FAMILY FEUD: DALAGITA PINATAY SA LOOB NG BAHAY  

(NI JG TUMBADO)

PATAY ang isang 16-anyos na dalagita matapos pasukin at pagbabarilin sa loob ng bahay sa Iloilo City, Lunes ng gabi.

Isang tama ng bala sa katawan ang tumapos sa buhay ni Noemi Mana-ay habang ang hindi pa mabatid na mga suspek ay patuloy pang tinutukoy ng mga awtoridad.

Nabatid sa report kay Police Col. Martin Defensor Jr., Director ng Iloilo City Police Office (ICPO), nasa kusina ng bahay ang biktima sa Barangay Mandurriao nang pasukin at pagbabarilin ng mga salarin pasado alas 9 ng gabi ng Lunes.

Laking gulat umano ng ina nang matagpuan nito ang kanyang anak na nakahandusay sa sahig at may tama ng bala sa kanang balikat.

Nalagutan ng hininga ang biktima habang itinatakbo sa ospital.

Ayon naman kay Mandurriao Police precinct commander Major Marlon Valencia, sinisiyasat pa nila ang anggulong paghihiganti bilang motibo sa krimen.

Away ng angkan ang lumalabas sa imbestigasyon kaugnay ng pamamaril sa biktima.

Napag-alaman na kasalukuyang nakakulong ang ama ng biktima dahil nakapatay ito may tatlong taon na ang nakalilipas.

 

Please follow and like us:
Read More

APP VS TSUNAMI, INILUNSAD NG PHIVOLCS

(NI ABBY MENDOZA)

INILUNSAD ng Philippine Institute of Volcanology and Seismology (Phivolcs) ang isang website application na nagbibigay impormasyon sa tsunami risk.

Ang GeoAnalyticsPH ay isang app na isinagawa ng GeoRisk Philippines, isang website na nagbibigay ng summary reports sa tsunami exposure sa mga barangay, municipalities at mga probinsiya.

Ang GeoAnalyticsPH ay maaring makita sa  https://geoanalytics.www.georisk.gov.ph/

Ayon kay Mabelline Cahulogan, ng GeoRisk Philippines, ipinakikita ng app ang populasyon na tatamaan ng tsunami gayundin kung gaano kalaki ang parating na tsunami.

“The website application aims to be the central source of information for accurate and efficient hazard and risk assessment helping the local and national governments in disaster management,” ayon kay Cahulogan.

Makatutulong umano ang nasabing app lalo sa gobyerno para matukoy kung ano ang kailangang gawin sa harap na rin ng banta ng tsunami.

 

Please follow and like us:
Read More

29 EVACUEES NALASON SA DONASYON NA PAGKAIN

(NI JG TUMBADO)

NASA 29 indibidwal na pawang mga evacuees ng dalawang magkasunod na lindol sa Mindanao ang iniulat na nalason sa pagkaing rasyon na ipinamamahagi sa loob ng evacuation center sa Barangay Malabuan, Makilala sa Cotabato.

Ayon sa nakarating na ulat ng National Disaster Risk Reduction and Management Council (NDRRMC), nangyari ang food poisoning nitong ng Lunes, Nobyembre 4, sa nabanggit na lugar.

Lumalabas sa inisyal na imbestigasyon, kumain ng pananghalian ang mga evacuees ng ‘pastel’, uri ng pagkain na naglalaman ng manok at itlog.

Makalipas ang limang oras ay dito na nakaranas ng papanakit ng tiyan, pagkahilo, pagsusuka at bowel movement.

Agad dinala ng Regional Health Unit ng Department of Health ang mga apektadong evacuees sa magkakahiwalay na hospital sa Cotabato Provincial Hospital at Kidapawan City Hospital kung saan 10 sa 29 ay nananatili sa pagamutan.

Inaalam na ngayon ng mga awtoridad kung saan galing ang ipinamahaging pagkain sa evacuation center.

 

Please follow and like us:
Read More

DALAGITA, 9 PA, NASAKOTE SA MAKATI BUY BUST

arrested

(NI DAVE MEDINA)

NASAKOTE at naaresto ang 10 katao, kabilang ang isang menor de edad, sa pagsalakay na isinagawa ng mga operatiba makaraan ang buy bust operation ng pulisya sa Camia St., Bgy. Pembo, Makati City, Martes ng umaga.

Ayon kay Makati City Police Chief PCol. Rogelio Simon, lima sa mga naaresto ay mga babae at isa ang menor de edad.

Target aniya ng buy bust operation ang isang alyas Jayson pero naaktuhan sa lugar ang siyam pang suspek kaya matapos makabili ng droga ang poseur buyer ay agad silang inaresto ng mga operatiba.

Nakuha sa mga suspect ang 81 sachet ng shabu, dalawang ecstasy tablet, 2 kalibre .45, 18 piraso ng mga bala ng kalibre .45 pistola , 15 piraso ng bala ng kalibre .22 na baril , timbangan, toother, tactical bag, holster, 2 pouch at isang Toyota Avanza na may plate # NAV 5327.

Ayon sa pulisya, nagkakahalaga ng P350,000 ang nakuhang shabu at P3,000 halaga ng ecstasy tablet sa mga suspek.

Ang mga suspek ay kinilalang sina Niro Rabina alyas Niro, Allan Conception, alyas Allan, Raymond Manlapat, alyas Mon, Venzen Valeros, alyas Jeboy, Jayson Ongmanchi, alyas  Inchik, Beatrice Donioza, Rosa Donioza, Jennelyn Flores at Maria Ronela Evangelista,  alyas Myka ; at ang menor de edad na alyas Ann Nazario na nasa pangangalaga ng Women’s Desk sa City Social Welfare and Development Office.

Nakadetine ngayon ang siyam na suspek  sa himpilan ng pulisya habang inihahanda ang isasampang kasong paglabag sa RA 9165 sa mga ito.

 

Please follow and like us:
Read More

CONVOY NG RELIEF GOODS NAAKSIDENTE

accident12

(NI JG TUMBADO)

APAT na sasakyan na may kargang mga relief goods na nakatakda sanang magdala ng tulong sa mga nasalanta ng lindol sa Makilala, Cotabato ang nagkarambola sa gitna ng kalsada Lunes ng hapon.

Kabilang sa mga nasangkot sa aksidente ang dalawang pickup truck at dalawang van na bahagi ng convoy sa relief operations.

Ayon kay Cotabato City Police Office (CCPO) Chief Col. Portia Manalad, ang itinuturong dahilan ng nabanggit na aksidente ay ang biglaang paghinto ng isang kotse sa gitna ng national highway na sakop ng Barangay Bulatukan, patungong Davao City.

Huli na para makapagpreno ang mga nasangkot dahil bigla rin umanong huminto ang kotse na nasa kanilang harapan kaya nag resulta ito sa karambola.

Hindi naman na naplakahan ang kotse ng dahilan ng aksidente dahil mabilis din itong humarurot palayo sa lugar.

Please follow and like us:
Read More

LOLA TINAGA NG LOLO DAHIL SA TALONG

(NI ANNIE PINEDA)

HINDI inakala ng isang lola na dahil lamang sa kanyang tanim na talong ang magiging dahilan ng kanyang kamatayan makaraan pagtatagain ito ng kapitbahay na lolo na pinagbintangang nagnakaw ng mga bunga ng kanyang talong, iniulat kaninang umaga sa Cebu City.

Kinilala ang biktimang si Prisciano Baraclan 64, habang nadakip naman ang suspek na kinilalang si Magdaleno Ypanto, 60, at kapwa residente ng Sitio Acacia Barangay Tungkop, Minglanilla, Cebu .

Batay sa report ng pulisya, naganap ang insidente sa nasabing lugar nang sugurin umano ng biktima ang suspek sa bahay nito.

Lumabas sa imbestigasyon, nagalit umano ang biktima nang mawala ang mga bunga ng kanyang talong at wala ibang pinagdudahan kumuha kundi si Ypanto.

Dito, pumunta umano ang biktima sa bahay ng suspek at sinabihan ito at nanguha ng mga bunga ng talong. Sa galit ng suspek, kumuha ito ng itak at pinagtataga ang biktima na agad nitong ikinamatay.

Nakatakda naman sampahan ng kaukulang kaso laban sa suspek.

 

Please follow and like us:
Read More

WEDDING GOWN PERSONAL NA KUKUNIN NI SARAH L. SA EUROPE 

ANG GARA NI VINIA(NI VINIA VIVAR)

UMALIS patungong Europe si Sarah Lahbati para kunin ang kanyang wedding gown sa nalalapit nilang kasal ni Richard Gutierrez.

“Left for Europe to pick up my wedding dresses for a few days without my boys!  I’ll be gone for only more than a week but this will feel like a year to me  lol thank God for FaceTime!!!  I’m gonna miss you all so much,” ang caption ni Sarah sa kanyang IG post na larawan nilang mag-anak.

Ikakasal sina Sarah at Richard sa March, 2020 dito sa Pilipinas.

 

Please follow and like us:
Read More

MISIS, LOVERBOY, HULI SA AKTO NI MISTER

cebu city12

(NI ANNIE PINEDA)

KULUNGAN ang kinabagsakan ng isang misis at kanyang loverboy makaraan mahuli sila ng kanyang mister na nagtatalik sa loob ng isang lodging house, iniulat kaninang umaga sa Cebu City.

Kinilala ang mga suspek na 37-anyos, residente sa Brgy. Cadulawan , Cebu at kalaguyo nitong 31-anyos,  taga-Naga City.

Batay sa report ng Minglanilla Police Station, nahuli ang mga suspek sa loob ng lodging house sa Brgy. Calajoan, Minglanilla, Cebu.

Ayon sa mister, matagal na siyang kinukutuban na may ibang lalaking kinalolokohan ang kanyang misis kaya minonitor niya ang mga kilos nito.

Hanggang sa nasundan niya ang misis na pumasok sa isang lodging house kasama si Cervantes kaya humingi na ito ng tulong sa pulisya.

At pagdating ng mga pulis sa naturang lugar, dito sapilitang binuksan ang silid ng dalawa at naaktuhan nakahubo at nagtatalik.

Dinala naman sa himpilan ng pulisya ang mga suspek at sinampahan ng kaukulang kaso.

Nabatid, na may pitong anak ang mag-asawang Yunson.

Please follow and like us:
Read More

DEPRESSED NA PARAK, NAGBARIL

(NI JESSE KABEL)

DEAD on the spot ang isang kagawad ng Philippine National Police nang magbaril sa sarili  sa hallway ng isang hotel sa Catarman, Northern Samar.

Sa ulat ng Catarman Police Office, kinilala ang biktima na si Patrolman Willard Castillo, 27, nakadestino sa Northern Samar Police Provincial Office.

Ayon kay Pol. Maj. Eddie Esidera, Chief of Police ng Catarman Police Station, nag-check-in sa naturang hotel ang biktima kasama ang kanyang ama at nagpaalam ito na may bibilhin lamang sa labas.

Subalit ilang minuto ang nakalipas ay nagulantang ang mga tao sa hotel nang biglang umalingawngaw ang isang malakas na putok mula sa pasilyo.

Nang siyasatin kung saan nagmula ang putok ay tumambad sa mga hotel staff ang biktima na  butas ang kanang sentido.

Sinasabing bago ang insidente ay na-diagnose na may depresyon ang biktima at posibleng ito ang nagtulak para mag suicide.

Sa inisyal na pagsisiysat ay walang nakikitang foul play ang mga otoridad sa insidente subalit patuloy umano ang kanilang imbestigasyon upang matiyak na isa nga itong kaso ng suicide.

Please follow and like us:
Read More

MAY TEMBLOR PA SI GONG YOO KAY ANNE CURTIS

ANG GARA NI VINIA(NI VINIA VIVAR)

MAY hang-over pa si Anne Curtis ng memorable trip niya sa Seoul, South Korea last week kung saan ay na-meet nga niya ang kanyang favorite South Korean actor na si Gong Yoo sa Louis Vuitton event.

Pagpasok niya sa It’s Showtime last Monday ay ito agad ang napag-usapan nila at nagtititili pa rin si Anne sa sobrang saya.

“Ang sayaaahhh!” tili niya nang tanungin ni Vice Ganda kung kumusta ang Haloween niya.

“Sobra akong saya as in. As in! Na-meet ko na kasi si Gong Yoo in the flesh!” tuwang-tuwa pang sabi ni Anne.

Naintindihan naman ng It’s Showtime family niya ang happiness niya at sabi nga ni Teddy Corpuz, napakatagal daw ang naging journey ni Anne before finally meeting her idol.

Matatandaan nga ring sumama pa si Anne kay Kim Atienza sa Korea last year nang interbyuhin nito si Gong Yoo pero bigo siyang makita that time ang Train to Busan actor.

Sabi ni Kuya Kim, “nagpanggap pa ‘yang staff ng Matang Lawin para makita si Gong Yoo.”

Kaya sabi ni Anne, “so eto na talaga, as in ‘yung moment. Alam mo ‘yung pagka-faney ko talaga, pinigilan ko.”

‘Yung pagkatinis ng boses niya ay kinontrol daw niya at binababan lang niya ang pagsasalita habang kausap niya si Gong Yoo.

Ang sabi raw niya kay Gong Yoo, “hello, it’s so nice to meet you. I’m from the Philippines and I’m a huge fan. Can I take a photo?”

Strict talaga ang mga Korean artists sa pagpapakuha ng photo pero ani Anne, super-bait ni Gong Yoo na pumayag talaga sa kanya na magpa-picture sila.

“Siguro kasi, it was a very intimate gathering,” sambit pa Anne.

“Maraming maraming salamat, Louis Vuitton Philippines for that experience. Na-meet ko si Gong Yoo at maraming mga celebrities, Alicia Vikander, si Chloe (Grace Moretz), they were all there. So super-saya. Sumunod pa ‘yung asawa ko (Erwan Heussaff),” sey pa ni Anne.

 

Please follow and like us:
Read More

81-ANYOS KUBRADOR NG STL PATAY SA VAN

accident12

(NI JUN V. TRINIDAD)

QUEZON – Todas ang isang 81-anyos na lalaking kubrador ng Small Town Lottery (STL) matapos aksidenteng mabangga ng humaharurot na van sa Maharlika Highway sakop ng bayan ng Atimonan, sa lalawigang ito noong Lunes.

Sa report ng Atimonan police station, kinilala ang biktima na si Rolando Montejo Sr., residente ng Barangay Tagbakin.

Tumatawid ang biktima sa highway sakop ng nasabing barangay, bandang alas-6:20 ng gabi habang nangongolekta ng taya sa STL nang salpukin ito ng humahagibis na Toyota Hi-ace Commuter van na minamaneho ni Robert Dosdo, 42.

Tumilapon ang biktima sa lakas ng pagkakabangga at nagtamo ito ng grabeng pinsala sa katawan.

Isinugod sa Doña Marta Hospital sa kabayanan ang biktima subalit hindi na umabot nang buhay sanhi ng malubhang kalagayan.

Nakakulong ang tsuper ng van sa Atimonan police jail.

 

Please follow and like us:
Read More

CLAUDINE HANDA SA DEMANDA NI ATE MARJORIE 

pwede ed deleon(NI ED DE LEON)

NATUWA naman kami nang makita namin ang picture ng magkapatid na Gretchen at Claudine Barretto, kasama ang kanilang inang si Inday Barretto na kasama niya sa isang lunch,  kasama rin ang kanilang mga kaibigan. Ang nakatawag ng aming pansin, isa sa mga kasama nila sa picture ay ang paring si Fernando Suarez, na pinasalamatan pa nila dahil sa kanyang mga panalangin.

Si Suarez ba ang bagong spiritual adviser ng magkapatid na Barretto? Ano ang malay ninyo, baka nga isang spiritual adviser ang kailangan para matahimik ang kanilang pamilya.

Iyang si Fernando Suarez ay isang paring Pilipino, pero na-ordenan bilang pari sa Canada. Nang mag-desisyon siyang bumalik sa Pilipinas, at nagpakilalang isang ‘healing priest’ marami  ang naging tagasunod niya hanggang sa magkaroon din nga siya ng problema na umabot sa hierarchy ng mga obispo sa Pilipinas, kaya hindi na  ninyo siya nakikitang nagmi-misa sa telebisyon o sa mga lugar na pampubliko kagaya noong dati.

Iyan namang si Gretchen, ang natatandaan namin sumali siya sa isang born again group. Pero kung ang napili na nga nilang adviser ni Claudine ay si Suarez, choice nila iyon.

Tungkol naman sa bantang demanda ni Marjorie laban kay Claudine, hindi mismo ang aktres ang sumagot kundi isang abugado niya na nagsabing nakahanda naman sila sa kung ano mang kasong isasampa ni Marjorie sa korte.

Ang sinasabi ni Marjorie, kakampi niya ang lahat ng iba nilang kapatid. Tiyak na magkakampi sina Claudine at Gretchen. Ang tanong kanino nga ba papanig si Inday Barretto? Kung ano man ang magiging statement ni Inday Barretto talaga, iyon ang magiging deciding factor ngayon.

BOW KAMI KAY ANGEL…

ACTOR NAGPAHATID NG MILYONES WORTH OF COOKED FOOD SA EARTHQUAKE VICTIMS

Believe talaga kami sa ginawa ni Angel Locsin na nagpunta mismo sa Davao Chapter ng Philippine Red Cross, doon na bumili ng mga kailangang ipamigay na relief goods para sa mga biktima ng lindol, na siyang pinaka practical kasi nga hindi na kailangan ng mahabang delivery, nandoon na mismo sila sa site kung saan iyon kailangan. At kasama ng Red Cross, ipinamahagi ang tulong na ni hindi binabanggit ang kanyang pangalan.

Pero hindi lang si Angel ang ganyan. Isang actor, na ayaw ipabanggit ang kanyang ginawa, ang tumawag sa isang food chain sa Cotabato at Davao, para mamahagi ng luto nang pagkain, dahil alam niya mahihirapan din ang mga evacuees na humanap pa ng mapaglulutuan. Milyong piso din ang halaga noon at hindi nababanggit ang kanyang pangalan. Hindi ba nakakatuwa iyan kaysa sa mga pulitikong isang multi cab na goods lang ang ipinadala nakabandera na ang pangalan, ang ibinibigay naman ay hinihingi rin sa iba?

AVAILABLE SA FLESH MARKET NA NAMAN SI MATINEE IDOL

Tito KC, “available na naman siya”, kasi matagal nang walang kinikita si matinee idol. Ngayon lang siya ulit nagkaroon ng project, at hindi pa nagsisimula. Natural wala pa siyang pay. Siyempre nahihiya rin naman siya sa girlfriend niyang siya pang nagsusustento sa kanya nang halos isang taon na.

Kaya si matinee idol, lumapit na naman sa isang friend para gawin siyang “available” sa lahat ng friends na naghahanap sa kanya. Kaya lang mukhang hindi na siya ganoon ka-exciting ngayon para sa crowd na iyon. Kasi ang tingin sa kanya, hindi na bagets. Isang taon na nga naman iyang nakikipag-live in eh fresh pa bang masasabi iyan?

 

Please follow and like us:
Read More

HOTSILOG CON SHABU

arrestwomen12

(NI KIKO CUETO)

TIMBOG ang isang babae na dadalaw sana sa kaibigan na nakapiit  sa Fairview Police Station, nang tangkaing magpuslit ng ‘hotsilog’ na may nakapaloob na hinihinalang shabu.

Napag-alaman na ang hinihinalang shabu ay nasa ilalim ng kanin, na may kasamang hotdog at itlog.

Nakalagay ang mga droga sa sachet.

Tiyempo naman na nabulilyaso ang modus operandi ng 27-taong gulang na babae nang magkamali pa ang jail guard at pabaliktad na nabuksan ang styro.

“Nagpupumilit siyang bumisita at magbigay ng pagkain kaya nagduda na rin kami,” ani Police Lt. Rosendo Magsipoc ng Fairview Police Station.

Itinanggi naman ng suspek na sa kanya ang droga. Napag-utusan lang umano siya ng kaanak ng kaibigan.

“‘Di akin ‘yan. Wala ako alam,” aniya.

Isang linggo nang nakakulong ang kaibigan ng babae dahil din sa kasong droga.

Sasampahan ang babae ng kasong paglabag sa Republic Act 9165 o Comprehensive Dangerous Drugs Act of 2002.

 

Please follow and like us:
Read More

REYES SIBLINGS HAHARUROT

(NI DENNIS INIGO)

UMANGKAS pa kayo!

Ito hamon ng magkapatid na sina Quiana at Wenson Reyes na ngayon ay umuukit na ng kanilang pangalan sa larangan ng isport na motorcross.

Ngunit kakaiba ang magkapatid na sina Quiana at Wenson,  na sa kanilang murang edad ay taglay na ang walang takot,  palaban at determinadong pusong mandirigma ng mga beteranong atletang Filipino.

Mapanganib ang isport na motocross ngunit hindi ito alintana ng 15-anyos na si Quiana (female category) at 13-anyos na si Wenson (male).

Hindi kinakikitaan ng kaba ang magkapatid na matapang na sinagot ang lahat ng mga ibinatong tanong ng sportswriters sa ika-46 edisyon ng “Usapang Sports” ng Tabloids Organization in Philippine Sports (TOPS) sa National Press Club (NPC) sa Intramuros, Manila.

“Exciting po talaga itong motocross kaya gusto po namin itong magkapatid, ” sabi ni Quiana na isang mag-aaral sa St. Paul College sa Bocaue,  Bulacan.

“Gusto ko pong tularan ang magagaling na female riders po natin  gaya po nina ate Pia Gabriel at ate Jasmine Jao po,  ang gagaling po nila. Gusto ko pong mapabilang sa kanilang kahusayan, ” ani Quiana, na edukasyon pa rin ang No.1 priority katulad ng kanyang kapatid na si Wenson na nag-aaral din sa SPC.

” Kapag weekdays po,  kailangan aral po kaming mabuti at kapag weekends po,  tutok naman po sa motocross, ” susog ni Wenson, alinsunod sa mga payo ng kanilang mga magulang  partikular ng kanilang ama na si Sonny Reyes na isa sa tumatayong coach ng magkapatid.

Si Wenson ang kasalukuyang pambato ng Pilipinas sa 85cc division.

“Nagpapatuloy po ang aming ensayo at ito po ay aming gagawin para matupad po namin ang aming mga pangarap,  ang tagumpay po namin at tagumpay po na maibibigay naming magkapatid sa ating bansa, ” simple ngunit puno ng katapatang sabi ni Wenson sa weekly sports forum na suportado ng Philippine Sports Commission,  National Press Club,  PAGCOR at Community Basketball Association ni founder director-actor Carlo Maceda.

Sina Quiana at Wenson ay muling haharurot sa napakadelikadong isport  bilang pambato ng Pilipinas sa NAMSSA National Motocross Championship sa Speedworld Motocross Circuit sa SM Bicutan sa Nobyembre 10, at sa FIM Asia Supercross Championship sa Nobyembre 24.

“Kaya po nating manalo!” Kumpiyansang sabi ng father-coach ng magkapatid na si Sonny Reyes. “Talagang desidido po silang makipagsabayan sa motocross, kaya po todo suporta kami sa kanilang mahal na sport. Pero siyempre po mag-aral muna silang mabuti.”

 

Please follow and like us:
Read More

P36-M SHABU NASABAT SA PASAY CITY

(NI KOI HIPOLITO/PHOTO BY JOVEN ORTEGA)

AABOT sa anim na kilo ng mga pinaghihinalaang shabu na nagkakahalaga ng hindi bababa sa P36 milyon ang nakumpiska sa dalawang big time drug pusher ng mga operatiba ng Philipphine Drug Enforcement Group (PDEG) sa buy bust sa Roxas Blvd.Baclaran ng Pasay City.

Kinilala ang suspek na target ng operasyon na si Emerson Fernandez at isang hindi pa kilalang suspek.

Batay sa ulat, nakipagtransaksyon ang isang pulis na nagpanggap na buyer sa mga suspek para bumili ng iligal na droga at nagkasundo na magtagpo sa nasabing lugar, Lunes ng gabi.

Nang magpositibo ang bentahan ng droga ay agad inaresto ang mga suspek at nabawi ng otoridad ang 47 plastic packs na may laman ng hinihinalang shabu at isang kulay puting Toyota Camry (XAF 784).

Mahaharap ngayon ang mga suspek sa paglabag sa violation of Sec.5 at 11 ng RA 9165 o Comprehensive Laws on Dangerous Drugs Act.

 

Please follow and like us:
Read More

MGA MAGSASAKA INIWAN, INILAGLAG NG NFA

MAGSASAKA-NFA

(Ni Nelson Badilla / Ikalawang Bahagi)

NITONG nakalipas na taon, mistulang sunud-sunod na ‘bagyo’ ang pumasok sa mga palayan at palengke sa mara­ming panig ng bansa, kabilang na ang Bulakan na siyang pinakamalapit sa Metro Manila na pinagkukunan ng bigas.

Napakataas ng presyo ng bigas bawat kilo, sapagkat kapos na kapos ang suplay ng bigas noong 2018, banggit  ng noon ay kalihim ng Department of Agriculture (DA) na si Emmanuel Piñol.

Ngunit, idiniin ni Piñol noong Setyembre ng nakalipas na taon na walang krisis sa bigas dahil walang “rice shor­tage.”

Aniya, ang problema lang ay walang bigas sa merkado na galing sa National Food Authority (NFA) at walang dumarating na mga bigas mula sa ibang bansa.

Ibig sabihin, ang inaa­bangan ng DA noong nakalipas na taon ay bigas na manggagaling sa ibang bansa, sapagkat wala nang mailalabas na bigas ang NFA sa mga palengke.

Ang suliraning ito ay binigyan ng “espekulasyon” ng publiko, kaya malaki ang itinaas ng presyo ng bigas, giit noon ni Piñol.

“We have no rice shortage, but there is admittedly a spike in the price of rice in the market because of speculation dahil nga nawala ang NFA rice sa merkado nang mahaba-habang panahon. Na-delay din ‘yung pagdating ng imported rice,” banggit ni Piñol.

Ang presyo ng bigas noong 2018 ay P50.00 hanggang P60.00 o higit pa bawat kilo.

Dahil sa ganitong masamang sitwasyon ng presyo at suplay ng bigas, iwinawasiwas at iginigiit noon ni Piñol sa media na kailangang tanggalin na limitasyon sa pag-angkat ng bigas mula sa iba’t ibang bansa.

Ipinunto ni Piñol noong Agosto 2018 na mareresolbahan na ang kakapusan ng suplay ng bigas dahil aangkat ang Filipinas ng dalawang milyong metriko toneladang bigas kapag ganap nang batas ang panukalang Rice Tariffication Act.

Sa ganitong karaming volume ng bigas, tinatayang aabot sa 40 porsiyento ang taripang makukolekta mula sa mga negosyante.

Ang halaga nito ay aabot sa US$400 milyon bawat taon o P21.6 bilyon.

Sa sobrang laki ng taripang ito, siguradong lalaki rin ang suporta ng DA sa sektor ng magsasaka, pagtitiyak ng dating kalihim.

Ganito ang pahayag ni Piñol: “Ililibre namin ang binhi ng mga magsasaka. Iyong magandang binhi [ang ibibigay ng DA sa mga magsasaka] para ma-doble ang kanilang produksyon, abono, and even subsidized farm machinery and equipment. If that happens then our farmer would be able to improve their productivity, increase the production and lower the cost of production.”

Sa madaling salita, pabor na pabor si Piñol sa panukalang Rice Tariffication Law (RTL).

Ang kilalang panguna­hing nagsusulong ng panukalang RTL ay si Senador Cynthia Villar.

Ngunit, maraming nag­duda kay Villar, sapagkat subdivision at condominium ang ilan sa negosyo ng pamilya Villar.

Sina Villar at Piñol ay kap­wa naniniwalang ang walang limitasyong pagdagsa ng bigas ng mga dayuhan sa Pilipinas ay siyang kagilagilalas na solusyon ng bansa upang magtuluy-tuloy nang hindi maubusan ng bigas sa mga palengke.

Batay sa rekord ng NFA, walang itinulong ang NFA upang dumami ang kanyang bigas na ibebenta sa palengke.

Malaki sanang tulong ang bigas na ibinebenta ng NFA, sapagkat ang presyo nito ay malayo sa presyo ng mga bigas na itinitinda ng mga negosyante.

Kaso, kulang na kulang ang suplay ng bigas ng NFA.

Ang lumabas sa pagsisiyasat at pag-aaral ng Commission on Audit (COA) ay inilaglag at iniwan ng NFA ang mga magsasakang Filipino.

Nadiskubre ng COA na ang P7 bilyong ibinigay ng pambansang pamahalaan sa NFA upang makabili ng mga bigas sa mga magsasakang Filipino ay ipinambayad ng NFA sa utang nito.

Nakasaad sa ulat ng COA na ang ginawa ng pamunuan ng NFA ay ginamit ang P7 bilyon sa pagbayad nito sa “maturing loans” nito sa Land Bank of the Philippines (LBP) at Development Bank of the Philippines (DBP).

Nadiskubre ng COA na ang NFA ay umutang ng P6.366 bilyon upang tustusan ang pag-angkat ng mga bigas. Ang P6.366 bilyon ay higit na mataas kaysa inutang ng NFA na P403.872 milyon noong 2017 upang magkaroon ng pondo para makabili ng inangkat na mga bigas.

Ang P7 bilyong inilaan ng pambansang pamahalaan ay siyang kongkretong palaman ng food security program ng NFA para sa taong 2018.

Sa pamamagitan ng pagbili ng NFA ng mga bigas mula sa mga magsasaka ay magiging matatag ang suplay ng bigas sa palengke at pati na ang presyo ng bigas.

Idiniin ng COA na ang desisyon ng pamunuan ng NFA ay tahasang paglabag sa Republic Act 10964 o General Appropriations Act of 2018.

Malinaw na nakasaad at ipinag-utos ng R.A. 10964 na ang pitong bilyong piso ay eks­klusibong gagamitin sa “rice buffer stocking” sa pamamagitan ng pagbili ng mga palay ng mga magsasaka.

Ayon sa R.A. 10964, ang tanging pagkakataon na hindi bibilhin ng NFA ang palay ng mga magsasakang Filipino ay kapag nahaharap sa kalamidad ang bansa o kapos sa produksiyon ng bigas ang bansa.

Kapag nangyari ito, aangkat ng bigas ang NFA, ngunit ito ay batay sa rekomindasyon ng NFA Council at ng pangulo ng bansa.

Please follow and like us:
Read More

HAMON SA MANILA WATER AT MAYNILAD

BAKBAKAN NATIN

IKALAWANG beses na ngayong taon na may problema sa tubig sa Metro Manila.

Kaso, ang nagaganap ngayong buwan ay mas masahol kaysa sa naunang problema, sapagkat Manila Water Company, Inc. at Maynilad Water Services, Inc. na ang sangkot dito.

Ibig sabihin, higit na maraming negosyante at residente ang apektado ng kakapusan ng suplay ng tubig.

Hindi tulad noong Pebrero hanggang Abril, mga kustomer lang ng Manila Water ang may problema sa tubig, kabilang na kami.

Sabi ng pamunuan ng Manila Water at Maynilad Water Services, Inc., ang problema sa tubig sa Metro Manila ay resulta ng limitadong pinagkukunan nila ng tubig.

Anila, hanggang nga­yon ay Angat Dam lang ang pinagkukunan nila ng tubig na kesyo kaunti lang ang naiipon dahil bihira namang umulan.

Ginagawa naman daw ng dalawang water concessionare ang lahat ng paraan upang matugunan ang pangangailangan ng milyun-milyon nilang kliyente.

Kaso, ang iwinawasiwas nilang dahilan ay hindi pa rin kaya ng dalawang kumpanya ang dami ng kailangang tubig ng mga negosyante at residente sa Metro Manila.

Kaya, ang solusyon ng dalawa ay magbawas ng distribyusyon ng tubig sa kanilang milyun-milyong kliyente.

Naniniwala ang pamunuan ng Manila Water at Maynilad na matagal pang magiging stable ang distribusyon ng tubig sa lahat ng kanilang kliyente sa Metro Manila.

Ang masama rito ay tumaas ang singil nila nitong nakalipas na buwan.

At nagpaplano pang sundan ito ng panibagong karagdagang singil matapos ilabas ng Korte Suprema ang pinal nitong desisyon hinggil sa paglabag sa Republic Act No. 9275 o Philippine Clean Water Act of 2004.

Sa desisyong inilabas nitong Oktubre, kinatigan ng Korte Suprema ang desisyon ng Court of Appeals (CA) na nag-uutos sa Manila Water at Maynilad na magbayad ng P921.5 milyon bawat isa dahil sa paglabag nila sa R.A. 9275.

Dahil sa nagbabad­yang tumaas uli ang sini­singil ng dalawang kum­panya sa kanilang mga kliyente, walang dudang karagdagang pahirap na naman ito sa kanilang mga kustomer.

Ang karagdagang singil ay pagpapakita ng sobrang kalupitan ng dalawang water concessionaire sa kanilang mga kustomer, sapagkat lumi­litaw na ipinapasa nila ang parusa ng Korte Suprema.

Kaya, ang magdurusa at mababawasan ng pera ay hindi ang Manila Water at Maynilad, kundi ang milyun-milyon nilang kustomer.

Habang nakarara­ting sa mamamayan ang masamang balitang ito, mahina naman ang tubig na dumarating sa kanilang bahay.

Hindi nagustuhan ni Pangulong Rodrigo Duterte ang panibagong masamang balitang ito tungkol sa tubig.

Kaya, tahasang binalaan ni Duterte ang pamunuan ng dalawang kumpanya na posibleng tapusin ang kontrata ng pamahalaan sa kanila kapag patuloy silang pumalpak.

Nagsimula ang operasyon ng Manila Water at Maynilad noong 1997 bilang solusyon sa “water crisis” noong panahon ni Fidel Ramos.

Mula noon hanggang ngayon, napakalaki na ang kinita ng dalawang higanteng kumpanya.

Kaya, ang babala ni Duterte ay malaking hamon sa kanila upang tapusin ang problema sa distribusyon ng tubig.

Kaya, huwag nilang gamiting palusot sa kanilang palpak na serbisyo ang limitadong tubig ng Angat Dam. (BAKBAKAN NATIN / NELSON BADILLA)

Please follow and like us:
Read More

LAHAT LABAN SA SMB

MAGPALAKAS at pigilan ang San Miguel Beer na maka-grandslam.

Ito ang misyon ng mga koponan sa kanilang patuloy na players-swapping, na pinapayagan naman ng PBA Commissioner’s Office.

“Naghahabol yung teams natin sa trade deadline.”

Ito ang pag-amin ni PBA Commissioner Willie Marcial kung bakit patuloy ang pagpapalit ng players ng mga team sa loob ng mga nakaraang linggo.

Ayon kay Marcial, hanggang November 8 ang trade deadline kaya’t ligal ang ginagawang players-swapping ng mga koponan.

Sa loob ng tatlong linggo, 14 na players ang nakasama sa trading block kabilang sina Christian Standhardinger, Chris Banchero, at pinakahuli si Bobby Ray Parks Jr.

Si Parks ang 2018 PBA Draft 2nd overall pick ng Blackwater Elite na napunta sa TNT KaTropa kapalit nina Don Trollano, Anthony Semerad, at future first round pick.

Patuloy ang pagpapalakas ng mga koponan bago ang 2019 PBA Governors’ Cup playoffs para pigilan ang Beermen sa kanilang inaasam na historic grand slam.

Hindi na maaaring magpalit ng players ang mga koponan na kasama sa semifinals at tanging teams na eliminated sa last conference ang pinapayagang makipag-trade para sa darating na 2019 PBA Draft sa December 8.

Please follow and like us:
Read More

NCRPO DIRECTOR SINAS ALAMIN MO

NIPIS

PAG-UPO sa puwesto ni NCRPO chief P/BGen. Debold Sinas mula sa Region 7, marami na kaagad ang hindi nakagusto sa kanyang ugali kaya’t may ilang pagkakataon na may mga nakabangga na kaagad siya dahil sa talim ng kanyang dila.

Unang nakabangga niya ay ang presidente ng NCRPO Press Club na si Lily Reyes na hindi kumibo sa ginawa niyang pambabastos nang tanggalan niya ng opisina kasama ang ilang miyembro ng media.

Bukod sa nais niyang ora-orada ang pag-alis na gawin ni Reyes at mga kasama ay halos agawin na niya ang susi ng nasabing tanggapan na ipinagkaloob ni dating NCRPO director Chief Supt. Joel Pagdilao at nang matalaga bilang kapalit sina Gen. Oscar Albayalde at P/MGen. Guillermo Eleazar ay hindi naman kinuha o binawi ang tanggapan na nasa 2nd Floor ng Kamuning Police Station.

Habang nakakatawa naman ang pahayag ni Gen. Sinas kaugnay sa mga pulis ng NCRPO na nakatalaga sa Bureau of Corrections (BuCor) kung saan nahulihan ang 16 sa mga ito na nagpupuslit ng mga kontrabando.

Simpleng pananakot lang naman ang ginawa ni Sinas na ipu-pull-out niya ang mga pulis na nakatalaga sa National Bilibid Prison kapag nagpatuloy ang pagturo sa mga pulis na ang mga ito ang nagpasok ng kontrabando.

Sana, inalam muna ni Sinas kung kanino galing ang utos na italaga ang mga pulis sa BuCor bago siya nagbitiw ng salita para hindi siya magmukhang katawa-tawa. Kaya ba niyang kontrahin ang kautusan ni Pangulong Rodrigo Duterte?

Eh kung hindi naman, eh makabubuting manahimik na lang siya. Sabagay, ang kalat kasi niya ay ibang tao ang naglilinis.

Katulad na lang ito nang pang-aaway niya kay Reyes na parang sinasabi niyang walang halaga sa kanya ang print media at tanging ang broadcast ang pinapahalagahan niya kaya nga kapag may press conference siya ay pawang taga telebisyon ang pinapatawagan niya.

Hindi niya batid na ang kalat na ginawa niya ay isang tauhan niya ang naglinis na siyang nakakaalam ng kalakaran sa Metro Manila. Nagmamalinis itong si Sinas pero ngayon pa lang ay naglulutangan na ang ilang mersenaryo niya na siyang nag-aayos ng ilang koleksyon o pagkakaperahan sa kanilang nasasakupan.

Baka akala ni Sinas, maitatago niya ang kanyang mga gagawing kababalag­han? Naku, Malabo yan sa sabaw ng pusit. Kahit anong gawin niyang tago, sisingaw at sisingaw iyan sapagkat matatalas ang pang-amoy ng mga mamamahayag.

Kung iyon ngang itinatago nilang “weekly protection money” mula sa mga Philippine Offshore Gaming Operators (POGO)  na milyon-mil­yon eh pumutok, iyon pa kayang plano pa lang nila  sa Metro Manila ngayon?

Malayo ang Cebu sa mga matatalim na mata ng mga mamamahayag sa Kamaynilaan pero nakarating sa Maynila ang balita, paano pa kaya kung nasa Maynila na sila kung saan naroroon din ang mga mamamahayag na handang bantayan sila 24-oras? (NIPIS / LEA BOTONES)

Please follow and like us:
Read More