia Pride na may plakang AHA 101at pagsapit sa nasabing lugar bigla na lamang itong nawalan ng kontrol sa manibela.

Sa bilis ng pangyayari, sumalpok sila sa poste dahilan para maipit si Lucio sa loob ng sasakyan.

Kaagad naman dinala sa ospital ang mag-asawa pero idineklara na rin patay ng umatending doktor habang nilapatan naman ng lunas si Dolores.

Ayon sa pulisya, mabilis ang patakbo ng sasakyan ni Lucio na naging sanhi ng aksidente at ikinamatay nito.

 

Please follow and like us:
Read More

P34-M SHABU NASABAT SA MAG-ASAWA SA CAVITE

(NI ROSS CORTEZ)
AABOT sa P34 milyon ang halaga ng nasabat na shabu ng pinagsanib na puwersa ng PNP Drug Enforcement Group, Region 4A Drug Enforcement Unit, Imus Component Police Station at PDEA Cavite, sa mag-asawang suspek, sa parking lot ng isang mall, sa lungsod ng Imus, Cavite.

Kinilala ang mga naarestong suspek na sina Emard Jimenez at Gretchen Jimenez , mga residente ng Ususan, Taguig City, na umano’y kinuha nila sa isang lugar sa Manila ang humigit kumulang sa 5 kilong shabu, para i-deliber sa kanilang katransaksyon sa Imus Cavite, pasado alas 10:00 Sabado ng gabi.

Lingid sa kaalaman ng mag-asawang suspek, operatiba na pala ang kanilang katransaksyon kaya agad silang inaresto matapos tanggapin ang buy bust money na ibinayad ng poseur buyer

Tumangging humarap sa kamera at magbigay ng pahayag ang mga suspek, maliban sa pagsasabing transporter lang daw sila ng mga nakumpiskang shabu.

Nahaharap sila sa reklamong paglabag sa sec 5 at 11 ng RA 9165 kaugnay sa mga nabawing 5 kilo ng shabu, 10 bundle ng P1,000 boodle money at gamit nilang kotse na may plakang NIN 654.

Please follow and like us:
Read More

12 SUGATAN SA TUMAGILID NA BUS

accident121

(NI KIKO CUETO)

SOCORRO, Oriental Mindoro — Aabot sa 12 katao ang sugatan nang tumagilid ang pampasaherong bus dito, Linggo ng madaling araw.

Sa report ng pulis, sinasabing galing ng Roxas Port ang Elms bus at may sakay na 24 pasahero. Papunta ang mga ito sa Calapan City Port nang mangyari ang aksidente.

Sinabi pa sa report ng Mimaropa Police na isinugod sa Oriental Mindoro Provincial Hospital sa Calapan City ang mga sugatang pasahero.

Sa imbestigasyon, nagkamali umano ng kalkulasyon ang driver ng bus na si Marcelio Reyes pagdating sa zigzag road kaya nawalan siya ng kontrol hanggang tumagilid ito.

Hindi nasaktan ang driver na hawak na ngayon ng mga awtoridad.

Kabibigay lang sa bus ng special permit ngayong holiday season sa rutang Iloilo – Batangas – Calapan – Roxas – Caticlan.

 

 

Please follow and like us:
Read More

SUSPEK SA PAGPATAY SA BATANG BABAE SA BATANGAS, NATIMBOG

(NI NILOU DEL CARMEN)

BUMAGSAK na sa kamay ng mga awtoridad ang  itinuturong suspek sa pagpatay sa 11-anyos na batang babae na natagpuan sa gilid ng creek sa Bauan, Batangas.

Naaresto noong Sabado si Mark Alvin Sajer, 27, isang laborer, at  nakatira umano malapit sa bahay ng biktima at isa rin sa limang person of interest na iniimbestigahan ng mga pulis.

Ayon kay Police Lt. Col. Joemar Labiano, hepe ng Bauan Municipal Police Station, nagtutugma ang mga pahayag ng tatlong witness na nagsabing huling nakitang kasama ng biktima ang suspek noong Lunes.

Ang biktimang si Ma. Cristine Velerio ay natagpuang patay sa isang creek sa Barangay Bolo matapos mawala ito bago mag-Pasko matapos magpaalam na magkakaroling.

Base sa inisyal na impormasyon, ginilitan sa leeg, sinuntok sa dibdib at sinaksak sa likod ang biktima na siya nitong ikinamatay.

Pangggahasa ang tinitingnang motibo sa krimen matapos matagpuan ang underwear ng bata 30 metro ang layo mula sa bangkay nito.

Sinampahan na ng kasong murder ang suspek.

 

Please follow and like us:
Read More

EX-BRGY KAGAWAD NA DRUG SURRENDERER ITINUMBA

TINADTAD ng bala ang katawan ng isang drug surrenderer ng barangay kagawad nang tambangan habang sakay ng motorsiklo, Sabado ng hapon sa Sarrat, Ilocos Norte.

Kinilala ang biktima na si Rodante Corales, drug surrenderer at dating kagawad ng Barangay Medina, Dingras, Ilocos Norte.

Nagtamo ang biktima ng iba’t ibang tama ng bala sa katawan mula sa kalibre .45 at kalibre .9 mm na baril.

Nagkalat din ang mahigit sa siyam na basyo ng bala ng kalibre .9 mm at tatlong basyo ng kalibre .45 sa crime scene.

Sa imbestigasyon, napag-alamang nakasakay ng motorsiklo ang biktima ng pagbabarilin ng dalawang salaring de-motorsiklo sa Barangay 20.

Wala ring nakakuha ng plaka ng mga suspek dahil ayon sa mga saksi. Napakabilis ng pangyayari at natakot din ang mga suspek sa mga armado.

Sa ngayon, inaalam pa ng pulisya ang pagkakakilanlan ng mga suspek.

Ayon kay Police Captain Carlo Abing, hepe ng Sarrat Police, droga ang isa sa mga anggulong tinitingnan sa krimen.

Patuloy ang imbestigasyon sa kaso.

Please follow and like us:
Read More

IMBESTIGASYON SA BOCAUE FIRE NAGPAPATULOY

PATULOY ang imbestigasyon sa sunog na sumiklab sa hanay ng bentahan ng mga paputok sa Bocaue, Bulacan, Sabado ng gabi, ilang araw bago ang bisperas ng Bagong Taon.

Bandang alas-6:10 ng gabi nang unang marinig ang pagsabog. Sinabi ng mga residente na inakala nilang may fireworks lamang sa lugar hanggang sa sunud-sunod na putok na ang narinig nila.

Unang nasunog ang stall sa A.T. Sayo Fireworks Store sa McArthur Highway sa Barangay Biñang 1st, ayon sa the Bureau of Fire (BFP) Bocaue.

Umabot ng hanggang tatlong alarma ang sunog at naapula ng alas-7:15 ng gabi.

Sa inisyal na report, naganap ang pagsabog sa bodega ng mga paputok. Abala ang mga empleyado ng stall nang maganap ang pagsabog.

Kasama ring nasunog ang dalawang sasakyan sa insidente.

 “Yung structure partially damaged. Kasi halos bato naman siya, naka-firewall siya.”

Tinataya sa P400,000 ang halaga ng napinsala. Walang iniulat na nasaktan ngunit nawalan ng kuryente sa lugar.

Please follow and like us:
Read More

NO BRIGHT, NO PROBLEM  

(NI DENNIS IÑIGO)

MULING nagliwanag ang kinabukasan para sa University of the Philippines (UP) Fighting Maroons sa pag-alis ng kanilang sentro na si Bright Akhuetie, na nakatakdang gumradweyt sa susunod na taon.

Ito ay dahil sa nakatakdang paglipat sa Diliman ng 6-foot-11 na si Maodo Malick Diouf.

Ayon sa ulat ng Spin, pumayag na ang Centro Escolar University na mag-tansfer sa UP ang 20-anyos na Senegalese.

Si Diouf ay may record na 16.7 points at 46-percent shooting, 19.5 rebounds, 3.3 assists, 2.9 blocks, 2.0 steals sa kanyang paglalaro sa CEU Scorpions.

Naging susi siya sa runner-up ng CEU sa 2019 PBA D-League Aspirants’ Cup, kung saan nagkampeon ang Cignal-Ateneo, kahit pa halos kalahati ng players nito ay hindi nakapaglaro sa finals dahil sa game-fixing allegations.

Pinangunahan din ni Diouf ang Scorpions sa NCRAA title, at inakay ito sa semifinals finish sa 2019 UCBL season na may average 18.0 points, 15.9 rebounds, at 3.0 blocks.

Mayroon lamang three playing years sa liga si Diouf kaya’t isang taon lang siyang makapaglalaro para sa Fighting Maroons sa UAAP Season 84 sa 2021.

Matatandaan na lumipat sa Diliman si Akhuetie, mula sa Perpetual sa NCAA, para tulungan na magkampeon ang UP sa UAAP Season 83 kung saan muling nanalo ang defending champ Ateneo Blue Eagles.

Gayunpaman, nangako si Akhuetie, kasama ang teammates na sina Kobe Paras at Ricci Rivero na maglaro pa rin sa UP Maroons sa susunod na season.

Please follow and like us:
Read More

MAINIT NA BALITA NG 2019

(Ni NELSON  S. BADILLA / Unang Bahagi)

MARAMING pangyayari ngayong 2019 na siguradong mayroong direktang epekto sa bansa at mamamayan.May maganda ang epekto at mayroon ding masama bu­nga anomalya at korapsyon.

Isa-isahin natin.

Kontra Maynilad at Manila Water

HINDI tinanggap ni Pangulong Rodrigo Duterte ang desisyon ng Permanent Court of Arbitration (PCA) ng Singapore na magbayad ang pamahalaan ng P7.39 bilyon sa Manila Water Company Inc. at P3.4 bilyon sa Maynilad Water Services Inc. bilang kapalit sa umano’y perwisyong ginawa ng pamahalaan sa dalawang kumpanya makaraang hindi kilalanin at hindi ipatupad ang ilang probisyon ng nakasaad sa kontrata  sa pagitan ng dalawang kumpanya at gobyerno upang maging distribyutor ng tubig sa mga residente ng Metro Manila at mga karatig lalawigan.

Ang P7.39 bilyon ay ang kabuuang halaga ng ikinalugi ng Manila Water mula 2015 hanggang 2019  at ang P3.4 bilyon naman ang kabuuang halaga ng ikinalugi naman ng Maynilad mula 2013 hanggag 2017 dahil sa pasya ng Metropolitan Waterworks and Sewe­rage System – Regulatory Office (MWSS – RO) noon na huwag isama ang corporate income tax sa umentong hinihingi ng Manila Water at Maynilad sa buwanang bayad ng kani-kanilang kustomer.

Ayon kay Duterte, maraming probisyong “onerous” sa kontrata ng pamahalaan sa Maynilad at Manila  Water.

Sinabi rin ng pangulo na “matagal nang niloloko” ng dalawang kumpanya ang kanilang mga kustomer sa Metro Manila at mga katabing lalawigan dahil maging ang buwis na dapat ang Maynilad at Manila Water ang nagbabayad sa Bureau of Internal Revenue (BIR) mula sa kanilang bilyun-bilyong kinikita bawat buwan ay ipinapasa sa kanilang mga kustomer bilang pagsama sa binabayaran kada buwan ng bawat pamilya.

Nagsimula ang kontrata ng Manila Water at Maynilad sa pamahalaan, sa pamamagitan ng MWSS, noong 1997.

Hanggang 2020 ang haba ng kontrata ng dalawang kumpanya sa pamahalaan.

Ang pagsasapribado ng negosyong distribyusyon ng tubig sa publiko ay nakatali sa programang praybitisasyon ni Pangulong Fidel Ramos.

Pagkatapos nito, nabuo ang MWSS – RO.

Noong panahon ni Pangu­long Gloria Macapagal – Arroyo, pumayag ang MWSS na pahabain hanggang 2037 ang kontrata ng Maynilad at Manila Water matapos makumbinsi ng dalawang kum­panyang ito ang pamunuan ng MWSS na kailangang umabot hanggang 2037 ang kontrol ng nasabing mga kumpanya sa negosyong distribyusyon ng tubig sa Metro Manila upang mabawi ang kanilang puhunan at ginastos sa nasabing negosyo.

Noong panahong nagsampa ng kaso ang Manila Water dahil sa iginiit nitong pagkalugi mula noong 2015 hanggang 2019, kaya dapat silang bayaran ng pamahalaan ng P7.39 bilyon ay umabot sa P25 bilyon ang kinita ng kumpanyang pag-aari ng pamilya Ayala at mga dayuhang negosyante mula 2015 hanggang 2018, ayon na rin sa ulat ng Manila Water.

Ang Maynilad na nagdeklarang nalugi noong 2013 hanggang 2017 sa PCA ay kumita ng P36.7 bilyon ang kinabig nitong kita nasabing panahon.

Pabor na pabor sa mga residente ng Metro Manila at mga kalapit na lalawigan ang desisyon ni Duterte, sapagkat una ay pumayag na ang pamunuan ng Manila Water at Maynilad na hindi na nila itutuloy at igigiit pa ang desisyon ng PCA.

Ikalawa, inatras na rin nila ang umento sa babayarang tubig kada buwan simula Ene­ro na naunang pinayagan ng MWSS – RO.

Ikatlo, kinansela at pinawalang bisa ng pamunuan ng MWSS ang kontrata nito sa Maynila at Manila Water noong 2009 na palawigin hanggang 2037 ang kontrol ng dalawang kumpanya sa distribyusyon ng tubig sa kanilang mga kustomer.

At ikaapat, nagbuo na ang Department of Justice (DOJ) ng panel na mag-aaral, mag­rerebyu at magbabago sa kontrata ng pamahalaan sa Maynilad at Manila Water alinsunod sa direktiba ni Duterte.

Sinabihan ni Duterte si DOJ Secretary Menardo Guevarra na tiyaking walang nakasaad na mga probisyong “onerous” sa kontrata.

Ampatuan MassacreKatarungan sa Ampatuan Massacre

Disyembre 19, inilabas ni Quezon City Regional Trial Court Judge Jocelyn Solis – Reyes ang desisyon sa 57 counts ng murder charges na isinampa laban sa 198 tao sa pangunguna ng angkan ng Ampatuan sa Maguindanao dahil sa kanilang pagkakasangkot sa pagpatay sa 57 katao, 34  ay mga journalist (ngunit tinanggal ng huwes ang namatay ding mamamahayag na si Reynaldo Momay, sapagkat hindi natagpuan ang kanyang bangkay).

Sa 761-pahinang desisyon ni Solis – Reyes, 28 ang makukulong ng “reclusion perpetua” (habambuhay na pagkabilanggo na 40-taon ang katumabas ayon sa batas), pangunguna ng magkakapatid na Zaldy, Sajid at Andal Jr. Ampatuan.

Kasama rin ang kamag-anak nilang si Anwar Ampatuan Sr., Anwar Sajid “Datu Ulo” Ampatuan, Anwar “Datu Ipi” Ampatuan, Mohades Ampatuan at Misuari Ampatuan.

Labinglima ang makukulong mula anim hanggang 10 taon bilang “accessories” sa pagpatay ng 58 tao.

Umabot sa 54 ang nakalaya matapos  ipawalang sala ni Reyes dahil walang sapat na ebidensiyang nagdiin sa kanila sa kaso.

Batay sa rekord sa sala ni Reyes, 80 akusado ang malaya pa hanggang ngayon mula nang maganap ang Ampatuan Massacre noong Nobyembre 23, 2009, ilang buwan bago mag-eleksyon noong Mayo 2010.

Maraming tao at orga­nisasyon ang nagsabing na­naig ang katarungan sa naganap na masaker sa bayan ng Ampatuan sa Maguindanao, dahil 57 katao na kamihan ay mamamahayag, ang nabigyan ng hustisya dahil sa kawalan ng takot ni Judge Reyes na hatulan ng habambuhay na pagkabilanggo ang mga akusado, lalo na ang mga prinsipal na akusado na sina Zaldy, Sajid at Andal Jr.

Ngunit, hindi lahat masaya sa desisyon, sapagkat mayroong ilang kuwestyonableng desisyon tulad ng pagpapawalang sila ni Reyes kina Akmad “Tato” Ampatuan at Sajid Islam Ampatuan bagamat alam nila ang planong pagpatay, ngunit wala sa aktuwal na masaker.

Ipinahayag ni Esmael “Toto” Mangudadatu, asawa ng isa sa mga biktima ng masaker at kasalukuyang congressman sa 2nd district ng Maguindanao, na iaapila niya ang kaso ng dalawang Ampa­tuan na napawalang sala.

Subalit base sa batas, hindi na puwedeng maghain ng motion for reconsideration o iapela ang pagpapawalang sala sa kasong kriminal sapagkat iyon ay proteksyon na ng akusadong napawalang sala.

Ngunit, posible pa ring maisampa ang apila ng mga kamag-anak ng mga biktima kaugnay sa pagpapawalang-sala kung ito ay papanigan ng Office of the Solicitor General (OSG).

Sa nasabing desisyon ni Judge Reyes, napakahalagang mensahe na ipinakita nito na mayroong opisyal sa korte na hindi kayang patahimikin ng pera o matakot at umatras sa makapangyarihang mga politiko.

Pinatunayang mayroong huwes na kayang maglabas ng desisyong reclusion perpetua laban sa makuwarta at makapangyarihang angkan ng Ampatuan.

Bagamat, mayroong nakamit na katarungan laban sa karumal-dumal na krimen na isinagawa ng ilang miyembro ng angkan ng Ampatuan, hindi nangangahulugang tapos na ang politika ng personalidad, politika ng pera at kapangyarihan ng Ampatuan, sapagkat batay sa rekord sa Commission on Election (Comelec), mayroong 36 na mga Ampatuan ang nahalal sa iba’t ibang posisyon noong eleksyong 2019.

Napabalitang mayroong 597 bank accounts, 500 ektaryang lupain, 130 sasakyan, 420 mga baril at pribadong sundalo na daan-daan ang mga tauhan.

Hindi rin nangangahulugang wala nang magaganap na masaker bago maganap ang eleksyon.

Wala ring garantiya na ligtas na ang mga mamamahayag sa pagpatay at pananakot sa mga mayayaman at makapangyarihang tao sa bansa na walang alam na solusyon kundi patayin ang mga mamamahayag upang tuluyan nang manahimik.

SEA GAMES GOLDNanguna sa SEA Games

Sa 149 na gintong medalya, 118 na pilak at 121 tansong medalya, hinirang na numero uno ang Team Pilipinas sa Ika-30 taong South East Asian Games na isinagawa sa bansa mula Nobyembre 30 hanggang Disyembre 11.

Higit itong kahanga-hanga kumpara noong 2005 SEA Games kung saan host din ang ating bansa.

Sa nasabing palaro, numero uno rin ang Pilipinas matapos makakuha ng 113 ang nakuhang gintong medalya ng Pilipinas, 84 na pilak at 94 ang tansong medalya.

Ibig sabihin, patuloy ang paghusay at pag-angat ng kakayanan ng mga manlalarong Filipino.

Ang problema lang sa katatapos na SEA Games ay nabalot ito sa kontrobersiya dahilan upang imbestigahan ng Senado sa susunod na taon at titiyaking magigisa ang mga opisyal na may kinalaman  sa mga kaganapan sa pangunguna ni Speaker Alan Peter Ca­yetano, tagapangulo ng Philippine SEA Games Organizing Committee (PHISGOC).

Ang kontrobersiya ay magsisimula sa pagpapatayo ng National Government Administrative Center (NGAC) at dalawang sports events ng SEA Games sa New Clark City, Pampanga.

Ayon sa Bases Conversion Development Authority (BCDA), wala sa orihinal na plano ng MTD Capital Berhad ang konstruksiyon ng dalawang sports facilities na gagamitin sa SEA Games dahil ang pagtatayo  ng NGAC lamang ang plano ng MTD Capital Berhad.

Iginiit ng BCDA ang sports facilities kung saan pumayag ang MTD Capital Berhad.

Ngunit, literal na wala namang pera ang MTD Capital Berhad kaya sa mismong tulong ng BCDA napautang ang nasabing kumpanya ng P11 bilyon ng Development Bank of the Philippines (DBP) na ginamit nito sa pagpapagawa ng NGAC at dalawang sports venue para a SEA Games.

Umabot sa P8.51 bilyon ang nagastos ng MTD Capital Berhad.

Ang natitirang mahigit P2.5 bilyon ay tubo na ng MTD Capital Berhad matapos mabayaran ng BCDA ang P8.51 bilyon sa loob ng limang taon.            (Itutuloy)

Please follow and like us:
Read More

PAG-ASA

PINOY ABROAD

“BAGAMAN ako’y ­patayin niya, akin ding hihintayin siya: gayonma’y aking aalalayan ang ­aking mga lakad sa harap niya.” (Job 13:15)

 

HINDI laging mangyayari ang gusto natin sa buhay. Kung minsan, sa halip na ang mga pagpapalang ipinangako, nakikita natin ang mga problema. Kung minsan, sa halip na ang mga tagumpay na ginarantiyahan, nakikita natin ang pagkatalo. Ano ang dapat gawin ng isang mananampalataya sa gayong mga kalagayan? Dapat na ba tayong mag-give up? Dapat na tayong tumigil sa tungkulin na itinawag sa atin dahil sa karanasan natin sa pagkakataong ganito? After all, ang mga planong bagay ay hindi pa nawawala ayon sa mga plano; hindi pa nawala ang paraan na sinabi ng Diyos na kanilang patutunguhan. Ito ba’y panahon na dapat natin panatilihin and kabiguan sa ating puso?

Sa katunayan, may mga pagkakataon na parang wala nang pag-asa at hindi na tayo makabangon sa masamang pangyayari, kung saan tila walang posibilidad na ­makabangon. Kahit tayo ay malapit nang mamatay. Ano ang dapat gawin? Hindi na maniwala sa Diyos nang lubusan? Itigil ang pagkakaroon ng pananampalataya sa Kanya? Kung ang mga pangako ng Diyos ay walang kaganapan sa buhay na ito, ano pa ang kahulugan ng buhay? Kung hihingin natin ang kanyang presensya at hindi ito nagreresulta na konretong pahayag, ano pa ang punto ng paghahangad ng kanyang presensya?

Para sa mga taong mananampalataya, gayunman, wala ni isa sa mga opsiyon na magkaroon ng anomang tunay na kahulugan. Pagdating sa ­pananampalataya sa Diyos, ito ay isang panukala na lahat o wala. Wala nang ibang pagpipilian, walang alternatibo sa pananampalataya sa Diyos. Hindi tayo maaaring ­gumamit ng ibang ­opsyon dahil kilala  natin ang Diyos. Alam natin na sa kabila ng lahat ng bagay, siya ang interes natin sa puso. Alam natin na siya ay nasa ating panig. Kaya ang resulta nito ay hindi natin siya pwedeng i-give up!

Kaya, bagama’t tila walang pag-asa ang ­inaasam na tagumpay, kahit ang kamatayan ay kinakaharap, patuloy pa rin tayong nagtitiwala sa Diyos. Hindi para lang makakuha ng mga bagay para sa ating sarili. Hindi tayo lang para lang mabuhay at hindi mamatay. Pumapaloob tayo   dahil naniniwala tayo sa Diyos. Hindi natin matutulungan ang ating mga sarili. Gumawa tayo ng desisyon na susunod sa kanya at umasa sa kanya at hindi para talikdan siya. Hilahin man  tayo ng ­kamatayan,  pero patuloy tayong nagtitiwala tayo sa kanya na aakayin tayo  tungo sa tagumpay on the other side.

Ngayon, pagbulayan natin ang mga salita ni Job: “Bagaman papatayin niya ako, gayunman ay umaasa ako sa kanya.” Hindi natin  naranasan ang masamang karanasan ni Job,  subalit hindi siya nawalan ng pag-asa, he never gave up hope! There is always hope. There is always, therefore, hope for us! (PINOY ABROAD / GUILLER VALENCIA)

Please follow and like us:
Read More

SOBRANG TINDI NAMAN NI SPEAKER CAYETANO

BAKBAKAN NATIN

NAGDESISYON si Speaker Alan Peter Cayetano na mamahagi ng P150,000 Christmas bonus sa bawat regular na kawani ng Kamara de Representantes.

Ganyan kalaking ­halaga ang ibinigay ni Cayetano sa mga kawani ng Kamara upang tiyaking mas mataas ang Christmas bonus na kanyang ipinamigay kumpara noong si Gloria Macapagal-Arroyo ang pinuno ng mababang kapulungan ng Kongreso.

Umabot sa P110,000 ang ipinamahagi noon ni Arroyo.

Siyempre, tuwang-tuwa ang mga empleyado ng mababang kapulungan noong panahon ni Arroyo.

Masayang-masaya rin sila ngayong panahon ni Cayetano.

Kaso, maraming ­nagreklamo, sapagkat ang totoong natanggap nila ay P112,000. May bawas na P38,000 bilang withholding tax. Kahit binawasan ng buwis, napakalaking bonus pa rin ang P112,000.

Kung sisipatin at uunawaing mabuti, napakasama ng ginawa ni ­Cayetano sapagkat nagbigay siya ng mahigit sandaang libong pera sa mga kawani samantalang napakapalpak ng Kamara sa ilalim ng kanyang liderato.

Apat na panukalang batas lang ang naipasa ng Kamara ni Cayetano.

Ito ay ang mga panukalang batas sa pagpapaliban ng eleksyon ng barangay at Sangguniang Kabataan, pagbibigay legalidad sa Malasakit Center ni Senador Christopher Lawrence “Bong” Go, Standardization Law of  2019 at ang General Appropriations Act for 2020.

Sa apat, dalawa ang inaprubahan ni Pangulong Rodrigo Duterte. Ito ay ang tungkol sa pagpapaliban ng halalan at Malasakit Center.

Tinatapos pa ng Senado ang Standardization Law at ang GAA 2020 naman ay binubusisi at pinag-aaralan pa ni Duterte bago lagdaan upang malaman kung mayroong badyet na pagkukunan ng karagdagang perang maipapasok sa bank accounts ng mga senador at kongresista o wala.

Napakalinaw ng kapalpakan ng Kamara sa liderato ni Cayetano, ngunit hindi siya nahiya sa mamamayang Filipino na bigyan ng P150,000 ang mga regular na kawani ng mababang kapulungan.

Gusto bang ipamukha ni Cayetano na siya ang ‘pinakamagaling’ na speaker dahil namigay siya ng P150,000 kaya dapat lang siyang manatiling speaker hanggang Hunyo 30, 2022?!

Kung gayon, sobra namang tindi ni Ginoong Alan Peter Cayetano sa pagpapapogi gamit ang pera ng pamahalaan.

Pokaragat na ‘yan!

Ang isa pang nakasusuka sa ginawa ni ­Cayetano ay ipinakalat niya sa media ang balitang napakataas ng inangat niya sa sarbey ng Pulse Asia mula Disyembre 3 hanggang 8 kumpara sa sarbey noong Setyembre dahil sa napakagandang ginawa ng Kamara.

Idiniin pa sa balita na dinaig ni Cayetano sa laki ng kanyang puntos, sina Pangulong Duterte, Bise Presidente Ma. Leonora Robredo at Senate President Vicente Sotto III.

Ang mataas na marka ni Cayetano sa sarbey ay resulta ng pagiging numero uno ng Team Pilipinas sa katatapos na South East Asian Games.

Sa madaling salita, ang pagiging kampeon ng mga manlalarong Filipino ang nagbigay ng mataas na marka kay Cayetano sa sarbey na ginawa habang nagaganap ang SEA Games.

Hindi ang nagawa ng Kamara mula Hulyo hanggang Disyembre 2.

Kung Kamara ang paksa sa sarbey, sinong tao ang matutuwa sa apat na panukalang batas na ipinasa ng Kamara samantalang ang lahat ng ito ay walang kinalaman sa pagtaas ng sahod ng mga manggagawa, guro at mamamahayag?

Walang panukalang batas para sa interes at kagalingan ng mga magsasaka at mangingisda.

Ang mayroon ay panukalang batas na naglalaan ng P500,000,000 pondo para sa proyekto ng bawat isang kongresista sa kani-kanilang distrito, kabilang diyan ang distrito ng mag-asawang Speaker Alan Peter Cayetano at Rep. Ma. Laarni Cayetano sa Lungsod ng Taguig at Munisipalidad ng Pateros.

Ngayon, sabihin n’yo kung tama o maling ­sabihing sobrang tindi ni Cayetano.

oOo

Alam ko na kayong mga mambabasa ay higit na maraming nalalaman kaysa inyong lingkod.

Kaya tumawag o mag-text na sa 0998 – 565 – 0271. (BAKBAKAN NATIN / NELSON BADILLA)

Please follow and like us:
Read More