EX-COP ITINUMBA SA SEMENTERYO 

(NI ANNIE PINEDA)

DUGUANG bumulagta sa sementeryo ang retiradong pulis matapos pagbabarilin ng mga hindi pa kilalang suspek nang dumalaw ang una sa puntod ng kaanak, sa Ilocos Sur.

Kinilala ang biktimang si Reynaldo Castro, 61, ng Barangay Baliw Laud, Sta. Maria, Ilocos Sur.

Batay sa report ng Ilocos Sur-PNP, dakong alas-2:50 Lunes ng hapon nang maganap ang insidente sa sementeryo sa Barangay Poblacion Sur, Sta. Maria, Ilocos Sur.

Lumabas sa imbestigasyon ng pulisya , nagtungo ang biktima sa sementeryo kasama ang dalawang trabahador nito para dalawin ang sumakabilang-buhay na kaanak.

Habang nakaupo ang biktima sa gilid sa kalsada,  bigla na lamang dumating ang mga suspek at pinagbabaril ang biktima na tinamaan sa iba’t ibang parte ng katawan .

Matapos ang pamamaril, tumakas ang mga suspek sa hindi malamang direksyon.

Dinala naman sa Ilocos Sur District Hospital- Narvacan, Ilocos Sur ang biktima pero sa daan pa lamang ay nalagutan na ito ng hininga.

 

Please follow and like us:
Read More

TEACHER PISAK ANG ULO SA TRUCK

accident121

(NI CHERK BALAGTAS)

PISAK ang ulo ng isang babaeng guro nang magulungan ng  truck habang angkas  ng  motorsiklo sa Lungsod ng Malabon, Lunes ng hapon.

Kinilala ang biktimang si Elsa May Enrique-Atega, 39, guro sa Maypajo High School at residente ng Block 39 Lot 18 Phase 2 Area 2, Kaunalaran Village, Lungsod ng Navotas, habang sugatan naman ang co-teacher niya na si Leo Cantilang, 31, ng Tindalo Street, Tondo, Lungsod ng Maynila, matapos tumilapon  sa minamanehong motorsiklo.

Agad namang nadakip ng mga awtoridad ang truck driver na si Jaynard Ibuyat, 32, driver ng International Harvester Tractor Head at trailer na may plakang TUE667 at residente ng Rolling Lane, Batasan Hills, Lungsod ng Quezon.
Sa ulat ng Malabon City Police, ganap umanong ala 1:30 ng hapon nang maganap ang insidente sa tapat ng Fishermall sa  C4 Road, Barangay Longos ng nasabing lungsod.

Kapwa binabaybay ng trailer truck at ng motorsiklo na minamaneho ni Cantilang at angkas si Atega ang eastward lane ng nasabing kalsada.

Ayon kay Ibuyat, iniwasan niya umano ang isang pampasaherong jeep na biglang huminto sa kanyang harapan ngunit pagkabig niya ng manibela ay doon niya nasagi ang motorsiklo na kinalululanan ng mga biktima dahilan upang tumilapon ang dalawa sa kalsada.

Doon na pumailalim sa truck si Atega at nagulungan ang kaniyang ulo na naging dahilan ng kanyang agarang kamatayan.

Dinakip ng mga tauhan ng Malabon City Police Community Precinct III si Ibuyat na nahaharap ngayon sa kasong Reckless Imprudence Resulting in Homicide, Physical Injury at Damage to Property.

Please follow and like us:
Read More

ABANTO SUSPENDIDO 

(NI ANN ENCARNACION)

NAGDESISYON si University Athletic Association ofthe Philippines (UAAP) Basketball Commissioner Jensen Ilagan na tuluyan nang suspindehin si Nick Abanto ng University of the East dahil sa “unsportmanlike foul kay William Navarro ng Ateneo.

Matapos ang mahabang pagrerebyu sa laro noong Oktubre 20 sa pagitan ng Ateneo at UE, nagdesisyon ang UAAP technical committee na palitan ng unsportsmanlike foul ang non-call foul laban kay Abanto na nangangahulugan ng one-game suspension.

At dahil dito, hindi makapaglalaro si Abanto sa darating na game ng UE kontra Far Eastern University sa Linggo, (Oktubre 27).

Nag-ugat ang lahat nang mag-agawan sa rebound sina Abanto at Navarro kung saan ay tinamaan ng braso ng UE player ang ulo ng Ateneo player. Sa lakas ng impact ay napahiga si Navarro at tuluyang inilabas sa game.

Walang itinawag na foul kay Abanto.

“Upon multiple reviews of the incident, wesaw that there was intent by Mr. Abanto to hit Mr. Navarro, causing him to falland eventually be carried off the playing court,” paliwanag ni Ilagan. “The action was unprovoked and his intentionto hurt was apparent. Therefore, an unsportsmanlike foul shall be assessedagainst him.”

Ayon sa Article 4.3 ng UAAP Basketball Rules,”The Commissioner has the power to impose additional penalties. This power may be exercised to non-calls but involve abhorrent acts in nature including, but not limited to, flagrant unsportsmanlike fouls, and conduct that involves dangerous and dirty tactics and supported by the official video.”

Dahil dito ay nanawagan si Ilagan sa lahat ng student-athletesna pag-isipan ang kanilang bawat aksiyon sa loob at labas ng court.

“We call on all student-athletes to always keep in mind the safety and welfare not just of their teammates but also their opponents. Though the spirit of sports is competition, the ultimate goal is to build comradery among everyone,” sabi pa ni Ilagan.

Please follow and like us:
Read More

MANILA FIRE: 2 VOLUNTEER SUGATAN; 200 PAMILYA APEKTADO

(NI HARVEY PEREZ/PHOTO BY KIER CRUZ)

NAGTAMO ng mga sugat at paso ang dalawang fire volunteer habang may 100 bahay yari sa light materials ang natupok sa nasunog na tatlong palapag na residential house, Martes ng tanghali sa Quiricada, Sta.Cruz, Maynila.

Nabatid  kay FSupt. Rodolfo Denaga, ng Manila Bureau of Fire Protection, alas  11:50 ng tanghali  naganap ang sunog sa bahay ni Jennifer Garcia,  sa  1606 Quiricada St.  Sta.Cruz, Maynila.

Ang sunog ay umabot sa Task Force Bravo at idineklarang fire control ala 1:36 ng hapon.

Mahigit 200 pamilya ang nawalan ng tahanan.

Hindi pa nabatid ang pangalan ng dalawang fire volunteer na isinugod sa pagamutan nang mabagsakan ng bubungan habang tumutupad sa tungkulin.

Ang natupok na residential houses ay nasa likuran lamang ng Manila Central Fire Station at nasa harap din ng San Lazaro Hospital, malapit sa Manila Health Center.

Patuloy naman iniimbestigahan   ng arson  ang sanhi ng sunog at halaga ng mga nasunog na ari-arian.

Please follow and like us:
Read More

BATA EDAD 2-14, NASAGIP SA ONLINE PORN

(NI ROSE PULGAR)

NASAGIP ang pitong bata na umanoy ibinubugaw sa online at isang babae at lakaki ang naaresto makaraang salakayin ng pinagsanib na puwersa ng mga tauhan ng Taguig City Police at PNP-Anti Trafficking Person Division ang isang bahay sa Barangay Tuktukan, Taguig City, Lunes ng gabi.

Base sa isinumiteng report ni Police Col. Alexander Santos, hepe  ng Taguig City Police kinilala ang dalawang nadakip na suspect na sina Rowena Cayanan Penasales, 32, ng Mendiola St. Barangay  Tuktukan, at Edgar  Castaneda Jimenez, 42, ng no. 721 Daang Hari St. Taguig City.

Base sa report, bandang alas-12:15 ng gabi nang magsagawa ng entrapment and rescue operation ang mga awtoridad sa bahay ni Cayanan sa  Mendiola St. Barangay Tuktukan nang nasabing lungsod.

Ayon kay Police Col. Maria Sheila Portento, ng PNP- Women and Children Protection Center, apat na babae at tatlong lalaki na may edad na 2 hanggang 14 ang mga biktima na kanilang nasagip.

Aniya isa sa mga biktima ay anak umano ni Cayanan habang ang iba ay mga pamangkin nito.

Ibinebenta umano ang mga biktima sa mga parokyanong pedophile sa ibang bansa.

“Mayroong person of interest na Pilipino na kung saan nakikipagpalitan o nag-aalok ng mga bata sa online. Mayroon kaming taong nag-undercover online at true enough, natunton namin ito ,” ani  Police Col Portento.

Sinabi pa ng opisyal na  unang nagbigay ng impormasyon ang United States Department of Homeland Security sa PNP nang ma-trace nila na sa Pilipinas nanggagaling ang ilang maselang larawan ng mga batang Pinoy na hawak ng mga pedophile.

Kasalukuyan naman nakakulong ang dalawang suspect habang ang mga paslit na kanilang na rescue ay dadalhin naman sa tanggapan ng Department of Social Welfare and Development (DSWD).

Sasampahan ng kasong paglabag sa Republic Act 9108 o anti  trafficking in person act of 2012 , RA 7610 o anti child abuse act  at RA 9775  anti chold pornography act sa Taguig City Prosecutor’s Office ang mga suspect.

Please follow and like us:
Read More

CHINESE NATIONAL NATAGPUANG PATAY SA BUBONG NG HOTEL

(NI HARVEY PEREZ)

NASAWI ang isang Chinese national na hinihinalang tumalon mula sa ika-20 palapag  ng  tinutuluyang condominium at bumagsak sa bubungan ng katabing hotel ,Lunes ng hatinggabi sa Ermita,Maynila.

Inaalam ng   Manila Police District-homicide section kung nagpakamatay o itinulak ang  biktimang si Wang Haoran, 31, nanunuluyan sa Unit 2007 Birch Tower sa 1622 J. Bocobo Street, Malate.

Nabatid na bago nakitang patay ang biktima bubungan ng Eurotel hotel , alas 11:50 ng hatinggabi,nakita pa ang biktima sa reception area ng tinutuluyan niyang condominium, alas 11:00 ng gabi.

Ilang  concerned citizen umano ang nakakita sa  biktima sa  bubong ng Eurotel  sa Pedro Gil Street, sa Ermita, at katabi lamang ng kanyang tinutuluyang condo building.

Isinugod  pa sa Philippine General Hospital (PGH) ang biktima sa pag-asang baka maisalba pa pero patay na nang dumating sa pagamutan.

 

Please follow and like us:
Read More

CHINESE NANDAKMA NG DIBDIB NG DALAGITA, KULONG

(NI ROSE FULGAR)

SA kulungan ang bagsak ng isang Chinese national matapos dakmain ang dibdib at paghahalikan ang isang dalagita sa isang kalsada sa San Isidro, Martes ng madaling araw.

Kinilala ang suspect na si Xuesong Peng, 26,binata, empleyado ng stock finances at nakatira sa San Isidro St., Carmencita, Barangay Talon 3, ng naturang lungsod.

Sa ulat ng Las Pinas City Police, dakong alas-2:30 ng madaling araw nang maganap ang insidete sa San Isidro St., sa Barangay Talon 3.

Kasalukuyan nakatayo sa nasabing lugar ang biktima na itinago sa pangalang ‘Grace’, 17 nang bigla umanong paghahalikan ng suspect at hawakan ang kanyang dibdib. Pumalag ang biktima at saka nagsumbong sa kanyang guardian na si Joylyn Vender, 50, na siyang nagsama sa kanya  sa barangay upang ireport ang nangyari.

Inaresto ng mga barangay tanod ng Barangay Talon 3 ang suspect saka isinuko sa Women’s and Children’s Desk ng Las Pinas City Police.

Mariin namang itinanggi ng suspect ang sumbong ng biktima laban sa kanya.

Nagpapatuloy ang imbestigasyon ng pulisya para maberepika ang sumbong ng biktima at mabatid kung ano ang punu’t dulo ng insidente habang inihahanda ang pagsasampa ng kasong acts of lasciviousness laban sa suspect na dayuhan.

Please follow and like us:
Read More

MARJORIE DAHILAN NG ATAKE SA PUSO NG KANILANG AMA?

(NI VINIA VIVAR)

SI Gretchen Barretto naman ay kasalukuyang nasa San Francisco ngayon para makasama ang nag-iisang anak na si Dominique Cojuangco na kasalukuyang naka-base roon.

Pero bago umalis ay nagiwan muna siya sa Pinas ng isa pang pasabog kung saan ay ibinunyag niyang ang kapatid niyang si Marjorie Barretto ang dahilan kung bakit inatake ang kanilang ama.

May nagkomento kasing netizen na hindi raw niya napansin ang Barretto matriarch na si Inday Barretto sa birthday celebration ng kanilang ama noong Setyembre.

Komento ng netizen, “pansin ko lang last bday ni daddy Mike wala si Mommy Inday. Hinahanap ko siya sa post ni Marjorie.”

Sagot ni Gretchen, “because Marjorie did not(read: not) invite my mom to the gathering & thats what caused my dad’s attack.”

Bukod dito ay nag-post din si Greta ng short video sa lamay ng kanilang ama noong dumalaw siya noong October 16 kung saan ay naroroon din ang Pangulong Rodrigo Duterte.

Caption ni Greta sa video, “Watch carefully Marjorie & Nicole is the one beside her.the day of the wake . Watch EX MAYOR ECHIVERRI, feeling part of the Barretto family . Watch marj itch-very Fuming mad  the relatives were trying to calm her from her insanity  now you KNOW WHY I DID NOT GO TO VISIT MY DAD IN HIS LAST DAYS .( Marjorie will have an outburst in the ICU.”

Sa kanyang Instagram Story ay nag-post naman ng larawan si Greta ng pamilya ni Atong Ang.

“Here is Mr. Atong and Mrs. Iris Ang & family. This family happens to be Our family too. We will protect our happy life Nicole. We love each other dearly.”

Nasa IG Story rin ni Greta ang mga screenshots ng pangba-bash ng mga netizens kay Marjorie, pati na sa anak nitong si Julia Barreto. Karamihan sa mga ito ay sinasabing hindi na dapat nakisali pa ang young actress sa away ng magkakapatid at dapat daw ay tumanaw ng utang na loob sa kanyang tita Gretchen sa mga tulong na naibigay nito noon sa kanilang pamilya.

Nag-post din ng screenshot si Greta ng statement ni Atong Ang na nilabas sa media at ang caption niya naman, “there’s a big difference between a girlfriend & merely (past time) na nilalako ng nanay.”

May post din si Greta na binabantaan si Nicole na ie-expose ang katotohanan kung bakit sila natanggal ng ina nito sa kumpanya ni Atong.

“Your mother & your services fired over 4 yrs ago. Would you want me to expose the reasons for it or would you care to tell your twisted truth, Nicole aramos Barretto Magno,” ang isa pang caption ni Greta.

 

Please follow and like us:
Read More

BINATILYO NATUSOK NG BAKAL SA LEEG

crime12

(NI ANNIE PINEDA)

MISTULANG na-barbeque ang isang binatilyo makaraan matusok ang leeg nito sa bakal na nakaparadang kuliglig nang kunin ang bola habang naglalaro ng basketball, iniulat kaninang umaga sa lalawigan ng Pangasinan.

Kinilala ang biktimang si John Imbat, 15, grade 9 student, ng Brgy. Imbalbalatong, Pozorrubio Pangasinan.

Batay sa report ng Pozorrubio Police Station, nagba-basketball sa lugar, kasama ang mga kaibigan, nang mapadpad ang bola sa nakaparadang kuliglig, dahilan para habulin niya ito.

Dahil sa pagmamadali hindi na napansin ng biktima ang bakal na nakausli sa kuliglig na may 3 pulgada ang haba.

Pag-angat ng ulo nito ay tumusok ang bakal ng kanyang leeg dahilan para agad itong isugod sa ospital pero idineklara na ring patay ng mga doktor.

Nagpaabot naman ng tulong pinansyal sa pamilya ng biktima ang may-ari ng kuliglig.

 

Please follow and like us:
Read More

BALIK-PBA NI ABUEVA: A LONG PROCESS — MARCIAL

NATUTUWA man si PBA commissioner Willie Marcial sa public apology video na pinost sa kanyang Instagram account ni Phoenix forward Calvin Abueva, inamin nito na matatagalan pa bago tuluyang alisin ang indefinite ban na ipinataw sa kanya.

“What he did was good. We have been talking, but the process (of lifting the suspension) is still long,” ani Marcial.
“If he’ll be able to do what we talked about, and I gave him a list of things to do, if he can do all those, then we’ll talk again,” dagdag nito.

Ayon kay Marcial, hindi nakasalalay sa PBA Board of Governors ang pag-alis ng ban kay Abueva  ngunit kailangan pa rin niya ang opinyon ng mga ito. “Depends on their comments since they are all my bosses.”

Maging si Phoenix coach Louie Alas ay masaya na tanggap na rin ni Abueva ang kanyang pagkakamali.

“Great for Calvin because before, he feels it wasn’t his fault. But now he’s learned to accept it (his mistakes),” sabi ni Alas sa ESPN5.

“I feel Calvin has started to mature and he’s willing to undergo the process. Now we can also see the light under the tunnel because before, there’s none since he was suspended indefinitely,” dagdag ng Phoenix coach na naniniwalang madalas ay nami-misunderstood lang ng mga tao si Abueva.

“If people only know Calvin, he’s such a good person. He’s rugged but he’s got a nice heart. Feeding the street kids and Calvin teaching what he knows about basketball, he’s been doing that since his days at San Sebastian. And he’s done that because Quiapo is very near San Sebastian,” pagtatanggol pa ni Alas kay Abueva.

 

Please follow and like us:
Read More

IT’S NOT MY BATTLE–JULIA BARRETTO 

ANG GARA NI VINIA(NI VINIA VIVAR)

BALIK- trabaho naman si Julia Barretto matapos ang pagyao ng kanyang lolong si Miguel Barreto. Last Monday ay dumalo siya sa story conference ng pagsasamahan nilang series ni Tony Labrusca sa iWant base sa mga larawang inilabas ng ABS-CBN sa social media.

Nakapanayam ng media ang young actress and of course ay napag-usapan ang tungkol sa controversy ng pamilya.

“I think it’s also nice if everybody would give the family the privacy and the respect to resolve their issues. Pero wala po kasi akong kinalaman diyan.

“Hindi ko po masasagot ‘yong mga tanong tungkol sa kanila kasi nga po it’s not my battle. Hindi ko po siya laban. I’ll be praying for them.

“Pero for now, my energy, my time, I would like to spend it on the blessings that I have been receiving. God has been so good,” pahayag ni Julia sa video interview na inilabas ng abs-cbn.com.

Nahingan din siya ng comment tungkol sa nangyari sa burol ng kanyang lolo at aniya, “’yong mga magkakapatid lang po ang makakasagot niyan. I cannot speak for them. Hindi ko po laban, eh. I don’t have the right to speak for any of them.”

When asked kung nasaktan nga ba niya ang isa niyang auntie, maikli niyang sagot, “wala pong katotohanan.”

 

Please follow and like us:
Read More

LALAKI BINIYAK NG KAINUMAN 

(NI ANNIE PINEDA)

BINIYAK ang isang lalaki ng kanyang kalugar habang nag-iinuman matapos umanong maungkat ang dati nilang away, Linggo ng gabi sa Capiz.

Kinilala ang biktimang si Marlon Pasco, 40, habang nadakip ang suspek na kinilalang si Jose Ronnie Calanza, 46, kapwa residente ng Poblacion Ilawod, Dumarao, Capiz.

Batay sa report ng pulisya, bago ang insidente, nag-iinuman pa ang suspek at biktima at nang malasing ay naungkat ang dati nilang alitan na nauwi sa mainitang pagtatalo.

Dito, kumuha ng itak ang suspek na may habang 18 pulgada at pinagtataga ang biktima sa iba’t ibang parte ng katawan .

Agad naman dinala sa ospital ang biktima ngunit hindi na umabot nang buhay.

Sumuko sa pulisya ang suspek na nahaharap sa kasong pagpatay.

 

 

Please follow and like us:
Read More

MISIS NAPUNDI; BABAERONG MISTER PINATAY

crime

(NI ANNIE PINEDA)

PINUTOL na ng isang misis ang umano’y pagiging babaero ng kanyang mister dahilan para ataduhin niya ito ng saksak matapos ang pagtatalo, Linggo ng gabi sa Cauayan City.

Kinilala ang biktimang si Rolly Bautista, 42, habang kusa naman sumuko sa pulisya ang suspek at misis nitong si Lea Bautista, 42, at kapwa residente ng Brgy. Bagong Sikat, San Mateo, Isabela.

Batay sa report ng Isabela-PNP, dakong alas 6:00 ng gabi ng Linggo nang maganap ang insidente sa loob ng bahay ng mag-asawa matapos ang pagtatalo.

Dito, kumuha ng patalim ang suspek at pinagsasaksak ang biktima sa iba’t ibang parte ng katawan na agad naman dinala sa ospital pero hindi na rin umabot pang buhay dahil sa dami ng saksak sa katawan.

Kusa naman sumuko sa pulisya ang suspek na ahaharap sa kasong parricide.

Patuloy naman ang imbestigasyon ng pulisya sa naturang insidente.

 

Please follow and like us:
Read More

MISIS KINATAY NI MISTER SA SELOS

(NI ANNIE PINEDA)

MINSAN pang napatunayam na walang mabuting dulot ang matinding selos makaraan pagsasaksakin hanggang sa mamatay ang isang misis ng kanyang mister, sa Cagayan de Oro City.

Kinilala ang biktimang si Jen Banaag Palin, 29, habang ang nadakip na suspek ay kinilalang si Ryan Palin, 30, kapwa residente ng Sitio Kilaa, Barangay Alga, Catarman, Camiguin.

Batay sa report ng pulisya, Linggo ng umaga nang madiskubre ng mga kaanak ang biktima sa bahay nito sa naliligo sariling dugo at tadtad ng saksak sa katawan habang tumakas ang mister.

Dinala pa sa ospital ang biktima pero dineklara na rin itong patay ng umatending doktor.

Bandang alas 6:30 ng gabi nagsagawa ng hot pursuit operation ang pulisya sa Cagayan de Oro City at nadakip ang suspek.

Nabatid, Sabado ng gabi narinig pang nagtatalo ang mag-asawa dahil nagseselos ang suspek sa hinalang may ibang lalaking kinalolokohan ang kanyang misis na nauwi sa pananaksak.

Sinampahan na ng kasong parricide ang suspek.

 

Please follow and like us:
Read More

PBA PAPASOK SA CHINA

(NI RAVENSON BIASON)

TATRABAHUHIN nina PBA Commissioner Willie Marcial at Board Chair Ricky Vargas na makapasok ang PBA sa China.

Ngayong araw (Martes) ay nakatakda silang tumungo sa Changsha para makipagpulong kay Mo Yanfei, presidente ng Hunan World Research Internet Company Limited, para sa posibleng pagsasaere ng PBA sa China.

Kaya naman masasabing, “NBA’s loss is PBA’s gain.”

Nagkataon kasi na nagkaroon ‘fallout’ sa pagitan ng China at ng NBA dahil sa kontrobersyal na tweet ni Houston Rockets team manager Daryl Morey na nakikisimpatya sa mga raliyista sa Hongkong.

Kasama rin sa PBA delegation sa China sina Barangay Ginebra board representative Alfrancis Chua, league marketing head Gelo Serrano, at Bong Sta. Maria ng Philippine Global Network, na joint subsidiary ng TV5 Network Inc. at Philippine Long Distance Company.

“Maganda ito kung sakali dahil first time na mangyayari sa Philippine sports na mayroong channel na make-carry ng (PBA) games sa China,” sabi ni Marcial.

“At the same time, magiging closer ang liga sa mga Pilipino na nasa China at yung mga Chinese naman, makikita rin yung brand ng basketball sa Pilipinas.”

Nabatid na ihihirit din ni Marcial na magkaroon ng official game ang PBA sa China.

Ito ang dahilan kaya’t inimbita rin niya si East Asia League CEO Matt Beyer na sumama sa miting sa China.

Si Beyer, isang American na based sa Beijing, ang nag-imbita sa PBA teams San Miguel, TnT Katropa at Blackwater sa Terrific 12 tournament sa Macau noong nakaraang taon.

Please follow and like us:
Read More

NICK ABANTO POSIBLENG MASUSPINDE

POSIBLENG masuspinde si Nick Abanto ng University of the East.

Ito ay kung mapatutunayan ng UAAP technical group na sinadya niya ang pananakit kay Will Navarro ng Ateneo sa laban nila noong Linggo kung saan nanalo ang Blue Eagles, 84-50.

Sinabi ni UAAP basketball commissioner Jensen Ilagan, nirerebyu pa nila ng technical group ang laro ng dalawang team, partikular ang tagpo kung saan sa pag-aagawan sa rebound ay tumama ang braso ni Abanto sa ulo ni Navarro na ikinatumba nito.

Dahil sa nangyari ay napilitan si Ateneo coach Tab Baldwin na i-subbed ang 22-anyos na si Navarro, 6:22 minuto sa first quarter.

Kinalaunan ay nagdesisyon ang PT ng Ateneo ng dalhin na sa ospital si Navarro na bagama’t “no sign of a concussion” base sa isinagawang CT scan, ay nananatiling under observation, ayon kay Blue Eagles team manager Epok Quimpo.

Ayon kay Ilagan, kung matiyak nila na sinadya ni Abanto ang nangyari kay Navarro, sususpindihin nila ang naturang Red Warriors player.

“Based on our guidelines, we can review the play. And if our findings is that the player did the action with intention to hurt, we can upgrade the non-call or make sanctions,” ani Ilagan.

Please follow and like us:
Read More

MAG-INGAT SA MENINGO (1)

meningococcemia-5

Meron ngunit di kailangang mag-panic

(Ni Nenet L. Villafania)

KINUMPIRMA ng Department of Health (DOH) na isang 53-anyos na babae ang namatay dahil sa meningococcemia sa isang hospital sa Tanauan City, Batangas noong huling linggo ng Setyembre.

Ayon kay DOH Calabarzon Director Eduardo Janairo, kumpirmado ito base sa mga test results ng Research Ins­titute for Tropical Medicine (RITM).

Ang mga sintomas na naranasan ng biktima ay mga pasa at galos sa katawan, pananakit ng ulo, at mataas na lagnat ang nagtulak sa mga awtoridad upang kumuha ng sample ng dugo ng babae upang mabatid kung pangkaraniwang trangkaso o sa mas malalang dengue. Gayunman, hindi ito agad binibigyan ng pansin ng mga nagkakasakit.

Hinihintay pa ng DOH ang resulta sa blood test ng tatlo pang hinihinalang kaso ng meningococcemia na nagresulta rin sa kanilang kamatayan noon ding isang buwan, kasama na ang isang taong batang isinugod sa emergency room ng Apacible Memorial District Hospital sa Nasugbu, isang dalawang taong batang lalaki na taga-Nasugbu rin at isang 46-anyos na babaing taga-San Jose, pawang sa Batangas.

Ngunit pinabulaanan ni Janairo na may outbreak ng meningococcemia sa Batangas dahil may tatlong kaso pang hindi beripikado, at hindi rin ito naka-concentrate sa iisang bayan. Gayunman, binalaan niya ang madla na maging mapagmatyag, ngunit huwag din naman umanong magpa-panic.

Base sa tala ng DOH, abot na sa 130 ang mga kaso ng Meningococcemia sa bansa mula Enero 1 hanggang Hun­yo, 2019 – kung saan karamihan sa kaso (18%) ay sa NCR at Region IV-A o CALABARZON (16%).

May animnaputwalo (68) na rin ang namamatay.

Noong 2018, 17 ang kaso nito sa CALABARZON kung saan 9 ang namatay. Naging 21 ang kaso dito nitong  Hun­yo at 11 naman ang namatay.

Paalala ni Janairo, “U­nang-una, huwag magpapanic. Napakaimportante pa-check up kaagad, humingi ka ng prophylaxis sa isang epidemiologist o mga doctor at may mga gamot naman sa kahit bata na para ibigay na prophylaxis ‘yung proteksyon, para hindi siya magkaroon ng meningo”.

Sa Nasugbu, pinitisyon ng mga mamamayang pansamantalang isara at ipa-qua­rantine ang Nasugbu Doctors Hospital at Apacible Memorial District Hospital matapos malamang dito itinakbo ang tatlong pasyenteng hinihi­na­lang namatay dahil sa meningo­coccemia.

Nakiusap naman si Na­sug­bu Mayor Antonio Barcelon na huwag mag-panic ang mga tao upang hindi lumala ang sitwasyon.

“Hindi airborne ang meningococcemia,” ani Barcelon. “Hindi ito makakahawa kung hindi ka masyadong malapit sa may sakit.”

Gayunman, hindi pa rin naiwasang magkaubusan ng disposable face mask sa mga botika. Makikita ring karamihan sa mga lumalabas ng bahay, lalo na ang mga bata, ay nakasoot ng face mask bilang proteksyon. (May kasunod)

Please follow and like us:
Read More

P50-K KADA BANYAGA SA BI-NAIA

BAKBAKAN NATIN

MISTULANG karinderyang bukas ang ating bansa sa loob ng bente-kuwatro oras araw-araw para sa mga dayuhang gustong makapasok sa bansa.

Kaya, walang dapat ikagulat ang mamamayang Filipino kung bakit maraming dayuhan sa Pilipinas ngayong panahon ni Pa­ngulong Rodrigo Duterte.

Ngunit, nakapagtataka na maraming banyaga ang dumadayo at nakapapasok sa bansa sa pamamagitan ng Ninoy Aquino International Airport (NAIA) na sa kalaunan ay mababalita sa media na nahuli ng mga pulis dahil walang “wor­k­ing permit.”

Ang mga banyagang nadakip ay mga Intsik na nagtatrabaho bilang “sex workers,” empleyado sa mga kompanyang naghuhuthot ng pera sa ibang bansa, mga empleyado ng Philippine Offshore Gaming Operators (POGO), ng online gambling establishment, construction workers at marami pang iba.

Mayroon namang permit ang iba sa kanila.

Ngunit, marami sa kanila ang nahuhuli ng mga operatiba ng Philippine National Police (PNP) at National Bureau of Investigation (NBI) na pawang “turista” ang kategorya.

Noong Oktubre 15, paksa ng Bakbakin Natin! ang tungkol sa mga dayuhang nahuli ng National Capital Region Police Office (NCRPO).

Ang pinakahuling na­­da­­kip ng NCRPO sa pamumuno pa ni Major General Guillermo Lorenzo Eleazar, ilang araw bago siya italagang pinakamataas na opisyal ng PNP, ay 512 mga dayuhan sa isang kompanya sa lungsod ng Parañaque na nanghuhuthot ng salapi sa mga tao sa ibang bansa na kanilang kinakausap.

Sabi ni Eleazar, ang 512 ay walang working permit.

Mahigit sa 400 na nasakote ay mga Intsik.

Ang titulo ng paksa ko noong Oktubre 15 ay: “Sinu-sino ang mga kumita sa pagpasok sa mga ilegal na dayuhan?”

Ang titulo ng kolum ko ay tungkol sa mga korap sa Bureau of Immigration (BI).

Ngunit, wala akong tinukoy na eksaktong opisyal at kawani ng BI, sapagkat hindi ko alam kung sinu-sino sa kanila ang kumikita mula sa mga dayuhan.

Ang alam ko, matagal nang umiiral ang katiwalian at korapsyon sa BI.

May kumontak sa akin na isang kaibigan na nag-aral noon sa Lyceum of the Philippines (LPU) at Philippine Christian University (PCU) kung saan idiniin at tiniyak niyang tumataginting na P50,000.00 ang ibinibigay ng bawat dayuhang pumapasok sa NAIA.

Ganito ang kanyang paha­yag: “Immigration Visa upon entry racket. P50k na lagay pasok ka na [sa Pilipinas].”

Kapag nagbigay ng P50,000 ang dayuhan, partikular na ang Intsik, siguradong walang maraming tanong.

Kaya, pasok na!, banggit ng aking kaibigan na dating aktibista.

Idiniin at tiniyak din niya na maraming kumikita sa NAIA-BI, sapagkat ang nakatoka sa “Visa Upon Entry” sa NAIA ay mga taga-Immigration.

“Open secret ‘yan,” tugon ng nagparating ng impormas­yon sa Bakbakin Natin!

Kung sisipatin at iisiping mabuti, ang P50,000 ‘padulas’ ang dahilan kung bakit mara­ming dayuhan na nagtatrabaho sa bansa na “turista” ang kalagayan.

Kung P50,000 kada banyaga, tumataginting na P25,600,000 ang kabuuang ibinigay ng 512 banyagang nadakip ng mga tauhan ni Eleazar sa mga korap sa NAIA-BI.

Isang kaso pa lang ito.

Hindi pa kasama iyong mga sex worker at mga kliyente nila na nahuli sa isang prostitution den sa Parañaque at tatlong prostitution den sa lungsod ng Makati.

Hindi ba’t napakalaking halaga kung totoong nagbigay ng P50,000 kada isa sa kanila sa mga korap sa NAIA-BI makapasok lang sa ating bansa nang walang kuskos-balungos?

Bilangin ninyo ang kabuuang bilang ng mga Intsik na nagtatrabaho sa industriya ng POGO at saka ninyo i-multiply sa P50,000.

Hindi ba’t napakalaking halaga, ngunit ang daming nagtatrabaho sa POGO service providers sa ilang panig sa bansa ang hindi nagbabayad ng tamang buwis. (BAKBAKAN NATIN / NELSON BADILLA)

Please follow and like us:
Read More

ISANG KISAP MATA ANG BUHAY

NIPIS

MALUNGKOT na Lu­nes ang sumalubong sa mga opisyales at miyem­bro ng National Press Club at Remate, Ang Dyaryo ng Masa, kaugnay sa pamamaslang sa kolumnistang si Jupiter Gonzales, alyas “Spider” at kasama nitong si Christopher Tiongson sa Arayat, Pampanga.

Ang buhay nga talaga ay isang kisapmata. Hindi mo aakalain na ang taong kasama mo lang nang Linggo ng umaga sa isinagawang clean up drive sa Navotas City Centennial Park and Bay at feeding program ay pinaslang nang gabi sa Pampanga.

Ang masaklap, manga­ngapa na naman sa motibo nang pamamaslang ang Presidential Task Force on Media Security na pina­ngungunahan ni Undersecretary Jose Sy-Egco at maging ang NPC, sa pa­ngunguna ni President Lakay Gonzalo, na naunang kumondena sa pamamas­lang.

Ilang buhay na rin ng mga mamamahayag ang inutang ng mga hindi kilalang salarin na ang motibo ay siguradong pawang pansarili at hanggang ngayon ay hindi pa nabibigyang katarungan. Dasal natin na sana’y ma­lutas ang kaso ni Jupiter Gonzales at mabigyang katarungan ang kanyang pagkamatay.

Sa isang buwan naman, sasapit na ang ika-10 taong paggunita  sa walang awang pamamas­lang sa 58 katao kabilang ang 32 miyembro ng media sa Maguindanao. Nobyembre 23, 2009 nang paslangin ng may 100 katao kabilang ang ilang miyembro ng Philippine National Police at private armies ng pamilya Ampatuan ang mga taong nakasuporta sa noo’y vice Mayor na si Esmael Mangudadatu na pinangunahan naman ng asawa ng huli na si Genalyn.

Bilang isang mamamahayag, dalangin natin na nawa’y magkaroon ng liwanag sa mga kaso ng mga mamamahayag na pinaslang.

Isang pakikiramay sa pamilya ni Jupiter.

Dumako naman tayo sa magandang balita para sa mga mamamayan ng  Caloocan at Malabon Cities dahil kabilang ang dalawang nasabing lungsod sa 2019 Seal of Good Local Governance awardees sa National Capital Region.

Malaki ang pasasalamat ni Mayor Len Oreta dahil ikatlong taon na nila itong 2019 bilang awardee sa SGLG ng Department of Interior and Local Go­vernment na nagpapatunay na maayos ang kanyang pamamalakad sa kanyang lungsod.

Samantala, gayundin ang Caloocal City sa ilalim ni Mayor Oscar Malapitan na kabilang din sa tatanggap ng pagkilala at parangal mula sa DILG.

Samantala, talagang napakasuwerte nitong Caloocan City sa pamumuno ni Malapitan sapagkat ang dating kulelat na lungsod ngayon ay nagsisimulang bumangon at maki­lala bilang isa sa pinakamayamang lungsod sa buong bansa.

Sa inilabas na financial report ng Commission on Audit, pumalo ang Caloocan sa ika-7 puwesto bilang pinakama­yamang bayan sa Pilipinas kung annual income nitong 2018 ang pag-uusapan na umabot sa P18.31 bilyon kumpara sa P17.01 bilyon noong 2017.

Gayunman, nangunguna pa rin ang Makati City sa usapin ng mataas na koleksyon sa annual income kung saan nakapagtala ito ng P230.833 bilyon na pinangalawahan naman ng Lungsod ng Quezon na nakapagtala ng P87.285 bilyon.

Sanay tuloy-tuloy ang gagawing pagpapaunlad ni Mayor Malapitan sa Caloocan City sapagkat hindi lang naman para sa kanya ang pagbabagong nagaganap sa lungsod subalit mas higit na makikinabang ang mga mamamayan at ang mga mamamayan sa susunod na henerasyon. (NIPIS / LEA BOTONES)

Please follow and like us:
Read More

CUTTING TRIP TALAMAK SA ANTIPOLO; MAYOR YNARES DEDMA

BOMBA KA DAY

IMPOSIBLENG hindi pa nakararating sa tanggapan ni Antipolo Mayor Andrea Ynares ang kawalanghiyaan ng maraming jeepney driver sa kanyang lungsod.

Matagal nang ginagawa ng mga jeepney driver dyan partikular ang mga may rutang Cubao-Antipolo vice versa ang trip-cutting. Kadalasan imbes na hanggang Cubao bumibiyahe lang sila hanggang Sta. Lucia-Ro­binson at Santolan LRT.

Katuwiran ng mga mokong na driver, lugi sila kung isasagad hanggang Cubao ang biyahe dahil kinakain ng matinding trapik ang kanilang oras kaya imbes makapitong balik ay minsan lima o kung minamalas-malas at talagang tumukod mula palang sa Masinag ang sikip ng trapik ay swerte nang makaapat sila.

May punto kung iisipin, dahil kailangan nga namang kumita ng mga tsuper dahil may mga pamilya rin silang sinusuportahan at karamihan naman ay nakikipasada lang.

Pero kung titingnan sa pangkalahatan, mas kawawa ang mga apektado sa kanilang kalokohan. Unang-una na riyan ang mga estudyanteng pumapasok sa mga unibersidad at kolehiyo sa lungsod ng Quezon at Maynila.

Dahil tigil ang biyahe ng LRT sa Santolan station hanggang Cubao, kalbaryo ang kalagayan ng mga estudyanteng Antipoleño. Kung papasyalan lang ni Mayor Andeng ang mga terminal tuwing umaga, mula alas-5 hanggang alas-8:00 ay tiyak mahahabag siya sa mga pumipila na daig pa ang pila sa blockbuster na pelikula sa haba.

At dahil nga pahabaan ang pila sa mga terminal, mapa-jeep man yan o UV express, marami ang nag-aabang na lang sa mga jeep na nagpa-’fire’ o yung mga hindi na pumipila sa terminal kundi pumipik-ap na lang sa daan.

Pero dito na nagsasamantala ang mga tsuper dahil bagaman ang nakatatak sa gilid ng jeep ay Antipolo-Cubao, madalas hanggang Masinag, Robinson o Santolan lang sila kaya ang pobreng mananakay ay susuong muli sa panibagong kalbaryo dahil kailangan na naman nilang makipag-unahan o makipaghabulan para muling makasakay.

Doble ang tama nito sa mga estudyante dahil bukod sa hirap silang makasakay muli ay mas napapamahal ang pamasahe nila sa putol-putol na biyahe.

Paano ang mahihirap na estudyante na saktong pamasahe lang ang ka­yang ibigay ng mga magulang o kung may sumobra man ay sapat lang para sa pagkain.

Sana aksyunan ni Mayor Andeng ang problemang ito tulad ng ginawa ni Mayor Isko sa Maynila.

Tama na po muna ang mga pa-zumba mayora, mas importante itong problema ng mga mananakay na Antipoleño. Paki-kastigo mo na ang mga abusadong tsuper na ‘yan para maram­daman naman na astig din pala ang Mrs. ni Junjun Ynares.

Speaking of Junjun Ynares, bakit siya pa rin ang nasa website ng City Government of Antipolo e hindi na siya ang mayor?

Pinasa na niya ang ‘korona’ kay misis kaya siya na dapat ang bida. (BOMBA KA DAY! / JO BARLIZO)

Please follow and like us:
Read More